رواية السمرة الفصل الرابع بقلم مريم اليوسف
رواية السمرة الفصل الرابع
البنات كلن عم يتطلعو ع المى وناطرين رد
المى : شبكن ليش هيك عم تطلعو فيني
مريم :شو رأيك
المى :لاء
____________________
عند الشباب
الكل قاعدين وعم يلعبو ع جوالاتن .. والاراكيل شغالة
معاذ قرب من شوكت وهمس
معاذ : بدي رقم شي طيرة
شوكت اتطلع فيه نظرة جانبية وقال :ليش
معاذ :نتسلى
شوكت :للأسف الطيرات كلن طارو 😏
معاذ :بيت السبع ما بيخلا من العضام
شوكت :وانت قلتا عضام ضال كم عضمة عم اتسلى فيهن
معاذ :عطيني عضمة اتسلى فيها انا
شوكت :معاذ حل عني ..
معاذ :بشرفك ولوو
شوكت :خلي شرفي عجنب وانقبر بعد عني
معاذ : بسيطة يا شوكت .. انا بفرجيك
شوكت ببرود : هه شوبدك تعمل ياحنون
معاذ :بتحب قول لمنار عن هداك الشهر لما جبت الحليب وطلع كلو محمض
شوكت :خراس لاتفضحني .. وبعدين شو دخلني اذا حمّض الحليب
معاذ :حمض لانك مانك منضف براميل الحليب منيح .. مع انو لما سألك منار قلتلو غسلتن منيح كتير .. بس اكيد من الجو لانو شوب
منار :انت واياه عشو عم تتهامسو
شوكت :لا لا مافي شي .. شغلة خاصة
اياس :خاصة من ايو نوع
شوكت :خلص خاصة ..
محمد :ههههه علينا وخاصة
شوكت همس بادن معاذ وقال :حلها معهن وبعطيك رقم وحدة
معاذ :شبكن شباب عم نقول خاصة .. يعني ضروري تفضحو الدنيا
منار :نفضح الدنيا ؟؟🙄🙄 شوفي ولااه .. انقبر احكي
معاذ :خلص شغلة خاصة
اياس :حتى ولو لازم نعرف .. ومزال حكيت لشوكت .. احكيلنا النا ولا بس بتوثق بشوكت
معاذ :والله مو هيك .. طيب خلص رح احكي
منار :اي يلا احكي
معاذ :كنت عم وصيه لشوكت يجبلي دوا من الصيدلية من عند ابن عمو
محمد فرط ضحك
معاذ :شايفين ليش مابدي احكي قدامكن
منار مو مستوعب لا هو ولا اياس ولا شوكت .. مافي غير محمد عم يضحك
منار :ليش انا شو فهمت هلأ
اياس :مظبوط مافهمنا شي
شوكت ماحكي بس ناطر يعرف شو القصة يلي عم يخترعها معاذ
معاذ :مزال محمد ضحك خليه يشرحلكن
منار رفسو برجلو لمحمد وقال :قوم اتضبضب حاج تتسهسك متل الشلكة واحكي شو فهمت لتضحك
محمد :ههههههه مافي شي بس حسيت في شي بضحك قلت بضحك
اياس :يعني نقوم نبتلى فيك اخر هالليل
محمد :هههههههه خلص .. خلص رح احكي ... معاذ الظاهر عندو مشكلة بالزواج .. فهمتو ؟
منار :كيف يعني
محمد :ههههههه اااخ ياربي معد اقدر .. معاذ اشرحلن انت انا معد اقدر
_______________________
عند البنات
مريم :خلص بنات تركوها.. لا تضغطو عليها
غزل :تضربي شو حوبة يا المى .. حدا بصرلو يحكي مع منار وبقول لأ .. وكمان هو يلي عم يتنازل ويبعتلك ..
ديمة :لك والله مافيها شي .. كل العالم عم تحكي مع بعضا هالايام .. ليكي انا قبلت احكي مع اياس عادي
مريم :اسمعي المى .. والله منار منيح .. وبرأيي لاتضيعي هالفرصة من ايدك .. ومتل ماقالت ديمة .. كل العالم عم تحكي مع بعضا هالايام .. واذا خايفة من الحكي مع الشباب .. خافي عادي .. بس من منار لا تخافي .. لانو عندو عرض وشرف وبخاف عليهن .. وانتي اذا صار نصيب رح تصيري عرضو وشرفو
المى :خلصنا بنات حاج تزنو فوق راسي انا قلت لاء يعني لاء .. واذا عنجد حاببني بيت اهلي مفتوح وغير هيك ماعندي
غزل :خلصنا ولووو شيلونا منها ناقصنا معقدين
المى : هلأ صرت بنظرك معقدة
غزل :مابس هيك .. وجبانة وضعيفة شخصية
المى : لا ياستي ماني لا معقدة ولا ضعيغة شخصية .. ولحتى اثبتلك .. رح احكي مع منار لفرجيكي انو انا ماني معقدة ... مريم عطيني رقمو
مريم :صبايا طولو بالكن ما مستاهلة ...وكمان انا بطلت اعطيكي اياه .. اذا بس مشان تثبتيلنا انك ماني معقدة
المى : لا مامشان هيك بدي الرقم .. انا بدي اياه لانو الشغلة مادخلها بالتعقيد بس .. انا ماحابة حدا يفرض علي شي .. وهلأ صار بدي احكي مع منار بكامل ارادتي
مريم :خلص روقو هلأ
المى :عطيني الرقم
مريم : انسي الرقم هلأ
المى :عم قلك عطيني الرقم شوبدك انتي ..
ديمة :خلص مريم عطيها الرقم
مريم : بس..
المى : اذا مابدك تعطيني اياه بلا .. انا بجيبو لحالي .. بس رح خبرو لمنار انك رفضتي تعطيني رقمو
مريم : لا دخيلك لا تعلقيني معو .. خدي هاد رقمو .. وتسطفلي منك الو
______________________
عند الشباب
منار :الله لايعطيك العافية .. فضحتنا ولاااه
معاذ :وليش لحتى افضحك
منار :مزالك مانك قد الزواج ليش لتقبر تتزوج
معاذ :قدو والله قدوو
منار :لكن لأشلك بالضراب السخن
معاذ :انو مقويات منيحة
منار :😒😒😒😒
اياس :تضربو انتو وهالسوالف .. انا قايم روح ع البيت نعست
منار :بكير ولاااه
اياس :بصراحة ناطر شغلة ..
منار :شغلة شو
اياس :ببعتلك اياها واتس
معاذ : كمان انتو عندكن اسرار الظاهر
منار : اي مادخلك
اياس :تصبحو
منار :وانت
شوكت :اي معاذ .. رح اعطيك رقمو وانت بتحكي معو وبتشرحلو ماشي ياحنون
معاذ :ماشي .. هات الرقم
شوكت :رح ابعتلك اياه مسج
بعتلو بالمسج رقم سمرا وكتبلو هي هون عنا بالضيعة طلبك بالظبط وكمان متزوجة يعني مارح تنق عليك مشان تتزوجا
قرأ معاذ الرسالة وابتسم وردلو بمسج :ياعيني عليك
___________________
الصبح بكير الساعة خمسة
دخل عمار على غرفة بنتو المى يلي غرقانة بنومها .. وقرب منها وصار يصحيها
عمار :بابا .. المى .. بابا
فتحت عيونا المى بنعس وقالت :اي بابا
عمار :حبيبتي مابدك تروحي ع بيت جدك
المى :بابا كتير نعسانة تركني نايمة
غمضت عيونا لتكمل نومتها
عمار :يابابا .. اذا ما رحتي هلأ مارح يصرلي اخدك بهالاسبوع
المى :بابا والله ميتة نعس .. خلص مامشكلة لغير مرة
عمار : هلأ لتصحصحي بتصيري تقولي ليش ما فيقتني واخدتني
تجلست وهية عم تتاوب وعم تأفأف :خلص قايمة انطرني
عمار زعل عليها وقلا :حبيبتي رجعي كفي نومتك وانا بتصل بخالك ادهم يجي ياخدك ع الضهر
المى :عنجد بابا 😍
عمار :عنجد ياروحو لبابا .. يلا هاتي بوسة ورجعي كفي نومتك
ضمتو لابوها من رقبتو باستو على خدو ورجعت نامت
______________________
بلشت تعلى الشمس لتستقر فوق الجبال وعم تنشر اشعتها الدافية بكل مكان لتتغلغل عبر الشبابيك وتدغدغ عيون النايمين
والناس بلشت تطلع على شغلها
فاقت المى عم تتاوب.. رفعت الغطا عنها وقامت
لقت مسج من مريم : شو ما حكيتي معو
المى شعور غريب داخل جوفها ومالو تفسير غير انها خايفة
ردت عليها مو فاضية لارجع من بيت جدي
مريم :ليش رحتي
المى : لا رح قوم جهز حالي وخالي ادهم جاي ياخدني
مريم :اممم
نطرت شوي بركي مريم لسه بدا تبعت شي بس مابعتت
قامت جهزت حالا لتنطر خالها
مافي شوي الا وعم يندق الباب .. حملت شنطتها يلي ضبتها وطلعت
لقت سمرا واقفة مع ادهم
سمرا :ليش ما عم تبينو جيب الحجة وتعالو
ادهم بتجاهل : ان شاء الله .. ان شاء الله
طلعت المى من جوا : اهلين خالي
ادهم :هلا بالخال .. شو جاهزة الاميرة
المى : على فكرة صار عمري ١٨
ادهم : يعني اذا ١٨ ما بنقلك اميرة
المى :انو عاملني متل صبية
ادهم : طيب المرة الجاي هلق تعي .. عندي شغل
المى :باي خالتي
طلعت وسكرت الباب ومشت مع خالها
المى :عندك شغل ؟ يعني بفهم انو رح توصلني وتروح
ادهم :المسا بسهر معكن .. اطمني مارح تضوجي خالك فؤاد وقرودو رح يسلوكي كتيير ههه
المى :عسلامتن اصلا
ركبو بالسيارة وقال :دخيلو الاصلا
_______________________
بالمعمل
دخل منار وصار يدور بعيونو على اياس .. لحتى لمحو داخل ع المكتب .. وراح لعندو
فتح الباب وكان اياس منحني على الطاولة وعم يسجل شي
اياس بدون مايرفع راسو :شو صار معك جايين المعمرجية اليوم
منار :اي حكيت معن وجايين بعد شوي .
اياس :تمام
منار :امممم ... خلص الشغل ؟
اياس :شوي وبخلصو .. ليش ناوي تاخدي حمل
منار :لا لا ..
اياس سكر الدفتر وقال:تمام ..
وطلع لبرا المكتب
بس منار فورا لحقو
منار :اياس حكتلك شي مريم
اياس :امم .. وانا عم قول شبك حايص ... تاريك ماخد الموضوع جد
منار :طبعا جد .. ليش انتو ماخدو مزح يعني
اياس :لا بس انو ماصار شي .. لاحق لحتى جن 😅
منار :المهم قالت شي
اياس :بالنسبة الي عطتني رقم ديمة وقال انا اللي احكي معها لانو بتخجل .. فانا ناطر لخلص شغل وبحكي معا على رواق
منار :والمى
اياس :قال اخدت رقمك وقال هية بتبقى بتحكي معك
منار :يعني رح تحكي ولا لأ
اياس :والله مابعرف
منار :انت واختك ما استفدت منكن بشي
رن موبايل منار
سحبو من جيبتو وكان رقم غريب
اياس : مين
منار :رقم
اياس :معقول هية ؟
منار :معقول ؟؟
اياس :اي رد رد بسرعة .. وعم تقلي ما استفدت منا بشي
منار :انقلع من وجهي هلق
اياس :هههه بلشت تجن
لف ضهرو ومشي ومنار كمان طلع لبرات المعمل
صفن بالشاشة وملامحو مو ملامح فرح .. في شي ناقزو
منار :معقول بهل السرعة دقت .. ع القليلة اتقل حالا... صح كنت ملهوف .. بس هيك بينت كتير خفيفة .. وبركي ماهية ..
فتح التلفون ورد
منار :الو
صوت انوثي :مرحبا
منار :اهلا مين
صوت :معجبة
منار : اي اهلين يا معجبة .. بس مين انت (وبقلبو معقول هية .. بكون مين غيرا )
: حابب تعرف مين انا
(بقلبو :ماهاد صوتا .. معقول ع التلفون تغير ؟)
منار :والله ياريت
:لكن ناطرتك بعد ساعة ببستان عبد المولى .. عند شجرة الجوز الكبيرة .. باااي
سكرت وهو مصدوم
منار :معقول بهالجرأة والوقاحة .. ماصدقت اطلب احكي معا لتنجلق هالجلقة ... بس لازم روح شوف واتأكد بعيوني.. واذا عنجد هية هيك رح اقطعلا كرت ناقصني انا .. واذا حلوة بس مبين انو بلا عقل .. الله يثبت علينا العقل والدين
__________________
ببيت معاذ ...
فاقت شهد مالقت معاذ جنبها وقامت تدور عليه .. لقتو قاعد بالصالون وعم يلعب بموبايلو
شهد :ايو ساعة جيت مبارح
معاذ: ليش لتجي لحالك بالليل
شهد :لانو امك مابتنحمل
معاذ :خلص لعد تروحي لعندن
شهد :اي معد روح
معاذ :روحي اعمليلنا شي نشربو
شهد: شي تشربو ولا فطور
معاذ : لا شي نشربو
مشت ع المطبخ وهية مستغربة من برودو معها.. هلق هو طبيعي بس هية عروس وين كلام الغزل والدلع
رجعت بخطواتا لباب المطبخ ووقفت تطلع عليه لقتو منسجم بالموبايل
شهد :قهوة ولا متة ؟
مارد او ما انتبه
قربت بخطوات هادئة وقفت وراه وهو مو حاسس عليها ابدا .. شافتو ملتهي عم يحكي مع حدا اتطلعت ع الاسم مكتوب ابو سمرا
:مين عاطيك رقمي
معاذ :كتب : شوكت
:اممم .. وخير شوبدك
معاذ :قلي شوكت انو عندكن عسل كتير طيب
:ليش خلص العسل يلي عندك عحد علمي ماصرلك يومين متزوج
معاذ :طلعت قليل خبرة وبدي تعلميني
شهد شافت كلمة (تعلميني )وعرفت انها وحدة جمدت مكانها معد عرفت شو تنطق او شو تحكي .. بس سيطرت على حالها لتشوف وين بدو يوصل
معاذ :شو قلتي
:بشو
معاذ :بالدورس الخصوصي😉
:هههههههههههههه
معاذ : شو بفهم من هالضحكة
:طلبك مو عندي.. روح خليك جنب عروستك ومابدك كل هالحكي ...ماحلك تمل منها او تملو من بعض .. مابعرف كيف بدي اشرحلك اياها بس فهمت علي .. انتو عرسااان
معاذ :بس انا مابحبا
: هه لكن بتحبني
معاذ : مابتعرفي يمكن حبك
سمرا :حب مرتك
معاذ :لك بنت عمي وربيانين سوا بحسها متل اختي .. اصلا في قاعدة هية انو الحب والزواج مابيجتمعو
سمرا :امم يعني انت بتحبني لانو ماني مرتك
معاذ : هيك شي
سمرا :خلص روح من خلقتي هلق
معاذ :قبل ماروح قوليلي
سمرا :انت بتعرفيني
معاذ :كيف مابعرفك .. اذا كل رجال الضيعة مافي على لسانن غير نيالك يا ابو بشار على هيك مرة .. طيرتي عقول الشباب
(هو عم يحكيها هيك لانو عرف انها بتتأثر بهاد الحكي ومفكرة حالها ملكة جمال والكل راكض وراها .. وهو بالاصل يمكن لامحها مرة )
سمرا :طيب بنحكي بعدين هلق مشغولة
معاذ :ناطرك على نار 🔥🔥
سكر الموبايل وحطو جنبو وضحك ضحكة ثقة .. انو قدر يضحك عليها لحتى حس انو في انفاس مرتجفة وراه .. التفت وشافها واقفة ومبينة الصدمة الكبيرة على وجها ودموعها يلي مغطية وجها
معاذ :ش.ش.شهددد
تركتو وراحت تركض على غرفتها .. قام فورا لحقها بس لقى الباب مسكر ومقفول
معاذ :شهد... افتحي باب... يا شهدد ... افتحي ورح اشرحلك كلشي
شهد من جوا بصوتها الباكي :شوو بدك تشرحلي .. شفت كلشي بعيني ... لك كسرتني وصدمتني وانا لساتني عروس ... شو خليت لبعدين روح الله لا يسامحك
معاذ :القصة مو متل ماشفتيها
شهد :لا تبرر ولا تحكي كلوو كان واضح ... والله معد اقعدلك دقيقة بهالبيت ... مزال مابتحبني ومتل اختك ليش لتتزوجني .. لييش
معاذ :والله بحبك ... والله بحبك ... بس افتحي خليني اشرحلك
شهد :رح افتحلك بس لخلص واطلع من هالبيت نهائيا .. يا خاين
معاذ :من هالبيت مالك طلعة
شهد :بنشووف
معاذ: اذا طلعتي مالك رجعة
شهد :ومين قلك بدي ارجع .. ميين
معاذ:مارح اسمحلك تطلعي
شهد :بنشووف ..
لساتو عم يدق ويبرر وهية معد ردت عليه .. كانت عم تضب شنطتها وبعتت رسالة لابوها واخواتها يجو فورا لامر ضروري
___________________
بسيارة ادهم
ادهم :كيفا معك خالتك
المى :منيحة
ادهم :عم تزعجك شي
المى :لا والله حرام المخلوقة مافي منها
ادهم :عكل حال انتبهي منها
المى :خير في شي
ادهم :هالمخلوقة مو ظابطة
المى :كيف يعني
ادهم :خلص لاتفكري ..
المى :عنجد خالي .. شوفي .. او شو شفت منها
ادهم :ماشفت منها شي ... بس انا بعرف الشخص من عيونو مارق على راسي كتير
المى :وشو شفت منها
ادهم :ولا شي.. بس اذا نهار حسيتي شي غريب حكيني وخبريني
المى :مع انو مافهمت عليك شي بس ماشي
ادهم :معك معك بتفهمي
هزت راسا وضلت صافنة بالطريق
اتطلع عليها نظرة ورجع انتبه لطريقو
ادهم :شو يلي شاغل بالك
ضحكت ضحكة وقالت :مابيمرق عليك شي
ادهم :من ايمت بتخبي عني
المى :هههه اصلا كنت رح احكيلك بس ليصير الوقت المناسب
ادهم :مافي انسب من هيك وقت احكي
المى :في شب من الضيعة بدو يحكي معي
ضل ساكت وماعلق
المى :شوو ؟
ادهم :اي كملي
المى :بس هيك
ادهم : وانت بدك تحكي معو ؟
المى :ليش حسيت انو الموضوع مافرق معك .. تخليت انك تعصب وتحذرني
ادهم :هههه عصب ؟؟ شو شايفتيني ابوكي ..لا ليش لعصب .. بالعكس كتير مبسوط منك انك عم تحكيلي اصغر التفاصيل
المى :بعمري ماخبيت عنك حتى لو تفصيل صغير
ادهم : برجع بسألك بدك تحكي معو
المى :يعني اذا حكيت عادي ؟
ادهم : بالاول انت بتحبيه
المى :لا شفتو مرة او مرتين
ادهم :هو شوبدو
المى:قال عجبتو وبدو يحكي معي واذا اتفقنا رح يبعت اهلو فورا يخطبوني .. هو ماعندو هالحركات قال
ادهم :يخطبك ؟؟ ليش مانك ناوية تكملي
المى :اي طبعا .. بس انو عم احكيلك انو اول مرة بحياتي بنحط بهالموقف
ادهم :هههه .. اي مين هو الشب
المى :قلتلك من الضيعة .. ابن مين مابعرف لانو مابعرف حدا بالضيعة 😅
ادهم : شو بيشتغل
المى :هو ورفقاتو عاملين معمل حليب
ادهم :شو كان اسمو الشب ؟
المى :منار
ادهم :اممم
المى :بتعرفو ؟
ادهم :شفتو ع التلفزيون ؟
المى :عنجد .. ايمت
ادهم :من يومين .. كان طالع بمشاريع الشباب .. كنت عم قلب بس لفت انتباهي اسم ضيعتكن فوقفت القناة وشفتو .. شب متعلم ومثقف وشغيل ومبين عنو محترم
المى :بهالخمس دقايق يلي طلعن ع الشاشة حللت شخصيتو
ادهم بثقة :ماقلتلك عندي نظرة
المى :طيب شو رأيك
ادهم :انا مادخلني .. انت بدك تحكي معو
المى :مابعرف .. بس رفقاتي صارو يقولو معقدة ومن هالحكي فأنا اخدت رقمو ويمكن هو هلق ناطر مني ابعتلو
ادهم :شوبدك بكل هالحكي انت بدك تحكي معو ؟
المى :لأ
ادهم :اي خلصنا .. محدا بيقدر يجبرك على شي انت مابدك اياه
المى :بس هو بكون ناطر ماهيك... ماني حابة خجلو
ادهم : طيب خالو ليش مابتحكي وبتجربي ... لازم الواحد يجرب ويندعك بالحياة
المى :خلص رح فكر
ادهم :المهم اذا حكيتو كلشي يكون ضمن الحدود .. وانا بدي اعرف اصغر التفاصيل
المى :طبعا
ادهم :وبالنهاية مانك خسرانة شي كلو حكي بحكي .. ويمكن عنجد هالشب يكون رايدك .. مافي شي ياخالي جربي
المى :وبابا ؟
ادهم :هههه كلشي الا ابوكي
المى :هههههه
_______________________
قاعدين الشباب بالمكتب يلي داخل المعمل .. واياس معو ورقة وقلم عم يحسب رفع قلمو وصفن فيها شوي ... وحطها على الطاولة قدام الشباب
اياس :هي تكاليف التوسيع
اخدها منار القى عليها نظرة ورجعها ومحمد وشوكت نفس الشي
شوكت :كأنو معلم هالعمار مغلي علينا
اياس :هي اسعار هالايام .. كلو طالع طلوع..
منار :شو شباب .. جبنا معلم العمار شاف وخطط ونحنا علين ندفع هاد المبلغ شو قلتو
محمد :الاتكال ع الله انا موافق
شوكت :وانا كمان
منار :وانت اياس
اياس :معقول عم تسألني
منار :طبعا
اياس :معك للموت ابن خالتي
شوكت :ومعاذ ؟
منار: اليوم بنخبرو .. ومنو بناخد موعد نروح نباركلو .. شو جهزتو الهدايا
شوكت : دغري بيتجهزو ماتاكل هم
منار :هينة ... هينة
شوكت :اياس شو عندك هلق
اياس :ولا شي رايح ع البيت
شوكت :بدي احكي معك كلمتين
منار (بشك) : شوبدك من اياس
شوكت :عايزو
منار: ياصاحبي وبعرفك وانت ما بتعتاز بهالحياة غير النسوان ... مشان هيك اذا في شي عم يدور براسك بعد عننا
شوكت :بس انا مابدي منكن شي
منار :احكي ... نحنا اخوة مابنخبي شي عن حدا
محمد :بس انت واياس عم تخبو
منار :لصير شي جدي بنخبركن
شوكت :وانا موضوعي جدي
اياس :بحياتك ماكنت جدي .. جاي تسلبها علينا
شوكت :والله هالمرة غير
اياس :طيب مزال غير احكي
شوكت :غزل رفيقة اختو لاياس
محمد :هي يلي انفجت بعرس معاذ
شوكت :انفجت؟؟🙄
محمد :هههه ما هيك بقولو
منار :اايييي شوبدك منها
شوكت :بدي رقمها
اياس :ليش
شوكت :بدي اياها
اياس :انا واختي مادخلنا.. دبر حالك
شوكت : هلق هيك ياحنون
اياس :يعني نضحك عبعض.. بعمرك مارح تكون عاقل .. مشان هيك خلي بنات الناس بعيدة عنك
وقف بقهر وقال :ماشي ... شكررااا يا رفقاتي
تركن وطلع قام منار يلحقو
محمد :لك تركو يلي بيزعل لحالو بيرضى لحالو
منار :قد ماكان نحنا رفقة
اياس :معك حق .. بس شفت انت حكيو هلق اذا صار ماصار رح توقع الشغلة براس مريم وانا ماناقصني لسانا .. خليها تمشيلنا امورنا هلق 😉
منار :دخيلك انت وهالامور مبينة فاشلة من اولها
محمد :امور شو 🙂
منار واياس :مادخلك
منار :لك صحيي.. نسيت شغلة
اياس :شو هية
قام منار وطلع وهو عم يقول :بعدين بعدين
___________________
وصل للبستان وصار يمشي بين الشجر ويتلفت حوليه .. لحتى لمح وحدة واقفة وعطيتو ضهرا .. صار يقرب بخطوات بطيئة .. وصل لعندها وتنحنح
التفتت لتكون .......
_________________
ببيت معاذ في اهلو واهلها
مجتمعة بغرفة الضيوف وشهد قاعدة حد امها وعم تحكي وتبكي
شهد: اذا من هلق عم يعمل هيك شو خلا لبعدين ... اذا وانا عروس عم يخوني ولسه ماعندو ولا سبب يخون شو خلا لبعدين ... لا وطلع مابحبني ....مزال مابحبني ليش خطبتوني وجوزتوني اياه ... بس انا بعرف شبو .. عند عقدة نقص ومستحيل شي يعبيلك هالنقص وبدك تضل طول عمرك ناقص وفلتان
ابو شهد : قومي بابا قومي .. وانت يا معاذ تفه 💦 بنص شاربك
ابو معاذ : لحظة اخي كلشي والو حل
ابو شهد :حل شوو اااه ... شوف ابنك وربيه من اول جديد وعلمو كيف يصون عرضو وشرفو .. هاد انسب حل فيكن تعملوه
ابو معاذ :تفضل معاذ احكي شي كلمة ولا هلق القط اكل لسانك
معاذ منزل راسو وقال :والله غلطان ومابقا عيدا .. بوعدك شهد انو هالشي مارح يتكرر
شهد:مستحيل صدقك
معاذ :طيب جربيني وشوفي
شهد :مابصير ما نحنا متل الاخوات
معاذ :لك كلشي شفتيه والله كذذب
شهد :مابهمني ... هلق طلقني وخليني روح مع اهلي
معاذ:مارح طلق
ابو شهد :غصب عنك
ابو معاذ :اخي طولو بالك والله ماهيك بتنحل الامور
ابوشهد :كيف بتنحل بالله
ابو معاذ :شوبدن يحكو العالم اذا عرفو انو شهد اتطلقت ورجعت عبيت اهلها بعد يومين من عرسا
شهد :مابهمني
ابو معاذ :كيف مابهمك ياعمي... حلوة الناس تجيب سيرتك بالعاطل .. والله لسانات الناس مابترحم
شهد :بس انا مستحيل ابقى عند هالبني ادم
او معاذ :بتضلي عنا معززة مكرمة لحتى الله يفرجها
شهد :بدي الطلاق عمي بدي الطلاق
ابو معاذ :طيب الطلاق الطلاق .. بس مو فورا .. بتضلي ببيتي كم شهر وبعدا يلي بدك اياه بصير وتكرم عينك
ابو شهد :حكي عمك يابنتي فيه وجهة نظرة .. حكي الناس مابيرحم
شهد عم تبكي ع الصامت
ابو معاذ :قومي بنتي ضبي غراضك لتروحي معي
هزت راسها بحزن وقامت.. ولما طلعت وقف ابو شهد ومسك معاذ من رقبتو
ابو شهد : اسماااع ولاااه ... انا بنتي خط احمر .. واحمد ربك انك جوزا ولا والله ماكنت رحمتك ... انا ماعندي بنات للطلاق بتحاول تصلح الامور بينك وبينا باي طريقة ... انا كنت عم سايرها بس مستحيل طلقها مشان ماتقول ابي ماوقف معي ... بس عيدها يا معاذ وشوف شو رح يصير فيك مارح طلقها لأ ... رح رملها
معاذ :امرك عمي كلامك على راسي من فوق .. والله غلطة ومعد عيدا
تركو وقال :بنشوف
مشي وقال :السلام عليكم
ابو معاذ :حكي عمك حطو حلقة بادنك ... واسمع مني هالكلمتين ... مرتك رح تسكن عنا انت ممنوع تزعجا بتاكل وبتجي بتنقبر بتندفس ببيتك ومن بكرا بترجع على شغلك
معاذ :حاضر ... وغيرو
زورو وقال :سلامتك . تركو وطلع وقال :شو صار معك عمي ماجهزتي
__________________
سمرا :ماعرفتني
منار :باستغراب : مفروض اعرفك ؟؟؟
سمرا :انا سمرا
منار :ايييه ... والله لو بعرف انو هي انتي فلا بخطي
سمرا :له له .. معقول ماعجبتك
منار بأشمئزاز : مفكرة حالك حلوة يعني ؟؟ حتى لو حلوة مبين الوسخ كيف عم يزرزب منك .. والوسخ والزبالة مابتحوم حوليها الا الدبان
كانت حاطة على كتافها شال ..رمتو بالارض لتبين مفاتنها وصارت تقترب من منار بخطوات مائلة ... لفت ورا ضهرو وحكت بهمس :كلكن بالاول هيك بتتعففو وبترمو حكي شروي غروي وعأساس انتو شريفين مكة بالاخير بترجعو لعند هي الصرماية
منار ثابت مكانو وعم يلحقا بعيونو :شوبدك مني
سمرا :هيهييي.. بلشت تفهم
رفعت ايدا بدا تلمس خدو بس هو رجع خطوة لورا قبل ايدا ماتلمس خدو
سكرت ايدا بالهوا نزلتا وقالت :بدي اياك ... عندك كريزما خاصة جننتني ... مستعدة اعمل يلي بدك اياه المهم انت قول اي... وبعنادك هاد عم تدبحني
منار :سبحان الله عقد مابكره وبقرف من هي النمازج ... عقد مابضلو بطريقي ... روحي عبيتكن والله يستر عليكي
لف ضهرو ومشي
سمرا :منار رح تندم
ضل مطنشها وكمل طريقو
______________________
المسا
مجتمعين الشباب .. قاعد منار وصافن
طلع اياس من المطبخ وحامل اركيلتو ... حطها بالارض والنبريج بتمو وارتكى عجنب فتح موبايلو .. فتح ع اسم ديمة وبعت مساء الخير
محمد قاعد بس لاحظ على منار مانو على بعضو
محمد :منار شبك
منار :مابعرف
ترك اياس الموبايل :وقال شبك شو صاير معك
منار بملل وتعابير وجهو يلي بتوحي لهالشي : والله مابعرف حاسس حالي مخنوق .. مالي نفس لشي
اياس :من شو صار شي معك اليوم خلاك تنزعج
منار اتذكر موفقو مع سمرا بس ماحس انو هالامر ما عناه ولا أضايق مشانو
منار :لا لا
اياس :شكلك تعبان قوم نام وارتاح
منار وهو هيك
قام وقال :تصبحو على خير
اياس ومحمد: وانت بخير
منار كان طالع وشوكت داخل
شوكت :ع وين
منار :ع البيت سلام
تركو وراح
دخل شوكت وهو عم يتطلع لوراه على منار
شوكت :شبو منار
اياس :علمنا علمك ؟
محمد :انا بعرف شبو
اياس :شبو
محمد :عشقان
اياس :لا ولوو ..
محمد :بكرا شوف وعلم على كلامي
اياس بقبلو :معقول حابب المى ... بس هو لسه ماحكي معها وماشافها غير مرة او مرتين
رجع راسو واجت عينو بعين محمد
محمد :عشقان عشقان
ضل صافن شوي لحتى صحي من شرودو ع صوت الموبايل
ديمة :مسالنور
اياس :انا اياس
ديمة :عرفت
اياس :كيفك
ديمة :الحمد لله .. انت كيفك
اياس:مشتقلك
صمت لدقاىق وقرر اياس يفتح موضوع
اياس :شو حكتلك مريم عني بالظبط
ديمة :كل خير
اياس :😅😅 وانت بتصدقي
ديمة :مريم عنا حكيها ثقة
اياس :اممم .. هاتي لشوف احكيلي شو حكتلك
ديمة :انك شب محترم ومافي منك وانو قلبك طيب
اياس :والله مادحتني منيح قدامك لكن
ديمة :انت مابدك مين يمدحك . الكل بيشهد فيك وبأخلاقك وبأصلك
اياس : وماقالتلك انو معجب فيكي
ديمة :ههههههه
ديمة : لو ما معجب فيني بتحكي معي ؟
اياس : بصراحة لا
اياس :هاتي احكيلي عنك خلينا نتعرف اكتر ونفوت بالجو
_____________________
ومرقت هي الليلة بسلام خارجي اما داخلي فكل شخص نام وهو على حالة شكل .. منها المبسوط ومنها الحيران ومنها المدايق ومنها يلي عم يفكر ويخطط ومنها الزعلان
__________________
الصبح ببيت معاذ
فاق ببيتو وكان لحالو .. كان وضعو بينشفق عليه .. ومبين انو مانو نايم طول الليل
رن موبايلو اخدو من جنب تختو ورد
معاذ :اهلين ماما
ام معاذ :حبيبي تعال افطر مشان تروح عشغلك
معاذ :صحة .. ماني جوعان وعشان شغلي عم البس قايم روح
ام معاذ :بس ياماما
معاذ :ماما هلق بتأخر سلام
_____________________
ببيت اهل معاذ
دقت الباب الاء ودخلت على غرفة شهد
الاء :قومي افطري
شهد :ماني جوعانة
الاء:بس ما اكلتي شي من مبارح
شهد : حتى جوع باكل ماتاكلو همي
الاء :بس
تمددت عتختها وضمت مخدتها وصارت تبكي وقالت :بترجاكي تركيني بحالي
تركتها وطلعت .. لقت امها بوجهها
ام معاذ :شو مارضت تقوم تاكل
الاء :لأ .. صح مابحبها بس والله زعلانة عليها
ام معاذ ماعلقت .. تركتها ومشت وكأنو بتوافق بنتها بنفس الرأي
___________________
وعند ديمة فاقت نشيطة والابتسامة على وجهها .. فتحت تلفونها وبعتت مسج لاياس :صباح الخير .. موفق بشغلك يارب
___________________
بالمدينة ببيت جدها لالمى
حست عحدا عم يلعب بشعراتها فتحت عيونها ولقت بوجهها ادهم بتايبو العسكرية
تجلست وقالت :صباح الخير
ادهم :صباح النور يلا قومي ولا مانك مشتاقة نطلع انا واياكي مشوار
المى :كيف ماني مشتاقة .. يلا
ادهم :لكن انا رح غسل وغير تيابي
المى :هلق جيت مو هيك
ادهم :اي والله
المى :مابدك ترتاح
ادهم :اممم .. رح نام شي ساعة بس بالاول بدي فطور مرتب من تحت ايديكي
المى : تكرم عيونك ..
ادهم :لكن يلا احركي .. ستك بالمطبخ بلشت فيه
المى :حبيبتي يا ستي .. يلا قايمة رفعت الغطا وقامت لتروح تساعد ستها بتحضير الفطور
ادهم :المى
المى : اي خالي
ادهم :شو صار معك
المى :بشو
ادهم :بالشب
المى :لا لا .. مابدي احكي مع حدا
ادهم : ههههههه.
المى :بنحكي .. بنحكي
تركتو وطلعت وراحت ع المطبخ .. وكانت ستها عم تحضر الفطور ..راحت ضمتها وباستها على خدها .. وستها بادلتها نفس الحضن
ام عمر :الله لايحرمني من هالريحة
__________________
المعمل
فات منار من باب المعمل وشافو اياس ومشي لعندو
اياس: شو منار
منار :شو شو
اياس :في شي جاي بكير
منار :لا .. بس ما اجاني نوم لا بليل ولا الصبح قلت لاجي ساعدكن
اياس :وضعك مو عاجبني يا ولد
منار :ولد بعينك
اياس :بتعرف شو قال محمد
منار :هات لشوف شو قال الحكيم محمد
اياس :قال انك عشقان
منار :اي لااا
اياس :والله
منار :حل عني انت ومحمد ناقصني هبلكن
اياس : طيب شبك
منار :والله ماشبني شي .. وبعدين انا عشقان مين بدي اعشق .. انت اخوي وبتعرف عني كلشي
اياس :المى
منار :لا لاا انت جنيت .. البنت شفتا مرة او مرتين وحكي ماحكيت معا من وين لوين بدي حبا
اياس : بركي حب من اول نظرة ..
منار سكت
اياس :شبك ولوو العين بتعشق قبل القلب .. من النظرة الأولى خطفتلك قلبك البنت ولو مانها خارطة مشطك مابتطلب تحكي معها وانت ماعملتها من قبل
فجأة حس انو مزاجو تعدل
منار :وماحكت شو اعمل
اياس : طيب فكر شوي .. لما جبت سيرتها حسيت هية يلي ضاربتك مزاجك
صفن شوي بوجه رفيقو .. وبداخلو لما اتذكر انو بدو اياها وبدو يحكي معها حس انو انزعج وبنفس الوقت سيرتها خلت شي لطيف يلامس احاسيسو
منار :مابعرف .. روح من وجهي
اياس :هلق رح جبلك رقمها .. واحكي معها
منار :وبركي البنت مابدها
اياس :مو على كيفها
وهنن واقفين حسو انو حدا دخل من باب المعمل
التفتو ليشوفو معاذ
منار :هاه هي العريس نورنا واخيرا
قرب وقف جنبن وهو قالب وجهو
معاذ :صباح الخير
منار واياس :صباح النور
اياس :شبك
منار :انا افهمت عليه .. زعلان لانو ماباركنالك وجبنالك هدية .. خلص انت حددلنا موعد .. بصراحة كنا ناطرينك لتفضى
معاذ :مافي داعي
اياس :مافي داعي ؟؟
معاذ : خلص مافي شي
تركن ومشي بس منار وقفو بمسكة دراعو
منار :شبك
معاذ :انا واحد حيوان
منار :شوفي .. شو صاير
معاذ :تعو بالمكتب بنحكي وين محمد وشوكت
اياس :محمد هون وشوكت عم يلم الحليب
معاذ :لكن ليجو بحكي مشان ماعيد السالفة .. ومنو بتساعدوني
منار :مشكلتك عويصة
معاذ :قد ماتقول
منار :طيب تعال لفوق نشرب شي بكون اجا شوكت
معاذ : جيت
___________________
ببيت سمرا
كعادتها قاعد ع الموبايل
المحادثة :
هلال :شو سمورة
سمرا :شو شو
هلال :ما اشتقتي لهالبدر
سمرا :مصدق حالك كتير
هلال:اكتر ما بتتصوري
سمرا :روح هلق ماني رايقتلك
هلال :ليش ياروحي
سمرا :مابعرف مالي نفس على شي
هلال :اجي روقك
سمرا :خلي عنك
هلال :ليش في حدا بالبيت
سمرا :لا مافي حدا انا لحالي
هلال :وين الربع
سمرا :عمار مسافر والولاد عم يحوشو مشمش مع بيت عمن
هلال :الامورة المى
سمرا :عند بيت جدا ... بعدين ليش عم تقول امورة
هلال :هالبنت عند زوجك حلووووة
سمرا بغيرة :هلال خليك بعد عنها
هلال :شو شايفتيني هاجم عليها
سمرا :شو ماكان .. المى لاتفكر فيها
هلال :مو انت يلي بتقلي بشو فكر وبشو مافكر
سمرا :شو يعني
هلال :هالبنت عاجبتني وعم فكر اخطبها .. وبظن عمار مايرفض بما اني ابن شريكو
سمرا :لا تحلم
هلال :شبك ولو سموور ... مشان صير قريب منك فتحي مخك
سمرا :يعني انت بدك تتزوجا مشاني
هلال :لكن مشانها ... ناقصني مراهقين انا .. بس مشان يكون الي حجة فوت واطلع وشوفك عطول قبالي ياقمر
سمرا : امممم
هلال :لكن مهديلي الطريق مشان انا فوت فوتي
سمرا :بشوف
هلال :لكن هلق تشااو .. وخبريني شو بصير معك
سكرت وقالت مصدق حالك والله هه... المهم هلق شوبدي سوي مع منار .. الواطي رفضني ... بس مايخبر شي حدا ... لا لا مابظن .. واذا صار ماصار بحطها بضهرو هو كان عم يتحركش فيني... بس لأ مابيحكي ...
__________________
وعند هلال
طالع من بيتو وعم يحكي مع حالو :مصدقة حالها سمرا خانم ... ليش يلي بيتطلع بألمى الو نفس يشوف خلقتك الوسخة تفه 💦
تف عجنبو وكمل عسيارتو
_____________________
بالمعمل
منار :الله لا يوفقك على هالعملة
معاذ :منار لاتزيدها علي
منار :لكن شوبدك مني قلك ولا يهمك ياصاحبي وطبطبلك
محمد :هههههههههه عحد علمي بدك دوا ... بس طلع بدك دوا ضد النسوان
معاذ :محمد خرااس .. ماناقص زناختك
اياس :محمد معو حق ...
منار :شو شوكت ليش مأنعم علينا بسكوتك
شوكت :مادخلني ..
منار :انت عطول خاربها وقاعد عتلتها
شوكت :وانا شووو دخلني .. شو هو ولد صغير ومابفكر ... قلي عطيني رقم عطيتو ما مشكلتي
منار :وانت مين ماقلك عطيني بتعطيني
شوكت :اي ... انا ماني مسؤول عن حدا كل واحد قد الحيط ومسؤول على قراراتو
معاذ :شباب شباب .. اهدو ...شوكت مادخلو .. الحق علي
منار :اي لا تدافع عنو اصلا محدا خارب سمعة هالشلة غير هو
شوكت :منار انتبه لكلااامك
منار :واذا ما انتبهت
اياس :يا شباب هدووو
شوكت :مااانك سامعو .. لسه كل مابتصير شغلة بتحطوها بضهر شوكت ... لاقو شماعة ترمو عليها مشاكلكن واتركو شوكت
ضرب الكرسي يلي قدامو وقام ليطلع بس فورا اياس مسكو
شوكت :اياس تركني
اياس :مارح اتركك لتتهدو وتتصالحو .. نحنا رفقات وشو ماكان صاير
شوكت :ماني مصالح حدا وكل هالرفقة معد بدي اياها
قام منار ووقف قدامو وقال خلص هديها
شوكت :تركوني
منار :حقك علي ... وانا بعتذر
شوكت ساكت
منار :شوو عم نقلك بنعتذر .. عطول بتطلع الفشة براسك
نتر شوكت ايد اياس وقال :ماشي
ورجعو قعدو اماكنن
معاذ :هلق لاقولي حل لمشكلتي
اياس :شوف حكيمنا (قصدو عمحمد)
محمد بابتسامة :بقول جدي .. المرة بنص عقل كلمة بتزعلا وكلمة بتراضيها ... يعني قد ماكانت زعلانة منك رح ترضى بالنهاية بس انت اثبتلا انو ندمان ومعد ترجع لهي الامور .. وضل حاول معها مشان ترضى وقد مافيك جبلا هدايا وورد وخصوصا الشوكلاتة .. قد مافيك كتر لواح شوكلاتة البنات بحبو الكتير الشوكلاتة
اياس :شو السر بالشكولا
محمد : لانو لوح بزعلها ولوح براضيها ههههههه
وقام يركض لبرا
الباقي صارو يتطلعو ببعض وفرطو من الضحك
معاذ :اذا مسكتك لفش نيعك يا كلب لكن انا لوح
منار :خلص المرة عشاني ههه لانو معو حق
معاذ :حتى انت ههههههه
____________________
المسا
انفتح الباب ودخلت المى وستها وخالها
وتلفون المى اول ما شبك ع الوايفي صار يوصلو مسجات
المى : الله يستر هاد اكيد ابي
ستها قعدت وعم تفك الشال عن راسها قالتلا قوليلو كنت عند خالك فؤاد
قعدت وشلحت جزدانها وطلعت منو موبايلها
فتحت الموبايل اتطلعت فيه وضلت ساكتة
ادهم :شو خالي
مدت موبايلها لادهم
اتطلع فيه وضحك ورجعلا اياه
ستها :شو مين
ادهم :ابوها ماما ..
تركن ودخل ع غرفتو
ستها :قومي ستي غيري تيابك وتعي نعمل عشا خفيف
المى : يلا
فاتت عغرفتها وفورا لحقها خالها
ادهم :بحب الحشرية بهيك امور
المى : هههههه
ادهم :شو صار معك
المى :ماصار شي
ادهم :مارديتي
المى :شوبدي رد اذا هو باعت مرحبا انا منار
ادهم :قوليلو اهلين وانا المى
المى :والله يلي بشوفك هيك مابقول انك ضابط بتزلز الفرع
ادهم :كلشي لحال
المى: صحي ادهم ليش ماتزوجت لهلق
ادهم :مالقيت صاحبة النصيب
المى :ان شاء الله بتلاقي وبتفرحنا فيك
ادهم :ان شاء الله
وقف وقال :جيت نغص عليكي شوي ...خدي راحتك
المى :يعني رد ولا لأ
رفع بكتافو 🤷♂️وضل طالع
المى :مرحبا
______________
_كان اول مانو داخل ع بيتو وموصل حمل اللبن والجبنة
سمع رنة موبايلو فورا فتحو على امل تكون هية وبالفعل كانت هية وهالشي خلاه يبتسم تلقائيا
منار :مية مرحبا
المى :حضرتك باعتلي خير
صفن شوي وحس كانها جدية شوي
كتب :مافي الا الخير .بس مسحها
كتب: اسمعي يابنت الناس انا معجب فيكي .كمان مسحها
كتب : مريم حكتلك عني :ارسال
المى :اي
منار: ليش مابعتي
المى :مابدي ابعت ولا بدي احكي مع حدا
منار :ممكن اعرف السبب
المى:هيك مابدي ولا الشغلة غصب
منار ملامحو بلشت تتحول لاستياء : لا طبعا مافي حدا يغصبك على شي ... بس انا ماقصدي التسلية
االمى :شو ماكان قصدك انا صغيرة على هي الشغلات
منار :ليش شقد عمرك
المى :مادخلك
منار :اخر سؤال
المى :تفضل
منار :انت مرتبطة
المى :مع انو مادخلك بس رح ريحك وقلك لأ .. وغيرو
منار :سلامتك واسف ع الازعاج
المى :مو مشكلة الله معك
مع وصلو اخر مسج رما التلفون بالحيط
يتبع الفصل الخامس اضغط هنا
- الفهرس يحتوي على جميع فصول الرواية كاملة :"رواية السمرة" اضغط على اسم الرواية