U3F1ZWV6ZTE0NTkwMzMxMzUwX0FjdGl2YXRpb24xNjUyODgzMjYyNTQ=

رواية فرصة استثنائية بقلم دودو محمد كاملة من الفصل الأول للأخير

رواية فرصه استثنائية الجزء الثاني من رواية فتاة فى زمن قاسي للكاتبة دودو محمد كاملة عبر مدونة دليل الروايات للقراءة والتحميل (pdf)

الفصل الأول من رواية فرصة استثنائية

دخلت علياء تجرى وراه زين وهى ماسكه الاكل فى ايديها وبتقول

علياء :- يا ابنى يا حبيبى تعبتنى تعالى كل بقى
زين :- بص ليها وضحك وقال مس عايس وطلع يجرى
وفى الوقت ده دخل مراد ولاقه علياء متعصبه شال زين وباسه وقال
مراد :- مالك بس
علياء :- زين مزهقنى ومدوخنى وراه ومش راضى ياكل
مراد :- طيب هاتى الاكل كده وقعد على الكنبه واخد الاكل من ايد علياء وقعد زين على رجله وقال مين هياخد دى من ايد بابا مراد
زين :- بفرحه اناااااااا
مراد :- حطها فى بؤقه وقال شطور حبيب بابا وبص لعلياء وقال سهله اهى
علياء :- مدوخنى من الصبح وقعدت على الكرسى قصادهم
مراد :- قعد يأكل زين ويضحك معاه
علياء :- قعدت تبص لمراد وهو بيأكل زين ويضحك معاه وتبتسم على ضحكهم
مراد :- علياء
علياء :- ها نعم
مراد :- مش ناويه تنزلى الشغل بقى وتشغلى وقتك بدل القاعده فى البيت دى
علياء :- فعلا انا كنت لسه بفكر اعمل كده زهقت من القاعده طول النهار لوحدى
مراد :- طيب كويس شوفى عايزه تنزلى من امته وانا اجهز ليكى المكتب بتاعك
علياء :- اى وقت انشالله من بكره عادى
مراد :- تمام انا هجهز ليكى كل حاجه متشغليش بالك
علياء :- أن شاءالله
مراد :- هى منار كل ده نايمه
علياء :- ابتسمت ليه وقالت منار فى المدرسه يا مراد الباص جه اخدها من شويه
مراد :- اخ نسيت لحد دلوقتى مش قادر اصدق ان بنتى كبرت ودخلت المدرسه
علياء :- اتنهدت بوجع ومردتش عليه
مراد :- عرف مالها قال تحبى اخرجك تشمى شوية هوا
علياء :- وشغلك
مراد :- مش مهم مفيش اى حاجه مهمه النهارده وبعدين انتى عندى اهم من الدنيا بحالها يلا قومى جهزى نفسك لحد ما اكل عم الشقى ده
علياء :- ابتسمت ليه وقالت ماشى وقامت طلعت اوضتها علشان تجهز نفسها
مراد :- بص ليها وهى ماشيه واتنهد بحب وقعد يأكل زين وبعد وقت نزلت علياء من فوق وقالت
علياء :- انا جاهزه
مراد :- قام وقف وقال وانا اكلت زين
علياء :- يا خرابى هدومه كلها اتبهدلت هات اغيره هدومه
مراد :- مد أيده بزين وقال معلش بقى مش بعرف اكل اطفال اوى
علياء :- قالت لاء عادى ولا يهمك وجات تشيل زين مسكت ايد مراد بصت ليه بصدمه واتوترت وسابت أيده ورجعت لوراه
مراد :- اتفاجئ باللى حصل وبص لعلياء لاقها اتوترت وبترجع لوراه والسلم كان وراها وهى مش واخده بالها طلع يجرى عليها وشدها قبل ما تقع وجت فى حضنه
علياء :- انهارت ودموعها نزلت منها وقالت ابعد عنى متلمسنيش ابعد عنى
مراد :- أهدى يا علياء انا مش هعملك حاجه انا كنت بلحقك قبل ما توقعى بالولد على السلم والله أهدى يا علياء
علياء :- قعدت على السلم وحطت ايديها على وشها وقعدت تعيط
مراد :- اتنهد بوجع وقعد جمبها وقال حقك عليا يا علياء مكنتش اقصد اوصلك لكده انا اسف ليكى بجد
علياء :- بدموع اى لمسه منك ليا بتفكرنى باللى حصل زمان يا مراد غصب عنى مش قادره انسى اللى حصل كان حاجه صعبه عليا جدآ ولسه لحد دلوقتى سايبه اثر سلبى جوايا حتى بعد ما سامحتك
مراد:- غمض عينه بألم وقال مش لوحدك يا علياء انا كمان لسه بعانى من الليله دى ومش قادر انساها وسكت شويه وقال انتى لازم تتابعى مع دكتور امراض نفسيه يا علياء
علياء :- انا كنت بتابع ايام عمر الله يرحمه لحد ما الدكتور قال أن انا بقيت احسن واقدر اعيش حياتى الزوجيه زى اى واحده ،محصلش ليا كده غير لما انت رجعت تانى
مراد :- بوجع انا اسف يا علياء اسف
علياء :- عندك حق يا مراد انا لازم ارجع اتعالج تانى عنده
مراد :- ياريت كنت موت قبل ما اعمل فيكى حاجه زى كده ياريت
علياء :- اتنهدت وقامت وقفت وقالت انا هطلع اغير هدوم زين وسابته وطلعت
مراد :- حط راسه ما بين ايديه وقال انا اسف مكنتش اقصد اعمل فيكى كده والله ما كنت اقصد وبعد وقت نزلت علياء ومعاها زين واخده منها مراد وخرجوا ركبوا العربيه وشغل مراد العربيه ومشى بيها
---
عند سمر

ركبت سمر عربيتها وراحت عند شغلها ولسه هتدخل لمحت مهند واقف بعيد ابتسمت بفرحه ولفت بضهرها وراحت عنده وربعت ايديها على صدرها وقالت

سمر :- واقف عندك بتعمل ايه
مهند :- مش واقف ولا حاجه انا كنت معدى من هنا بالصدفه
سمر :- والله
مهند :- ا.ا اه و.و.وبعدين انا كنت عايز اعرف هو ايه بينك وبين أدم
سمر :- بينى وبينه ازاى مش فاهمه
مهند :- انا شايف انكم قريبين جدآ من بعض اليومين دول
سمر :- وده يخصك فى حاجه
مهند :- سمر انتى عارفه أنه يخصنى وانك انتى ايه بالنسبه ليا
سمر :- وانت عارف ان انا مستحيل اسامحك على اللى انت عملته معايا لما جيت وكنت هبوس ايديك علشان مطلقنيش وسمعتنى كلام صعب جدآ مع ان وقتها قولتلك أن انا اتغيرت ومستحيل اعمل كده متجيش دلوقتى وتعمل فيها المجنى عليه لانك فى وقت من الأوقات كنت انت الجانى
مهند :- انا مش هسمح تكونى لحد غيرى
سمر :- وانت ملكش حاجه عندى انا حره
مهند :- لاء ليا حاجات كتير اوى عندك أولهم قلبى انتى مش حره انتى حبيبتى يا سمر
سمر :- رفعت عينيها ليه وبصت فى عينيه وقالت انا مينفعش اكون حبيبتك علشان هفضل فى نظرك سمر بتاعة زمان
مهند :- ادينى فرصه واحده وتعالى نثبت لبعض أننا احنا الاتنين اتغيرنا فعلا ما هو انا مكنتش ملاك محدش فينا معصوم من الغلط يا سمر
سمر :- ضحكت والدموع فى عينيها وقالت ما هو ده اللى حاولت أوصله ليك ساعتها بس انت رفض تكمل معايا
مهند :- كنت ساعتها مشوش وكلام الزفت التانى لعب فى دماغى وأثر فيا بس انا فعلا بحبك يا سمر
سمر :- تصدق أن انا خلاص مبقتش احس بطعم الكلمه دى بقيت احس انها كلمه عاديه جدآ ملهاش اى معنى ولا أساس انا على أيديكم شوفت واتعلمت كتير واللى شوفته كفيل يخلينى اعيش لوحدى بعيد عنكم
مهند :- ادينى فرصه واحده ارجوكى
سمر :- سكتت ومردتش عليه
مهند :- ها ردى
سمر :- امشى يا مهند امشى وسابته ومشيت
مهند :- اتنهد ووقف تاكسى وروح على البيت
---
فى شقة مياده

صحيت مياده من نومها على صوت عياط ابنها عامر قامت تجرى اخدته من سريره وقعدت تطبطب عليه وبصت على مروان لاقيته نايم اخدت عامر بره فى البلكونه علشان صوته ميصحيش مروان وقعدت تلاعب فيه وفى الوقت ده دخل مروان عليهم وقال بغيظ

مروان :- واقفه بتعملى ايه فى البلكونه
مياده :- عامر بيعيط كتير اخده وقفت بي فى الهوا وعلشان صوته ميصحكش
مروان :- بص حاوليه شاف واحد واقف فى البلكونه بص ليها بغيظ وقال علشان عامر برضه
مياده :- بعدم فهم اه علشان عامر امال هيكون ليه
مروان :- لاء ولا حاجه بس متطلعيش البلكونه دى تانى فاهمه
مياده :- بصت ليه ومردتش عليه ودخلت جوه وقالت انا تعبت من طريقة معاملتك ليا يا مروان فين وعدك ليا انك هتتغير ومش هتزعلنى تانى احنا من يوم ما اتجوزنا واحنا علطول فى مشاكل كفايه بقى حرام عليك واخدت عامر وطلعت بي بره
مروان :- خرج وراها وقال ايه خلاص مبقتش أعجب دلوقتى اه ما خلاص الهانم شافت نفسها عليا
مياده :- شوفت ايه وزفت ايه انت مريض اقسم بالله انا مش عارفه حبيتك على ايه بجد كنت عاميه حرام عليك يا اخى بقى كفايه اللى انت بتعمله ده
مروان :- مسكها من شعرها وقال ايه عايزه تطلقى علشان تروحى تتجوزى واحد تانى صح
مياده :- بدموع سيب شعرى يا حيوان
مروان :- ضربها بالقلم وقال انا هوريكى شغل الحيوانات يا مياده
زقته بعيد عنها وقالت مياده :-وكمان بتمد ايدك عليا يا مروان انت بتعمل فيا كده ليه عملت ليك ايه انت اكتر واحد كرهته فى حياتى كرهتك قد الحب اللى كنت بحبه ليك طول السنين اللى فاتت دى ازاى حبى عمى عينى عنك فى السنين دى كلها ازاى، اتجوزتك وشوفتك على حقيقتك بقيت استحمل علشان حملت منك واستحملت اكتر لما جه عامر واقول معلش استحملى يا بت وبلاش تربى ابنك بعيد عن ابوه بس خلاص مبقاش عندى طاقه استحمل حاجه تانى طلقنى يا مروان
مروان :- هه اطلقك ؟ ده فى احلامك يا مياده طلاق مش هطلق وأعلى ما فى خيلك اركبيه وسابها ودخل اوضه
مياده :- بصت عليه وهو ماشى وقعدت على الكنبه بدموع وقالت يارب أنا عارفه أن ده اختبار منك وانا راضيه بحكمك وعارفه ومتأكده أن كرمك ليا هيكون كبير ومسحت دموعها ودخلت المطبخ تحضر الاكل لابنها واتفاجئت بأيد مروان بتلف حاولين وسطها وبيبوسها فى رقابتها وقال
مروان :- حقك عليا متزعليش
مياده :- غمضت عينيها بدموع وقالت ابعد عنى يا مروان
مروان :- متزعليش منى يا مياده انتى عارفه أن انا بحبك وبغير عليكى ولما شوفتك واقفه فى البلكونه وواحد واقف قصادك اتعصبت
مياده :- نفس كلمتين كل مره انا اسف متزعليش منى انتى عارفه ان انا بحبك وبغير عليكى اصل شوفت فلان بيبص عليكى شوفتك بتضحكى لده شوفتك بتتكلمى مع زميلك فى المدرسه لابسه طقم شيك لمين ايه اخرك كده كنتى فين كل ده لحد ما خلاص زهقت وتعبت انت مريض نفسى دى مش غيره ده شك وقلة ثقه فيا يا مروان انت حالتك تدهورت لدرجه انك بقيت تمد ايدك عليا وانا خلاص مبقتش قادره استحمل كل اللى انت بتعمله ده طلقنى ارجوك بلاش تكرهنى فيك اكتر من كده
مروان :- لفها ليه وشدها فى حضنه وقال طلاق لاء يا مياده انا بحبك ومقدرش اعيش من غيرك اوعدك أن انا هتغير وأبطل غيره
مياده :- احنا دخلنا فى ست سبع سنين مع بعض كل مره توعدنى الوعد ده وبترجع اصعب من الاول
مروان :- المرادى بجد يا مياده صدقينى
مياده :- غمضت عينيها بوجع وبعدت عن حضنه وقالت خلينى افطر عامر علشان جعان وخرجت وسابته فى المطبخ
مروان :- خرج وراها وقعد جمبها وحط أيده على كتفها وقال مش قادر اشوفك زعلانه كده وباس خدها وقال حقك عليا انا اسف
مياده :- اتنهدت وقالت روح اجهز هتتأخر على شغلك
مروان :- طيب سامحينى
مياده :- مش هقدر
مروان :- طيب سامحينى ولو عملت كده تانى ابقى اعملى اللى انتى عايزاه
مياده :- بصت ليه مده وقالت لو اتكررت تانى يا مروان مش هقعد ثانيه واحده على ذمتك ماشى ؟
مروان :- وانا بوعدك مش هتتكرر تانى، خلاص صافى يا لبن
مياده :- ابتسمت وقالت خلاص يا مروان
مروان :- باس ايديها وقال بعشقك
مياده :- اكتفت بألابتسامه بس ومردتش عليه
مروان :- هقوم بقى اجهز علشان اتأخرت على الشغل وباس راسها ودخل الاوضه
مياده :- بصت عليه وهو ماشى وقالت ربنا يهديك ويصلح حالك يا مروان وقعدت تأكل ابنها
---
فى شقة عبدالرحمن

صحيت مريم من نومها وقامت قعدت بتعب على السرير وبعدين قامت دخلت الحمام وبعد وقت خرجت وراحت عند عبدالرحمن وقالت بتعب

مريم :- عبدالرحمن يا عبدالرحمن
عبدالرحمن :- اممم
مريم :- اصحى يلا هنتأخر على الشغل
عبدالرحمن :- قام قعد وبص فى الساعه
مريم :- قامت من على السرير بتعب
عبدالرحمن :- انتى شكلك خلاص على اخرك
مريم :- لسه الشهر فى أوله
عبدالرحمن :- متنزليش الشغل اليومين دول ريحى بقى لحد ما تولدى
مريم :- لاء انا هنزل الشغل مش هقعد فى البيت لوحدى انا
عبدالرحمن :- اسمعى الكلام ومتبقيش عناديه
مريم :- لاء يا عبدالرحمن مش هقعد فى البيت انا كويسه متقلقش عليا هروح اصحى سجده علشان ألبسها وخرجت فى الاوضه وسابته
عبدالرحمن :- اتنهد وقام دخل الحمام وبعد وقت خرج واده فرضه وغير هدومه وخرج من اوضه
سجده :- طلعت تجرى عليه وقالت بابا بابا بابا
عبدالرحمن :- شالها وباسها وقال حبيبت قلب بابا صباح الورد والفل والياسمين على عيونك يا اميرتي
مريم :- سيدى يا سيدى على الدلع اه يا انى يا محرومه من الدلع ده يا انى
عبدالرحمن :- قعد على الكرسى وقعد سجده على رجله وقال وانا عندى كام اميره فى الدنيا دى؟ هى واحده بس حبيبت ابوها وباسها من خدها
مريم :- طيب يا اخويه كل علشان منتأخرش
عبدالرحمن :- قعد ياكل ويأكل سجده وبعد وقت انتهوا من الاكل ودخلت مريم تجهز نفسها وخرجت من الاوضه ونزلوا التلاته ركبوا العربيه راحوا عند بيت حكمت طلعوا ليها سجده وراحوا على الشركه

بقلم الكاتبة دودو محمد

عند علياء ومراد

نزل مراد من العربيه وراح فتح الباب لعلياء واخد منها زين ومد أيده ليها علشان تنزل بصت لايده ونزلت من غير ما تمد ايديها ابتسم ليها وقال

مراد :- امشى يلا
علياء :- هنروح فين
مراد :- ناكل الاول وبعد كده هخدك اركبك مركب فى النيل
علياء :- بفرحه بجد انا من زمان اوى نفسى اركبها
مراد :- ابتسم ليها وقال تعالى ناكل الاول وبعد كده نروح ودخلوا المطعم وقعدوا الاتنين على الكراسى وطلب مراد الاكل بعد ما سأل علياء وبعدين بص ليها وقال علياء كنت عايز اسألك سؤال
علياء :- اممم أسأل
مراد :- هو انتى رافضك للجواز، ليا انا بس ولا لأى حد ؟
علياء :- بصت ليه بأستغراب وقالت ليه السؤال ده
مراد :- إجابته مهمه جدآ بالنسبالى
علياء :- والدموع فى عينيها قالت رفضى للجواز عمومآ رافضه أى حد يدخل حياتى يا مراد
مراد :- بفرحه طيب الحمدالله
علياء :- انا مش فاهمه سبب فرحتك دى ليه الصراحه
مراد :- لان لو كان رفضك ليا انا بس كان ممكن حد تانى يخدك منى إنما مدام للكل يبقى اطمنت أنك مش هتفكرى فى اى حد غيرى
علياء :- بصت ليه ومردتش عليه
مراد :- تعرفى أن نظرتك دى اكتر حاجه بتدينى طاقه اكمل بيها الحياه بتدينى أمل أن بكره هيكون احسن
علياء :- هو انت فعلا بتحبنى ولا شعورك ليا ده احساس بالذنب علشان اللى عملتوا فيا
مراد :- كلمة بحبك دى بالنسبه للى فى قلبى ليكى ولا حاجه انا مش لاقى كلمه اصلا توصف اللى انا بحسه ليكى محتاج كلمه اكبر بكتير من كلمه الحب انتى حبك فى قلبى بقاله سنين طويله اوى من ساعة ما كنتى طفله صغيره شايله مسؤولية اخواتك لوحدك بعشق نظرة عينك اللى كانت كلها قوه وإصرار حبيت كفاحك على اخواتك بالحلال كنت بشوفك جميله واستثنائيه ومازلت بشوفك كده لحد دلوقتى يا علياء
علياء :- بصت ليه بكسوف والاكل جه واتحط على الترابيزه
مراد :- بحب كلى
علياء :- هزت راسها ليه وقعدت تاكل
مراد :- قعد ياكل ويأكل زين معاه
علياء :- هات زين اكله انا علشان تعرف تاكل
مراد :- ومين قالك أن انا مش عارف اكل بالعكس ده الاكل بيبقى ليه طعم تانى وانا معاكم
علياء :- ابتسمت ليه وكملت اكلها
مراد :- قعد يبص ليها وهى بتاكل
علياء :- بصت ليه وقالت انت بتبص ليا كده ليه
مراد :- بحاول أقنع نفسى انك انتى قاعده معايا وبتاكلى على نفس الترابيزه وعيونك مبتسمه وزى القمر
علياء :- لو سمحت يا مراد بلاش مغازله ارجوك
مراد :-ابتسم ليها وقال حاضر
علياء :- كل بقى
مراد :- قعد ياكل وبعد وقت خلصوا اكل وحاسب مراد وخرجوا من المطعم وراحوا عند النيل ونزلوا يركبوا المركب ركب مراد المركب وهو شايل زين ومد أيده لعلياء علشان تركب
علياء :- بصت ليه وقالت انا هعرف اركب لوحدى
مراد :- مش هتعرفى صدقينى
علياء :- حاولت وكانت هتقع
مراد :- قولتلك ومد أيده ليها
علياء :- اتنهدت ومدت ايديها ببطئ وحطتها فى ايد مراد
مراد :- شدها وركبت المركب
علياء :- سحبت ايديها من أيده وبصت ليه بتوتر
وبدأت المركب تتحرك فاجئه وكانت هتوقع
مراد :- مسكها بسرعه قبل ما توقع
علياء :- بعدت عن مراد بسرعه وغمضت عينيها وقالت بوجع ارجوك بلاش تلمسنى بترجاك يا مراد
مراد :- والله العظيم ما قصد حاجه انا كنت بلحقك قبل ما توقعى وعمومآ انا اسف اقعدى علشان متوقعيش
علياء :- قعدت وبصت على الميه وابتسمت وقالت عارف
مراد :- بص ليها بأنتباه
علياء :- بابا الله يرحمه مره جابنى هنا انا وماما ومياده مكانش لسه عبدالرحمن جه كانت ماما حامل فيه وانا كنت لسه صغيره وكان نفسى المس الميه وكل ما اجى اقرب احس نفسى هقع ارجع لوراه وفاجئه لاقيت ايد بابا بتتمد ليا مسكتها وقربت للميه من غير خوف حسيت بالأمان وهو ماسك ايدى انا عارفه لو كنت لمست الميه وانا لوحدى مكنتش هقع ولا حاجه بس الاحساس بالامان بيديك القوه بيخليك تكمل اللى نفسك فيه بيديك دفعه تجرب ومتخافش وهو ده اللى انا كنت محتاجه فى حياتى ايد تتمد تمسكنى تحسسنى بالأمان تخلينى اكمل حياتى وانا مش خايفه من المستقبل ايد تقوينى وتسندنى وقت ما اجى أقع بس عارف مكنتش هلاقى ايد أبدآ زى ايد بابا الله يرحمه لان مهما اتمدت ايادى للواحده عمرها ما هتكون سند ليها زى سند ابوها
مراد :- اتنهد وقال وانا مستعد امدلك ايدى واسندك فى اللى باقى من عمرك يا علياء بس انتى ادينى الفرصه دى ومش هتندمى
علياء :- اهو انت بالذات بتشبه عليا بالحكايه اللى قولتها ليك انت عامل زى الميه دى كل ما اجى اقرب منك والمسك بخاف وارجع تانى لوراه عارفه أن لو قربت منك مش هتأذينى بس الفكره نفسها مرعبه ومخيفه، بس فيه فرق بسيط ما بينكم أن الميه انا خوفت منها من غير ما تعملى اى حاجه إنما أنت خوفى منك بسبب حتى لو كان غصب عنك بس يكفى ان ساب أثر فى قلبى وكسرنى اهو ده اكتر وقت محتاجه فيه بابا يسندنى ويمسك ايديا يدينى دافعه أن أقرب منك ومخافش يحسسنى بالأمان اتجاهك يدينى أمل أن بكره هيكون معاك احلى
مراد :- بصلها بوجع وقال انا عارف ان اللى حصل صعب عليا وعليكى بس عندى امل فى ربنا كبير أن المسافات اللى ما بينا دى هتنتهى قريب وهيقربنا من بعض
علياء :- بتمنى على الأقل هرتاح من وجع قلبى وهقدر اعيش طبيعيه شبه اى واحده فى سنى
مراد :-ابتسم ليها وقال أن شاءالله
---
فى فيلا أدم

صحى أدم على صوت ابنه عمر وهو بينادى عليه وهو نايم وبيخبط على ضهره فتح عينه وابتسم ليه وقام قعد وشال عمر وحطه على رجله وباسه وقال

أدم :- صباح الورد والفل والياسمين على احلى عيون فى الدنيا دى كلها
عمر :- ابتسم ليه وقال ممم
أدم :- يا نهارى انت عايز مممم ومفيش حد اكلك من عيون بابى وقام شاله ونزل بي تحت وقال بصوت عالى سلوى يا سلوى
سلوى :- جت تجرى وقالت نعم
أدم :- بعصبيه انتى ازاى سايبه الولد جعان كده انتى لزمتك ايه هنا؟ مش علشان تخلى بالك منه
سلوى :- والله العظيم حضرتك انا دخلت أحضره الاكل حتى اهو وكنت لسه طالعه اكله
أدم :- داس على أسنانه وقال على الله الاقيكى اهملتى فى عمر هوديكى وراه الشمس مفهوم
سلوى :- انتفضت من مكانها وهزت راسها وقالت م م.مفهوم
أدم :- باس عمر ونزله وبص لسلوى بغيظ وسابها وطلع اوضه
سلوى :- نفخت بغيظ وشالت عمر وقالت كده برضه يا عمر تجيب ليا الكلام من ابوك
عمر :- ايز مممم
سلوى :- من عيونى وقعدت على الكنبه وبدأت تأكله وتلاعب فيه وبعد وقت نزل أدم من فوق وبص على عمر لاقه بيضحك مع سلوى وسعيد وقف يتابعهم من على السلم مده ونزل من غير ما حد يحس بي
أدم :- احم
سلوى :- انتبهت لصوت ادم وقامت وقفت وهى شايله عمر
أدم :- انا ماشى خدى بالك على عمر كويس اوى مفهوم
سلوى :- حاضر
أدم :- قرب من عمر وباسه وكان قريب من سلوى بصلها وبعدين بعد عنها وقال لو فيه حاجه ضروري كلميني
سلوى :- حاضر
أدم :- خرج وركب عربيته ومشى بيها
سلوى :-بصت على أدم وهو ماشى وقالت بصوت واطى يخربيت حلاوتك مز اوى شبه الممثلين وابطال الروايات حاجه كده اخر جمال
عمر :- قعد يضحك
سلوى :- انت فاهم انا بقول ايه بتضحك، ده انا هقطعك بوس وقعدت تبوس فيه
---
عند سمر

خرجت سمر من الشغل بعد انتهاء العمل وركبت عربيتها وشغلتها ومشيت بيها راحت عند شغل انجى ووقفت تنتظر نزولها وفى الوقت ده قعدت تفتكر اللى حصل فى الماضى
---
فلاش بااااااك

من سنه خرجت سمر من شغلها وهى حزينه ولسه هتركب عربيتها سمعت صوت بينادى عليها بصت على الصوت لاقيته هيثم وقفت مستغربه وجوده جه عندها ووقف قصادها وهو حزين وقال

هيثم :- سمر ارجوك رجعيلى انجى
سمر :- بعدم فهم ارجعلك انجى ازاى مش فاهمه
هيثم :- بص للارض وقال بعد ما طلبت منك انك تبعدى عنها وانتى نفذتى اللى طلبته منك معها تعبت جامد وبقت علطول حزينه ودموعها على خدها وحياتنا اتقلبت لجحيم حاولت أخرجها من اللى هى فيه معرفتش وشويه شويه رجعت تنزل تانى الشغل بس مش هى انجى بتاعة زمان علطول مكسوره و موجوعه ضميرى تعبنى كتير واخد قرار أن اقولها الحقيقه ان انا اللى طلبت منك تبعدى عنها كنت كل ما اجى اقولها أتراجع فى اخر لحظه لحد ما اتشجعت وقولت ليها الحقيقه انهارت وقعدت تضرب فيا وطلبت منى الطلاق وسابت البيت ومش راضيه تسامحنى وترجع ليا
سمر :- غمضت عينيها بوجع وقالت انا اسفه لو كنت سببت ليكم مشاكل فى حياتكم انا بعد عنها و ربنا يعلم انا بتعذب قد ايه فى بعدها
هيثم :-انا بعترف أن انا ظلمتك يا سمر وكلام انجى كله صح لما قالت ليا انك اتغيرتى عن زمان مكنتش شايف غير سمر بتاعة زمان اللى جرحت انجى بكلامها وبس سامحينى يا سمر
سمر :- حصل خير اهم حاجه دلوقتى نرجع انجى ليك
هيثم :- ياريت علشان مش قادر اعيش من غيرها وعلى فكره هى حامل وقربت تولد
سمر :- بفرحه بجد ربنا يقومها بالسلامه يارب أنا دلوقتى هروح ليها على بيت اهلها وهقنعها ترجع ليك
هيثم :- شكرآ يا سمر
سمر :- ابتسمت ليه وقالت العفو وركبت العربيه وشغلتها وراحت عند بيت انجى ونزلت من العربيه وطلعت عند الباب وقعدت ترن الجرس
انجى :- من جوه بعصبيه طيب ياللى على الباب فيه ايه احنا مش واقفين وراه الباب وفتحت الباب واتصدمت لما شافت سمر وقعدت تبص ليها مده
سمر :- واحشتينى يا كلبه
انجى :- اترمت فى حضنها وقعدت تعيط
سمر :-طبطبت على ضهرها وقالت وانتى واحشتينى اوى والله بس أهدى يا انجى علشان اللى فى بطنك
انجى :- بدموع شوفتى الواطى الندل بعدنا عن بعض ازاى طلع بنى أدم زباله
سمر :- بعدت عنها وقالت هو احنا هنتكلم على الباب كتير كده ولا ايه
انجى :- وسعت ليها وقالت انا اسفه من فرحتى نسيت ادخلك تعالى نقعد فى اوضى ودخلوا الاتنين اوضة انجى
سمر :- بصى انا مش زعلانه من هيثم هو عمل كده علشان خايف عليكى احسن ما اجرحك بكلامى مكانش قادر ينسى اللى حصل زمان وده من حقه الصراحه
انجى :- كسر حقه يعنى هو علشان يثبت لنفسه أن تفكيره هو اللى صح يروح يوقع ما بينا ويبعدنا عن بعض ده انسان مريض
سمر :- بصى يا انجى انتو الاتنين غلطوا انتى لما سيبتى بيتك وجوزك وهو علشان حاول يساعدك بس بطريقه غلط تبقوا خالصين ارجعوا لبعض بقى علشان خاطر اللى فى بطنك ذنبه ايه يتربى بعيد عن أبوه بلاش تحسسينى بالذنب أن انا السبب فى خراب حياتك ارجوكى يا انجى ارجعى لهيثم والله العظيم هيموت عليكى وجه واتأسف ليا وقالى أنه غلطان كمان الراجل اعترف بغلطه بلاش تضيعى حب عمرك علشان حاجه صغيره حصلت اهو أنا وانتى رجعنا لبعض تانى وهو السبب سامحيه يا انجى بقى
انجى :- انا مش طايقه ابص فى وشه الصراحه وبعدين عندى هرمونات الحمل مضيقه خلقى ومعصبانى اوى الصراحه
سمر :- ده انا اللى خلقى ضاق وهفتح نفوخك الناشف ده اسمعى الكلام واخلصى
انجى :- سيبك منه المهم انتى واحشتنى اوى احكيلى بقى عملتى ايه الفتره اللى فاتت دى كلها
سمر :- مش هقولك اى حاجه غير لما ترجعى بيتك وازورك فيه
انجى :- بفرحه بجد هتيجى بيتى
سمر :- ايوه وهتغدا معاكى كمان بس اكيد مش النهارده الراجل عنده حرمان ده يحدفنى من البلكونه وقعدت تضحك
انجى :- بكسوف سافله
سمر :- مبقاش حيلتى غيرها وقامت وقفت وقالت هكلمه واخليه يجى يخدك
انجى :- ماشى
سمر :- الليله ليلتك يا عروسه وغمزت ليها ومشيت
انجى :- حدفت عليها المخده وقالت يا قليلة الادب وقعدت تضحك
---
بااااااااك

فاقت سمر لما شافت انجى جايه عليها وهى بتشاور ليها بأيديها وبتبتسم ليها جت تجرى عليها وركبت العربيه وحضنتها وباستها وقالت

انجى :- واحشتينى يا كلبه بقالك كام يوم مشوفتكيش
سمر :- والله كان عندى شغل كتير اوى وبروح وانا مش قادره افتح عيونى
انجى :- يبقى اكيد ناويه تيجى معايا البيت نتغدا سوا
سمر :- لاء مش هقدر انا جيت اشوفك واسلم عليكى واروح على الفيلا
انجى :- اخص عليكى لوچى مش وحشاكى
سمر :- ده انا هتجنن عليها والله بس خليها يوم تانى
انجى :- بارده
سمر :- معلش والله هجيلك علشان احكيلك مهند قالى ايه النهارده لما شوفته واقف من بعيد بيراقبنى
انجى :- لالالا مش هقدر اصبر احكيلى دلوقتى
سمر :- وربنا ما قادره اتكلم هجيلك واقولك كل حاجه بتفصيل الملل
انجى :- وعد
سمر :- وعد وانزلى يلا عايز اروح
انجى :- انزل فين انتى هتوصلينى هيثم لسه عنده شغل كتير وانا هروح علشان لوجي
سمر :- ادعى عليكى بأيه انا ايه جابنى بس وشغلت العربيه ومشيت بيها وصلت انجى على الفيلا بتاعتها وروحت على البيت ودخلت الفيلا وقعدت تنادى وملاقتش حد نادت وقالت سعديه يا سعديه
سعديه :- ايوه يا مدام سمر
سمر :- امال فين علياء
سعديه :- خرجت مع استاذ مراد
سمر :- امممم مراد ماشى يعنى محدش هنا خالص معاهم الاولاد
سعديه :- معاهم زين بس ومنار فى اوضتها فوق
سمر :- ماشى ولسه هتطلع
سعديه :- احضرك الاكل
سمر :- لاء شكرآ وسابتها وطلعت على اوضة منار وخبطت ودخلت عندها وقالت حبيبت خالتو بتعمل ايه
منار :- برسم
سمر :- الله بجد ورينى كده
منار :- مدت ايديها وقالت اهى
سمر :- بصت على الرسمه بأستغراب وقالت ايه ده يا منار
منار :- ده قصر كبيررررر اوى اللى هعيش فيه لما اكبر
سمر :- واشمعنا قصر اللى هتعيشى فيه
منار :- علشان هتجوز الوحش
سمر :- بأستغراب الوحش
منار :- ايوه بل فيلم الجميله والوحش ديزنى يا خالتو
سمر :- ااااه طيب اشمعنا القصر ده اللى فكرتى فيه وليه تتجوزى وحش علشان القصر يعنى
منار :- ايوه
سمر :- امممم انتى بتفكرينى بنفسى يا منار تعالى لما احكيلك حدوته
منار :- هييييه بجد
سمر :- شالت منار وراحت قعدت على السرير وحطت منار على رجليها وقالت كان يا مكان يا سعد يا اكرام ما يحلى الكلام الا بذكر النبى عليه الصلاة والسلام
منار :- عليه الصلاة والسلام
سمر :- كان فيه زمان بنوته صغيره حلوه وشقيه بس كانت فقيره جدآ كان عندها طموح كبيرررر اوى واخدت قرار أنها هتوصل لحلمها ده بأى تمن وكبرت البنوته دى وبقت قويه ومحدش بيقدر عليها دخلت الجامعه وبقت انسانه انانيه جدآ مش بتشوف الا نفسها وكانت بتجرى وراه اى واحد معاه فلوس كتير كانت مفكره أن السعاده بالفلوس وبس ووقعت فى مشاكل كتير اوى وكل مره توقع تقوم اقوى من الاول وتدوس على الناس اكتر واكتر وفى يوم البنت دى بقى معها فلوس كتير و اتحقق حلمها بس طمعها خلها عايزه فلوس اكتر وده كان بداية النهايه جريت وراه طمعها و غضبت ربنا وسلمت نفسها لشيطان وفاقت بس كان بعد فوات الاوان بعد ما خسرت كل شئ حتى خسرت نفسها وعلشان كان حاوليها ناس طيبه و بيحبوها من غير مصلحه وقفوا جمبها وخرجوها من اللى هى وقعت فيه بس فى عز ما هى مكسوره جالها الأمير مد أيده وساعدها حبيته وقررت انها هتنسى كل الماضى وهتعيش بس ليه انشالله لو هتعيش فى اوضه وصاله كانت راضيه وقابله بده وعرفت ساعتها أن الحب الحقيقى احسن من كنوز العالم كلها بس للاسف الماضى عاش معها والزمن رفض يديها فرصه وقف قصادها وبعد عنها الأمير وساب ايديها ومشى فى أول الطريق اتكسرت بجد سعتها وفقدت الثقه فى الناس كلها قررت هتعيش لنفسها وبس ومش هتسمح لأى امير يقرب منها رغم انها لسه بتحب الأمير اللى سابها فى أول الطريق بس مش قادره تسامحه وعاشت وحيده ما بين الماضى وذكرياتها البسيطه جدآ مع الامير حبيبها وتوته توته خلصت الحدوته، اللى استفدنا من حدوتنا دى أن خليكى قويه بس اوعى تحلمى حلم اكبر منك علشان لو حطتيه فى دماغك هتجرى وراه وهدوسى على كتيررررر قوى وانتى فى طريقك لي ولما توصلى لحلمك ده هتلاقى نفسك جريتى وراه سراب خسرتى الكل ونفسك علشان حاجه تافهه السعاده بحب ربنا وإيمانك، وحب اللى حاوليكى ليكى وثقتك فى نفسك هى دى السعاده اللى بجد وبصت على منار لاقيتها نامت باستها وحطتها على السرير وغطتها وقامت وقفت ومسحت دموعها واتنهدت بوجع وراحت على اوضتها
قد يعجبك أيضا
الاسمبريد إلكترونيرسالة