رواية ابتلائي الفصل التاسع 9 - بقلم حبيبة شداد
كان في ايدي أنسى ياحبيبة بس مقدرتش أخونك أصل اللي بيحب بيبقى قلبه مع واحد بس وبيحافظ عليه حتى من نفسه اللي بيحب بيغير! وأنا حبيتك ولازم احافظ عليكي.
دخلت اوضتي ورنيت على والد حبيبة وعرفته ان عاوز اقابله بكره بس ف مكان غير البيت وهو وافق برغم اصراره يعرف السبب بس مرضيتش أقوله ..اتفقنا نتقابل بعد ماأخلص شغلي . خلصت شغلي وجهزت واتوجهت للكافية اللي اتفقنا نتقابل فيها . اختارت كافيه هادي أعرفه عشان نعرف نتكلم
= سلام عليكم ورحمة الله وبركاته ازيك ي عمي
^وعليكم السلام ورحمة الله وبركاته ازيك ي بني . عامل اي
= الحمد لله ياعمي في زحام من النعم. كنت عاوز اتكلم معاك ف موضوع كده مهم
^ خير يابني ان شاء الله
= حضرتك شوفت مني حاجة وحشة او سمعت عني حاجة
^ لا يابني انا بعتبرك زي مالك ابني بالظبط . ولو انا شوفت منك حاجة غلط ولا سوء أدب مكنتش هبقى معاك دلوقتي ولا اي
= تسلم ياعمي. الآنسة حبيبة قررت تنهي الخطوبة أقدر أعرف السبب
^ هي عندها اعتقاد انك أصغر منها وخايفة من عدم التوافق بينكم بس
= طيب انت اي رايك ف عقليتي ياعمي . انت قعدت معايا اكتر منها وتقدر تحكم
^ والله يابني أنا شايف ان فيك خير بس ده قرارها وانا مش عارف أقنعها بغير كده لانها عنيدة شوية وكمان خايفة تتكرر التجربة. خطيبها الأول كان ظاهريا ملتزم بس مفيش اي توافق ولا طاعة ولا اي حاجة ف اتقفلت
= طب ينفع أقنعها أنا .ثم ان الانسان مش بيتعلم بسهولة لازم نغلط عشان نتعلم
^ أكيد. حقك تثبتلها بس انتم ملتزمين بالضوابط عاوز تقنعها ازاي
= هو ده الموضوع اللي عاوز حضرتك فيه . لو حضرتك موافق ممكن نكتب الكتاب عشان أقدر أثبتلها اني هكون الخير وهكون اد الثقة
^ والله يابني هي فكرة حلوة بس مش شايف ان لسه بدري على كتب الكتاب شوية
= صدقني ياعمي والله انا شاريها وربنا يقدرني وأكون الخير ليها
^ طيب يابني سبني استخير وافكر واللي فيه الخير ربنا يقدمه
——————
^ حبيبة
_ نعم ياأبي
^ انتي طلبتي من أويس برضو تفركشي
_ اه
^ انا مش موافقك ع ده وسبتك تعملي اللي يريحك بس مش عشان حاجة انا كان ف دماغي هدف معين
_ هدف اي ياأبي
^ أشوف هو شاريكي فعلا ولا كان حماس بدايات ومحاولات للحصول ع حاجة صعب ياخدها بس..
_ مش فاهمة تقصد اي برضو
^ أويس كلمني النهاردة وطلب نتقابل ولما قابلته طلب يكتب الكتاب عشان يثبتلك إنه شاريكي فعلا
_ والله!!!! بس انا خايفة يابابا
^ متخافيش حد زي أويس متخافيش منه هو مش زي اللي فات لازم تخرجي من اللي انتي فيه لازم تعرفي ان مش الكل زيه .
_ سكت. والدي عنده حق فعلا انا عارفة ان أويس كويس أنا عارفة أنه الخير . بس خايفة.
^ ها قولتي اي
_ حاضر ياوالدي هصلي استخارة وربنا يقدر الخير
قومت دخلت اتوضيت ونويت أصلي الاستخارة أنا عارفة أنه شاريني أنا عارفة أنه بيحاول عشاني عارفة من زمان بس خايفة هو ميتخافش منه خايفة أكسر قلبه وقلبي يتوجع معاه أويس مبطلش يحاول لأجلي تقريبا فيه كل حاجة طلبتها من ربنا .يارب سلمتك أمري فارزقني الخير حيثما كان وراضني به
___________________
فات يوم واتنين وأنا بدعي ربنا يكون ده آخر بُعد بينا يكون ده وقت العوض وربنا يقدرلي الخير ويراضي قلبي بيها . أهلي متوترين اوي خايفين قلبي يتكسر الحقيقة انا خايف ترفض وتصر على قرارها وقلبي يتوجع.
صليت استخارة وتوكلت على الله وسلمته أمري وانا عندي حسن ظن بيه
في نهاية اليوم لقيت والدها بيتصل
^ الو سلام عليكم ورحمة الله وبركاته ازيك ي بني
= وعليكم السلام ورحمة الله وبركاته ازيك ي عمي
^الله يسلمك يابني . شرفنا ان شاء الله بكره أنت وأهلك عشان نحدد معاد كتب الكتاب. مبارك يابني
= بإذن الله ياعمي . الله يباركلنا فيك يارب
قفلت المكالمة وأنا برقص حرفيا قلبي بينبض من كتر الفرحة والحياة بقى لونها بمبي على رأي الفنانة . ده الانسان أبسط مايكون مجرد كلمة تعالى نتفق تقلب حالي كده
روحت البيت وبلغت أهلي فرحولي بطريقة غير طبيعية بداية من عائش أختي اللي كانت بتغنيلي وأبي اللي اخدني ف حضنه وأمي اللي عيطت وقالتلي خلاص كبرت ياواد
ونعتبر ده تالت أسعد يوم في حياتي بعد يوم خطوبتنا ويوم لقاها.
نمت وأنا كلي حماس ل بكره . صحيت ع صوت زغروطة ف ودني ودف وهيصة اي ياجدعان ف اي
& صباح الخير ع أحلى عريس . قوم ياعم قوم هو في عريس بينام الوقت ده كله.
= حبيبة قلبي والله مقدر فرحتك بيا بس سبيني انام الهي تنستري . وبعدين وقت اي الساعه ٧ الصبح.
& ياكسلان قوم ياعم هات الورد والحاجة
= ورد اي ها ورد اي ده احنا لسه رايحين نتفق ع المعاد اي بقى الهيصة دي
& جرا اي ياولد ده انت فرحتي الأولى والوحيدة عاوزني مفرحش بيك ولا اي
= انتي قلبتي ع أمي الحاجة ليه كده. وبعدين افرحي بعيد عني ياستي سيبيني انام
& عيل كسول
قفلت الباب ومشيت وانا ضحكت وكملت نوم . صحيت صليت الضحى وجهزت ونزلت فتحت الصيدلية عدى الوقت ببطء شوية بس كنت مشغول جدا ف ممليتش من بطئه. صليت العشاء وروحت أنا وأهلي ل بيت حبيبة والفرحة مالية قلوبنا والضحكة ع وشوشنا .كالعادة مالك وعمي استقبلونا أجمل وأكرم استقبال وقعدنا اتفقنا على كل حاجة واتفقنا ان المعاد هيكون يوم الجمعه بعد صلاة العصر .استأذنت من عمي اني عاوز أعمل كتب كتابي في جامع الأزهر وبعدها نتفسح شوية ونعمل سيشن وهو وافق على ده الحمد لله. أنا الكون كله لايسع أجنحتي . مشينا وبدأت أجهز لليوم ده بكل حب ودفا مش مصدق ان خلاص كلها يومين وتبقى حلالي وأثبتلها اني بحبها بجد مش مصدق ان خلاص هتبقى ملكي. طلبت من جاليري بيبيع شغل هاند ميد إنه يعمل منديل كتب الكتاب بأسمائنا ويعمل تارة برضو فيها أسمائنا ومكان للبصمة وتاج باسمها هي كل حاجة كنت بخططلها بكل حب كنت متحمس بشكل محدش يتخيله
وأخيراً جيه يوم الجمعه ده لقد هرمنا والله بجد .
نزلت استلمت الاوردر اللي طلبته واللي كان مفاجأة ليها . واوردر الورد والحاجة اللي طلبت تتعمل اتجهزت لصلاة الجُمعة صليت ونزلت وقفت ف الصيدلية حوالي ساعة وطلعت أجهز
=الله الله على الحلاوة .شو هالقمر وشو هالحلا .
*أنت القمر ياعيوني والله
= هذا الشبل من ذاك الأسد . وبعدين انتي واخده حلاوة الدنيا كلها ليكي ياأمي
*اللي حلى الدنيا وجودك أنت وأبوك وأختك
=بوست ايدها وراسها وانا بقولها يديمك ليا ياأحلى مافي الكون . غمضي عيونك بقى
طلعت تاج ورد ولبسته ل أمي بوست راسها و قولتلها
=هتخطفي الأنظار يابطوطة يامزة
*انت بتعاكس مراتي يالا ده انت ليلتك مش معدية
= سلم قولا من رب رحيم . اي ياحجوج رعبتني انت جيت امتى
*احسن جيت من وقت مزة يابطوط. انت بتعاكس مراتي ف بيتي يااض
= ماهي اللي حلوة ياحمزة
*حمزة! ده انت يومك مش معدي بجد بقى
جريت وأنا بقوله خلاص ياحموزي محدش قالك اتجوز واحده حلوة كده
*برضو بتعاكسها برضو هضربك يالا
=خرجت من الاوضه وانا بقوله زعلان ليه ياحموزي بس . هي حلوة وأنت قمر وأنا الناتج من اجتماع القمر ونجمته الحلوة.
*بتثبتني ياأويس
=فشر مين قالك ده. ده انا بمدحك ياحموزي ياحلو
*طيب يااخويا روح أجهز عشان منتأخرش يلا
= طيارة
لبست بدلتي وخرجت لقيتهم مستنيني . عائشة حلوة اوي شكلها قمر اوي وأمي قمرين وحموزي حبيبي واخد الجمال كله ليه
ركبنا العربية واتوجهنا لبيت حبيبة عشان نكون يعني ماشيين كلنا مع بعض.
خرجت من البيت وأنا بكبر وأسمي بسم الله ماشاء الله الله اكبر الله اكبر اللهم زد وبارك
كانت جميلة اوي فستان أبيض رقيق نقاب وخمار موف درجته جميلة اوي كده عليها كاب أبيض مغطي وشها شكلها قمراية اوي ..قدمتلها بوكيه الورد أخدته مني وركبت العربية مع والدها وأهلها وأنا ركبت مع أهلي قرايبنا كانوا معانا برضو بس كانوا راكبين باص . كانوا عاملين هيصة ف الباصات وبيدقوا ع الدف ويغنوا وحاجة اخر قمر شغلت كاسيت العربية أغنية ياللي كنتي في بالي
غنت عائشة مع الأغنية وغنينا كلنا
= دايما أنا بدعي بيكي ياللي كنتي في خيالي انتي نصيبي مكتوب
& بسأل ربي في صلاتي إنه يعطرني فيكي وربي عالم بحالي جمع فرح قلوب
= والليله جينا بالفرحة وعروسة في أحلى طرحة نورها يملى المكان ضحكتها فيها أخلاق ودين
خلصت الأغنية وكلنا مندمجين وبنغني معاها كل حاجة كان شكلها جميل . الباصات كانت متزينة بما ان الباصات لناس من عيلتنا فكانوا مزيننها بشكل بسيط وعربيتنا عليها ورد ومتزينة وكذلك عربية حبيبة كل حاجة كانت مبهجة وشكلها جميل وبعد ساعة ونص في الطريق وصلنا الحمد لله كان باقي عشر دقايق على أذان العصر دخلنا استعدينا للصلاة وقعدنا نذكر الله لحد ماالأذان أذن وأقيمت الصلاة صلينا ومن جمال الجامع الأزهر الوافدين اللي فيه والشيوخ اللي بيصلوا بالقراءات الشبخ صلى برواية خلف عن حمزة الرواية المحببة لمعظم دارسين علم القراءات. خلصناصلاة واتوجهنا لركن ف المسجد وجلس الشيخ وبدأ بالعقد حطيت ايدي في ايد عمي وقلبي مش موقف نبض يارب كرمك واسع اوي يارب لطفك بيا كبير اوي
£قول ورايا ياأستاذ . زوجتك ابنتي
^زوجتك ابنتي
£موكلتي
^ موكلتي
£البكر الرشيد
^البكر الرشيد
£ زواجاً شرعياً على سنة رسول الله
^ زواجاً شرعياً على سنة رسول الله
£ وعلى مذهب أبي حنيفة النعمان
^ وعلى مذهب أبي حنيفة النعمان
£ اتفضل يادكتور قول ورايا
قبلت زواجها
= قبلت زواجها
£زواجاً شرعياً على سنة رسول الله
= زواجاً شرعياً على سنة رسول الله
£ وعلى مذهب أبي حنيفة النعمان
= وعلى مذهب أبي حنيفة النعمان
£ بارك الله لكما وبارك عليكما وجمع بينكما في خير . بالرفاء والبنين ان شاء الله
= كنت بردد الكلمات بقلبي مش بلساني كنت بتنفض مع كل كلمة كان قلبي بيرقص
مضيت وبصمت ومالك اخد الدفتر عشان هي كمان تمضي وتبصم وخلصنا الإجراءات. الناس كلها بتباركلي مصرين ووافدين حضروا العقد بقيت بعد الوقت لأجل أشوفها قلبي مشغول بيها . قعدنا مدة ف الجامع وبعدين رنينا عليهم عشان نتصور عملنا سيشن أنا وهي في الجامع كلنا اتصورنا أستاذنت والدي وأخدتها معايا وأهلي ف العربية. وهما ف العربية التانية. روحنا ممشى أهل مصر وقفنا على النيل شوية اتصورنا وزقططنا استأذنت منهم أخدها ونتمشى شوية لوحدنا وعمي وافق . وعرفتهم اني هنتأخر وهنبعد عن هنا شوية عشان زحمه . فتحت باب العربية وهي ركبت وبدأت أسوق شغلت الكاسيت على أغنية كتبوا كتابك يانقاوة عيني وبدأت اغني مع الاغنية مديت ايدي ليها وقولتلها هاتي ايدك لو تسمحي . كانت خايفة ومتوترة شوية بس مسكت ايدي بوست ايديها وأنا بقولها كل سنين العمر وانتي معايا وجمبي وأجمل مافي الدنيا كلها عاوز اوعدك اني عمري ماهسيب ايدك أبداً وهكون معاكي ع الحلوةوالمرة ربنا مايجعل فيه مر في حياتنا
بصتلي وقالتلي يارب
قولتلها لو حابة ممكن تنزلي النقاب عادي ازاز العربية أسود ومش بيكشف .
رفعت الكاب عن عيونها ونزلت النقاب اتفاجأت بالبدر قاعد.معايا
= وقفت العربية ولبستها التاج وبوست راسها و قولتلها اللهم بارك اللهم بارك. الله يحفظك من كل سوء ياحبيّبَتِيّ ويديمك ليا
كانت خجولة اوي حاولت ألطف الجو و قولتلها ع فكرةانا زعلان منك اوي
ردت عليا بسرعه ولهفة حاولت تداريها _ ليه . اي اللي حصل
= مقولتليش رايك ف الورد ولا تارة الخطوبة ولا اي حاجة
اتنهدت براحة وقالتلي
_كانوا جُمال اوي وكانت كل حاجة جميلة اوي والنهاردة كل حاجة جميلة
= انتي أجمل من الكون كله
___اتكسفت وسكتت تاني
= غمضي عيونك بسرعه
طلعت التارة اللي عليها اسمائنا والمنديل والدرع
_ الله شكلهم جميل اوي بجد .تسلم ايدك
= أخيراً نطقتي . يسلم قلبك ونبضه يارب
_ بس مكان البصمة نشف هنبصم ازاي
= ودي تفوتني برضو . معايا البصامة
_ بسرعة بسرعة
= ضحكت وانا بقولها حاضر يلا بينا
_ بصمنا كل واحد لوحده ف الخانه تحت اسمه وبعدها احنا الاتنين ف خانة اسمائنا سوا اتصورنا بالمنديل والتارة اللي كان مكتوب عليها
((فتلاقت الأرواحُ بعد شتاتِها
وحنَا علينا العُمرُ وابتسمَ القدَر :)) ♥️
صَوّرتها بالورد والتاج والدرع شكلها كان جميل اوي ويخطف .
=غمضي عيونك تاني بقى
_ تاني . اهو
طلعت تورتايه عليها اسمائنا وتاريخ كتب كتابنا وطلبت منها تفتح عيونها
_ الله بجد اي القمر ده شكلها تحفه. انا هستخسر أكلها
= نتصور معاها بس !
_ نتصور معاها
وفعلا اتصورنا معاها بس اتس اوك بعد كده أكلناها وطبعا باقيها ركناه للحبايب
= قولتلها غمضي عينك تالت
_ لا بقى اي ياأويس فيه اي
= ياعيون أويس أول مرة أحس بحلاوة اسمي كده
اتكسفت ووشها أحمر وسكتت
= خلاص خلاص متقلبيش فراولة كده
اخر مرة غمضي عينك بس
غمضت عيونها وطلعتلها الهدية
_ الله دي هدية ليا!
= أكيد.. افتحيها يلا
فتحتها وظهر على وشها علامات انبهار .الله بجد ياأويس
= طلعي وشوفي
بدأت تطلع اول بوكس واللي كان فيه مصاحف وكتب قراءات اي كتاب او مصحف ممكن تحتاجه خلال دراستها لعلم القراءات وكشاكيل ونوتات وأدوات شكلها جميلة ولطيفة تحفزها على طلب العلم .لقيت عيونها دمعت وبصتلي بفرحة وهي بتقرأ المسدج اللي ع البوكس ” أَعِدُكِ أن أكونَ لكِ عوناً في طلبِ العِلْم وأن نُجاهد سوياً لتربية أطفالنا تربية صالحة ” فتحت البوكس التاني واللي كان فيه جميع أنواع الكاندي والشوكليت والسناكس ابتسمت وهي بتقرأ المسدج اللي ع البوكس ” ودول ياست البنات عشان تنقنقي وانتي بتذاكري ” فتحت البوكس التالت واللي كان فيه ادناءين وملحفاه وفستان وبوكس خمارات وأنقبة ابتسامتها زادت وهي بتقرأ ” كحورية انتي من الجنة. أَسرتني عند رؤيتك بلباس أمهات المؤمنين ” فتحت البوكس الرابع واللي كان فيه كل الأدوات والمستحضرات اللي ممكن اي بنت تحتاجها ودي مكتبتش مسدج عشان معرفش حاجة لأن عائشة هي اللي كانت بتكلم الاونر وانا بطلب البوكس و حان وقت اخر بوكس كان مكتوب عليه مسدج ” إنما نتزوج ليخرج الله من أصلابنا من يعبد الله حق عبادته” فتحت البوكس واللي كان أفضل الكتب اللي بتتكلم عن تربية الأطفال على الدين الصحيح وازاي تتعاملي كأم . خلصت وبصتلي بفرحة وهي بتعيط وقالتلي
_ انا مش عارفة ولا قادرة أعبر باللي انا حساه. أشكرك ازاي؟
= مفيش بينا شكر انتي مراتي وحياتك حياتي وأنتي أنا
_ لقيتها بتمد ايديها تمسك ايدي اللي اتخلت عنها من وقت مابدأت أطلعلها ف المفاجأت وباستها وقالتلي
_ الله يديم وجودك ويجعلنا أزواج صالحين
آمنت على كلامها ودعاءها وقولتلها تعدل نقابها عشان ننزل نشم هوا النيل واجهت صعوبة شوية ف انها تظبطه كما كان بس مش أوسو اللي حاجة تعطله ظبطته معاها ومشينا حالنا ولبستها الكاب ونزلت فتحت الباب واخدت ايديها حاوطتها بايدي واتمشينا شوية ع النيل الهوا جميل ومنعش فيه نسبة سقعه بس الحقيقة اني ف دفا لاني محاوطاها ولأنها جمبي اتمشينا كتير ودردشنا وبدأت تاخد عليا وتضحك معايا وتتفاعل أخيرا استوعبت اني زوجها كانت قعدة رومانسية مليئة بالصور والدرة المشوي وحمص الشام وايس كريم ولغبطة أكل بس فداها الدنيا قولوني هيسفلتني لما أروح بس فداها برضو هو انا بتجوز كل يوم يعني!
بس الحلو ميكملش لقينا أبي بيرن عليا عشان نروح ليهم . رجعنا لمكان العربية وركبنا وروحنا ليهم لقيناهم عاملين هيصة كبيرة وبيغنوا ويرقصوا وحاجة اخر قمر قعدنا هيصنا معاهم شوية وبعدين لقينا مالك اخدني ع جمب وبيقولي
¥ماتيجي نخلي الفرح فرحين يابرو
= مش فاهم عاوز اي برضو
¥ انا طالب ايد عائشة
= وانا مش هلاقي أنسب منك لاختي بس الراي رأي والدي ورأيها
¥ مانا خايف أقول لعم حمزة
= تعالى وانا معاك خايف ليه أصلا
كلمنا والدي ورحب بالموضوع بس الرأي ف النهاية يرجع لعائشة .خلصنا كلامنا ورجعنا ليهم تاني نهيص ونفرح
الوقت اتأخر اوي ف قولنا نمشي بقى . وصلت أهلي البيت وبعدين وصلت حبيبة اخدت رقمها وهي طلبت مني أكلمها لما اوصل بالسلامة وأنا طبعا قولت سمعاً وطاعة يامولاتي
= السلام عليكم ورحمة الله وبركاته
_ وعليكم السلام ورحمة الله وبركاته
وصلت بالسلامة ياأويس؟
= وصلت ياعيوني .
ها قوليلي عجبك اليوم
_ اوي اوي ياأويس بجد كل حاجة جميلة كل حاجة حلوة بوجودك ولمساتك فيها ربنا يجمعنا عاجلاً غير آجل
= أول مرة اعرف انك بتدعي ربنا يجمعنا
_ انا بدعي من زمان ياأويس من أول مرة اتقدمتلي فيها بدعي إنك لو الخير ليا ربنا يجمعني بيك قريب اوي
= اومال كنتي عاوزة تسيبيني ليه
_ مش بايدي زي ماقولتلك خايفة وخايفة تتكرر نفس الحاجة
= قصدك خطيبك الأول
_ مش مهم مبحبش أفتكر بس ف نفس الوقت بحمد ربنا أنه عوضني بيك
= يافرحة قلبي يافرحة قلبي . هموت منك كده
_ بعيد الشر عنك
= يديمك ليا ياحبيبتي يارب
_ ويديمك يارب .يلا روح نام عشان الشغل
= حاضر
_ تصبح على خير سعادة
= وانتي من أهلي
قفلت الفون وأنا مش مصدق أخيراً حلمي اتحقق . نمت برتياح شديد وانا متشوق لتاني يوم عشان أسمع صوتها .
_____________________
عدت الأيام وأويس أثبتلي حبه بجد هو مش محتاج يثبت أثبتلي اني اختارت صح واني غلطت لما فكرت اسيبه كل فعل كان بيعمله كان عاوز يراضيني باي طريقة مفتكرش انه مرة زعلني منه او سبني زعلانه او مضايقه أويس جميل بشكل يخطف القلب وحقيقي هو خطف قلبي أصلاً
____
النهاردة فرحنا وكمان فرح مالك وعائشة. كان يوم جميل بوجود أويس جمبي وفرحتي بعائشة و أخويا .كان يوم بسيط وهادي وجميل اتبسطنا جدا وانا اتبسطت بوجود حبيبي ونور العين اللي كانت العيون كلها عليه ربنا يحفظه ويديمه ليا .
____________
سطور حكايتنا كتبت نهايتها وكانت أحلى نهاية باجتماعنا سوا وفرحة قلوبنا بقربنا.
#«فلما اجتمعنا قلتُ من فرحي بهِ
من الشعر بيتًا، والدّموعُ سواقيا
وقد يجمعُ اللهُ الشتيتينِ بعدما
يظُنّانِ كل الظنَّ أن لا تَلاقِيَا♥️>>
تمت……
- يتبع الفصل التالي اضغط على (رواية ابتلائي ) اسم الرواية