رواية خدمة من الجن العلوي كاملة بقلم محمد مهني عبر مدونة دليل الروايات
رواية خدمة من الجن العلوي الفصل الاول 1
في مسلسل المداح ظهرت شخصية وكانت جن من ملوك الجن العلوي المسلم.. وكانت هي تاج!.. والمفروض أنها كانت خدمة روحانيه لصابر المداح..
هو بقى فعلا ممكن يكون حد ليه خدمة من الجن العلوي؟
انا جاي النهاردة احكيلكم تجربة مرعبه جدا حصلت مع حد من المتابعين لقصصي.. هو بعتهالي وقالي احكيها لأنه محتاج تفسير ليها...
بيبدأ صديقنا هشام يحكي حكايه ويقول...
أنا بيحصل معايا حاجات غريبة من صغري ومش عارف ايه الحاجات دي.. وفيه ناس قالت لي ان معايا خدمه؟
خدمه بمعنى خدمة من الجن المسلم!..
انا هحكيلكم اللي بيحصل معايا وياريت الاقي تفسير للي بيحصل معايا...
خليني اعرفكم بنفسي انا هشام وعندي 28 سنه.. من المنوفيه.. وقاعدين في مزرعه أبويا شغال فيها.. وحياتنا حياة بسيطة جدا..
الحكاية بدأت لما امي تعبت ف ابويا اخدها ونزل بيها القاهرة عشان تعمل عملية جراحية في إحدى المستشفيات... انا وقتها كنت صغير عندي حوالي 10 سنين.. وابويا سابني انا واخويا التوأم .. ابويا لما سافر للقاهرة سابنا مع واحد شغال معها ف المزرعه وقاله ياخد بالو مننا..
في يوم كنت قاعد انا واخويا وصاحب والدي بنتفرج على التلفزيون.. في اوضة بالمزرعه.. والباب كان متوارب.. وفجأة واحنا قاعدين سمعت صوت تزييق الباب وشوفته وهو بيتفتح ودخل الاوضة حد أبيض اوي.. مالوش ملامح خالص.. هو كان شفاف زي الخيال لكنه أبيض اوي.. ولابس عمه على راسه بيضه.. ووشه بيطلع نور! انا خفت وقلت لاخواتي شايفين الراجل ده؟ قالولي مافيش حد! وانا كنت شايفه.. هو خرج بعدها!..
انا خوفت اوي.. تخيل انك تشوف حد وتيجي تقول للي جنبك شايف اللي انا شايفه.. يقوم يقولك لأ! وعشان كده انا خوفت اوي!..
ولما جه الليل وجيت أنام.. لقيت باب الاوضة اتفتح.. ودخل منه نفس الراجل الأبيض اللي عامل زي الخيال.. وقرب مني وكنت خايف اوي.. هو مد أيده على راسي وطبطب عليا وقالي ( ماتخفش مني.. احنا جايين نقعد معاك شوية) وأول ما قال كده شوفت ناس بنفس شكله داخلين عليا.. شفافين.. خيال ابيض ولابسين عمم بيضه وجلاليب برضه بيضه!...
انا خوفت اوي وفضلت اعيط لحد ما لقيت نفسي نمت.. وصحيت تاني يوم الصبح عادي..... المزرعة اللي قاعدين فيها كبيره وف مزرعه جنبنا مزروع فيها خوخ.. وانا كنت بروح اعمل حاجة أسمها تصييف.. وده اني بنقي الخوخ البايظ واحطه ع جنب.. فالمهم قلت أروح اعمل تصييف للخوخ.. وأنا شغال شوفت حاجة غريبة اوي؟ شوفت كائن طويل بطول ال 3 متر.. لابس لبس الكاهن.. عبايه سوده وليها غطا للراس اسود برضه! قمت من مكاني وأنا خايف.. وكان ماسك منجل كبير وطالع منها حديده طويله بالعرض! عارفين الساحرات اللي بنشوفهم ف الأفلام هو زيهم!.. كان واقف بعيد لكنه قرب عليا.. و مشيته كانت غريبه.. رجليه مرفوعه من ع الأرض.. فضل يقرب عليا.. ويختفي.. والاقيه ظهر ف حته تانيه.. ويختفي لحد ما لقيته عندي! أنا معرفش أزاي ماخوفتش.. وقفت قصاده وقلت له انت ايه وعايز مني ايه.. وبعديها اختفى!...
ولما روحت حكيت لاهلي.. في الأول ماصدقوش.. لكن لما جيت وشوفت قطه سوده.. وفضلت اشوفها كتير.. كانت تظهر فجأه وانا شغال ف المزرعه وتقوم مختفيه.. هتقولولي ما يمكن قطه عابره.. لكن لأ دي كانت تظهر وابص عليها ف الاقيها اختفت من المكان اللي واقفه فيه من غير ما تتحرك!..
وفي مره كان اخويا معايا.. وظهرت.. فصرخت ف اخويا اهي القطة شايفها؟ فطلع شايفها.. وشافها وهي بختفي.. وعشتن كده اهلي صدقه.. فجابوا شيوخ.. وفي شيخ فقال ان دي خدمه.. والكاهن ده زعيم الاشخاص البيض اللي بيظهرولي! وف شيخ لما جه قالي وريني كان بيظهروا فين..
فقلت له هنا وهنا.. فقال ان المكان فيه مقبره وكنوز!..
خصوصا ان المكان اللي ظهر ف الكاهن.. كان لما أبويا بيروح يشتغل مع الناس هناك.. كانوا بيلاقو طوب بيتحدف عليهم من الحته اللي ظهر فيها الكاهن!...
أنا فضلت على كده أشوف الناس البيض.. فترة كبيره.. وكنت لما أقرأ قرآن كنت بشوفهم قاعدين حواليا.. والاوضة وقتها بتكون منوره اوي.. حتى لو ليل كنت تحس ان الاوضة داخلها شمس.. وغير لما كنت اتعب.. كنت اقول في سري مثلا انا عندي برد.. فالاقيهم يقربوا مني ويحطوا ايديهم ع جسمي فاخف على طول!...
ومش كده وبس.. كنت بحلم أحلام غريبة واحس بيها وأقدر كمان اسيطر على الحلم.. والحلم اللي بحمله بيكون حلم واحد بيتكرر.. كنت بشوف نفسي بتعلم الطيران.. الطيران بجسمي! كنت مثلا انط من ع الأرض واروح مرتفع فوق أوي.. واروح نازل زي الطيارات لما تنزل.. وهكذا لحد ما بقيت أعرف أطير واروح لاماكن بعيده.. ومن الاماكن اللي روحتها قطر.... كان في قطر مركون من سنين حنب مدرستنا كده.. أصل المدرسة بتطل ع القطر.. المهم كنت نفسي ادخله.. فرحت بهناك ودخلته.. واتفرجت عليه.. ولما صيحت وعشان اتأكد من الي شوفته.. رحت للقطر بعد المدرسة.. واللي شوفته جوه زي اللي شوفته ف الحلم بظبط!...
فضلت على كدا كتير لحد ما كبرت وبقى عمرى 20 سنه... سبنا المزرعه ورحنا قعدنا ف شقة.. وبرضه كنت بشوف الأحلام دي.. ولما حيكت لامي. وابويا قرروا يجيبو شيخ كان الشيخ من اكتوبر.. المهم جه وابويا حكاله ف الشيخ قال بالنص ( انا هشيلهم عنه) ومن وقت ما الشيخ ده جه وقال كده وانا مابقتش اشوف الناس البيض اللي بيجولي!...
لكني بقيت اشوف حاجات تانيه؟!
عفاريت وشياطين!..
الدجال ده عمل فيا حاجة واتأذيت بسببها؟!
- يتبع الفصل التالي اضغط على ( رواية خدمة من الجن العلوي ) اسم الرواية