رواية حكاية قمر كاملة بقلم هاجر محمود عبر مدونة دليل الروايات
رواية حكاية قمر الفصل العشرون 20
قعد فارس مع سيف في بيته وفضلوا يتكلموا سوا وبعدين سكتوا شويه وكل واحد كان في دنيا تانية لحد ما سيف سأله: فارس!! نويت على ايه؟
فقال فارس وهو موطي راسه وحاطط ايديه عليها: هرجع الشغل، ملهاش لازمه الاجازه
سيف: انا مش قصدي عالشغل
رفع فارس راسه وبصله وقال: فاهم قصدك، بس انا لسه ماخدش قرار
سيف: هسألك سؤال، انت….
قاطعه فارس: من غير ما تكمل، ايوه بحبها بس….
سيف: بس ايه؟
فارس: مي، اعمل معاها ايه؟
سيف: هحكيلك حاجه صغيرة وبعدها احكم
بدأ سيف يحكي يوم ما راح لوالد فارس بالتفصيل وبعد ما خلص قاله: عارف انك زعلان مني، بس انا عملت كده لمصلحتك
طبطب فارس عليه وابتسم وقال: عارف ومش زعلان منك، انت قولتها قبل كده ده حقك عليا، وانا كنت حاسس كمان ان في حاجه غلط فيا
سيف: ازاي؟
فارس: وانا معاها كنت حاسس ان في حاجه مكتفاني وعقلي بيقولي ان في حاجه غلط وقلبي مش قادر يحس بمشاعر ليها
سيف: طيب كويس اننا لحقناك، ودلوقتي هتعمل ايه؟
نفخ فارس بضيق وقال: مش عارف، مش قادر افكر او اعمل اي حاجه
سيف: انت حاسس بإيه؟
فارس: غضب ابويا عليا خلاني تايه وحاسس بخسارة كبيرة، واكيد امي الله يرحمها غضبانة عليا برضه والا مكانش شغلي وحياتي وقفوا في ثانية كده
سيف: والعمل
فارس: مش عارف، انا عاوز ارضيهم بس مش عارف ازاي
سيف: انت محتاج وقت تصفي دماغك وتهدا وتوصل لحل
اتاوب فارس بتعب وقال: صح
سيف: طيب قوم نام الساعة داخله على عشرة وربنا يحلها
فارس: ماشي
شاورله سيف عالاوضه اللي هينام فيها وسابه وراح ينام، اما فارس فدخل الاوضه وهو بيفكر وسرحان وفرد جسمه عالسرير ونام
*************
وبعد العصر صحي فارس مخضوض وبينهج مش عارف ياخد نفسه لحد ما هدي، فلقى نفسه لسه بجزمته وهدومه فقام غيرهم ولبس شورت قصير وخرج قعد في بلكونة الصالة بيشرب سجاير، في الوقت ده كان سيف صحي وقام لقاه بالمنظر ده فنادى وهو بيحدفله تيشيرت: انت مش عالبحر هنا، في جيران بنات
اخد فارس التيشيرت ولبسه وهو بيقول: مفيش حد واقف
فراح سيف قعد قدامه وقاله: برضه ياخويا انت مش عالبحر، هتاكل ايه؟
فارس: اي حاجه، انا مليش نفس اصلا
ففتح سيف تليفونه وطلب اكل من بره وبعد ما خلص سأله فارس: انت عاوز تفجرنا، ليه السي فود ده كله، ده احنا اتنين بس
سيف: ياعم انت مالك، ما تاكل وخلاص
فارس: خلاص ياعم فهمت
ضربه سيف بهزار وسأله: هترجع الشغل امتى؟
فارس: بكره عشان خاطرك بس
سيف: ماشي ياخويا وايه اللي صحاك؟
فارس: قومت على كابوس
سيف: خير ايه اللي حصل، احكي
فارس: اول مرة امي تجيلي وهي بتعيط ومش راضية تبصلي ولا تقرب مني ومعاها صبا بنت اختي وكانت عروسة بس بتعيط وقالتلي انت السبب وزقتني وقعت في حفرة كبيرة اوي ولما وصلت لاخرها لقيت نفسي نايم في مكان عمال يضيق عليا ومش عارف اخد نفسي، وصحيت من النوم مش قادر زي ما اكون مضروب علقه
سكت سيف شوية وقال: عرفت تفسيره؟
فارس: ايوه
وقعدوا يتكلموا لحد ما سيف قال بغيظ: ما انا بأدن ف مالطه
فارس: بس يلا
فسمع فارس اغنية جاية من بيت حد من الجيران وفضل يدندن معاها وسرح، وبعد ما خلصت اشتغلت اغنية تانية فسأل سيف: انت عندك جيران مفارقين حد؟
ابتسم سيف لانه عارف صوت الاغاني جاي منين وقاله بتريقه: بعيد عنك مفارقين ناس ميعرفوش قيمتهم
فارس باستغراب: انت تعرف جيرانك كلهم؟
سمع سيف جرس الباب فرد على فارس وهو قايم يفتح الباب: لا مش كلهم
وسابه وراح يفتح اما فارس فركز مع الاغنية اللي شغاله وفجأه افتكر قمر وفضل يغني مع الاغنية لحد ما سيف نادى عليه وراحله عشان يتغدوا سوا وفضلوا مع بعض لحد ما اليوم خلص وتاني يوم حضر فارس شنطته وحطها جنب باب الاوضه ونادى على سيف فراحله وسأله: في ايه؟
فارس: انا همشي، عاوز حاجه؟
فطلع سيف ظرف صغير وحطه في جيب فارس وقاله: خلي ده معاك
فارس باستغراب: ايه ده؟
سيف: افتحه لما تنزل من هنا
فارس: ماشي
سيف: توصل بالسلامة
فارس: الله يسلمك
ونزل ركب عربيته وسافر لشغله…….
*****************
نروح لقمر
رجعت قمر من الجامعة ودخلت اوضتها وهي بتدندن اغنية سمعتها فشغلتها وسمعتها تاني وهي بتغير هدومها وبعد ما خلصت فتحت اللاب توب تشتغل عليه وشغلت playlist وبدأت اغنية
🎶🎵🎶🎵🎶🎵🎶🎵🎶🎵🎶🎵🎶🎵🎶
في يوم هنعوووود… ده بينا وعوووود…
وفي غيابه اكيد لسه الامل موجووود
قصاد عيني… في كل مكان…
قصاد عيني في كل مكاااااان…
ومن تاني اكيد راجعين… انا دايب وكلي حنين…
ولا عمري ابيع لو مين… قصاد عيني…
🎶🎵🎶🎵🎶🎵🎵🎶🎵🎶🎵🎶🎵🎶🎵
سمعت قمر الاغنية دي وافتكرت فارس وبدأت عينيها تدمع وعيطت فرفعت صوت الاغنية عشان محدش يسمع عياطها، في الوقت ده اتصلت عليها چنى فردت عليها قمر، وبعد السلامات سمعت چنى صوت الاغنية فسألتها: ليه الحزن ده؟
قمر بكدب: ابدا مفيش
چنى بعتاب: لسه بتفكري فيه؟
قمر بحزن: غصب عني
وفضلوا يتكلموا مع بعض شوية لحد ما قمر قالتلها: بقولك ايه انا هجيلك احسن
چنى بسرعة: لا انا مش في البيت
فبصت قمر على بلكونه چنى وقالتها: بس ده في حركة ف البيت اهو
چنى: ايوه ده جوزي ومع واحد صاحبه بايت معاه انما انا مش ف البيت
قمر: طيب خلاص اما ترجعي نكمل كلامنا
چنى: ماشي، فوقي كده وروحي كملي مشروعك
قمر: حاضر، سلام
چنى: سلام
وقفلوا سوا ورجعت قمر تشتغل عاللاب توب تاني لحد ما والدتها ندهت عليها عشان يتغدوا سوا فراحلتها قمر وبعد ما رصت السُفرة وقعدوا سألتها: اومال فين بابا واياد
نبيلة: عندهم شغل كتير الفترة دي فيتغدوا سوا
قمر: طيب
نبيلة: قوليلي بقا يومك كان عامل ازاي؟
حكيتلها قمر عن يومها في الجامعه، وبعد ما خلصت سألتها نبيلة: لسه حطاكي في دماغها برضه؟
قمر: براحتها، انا مليش دعوه بيها، عاوزه اخلص السنادي وارجع اكمل شغل مع اياد وبابا
نبيلة: والجواز يا بنتي؟ انا عاوزه افرح بيكي
قمر بحزن: لسه النصيب مجاش
نبيلة: انتي لسه بتفكري في فارس؟
قمر باستغراب: فارس!! حضرتك عرفتي منين؟
ابتسمت نبيلة وقالت: انتي بنتي واحس بيكي من غير ما تقولي، وعارفه انه سابك
سكتت قمر ومعرفتش ترد
فسألتها نبيلة بعتاب: ليه خبيتي عليا كل ده، مش انا ماما وصاحبتك
دمعت قمر وقالت: ايوة، انا اسفه يا ماما
طبطبت نبيلة عليها وقالتلها: بكرة ربنا يعوضك
قمر: يارب
ورجعوا يكملوا غدا وبعد الغدا فضلوا قاعدين سوا مستنيين طارق واياد لحد ما وصلوا واتشعو سوا واتكلموا وبعد كده كل واحد دخل اوضته واليوم انتهى……
**************
بعد يومين
عند طارق واياد في الشركة
كان اياد بيراجع الحجوزات والصفقات في مكتب طارق
اياد: كده حجوزات السياحة تمام هنطلع الفوج الاول بعد يومين
طارق: وكل حاجه جاهزه؟
اياد: طبعا، انا مأكد عالناس بنفسي وهطلع مع الفوج ده كمان
طارق: هايل، نشوف التجارة
اياد: في مزاد معدات خشب حلو قدامي بس في مشكلة
طارق: ايه؟
اياد: في كذا شركة تانية عاوزاها وهو بصراحة ميتسابش
طارق: والعمل
اياد: هشوف كده المزاد هيرسى على كام
طارق: افتح كده موقع المزاد ده نشوف اخره كام
دخل اياد على صفحة المزاد وشاف السعر وقال لطارق عليه فرد طارق: حلو اوي، بس الشركات دي مش هتسيبه
اياد: ايه رايك لو دخلنا حد منهم شريك معانا
طارق: فكرة برضة
اياد: بس انهي شركة
طارق: هنشوف اللي داخلين المزاد ونختار وانت عارف هنختار ازاي
اياد: ماشي
واتصل بالسكرتير وقاله: هاتلي اسماء الشركات اللي داخلين مزاد معدات الخشب
السكرتير: حاضر يا فندم
طارق: تعالى نشوف الحسابات بقا عشان المزاد ده
اياد: ماشي
***********
وبعت للمحاسبين عشان يحضروا الاجتماع اللي هيتعمل دلوقتي، وبعد ما حضروا المحاسبين بدأ الاجتماع وطارق واياد راجعوا كل حاجه حصلت ف الشركة الفترة الاخيرة، وبعد ساعتين الاجتماع خلص ودخل عليهم السكرتير وناول طارق ملف وقال: اتفضل يا فندم
طارق: ايه ده؟
السكرتير: ملف باسماء الشركات وبيانات اصحابها اللي داخلين المزاد
طارق: طيب، اتفضل انت
وناول اياد الملف وفتحه وبعد ما قراه بدأ يشاور على كذا شركة وهو بيقول: عندك دي ودي ودي ودي كمان
في الوقت ده دخل عليهم السكرتير وهو بيقول: بعد اذنك يا فندم
طارق: خير
السكرتير: في شركة دلوقتي لسه باعته طلب شراكة مع حضرتك في المزاد الجاي
طارق: شركة ايه؟ ومين صاحبها؟
السكرتير: المصري، وصاحبها رجل الاعمال سالم المصري…..
- يتبع الفصل التالي اضغط على ( رواية حكاية قمر ) اسم الرواية