Ads by Google X

رواية سلف و دين الفصل السادس و الاربعون 46 - بقلم لولو محمد

الصفحة الرئيسية

  رواية سلف و دين كاملة بقلم لولو محمد عبر مدونة دليل الروايات 


 رواية سلف و دين الفصل السادس و الاربعون 46

فى شقه ندى
حسام يفتح الباب و يدخل شايل اكياس كتير ندى تطلع تجرى من جوه
ندى / على ما افتكرت
حسام يبصلها و يدخل الاكياس المطبخ تجرى وراه
ندى / كنت فين
حسام / كنت مكان ما كنت هو مش ده اللى انتى عوزاه توزعيني نص الاسبوع
ندى / طب ما بتردش على التليفون ليه
حسام / عشان ما ارجعش عشان لا قادر ارجع و لا عاوز ارجع
ندى / امال ايه اللى رجعك
حسام / بجيب طلبات للبيت
ندى / بمزاجك هو مش يمكن كنت محتاجه حاجه
حسام / كنتى محتاجه ايه البيت و مليان اكل و بامبرز و لبن و كل اللى محتاجاه عندك و بزياده واتحدى ان يكون ناقصك حاجه اصلا ومع كدا جبت
ندى / بفكرك انك سايبنى انا و بنتك فى بلد غريبه لوحدنا
حسام / لا والله و ما كانتش هتبقي غريبه و انا متجوز
ندى / كنت هبقي عارفه انت فين عايش و لا ميت
حسام / فارق معاكى يعني
ندى / انت بتكلمنى كدا ليه
حسام / عوزانى اكلمك ازاى اقيدلك صوابعى العشره شمع تقوليلى مش طايقه نفسك ابعد و اريحك تتخانقى معايا انتى عاوزه ايه
ندى / مش عاوزه حاجه تحب اغرفلك
حسام / واكل انا جاى اقعد شويه مع حبيبه و همشي و كل كام يوم هجيبلك حاجات للبيت و لو احتاجتى حاجه ابعتى رساله
ندى / اريح برضه
حسام يبصلها و يسيبها و يدخل الاوضه ندى تشوط الحاجات اللى جايبها و تطلع تقعد فى البلكونه و هى مضايقه و بتمنع دموعها تنزل بالعافيه ما تقدرش تعيط حسام يعدى فى الصاله يشوفها يبصلها ثانيتين و يروح ياخدها فى حضنه و يطبطب عليها
حسام / طب اعمل ايه عشان اريحك طيب
ندى / اقتلنى
حسام / و اعيش ازاى يا ندى طب بلاش انا حبيبه ما فكرتيش فيها
ندى / لو ما كانتش حبيبه كنت موت نفسي من زمان
حسام / لا اله الا الله … تحبى تخرجى
ندى / لا
حسام / طب اكلتى
ندى / لا
حسام / اغرفلك تاكلى معايا
ندى / لا ما ليش نفس
حسام / ما لكيش نفس و لا بوظتى الاكل زى كل مره
ندى تضحك غصب عنها
ندى / طب على فكره طعمه حلو
حسام يبتسم و ياخدها جوه
حسام / طب تعالى دوقيني تعالى ربنا يهديكي .. انتى طالعه مجنونه لمين
ندى / و انت كنت سبت فيا عقل
حسام / بجد بقي … كنتى قلقانه عليا … حتى لو فرضنا على اساس ابن عمك بس قلقتى عليا
ندى / قلقت
حسام يبتسم
حسام / عشان خفتى و انتى لوحدك صح
ندى / انا ما اعرفش حد تانى هنا ما اعرفش هتغيب قد ايه و لو حبيبه احتاجت حاجه هعمل ايه
حسام / يعني لو كنت رديت على التليفون و غبت زى ما غبت ما كنتش هفرق معاكى صح
ندى / اكيد كنت هتفرق
حسام يبصلها باستغراب
ندى / مهما كان اللى بينا … انا برده بحس بالامان فى وجودك … صحيح بخاف منك … بس على الاقل عندى امل انك هتحبيني من الدنيا … هتحمى حبيبه على الاقل
حسام / انا عمرى ما هسمح لحاجه تاذيكوا و لا حتى نفسي
ندى / انا كنت بتفزع فى كل مره بسمع خبط على الباب او رجلين على السلم كنت بكلمك مش بترد انا مش فارق معايا نفسي بس كنت بترعب على حبيبه
حسام / انا اسف بس لو كنت سمعت صوتك كنت رجعت جرى
ندى / انا داخله انام الاكل عندك لو عاوز
حسام / مش جعان دلوقت تعالى ننام حبه و لما حبيبه تصحى نبقي ناكل و لا نشوف هنعمل ايه
ندى تهز راسها و تدخل معاه الاوضه يبوس راسها و هى بتمسح دموعها
……………………….
على البحر فى اسكندريه
على / اهو انا كل ما كنت اتخنق كنت اجاى هنا و اخد الكورنيش ده مشي ابدا من عند المنتزه و اسرح ما افوقش غير و انا فى القلعه
نور / دى مسافه كبيره اوى انك تمشيها
على / ما بتحسيش بيها و انتى بتتفرجى على البحر و الموج و السحاب و السما
نور / دا انت كنت بتمشيها بالنهار كمان يعني حر و تلزيق و عرق
على / ما انا ما كنتش باجى هنا غير و انا مخنوق و بعدين تلزيق و عرق ايه يجي ايه ده جنب صهد سيخ الشاورما فى عز الصيف بالاربعتاشر ساعه ياختى خليني ساكت
نور / انا كمان على فكره بحب البحر اوى بس من ساعه ما روحت البحر الاحمر و انا علاقتى بالمتوسط اهتزت شويه
على / كلمتى حسام النهرده اطمنتي على حبيبه
نور/ هو انا بظلمك معايا يا على
على / ليه السؤال ده
نور / عشان حوار الخلفه و تعلقك بحبيبه انت نفسك تكون اب
على / لا
نور/ و ايه خلاك متاكد اوى كدا
صمت كتير و على بيحاول يهرب بعنيه من نور
على / كان نفسي كان نفسي اوى زمان بقي كان نفسي اتجوز و يبقي عندى عيال كتير و اثبت لابويا انى اب احسن منه … بس انا عمرى ما حلمت بحاجه و اتحققت
نور / بس انت بايدك تحقق الحلم ده
على / هيفيد بايه العيال الكتير لو انا و امهم مش متفقين مش هجيب عيال اعذبهم فى الدنيا … انا عارف انه نصيب و ان لا انا و لا اى حد له دخل فى كل اللى بيحصل حوالينا و بصراحه ما عدتش عارف لو الدنيا اتغيرت دلوقت هعمل ايه
نور / هتعمل ايه فى ايه
على / فى حياتى و حياتنا انا ما عدتش عارف انا عاوز ايه انا مبسوط بس فى جوايا شوكه صعبه اوى … غارزه فى قلبي كل ما اضحك توجعنى … ده مش من حقك
نور / هو ايه اللى مش من حقك
على / قولت وعود كتير اوى ما قدرتش اوفى بيها وقفت عاجز قدامها اخترت الحل السهل اخترت اكون انانى و اعيش بحجه انى كدا
على يبص لنور و يسكت و هى مهتمه بتحاول تفهم
على / احنا بنتكلم فى ايه
نور / ههههههههههه معنديش فكره بس صدقني انا هموت و اعرف
على يبتسم و يبص الناحيه التانيه
نور/ اتكلم يا على … قول اللى جواك ما تكتموش هترتاح
على / الدنيا دى ما فيهاش راحه يا نور
نور / لا فيها احنا سوا عشان كدا عشان نريح بعض
على / و انا فعلا مرتاح معاكى
نور / بس الشوكه صح … انت طلبت منى ما اتكلمش عنها بس
على/ كل ده عشان سالتك عن حبيبه
نور/ على انا بحبك
على / و انا كمان بحبك والله بحبك و بحب اكون معاكى و بحب نتكلم و نعلب و بحب كل الحاجات الحلوه اللى بينا و الله ببقي مبسوط معاكى و كانى عيل صغير بنسي كل القرف اللى حوليا بنسي اى حاجه و اعيش … بتنفس
على يبص لنور مبتسمه اوى
نور / ارجوك ما تقولش بس
على / مفيش بس يا نور انا راضي بحياتى دى على وضعها و ما عنديش اى استعداد انى اخسرك لا دلوقت و لا بعدين
نور تمسك ايده و هى سعيده
على / ممكن تطمنيني على حبيبه بقي
نور / ممكن بس الاول لازم ارد على كلامك الحلو ده و اقولك انى بحبك جدا جدا جدا يا على و انى انا كمان ما عنديش استعداد اخسرك لا دلوقت و لا بعدين
على يبتسم اوى
نور / عشان كدا بسالك على موضوع الخلفه لانى كل يوم بتعلق بيك اكتر كل يوم بحلم اكتر و النهرده احسن من بكره وجع دلوقت اقل بكتير من وجع بكره
على / انا مش هسيبك وعد مش هقدر صدقيني ما كنتش متخيل انى هتعلق بيكي بالشكل ده و لا احبك كدا
نور / على العموم حبيبه كويسه الحمد لله و زى الفل
على / الحمد لله خفت يعني
نور / اه خفت هى ما كانش عندها حاجه يعني بسيطه الحمد لله
على / الحمد لله و ندى كويسه
نور / اه الحمد لله
على / امال ما كانش بيريحك ليه لما بتساليه عن حبيبه و ترجعى تتصلى بندى و تقولى صوتها متغير انا افتكرت فى حاجه
نور / ما هو طلع الموضوع ما لوش دعوه بحبيبه هو اصله كان سايب البيت الكام يوم دول بس الحمد لله رجع النهرده
على يقوم يقف و يبص لنور
على / سايب البيت !! سايب بنته عيانه و مراته لوحدها فى لبنان و سايب البيت … و طول الفتره دى … نور بصي انا هروح اجيب حاجه من الكشك اللى هناك و ارجعلك
نور / اجى معاك
على / انا بحاول ابعد دلوقت قبل ما انفجر و اقول كلام ما ينفعش يتقال عن اذنك
على يمشي و نور بتابعه واضح عليه العصبيه تتنهد و تبص حواليها
………………..
فى شقه أية
أية / مش كنتى خرجتى معاهم غيرتى جو اسكندريه حلوه اوى
ليلى / يا بنتى انا عمرى كله هنا بس قولت ما تقلش عليهم برده عرسان و عاوزين ينبسطوا مش كفايا كاتمه على نفسهم فى مصر … داهيه لكون كاتمه على نفسك
أية / ابدا خالص بالعكس مسليانى جدا لحسن انا الوقت دا كله بقعده لوحدى لحد ما عمر يرجع من المحل و لو زهقت بروح اقف معاه
ليلى / ربنا يفتحها عليكوا يا بنتى
أية / امين … بقولك ايه ما تيجي نخرج نتمشي على البحر و لا نلف على المحلات لو قادره طبعا
ليلى / و ماله نخرج
أية / فوريره اكون لابسه
أية تجرى على جوه تلبس
………………….
على القهوه تحت بيت عمر
عمر / انت بتعمل فى نفسك كدا ليه
على / انا السبب فى كل اللى هى فيه ده
عمر / باماره ايه ما انت عملت المستحيل عشانها هتعمل ايه اكتر من كدا
على / ما عملتش حاجه وقفت اتفرج زى العاجز قلتلى بدل المره مليون مش هيسكت مش هتقدر عليه فتحت صدرى و عملت عشر رجاله فى بعض
عمر / غدر بيك مش ضعف منك
على / و ما سكتش روحت عشت معاها فى نفس البيت عشان تشوفنى و انا طالع وانا نازل و تسمع من نور اللى بيحصل بينا ضغطها لما هربت و بقت معاه لوحدها معاه
عمر / و هى كان ليها مين هنا يا على ما على يدك لولا انك لحقتها منه يوم فرحك ربنا وحده اللى يعلم كان هيجرالها ايه
… على … انت اخويا الكبير و ليك عليا النصيحه … نور بنت كويسه
على / نور دى عوض ربنا ليا دى نسمه ملاك كدا من السما
عمر / امال بقي
على / كل ما اقرب منها بحس انى بخون ندى انى انانى ازاى اكمل حياتى و ندى بتتعذب
عمر / ما يمكن لو كملت حياتك ندى تقدر تكمل مع حسام تفكيرك فى ندى خيانه لنور على فكره
على يبتسم ابتسامه حزن و استهزاء
على / بخون الاتنين مع بعض يعني وجودى مع نور خيانه لندى و حبى لندى خيانه لنور
عمر / ندى متجوزه و شرعا بقي حرام تفكر فيها اصلا ركز مع اللى معاك انت مش بتقول مريحاك ناقصك ايه ما تنسي و تعيش
على / يا عمر انا مهما حكيتلك مش هتفهم انت عارف انى ما عشتش طفولتى اتاخدت من الدار للنار و شلت الهم بدرى نور بترجعنى طفل تانى معاها بنسي انى شحط كبير بنسي كل حاجه بضحك و افرح و اجرى و اللعب
عمر / فى بس جايه
على / مع ندى بحس انى اب بحس انها بنتى بحس انها بيبي صغير عاوزه اللى يراعيها و يطبطب عليها لما تقع و تعيط فاهم
عمر / و نور ما تقدرش تعوض الجزء ده ما ينفعش يعني تطبطب عليها و على عشان شيلاك هى مش فارقه
على / فارقه بخاف عليها جدا و بتقى ربنا فيها
عمر / ما تجازفش بنور يا على السكه دى هتخسرك الاتنين نور لو ضاعت منك هتندم … بقولك ايه … ما بدل ما البت قاعده لوحدها فوق كدا ما تطلعلها تعوضها عن الخروجه اللى باظت دى
على / افندم
عمر / يا عم انا هقعد هنا استنى الجماعه و لا اقولك انا هروحلهم اللف معاهم و اعزمهم على العشا و احنا جايين هديك رنه
على يبص لعمر باستغراب
عمر / ايه يا عم بتبصلى كدا ليه امال لو ما كنتوش عرسان ما تعيش يا ابنى و انبسط الدنيا قصيره و هى خلقه مليانه نكد ما تضيعش لحظه ممكن تنبسط فيها ما حدش عارف ايه اللى جاى
على / انت عبيط يا عمر
عمر / دا انت اللى تبقي عبيط لو ما طلعتش لمراتك … اقولك
عمر يطلع الموبايل
عمر / قلبي انتى فين … لا خدى راحتك انا زهقت من القاعده على القهوه لوحدى قولت اجى اعزمكوا على العشا و نقضي اليوم … لا لا على ايه … سبيهم لما يبقوا يفتكرونا هم عرسان بقي … تمام انتى فين بقي … خالد ابن الوليد … قشطه مسافه السكه لما هوصل هكلمك اشوف انتى فين بالظبط … تمام يا قلبي سلام
عمر يقفل و يقوم و يطلع فلوس ويحطها على الترابيزه
عمر / اجبلك عشا و انا جاى ؟
على باصصله و ساكت
عمر / هجبلك هجبلك يلا سلام
عمر يمشي و على متابعه فى صمت لحد ما يركب عربيه و يمشي على يفكر ثوانى و يطلع العماره
…………………….
فى شقه ندى
ندى قاعده فى البلكونه حسام يدخل شايل اتنين نسكافيه
ندى / ما قولتليش ليه كنت عملتلك
حسام / بصالحك
ندى / مش زعلانه اصلا بالعكس
حسام / ايه نفسك اطفش تانى
ندى / انا ما عدتش عارفه انا عاوزه ايه
حسام / طب خدى النسكافيه و روقى كدا
ندى تاخد المج
ندى / شكرا
حسام / انتى مش عوزانى زوج … بس انفع ابن عم
ندى تبصله
حسام / ايه رايك
ندى / فى ايه
حسام / نبدا من الصفر نرجع ولاد عم تغمضي شويه عن اللى حصل الفتره اللى فاتت … قبل ما تتكلمي انا عارف انه مش سهل و عارف انى عملت حاجات كتير غلط … بس صدقيني انا بحبك … لا لا بصي من غير حب احنا ولاد عم و فى بينا عشره و هنا مع بعض فى الغربه … هاخد بالى منك و تاخدى بالك منى
ندى / و انت هتقبل بده لحد امتى
حسام / لحد ما اكسب قلبك تانى
ندى / هتصبر يعني
حسام / و انتى مش واخده بالك انا بقالى قد ايه صابر اصلا
ندى / ياريت يا حسام … ياريت فعلا نقدر نرجع على الاقل ولاد عم تانى
حسام / تمام ايه رايك بقي اخدك بكره انتى و بيبو
ندى / لا بكره لا … خليني اقدم السبت هات تورته صغيره و خلينا نعوض عيد ميلادك و انا هعمل فشار و عشا خفيف و نشوف فيلم و كدا احنا الاتنين مرهقين و حبيبه كمان يادوب خارجه من دور عيا … ايه رايك
حسام / اصلا هعوز ايه اكتر من كدا
ندى / تمام
حسام / رجاء بس … خليني انا اعمل الفشار عشان دراعى بيتخلع فى غسيلها مطرح الشياط
ندى تضحك و تبص الناحيه التانيه
حسام / طب والله ما هتلاقي زوج زيي اصلا بس يلا نقول ايه فقريه
ندى تبصله يزغدها بالراحه
حسام / ايه بهزر
ندى تشرب النسكافيه و هى مبتسمه حسام متابعها و مبتسم
…………………
فى شقه عمر
على نايم و واخد نور فى حضنه على سرير فى اوضه بسريرين
نور / حد قالك قبل كدا انك مجنون
على / دا انا معايا ورق رسمي بالموضوع ده
نور / هههههههههههه بس جنانك حلو
على يبوس راسها
نور / بتحبني يا على ؟
على / بحبك
نور/ و انا كمان بحبك اوى ساعات كتير بسال نفسي انا عملت ايه فى دنيتي عشان ربنا يكرمنى بيك
على / ما تغوطيش اوى كدا لتغرقى
نور / مش فاهمه
على / يعني ما حدش كامل و خصوصا انا
نور / و انت ناقصك ايه … انت بتحاول تخلينى امدحك !!!
على / ههههههههههههههههه
على يقوم يطلع غيار من الدولاب
نور / ما خالتش عليا على فكره تقولى انا وحش و انا اقعد اقولك انت جميل انت ما حصلتش
على / انتى ارق و اطيب قلب قابلته فى حياتى … انتى مش بس خساره فيا انتى خساره فى الدنيا بحالها انا داخل استحمى قبل ما يجوا
على يحدفلها بوسه و يمشي و هى متبعاه و مبتسمه
…………………
فى مطعم سمك
فى ترابيزه فى جنب
ليلى / الحمد لله اكتر من كدا ما اعرفش انام
عمر / حرام عليكي بقي حد يبقي قدامه الفسفور دا كله و يشبع
ليلى / اكل اكتر من كدا ايه
أية / بصراحه انا كمان شبعت بس مستخسره اقوم
عمر / عادى نلف الباقي معانا و انا اصلا هطلب لعلى و نور تيك اواى فما تضغطيش على نفسك
ليلى / هى ما تضغطش على نفسها لكن انا حرام اشبع ماشي يا سي عمر ماشي
عمر / انتى اصلك ما تعرفيهاش دى لو سرحت هتاكل الاخضر و اليابس
أية تزغد عمر و هم بيضحكوا
أية / هروح اغسل ايدي تيجي معايا يا طنط
ليلي / رجلى منمله روحى انتى و انا شويه و احصلك
أية تبتسم و تقوم
عمر / المطعم ده من ايام بابا الله يرحمه كان بيحبه اوى
ليلى / طول عمره مزجانجى و بيحب يدلع نفسه
عمر / الله يرحمه
ليلى / بس حلوه أية مش زى امها
الابتسامه تروح من وش عمر
عمر / أية مش زى حد أية ما لهاش زى اصلا
ليلي / ربنا يهديهالك شكلك بتحبها اوى انت و على اغرب من بعض هو تضيق بيه الدنيا و يتجوز مطلقه ما بتخلفش و هو فى عز شبابه الا حتى ما هى اغنى منه مثلا نقول طمعان فيها
عمر / على ما يعملش كدا
ليلى / و دا اللى هيجننى اشمعن نور زيك بالظبط كل البنات اللى فى الدنيا و اخدت بنت اللى قتلت امك بقهرتها
عمر / اللى قتل امى ابويا مش سمر ابويا اللى ما عدلش ابويا اللى هان و ابويا اللى ظلم … ابويا لو كان اتكلم مره واحده كان وقف سمر عند حدها بس ما كناش فارقين معاه انا ابويا طردنى من البيت و انا ثانويه عامه
ليلى / اراهن ان سمر اللى قومته عليك
عمر / ما فيش مبرر فى الدنيا ان حد يرمى ضناه انا مش ابنها عشان تخاف عليا و مش ملزمه ناحيني باى حاجه ابويا اللى ملزم بس ملخص الكلام أية اغلب من الغلب لو كانت خدت من امها حاجه ما كانش دا بقي حالها و نور بقي اغلب من أية و بتحب على و على بيحبها
ليلى / و الخلفه
عمر / ربنا اللى بيرزق … أية جايه
ليلى تبص على أية و تبتسم و تقوم تدخل الحمام تقابل أية
أية / احسن دلوقت
ليلى / الحمد لله
أية / تحبى اجى معاكى اوصلك
ليلى / لا ارتاحى مش مستاهله
ليلى تمشي و أية تروح تقعد جنب عمر عمر يوطى عليها
عمر / بحبك
أية / السمك طلع سره باتع و لا ايه نطق ابو الهول
عمر / دا عنيكي دى اللى رقصت ابو الهول
أية / ههههههههههههه هاخد على الدلع ده
عمر / يخليكي ليا و ادلعك
أية / و يخليك ليا يا احلى حاجه فى عمرى
عمر / هقوم اغسل ايدي و اطلب لعلى
أية / تمام يا قلبي
عمر يقوم يروح يكلم وايتر و يروح الحمام يقابل ليلى يوقفها
عمر / أية غاليه على على اوى
ليلى / انا ما بوقعش بينكوا
عمر / و نور كمان غاليه عليه
ليلى / انا زى اى ام من حقى افرح بعيالي اشيل عيالهم انا ما ربتش عيالي يا عمر اتحرمت منهم على الاقل أعوض فى عيال ابنى الوحيد
عمر يبص على أية بصالهم
عمر / هغسل ايدي و ارجع
ليلى / ما تقلقش الكلام ده هيفضل بينا
عمر / كدا احسن للكل
ليلى / بس متاكده انك هتفهمنى و تحس بيا
عمر يهز راسه و يمشي و ليلى ترجع ناحيه الترابيزه تلاقيهم شالوا الاكل و بينضفوا الترابيزه تقعد
ليلى / يا مين يلايمنى سريرى دلوقت
أية / ههههههههههههه و مين سمعك
…………………….
فى شركه حسام تانى يوم
حسام بيبص فى ورق و هو مبتسم هدايه تدخل تقعد على المكتب
هدايه / انا متبعاك من بدرى
حسام يبصلها
هدايه / انت بتضحك على ايه فى ايه فى الورق ده
حسام / شغل
حسام يوريها الورق
هدايه / و دا بيضحك … انت غريب اوى
حسام / لا بس فى صنف كدا السحب عليه عالى سواء توزيع داخلى او خارجى بس ايه حاجه عنب
هدايه / مش فاهمه
حسام / ما تاخديش فى بالك انا فعلا غريب اوى ههههههههههههههه
هدايه / رايق النهرده شكلك صالحت المدام
حسام وشه يقلب
حسام / افندم
هدايه / ايه اتعديت حدودى
حسام / جدا
هدايه / سورى كنت فاكره اننا
حسام / انا فعلا كنت متوتر الفتره اللى فاتت بس دا عشان حبيبه كانت عيانه و دى بنتى الوحيده
هدايه / ااااااه بس هو اللى بنته الوحيده عيانه يبات فى فندق امباسي … سورى سورى اتعديت حدودى تانى
حسام / دا انتى ما طلعتيش لطيفه وخلاص دا انتى ما شاء الله بتراقبيني
هدايه / تؤ … خالص دى كانت مجرم صدفه
حسام / صدفه !!!
هدايه / ليا صديق يمنى نزل لبنان اجازه من يومين و كنت بوصله الفندق شوفتك و انت خارج منه فى الاول مش هنكر ههههههه افتكرتك … يعني هههههه … بس لما سالت عرفت انك بايت هناك لوحدك … و على ما استجمعت شجاعتى لقيتك عملت شيك اوت
هدايه تقلب وشها ساد فيس
حسام / تمام
حسام يبص فى الورق و يحاول يتجاهلها
هدايه / انت سبت الامارات ليه
حسام يقفل الورق و يبص لهدايه بضيق
هدايه / دى تانى مره تتجاهلنى الاولى كانت فى عيد ميلادك
حسام / دا الكلام اللى بيتقال عنك هنا طلع حقيقي بقي
هدايه / و الكلام اللى بيتقال عنك هناك يا ترى حقيقي و لا ايه
حسام/ هناك فين بالظبط … ما تتفضلى تروحى مكتبك و تشوفى شغلك
هدايه / ششششش يعرفوا انك سبت مراتك و نزلت مصر و نزلت بعديك هى و حبيبه
حسام يتعدل فى كرسيه و يرفع حاجبه
هدايه / انا مش عدوتك على فكره
حسام / و مش حبيبتي
هدايه / بايدك ابقي
حسام / بصي يا هدايه انا ما وصلتش للى انا فيه ده بالساهل و انتى ما تعرفينيش
هدايه / انت لسه ما فهمتش انا ساله عليك كويس اوى و اعرفك كويس اوى و عارفه انت وصلت لهنا ازاى و بتترقى بالسرعه دى ازاى انا عرفاك اكتر يمكن من مراتك
حسام / برافو عليكى مجهود يحترم … بس على الفاضي … ضيعتى وقتك
هدايه / بقولك ايه ما تيجي نتكلم على رواقه فى مكان تانى
حسام / ورايا شغل مره تانيه
هدايه / بعد الشغل
حسام / انتى عاوزه ايه هاتى من الاخر عشان بدات اضايق
هدايه / انت اللى هتعوز … كمل شغلك سلام
هدايه تقوم و تروح مكتبها و حسام متابعها بضيق يقفل الورق و يقوم يدخل اوضه و هدايه متبعاه و مبتسمه
………………………
فى السوق فى اسكندريه
على و عمر بيتمشوا و كل واحد شايل اكياس خضار و فاكهه
على / انت بتهزر صح
عمر يبص لعلى على ينفخ
على / و ادى اعمل معاها ايه دى
عمر / نوعا ما ليها عزرها برده
على / ايوه بس دى حياتى و مش من حقها تدخل فيها
عمر / و لو ادخلت هتعمل ايه هتطردها مثلا دى امك
على /لا طبعا مش هعمل كدا بس هفصل هشوفلها شقه قريبه تعيش فيها و اروح و اجى عليها اقولك هشوفلها شقه ناحيه بيت الحجه منال و اخلى المحل فى نفس المنطقه
عمر / فكره كويسه بس انا جربتها قبلك كانت بتنطلى كل شويه
على / دى امى مش سمر
عمر / ما هياش ملاك برده
على / و مين فينا ملاك انت ؟؟
عمر يبص لعلى و يروح ينقى طماطم على يروح يقف جنبه
على / ما حدش فينا ملاك و لا حتى انا تمام بس انا هعرف احط كل واحد عند حده
عمر / اهم حاجه عندى … هى الطماطم وحشه كدا ليه النهرده
على / تعال نشوف قدام شويه
عمر يهز راسه و يمشوا
…………………..
فى شقه ندى
ندى بتتكلم فيديو كول فى التليفون مع أية
أية / لا بطلت الحمد لله ربنا ما يعيدها دى ايام
ندى / فرحت اوى عشانك … ها هتفرحيني قريب بقي
أية / مش عارفه يا ندى لسه شويه على الحكايه دى
ندى / ما تتبتريش على النعمه يا أية لتزول
أية تبصلها باستغراب
ندى / الادويه دى تاثر عليكى و تيجي تحملى ما تلاقيش … أية … انا نفسي لاخوات لحبيبه تتسند عليهم من بعدى
أية / اتكتمى يا بت تعيشي و تسنديها
ندى / انا ما ليش اخوات … انتى نفسك ما لكيش اخوات و عارفه اكيد بتوجع قد ايه
أية / كان عندى عمر
ندى / انا بقي ما كانش عندى … حتى اللى كنت بعتبرهم اخواتى … اكتر ناس غدروا بيا
أية / نور هنا على فكره بره مع طنط ليلى مامه على … الست مش طيقاها و شكلها ناويه على طلاقها بس مستنيه فرصه
ندى / ليه كدا هى نور عملت معاها حاجه … اكيد عمتى … الست دى عمرها ما هتتهد
أية / لا خالص دا عشان ما بتخلفش
ندى تبلع ريقها و الحزن يبان عليها
أية / بصي هو الشهاده لله نور كويسه اوى و مدلعه على و امه على الاخر و انا خايفه على يحبها
ندى / هى تتحب يا أية
أية / بس هو بيحبك وانتى بتحبيه
ندى / مفيش نصيب يا أية انا اتجوزت و هو اتجوز و ما عدش ينفع نفكر حتى فى بعض
أية / بس حسام ده حيوان ابن كلب ما ينفعش تعيشي معاه
ندى / انا مش عايشه معاه انا عايشه مع حبيبه .. بنتي الوحيده اللى مش هقدر اجيب غيرها
أية / ربنا ياخده … لا ربنا ينتقم منه و يوريني فيه يوم … لا سنه بحالها … شيل و حط عليه يا رب و بعدين خده
ندى تضحك
أية / انا بكرهه … و بكره امه
ندى / انا بحبك يا بت انتى على فكره
أية / ما انا اتحب برده هههههههههه
ندى / فرحانه انك رجعتى أية تانى وحشتني اوى البت دى
أية / و انا كمان وحشتني بس مش هكدب عليكي انا بحارب نفسي عشان ارجع بحارب وجع شديد ربنا ما يكتبه على حد بغمض عيني عن الحقيقه و استهبل
ندى / و ماله على فكره كل الناس كدا لولا الاستهبال ده كان زمان نص الناس قطعت شراينها
أية / و النص التانى
ندى / و الله مش متاكده يا هيولعوا فى نفسهم يا هيرموا نفسهم فى النيل حسب موقعهم الجغرافى بقي
أية / ههههههههههههههه طب والله بحبك يا بت … هى بيبو مش ناويه تصحي بقي
ندى / يا شيخه سبيها نايمه شويه و انا كمان هنام جنبها حبه روحى اقعدى مع ضيوفك
أية / ابقي كلميني تانى سلام
ندى / أية
أية / نعم
ندى / هو على سعيد مع نور بجد و لا بيستهبل زينا
أية / بجد عاوزه تعرفى الاجابه
ندى / على طيب و يستاهل كل خير و نور كمان طيبه ربنا يسعدهم
أية / سلام يا ندى
ندى / سلام يا أية
أية تقفل و ندى تقعد تعيط
……………………
فى شقه عمر بالليل
على نايم فى الصاله نور تطلع من الاوضه الكل نايم تبص على على و تبتسم و تروح تنام فى حضنه يفتح و يبصلها بنعاس
على / لو عمر قام يدخل الحمام هيشوفك
نور / انا مش بعرف انام و انت مش جنبى تعال ادخل نام جوه معايا
على / ماما نايمه جوه
نور / فى سرير لوحدها و بعدين دا سرير متر و ربع مش هياخدنا مرتاحين
على / مش مستظرفها تصحى تلاقينا حاضنين بعض
نور / خلاص يبقي نرجع بيتنا
على يبتسم و يبوس راسها
نور / انا ما برتحش غير جنبك اعمل ايه
على / اممممم صعبه دى … طب ايه رايك تيجي على نفسك النهرده و بكره اخطفك فسحه فى الاستخبص و نبات بره
نور / ازاى يعني هو ينفع
على / كل حاجه تنفع
نور / بس
على / هنخرج عادى و مش هنرجع و هنبقي نشترى غيارين ننام بيهم من اى حته
نور / انت بتهزر و لا بتتكلم جد
على / انتى مش عاوزه تجنينينى اديني هوريكي الجنان على اصله
نور / انا !!!
على / امال لما تجيلى متحلونه كدا و تصحيني من نومى و تقوليلى ما بعرفش انام غير جنبك تسميها ايه
نور / بس انا مش متحلونه
على / امال خدودك و شفايفك حمر كدا ليه … انتى مكسوفه منى يا بت
نور / مش بيتنا عشان اخد راحتى فى حضنك فيه
على / خشي نامى و انا هعوضك وعد
نور / تمام
نور تيجي تقوم على ماسك ايدها تبصله
على / بحبك
نور توطى تبوسه من خده و هو مبتسم و تدخل جوه و هو سعيد و متابعها
…………………..
فى شقه ندى
حسام يفتح الباب ندى تطلع تجرى من الاوضه تبص عليه
ندى / اتاخرت كدا ليه
حسام / قلقتى عليا يعني
ندى / اه قلقت و قولتلك قبل كدا انا ما اعرفش حد هنا غيرك بخاف
حسام / ما انا كنت برد على تليفوناتك كلها اعمل ايه اكتر من كدا
ندى / ما تعملش
ندى تيجي تدخل جوه حسام يمسك ايدها
حسام / و الله عندى مشاكل فى الشغل و قرفيني اخر قرف
ندى / ليه خير
حسام / المصرين فى الغربه بقي و انا جديد و الكل هيموت على مكانى فشغالين اسافين و قرف
ندى / طب و هتعمل ايه
حسام / مش عارف اديني بحاول اركز فى شغلى و ما سبلهمش فرصه انا اساسا الاشكال دى بعرف اتعامل معاهم كويس
ندى / ربنا يعينك عليهم
حسام / عاوزك تفهمى انى ما عنديش اى حاجه اهم منك انتى و حبيبه و انى ان انشغلت عندكوا لاى سبب يبقي اكيد غصب عنى و انتى كلمتيني اكتر من مره و قولتلك انى فى الشركه
ندى / تمام انت بس اتاخرت اوى … تمام تمام حصل خير … تحب اغرفلك
حسام / واقع
ندى / تمام على ما تغير عامله مسقعه
حسام / طب اجهز الانتينا و لا ايه ههههههههه
ندى / دمك خفيف اوى طب والله طلعت حلوه
حسام / و لو وحشه تبقي سكر من ايديكي الحلوه دى
ندى تبصله و تمشي و حسام متابعها بحب تليفونه يرن رساله يفتحها و يبص فى الموبايل كتير بتركيز ندى تطلع من المطبخ
ندى / الله انت لسه عندك
حسام يقفل الموبايل و يبتسم
حسام / حتى فى البيت ما بيسيبونيش ارتاح شغل شغل شغل حاجه صعبه اوى
ندى / ربنا يقويك
ندى تدخل تانى
حسام / ماشي يا ست هدايه .. عنيا
حسام يدخل الاوضه و هو بيقلع
…………………….
تانى يوم على البحر فى مارينا
منطقه يخوت على و نور يركبوا يخت و فى شاب معاهم على يساعد نور يطلعوا فوق تلاقي ترابيزه و اكل محطوط
على / طبعا مش محتاج اقولك انا كاعع كام الصرف باين
نور / بصراحه انا طول عمرى نفسي فيها اوى بجد انا مبسوطه جدا
على / طب الحمد لله يا ستى اى خدمه … تعرفى امبارح اول ما دخلتى ما غفلتش حتى قمت مسكت الموبيل و اتصلت بسمسار حبيبي هنا عارفني و بيخدمنى قولتله عاوز كذا كذا ما تعرفش تخدمنى ادانى نمره واحد تانى كلمته و اتفقت معاه مش هنغوط اوى هيشوفلنا حته هاديه نقضي فيها اليوم
نور / و هيفضل معانا
على / ما انا مش هعرف اسوق البتاع ده و بعدين هو هيبات فى كبينته ما لوش دعوه بينا
نور / تمام اللى تشوفه
على / تمام تحبى تفطرى دلوقت و لا تتفرجى على الياخت الاول
نور / انا بقول ما دام طلعنا بقي نفطر و ننزل مره واحده
على / تمام اتفضلى
نور و على يقعدوا و هم مستمتعين نور تطلع الموبايل و تتصور مع على سيلفى و هو مبتسم
………………..
فى شقه ندى
ندى ممدده جنب حبيبه
ندى / ايه الملل ده هو احنا هنقضي عمرنا كله بين اربع حيطان كدا
ندى تقلب على بطنها و تبص على حبيبه صاحيه
ندى / تفتكرى فى جامعات هنا اقدر اقدم فيها
ندى تتنهد باستسلام
ندى / بس هسيبك لمين و انا هناك … اعمل ايه يا حبيبه هفضل ثانويه عامه كدا طول عمرى
ندى تقوم تشغل التليفزيون و تفضل تقلب فى القنوات و فجاه تبص لحبيبه بحماس و فرحه
ندى / ايه رايك اشترك فى جيم
الفرحه تروح من وش ندى
ندى / برده هسيبك لمين … اعمل ايه بس
ندى تقوم تجيب التليفون و تقلب فى الفايس تلاقى صوره على و نور تبصلها بحزن و تتصل بحسام
حسام / قلبي ازيك
ندى / زهقانه و عاوزه اخرج
حسام / تمام اجهزى و جهزى بيبو و انا ساعتين بالكتير و ابقي عندك
ندى / طب بقولك ايه ابعتلى اللوكايشن و انا هركب تاكس و اجيب بيبو و نجيلك انا بجد زهقانه اوى
حسام / تمام
ندى / شكرا بجد .. استنى انا عامله غدى يوووووه ايه القرف ده
حسام / حطيه فى التلاجه يا نونو نسخنه بكره مش حوار يعني
ندى / تمام يلا سلام عشان اروح اللبس
حسام / سلام
…………………
فى شقه عمر
أية بتجهز الغدى
ليلى / يعني ما قالولكيش و لا قالوا لعمر
أية / والله ابدا انا اصلا على يدك صحيت ما لقيتهمش اساسا
ليلى / يلا ربنا يسعدهم هعوز ايه اكتر من كدا انا بس مش هنكر كان نفسي اروح معاهم
أية / و انا بس هم ما دام ما قالوش يبقوا عاوزين يبقوا لوحدهم و ما ينفعش نفرض نفسنا عليهم
ليلى / ايوه بس احنا جايين مع بعض و بعدين ما كانوش نشروا الصوره بقي و غاظونا
أية / هو الصراحه معاكى حق بس هم عرسان برده و كدا و عاوزين يبقوا لوحدهم
ليلى / ايه رايك فى نور
أية / من حيث ايه
ليلى / انتى شايفاها ازاى حلوه وحشه طيبه لقيمه كدا يعني
أية / ما ليش دعوه بيها المهم على مرتاح معاها
ليلي / ازاى بس هى مش سلفتك
أية / بصي … بلاش نتكلم فى الحكايه دى مش عاوزه مشاكل ممكن
ليلي / مشاكل ليه يعني
أية / اهو بقي
أية تروح الحمام و ليلى مستغربه
……………….
فى الشركه عند حسام
حسام بيشتغل ندى تدخل شايله حبيبه و شنطه تقابل شاب
ندى / لو سمحت حسام زغلول فين
الشاب / هونيك
الشاب يشاورلها على مكتب حسام و يمشي تروح تقعد قدامه
ندى / ما شوفتش زحمه كدا
حسم يبصلها و يبتسم
حسام / حمد الله على السلامه تحبى تشربى حاجه على ما اخلص
ندى / هو لسه بدرى
حسام يبص فى الساعه و يهز راسه لا
حسام / نص ساعه بس
ندى / و ما ينفعش تزوغ صح
هدايه تدخل
هدايه / اهلا … اتارى الشركه نورت
ندى / ميرسي
هدايه / هدايه عزام
ندى / اتقابلنا فى العيد ميلاد
هدايه / كنت خايفه تنسيني
ندى / ما عداش وقت طويل يعني
حسام / ثوانى و راجع عشان نمشي
ندى / تمام
حسام يقوم هدايه تقعد قدام ندى
هدايه / حلوه اوى حبيبه شبهك
ندى / ايوه كلهم بيقولوا كدا
هدايه / و انتى بتقولى ايه
ندى /لا انا بحسها مختلفه عنى بشوفها احلى
هدايه / انتوا رايحين الاعاده
ندى / لا خارجين عادى
هدايه / اعرف مكان تحفه لو تحبى ابعتلك اللوكايشن لو ليكي فى الاكل اللبنانى على حق
ندى / مش عارفه بصراحه انا ما افهمش اوى فى تصنيفات الاكل يعني ده لبنانى و ده سورى و ده مصرى ما افهمش فى الحاجات دى
هدايه / ازاى يعني
ندى / اصل انا لسه اولى مطبخ و يمكن اكون كى جى لو تحبى تقولى قولى يعني
حسام يدخل
حسام / يلا يا نونو
حسام يشيل حبيبه و ندى تقف
ندى / عن اذنك
هدايه / هبعتلك اللوكايشن على تليفون مستر حسام انا للاسف مش معايا رقمك
ندى / هبقي ابعتهولك ما فيش مشكله
هدايه / ياريت حتى يبقي ليكي صحاب هنا بدل ما بتقضي وقتك كله فى البيت لوحدك
حسام / هو بغض النظر ان ده شئ يسعدنى بس انتى مواعيد شغلك معايا يعني وقت فراغنا واحد
فمش هتبقي فضيالك
هدايه / ايه خايف تجندنى و ابقي عينها عليك هنا فى المكتب ولا ايه ههههههههههه
ندى / لا انا مش من النوعيه دى من الستات حسام ليه مطلق الحريه يعمل اللى يعمله فى المكان اللى يعمله
هدايه / و دى ثقه فيه ولا ثقه فى نفسك
ندى / لا دى تكبيره دماغ
هدايه / هههههههههه دمك خفيف موت حبيتك
حسام / طب يلا بقي و لا ايه
ندى / يلا .. عن اذنك
ندى و حسام يمشوا ندى تشد حسام عليها و توشوشه
ندى / هى رخمه و لا انا اللى مستتقلاها
حسام / خارجين ننبسط
ندى / معاك حق
ندى و حسام يمشوا
……………….
فى اليخت
نور / الدنيا بدات تضلم و انا بدأت اخاف
على / تحبى نرجع
نور / بصراحه مش عارفه انا اصلي عمرى ما عملتها يعني عمرى ما نمت وسط المايه بس هموت واجرب بس خايفه فاهمنى
على / حاسس بيكي جدا بس محرج اقول من الصبح
نور / هههههههههه
على / ما هو مش بخاف من الطياره والمركب طب سبت ايه كدا هبتى ضاعت خالص قدامك
نور تمسك ايده
نور / مفيش حاجه فى الدنيا هتهز صورتك فى عيني
على يبوس ايدها
على / انا بقول نكمل التجربه على الاقل يبقي عندنا مغامرات نحكيها للاجيال الجايه
الابتسامه تروح من وشه نور
على / ما اكيد أية ربنا هيهديها فى يوم و تقرر تواجه المجتمع و تخلف و اكيد حبيبه … وحشتنى اوى البنت دى بخاف عليها اوى
نور / الدنيا بدات تسقع انا بقول انزل اشوف بطانيه تحت و لا اى حاجه
نور تنزل على يقوم ينزل وراها نور تدخل الكابينه و تفتح الدولاب تلاقي بطانيه تطلعها تيجي تطلع على يسد عليها الطريق تبصله
على / انا اسف لو قولت حاجه غلط احنا هنا عشان ابسطك
نور / المهم انت تكون مبسوط معايا
على / جدا … و ربنا شاهد على كلامى انتى مليتي الفراغ اللى فى روحى يا نور
نور تتنهد
على / لا بايدك و لا بايدي و لو ربنا كاتبلى الخلفه مفيش حاجه فى الدنيا هتمنع ده هيرزقنا زى ما رزق سيدتنا ساره و هى عقيم و سيدنا ابراهيم و هو عجوز بسيدنا اسحاق لو ربنا عاوزنى اكون اب هيرزقنا
نور تتنهد
نور / ما انت ممكن تكون اب من غيرى الموضوع سهل
على يبصلها و يسكت تروح تقعد على السرير و تبصله
على / ما انا ممكن اتجوز ٣ و ربنا ما يكتبليش برده خلفه
نور / اش عرفك ما يمكن تخلف من اول واحده
على / ما يمكن ما بخلفش اصلا
نور / اش عرفك برده
على / انتى عوزه ايه يعني انا مش فاهم
نور / عوزاك سعيد مش عاوزه اكون السبب فى انك تتحرم من حاجه نفسك فيها
على / كنتى فكرى فى الموضوع ده قبل ما تعلقيني بيكي بالشكل ده انا بحبك و ما اقدرش اعيش من غيرك اعمل ايه انا
نور / هى خطيبتك القديمه
على يتعصب
على / نور
صمت ثوانى على يحاول يلم نفسه
على / احنا اتفقنا … ليه يا نور ليه
على يسيب الكابينه و يطلع فوق على الدك و يتفرج على البحر نور تطلع تحط البطانيه على كتفه يحضنها تحت باطه و ياخدها تحت البطانيه تحط راسها على صدره يبوس راسها و يتفرجوا على البحر فى صمت
……………………
فى شقه حسام
حسام بيفتح الباب و يدخل و هو بيضحك و ندى وراه شايله حبيبه و الشنطه تروح تحطها على السرير و تطلع بره تلاقي حسام فى البلكونه تقف جنبه
حسام/ انا مبسوط جدا النهرده
ندى / ما انت غرمت جامد برده
حسام / و انا بشتغل ليه مش عشان اسعدك انتى و حبيبه
ندى / لا بص انا فعلا النهرده كنت مخنوقه اوى بس بص بعد كدا هنلم ايدينا فى المصاريف عشان حبيبه افرض احتاجت حاجه افرض الظروف اتغيرت انا مش عوزاها تحتاج لحاجه
حسام يحط ايده على دراعها
حسام / تعرفى ما تشغليش بالك باى حاجه و تسيبي الموضوع ده عليا
ندى / انا ما عنديش شهاده و مش هقدر اشتغل و لو حصلت اى حاجه
حسام / مش هيحصل طول ما انتى معايا مش هيحصل انا هعرف اتصرف طب ياريت مشاكل الدنيا كلها كانت فى الفلوس كانت اتحلت
ندى / انت شايف كدا
حسام / انتى عاوزه تكملى تعليم
ندى / نفسي هيشغل وقتى جدا و كمان عشان عريس حبيبه لما يتقدملها ما يتقالش امها ثانويه عامه
حسام/ بسيطه هسالك و اظبطلك الموضوع ده
ندى بفرح
ندى / بجد يا حسام
حسام / انتى بس تؤمرى بس تعملى حسابك لما اخلصلك الحوار ده لازم تكافئيني بحاجه
ندى الفرحه تروح من وشها
ندى / تقصد ايه
حسام / انتى و زوقك بقي … انا داخل اغير هدومى
حسام يدخل و ندى واقفه مضايقه
…………………..
فى شقه مصطفى
محمد و مصطفى ممددين جنب بعض على السرير و محمد بيورى مصطفى صور ندى و حسام و حبيبه
محمد / الواد مش مخلى فى جهده جهد و اديك شايف … انا عارف انه غلط و زعلك بس اديك شايف اهو بيحاول و محتويهم و معيشهم احسن عيشه … ان شاء الله ينزلوا الاجازه يلاقوك خفيت و بقيت زى الفل … بصراحه الناس اللى حسام جايبهم بجد الله يبارك لهم شايفين شغلهم فله مفيش غلطه … بس بقولك ايه لو حد فيهم كدا و لا كدا تقولى علاطول … او اكتبلى او حتى شاورلى انا هفهم علاطول
مصطفى يكتب نور
محمد / زى الفل الحمد لله على شايلها من على الارض شيل هى كمان دا خدلها ياخت و بيقضوا داى يوز فى عرض البحر
مصطفى يهز راسه
محمد / انا فى الاول ما كنتش مرتحله قولت طمعان فى البت مطلقه و ما بتخلفش لقيته بيقول يكتبلها الشقه و شارى قولت هيجرحها بحوار الخلفه لقيته مش سايب فى جهده جهد تقولش عوض ربنا للبت على السنين السوده اللى عاشتها مع مروان
مصطفى يبص لمحمد
محمد / امانى على قد ما بتحبه على قد ما هى مش طيقاه ما انت عارف مراه اخوك كل حاجه و عكسها بس امه شكلها ست طيبه او يمكن الزمن هدها ما انا مستحيل ائمن لواحده سابت عيالها فى الشارع انا سمعت عن على قصص تشيب انت كنت عارف انه بينام على البلاط فى المحل …. اه صحيح دا جارك الواحد تركيزه انعدم
مصطفى يتاوب محمد يعدله فى السرير
محمد / هسيبك تنام و ترتاح و هشقر عليك الصبح قبل ما انزل الشغل … يلا تصبح على خير يا خويا
محمد يطفى النور و يطلع بره مصطفى يعيط
………………….
فى اوضه أية
الاوضه ضلمه وعمر نايم و أية قاعده فى السرير جنبه بتعيط يقلق يقوم يأيد النور تبصله و الدموع مغرقه وشها يجرى ياخدها فى حضنه
عمر / مالك يا أية مالك يا قلبي فى ايه
أية / حلمت بماما
عمر يهدى و يمسح وشه و يبصلها
عمر / الله يرحمها
أية / ليه عملت فيا كدا
عمر / ماتت خلاص ما يجوزش عليها الا الرحمه
أية / و لا حتى الرحمه تجوز عليها
عمر / ما تبقيش قاسيه ما عدلهاش فى الدنيا غيرك يدعيلها
أية / سمحتها يا عمر على اللى عملته فيك
عمر / ما سمحتش بس هى ما عملتش فيا حاجه ابويا اللى عمل
أية / انا بقي امى اللى عملت دا نفس مبدائك اللى مخليك هادى و حسام عايش حياته ان مش هو اللى عمل امى اللى عملت
عمر / انا مش هادى يا أية انا عاجز
أية تبص لعمر باستغراب
عمر / مهما قولت مبررات مهما اديت لنفسي حجج احنا ما قدرناش نمسك عليه اى غلطه و لو فكرت اخد حقى بايدي بعيد عن القانون هتبقي اخرتى زى مامتك انا اللى هتحبس او اتعدم
أية / بعد الشر عنك
عمر / و هو برده هيكمل عادى انا مفيش فى ايدي اى حاجه اقدر اعملها حتى على قال لما يبقي جنبه هيقدر يمسك عليه غلطه بس حسام كان علاطول سابق على بخطوه … خد ندى و حبيبه و هرب بس لينا رب يمهل و لا يهمل و حقنا راجع راجع فان كنت انا عاجز فربنا مفيش اقوى منه هيجبلى حقى انا بس اصبر و ادعى و اتفرج
أية / ازاى قدرت
عمر / مش سهله والله مش سهله بس بحاول و كل مره بشوفه او بسمع اسمه النار بتقيد جوايا تانى و برجع لنقطه الصفر بس انا من سنين و انا فى نفس الاحساس احساس الظلم احساس وحش بس العوض جميل اوى
أية / بس انا مش هقدر
عمر / هتقدرى عديتي بكل ده و هتيجى على دى و تخيبى و بعدين انتى مش لوحدك كلنا حواليكى هتسندينا و نسندك … قبل ما تقولى اى حاجه انا عارف انتى بتفكرى فى ايه انا عارف انك هتقولى اننا خذلناكى قبل كدا بس دا مش هيتكرر و دا وعد
أية / طب و ماما
عمر / سامحيها يا أية حتى لو عملت ايه اكيد ما كانتش تقصد تاذيكي على الاقل مش بالشكل ده
أية / مش قادره
عمر / انتى احسن من كدا يا أية انتى احسن من كدا بكتير
أية تبص لعمر
عمر / انسي دلوقت و نامى و مع الوقت كل حاجه هتتصلح ان شاء الله و يمكن لما ربنا يكرمنا و تبقي ماما حلوه كدا تفهمى
أية / انت عاوز تبقي اب يا عمر
عمر / اكتر من اى حاجه تانيه
أية تبص فى الارض
عمر / عاوز بنت حلوه زيك كدا
أية تبص لعمر
عمر / اما لو طلع واد و شبهك دا هيخربها
أية / و لو طلعت بنت شبهك
عمر / يبقي ربنا يتولاها بقي
أية / ما تقولش على نفسك كدا دا انت مز السنين
عمر / تعالى هنا يا قلبي انتى
عمر ياخد أية فى حضنه
عمر / احنا ننام دلوقت و ليكي عليا بكره اخدك القلعه و اغديكي الكبده اللى بتحبيها و افسحك فسحه تحلفى بيها ايه رايك بقي
أية / انا نمت خلاص
عمر/ هههههههههههه
عمر يبوس راسها و يطفى النور و ينام جنبها
……………….
فى شقه امانى
امانى / ما انا عاوزه أفهم انا دورى ايه فى العيله دى
محمد / هو يوم باين من اوله
مانى / هو انا كل ما اكلمك تعملى الشويتين دول انا اتخنقت
محمد / ما قولتلك لما ربنا يكرم نور و ترجع بالسلامه هبقى اخدك افسحك
امانى / طبعا ما احنا خدامين اخوك
محمد / انا مش هرد عليكي و كلمه كمان هطلع ابات مع اخويا اللى مش عاجبك و خليكي بقي اهرى و انكتى فى نفسك كدا مش كل يوم نفس الهم
امانى / براحتك يا محمد انا داخله انام ما انا بقيت تقيله عليك
محمد / و انتى من اهله
محمد يدخل اوضته و امانى تقف على الباب و تروح تنام فى اوضه حسام محمد يبرطم
محمد / احسن
……………..
فى الشركه تانى يوم
حسام بيتكلم فى التليفون فى بلكونة
حسام / لبنان ايه بس اللى تجيها يا ماما
امانى / بقولك مش طايقه ابوك اروح فين يعني
حسام / تيجي لبنان طبعا
حسام يحاول يكتم غيظه و يتك على سنانه
حسام / بس دى لبنان مش الفيوم يعني باسبور تاشيره الموضوع ما بيخلصش فى يوم و ليله
امانى / الله اشمعن الامارات يعني
حسام / و لا الامارات ما كلو كان على يدك كنت بروح اتمرمط فى التساهيل و الجوازات
امانى / يا سلام كنت بقولك فى كذا يا حسام تنزل و يومين و تسافر عادى
حسام / ايوه عشان بسبورى و تاشيرتى معايا انما حضرتك اصلا مش معاكى باسبور حتى
امانى / اعمل باسبور
حسام / حلو جدا هبعتلك الورق المطلوب و حضرتك تروحى الجوزات تطلعى باسبور و لما تستلميه هقولك تعملى ايه بعد كدا تمام
امانى / ماشي يا حسام ماشي يا ابن بطنى
حسام / ما انا والله ما اقدر اعمل اكتر من كدا انا حتى الشقه اللى قاعد فيها سرير واحد كبير اديني وقت حتى ارتبلك على الاقل حاجه تنامى عليها
امانى / ماشي
حسام / انا مضطر اقفل عشان الشغل لما تخلصى الباسبور كلميني عشان نشوف هنعمل ايه
امانى / ماشي يا حسام تمام
حسام / سلام يا ماما سلام
حسام يقفل و ينفخ و يتصل بنور
نور / حبيبي ازيك
حسام / انجديني ابوس ايدك
نور / خير فى ايه قلقتنى
حسام / امك عاوزه تيجي لبنان
نور / ههههههههههههه لا بجد
حسام / شكلها متخانقه مع بابا و مش عاوز اقولك بقى اروح فين و ماشي يا ابن بطنى
نور / ههههههههههه هى وصلت كمان لابن بطنى دا الموضوع شكله كبير بقي
حسام / انتى بتهزرى يا نور انتى عارفه انى اجبها هنا هتكلفنى كام انا فاضلى تكه و ابيع الموبايل اللى بكلمك فيه هتنبسطوا ساعتها
نور / هههههههههههههههه لا لا ما يرضينيش ابدا بص انا فى اسكندريه هرجع النهرده بالليل هكلمها و اشوف ايه المشكله
حسام / حبه عياط على ما تسبنيش يا ماما ماشي انا ما عنديش حتى كنبه تنام عليها
نور / يا عيني
حسام / بطلى استفزاز
حسام / لا كدا هتعرف انى اتصلت بيكي و هتتقمص
نور / ليه و انا تلميذه انا هكلمها قال بطمن عليها يعني و عاوزه حاجه من هنا قبل ما ارجع و كدا يعني
حسام / الله ينور عليكي كلميها بقي
نور / ماشي يا قلبي سلام
حسام يقفل و يتنهد هدايه تدخل شايله مجين تعزم عليه بواحد
هدايه / المشاكل ما بتخلصش ايه عاوزين فلوس
حسام يبصلها باستغراب و ياخد المج و يشرب
هدايه / انا اهلى فى مصر كدا برده اول ما شوف رقم اى حد من عمامى بفهم علاطول حاجه من تلاته يا فلوس يا شغل يا ادويه
حسام / هو بالرغم من انى معاكى جدا بس لا مش فلوس و دى مامتى
هدايه / لا كدا اقلق كدا المشكله كبيره لان شكلك كان مضايق اوى لو على الفلوس تتحل انما
حسام / انتى ماوراكيش شغل يا هدايه
هدايه / كوفى بريك
حسام / طبعا
حسام يبص الناحيه التانيه و يشرب
هدايه / على فكره لو مضايق اوى كدا من وجودى انا ممكن اطلب نقلى فرع تانى
حسام يبتسم و يبص فى الساعه و يبصلها
حسام / نهائي … الموضوع مش فيكي انا بجد مش ف المود تمام … الكوفى بريك بتاعى خلص هستاذنك اكمل شغلى
…………………

google-playkhamsatmostaqltradent