رواية تربية واصلاح الفصل الخامس عشر 15 - بقلم منار مجدي
رواية تربية واصلاح الفصل الخامس عشر 15
عدى ست سنين حياه الكل اتغيرت والأطفال كبرو ومبقوش اطفال ريم راحت لدكتور نفسى وكانت كريمه بتساعدها فى العلاج وعمر كمان بقا اشجع واحسن وفعلا الاتنين كانو محتاجين بعض وشرف طفل صغنون اسمه عمار وهو ده بقا إلى دخل عمر الجيش وده عنده اربع سنين اما سيف وريم بعدو عن بعض وده كان اختيار ريم فى حاجه حصلت خلتها تعمل كده وسيف بعد عنها وفضل مضايق منها وقالها بكره تندمى وترجعيلى وساعتها انا إلى هرفض ومن محاسن الصدف يوسف طلع مع ريم فى نفس الجامعه دخلو هندسه مع بعض وحاليا خاطب حور وفرحهم قريب .
ريم:والنعمه يا عمار لأربيك
عمار :نينينينى
ريم:شايفه يا ماما عمار بيقولى نينينينينى
عمر :مش ده كلامك اشربى بقا علمتى الواد الفساد
ريم:وله انت انا ساكتالك من الصبح تعلالى بقا كده
جمال:بس يا ريم عيب اخوكى الولد عيب
ريم:بس يا بابا
كريمه:بس يا جمال هو إلى ضايقها يستاهل
ريم: حبيبتي حبيبتى خدى بوسه هوا
عمر:دائما واقفه معاها يا ماما
جمال حط أيده على كتفه: متقلقش يا عمر ابوك فى ضهرك
عند جلال
جلال:سيف مش عايز خناق وتوافق وانت ساكت
سيف:هشوف مؤاهلاتها الاول تنفع وله لا فى الشركه بتاعتى
جلال:سيف متخليش كبريائك هو إلى ممشيك
سيف:ماشى ماشى عايز حاجه انا تأخرت عن أذنك
نسيت اقول سيف بقا صاحب شركه كبيره للمقاولات والمبانى +أنه بقا بيهتم بالمدرسه
عند حور
حور:عايز ايه يعنى
يوسف:عايز اتجوز يا حور حرام عليكى محنطانى جمبك
حور:خليها السنه الجايه احسن
يوسف:اقسم بالله يا حور لو موافقتيش لأسيبك وأشوف حد تانى اتجوزه
حور:انت هتسبنى يا يوسف انت مبقتش تحبنى خلاص
يوسف:يادى النيله عليا يا بنتى مش كل لما اقولك نتجوز تأجيليها
حور:الله يعنى اسيب التعليم يعنى ألغى كيانى وكريرى عشان يعجبك
يوسف:ماشى سيبتك وخلصتى واتخرجتى بقالك سنه عايزه ايه تانى
حور:يوسف قول الحقيقه انت شايفلك شوفه تانيه وعايز تفلسع بالطريقه مش كده.
يوسف: يادى النيله السودا
حمزه:حذرتك وانت مسمعتش كلامى قولتلك مجنونه مصدقتش اشرب بقا
حور:انت اخويا وله اخوه
حمزه:انا مع الحق
يوسف:اسمعى الكلام بقا يا بنت الحلال
حور: خد يا يوسف دبلتك اهى وحل عنى
يوسف:يادى الشغلانه الزرقا انت عارف يا حمزه ديه المره الكام إلى تدينى الدبله فيها
حمزه:بطلت اعد يا جيمى
يوسف: المره ١٧ ال١٧ يا حمزه متخيل
حمزه:قلبى معاك يا يوسف يا اخويا
يوسف:انا ماشى ياعم كده كتير اوى
حمزه:اه طبعا طبعا متقطعش الجوابات
عند ريم
ريم قاعده بتأكل
عمر:نفسى مره تبطلى اكل
ريم:الله يا عمر عايز ايه سيبنى اتغذى
كريمه:سيبها يا واد تاكل كلى يا حبيبتى
جمال:اه سيبها قبل مقابله الشغل
ريم:أنهى مقابله شغل
جمال:كلمت عمك جلال قال فى شركه سيف محتاج مهندسين وانا قولتله عليكى
عمر:ألبس
ريم لبست فى وشه رغيف العيش:ليه يا بابا كده
جمال:ايه إلى عملتيه فى اخوكى ده
ريم:مش مهم دلوقتى عمر انا قولتلك عايزه شغل؟ لا صح
جمال:والله انتى متعبتيش كل ده عشان تقعدى فى البيت
كريمه:معاه حق يا ريم لازم تخرجى وتشتغلى وتحققى ذاتك
ريم:ذاتى! ده انا هتهان اسكتى انتى مش عارفه حاجه
حور:سامو عليكم
عمر:اهلا بالدوشه
حور:بتاكلو من غيرى
ريم:مفيش طفح ليكى تعالى ورايا
دخلت الاوضه وقفلت الباب
كريمه:حور انتو مخبين حاجه عنى
حور:ها لا طبعا تلاقى يوسف قالها انى رميت الدبله فى وشه
كريمه:تانى يا حور
عمر:يارب يطفش يارب 🤲
حور:عشان تخطبنى انت صح للدرجه دى بتحبنى
عمر:يا ستى لا يا ستى بعيد الشر عنى
ريم بتنادى:حوووووور
حور اتنفضت:جايه جايه
دخلت حور وقفلت الباب
ريم:بابا لقا شغل ليا
حور:وملقاش ليا العبد لله دايخ والله ما لاقى
ريم:يا غبيه افهمى انا كنت بتلكك بالشغل
حور:اه قصدك على فهد
ريم:ايوه نسيتى
حور:لسه بيبعتلك رسائل تهديد
ريم:هو مكنش بطل اصلا يا حور والموضوع اتطور معاه لدرجه بقا بيبعتلى رسايل حب انتى متخيله وانا اصلا بيبقا هاين عليا احرق التليفون بالى فيه
حور:انتى هتقوليلى ده انتى كل شهر بتليفون شكل
ريم:اتنيل اعمل ايه دلوقتى لو عرف هيستغل الوضع ويجى لبابا
حور:وماله يجى ويترفض
ريم ضربتها بالمخده فى وشها:عشان يقتلنا كلنا افهمى بقا ده مجنون انا لما طنشته نسيتى عمل ايه دبر حادثه لبابا لولا ستر ربنا كنت خسرته
حور:كان يوم صعب جدا فاكره طبعا
ريم:لا والمصيبه الكبيره الشغل مع سيف
حور بصدمه:سيف!!!
ريم طلعت السلسله إلى ادهالها من ست سنين كانت لسه لابساها لحد دلوقتي وبصيت ليها بابتسامه مكسوره:ايوه سيف
حور حطيت إيديها على كتفها:معلش
تليفون ريم رن
دخلت السلسله تانى مكانها قريبه من قلبها وراحت تشوف تليفونها
حور:مين ييتصل
ريم:ده يوسف
حور:يوسف طيب استأذن انا بقا
ريم مسكتها من قفاها وردت:ايوه يا يوسف اخبارك ايه
يوسف:انا تعبت بقا يا ريم بقا
ريم:مالك يابنى
يوسف:صاحبتك جننتنى مش عايزه تتجوز
ريم:انت عارف انها خايفه
يوسف:تمام انا قولت هقنعها براحه لكنها وكالعاده
ريم :رمت دبلتها فى وشك مش كده
يوسف:ايوه
ريم بقيت تهز حور من قفاها وهى بتزعق للاتنين:انتو الاتنين عايزين تجننو إلى خلفونى ديه المره الكام إلى ترمى دبلتها فى وشك ها العشرين
ريم ويوسف بسرعه:لا ال١٧
ريم بغيظ اكتر:لا فرقت فرقت جدا
يوسف:انا بس متصل عشان تعرفيها انى بكره هتجوز ست ستها ومش هرجعلها تانى
ريم:ما تتجوز ياخويا ست ستها وتريحنا وتريح ستها إلى ماتت وشبعت موت فى قبرها
حور:ست ستى هيلاقى فين ست ستى وله يعرف يلاقى ظفرى تانى الخ'اين الغ'شاش
ريم:بقولكم ايه انتو الاتنين اولعو فى بعض محدش فيكو يكلمنى تانى
قفلت السكه فى وش يوسف وطردت حور بره الاوضه وقفلت على نفسها
بليل
عمر خبط ودخل:عامله ايه دلوقتى
ريم:انا كويسه يا عمر مفيش حاجه
عمر:عليا انا ،ماشى يا ستى جاهزه للشغل بكره
ريم:اعتقد ايوه ،هربت كتير ده وقت المواجهه
عمر:هروح معاكى بكره وهبقا فى ضهرك زى ما اتعودنا
ريم ابتسمت بحب ليه:انت احسن اخ فى الدنيا
عمر:وانتى احسن اخت ،متنسيش احنا بنكمل بعض تقدرى فى اى وقت تحكيلى اى حاجه مضايقاكى
ريم:اكيد طبعا
فى الصبح
سيف بيبص على الساعه مستنيها توصل باسرع وقت
وصلت ريم تحت
عمر:ها جاهزه
ريم:انا دائما جاهزه يابنى عيب عليك
عمر:لا واضح فعلا
ريم اخدت نفس ونزلت من العربيه
ريم:المقابله هعملها مع عمو جلال مش كده
عمر:لا سيف
ريم:الله يطمنك
عمر:يالا
طلع عمر وريم طلعت وراه
عمر للسكرتيره:عرفى استاذ سيف أن ريم وعمر بره
السكرتيره بصيت لريم من فوق لتحت وبعدين قالت:تمام استريحو
ريم بصيت لنفسها:مالها الوليه ديه بتبصلى كده ليه فى حاجه غلط فى شكلى
عمر ضحك:لا دى نظرات البنات لبعض لما بيشوفو بنت احلى منهم
ريم ضحكت وضربته على كتفه:بس بقا هتروح نار جهنم من كدبك ده
سيف من حماسه خرج بنفسه اول ما سمع انها بره وشاف هزارهم حس بغيره عاميه
سيف:احم اوعو اكون قاطعت عليكم الجو
ريم بلعت ريقها بشويه توتر
عمر:جو ايه بس ده مجرد هزار ،انت عامل ايه
سيف ابتسم:أو ما عرفت انك بره اتحمست وخرجت بنفسى أرحب بيك
عمر:امم بيا بس تمام تمام هتفضل واقفين
سيف لنفسه:يخربيتها مش عارف ابطل ابص ليها وكمان بتحمر هى عايزه تجننى صح اتغيرت وبقيت حاجه تانيه خالص ياربى هستحمل ازاى بعدها وهى قدامى كده طول النهار يارب الصبر.
بعد فتره
سيف:جاهزه يا ريم
بس ريم مكنتش مركزه غير فى ملامحه إلى اتغيرت بقيت حاده أكثر رجوله ورزانه ودقنه زودته حلاوه فوق حلاوته والبدله الرسميه إلى بقيت جزء من شخصيته
ريم لنفسها:كنت فاكره أن البنات هما الى بيحلو بالانفصال يخربيتك ايه الحلاوه ديه هعمل ايه دلوقتي والله انا تكه وهقوله بحبه ومش هيهمنى حاجه لا لا ريم ركزى فهد مش هيسبكو فى حالكم لا انتى وله عيلتك وله حتى سيف
سيف بصوت عالى:رييييم انتى معايا
ريم فاقت وردت بسرعه:معاك معاك
سيف:كنتى معايا دلوقتى لا
ريم بصيت ليه:ها
سيف:قصدى يعنى سرحتى فجأة انتى كويسه
ريم:اه الاحسن نبدأ المقابله
سيف:لا مقابله ايه على الشغل على طول جولين هتعرفك كل حاجه
جولين دخلت:طلبتنى يا سيف باشا
سيف:ورى الاستاذه ريم مكتبها وعرفيها اماكن المواقع إلى هتنزل فيها.
جولين:تمام يا فندم اتفضلى معايا
ريم قامت وحركت شعرها الطويل ومشيت
سيف فضل يبص عليها لحد ما مشيت واتنهد
عمر:احلوت مش كده
سيف:عمر ينفع تقفل الموضوع قولى عامل ايه ويوسف محدش فيكم بيسأل
عمر:مشاغل يابنى عارف أنا مشغول في العياده ولما بفضى ريم مش بتسبنى فى حالى وله هى وله عمار ولازم اخرجهم ممنوع امسك تليفونى فى اجازتى أما بقا عندك يوسف فكفايه حور عليه بتوريه النجوم فى عز الضهر
بليل
ريم بتعب:اه يا ركبى يانى ياما
سيف:عايزه توصيله
ريم بإحراج:بلاش احسن انا هكلم عمر
سيف وقف ومسك تليفونه ورن على عمر
سيف:الو يا عمر عندك مشكله اوصل انا ريم للبيت تمام لا مش هنتأخر مسافه السكه طيب سلام
سيف:عمر قال مفيش مشكله ،نتحرك بقا
ريم بصيت حواليها بتوتر خايفه يكون فهد بيراقبها كالعاده بس زى العاده برضو مش شافته خالص اتنهدت
ريم بيأس:يالا كده كده خربانه
ركبوا العربيه وانطلقو والاتنين ساكتين لحد ما قرر سيف يقطع الصمت
سيف:انتى كويسه؟
ريم:اه تمام الحمدلله
سكتو تانى المره دى ريم اتكلمت
ريم:انت كويس؟
سيف:انا على طول كويس
ريم ضحكت:عمرك ما هتتغير هتفضل طول عمرك نرجسى
سيف:على الأقل حد فينا متغيرش
ريم سكتت وبصيت للشباك
سيف:ريم عارفه انا مش مضايق اننا سيبنا بعض انا بس مضايق انى مش عارف السبب.
ريم:انا اسفه
سيف:لا سورى مش هنرجع
ريم بصيت ليه:انا مش بعتذر عشان نرجع يا سيف انا بعتذر عشان مقولتش السبب انا عايزاك تعرف أن انت مغلطتش معايا وله غلطه وان انا كان كل كلامى ليك حقيقى بس مكنش هينفع نكمل فأنا اسفه انى حسستك انك غلطت أو كنت انت السبب.
سيف:انتى عارفه أن كلامك ده كله انا مش مستفاد منه حاجه انا بس عايز سبب ما مش معقول سيبتينى من غير سبب
ريم:لا بسبب يا سيف وسبب قوى جدا كمان بس مش هينفع أقوله ليك
سيف:تمام يا ريم تمام
ريم دمعت وبصيت بعيد وايديها اتحطيت على السلسله المستخبيه فى هدومها
سيف لاحظ السلسله من فوق بس مشافش هى بتاعته وله لا
سيف لنفسه:السلسله دى ،....يا ترى هى نفسها وله حاجه تانيه لازم اعرف
•تابع الفصل التالي "رواية تربية واصلاح" اضغط على اسم الرواية