رواية السمرة الفصل العاشر والاخير بقلم مريم اليوسف
رواية السمرة الفصل العاشر والاخير
يوم العرس
عمار وصل المى والولاد ع الضيعة .. الولاد راحو عبيت عمهن والمى راحت عبيت ابو اياس ..
ماشية بالضيعة .. وخيمة العرس تنتصب بالساحة الكبيرة يلي قدام بيت ابو اياس .. واضطرت تمرق من جنبها لتوصل لمدخل البيت .. وهية قربت توصل بيطلع بوجهها منار بالصدفة .. عم يرجع بخطواتو لورا ومعو كبل كهربا عم يجرو معو .. ومو منتبه لوجودها لسه
منار بصوت عالي موجهو لحدا : شوو منيح هيك
صوت من بعيد :ايي منيح
منار :شوووو
:لك منيح .. تعا
منار :قوووي صوتك ماعم اسمعك
المى :عم يقلك منيح
التفت فورا لمصدر الصوت وشافها واقفة لانو قاطعلها الطريق
ردت شعرها ورا ادنها بخجل وقالت :يعطيك العافية
منار :الله يعافيكي
المى :بدي امرق
منار :اي اكيد .. تفضلي
هزت براسها ومشت ... وهو لحقها بقلبو قبل عيونو
وصحي على حالو لما اختفت من قدام عيونو وكمان صحي انو خسرها بأيدو
صوت اياس من جنبو :روح حكيها
منار :لا لا
اياس :ليش
منار :خلص يلي راح راح
اياس :اذا بدك تحكيها انا بظبطلك الوضع
حط منار ايدو على كتف اياس ومشي
خلصت تظبيطات العرس ومريم وديمة كانو ببيت اهل اياس عم يتحضرو والبنات كانو معهن .. من شهد لألمى لغزل لألاء
غزل همست لالمى : ماضل غير انا وانت ياحسرتنا
المى : ياحسرتك لحالك .. انا مو مفكرة بالموضوع
غزل : ليش ولوو والله الحب حلو والزواج أحلى ليكي ما احلاهن
المى :اي اتزوجي مين ماسكك ... ولا ماعم تلاقي عريس
غزل :حكاني
المى :مين
غزل :شوكت
المى :وان شالله رضيتي تحكي معو
غزل :حاليا عم نحكي عادي
المى :بدك نصيحتي بلاه
غزل :ليش
المى :واحد فلتان
غزل :عنجد
المى :مابتعرفي انو كان يحب وحدة من ضيعة الشقرة وضحكت عليه مشان يدخل اخوها على المعمل واخوها يلي خرب المعمل
غزل :من وين جبتي هالحكي
المى : ولمى عرف انو كانت عم تضحك عليه صار بدو يرجعلك
غزل :عم تحكي جد
المى :والله
غزل :طيب كيف عرفتي
المى :مصدر موثوق
غزل :مريم وديمة بيعرفو
المى :مابظن .. بس زواجن بيعرفو
غزل :هيك لكن
المى :هيك ونص
خلصو العروسات مكياج ولبس ووقفو جنب بعض قدام المراية
والنسوان صارت تزلغطلن
المى :تعي خلصو
قربو منن والمى كان معها سلة فيها شوية ورق ورد وصارت ترشن عليهن وتزلغط مع النسوان
المى :هي لدمدومة
#اويها حطي المخدة وراكي
اويها عريسك عم يستناكي
اويها دير بالك على حماتك
اويها و نيالك على بنت حماكي
وليلي لييييش
مريم :والله عم يطلع معك الموش
المى: لكن
مريم :ووحدة الي كمان
المى :من عيوني
المى :اويها قامت العروس على حيلها
اويها و هرهر الياسمين من ديلها
اويها لا تقولوا عروستنا وحيدة
اويها في عنا المى وديمة وغزل غيرها
ولي لي ليييششششش
ههههههههه
ام منار :يسلم هالتم يا عيوني
المى :شكرا خالة
همستها غزل :شكلك عجبتها ورح تخطبك لأبنها
المى :مين هي
غزل :امو لمنار
المى :تضربي اييي
________________________
طلعت ديمة وراحت على بيت اهلها مشان تطلع من بيت ابوها وراحت المى وغزل معها
والشباب اتجمعو مع كبارية الضيعة يروحو يجبوها لعندن بيجو بطالعو مريم من بيتها
اجو الرجال على المضافة شربو القهوة وقامو يطالعو البنت .. وعدت اهلها بين الدموع وتقدم عريسها اخدها وطلع ركبها بسيارة العريس وراح على بيتو ليطلعو اختو .. وبقيت غزل والمى مع ام ديمة عم يواسوها على طلعة ديمة ..
غزل :بالاذن خالة بدنا نروح لعند مريم
ام ديمة :اي ياعمري روحو عقبال ما افرح فيكن .. نحنا جايين على خيمة العرس
طلعو مشي من بيت ديمة لبيت مريم .. وسمعو صوت من وراهن بسيارة
منار :تعو لوصلكن
اتطلعت عليه المى .. وماردت وضلت مكملة وغزل معها
وصلو كانت مريم واصلة عباب الدار كمان مع بكي ودموع فرح وفقد ..
المى :انا مكياجي خرب على الاخير
غزل :لا ماصار شي
المى :هالشعور شو صعب
غزل :اي والله الله يدوقني اياه
ضحكت المى وهية عم اتداري دموعها :الله ياخدك هههه
عيون منار مافارقتها ولا ثانية .. حبو عم يتجدد بداخلو .. وعم يسأل حالو شو عملت بحالي ... عم يراقب كل تفاصيلها ... متغيرة كتير .. كتير .. حركاتها ضحكتها .. متغيرة وكأنها متحولة من طفلة لبريئة لأنثى جريئة ... غيران عليها وحاسس انو الكل عم يتطلع عليها .. ياااه هالنظرات شو بتحمل حكي ووصف .. بس بالاخير في نظرة انكسار ..
كانت عم تضحك لما لفت وجهها ولمحتو بشكل سريع صافن فيها .. تغيرت ملامحها ورجعت دارت وجهها
المى بداخلها :ارحمني من نظراتك .. مزال مابدك اياني ليش عم تعذبني هيك
نزلت دمعة من خدها وهية شاردة .. يمكن بين موجة هالدموع محدا يعرف سبب هالدمعة .. بس هالدمعة سببها حب متألم
طلعت مريم بسيارة تانية مع محمد وراحو على خيمة العرس كل اهل الضيعة .. واشتغلت الاغاني والناس قامت ترقص وتدبك ومن بيناتن منار وشوكت ومعاذ ونزلو العرسان يرقصو ..
مريم وديمة قربو من المى وغزل سحبوهن يرقصو .. ومسكو ايدن بعض وعملو دائرة شباب وصبايا .. كل حدا وجنبو شريكو .. فجأة حست بأصابيع ايديه تغلغلو بأيدها وشد عليهن بقوة
لما انتبهت مين هو حاولت تنسحب بس كان متمسك فيها وماتركها .. وغزل اجت جنب شوكت
شوكت همسلا :حليانة
غزل :مو شغلك .. نترت ايدو وراحت مسكت بين منار المى .. وهالحركة زادت جنون شوكت ومنار .. والمى وغزل انبسطو كتير
طبعا العرسان مو منتبهين عحدا .. كل حدا وقلبو وعيونو على نصو التاني
كل ثنائي انسحب عجنب وصارو يرقصو مع بعض
اياس : اميرة يا نااس اميرة
ديمة : الله لايحرمني منك
مريم : محمد بكفي تتبسم
محمد :في أحلى من الواحد انو يتبسم بعدين ياعمري هاد عم يعبر عن الفرح يلي جواتي
مريم : وفرحان
محمد:كتييير
مريم : قلك شي اول مرة بقلك اياه
محمد :شو
مريم :مع انو بكير عليها ..بس رح احكي
محمد :شوو
مريم :بحبك
محمد :وبكير عليها يا اختو لأياس
مريم :ههههههه
محمد:وانا بعشقك
قرب اياس منن وقال : سامعك ولااه .. انتبه وانت عم تحكي مع اختي
محمد :انت ماعندك ولاد احمى ؟؟
اياس :هههه مبلى عندي بس صغار
محمد:ياارب تفرجيني فيه يوم
مريم :محماااااد انتبه لحكيك
محمد : كملللت .. تعا عمي خود اختك وانا فالل
مسكتو مريم :يامجنون ع وين
محمد :هههه لك انا بستغني
اياس :بشرفك ازعل وروح
محمد:قاعد على قلبك
راح منار وقعد جنب معاذ واخد الاركيلة منو
معاذ :يا زلمة .. يا زلمة
منار :مو عاجبك
معاذ :لا مو عاجبني
منار :اي قوم اعمل اركيلي لحال
معاذ: ماهي الضراابة الي
منار :اي خراس
قعد شوكت جنبن واخد النبريج من منار
منار :يا زلمة .. يازلمة (عم يقلد معاذ)
شوكت :شبك حنون
منار :ههه ولا شي صحة
منار :شو حنوني شبها غزل
شوكت:انا بعرف
منار :اي معها حق .. تركها للفضلة للبنت
شوكت:وهية شو عرفها
منار : بكون محمد او اياس حكو لنسوانن ... وهنن حكولا
شوكت :معقوول
منار :اووف معقول ونص
شوكت :يضرب هالحظ مالنا نصيب بالنسوان
منار :لا تشكيلي .. انا وحدة تركتا والتانية تركتني
معاذ بمسخرة😅 :ههههه من كتر مو عاملين حسنات بحياتكن
منار :اي خراس ..خراس .. انت لو مامرتك رضت عليك وسامحتك كنت مشنطط
حك راسو وقال :استرونا
الافراح عمت لياليهن .. وصوت الرصاص عم تعلى فوق قدانديلهن .. والعرس بعدو شغال والناس فرحانة ومبسوطة ..وضيعة الشقرا عم تتسمع على اصوات الفرح والرصاص .. ومقهورين انو فشل مخططن وماعرفو كيف
المى قاعدة جنب غزل وحكتها
المى :اتاخر الوقت وانا تعبت
غزل :والله وانا كمان
المى :نقوم
غزل :ياريت
قامو وانسحبو بهدوء من خيمة العرس وطلعو يتمشو
المى :رح توحشني هالضيعة
غزل :ليش ماعاد تجي لهون
المى : ليش شو لسه الي هون .. بالمناسبات هه
غزل :بلشتي دوام بالجامعة
المى : رحت هادك الاسبوع يومين .. وبكرا اذا الله راد رح داوم نظامي .. وانت شو مشانك
غزل :مارضيو اهلي سجل .. قال اذا تزوجت وسمحلي جوزي بخلوني
المى :هالمعادلة السخيفة هي
غزل :يلا السنة الجاي بسجل مع مريم وديمة
المى :ان شاء الله خير
غزل :بس عم فكر استغل الوقت وسجل بدورات انكليزي
المى :فكرة كتير حلوة
غزل :بتعرفي شو رح اطرحها على مريم وديمة ..
المى :اي ليش لأ
غزل :اي صحي انت مقتنعة بالفرع يلي سجلتي فيه
المى :في احلى من الحقوق اتدافعي عن الظلم
غزل : بدك تصيري محامية
المى :لا عم فكر صير ضابط شو رأيك
غزل :عفكرة عم تفاجئينا اخر فترة
المى :ههههه انا متفاجئة بحالي
: غزلل
وقفو والتفتو لمصدر الصوت وكان شوكت
شوكت :غزل ممكن كلمة
غزل :انت ناوي تفضحني عم تلحقني بالليالي
شوكت :بس كلمة
غزل :حل عني ماعندي شي احكيه
شوكت: بس بدي افهم شو غيرك
غزل : متعود علي عطول فاتحة قلبي بصدر رحب وناطرتك لتخلص من علاقاتك الفاشلة لترجعلي
شوكت :طيب شو اعمل بلف بلف وبالأخير برجع لعندك مالي غيرك
المى :روحي احكي معو عجنب هلق حدا بشوفنا .. او بيسمعكن وانتو عم تعيطو بنص الشارع
كتفت اديها ومشت لجنب الطريق جنب شجرة سرو وهو لحقها
والمى تابعت ببطئ لحتى ماتبعد عن غزل
لحتى هية كمان حست بايد مسكتها من زندها وسحبتها على جنب الطريق التاني
المى :لك مين انت ... مناار !!
منار :بدي احكي معك كلمتين
المى :انت ورفيقك متحططين علينا يعني
منار :هيك شي
سحبت ايدا من ايدو وقالت شو عندك
منار :بدي شوفك
المى :هيني قدامك شوفني
منار :بدنا نقعد ونحكي
المى :اذا مشان تتشكرني فما في داعي .. وحدة بوحدة
منار :هلق بالنسبة للشكر فعلاً بتشكرك كتير.. بس موضوع تاني
المى :انا وانت ؟؟
منار :اي
المى :شو هو الموضوع
منار : مابينحكى هون
المى :طيب ماشي انا رح ابقى حدد موعد وبخبرك عليه
منار :عنجد
المى :احلف يعني
منار :يعني مع عم تحكي هيك لتتهربي
المى :لأ شو شايفني انت
منار :معك حق .. ناطر منك اتصال
تركها وراح وهية لحقتو بعيونها يلي دمعو بعد ما مشي
المى : شوبدك يا منار ... يا كنت احكيها يا لا تلوعني على الفاضي
ضمت اديها على حالها ومشت وانضمت غزل لمشيتها
المى :شوبدو
غزل :بدو اياني .. بحبني وبدو يخطبني .. شو رأيك
المى :انت بتحبيه
غزل : بصراحة .. اي .. مع كلشي عملو معي بحبو ... لو لسه مابحبو كنت قبلت صدقات وعلاقات حب من زمان .. بس شي جواتي يمنعني وهو الوحيد لما يحكيني فورا رد عليه
المى :لكن اقبلي .. بس بشروط تحطيها .. ولاتقبلي بشروط حيالله .. شوكت اكتر واحد من الشلة يلي شمال .. بدك تنتبهي منو
غزل :شروط متل شو
المى :شروط صارمة وفترة خطبة طويلة وتكتشفيه واذا حسيتي انو بلش يلعب بديلو والو شي بسيط اتركيه ولا تترددي لأنو اذا عمل معك هيك شي اثناء الحب والخطبة .. ايام الزواج مارح يتردد ويعملها بكل بساطة
ضلت ساكتة وماردت
المى حكت وهية شاردة قداما :كمان منار حكاني
التفتت عليها غزل وقالت :شوبدو
المى :يشوفني
غزل :ورح تشوفيه
ابتسمت وهمت بمشيتها وقالت :بس بشروطي
_____________________
بعد نص الليل والناس نايمة إلا عرسانا سهرانة ومعهن العيون العشقانة
واقف منار على السطح وصافن بالقمر والنجوم
الشلة بلشت تتحول من عذابية لمتأهلين .. ومابقي غير هو وشوكت
شي مدايقو ... معقول غيران من رفقاتو .. ولا ندمان على الماضي ... ولا مقهور من شي ... حتى هو مابيعرف بس يلي بعرفو انو مانو مرتاح
رن موبايلو بجيتو .. اخدو واتفاجئ بالاسم
((هلا))
منار :هلا؟؟ شوبدها
سكر بوجهها ومارد
____________________
بعد اسبوع تقريبا
رجعو العرسان من اسبوع العسل مارح نقول شهر .. لانو ماطولو لأنو كان في طلبية بالمعمل كبيرة ولازم يكونو
ببيت اهل معاذ
مجتمعين الصبح والاء وام معاذ وشهد عم يحضرو الفطور
دخل معاذ على المطبخ مستعجل وقال :شو صار بالفطور مستعجل
الاء : يالله اخي ثواني وبكون جاهز
اخدت الاء الصحون وامها اخدت الخبز وطلعو على السفرة
ومعاذ قرب من شهد وقال :شبو القمر قالب وجهو
شهد :شو بينقصك عن رفقاتك لحتى هنن راحو شهر عسل ونحنا لأ
معاذ :هو اسبوع
شهد :كنو يوم .. بس لأ انا كان شهر بصل استقبلناه بالخيانة
معاذ :ما عاساس تسكر الموضوع
شهد: هاد الشي رح يضل جرح ومعلم جواتي طول العمر .. يعني اذا سامحتك مو معناتها نسيت
معاذ :اصبحنا واصبح الملك لله .. شوبدك هلق
اخدت ابريق الشاي وقالت :سلامتك .. بس اتركني بحالي
___________________
وصل بسيارة الحليب على باب المعمل .. وبلشو العمال ينزلو الحليب لداخل المعمل .. وهو طلع من جيبتو ورقة وفتحها بحماس
وبلش ينقل نظرو بين سطورها والصدمة عم تكسي وجهو
قرب منو محمد وصبح عليه
شوكت بشرود :اهلين .. اهلين
محمد : شو حنوني.. مافي مبروك يا عريس
اتطلع فيه وصفن شوي وبعدا قال مبروك .. شو شايفك هون
محمد :بالله .. وانا فكرت حالي هنيك
شوكت :زناختك مابتبطلها
محمد :ههههه انت شبك وكانو حدا دالق علبك سطل مي مجلدة
شوكت :ياحنون اتركها لربك
محمد :خير صاير شي بغيابنا
شوكت :لا ..
عطاه الورقة وقال : بس هي الورقة ويلي فيها بسسس .. هنن شروط الانسة غزل لتقبل فيني
محمد :ههههه بالله جد هات لشوف
اخدها وصار يقرأها وفرط من الضحك
تركو شوكت وقال :اي تمسخر ..
وراح وقف على جنب بجية معاذ ووقف جنب شوكت
معاذ :شوفي
شوكت :قلنا هي البنت منيحة .. طلعت كاتبة قائمة طلبات بدا مصباح علاء الدين ليحلها
معاذ :ولشو هي
شوكت :مشان انقبر على قامتي واتزوج ياحنون
معاذ :اصحككك ... صدقني لا تتورط
شوكت :لي
معاذ : خلص لا تتورط ولا تسألني لي
تركو مشي من جنب محمد
معاذ :مبروك محمد .. وكمل لجوا
محمد وعيونو بالورقة :ههههه اهلين اهلين
انضم اياس لمحمد بدو يعرف شو عم يضحكو .. وشوكت شافن كيف عم يقرو ويضحكو
راح لعندن وسحب للورقة من ايدن
شوكت :اي هات لهون تضرب منك الو
اياس :ههههه والله مابتقصر فيك حنونيي
وصل منار بسيارتو لعند محمد واياس
منار :نورت شباب
اياس :منورة فيك ابن خالتي
منار :كيف كان اسبوع العسل
محمد : شوبدنا نحكيلك لنحكيلك ... غير شكل
اياس :يلا منار شد همتك وفرحنا فيك
منار :ان شاء الله .. عشو عم تضحكو
محمد :عالحنون
منار :شوكت شبو
محمد :غزل كاتبتلو قائمة ينفذا مشان تقبل فيه
منار :ويلي هية ؟
اياس : والله معد اتذكر بس من بيناتن خطبة سنتين ... وباسورد التلفون ... يحلق دقنو ... هدية كل يومين .. ههه معد اتذكر شو محمد كمان
محمد :يخلص لم الحليب من الضيعة خلال نص ساعة ومايطق حنك مع النسوان
منار :والله بيستاهل
محمد : اي والله
اياس : ايه .. بعين الله انا داخل شوف الشغل
محمد :خدني معك ابن حماي
راحو وضل منار عم يبتسم .. لرن تلفونو
اخدو وكانت هلا
قرر يرد وفتح خط :الو
هلا :منار واخيرا رديت
منار :شوفي هلا ماني فاضيلك
هلا بترجاك تسمعني ..
منار :عشو بدي اسمعك .. غيرتي رأيك وبطلت كلب وحقير
هلا عم تبكي :والله اخي كشفني وقلي هيك بتبعتيلو احسن مالوم حالي .. واتطريت ابعتلك هيك مشان تفكر انو بكرهك
منار :مافهمت شي بصراحة
هلا :والله كان مغلوب على امري .. بترجاك خليني شوفك
منار :...
هلا :منار والله انا حبيتك .. وبموت فيك كمان خلينا نجتمع وبشرحلك كلشي بس اعطيني فرصة
منار :هلق صار فيكي تشوفيني
هلا:اي اخي سافر بترجاك
منار :طيب ماشي ووين وايمت
هلا :بكرا الساعة ٢ الضهر بكافيه المدينة منيح
منار :تمام ماشي
هلا :بحبك
منار :بحكيكي بعدين
سكر ودخل على المعمل
والمسا بعتتلو رسالة المى :فيني شوفك بكرا الساعة وحدة بالكافيه يلي شفتك فيه اول مرة
رد :اي أكيد .. بعد مابعت الرسالة اتذكر المواعيد المتقاربة بين الموعدين
منار :لك شوو عملت انا ... خلص اي بلحق
___________________
تاني يوم الساعة وحدة
دخل منار من الكافيه يلي رح يقابل فيه المى .. دخل بس وصار يدور بين الطاولات ومالقاها على ولا وحدة .. دخل وقعد على وحدة وصار يراسلها .. وهية ردتلو :شوي وبكون عندك
اتاخرت لاجت وهو كل شوي يتطلع على الساعة خايف يروح عليه الموعد التاني .. وع الساعة وحدة ونص اجت المى
المى :بعتذر .. بس كان زحمة
منار :مو مشكلة .. تفضلي
قعدت ولاحظت عليه متوتر
المى :في شي
منار وهو عم يهز برجلو :لا أبدا .. شو تشربي
المى :عصير
طلبو عصير ومنار كل شوي يتطلع على الساعة
المى : أسفة اذا اتأخرت بس طلعت فورا من الجامعة لهون وكان زحمة
منار :شو سجلتي
المى :حقوق
منار :حلو
المى :شكرا
سكتو شوي ..
المى :كنت مصر انك تقابلني .. شوفي
اجا الكرسون وعطاهن طلباتن ومشي وهالوقت استغلوه بالصمت
اتطلع بالساعة وكان بدو يحكي
المى : عندك موعد تاني
منار : اي
المى : ما انا خبرتك بالموعد .. كان فيك تقلي ماني فاضي بهالوقت
منار :المشكلة ما انتبهت غير بعد الاتصال
المى :كل هالقد الموعد مهم
منار :مو قصة مهم .. القصة قصة فضول
المى :كيف يعني
منار : خلص بعدين
المى :يعني بدك تروح
منار :مابعرف
مدت ايدا فوق ايدو وقالت : لاتروح
انصدم من حركتها .. واتطلع بايدها وفيها بصدمة
ساكت وساكن ما آتى باي حركة
المى :شو
منار :رح اجل الموعد
المى :انا برأيي تلغيه
ضحك وقال :هيك بدك
المى : اذا رح تسمع مني فأي الغيه مشاني
منار (ابتسملها بحب ): انا بأمر عيونك ... رح اثبتلك هالشي
طلع موبايلو واتصل عرقم هلا .. وفجأة تلفون المى صار يرن .. طالعتو من الجزدان تحت انظار منار ..وحطت الموبايل على الطاولة ودفشتو لعند منار
منار شاف اسمو على شاشة تلفونها .. وفكر انو خربط وعم يدق رقم المى .. بعد التلفون عن ادنو واتطلع فيه بصدمة
منار :بتعرفيها لهلا؟؟؟؟
المى :اي .. انا هية
منار :شووووو
المى :لكن متخيل انو ضل ساكتة وما اعرف شو هو الذنب يلي تركتني مشانو
منار :ماعم صدق .. هلق انت يلي كنت عم تحكي معي كل هالفترة
المى : كانت خطوة كتير مهمة بحياتي من الخطوات يلي غيرتني .. كان لازم اعرف وردلك الشي يلي عملتو فيني .. واتركك بدون سبب... وقصد رجعت بعتلك واخترت موعدين قراب من بعض .. وعن قصد اتأخرت
منار :لحظة .. لحظة .. انا ماعم استوعب
اخدت الكاسة ورشفت منها وقالت:خود وقتك
صفن شوي فيها وحكي :كل هالفترة عم تتسلي فيني
رفعت ايدا بوجهو بمعنى ستوب :لحظة انا ما اتسليت بحدا .. ولاتنسى انو انت يلي بلشت
منار : ووصلتي لغايتك
المى : اي وكتير .. من خلالك كشفت سمرا على حقيقتا ... ليك حابة احكي شي اذا عندك وقت
منار :احكي
المى :بتتذكر انو صار سرقة بالبيت عنا
منار :ايي
المى :هي انا
منار :انت سرقتي بيتكن
المى :طبعا لأ ... كل يلي انسرق هو دهباتي ودهب امي وخبيتن عند بيت جدي.. بكرا بخلي خالي يقول انو التقوا الدهبات وبيرجعولنا .. كان لازم اعمل هيك للاقي حجة وازرع كاميرات بالبيت
منار :وزرعتي
المى :اي وكشفت سمرا بالصوت وبالصورة
منار :مشان هيك حاولت تقتلك ؟؟؟؟؟
المى :اي
منار:وكيف بتخاطري بحالك هيك
المى :ماخاطرت هية كشفتني ... متل ماحكيت معك حكيت معها عاساس زلمة وصرت هددها .. كان بدي اياها تطلق وتتركنا بدون اي شي .. مشان بابا واخواتي الصغار .. بس هية تصرفت بتهور ... ليش انت شوفكرت السبب يلي قتلتني الو
منار :مابعرف صرلي فترة ضايع ... بتعرفي شو يعني ضايع .. يعني بمشي يمين بلاقي حالي شمال
المى : مابعرف ليش حبيت احكيلك كل هالشي .. او يمكن كان بدي حدا افتحلو قلبي واحكي يلي صار معي هالفترة
صافن شوي بالطاولة وضحك ضحكة جانبية :ماعم صدق انو انت هلا .. ههه وانا كنت اقعد احكيلا .. قصدي احكيلك عنك .. وانت تغاري من حالك هههه
المى :بتعرف انو كان من دواعي سروري .... بس بعدين كان لازم علقك بهلا مشان اتركك متل ماتركتني
منار :انا هلا ماحبيتها ... حيبت الحكي معها .. حسيت شي اتجاهها .. بس هلق عرفت شو هو ... كنت حاول عوض حالي فيها بدالك ...قلبي عرفك وانا ماعرفتك
المى : يعني لساك بتحبني
منار :ساكت
المى : انا احكيت يلي عندي وصار كلشي واضح قدامك .. بس مابعرف شو انت بدك وليش طلبت تشوفني .. اصلا مابعرف اذا لسه بدك تحكي شي بعد يلي اسمعتو
كمان ساكت
المى : ليك اذا بدك تضل عم تفكر رح تتعب .. انا وانت متعادلين ... واذا بدك بنفتح صفحة جديدة
وقف واخد مفاتيحو وموبايلو وقال : بشوف مرة تانية سلام
مشي خطوتين ووقفتو :منار
التفت عليها
المى :مافي مرة تانية
تركها وضل طالع لبرا ... مع كل خطوة عم يخطيها كلشي قدامها تلاشى . حست قلبا عم يتمزع .
حكت بغصة : اول مرة حكمت علي بشي انا ما عملتو وسامحتك .. وهلق شو الشي يلي عملتو .. لانو رديت حقي ... مابعرف كيف بتفكر ... ليش كل هالحواجز .. ليش عم تعذبني وتعذب حالك
هية عم تحكي مع حالها حست انو في حدا قعد على الكرسي .. رفعت راسها بفرح .. بس لقت شخص تاني مابتعرفو
المى :خير
من اول مادخلتي عم راقبك وشفتك جيتي قعدتي مع هداك الشب ... الظاهر مانكن متفقين .. قلت لأرمي سنارتي
اجت بدا تحكي بس لقت حدا تاني حكي عنها
منار :خيرر يا استاذ... طلعنا خمس دقايق قعدت مع المدام .. وانت ياخانم كيف بتسمحيلو يقعد ..
المى :ان...
سحبها من ايدها وقال :قومي خلصينا.. بيطلع الواحد يغير جو بتلعنو اخت الجو . نسوان بدا تكسير راس
سحبها وهية بحالة صدمة .. وجرها وراه .. واتحولت الصدمة لابتسامة على وجهها
ركبو بالسيارة وانطلقو .. وهنن ساكتين
لوقف بمنطقة مقطوعة .. التفتت عليه لتحكي
منار : بتعرفي شو مشكلتي انو بحبك ... وماعم اقدر طالعك من جواتي .... روحي اتعلقت فيكي .
رفع ايدو وحطها على خدها :ماني قدران عيش الشي يلي عشتو بغيابك مرة تانية ... شعور الندم مافارقني ولا لحظة ... مابس رح نفتح صفحة جديدة ... رح افتحلك كتاب بكاملو .. وكل ماغلطنا غلطة نشق الورقة ونبلش من جديد
المى :وانا كل هالفترة ماقدرت اكرهك ... بحبك .. والله بحبك
ماحسو عبض الا وهنن بوسط قبلة جمعتن مع بعض لدقائق
_____________________
بعد فترة مو معروفة
بغرفة مقابلة السجناء .. انفتح الباب ودخل شريطي وماسك سمرا من ايدا ودخلها وطلع وسكر الباب
اتطلعت سمرا قداما لقت المى قاعدة وناطرتها
المى :تعي اقعدي
قربت سمرا وقعدت وعيونا معلقة على المى
مدتلا المى ورقة .. اخدتها وصارت تطلع فيها وتضحك
سمرا :هه شو هي
المى :مابين معك شو هي .. ورقة طلاقك من ابي
سمرا :اي شكرا
المى :كل يلي كان بدي اياه هي الورقة بهدوء بس انت بخباثتك وصلتي حالك لهون
سمرا :ومفكرة اني متندمة ؟؟ لا طبعا انت وابوكي بتستاهلو .. انت بتستاهلي الموت وهو بيستاهل الخيانة ... لو كان يهتم فيني ويعبيلي النقص ماكنت صرت هيك
المى :ليش ماقلتيلو هالشي .. ليش عم تقوليه الي.. ولا قلك مادخلني هي حياتك وانت كان المفروض تحافظي عليها .. عالقليلة مشان ولادك .. اي قوليلي مانك مشتاقتيلن
سمرا والدمعة بطرف عينها :كيفن
المى :مبسوطين غير شكل عم يروحو ع المدرسة وعين الله عليهن .. وانا عم اهتم فيهن وماعم نقص عليهن شي
ماحكت
المى : انا اتنازلت عن الشكوى
فتحت عيونا على وسعهن بصدمة
المى :ليش مستغربة .. انا ماني متلك .. ستة اشهر وبتطلعي هيك قلي المحامي ... ولادك فيكي تشوفيهن ايمت ماحبيتي بس بشروطنا ... مابدي احرمن من امهن لانو فقدان الام شعور كتير صعب ... خبرتن انو اختك مريضة وسافرتي لعندا .
سمرا بندم ظاهر :شكرا
المى : مابنسى انو الك فضل علي رغم سلبياتك بس بينا عشرة
لمحت المحبس يلي بايدها غير يلي كانت لابستو من هلال
سمرا : مغيرة المحبس ولا العريس
اتطلعت بالمحبس وابتسمت : اي لمنار وبعد كم يوم عرسنا
سمرا :مبروك
المى :شكرا .. اي وبالمناسبة نحنا تركنا الضيعة .. واطمني محدا عرف حقيقتك .. يلي عرفوه انو كيد مرت اب اتجاه بنت جوزا ... وبما انو اطلعنا من الضيعة بكرا القصة بتموت .. وهيك هيك انت معد الك رجعة عليها
سمرا :بس انت راجعة
المى : المهم انت تبلشي من جديد .. وبتمنى انك تكوني تعلمتي درس ... افتحي صفحة جديدة بحياتك هي نصيحتي الك
وقفت المى ووقفت معا سمرا
سنرا :بدي شوف ولادي
اتطلعت المى حواليها وقالت :هون ... خلص ست اشهر وبتطلعي .. ولاتنسي انك عند اختك
سمرا :كيفو ابوكي
المى :وبكل عين وقحة عم تسألي عنو بعد ماكسرتيه
مشت خطوتين ووقفت المى: اوبس .. كنت نسيت
رجعت وحطت على الطاولة مبلغ وقالت : بيلزموكي .. ااه صح نسيت خبرك .. التقو الدهبات ههههه... بااي
طلعت وكان منار بانتظارها حطت ايدا بايدو ومشو
________________________
بعد عام
بشاليه على البحر والوقت ليل
قاعدة المى مقبال التلفزيون .. وطلع منار من المطبخ وحامل اركيلتو وضل مكمل عباب الشاليه
المى :ع وين
منار :لعند الشباب
المى :بالله شوو .. مابكفي جبتلي اياهن معنا لهون كمان رح تتركني وتروح تسهر عندن...
انا قصد اقترحت عليك انو نطلع لهون نغير جو .. ولقيتك جايبن معنا .. قلت ماشي .. بس ماعم شووفك عطول معن
منار :ياعمري لاتنسي انو كمان رفقاتك هون
المى :بس انا بدي ضل معك
منار :والله ساعة بس لخلص هالنفس وبرجع مشانك لانك بتضايقي من الاركيلة
المى :لا مابضايق .. بس مابحب ريحتها
منار :نفس الشي
قرب باسها على خدها وقال والله مابطول شوي وراجع كمل السهرة معك
المى :طيب ماشي .. ناطرتك هاا
منار : بحببك
طلعوهية نفخت وطلعت من من باب البلكون وراحت تتمشى على الشاطئ .. لقت كراسي مصفوفين جنب بعض قعدت على واحد وسرحت بالبحر وبجمالو
المى :بقولو عنك غدار .. بس والله الحياة غدارة اكتر منك .. مو قصدي ع الحياة قصدي ع الناس ... متل ما الناس مابتوثق فيك انا كمان مابوثق بحدا .. ولا باي حدا .. حتى بحالي مابوثق .. شقد قلت مارح ارجع لمنار بس خالفت عقلي ورجعتلو (ابتسمت)بحبو كتير .. مابدي عيش عم اتعذب .. وابدا مو ندمانة بالعكس منار انسان رائع ومافي منو الله يحميلي اياه .. ويحميلي بابا واخواتي وخوالي وتيتة... بس بتعرف عشو بتندم اكتر الشي انو بيوم من الايام كنت غبية .. بصفن بحالي وبقول العماااا ... بتعرف شو انا بحبك الك كمان في أحلى من البحر هههههه .. حاسة حالي مجنونة .. بس كلو من منار بيتركني وبروح لعند رفقاتو قصدي ضرايري.. قلتلو ياحبيبي يامنور مزال الجو صيف وحلو خلينا نطلع شوي ع البحر .. واذ بكون مخبر كل رفقاتو وقال هنن كمان بدن يطلعو يغيرو جو وكل واحد نتعلي مرتو واجو.. هههه حتى نسوانن عم يعانو متل ماعم عاني
انسحب الكرسي يلي جنبا وقعدت غزل
غزل :عم تحكي مع حالك ؟؟.
المى :مع البحر
غزل :بدي افهم انا شو جابني معكن
المى :شوفي
غزل :انتو كلكن متزوجين الا انا مخطوبة وجيتي مو ظابطة بقلعو لشوكت من الباب بنط من الشباك هربت منو هريبة هلق
المى :وعاجبتك هالحالة يعني روحو انقلعي تزوجي
غزل :قلت سنتين يعني سنتين
شوكت من وراهن :اقنعيها .. رح تجنني
المى :عم اعمل جهدي
غزل :لاتحلمو
المى :ليك اسمع مني هون محدا شايفك لا اهلها ولاغيرو اخطفها يا بتتزوجك يا ضل خاطفها
غزل :بالله شوو لاتنسو انو انا مأمنة عنكن
المى :وخطفك وراح شو نعمل .. ماطلع بأيدنا نمنعو
غزل :هلق لعند منار
منار :سمعت اسمي
قرب وقعد جنب المى .. وشوكت جنب غزل
غزل :مرتك عم تقلو اخطفها
قرب وحاوطها من كتافها وقال :مرتي انت عم تدرسي حقوق على حد علمي .
محمد من وراهن :ههههه وشوكت عندو حقوق ومرتك بدا تدافع عنو
منار :وانت شو جابك بالله
محمد :ههههه قلعتني مريم بتعرف انت عم تتوحم ومابدا الولد يطلعلي 😂😂😂
الكل :معها حق
قرب وقعد جنب منار صوت مريم من وراهن كمان : شو استاذ محمد
وقف وقام لعندا وقال :ياعيونو لمحمد
مريم :طالع تشم هوا من دوني
محمد :ما انت الهوى يلي بتنفسو ياعمري
منار :بلشنا خرط هههه
سحبها من ايدها وقعدها جنبو
المى ل منار :ليش الحقتني
منار : شوب جوا .. وليكي هون محمد وشوكت قلنا لنجي لهون
مريم :يعني اياس جاي
منار :اي راح يجيب ديمة
مريم : منيح مشتاقتلو
محمد :لسه من شوي شفتيه
مريم :شكلي وحامي جاي عليه
منار :اشكر ربك انو مو جاي عليك يامحمد كانت حلت مصيبة
محمد :مين صايرو هالايام اب مهضوم
شوكت :بكولا ولا بلا كولا
محمد : مابيلبقلك
انضم للقعدة معاذ وشهد واياس وديمة وصارو يسألو شوفي
شوكت : اقنعولي غزل تنزوج والله معد فيني اصبر لسه سنة
مريم :اي صحي ولو العما بقلبك حسي فيه لخل الزلمة
اتطلعت عليه غزل بطرف عينا وقالت :ماشي لنجرع بنحدد موعد العرس
شوكت :اي ها يسعد دينك ياحنون
محمد :انا عند اقتراح
شوكت :شو هو
محمد :دوبنا هون خود غزل وانزلو ع الضيعة اتزوجو وارجعو رح ننطركن هههههههه
وكلن فرطو ضحك
وهالسهرة زادت حلاتها وقضوها مزح وضحك .. وبظن بعد هالجمعة الحلوة ماضل شي يفرق بيناتن .. اذا البنات رفقات والشباب رفقات .. رفقة صادقة مبنية على الحب والاحترام والأخوة والخير
اياس :حمود هتلك شي وحدة
محمد :نكتة؟؟
المى :لا لا اخي محمد .. حكمة من حكم جدك
محمد :وبتصدقو انها حكم لجدي ههههه
منار :لكن لمين
محمد : الي 😅😅
شهد :طيب عطينا شي وحدة هيك بتناسب هالجمعة الحلوة
محمد :رح احكي نصيحة بمناسبة هالجمعة الحلوة الكن (وللمتابعين)
معاذ :وهية؟
محمد : لا تضلو بدون روح الفكاهة والمرح والضحك .. صدقوني محدا ماخد معو شي ... شو ماكانت اموركن صعبة خدوها بروح مرحة والله هالدنيا مامستاهلة نقطة زعل .. وكمان لاتنسو قول الرسول صل الله عليه وسلم (تفائلو بالخير تجدوه)
منار :وانا بقول دافع عن حبك لأخر رمق .. (ضم المى اكتر) ولاتخلي أي شي يخرب هاد الحب .. ولاتكون غبي وتخلي شي يغير رأيك فيه اذا انت مقتنع فيه ... حتى لو كان هالشخص هو سلبي .. لا تتركو جيبو لعندك وانت غيرو .. مزال بتحبو قادر تغيرو .. الحب بيعمل المعجزات
ابتسمت بحب لمنار وماعلقت
معاذ : وانا بقول .. اذا الله اعطاك كلشي بتتمناه لا اتطلع عينك لبرا .. احمد ربك واقتنع بحياتك وبعمرك لا تطمع .. لانو الطمع ضر مانفع .. وخلي طمعك بشي مفيد بهالحياة وكلشي من الله يا محلاه
شوكت: وانا بقول حدد هدفك بهالحياة واعرف شوبدك .. ولاتقضي عمرك عم تجرب هون وهون .. حدد هدف واحد وامشي عليه وصدقوني رح توصلو
اياس :وانا بقول يلي مابيحسب مابيسلم .. ضل احسب لقدام وفكر وخطط .. صح بقولو عيش اليوم ولبكرا فرج .. بس بوقتنا هاد غير ... لانو الدنيا مليانة مطبات .. وصدقني اذا ماحسبت لبكرا .. واجا بكرا صعب عليك محدا رح يتطلع فيك
المى:وانا بقول عمركن لاتوثقو بحدا ... محدا بينوثق فيه الايام خلي اعتمادكن دائما على حالكن .. وعطول تخيل اسوء الاحتمالات مشان اذا صار شي مانو منيح تكون متوقع حدوثو واذا صار العكس وكان شي حلو بتفرح كتير
مريم :وانا بقول هالحياة بدا مغامرة .. لانو بدون مغامرة مو حلوة.. واذا ماعشت وجربت رح تضل طول عمرك تقول لو جربت شو كان صار
شهد :وانا بقول حافظو عالناس يلي بتحبكن .. ولاتتخلو عنن او تبدلوهن ... وكمان الصداقة شي مقدس وصداقكن كتير حلوة بعيدة عن المصالح حافظو عليها
غزل :وانا بقول لا تستقل بحالك واعمل قيمة لحالك مشان الناس تعملك قيمة .. ولاتكون البديل يا الاساسي يا بلا هالحياة بنعيشا مرة وحدة مانك مضطرة تعيشها وانت صفر عالشمال
ديمة :وانا بقول كون انت .. كون مميز .. كون متل بصمتك مافي متلها على مر العصور والازمان ... ولاتقلد حدا .. ممكن تاخد كم نقطة اجابية من شخص هو قدوة الك .. بس خليك مختلف
غزل :انا حابة احضر فيلم تحضر معي حبيبي
شوكت :اكيد
مريم :وانا بدي اتسطح تجي معي محمد
محمد :اكيد ياعمري لكن بدك اياني ضل قاعد معن هههههه
اياس لديمة :عمري شو رايك نتمشى
ديمة :ياريت
معاذ :شوشو شو حابة نعمل
شهد :اتمشى كمان
قامو كلن الا منار والمى
منار :وعمري الحلو بدو يضل هون
المى :اي انا زعلانة منك روح لعند رفقاتك لشوف كنو بينفعوك
منار :لك مالي غيرك حاج تصغير عقل
المى :بس انا مو جاي عبالي قوم
منار :ولايهمك ياعمري بحملك
المى: منار لااا
ما حست على حالها الا ارتفعت عن الكرسي لبين اديه واخدها ودخلو على الشاليه تبعن
المى :نزلني عيب عليك
منار :مرييم خلص انهي القصة .. بدنا شوية خصوصية 😂😂
تمت الرواية كاملة عبر مدونة دليل الروايات
- الفهرس يحتوي على جميع فصول الرواية كاملة :"رواية السمرة" اضغط على اسم الرواية