رواية السمرة الفصل الثالث 3 بقلم مريم اليوسف

الصفحة الرئيسية

   رواية السمرة الفصل الثالث بقلم مريم اليوسف 


رواية السمرة الفصل الثالث 

عند غزل 
البنات مجتمعين بغرفة غزل وغزل نايمة ع التخت وراسا ملفوف .. دخلت امها لغزل ومعها كاسات عصير وصارت تضيفن وقالت: اهلا وسهلا حبيباتي 
الكل :اهلين فيكي طنط 
ضيفت وطلعت 
مريم :اي احكيلنا غزل شوصار معك 
غزل :مابعرف سألو المى .. 
ديمة :احكيلنا المى 
المى :لك كنت عم دور ع اخواتي .. وفجاة لقيت غزل خايفة متلي وعم تدور ع اهلا .. فجأة طوب ولا واقعة عراسا حجرة  ووقعت بالارض لا من تما ولا من كما وبلشت تنزف بالدم .. كان شوكت وراي وصرخ عملات صوتو غزلللل .. وصار يصيح قتلتو البنت .. وانا واقفة مصدومة .. فجأة حملها وصار يركض فيها 
غزل :عنجد هيك صار 
المى :والله هاد يلي صار 
سكتت غزل وشردت قداما 
ديمة :وكيف شفتيه يعني خايف عليها 
المى :اي والله 



مريم :المهم كيف تجرأتي ورحتي معا ع المشفى بعرف قلبك خروق 
المى :اي والله قلبي خروق .. بس مابعرف كيف رحت وركبت معن كل همي انو اطمن ع غزل 
غزل :صح انتي قلبك قطيعة بس عنجد وقت الجد اخت رجال وبتشكرك ع وقفتك جنبي 
المى :لا شكر ع واجب حبيبة قلبي 
_____________________
بالمدينة 
نزلت سمرا من التاكسي وراحت ع بيت وقفت قدامو .. دقت الباب وفتحلا هلال 
هلال :اهلا وسهلا بالحلا .. تفضلي فوتي 
دخلت وهو عمل نظرة هيك وهيك   ودخل وسكر الباب 
____________________
المسا 
ببيت اياس 
مريم وامها عم يحطو عشا .. 
وابو اياس قاعد عم يحضر اخبار 
خلصو العشا وحكت ام اياس : قوم لنتعشى 
سكرت التلفزيون وقام 
قعد ع السفرة وقال :اياس وينو 
مريم :مابعرف .. 
ام اياس :دقيتلو وقال شوي وبيجي 
مريم :نستناه 
امها :لا ابوكي جوعان .. حتى يجي بنحطلو اكل 
مريم :قصدك حطلو انا 😒
امها :اي وشو شغلتلك 
مريم :خلينا نستناه شوي 


امها :سكتي 😠🤫
سكتت ونزلت راسا ع صحنا وصار تاكل 
فجاة بيدخل اياس 
ابتسمت مريم وقالت :اهلين اخي 
امو :حبيبي يلا قعود لناكل 
اياس :يلا جاي .. بس بدي مريم ثواني 
مريم :انا 
اياس :اي تعي شوي 
وقفت وقالت :ع وين 
اياس :برا 
ابوه :شوفي 
اياس :  بعدين .. تعي مريومة 
طلعو مع بعض لوصلو للباب 
مريم :شوفي 
اياس :تعي منار بدو يحكي معك كلمتين 
مريم :منار ؟ معي ؟ ليش 
اياس :والله مابعرف .. تعي هلا بنعرف .. ليكو ناطرني بالسيارة 
راحو لعند السيارة .. فتح اياس وركب جنبو  ومريم ركبت من ورا 
مريم:مرحبا منار 
منار :هلا مريم كيفك 
مريم :بخير ..  انت كيفك 
منار :تمام .. تمام .. مريومة الك ولا الديب 
مريم :اذا بقدر عليها تكرم 
منار :لا بتقدري 
مريم :طيب احكي 
منار : بدي تحكيلي مع رفيقتك 
مريم : ايو وحدة 
منار :المى .. 



مريم :وشوبدك منها 
منار :بدي تحكيلي معها وتقوليلا منار بدو يحكي معك 
مريم :انا بقلك من عندي مارح تقبل 
اياس :طيب حاولي 
مريم :جيت معكن .. بس ابوها كتير بخاف عليها وكلشي بتعملو تحت تصرفو 
منار :مشان هيك عجبتني .. 
مريم :بعدين ليش بدك تحكي معا .. عفكرة البنت ادمية وماخرج تسلاية ابدا 
منار :ومين قلك انو انا بدي اتسلى 
مريم :مزال مابدك تتسلى روح اخطبا 
منار :هيك خبط لزق .. بركي ما وافقو .. بركي هية ما وافقت 
مريم :وشو رح تستفيد اذا حكيت معا 
منار : بقنعها فيني بخليها تحبني .. يعني بندرس بعض .. بس والله ناوي اخطبا بس بدي احكي معا بالاول 
مريم : طيب تكرم رح احكي معا 
منار :وتقنعيها فيني 
مريم :حاضر وغيرو 😒
اياس :شوبدا تقلا 
منار :صداقة .. بدو يتعرف عليكي .. اي شي 
مريم  : قلا بحبك 
منار :لا لا .. صح معجب فيها بس لسه ما حبيتا 
مريم :قول انك بدك تعيش قصة حب 
منار :ياعيني عليكي بلشتي تفهمي .. وهي انتي شاهدة واخوكي شاهد انو انا مابدي اتسلى وناوي هالبنت بالحلال بس حابب احكي معها بالاول 
مريم : خلص عندي .. المى كتير جبانة بالحياة ومابتعمل شي الا بتشاورني فيه .. فاذا انا قلتلا احكي معك رح تحكي 
منار :لك مافي منك انتي 
مريم :بعرف 😎 المهم نزلو لنتعشى 
منار :انا صحة بدي روح 
اياس :انزل ولوو 
منار :خلص غير مرة .. انت تعشا ولحقنا خلينا نكمل السهرة عندي بالبيت 
اياس :ماشي .. لاحقك 
__________________________
بالبيت عند غزل 
كانت قاعدة وشاردة ومبتسمة وعم تتذكر كلام المى .. رفعت الغطا عنها وقامت وقفت ع الشباك وصارت تتطلع على انعكاس صورتها وتبتسم .. وبعدها تنهدت تنهيدة حب  ورجعت ع مكانها 
________________________
عند سمرا 
واقفة قدام المراية ومبلشة دهن برقبتها عم تحط فونديشين مشان تغطي اللون الاحمر يلي معلم ع رقبتها 
سمرا :العما شوو حيواان .. شو بدي قول لعمار اذا شافها برقبتي معلمة... اووف 
رمت الكريم من ايديها وهية عم تتأفأف بعدم نتيجة .. وقفت محتارة .. كانت منزلة راسها وعيونا عم تنقلن بالعلب الميكب يلي ع التسريحة ..  رفعت راسا واتطلعت ع حالا بخبث  وطلعت من الغرفة .. 
طلعت ع غرفة القعدة وكان فيها  المى واخواتا وقدامن بوشار 
المى :خالتو عملنا بوشار تعي سهري معنا 
سمرا :يلا بس لفوت ع الحمام 
دخلت ع الحمام ووقفت قدام مراية .. وفتحت الصيدلية يلي فوق المغسلة طلعت شفرة .. من شفرات الحلاقة  ..  هي الشفرة يلي بتنحط بقلب الموس .. يمكن لزوجها 
رفعتا ع رقبتها وخدشت مكان اللون الاحمر وصار ينزل هالدم .. مسحتن وعقمتن وحطت عليهن لزقة طبية 
رجعت الابتسامة الخبيثة انرسمت على وجها وقالت :هلأ صار وقتك يا منار بيك
____________________
بالبيت عند منار 
الغرفة كلها ضباب من كتر الدخان 
وقاعدين ع الارض وكل واحد متمدد ع فرشة وبتمو نبريج الارغيلة وبأيدو الموبايل عم يلعب فيه 
انفتح الباب ودخل اياس 
اياس :اووف شو عاملين مشحرة هون 
محدا رد 
دخل وقعد جنب منار وصار يدفشو ليفتحلو مكان يقعد 
منار تجلس بقهر وقال :تفضل قعود .. ترك كل هالبيت وجا يحاشكني على هالفرشة 
اياس :هههه لك لانو بحبك يا ابن خالتي وبدي ضل قريب منك 
منار وجه لعندو نبريج الارغلية وقال :اي اهلين بابن خالتي .. خدلك سحبة 
سحب النبريج من ايد منار وصار يأركل 
ومد رجلو لعند شوكت وصار ينكعو بأطراف اصابع رجليه 
شوكت :لك شبككك 
اياس :شبكن ولوو كل واحد راسو بتلفونو اتجلسو خلونا نسولف شوي 
محمد من على الفرشة يلي قبالو .. سكر تلفونو وتجلس وقال :قعدنا تفضل سولف 
وشوكت كمان تجلس ورما تلفونو وصار ينفخ بالارغيلة بدون ما يحكي 
اياس :محمد احكيلنا شي سالفة من سوالف جدك الله يرحموو
محمد :هههههه خليه مرتاح بقبرو مابدي يجيني بالمنام بالعكازة 😂😂😂
اياس: ههههه شي طبيعي لانك بتحرف كل قصصو
محمد :ههههه الحمد لله انو مات 
اياس :اي والله الحمد لله لانو لو شايفك كان اخدك معو مشان ماتفضحو 
شوكت :😏😏😏😒
منار :تضرب منك الو .. ليكو شباب دوبنا قعدنا بدي اقترح عليكن هالاقتراح 
شوكت :شو هو 
منار :  بدنا نكبر المعمل 
اياس :ليش 
منار : علينا ضغط .. ومنو بنكبر شغلنا 
محمد : طيب هيك خلينا ع الخفيف احسن .. وكمان مابدنا ننعجق 
منار :شو بدنا نضل طول عمرنا محلنا لازم نكبر ونتطور 
شوكت :فكرة حلوة .. بس المعمل صغير  
منار :بنكبرو 
شوكت : طيب انا من عندي موافق 
اياس :وانا موافق 
محمد :وانا موافق .. وشو عشان معاذ 
منار :معاذ عندي .. وكمان اذا لقانا موافقين مارح يعترض لحالو 
محمد :هههه مارح يدقق صار عندو شي اهم 
منار :انت بتقول هيك بكرا يومين  وبتلاقيه جاي عم يلعن هديك الساعة 
محمد :هههههههه اصبح خلينا نكبر الشغل مشان يلتهى 
_____________________
ببيت اهلو لمعاذ 
قاعد معاذ وهو وشهد مع الكل 
اجت اختو لمعاذ ومعها شاي  .. ضيفت وقعدت .. وشهد اخدت الضيافة وكأنها عنجد ضيفة .. 
وكان ع الطاولة فناجين قهوة  فاضية 
ام معاذ لبنتها الاء : قومي امي خدي فناجين هالقهوة على المطبخ 
الاء :حاضر ماما 
قامت اخدتن وكانت عم تزور شهد 
وام معاذ برمت تمها ع جنب وقالت بقلبها :ولا انهزت او تحركت وقالت انا باخدن.. لكن بدا خدم بنت المدينة 😏😏 بس مو علي  انابفرجيكي 
حكي معاذ :حبيبتي شربي شاي 
شهد :لا حبيبي .. ما بحبها زيادة 
ام معاذ بقلبا : اي لكن مابتشرب شاي 
شهد اتطلعت ع حماتا يلي عم تزورا وعرفت مغزى نظراتها  رفعت  حواجبا بغرور وقالت بقلبا :انا مشربش الشاي اشرب ازوزا 😌 
التفتت ع معاذ وقالت :حبيبي انا تعبت اشرب كوبايتك وخلينا نروح ع البيت 
معاذ كان حامل كوباية الشاي وبعدها ملينا .. حطها بسرعة ع الطاولة وقال:قومي حبيبتي .. 
امو :شرااب شايتك 
معاذ :شربت ماما قبل ما اجي .. يلا قومي شهد 
قامت شهد وقالت :تصبحو على خير ياجماعة 🤗🤗
ام معاذ :وانتو بخير😒😒
________________________
عند منار 
مزال كلنا موافقين خلينا نحكي شوبدنا نعمل بالتفصيل .. 
اياس :عم نسمعك 
منار :اول شغلة رح نجيب عمال بناء ونعمر وسعة ورا المعمل 
شوكت :بدنا نهد حيط المعمل ونبلش 
منار :لا بنعمر بعدين بنهد 
اياس :اي اظبط 
محمد :وبدنا نجيب عمال زيادة ماهيك 
منار :اكيد 
محمد :وبنات 🙂🙂
زورو منار وتابع حديثو وقال :اياس رح يدورلنا على عمال يكونو مناح 
محمد :بنااات؟🙂🙂
نفخ منار: وبدنا نجيب الة تانية لتسخين الحليب 
محمد :ونجيب بنات يشتغلو عليها 
منار :وبعدديين معك محمد .. اي رح نجيب بنات منيح 
محمد :يكونو حلوين 😁😁
اياس : اكمشلك اياه 
منار :ياريت 
محمد :هههههه لك عم نمزح ولوو بس عم نطبق عليكن نكتة الضفدع 
شوكت :هات لنشوف شو هية النكتة 
تربع محمد وقال : هاد يا شباب  النكتة كالتالي ( قال الأسد ملك الغابة جمع الحيوانات وقلن: بدنا نطور الغابة 
نط الضفدع وقال :ونجيب بنات حلوين 
الاسد تجاهلو وقال:  نعمل حلبات سباق وحلبات مصارعة 
الضفدع :ونجيب بنات حلوين 
الاسد:😒😤  ونعمل سوق مشان راحتنا 
الضفدع :ونجيب بنات حلوين 
الاسد عصب وتابع حكيو وقال :ونعمل سياج للغابة لحمايتنا 
الضفدع :ونجيب بنات حلوين 
الاسد  فقعت معو وقال :وفي واحد اخضر وعيونو كبار بدي اسلخ جلدو عن لحمو وارميه للحيوانات ياكلوه 
الضفدع :بعد ماتسلخ التمساح وتطعميه للحيوانات  نجيب بنات حلوين )
خلص وصار يتمردغ ع الارض وماسك بطنو وفارط بالضحك 
منار اتطلع باياس وقال :خلصت النكتة ؟؟
اياس :مابعرف يمكن 
اتطلعو ببعض وفرطو من الضحك بس مو ع النكتة ع صاحب النكتة 
____________________
عند سمرا 
داخلة ومعها كاسات عصير .. حطتها ع الطاولة وقعدت لفت رجل ع رجل 
المى واخواتا كل واحد اخد كاسة والمى عطت كاسة لخالتا 
اخدتها سمرا وقالت بقلبا: وهي احلا كاسة عصير لروق دمي وكون رايقة  لما احكي معك يا منار 😌😌
المى التفتت عخالتها ولاحظت على رقبتها لزقة طبية 
المى :خالتي شبها رقبتك 
سمرا حكت بدون خوف او توتر:وانا عم اعملكن كاسات العصير دخلت قطة من شباك المطبخ .. فكرتها اليفة حملتا ومدت مخالبها لتخرمشني ع وجهي .. بس انا بعدت راسي واخرمشتني برقبتي 
بشار :عنجد في قطة .. وينا 
سمرا :قلعتا 
براء لبشار :بكرا بندور عليها 
سمرا :يلي بيسمعكن بقول بعمركن ماشفتو قطة .. مزال عايشين بضيعة كلها حيوانات 
المى : المهم سلامتك خالتي 
سمرا :الله يسلمك (وبقلبا) الله لايسلمك 
مدت ايدها ع تلفونا وصارت تكبس فيه .. والمى رجعت تتفرج ع التلفزيون .. وبراء وبشار تسلحبو يمكن يدورو ع القطة 
___________________
عند الشباب .. 
رجعو لوضعياتن وكل واحد حامل تلفونو .. الا اياس معو ورقة وقلم وكأنو عم يحسب شي
اياس :منار 
منار :امممم 
اياس :كم عامل ناوي تجيب 
منار : ليش 
اياس :عم احسب  انو شقد  بدا تزيد ارباحنا
منار :محمدد 
محمد :اي 
منار :شو بقول جدك 
محمد :بقول جدي (يا كركدن لا تعجلن لا تحسبن لتقبضن) 
منار ضربو لاياس كف عرقبتو وقال: سمعت يا كركدن 
اياس :😏وبعدين استاذ محمد مالقيت غير هالمتل 
محمد :هادي يلي طلع معي 
شوكت :ههههه لا لا بالعكس كتير ظابط عليك 😂😂
منار :  مظبوط ظابط عليك .. ولا تستبق الاحداث يمكن مانعمل شي .. يعني (واشر على محمد ليكمل عنو👈
محمد :لاتقول فول ليصير بالمكيول 
اياس رما الورقة والقلم من ايدو وقال :قايم اعمل نفس اركيلة احسن الشي 
طنطن تلفون منار بمسج  اخدو وشاف رقم : باعتلو :مسالخير 
برم شفتو بتعجب وقال :اهلا مسالنور .. مين معي 
_وحدة مستعدة تصير عبدة عند رجليك 
منار :مين معي
سمرا : وحدة 
منار :وشو كمان 
سمرا :مجنونة فيك 
منار :شو بدك 
سمرا  :بدي اياك 
منار : شوبدك فيني 
سمرا :**************(جملة مشفرة😅)
منار صفن بشاشة التلفون شوي ورجع بعت :مييين انتي 
سمرا :اذا بدك تعرف مين انا  .. بقلك مين انا بس بشرط بجي بقلك مين انا عندك بالبيت او عندي 
منار :وكيف بدك تعرفيني ع حالك 
سمرا :بغرفة النوم 😉
منار :  عدي لل ٣ 
سمرا :ليش 
منار :عدي وماعليكي 
سمرا : ١ 
بعد التلاتة كان عاملا بلوك 
________________
عند سمرا 
كتبت :وبعديين؟؟
ما وصلتو واختفت الصورة يلي كان حاططتها والحالة والظهور 
سمرا بقلبا :الكلبب .. بسيطة 
_________________
عند منار 
اجا اياس من المطبخ والاركيلة بايدو .. حطها وقعد 
منار : شباب شوفولي هالرقم موجود عنكن 
كلن فتحو ع لوحة الارقام 
منار : ٠٩٨٨٨٨٨٧٧
اياس :ماعندي 
محمد :ولا عندي 
شوكت صافن بالرقم 
منار :شو شوكت 
شوكت :ليش عم تسأل ع الرقم 
منار :عندك ؟؟
شوكت : عم اسألك شوبدك بالرقم 
منار :عم يبعتلي 
شوكت :قوم نحكي برا 
قام شوكت ولحقو منار 
محمد :ههههه شوفي 
اياس :مابعرف علمي علمك 
...............
شوكت : شو باعتلك هاد الرقم 
منار :خود شوف 
اخد شوكت وقرأ المحادثة وضحك ضحكة جانبية 
منار :مين هي 
شوكت :صاحبتي  يلي كنت عندا مبارح 
منار :ومين بتكون 
شوكت :ليش مابتعرفا 
منار :بصراحة لا .. كذبت عليك 
شوكت : اممم 
منار :مين هية 
شوكت :خلص مزال حظرتا 
منار : بدي اعرفا 
شوكت :اسما سمر وبيندهولا سمرا بتصير مرتو لابو بشار 
منار :مين ابو بشار 
شوكت :هاد يلي عندو كميون 
منار :العمااا .. وشو هالوساخة هي 
شوكت :هه 
منار :وكيف جابت رقمي 
شوكت : مابعرف 
منار :لسه عم تحكي معا 
شوكت :من مبارح لليوم ماحكينا 
منار :وليش ما حظرتا 
شوكت :بحظرا .. بحظرا 
تركو ودخل لجوا 
منار لحقو بسرعة وكمشو من دراعو 
منار :لاتخبص 
شوكت :والله مارح خبص .. بس مارح احظرا حاليا 
منار :ماشي 
وصلتو رسالة نصية لمنار منها ( صح عملت حظر بس بوعدك تشيلو متل الشاطر .. باي بيبي 😘)
دخل ع الإعدادات وكان بدو يحظرا من الموبايل نهائيا .. بس تراجع اخر لحظة وقال بقلبو :لشوف شوبدو يطلع معك 
_____________________
تاني يوم 
فاقت المى على صوت تلفونها .. تجلست وخدت الموبايل ولما شافت مين متصل ابتسمت وردت بحماس 
المى :لك يسعدلي صباحك 
_ كيفا اميرتنا الحلوة 
المى :مشتاقتلكن كتييير .. كيفك خالو وكيفا تيتا ومرت خالي والولاد وكلن كلن 
_نحنا كتير مناح ومشتاقيلك كوميات..  انتي كيفك ولو خال 
المى :الحمد لله بخير 
_الحمد لله .. لكي خالو التيتا بدا تحكي معك 
المى :يلا هاتها 
_الو .. مرحبا يا ستي .. كيفك يا قلبي 
المى :الحمد لله كيفك انتي يا ستي .. انا كتير مشتاقتلكن 
_والله مو قدنا يا ستي .. اي حبيبتي قوليلي مانك ناوي تجي تقضي عنا هي الصيفية 
المى :والله بتمنى .. بس مابعرف شو بقول البابا 
_وينو ابوكي عطيني احكي معو 
المى :والله البابا مسافر .. بس اليوم بيرجع باذن الله 
_يوصل بخير وسلامة 
المى: الله يسلمك يارب .. 
_احكي معو انا ولا انتي 
المى :خلص تيتا انا بحكي  معو وبرد عليكي خبر المسا 
_  ماشي ياعمري .. وهلا انتبهي عحالك 
المى :ماشي 
_ناطرة منك خبر المسا 
المى :ان شاء الله 
_______________________
بالمعمل 
دخل منار ومعو  معلمين بناء تنين ... واول ما دخل صار ينده على اياس 
منار :ايااس .. ايااس 
اجا محمد وقال : اياس مانو هون 
منار :وينو ؟
سحبو محمد ع جنب وقال : جاي وفد من وجهاء الضيع يلي حدنا وبدن يعملو صلحة بينا وبين ضيعة الشقرا 
منار : اها .. وايمت هالحكي 
محمد :صرلن شي ساعة عند المختار 
منار :واياس شو دخلو 
محمد  :مابعرف ابوه اتصل فيه 
منار :وشوكت وينو 
محمد :هلا جاب اخر نقلة حليب نزلها ودخل يلبس تياب الشغل 
منار :اممم ..  طيب انا رايح مع المعلمين هدول وفرجيهن وين بدنا نعمل الوسعة وانت جبلي اياس من تحت الارض 
محمد :رح اتصل فيه 
منار :واذا مارد روح دور عليه وجيبو 
محمد :تمام .. يلا 
مشي منار مع العمال  ومحمد طلع تلفونو من جيبة مريولو وصار يتصل ع اياس 
_______________________
بضيعة الشقرا 
ع جنب حيط مدرسة .. واقفين ٣ شباب .. تين واقفين  وساندين رجليهن ع الحيط وواحد قاعد قادمن على صخرة ومعو عصا صغيرة رفيعة عم يكسر فيها 
ماجد : وشو بدنا نعم هلأ 
ناصر: معد نقدر نعمل شي .. خلص عم يعملو صلحة  وفضة عرب 
نوار يلي قاعد ع الصخرة قال : تضربو انتو وهيك خطة 
ناصر :هاد يلي طلع معنا .. انت كان بدك الضيعتين يعلقو وعلقناهن 
ماجد :مظبوط .. بس مابعرف كيف تصاوبت البنت 
نوار :المهم بدي خطة جديدة ..  لانو سمعت انو منار جايب اليوم عمال مشان يكبر المعمل 
ناصر :عنجد 
نوار :والله 
ماجد : انو لحد هلق مافهمت انو لسه لاحقينن وبدنا ندمرن .. وهنن كل مالن عم يكبرو .. خلونا نلتفت ع شغلنا 
نوار : رح نلتفت وبنفس الوقت بدي دمرن  لهدول الكلاب .. لاتنسو بسببن تسكر معملنا 
ماجد :بس هنن يلي فتحو  قبل 
نوار :مظبوط .. بس هنن لما شافونا فتحنا صارو يضاربو علينا  لحتى خسر شغلنا ..  وبعدين انا معد يهمني لا معمل ولاغيرو.. بس حطيتن براسي ومارح هنيهن .. 
ناصر :انت المشاكل ماشية بدمك 
نوار :وانت قلتا .. ومابقدر اقعد بدون ماكون عم ائذي .. المهم انتو معي 
ماجد :معك بشرط انو نشتغل 
ناصر :وانا من رأي  ماجد 
نوار :هههه .. اطمنو .. انا استاجرت ورشة مكنيك ع الطريق العام ورح نبلش شغل من بكرا .. 
ناصر :ياعيني عليك .. هي شغلة بنفهم فيها 
نوار :ايه .. 
________________________
طلع محمد من المعمل  وركب متورو وراح ع بيت اياس .. نزل ودق الباب وفتحت مريم 
اول ما اجت عينو بعينا حس حالو تلبك 
مريم :اهلين تفضل 
محمد :هون اياس 
مريم :لا ليش مانو بالمعمل 
محمد :لا 
مريم :اي مابعرف 
محمد :طيب وابوكي وينو 
مريم :عند المختار 
محمد :اي ماشي .. شكرا 
مريم :اهلا 
راح ركب ع متورو وهو عم يتطلع عليها ويبتسم وهية عم تتطلع عليه مستغربة  وعلى وجها ابتسامة استفهام... دخلت وسكرت الباب 
_____________________
عند المى 
اندق الباب 
نطت المى وقالت :اكيد بابا انا بفتح 
سمرا معها صحنين جايبتن ع السفرة وعم تلوي بتمها بغل .. 
فتحت المى الباب وكان ابوها .. رمت حالا بحضنو وهو ضمها بقوة وقال :كيفك يا حبيبة بابا 
سمرا كملت ع المطبخ وقالت : بدن ساعة مابخلصو دراما 😏
دخلو لجوا وسمرا رجعت من المطبخ ومعها صحون اكل عم تجهز الغدا .. حطتن ع السفرة وقربت من جوزا .. باستو على خدودو وقالت :الحمد لله عسلامتك حبيبي 
عمار :الله يسلمك ياسمرا .. كيفك وكيفن الولاد 
سمرا :الحمد لله بخير .. وهلا عشوفتك صرت احسن .. ليش قعدتو هون قومو ع السفرة 
عمار :وشو عاملتيلنا اليوم 
سمرا :هههه اكلة كتير بتحبها 
عمار :وينن الولاد 
سمرا :عم يلعبوا برا هلق بنده عليهن من شباك المطبخ 
المى :بابا قوم غسل وتعا ناكل 
عمار :يلا .. 
____________________
بالمعمل 
دخل اياس ومحمد .. ع غرفة المكتب كان هنيك منار 
اياس :شوفي ليش مستعجل علي 
منار :اتاخرت قلت برأي بتلحق المعمرجية .. وبتتفق انت واياهن ع الحساب 
اياس :راحو 
منار :اي من شوي .. يلا بكرا بيرجعو .. محمد خبر العمال خليهن يعبولي البراد اطلع وزع 
محمد :يلا (وطلع )
منار :شوصار عند المختار 
اياس :فضة عرب .. اتدخلت وجهاء الضيع يلي حدنا .. وكبارية ضيعتنا وضيعة الشقرا  قامو وبوسو شوارب بعض .. والمختار صار يلقي خطاب انو نحنا اهل ومن هالحكي 
منار :امممم .. مع انو ماكنت ناوي تنحل بهالسهولة .. كنت بدي الحق المشكلة لمصدرها وبينلن انو هنن يلي على غلط 
اياس : لك شيلنا من المشاكل انحلت ومشي الحال 
منار (هز راسو بتهديد)وقال: اييه .. هينة 
______________________
عند معاذ 
الدنيا قطعت الضهر وهو مرتو بعدن نايمين .. الباب صار يندق بقوة 
تجلسو برعب وشهد قالت :شوفي ..مين هاد 
معاذ رفع الغطا وقام لعند الباب فتح وكانت امو 
امو :صرت جاي لعنكن ٣ مرااات.. لهلأ نووم 
معاذ نفخ وقال :شوفي ماما 
امو :سلامتك والله .. شو لايمت ناوي تضل عريس 
معاذ :مانا  لسه اول مبارح تزوجت
امو :مابفهم انا بهالشي من بكرا بتنزل ع الشغل ومرتك بتنزرع عندي من طلوع الضو 
معاذ :طيب ماشي .. تفضلي فوتي 
امو :لا مابدي فوت عبيت مخمخم
معاذ :بيتي مخمخم؟؟
امو :اذا صحابو مخمخمين كيف بدو يكون هون 😏😏
لفت ضهرا ومشت 
معاذ :اصبحنا واصبح الملك لله 
دخل وطبش الباب 
وكمل ع غرفة النوم 
شهد :مين حبيبي 
رفع الغطا ونزل تحتو وقال: مافي شي رجعي نامي 
______________________
المى قاعدة هية عيلتها وعم يشربو شاي بعد الغدا 
المى :بابا 
عمار :عيونو 
المى :مابدك تخليني هي السنة روح قضي الصيفية عن بيت جدي 
سمرا لما سمعت هيك ابتسمت واتجلست وعطت اهتمامها للحديث 
عمار :لأ 
المى :ليش طيب .. هديك السنة ما خليتني وهي السنة كمان 😥
عمار : بابا شو مفكرة حالك لساتك صغيرة .. خلص انتي كبرتي 
الكى :واذا كبرت ؟؟
عمار :ولاد خالك بضلو عن ستك وكمان هنن صارو شباب .. ماظابطة قعدتك معن 
المى :والله ولاد خالي متل اخواتي 
عمار :بعرف .. بس مانها ظابطة 
المى : حكت معي ستي اليوم 
عمار :انا بحكيها وبفهما الوضع 
المى : بس مابقدر ما روح لعندن 
عمار :باخدك تزوري عندن شي يومين غير هيك لأ 
المى :طيب بكرا تاخدني 
عمار بنفذ صبر :هيك بدك 
المى :اي بترجاك 
عمار :جهزي حالك الصبح بكير .. لانو عندي شغل بالمدينة بدي انزل بكير 
المى :شقد بكير 
عمار :ع الخمسة 
المى :طيب ماشي متل مابدك 
عمار :انا فايت نام شوي 
سمرا :ماشي حبيبي 
قام ودخل ع غرفة النوم .. وسمرا قامت وقعدت جنب المى 
سمرا :خلص حبيبتي لاتزعلي 
المى :طيب ليش هيك بفكر البابا 
سمرا :انتي كتير حابة تضلي عند بيت جدك 
المى :اي والله .. بعدين ولاد خالي فؤاد ماعطول عند ستي .. وعند ستي مافي غير هية وخالي ادهم وبتعرفي خالي عذابي 
سمرا :طيب ليش بتحبي تضلي عندا مزال مافي غير هية وخالك .. انو مابتضوجي 
المى :لا ابدا بالعكس .
سمرا :طيب انا ببقا بحكي مع ابوكي 
المى :عنجد خالتي
سمرا : اي عنجد .. تركيها علي 
حضنتها وقالت :الله يخليلي اياكي يا احلا خالة بالدني 
______________________
المسا 
مريم لابسة وطالعة 
مريم :ماما بدك شي 
امها :لا بس لاتطولي 
مريم :ماشي مارح طول 
عم تفتح الباب بيطلع بوجها اياس .. بشوفها لابسة وطالعة 
اياس :شو ع وين 
مريم :رايحين نسهر انا والصبايا عند المى ومنو بنفتحلا الموضوع. وغمزتو 😉
سحبها لبرا وسكر الباب وقال :طيب دوبك رايحة شو رايك تفتحي موضوعين ما بس موضوع واحد 
شهقت وحطت ايدا عتما وقالت :انت كمان بدك المى 
اياس :العما شو جدبة .. طبعا لأ .. قصدي ع ديمة 
هزت براسا وقالت :اممممممممم 
اياس :شوووو 
مريم :شو شو .. انت وابن خالتك عم تخلوني اعمل شغلات ضدد مبادئي 
اياس :حطيلي مبادئك عجنب  وقوليلي شو رح تقوليلا 
مريم :وشو بدي قلا بلله 
اياس :متل منار بدي احكي معا .. واذا صار اتفاق رح ابعت اهلي يخطبوها 
مريم :والله لو مابحبكن وبعرفكن وبعرف اخلاقكن مابساعدكن بهيك شي 
اياس : لك يسلملي المتفهم 
مريم :اي بعد بعد هلق بتأخر 
اياس :ناطرك ع نار 
مريم :😒😒😒
تركتو ومشت 
طبعا البيوت قريبة من بعضا .. والعالم بالضيعة جاي ورايحة وفي اضوية ع طول الطرقات يعني كان امان والبنات بيطلعو وبفوتو ومابنخاف عليهن 
__________________
بالبيت عند المى 
نازلة من على درج السطح ودخلت ع البيت 
عمار :بابا ناقصك شي 
المى :لا بابا كلو جاهزة وظبطت كلشي ع السطح بس ناطرة الصبايا 
عمار :طيب نحنا رايحيين نسهر عند بيت عمك مشان تاخدو راحتكن 
المى :ماشي 
بشار :بابا خدونا معكن 
سمرا :لا خليكن هون تفرجو ع التلفزيون 
براء :الله يخليكن 
عمار :خلينا ناخدن بيلعبو مع ولاد اخي 
سمرا :طيب متل مابدك  مشو يا ولاد 
فتحو الباب وبيطلع بوجهن البنات  واصلين 
عمار :اهلين عمو تفضلو فوتو 
سمرا :اهلا بالصبايا الحلوين تفضلو 
سلمو الصبايا عليهن ودخلو .. 
المى :تعو ع السطح 
طلعو وقعدو ع السطح 
وكان في طاولة كبيرة عليها متة وبرز وبطاطا شبيس وفواكه وظروفة نسكافية .. يعني عدو السهرة كاملة 
___________________
عند معاذ عم يلبس وطالع 
شهد :ع وين 
معاذ :اسهر مع الشباب 
شهد :وانا 
معاذ :تعي وصلك لعند اهلي 
شهد: بلله شوو .. مالاحظت امك مابطيقني 
معاذ :لاتبلشي تعمليلي قصة الحماية والكنة 
شهد: والله 
سكتها وقال :لا تحلفي .. بدك تروحي لوصلك ولا خليكي  هون 
شهد :لا وصلني 😏
معاذ :لبسي بسرعة 
_____________________
وصلت شهد عبيت عمها ودخلت لقتن عم يفرطو بزاليا
حماتها :جيتي بوقتك تعي ساعدينا بسرعة 
شهد : وليش كل هاي البزاليا 
ام معاذ :نفرزها 
شهد :مزال صار كلشي متوفر بالسوق 
ام معاذ :اي تعي وبلا فزلكة .. بدا تعلمني شو اعمل .. حبيبتي اذا امك قليلة مروة نحنا ما متلها 
شهد :مرت عمو ليش عم تحكي ع ماما 
ام معاذ :شو امك نبي مابينحكي عليها 
شهد: مو نبي بس ليش هيك عم تجيبي سيرتها بالعاطل 
ام معاذ :نعم .. نعم .. نعم .. بالله شو حبيبتي ..مين حكي ع امك بالعاطل 
شهد :ماما بحياتا ما جابت سيرتك 
ام معاذ :وليش لتجيب سيرتي .. يطلعلا تكون متلي 
شهد : مارح ناقشك لانك اكبر مني .. بالاذن 
ام معاذ :ع وين 
شهد :ع بيتي 
ام معاذ : ولحالك ؟؟
شهد :اي محدا رح ياكلني 
ام معاذ :اي فوتي فوتي معاذ ما بينهان عليه تطلعي لحالك 
شهد : ينهان ولا لأ مابدي ضل هون .. 
ام معاذ :ايه بسيطة انا بفرجيكي 
شهد :عملي يلي بدك اياه  
طلعت وطبشت الباب 
ام معاذ :ليك الكلبة بنت الكلبة 
الاء : العما شو جقرة .. لاتسكتيلا وخبري معاذ عن كلشي 
ام معاذ :بسيطة انا بفرجيها .. قومي جيبلي تلفونك 
_________________
عند منار 
الشباب كلن متجمعين 
اندق الباب 
صارو يتطلعو ببعض 
منار : مين ؟
اياس :مابعرف قايم شوف
قام اياس وفتح وقال :اهلين بالعريس 
معاذ :لك كيفك 
دخل والكل وقفلو وصارو يسلمو عليه 
منار : وين مقبور جاي وانت لساك عريس 
معاذ :هههه مليت 
منار :العما كنو هالحكي صحيح
معاذ :طبعا ما مليت من الجازة بس مليت بدونكن 
محمد :😂😂😂 كذاب  بكون طلعلو قرون 
معاذ :اي خراس انت ولاتتمسخر 
قعدو  ومعاذ سحب نبريج الاركيلة من ايد شوكت 
شوكت :قوم انقبر عميل لحالك اركيلة 
معاذ :ههههه بدي اياها من ايدك اطيب
شوكت :ياربي ع الغلاظة 
رن تلفون معاذ  :الو ... اي ماما ..  شو شو .. طيب طولي بالك .. وينا هية هلأ ..  شووو راحت ع البيت لحالا .. وليش لتخليها .... يلا انا بتصرف 
سكر ومبين مزعوج 
منار :شوفي 
معاذ :وصلت مرتي لعند اهلي .. تناقرت هية وامي وطلعت وراحت ع البيت لحالا 
منار :هههههه اي القا اذا بتقلى.. والله لسه ماشفت شي 
معاذ :لك سكوت  ماني ناقصك 
اياس :بدك تروح 
معاذ : لأ .. 
طلب رقم مرتو وحكي : الو وينك... صرتي بالبيت اي منيح.... باي 
حط الموبايل بجيبتو ووقف 
محمد :ع وين 
معاذ : اركيلتي جوا ماهيك 
منار :اي 
معاذ :منيح 
فات عالمطبخ 
محمد :والله فكرتو قايم يروح ع بيتو 😂😂😂
منار :  مابيعملا ابن حلال
______________________
عند البنات قاعدين وعم يسولفو ويحكو 
مريم : والله ابوكي معو حق تضربي كل صيفية بتروحي عبيت جدك .. خليكي معنا 
المى :رح ضل .. بس رايحة زيارة شي يومين 
ديمة :ليش بتحبي تضلي عند بيت جدك 
المى :عندكن للسر مطرح 
غزل :طبعا احكي 
المى :انا خالتي سمرا مابحبا .. صح هية منيحة معي وكتير .. بس مابحبا ولا بحسها قريبة مني .. انو بحسها ضيفة 
ديمة :المى احكي لاتخافي .. في كتير بنات بعانو من مرت الاب .. مرت ابوكي بتعملك شي 
المى :لا والله .. عم قلكن منيحة .. بس ما بحبها .. ما باخد راحتي معها ..ولا مرة حسيتا قريبة كمان هية بحسها بتجاملني مجاملة .. اما ستي فيها ريحة امي الله يرحمها 
الكل :الله يرحمها 
المى :تعيشو ..  المهم غيرو السيري شوفي مافي 
مريم :بدنا نسال غزل شوفي 
غزل :اناا؟؟
مريم :اي انتي .. شو اخبارك انتي وشوكت 
غزل :مافي شي 
مريم :ما حكاكي بعد الحادثة 
غزل :لا اصلا انا حاظرتو من زمان 
ديمة :تضربي .. فكي الحظر 
غزل :لا لا مابدي .. ما ضروري اذا خاف علي نرجع لبعض 
مريم :طيب مابدك تتشكريه 
ديمة  :اي والله لازم 
غزل سكتت شوي بعدين حكت : هيك رأيك 
مريم :اي مافيها شي .. وبركي من بعدا بتفتحو صفحة جديدة 
غزل : وانتي ديمة 
ديمة :رأيي من رأي مريم 
غزل :وانتي المى
المى :انا مادخلني ومابعرف بهيك شي 
ديمة :ههههه احسن الشي 
مريم : انا برأيي ترفعي الحظر وتتشكريه .. واذا لقيتيه تغير كملي معو .. واذا لأ كل واحد من طريق 
غزل :رح اتشكرو بس 
ديمة :مو غلط .. وخليه هو يبادر 
غزل :خلص رح اسمع منكن 🙂🙂
مريم :بنجي عليكن انتو التنتين 
المى وديمة :نحنا ؟؟
مريم :اي انتو .. مانكن حاسين انو في حدا معجب فيكن بالضيعة 
المى :قصدك فيني وبديمة 
مريم :اي اي ..  فيكي وبديمة .. احلا شبين بالضيعة .. واحد طابس فيكي والتاني بديمة 
ديمة :عنجد عم تحكي مينن 
مريم :  وصوني اعطيكن ارقامن لتحكو معن 
المى :بالنسبة الي بعتذر 
مريم :ما لتعرفي مين هو 
المى :مين ما كان .. مابدي .. 
ديمة :انا بدي قوليلي مين 
مريم :اخي اياس 
ديمة لمعو عيونا وقالت :اخوكي اياس معجب فيني انا 😍😍
مريم : اي معجب فيكي انتي ..  طلب مني خبرك انو يحكي معك .. طبعا بالاول كأصدقاء وتتعرفو عبعض .. واذا عجبتو بعض رح يبعت اهلي يجو يخطبوكي .. مو لانو اياس اخي .. بس والله اخلاقو عالية ومافي منو .. يعني لولا هيك والله مابخليه يقرب منك .. لانو انتي كمان غالية علي وبتستاهلي واحد متل اياس ... وهو بيستاهل وحدة متلك 
ديمة بخجل :والله مابعرف صدمتيني .. صح اياس من الشباب الحلوة يلي بالضيعة وكل البنات بتتمنى منو نظرة وانا طبعا من معجباتو بس ماتخيلت يكون حاطط عينو علي 
مريم :ليش من شو بتشكي انتي .. يصحلو وحدة متلك 
غزل :حكي مريم صح .. وبعدين عنجد اياس مافي منو .. برأيي لا تترددي  .. وبعدين هلأ مجرد تعارف 
ديمة :طيب عطيه رقمي خليه يحكي معي 😅😅 لانو انا بخجل حكيه 🙊🙊
مريم :هههه من عيوني .. 
غزل :اي ومين يلي معجب بالمى 
المى :لا تحكي مابدي اعرف 
ديمة :شوبدك فيها .. احكي .. وخصوصا اذا كان متل اخوكي اياس 
مريم :حتى احسن واحلا من اياس 
غزل :صار عندي فضول احكي يلا 
اتطلعت ب المى  وقالت :شو 
المى :طيب قولي لنشوف مين هو عريس هالغفلة 
مريم :هووو ... بكووون .. 
ديمة :ولعيةةة.. خلصينا 
مريم :حزرو 🙂🤣
غزل :لك تضربي .. معد بدنا نعرف 
مريم :ههه لا لا رح قول .. هو بكون منار ابن خالتي 
الكل : شووووو 
المى اول ماسمعت اسمو حست قلبا نقز وصار يدق بسرعة ..  وتذكرت لما غمزها بالعرس .. ولما وصلا من المشفى للبيت .. سكتت وماعلقت 

يتبع الفصل الرابع اضغط هنا
  • الفهرس يحتوي على جميع فصول الرواية كاملة :"رواية السمرة" اضغط على اسم الرواية 
رواية السمرة الفصل الثالث 3 بقلم مريم اليوسف
ranosha

تعليقات

ليست هناك تعليقات
إرسال تعليق
    google-playkhamsatmostaqltradent