رواية فجر جديد الفصل العاشر 10 - بقلم إيمــــان

الصفحة الرئيسية

    رواية فجر جديد الفصل العاشر 10 - بقلم إيمــــان

رواية فجر جديد  - بقلم إيمــــان

*    رواية فجر جديد الفصل العاشر 


بمجرد دخوله المكتب وجدها امامه بفنجان القهوة ويبدو على وجهها الارهاق الشديد فشعر بوخذة فى صدرة لا يدرى لماذا واحب ان يخرجها مما هى فيه فقال على الفور

ايه ده فنجان واحد

فنظرت له دون ان تفهم ما يقصد وقالت : هه

بقولك فنجان قهوة واحد انا اصلا ليا عندك واحد من امبارح

فابتسمت بصعوبة ثم قالت : اه صحيح عند حضرتك حق

لم يدرى بنفسه وهويسألها ندى انا عاوز اعرف انتى ازاى اتجوزتى الحيوان ده

فنظرت له وهى لا تدرى كيف ترد ،فنزعج هو وقال

انا اسف ان كنت بتكلم فى موضوع شخصى

تنهدت تنهيدة وكأنها بركان وجلست امامه وهى تقول

لو حضرتك شوفته واتعملت معاه حتقول عليه راجل من طراز خاص راجل بمعنى الكلمة دا حتى ابيه شوقى نفسه بكل خبرته وحكمته دى فى الحياة اتخدع فيه

ممكن اعرف عرفتيه ازاى؟؟؟؟

كان قريب لواحد صاحب ابيه شوقى وكان يعرفه من فترة بسيطة ولكنه كان بيقول عنه راجل محترم جدا ومرة شافنى مع ابيه شوقى بالصدفة ومن ساعتها وبقه زى اللى شاف لعبة وشبط فيها ومعرفش ازاى كل حاجة تمت بمنتهى السرعة حتى تعلقى الشديد بيه معرفش حصل امتى وازاى بس وتمت الجوازة عشان يبدء الفصل التانى من القصة واتفاجأ بالوش التانى راجل مش راجل ما يقدرش يعمل حاجة فى حياته بدون مشوره اهله المصروف زى ما يقولوا الخروج زى ما يقرروا الخروج الدخول حتى لبسى المصيبة بقه انى كنت كل لما احكى لابيه شوقى ماكنش يصدق وهو نفسه كان يأكدله ويفهمه انى بكبر المواضيع وبيتهيألى حاجات لحد لما فى يوم حضر وبالصدفة موقف وشافة على حققته ومن يومها وهو وقف فى صفى وبعدها صممت على الطلاق والحمد لله خلصت منه بس بعد ما كان دمر نفسيتى والحمد لله ان ماكنش فى اطفال ربنا عالم بحالى 

الحمد لله خلاص بقه ننسى اللى فات ونرميه ورى ضهرنا ، ثم انتى قاعدة ترغى كده ومعطلانى عن شغلى واكيد مفيش غدا انهاردة كمان وحتجوعينى زى امبارح

لاابدا ان شاء الله الغدا حيكون جاهز فى معاده وحعوضك عن امبارح كمان

طب لما اشوف

طب بعد اذنك

وانصرفت لتقوم باعداد الغداء وتركته لعمله ولكنه لم يستطع منع نفسه من التفكير فى حالها وهم برفع فنجان القهوة ليشربه فوجده فارغا مع انه لم يتذكر انه شربه فقال فى نفسه

اكيد شربته وانا بسمع حكايتها من غير ما احس

فضغط على الجرس بجانبه فجائته على الفور وفى يدها فوطة المطبخ تمسح بها يدها ومرتدية مريلة المطبخ فنظر لها على هذة الهيئة وانفجر فى الضحك

ايه اللى انتى عملاه فى نفسك ده

ما انا كنت بطبخ وحضرتك رنيت الجرس يلا بسرعة قول عاوز ايه الاكل على النار

فنظر الى فنجان القهوة الذى امامه وقال : كده كده تجيب لى فنجان قهوة فاضى

نعم ازاى يعنى ولما هو فاضى امال البن اللى فى قعر الفنجان ده منين

وانا اش عرفنى

اه يعنى حضرتك تقصد انك عاوز فنجان قهوة تانى

بتعجبينى لما بتفهميها وهى طيرة

شكرا وحاضر حالا بس الاكل على النار الاكل 

وجرت على المطبخ لتجد انها وصلت فى الوقت المناسب

وضعت على احد عيون البوتاجاز كنكة القهوة وحضرتها سريعا حتى تواصل اعداد الغداء لتفاجأ بصوته خلفها يقول

انا جيت اخد القهوة بنفسى بدل ما تعمليها حجة وتحرقى الاكل ويروح عليا الغدا انهارده

طب كويس والقهوة كمان جهزت اهى اتفضل عشان معطلكش

ايه ده انتى بتطردينى من مطبخك

انا هو انا اقدر برضو

ايه الروايح الحلوة دى انا ريقى جرى حرام عليكى

عمله لحضرتك محشى مشكل

ايه ينهار ابيض انتى بتقولى ايه

ايه فى ايه . ايه اللى قولته غلط

انتى كل اللى قولتيه غلط يابنتى

هو انا شوية ستك وشوية مامتك وشوية بنتك ما ترسى على بر

مش موضوعنا ده دلوقت انتى قولتى حتغدينى ايه ؟؟؟؟

محشى مشكل

وبتعديها تانى كده ببساطة

هو فى ايه انا مش فهمه حاجة

يا هانم المحشى بجميع اصنافه عشقى الكبير

يادى النيلة قاصد تخضنى برضو

بصراحة اه . المهم المحشى خلص ولا لسه 

اهو على النار

طيب بسرعة بقه عشان مفيش وقت

مفيش وقت على ايه

اصلى ابتديت اجوع من دلوقت

هو انت اشتغلت انهاردة

لا ليه

فضحكت على البساطة اللى رد بها عليها وقالت : طبعا ماهو لو حضرتك لك مدير يخصم منك مكنتش تقضى اليوم فى اللعب كده

على فكرة انا عندى شغل مهم جدا انهاردة المفروض اخلصه بس مش عارف ليه معنديش رغبة اشتغل انهاردة

لكن عندك رغبة تعطلنى

تقريبا انا جيت انهاردة من بيتنا عشان كده

فلم تدرى بنفسها وهى تنفجر ضاحكة ، ولم يدرى هو الاخر بنفسه وهو يتابع ضحكتها وقلبه يرفرف من الفرح لانها اخيرا ضحكت من قلبها وهو السبب فى ذلك

يلا يلا يا هانم هاتى المحشى بقه انا مش قادر خلينى اتغدى واروح انا تعبت اوى انهارده

فعلا تعبت جدا الله يكون فى عونك

فذهب هو الى مكتبه وتركها وهى تخرج سرفيز لترص به المحشى واخر لتضع به الفرخة المحمرة وسلطانيه من شوربة لسان العصفور واتجهت الى مكتبه وقامت بوضع الصينية على السفرةوفى هذة الاثناء كان رفعت يتحدث فى الموبايل مع شخص ما فوضع يده على السماعة ونده عليها قبل ان تغادر مدام ندى مدام ندى

فعادت على الفور

ايوة يارفعت بيه

انتى بتعرفى تعملى فشه وكرشه وممبار والحاجات دى

ايوة

فرفع يده من على السماعة وقال للمتحدث معه : خلاص تمام كله حيكون جاهز بعد بكره على ما تكون رجعت من السخنه سلام

كل هذا وندى تقف لا تدرى شئ ثم قالت : هو فيه ايه

ابدا انا يدوب دخلت المكتب لاقيت الموبايل بيرن وكان اللى بيتصل ادهم جوز اختى وعوزنى فى شغل كده ثم سكت.

اه طب وانا دخلى ايه ودخل الفشه والكرشه ايه برضو

لا ابدا اصل وانا بكلمه بقوله حماتك كانت بتحبك لانى حتغدى 

فسألنى حتغدا ايه ولما قولتله محشى مصدقش فانا قولتله انى عرفت مطعم جديد بيعمل اكل بيتى فعشان يعجزنى قال انه حيجى نخلص الشغل هنا وانه عاوز يتغدى بقه فشه وكرشه والحاجات دى وعشان كده سالتك بتعرفى تعملى الحاجات دى

اه يعنى تقصد حضرتك انى اغدى الاستاذ ادهم الاصناف دى 

بالظبط ايه ورطتك ولا ايه. اتصل بيه والغى الموضوع

لالا ابدا كله سهل بس المشكلة ان الحاجات دى لازم تيجى طازة ومش بتبقه موجودة غير الصبح بدرى فى السوق

يعنى ايه

يعنى محتاجه نص يوم بكرة عشان اجيب كل شىء بنفسى

نعم ياختى طب ابعت اى حد يشتريلك اللى انتى عوزاه وانتى تطبخى وبس

لالا مش حينفع انا بحب اشترى الحاجات دى بنفسى

وانا مقدرش انحرم بكرة كمان من القهوة  ومن الغدا  لالا انا الغى مقابلة ادهم من اصله احسن

طب خلاص اجى الشغل واحضر لحضرتك القهوة وبعدين اروح السوق اشترى الحاجة وارجع على هنا تانى اعملك الغدا ايه رايك

لالا كده حيبقه تعب ليكى ولا اقولك انتى تيجى وبعدين تروحى السوق وترجعى مع عم محمدعشان ما تتعبيش فكرة حلوة صح

ايوة كده حتوفر عليا وقت وتعب كبير جدا

معلش تعبك معايا يا مدام ندى

لا ولا يهمك امشى بقه

مش لما تعرفى نتيجة المحشى الاول

لالا حتخضنى زى كل مرة

لالا حقول راى وبمنتهى الصراحة

وقام على الفور واتجه الى تربيزة  الاجتماعات ونظر فى ذهول عندما راى سرفيز المحشى وقال : لالا انتى بتشتغلينى انا اصلا انهارده كنت برغى معاكى طول الوقت ازاى بقه لحقتى تجهزى لى كل اصناف المحشى دى  

فى الحقيقة لما ابيه شوقى قال ان حضرتك رفضت الاجازة وانى لازم اجى انهاردة مكنتش عارفه اعمل لحضرتك غدا ايه وكنت حاسه ان دماغى وقفت فسألت اختى نبيلة يمكن تقولى اعمل ايه فقالتلى بكل براءة انتى طبختى لرفعت بيه محشى لانه كان الغدا اللى اتغدناه سوا فضحكت وقولتلها لاطبعا محشى فى الشركة قالتلى ومالوا هو مش رفعت بيه اصلا جابك عشان ياكل اكل بيتى يبقه مفيش مانع تعملى محشى

وبعد شوية لاقتها فكرة مش بطالة وفعلا هى كان عندها باقى الخضار اللى كنا عملينه سوا فقومت عملت الخلطة وشلتها فى التلاجة وقورت الخضار وجهزت كل شىء على انى اول لما اجى احشى وبس

دا انا عاوز ابوس ام ياسر 

فقالت بفزع : ايه طب وابيه شوقى

لا ماتفهمنيش غلط من دماغها طبعا

فضحكت ندى عن اخرها وهو ينظر لها باعجاب شديد 

بسم الله لما نشوف بقه الموضوع ده واخذ قطعة من الباذنجان وتناولها ليشعر انه فى عالم اخر فقد عاد به الزمان للسيدة سميرة والدته وهى تسكب امامه هو واخوته حلة المحشى وتقول لهم

براحة يا عيال المحشى لسه سخن 

وهم لا يهتموا ولا يسمعوا اساسا صوتها كل همهم اللحاق بأكبر كم من المحشى قبل ان ينفد

وفاجأة وجدته يضحك وقهقه وهى تنظر له فى ذهول

خير فى ايه ؟؟؟؟

اصلى افتكرت الست سميرة وهى بتحط لنا المحشى انا واخواتى والحرب اللى كنا بنقوم بيها عشان كل واحد فينا ياخد كمية اكبر من التانى قبل ما المحشى يخلص

فضحكت هى بدورها ثم قالت : الست سميرة دى والدتك الله يرحمها 

ايوة المحشى بتاعك فكرنى بيها على فكرة طعم اكلك قريب جدا من طعم اكلها

بجد دى حاجة تسعدنى اوى

امال انا وفقت على شغلك ليه مع انى ضد الكوسة والوسطة 

عارفه ابيه شوقى قالى وهو فعلا كان محرج اوى انه يفاتح حضرتك فى الموضوع ده لولا الحاح نبيلة واللى كان والله من ورايا هى اصلا فكرتها من غير ما تقول لى

كده لا دا انا لازم ابوس ام ياسر بوسه كمان

من دمغها برضو

اومال منين شكلك عوزة توقعينى مع عم شوقى

فضحكت وهمت بالانصراف

فنظر لها بكل امتنان وقال : انا متشكر ليكى اوى يا ندى

على ايه

على كل حاجة كل حاجة

لم تفهم ماذا يقصد ولكنها شعرت بالخجل فغادرته سريعا

* يتـبـــــــــــــــــــــــع الفصل الحادي عشر اضغــــــــط هنا

* الفهرس يحتوي على جميع فصول الرواية " رواية فجر جديد " اضغط على اسم الرواية


author-img
DoOoBy

تعليقات

ليست هناك تعليقات
إرسال تعليق
    google-playkhamsatmostaqltradent