رواية حبك نار الفصل التاسع والثلاثون بقلم أسماء الكاشف
رواية حبك نار الفصل التاسع والثلاثون
بس انا مش عايز اتعالج
قالها فبص عليه معاذ بصدمه الي مكنتش من نصيب معاذ وبس دي كانت باينه في ملامح الدكتور الي وسع عينيه وهو بيسمع الكلام الي هدم توقعاته
= ايه بتقول ايه يا عاصم
فكمل عاصم من غير ما يسمع باقي الاعتراض
_ مش عايز اتعالج دلوقتي انا هتعالج بعد شهرين اكون خلصت شويه حاجات مهمه
الدكتور بجدية
^ بس التأخير في العلاج بيزود المرض وفرصة الشفا بيقل انت كده بتسمح للمرض ينتشر أكثر يا استاذ عاصم
بص معاذ عليه بضيق وقال بعصبية
= هتبدء العلاج في اقرب وقت وكلام التأجيل ده تنساه فاهم أي حاجه تتأجل عادي لكن صحتك لاء دي الاهم يا عاصم
زفر بقوة وقال
^ لو سمحت يا دكتور اكتبلي مسكنات او اي علاج غير القديم لانه مبيأثرش فيه علي ما نبدء العلاج بعد شهرين
اتنهد الدكتور بقوة وقال
^ تمام ذي ما تحب
وسحب روشته فاضيه وكتب العلاج وأعطاه لعاصم الي اخذه وقام بهدوء وسلم على الدكتور وخرج ووراه معاذ الي متغاظ من تصرفات صاحبه لحقه وشد عاصم من ايده ولفه ليه بغضب واتكلم
= منكن اعرف الي عملته جوه ده وايه الهبل الي قولته علاج ايه الي هيتأخر عاصم بلاش تلعب بأعصابي أكثر من كده
اتنهد عاصم بقوة ومسك ايد معاذ بهدوء واتكلم بهدوء
_ منكن تهدي يا معاذ شويه ومتفرجش الناس علينا قالها ولف معاذ وشه ولقي المرضي والممرضين بيتابعوا حوارهم فزفر بقوة وسحب ايده وقال
= اتفضل قدامي يا مغلبني
قالها وشاور بايده لعاصم الي اتحرك وهو بيهز راسه ووصلو للعربية دخل معاذ مكان السائق وقعد جنبه عاصم بهدوء قبل ما يتكلم معاذ شاور بايده ليه يسكت فاتنهد بتعب ولف وشه ناحيه الشباك يستجمع نفسه وسمع عاصم الي بيتكلم بجدية ....
_ عارف كل الي عايز تقوله والي بتفكر فيه ومدرك اووي خطورة الي عملته والي قولته
بس انا عندي أسبابي
بغضب لفله
= ايه اسبابك دي الي تقف في طريق علاجك
اتنهد وكمل ...
_ مروه مقدرش اسيبها الفترة دي لوحدها لازم اقف معاها وتخلص امتحاناتها على خير وبعدين هتعالج
رفع معاذ حاجبة بغيظ وضرب عاصم علي كتفه بغيظ وقال بنرفزه ...
= تصدق انك مستفز طالما بتحبها كده يبقي اتعالج اسرع علشانها لكن انت بتأذي نفسك وبس للاسف طلعت ماعرفكش كويس يا صاحبي عموما مش هتكلم في الموضوع ده ثاني معاك قولت الي عايز اقوله بس انت دماغك هتوديك في داهيه وهتخسرك حبك كمان
سكت واتحرك بالعربية من غير ما يفتح كلام مره ثانيه وصلوا الشركة فخرج معاذ وقفل الباب بعصبية فغمض عاصم عينيه بقوة واتنهد جامد وبعدين خرج هو كمان وطلع علي مكتبه بوقار
***********
الحصة خلصت والمدرسة سابت الفصل غمضت مروه عينيها وحطت راسها على الطرابيزه قدامها وغادة طلعت مبرد ضوافر بتظبط ضوافرها ضحكت عليها وقولتلها
* ايه الي بتعمليه ده يا بنتي احنا في مدرسة علي فكرة
لوت شفايفها وقالت وهي مركزة في الي بتعمله
_ بعمل ايه يعني بظبط ضوافري شويه هو حرام يعني
* لاء يالمضه بس ممنوع في المدارس وما انتي عندك البيت اعملي الي عيزاه فيه حبكت هنا يعني
وقفت شويه وبصت عليه وقالت بهدوء
_ مبلاقيش وقت اعمله في البيت
ورجعت تكمل ضوافيرها ضحكت عليها وقولت
* ايه الي بيشغلك يعني
_ بالي مشغول علي طول بسي معاذ
اتعدلت في قعدتي وقولتلها بفضول ...
* وماله سي معاذ الي واخذ كل تفكيرك احكيلي كل حاجة بسرعة
ابتسمت غادة بهيام وقالت ..
_ بيحبني واعترف ليه بده قالي بحبك وانتي ليه
اتعدلت وقربت منها وسقفت بمرح وفرح
* الله كملي كملي ده طلع رومانسي اووي
ابتسمت بكسوف ووشها احمر عضت علي شفايفها بخجل واضح وكملت بهيام ...
_ اوه .. امم انا كمان مش مصدقة اني حد يحبني كده تحسيه باد بوي في نفسه كده وده ساعات بيشدني ليه اوي بيخاف عليه وبيغير اووي
قربت من مروه وقالت بعيون واسعة
_ تعرفي انه هزقني اووي علشان كنت لابسه فستان قصير شويه مسكني كده من ايدي وقالي بشخيط كده متعصبنيش يا بنت الناس واتفضلي غيري الفستان الزفت ده علشان مكسرش دماغك
صرخت بخفوت وفرح
* اوه ده باد بوي الله حلو اووي يارب يتعلم منه سي عاصم
ضحكت عليها وقالت
_ يا ستي اتنيلي واسكتي مش دايما حلو ساعات بيخوف اصله بيتحول خالص وما فيش تفاهم معاه كلمته واحده وتتنفذ
سكتت شويه وبعدين قربت من مروه لدرجة وشها بقي في وش مروه وهمست بخوف
_ انا ساعات بخاف ليكون ده حب التملك الي بنسمع عنه
بصيت عليها للحظات وبعدين ضحكت جامد وكأنها بتحكي موقف مضحك
* حب ايه يا اختي الروايات خلاص كلت مخك
نفخت غادة خدها بغيظ وضربه كفها وقالت بضيق ....
= بطلي رخامتك دي انا بتكلم جد علي فكره
فسكت وبصيت عليها بدهشه وزهول وقولتلها
* عمل ايه مخليكي تفكري كده احكيلي
غمضت عينيها للحظات ومطت شفتيها بضيق وهمست بخفوت ..
= ماعرفش يا مروه بس قلبي مش مطمن انا ضعيفة اووي علي اني اواجه شخص مؤذي انا اه بحب معاذ وبحب اشوفه اليوم الي يعدي كده من غير ما اشوفه بحس انه واحشني بس تاعبني انه فرض نفسه عليه مره واحده دخل حياتي اعترف بسرعة مش مهدلي الطريق وبين يوم والثاني بقي متحكم فيه لو لبسي معجبهوش يجبرني اغيره ولو حطيت ميكب يجبرني امسحه كل حاجة معاه اجبار وانا لقيت نفسي بسمع كلامه
* ما يمكن علشان كلامه صح وخايف عليكي بتسمعي كلامه
بعيون زائغة كملت..
= يمكن بس الي مخوفني فرق السن انا لسه ١٨ سنة وهو فوق الثلاثين حاسه ان تايهه اووي
ابتسمت بوجع وحطت مبرد الأظافر في حقيبتها وهي بتكمل بهمس لنفسها ...
= خايفه احبه أكثر
* فرق السن مش وحش ذي ما بتتخيلي انتي ما بتشوفيش الروايات ولا ايه ده احلي حاجة يا بنتي تعرفي ده الي مخليني أحب عاصم اصلا سكتت وهي بتفتكر قلبها المتهان
فكملت غادة بضيق ..
= بلا حب بلا نيله ما حدش يستاهل نديله قلبنا بسهولة قالتها وبصت قدامها اتنهدت جامد وقولت وانا بقف مكاني
* خلاص يا ست حلويات تعالي نلحق الفسحة قبل ما تخلص هنزل اشتري حاجة اكولها
حطت غادة الشنطة على كتفها وقالت
= يله انا جايه معاكي خلينا نشوف نفسنا شويه وخرجو مع بعض وقفت غادة مكانها بضيق وقالت ...
= انا مليش في جو الزحمة ده مش هحشر نفسي وسطهم علشان شيبسي وبسكوت
بصيت عليها وبصيت علي الكانتين بضيق ..
* بس انا جعانه
لفيت ضهري وهتكلم لقيت الي واقف في وشي ومادد ايديه ليه بكيس صرخت بخفون ورجعت خطوه لورا بخضه وحطيت ايدي علي قلبي ظهوره مره واحده خضني
اتكلم باحراج وهو حاطط ايده الثانية علي قفاه ..
^ اسف ما قصدش اخضك
قالها اياد وقرب الكيس مني وقال بهدوء ...
^ الحاجات دي علشانك اتفضلي
* شكرا بس انا هدخل اشتري خذهم انت اليوم طويل وهتحاتجهم أكيد
^ دول جايبهم ليكي علشان الزحمة عارف امك مش هتسلكي فيها اصلك رقيقة علي البهدلة
وشي قلب وسمعته بيكمل
^ وعموما يا ستي انا اصلا عامل حسابي متقلقش جايب لنفسي اتفضلي بقي ما تكسفنيش
اتنهد بصوت عالي وابتسمت بلطف بس هو سحب ايدي برفق وحط الكيس فيها وغمز ليه بوقاحة خلتني افتح عيني بصدمة ومشي
* مجنون ده ولا ايه
قربت مني غادة الي تابعت الحدث كله وقالت بخبث وهي رافعة حاجبه
= هو فعلا مجنون بس مجنون بيكي واضح اوي ان الحب ولع في الدره مع عم اياد
حطيت الكيس في ايدها بغيظ وقولت بغضب ...
* بس انا متجوزة ما ينفعش حتي يفكر بيه
= هو ما يعرفش وده الي شجعه يقرب منك
لويت شفايفي بغيظ ومشيت من قدامها عارفه انه بيحبني بس ده حب ملهوش غير نهاية واحده الفشل الحب الي بيجي مع الشخص الغلط بيدمرنا
**********
ماسكة شنطتها بغضب وبدور جواها اتوترت أكثر ورمت كل محتوياتها علي الطربيزة قدامها بس ملقتش الي بدور عليه زقت الشنطة بغضب علي الأرض ولفت حوالين نفسها وحاطه ايديها على شعرها تشده بغيظ وبعدين جريت علي مكتبها وبدءت تفتح الادراج وتدور فيهم بس ملقتش حاجة وده عصبها اكثر صرخت ميرا بغيظ وعصبية
* راح فين ده
غمضت عينيها بتعب وقعدت علي الكرسي بانهاك شديد وضربت راسها بخفة بتحاول تفتكر حاطته فين همست بوجع من التفكير
* انا متأكده اني مطلعتوش من الشنطة خالص
رجعت للشنطة وحطت كل محتوياتها جواها وقفت لحظة وقضبت حاجبها بتفكير وبعدين حطت ايدها علي وشها وحركتها بضيق وعينيها اتحولت لغضب حركت رأسها بخفة وقالت بهمس ..
* ما فيش غيره جدي الي عمل كده اكيد هو الي اخذه وخباه علشان يضمن قعدتي هنا
قامت وقالت بغيظ
* اوك يا جدو هوريك ازاي تلعب معايا انا كده
خرجت من اوضتها ومشيت علي طراطيف صوابيعها ذي الحرامية علشان ما يسمعش صوتها ويقفشها وصلت لاوضة مكتبه دخلت براحه وقفلت الباب والي ساعدها ان هو في شركته بس عامله احتياطها بردو قربت من مكتبه وبدءت تدور فيه لقت درج مقفول بمفتاح فشكت انه مخبيه هنا بدءت تدور علي مفتاح علشان تفتح الدرج المقفول بس ملقتش غمضت عينيها بضيق وشتمت جدها في سرها بس فتحت عينيها علي رجلين ورا الستاره بلعت ريقها بخوف ولفت بعينها علي المكان تلاقي حاجة تدافع بيها علي نفسها بس ملقتش قربت من الستارة بتوتر وشدتها مره واحده بتهور منها فصرخت وهو كمان صرخ بس حط ايده علي بوقها بسرعة وكتم صوتها وهي واقفه وشها في وشه ايد علي بوقها والثانية محاوط بيه جسمها ومثبتها اترعشت بخوف وهو قرب منها أكثر وعينيه الزارقه متعلقه في عينيها ابتسم بخبث وهي بلعت ريقها بخوف وجسمها كله مشلول وكأنها دمية بين ايديه وقفت تنفسها لما بقي المسافة بينهم شبه منعدمه وعينيها واسعة علي الاخر
يتبع الفصل الأربعون اضغط هنا
- الفهرس يحتوي على جميع فصول الرواية كاملة :"رواية حبك نار" اضغط على اسم الرواية