رواية أحببتها مرة أخرى الفصل الرابع 4 بقلم منى عبد الغني
رواية أحببتها مرة أخرى الفصل الرابع 4 بقلم منى عبد الغني
_وانا مش عايزه اتكلم معاك افتح الباب انا عايزه انزل حتى لو مش هتقف افتح البااااب.
+اتعصبت منها وفتحت ال lok وانا لسه بسوق وانا متأكد انها مستحيل تعمل دا وتفتح الباب يعني وتنزل وانا ساي...
_اااااه
+الا لو كانت مجنونه طبعا، وقفت العربيه ونزلت بسرعه اشوفها بعد ما حدفت نفسها زي المجانين من العربيه...
، انتي اتجننتي ايه اللي انتي عملتيه دا انتي متخلفه يعني ولا ايه؟
_فضلت اعيط، دراعي مش حسه بدراعي يا خالد بيوجعني اوي كله بسببك انت السبب انا بكرهك منك لله يا خالد منك لله.
+حتى وانتي متمرمطه كدا مش رحماني وبتشتميني، مسكتها من كتافها وقومتها.
_ااه رجلي وايدي حسبن الله ونعم الوكيل فيك كل دا بسببك والله لاقول لبابا انك حدفتني من العربيه..
+والله حسبن الله في الظالم يا مفتريه اركبي خلينا نروح نشوف دكتور يجبسك قصدي يكشف عليكي.
_ركبت معاه وانا بتوجع ومش طيقاه لانه السبب ما هو لو مضحكش عليا ولو كان سمع كلامي ووقف من الاول مكنش هيحصلي كل دا.
:ايه دا زينب مالك مالها يا خالد ايه حصل؟!
+مفيش يا طنط دي حاجه بسيطه والدكتور قال انه كسر في الدراع ورجلها اتجزعت بس مش اكتر وان شاء هيفك الجبس بعد شهر بس لازم متستخدمهاش كتير بقى ورجلها تواظب على المرهم والادويه عشان تخف..
:هتفضلي دايما تعملي مصايب كده؟
_على فكره هو السبب واصلا انتوا اللي غلطانين كل دا بسببكم ما انتوا لو مش مجوزني حمار مكنش دا حصل..
+طب انا همشي عشان لو فضلت اكتر من كده معاها انا ممكن يحصلي حاجه عايزه حاجه يا طنط.
:حقك تعمل اكتر من كده لا يابني تسلم.
+نزلت وانا دماغي مصدعه وتعبان ومش قادر اكني كنت بحارب مثلا بس فعلا الكلام معاها لوحده حرب انا مش عارف دي هعيش معاها في بيت واحد ازاي يارب!...
عدي اسبوعين وطبعا مكنتش مهتمه باللي قاله الدكتور ولا حتى اللي هو قاله وكنت بنزل الشغل عادي جدا وبرغم ان رجلي كان وجعها بيزيد فا كنت بضغط على نفسي وبستحملها وحتى من ساعتها مشوفتهوش بسبب انه تقريبا بيدور علي شغل في مصر ووالله كانوا احلى اسبوعين من غير الهجمي المتخلف دا..
[الكاتبه مني عبد الغني
_ايوه انا مش فاهمه انت ايه جايبك اصلا ؟!
+هو ايه اللي جايبني انتي هبله يا بنتي انا جوزك.
_لا يا بابا انت مش جوزي وهطلقني زي ما قولتلك لاني مش عيزاك ولو عملتوا اللي في دماغكم صدقني هموت نفسي واخلص...
+يارب كنت بحبها على ايه دي، طب ممكن تهدي كده ونتكلم حبه بدل البكابورت اللي بيطلع منك طول الوقت دا؟
_انا بكابورت طب وال...
+حطيت ايدي على بوقها قبل ما تفتح وتبدأ تشتم تاني، ممكن تهدي حرام عليكي من ساعه ما شوفتك وانتي مش بتبطلي كلام وزعيق انا على فكره اعرف اوي اخد حقي منك واخليكي تسكتي بس انا محترم والدك والبيت اللي انا فيه ممكن تسيبيني اتزفت واتكلم شويه بقى؟
_......
+بعدت عنها، بصي يا ستي انا اللي عايز اكمل في الجواز ودا طبعا مش حباً فيكي يعني ولا حتى عشان ارضى امي زي ما قولتي قبل كدا بس دا عشان سبب تاني وصدقيني هتعرفي بس مش دلوقتي بس عايز اقولك اني بجد مش الشخص اللي ممكن يأذيكي في يوم من الايام ولا حتى أنه يزعلك اه طبعا فيا عيوب كتير وهتعرفيها مع الوقت والعشره بينا بس اللي عايزك تعرفيه اني هحافظ عليكي وهصونك اكتر من اي راجل وهشيلك على دماغي لأنك هتبقى مراتي على اسمي وتخصيني وراحتك من راحتي اكيد والحب فا انا متأكد انه هيجي مع الوقت بس الأهم اننا نكون بنحترم بعض عشان مش هقدر اعيش مع واحده بتهزئني وتشتمنى طول الوقت وزي ما تحترميني هحترمك وهحطك فوق الكل كمان فا اديني فرصه وخلينا نحاول مع بعض ممكن؟..
_كان بيتكلم بهدوء وحنيه غريبه كانت في عنيه نظره مش عارفه افهمها مش عارفه ليه ارتحت واطمنت وعجبني الكلام والطريقه اللي بيتكلم بيها كانت أول مره اركز في عينيه كدا واخد بالي اصلا انها ملونه ولونها ازرق لون السما عنيه كانت حلوه اوي خلتني ابتسم من غير ما اخد بالي حتى...
+زينب انتي سمعاني؟
_موافقه.
+بتتكلمي جد؟!!
_هو ايه انا قولت ايه؟
+لا انتي لسه قايله انك موافقه لو رجعتي في كلامك صدقيني هزعلك.
_لا انا مخد....
+خدتي او مخدتيش بس خلاص انتي وافقتي بالنسبالي يلا انا همشي وهيجيلك بكره
_تيجي بكره ليه؟؟
+عشان اشوف الهانم راحت الشغل تاني ولا ايه ما بسبب اهمالك دا رجلك مخفتش برغم انها حاجه عبيطه يعني.
_......
+ باسها من راسها، يلا انا ماشي سلام..
_كنت قاعده مكاني ومفهمتش ايه اللي حصل ولا ايه دا هو باسني احييه هو باسني ومن راسي ايه الاحترام الغريب دا وبعدين ايه يبوسني ازاي دا حيوان....
عدي اليوم وأنا عماله أفكر في اللي قالهولي هو وملك وبعدين قررت اتصل بيه..
_الوا
+...
_الو خالد انت معايا؟
+همم اه مين معايا؟
_انا زينب انت نايم؟
+قومت وفركت عيني، اه انتي مش شايفه ان الساعه 3 الفجر يعني ودا وقت نوم!
_انا موافقه بس بشرط
+وحبكت الشرط يتقال دلوقتي؟
_هتسمعني ولا بلاها خالص الموضوع دا اصلا؟
+قولي
_هنقضي فتره خطوبه الأول..
+نعم ؟مالك انتي هبله يا زينب احنا متجوزين اصلا!؟
_اصبر بس واسمع هنقضي فتره خطوبه يعني متقربليش تاني ابدا هنتجوز قدام الناس بس في بيتك انا خطيبتك مش مراتك ولو بوستني زي النهارده كده صدقني هصوت والم عليك الناس..
+لا اله الا الله سلام يا زينب عشان متعصبش على هبلك دا سلام.
_دا قفل في وشي طب والله يا خالد لاوريك....
_انا لا يمكن اتجوزوا دا مش بيحترمني ولا حتى مستحمل مني كلمه تصوري قفل في وشي التليفون امبارح وانا بكلمه دا واحد مهزء وحيوان وانا رجعت في كلامي ولو اتجوزته قوليلي يا طوره بعد كدا.. انتي مش بتتكلمي ليه انتي كمان؟!
-وهو انتي سيبالي فرصه اتنفس والله دا حقه يقفل في وشك ميه مره مش مره واحده.
_تصدقي اني غلطانه اني بكلم واحده زيك روحي شوفي شغلك بلا قرف سلام.
-صحيح هتيجي بكره؟
_معرفش لما نشوف سي قرف اللي حابسني دا ومتفق مع ماما متنزلنش ياخربيت الجواز واللي عايز يتجوز يا شيخه.
-ضحكت عليها، سلام عشان عندي شغل سلام.
_يارب بقى انا زهقت من القاعده دي حسبن الله فيك يا خا....
+ها كملي وقفتي ليه!
_كنت واقفه بدعي عليه ولسه بلف ظهري وببص قدامي لقيت اللي واقف مربع ايديه وساندلي على الباب، أنت جيت امتى؟ وليه؟ وبتعمل ايه هنا؟؟!
+من ساعه مهزء وحيوان وطبيعي اجي وقت ما اعوز..
_شهقت وحطيت ايدي على بوقي وانا مرعوبه، أنت هنا كل دا?!
+دخلت وقفلت الباب وقعدت على السرير.
_انت بتعمل ايه وقفلت الباب ليه اخرج برا..
+.....
_حرام عليك بقى كل شويه تدخل عليا وانا بلبس البيت وبشعري اخرج برااا بقولك يا حيوان.
+اتعصبت وقومت مسكت ايدها جامد وزقيتها لحد ما وقعنا على السرير احنا الاتنين..
_اتفاجئت من اللي حصل وفضلت مبرقه وهو لسه واقع عليا وقريب مني اوي..
+على فكره انا جوزك وفي حاجه زي دي اقدر اعمل اي حاجه اعوزها واخده بالك، شديت التوكه من شعرها.. واقدر كمان اشوف شعرك عادي.
_اتكلمت بصوت واطي وانا خايفه، لو سمحت ابعد عني كده عيب وحرام اللي بتعمله دا ابعد لو سمحت..
+ انتي مراتي وحلالي ومفيش حاجه اسمها حرام بينا واعرفي اني اقدر اعمل فيكي اللي عايزوا...
_بدأت ادمع وانا خايفه وحاسه اني مش عارفه اعمل حاجه.
+وزي ما اقدر اعمل اي حاجه فا كمان اقدر اعاقبك على اللي انتي لسه قيلاه دا ها هتعتذري ولا؟..
_عيط، اسفه اسفه ابعد بقى يا خالد لو سمحت.
+اوعديني الأول انك مش هتشتميني تاني وهتتكلمي بحترام مع جوزك!..
_حاضر والله حاضر ابعد بقى.
:فتحت الباب، ايه يا ولاد ان.......
+بعدت عنها بسرعه وهي كمان قامت بسرعه وهي لسه بتعيط..
:احم الفطار جاهز هتاكلوا دلوقتي ولا بعدين؟
+جاين يا طنط حاضر.
[الكاتبه مني عبد الغني
:طلعت بسرعه وانا فرحانه وحاسه ان ممكن يبقى في فرصه انهم فعلا يفضلوا متجوزين وبنتي متبقاش مطلقه..
+انتي بتعيطي ليه دلوقتي؟
_انا بكرهك بسببك ماما هتفهم غلط كله بسببك..
+اهدي يا زينب وافهمي بقى اني جوزك والله.
_لا مش جوزي ولحد ما يتم الفرح انت مش جوزي سامعني؟..
+طبطبت علي ايديها، حاضر خلاص اسف متعيطيش.
_......
+خلاص يا زينب مش هقربلك تاني وممكن تروحي تغسلي وشك وتيجي نفطر بقى؟
_مش عايزه انا هنام.
+خلاص يا زينب بقى عشان خاطري يلا تعالي كلي معانا انتي لسه صاحيه ملحقتيش تبقى عايزه تنامي.
_خالد اطلع برا لو سمحت وسيبني لوحدي..
+حاضر ،طلعت وسيبتها مش عارف ليه كانت عامله كدا كنت بهزر ومكنتش متخيل ان قربي منها بس هيخليها بالشكل دا.
_مش عارفه كان مالي بس حاسه اني بخون حبي لإبراهيم اه عارفه انه خطب خلاص وان انا مش في دماغه بس حبي ليه لسه في قلبي.. حسيت اني بعمل حاجه غلط واني كدا بخون ثقتي في نفسي كمان اه مكبره الموضوع بس بردوا مدايقه ومش عارفه ايه السبب...
عدي يومين وكنت قاعده فيهم في البيت ومكنتش بشوفه ولا بكلمه ومش ببطل تفكير دايما وخصوصا ان الفرح قرب وحتى انا مكنتش بنزل الشغل ولا حتى بنزل اجيب اي لبس او حاجات للجواز وكنت مدايقه اوي بسبب كدا وحاسه اني بتسلق سلق بيض اوي وأنهم عايزين يخلصوا مني مثلا..
_ماما هو احنا مش هننزل نجيب هدوم جديده؟
:وعايزه هدوم جديده ليه ما احنا جايبين كل حاجه
_لا يا ماما انا عايزه اجيب حاجات جديده الحاجات اللي طالعه موضه دلوقتي كل الهدوم اللي كنت جبتها وشيلاها زمانها صغرت عليا اصلا.
:تمام هبقي اديكي فلوس وانزلي جيبي اللي انتي عيزاه.
_وهتنزلي معايا؟
:لا انا تعبانه شوفيلك حد تاني ينزل معاكي..
_ماما على فكره انا بنتك هو ايه اللي مش هتنزلي معايا؟!
:زينب متزهقنيش انتي عارفه اني رجلي وجعاني ومش بقدر الف كتير عايزه تجيبي حاجه خدي فلوس وانزلي لكن انا مش نازله في حته تمام.
_اتعصبت ودخلت اوضتي وانا مدايقه انا اصلا مش فاهمه هي ليه متنزلش معايا زي باقي الأمهات ليه بقت عامله كدا ومبقتش حنينه عليا زي زمان؟..
_نعم بترن ليه تتصل 8 مرات ليه يعنى ايه الصداع والفراغ دا؟
+ما الهانم لو بترد عليا ولا بتخرج تشوفني مكنتش اتصلت دا كله مش مهم حسابك بعدين المهم دلوقتي تلبسي وتنزلي.
_لا مش نازله رجلي بتوجعني.
+طنط قالتلي انك بقيتي كويسه فا بلاش استعباط وانزلي.
_وانزل ليه يعنى عايز ايه لو عايز تتكلم في حاجه قولها دلوقتي او اطلع انت..
+زينب متخلنيش اطلع انا وانزلك بطريقتي وأعتقد انك بقيتي عارفه انا اقدر اعمل ايه.
_فهمت قصده وافتكرت اللي حصل من يومين.. شهقت، أنت قليل الادب.
+ضحكت، هستناكي متتأخريش سلام.
_ايه يارب الكائن الجاموسي دا انا بجد بكرهه..
_نزلت وركبت وانا متعصبه ومش طيقاه.
+وعليكم السلام
_بصتلوا وضحكت ضحكه سمجه ودورت وشي.
+تمام مترديش براحتك المهم قوليلي عايزه تجيبي لبس منين؟
_بصتلوا بستغراب، لبس ايه؟
+طنط قالتلي انك ناقصك حاجات وعايزه تجيبيها فا قولي عايزه نروح فين عشان انا مش عارفه أماكن لبس هنا..
_اووف هي ماما دي مبيتبلش في بوقها فوله كل حاجه تقولهالك انا زهقت.
+فضلت ساكت وبضحك على عصبيتها ومستنيها ترد.
_عموما انا مش عايزه حاجه انا هطلع وانت روح نام وانا لو عوزت انزل هبقي اخد ملك وننزل احييه دا ملك عيد ميلادها الاسبوع الجاي!!..
+احييه؟؟ في بنت محترمه تقول كدا؟
_بص متصدعنيش انا هنزل واروح اجيب هديه البت ملك وماما لو اتصلت بيك تبقى تقولها اني معاك سلام، فتحت باب العربيه وكنت لسه هنزل لقيت اللي بيشدني بكل عنف..
+اقفلي الباب
_سيب ايدي يا خالد ايه الجنان دا انت بتشدني كدا ليه!.
+زينب انتي لو نزلتي من العربيه صدقيني هتشوفي وش مش هيعجبك اقفلي الباب واقعدي مكانك من غير كلام كتير.
_مش عارفه ليه خوفت بس بردوا مسمعتش الكلام وشديت ايدي منه، خالد مطلعش جنانك عليا وبعدين انا حره انزل ولا لا وقولتلك عايزه اروح اجيب حاجه لملك مش لازم كل حاجه همجيه وجنان بقى.. سيبته ونزلت ولسه بقفل باب العربيه ولقيت اللي في وشي، أعوذ بالله انت بتطلع منين...
+اركبي..
_خالد في ايه ما توسع بقى وبطل شغل الهبل دا.
+زينب مش هقولها تاني اركبي ومتخليش الناس تتفرج علينا.
_خلاص مش هروح في حته وهطلع فوق ابعد بقى بعيد عني.
+مسكت ايديها جامد وزعقت جامد، وانا لما اقول تركبي يبقى تركبي وانتي ساكته مش كل حاجه مناهده ومحايله انا زهقت انتي ايه مفيش حد بتسمعي كلامه اركبي بقوللللك...
_اترعبت منه وخوفت وركبت العربيه ومعرفتش امسك دموعي وبدأت اعيط.
+دخلت ركبت انا كمان وبدأت اسوق وخلاص وانا حتى مش عارف اروح فين انا اه بقالي شويه نازل مصر بس ملحقتش اعرف أماكن هنا وحتى مكنتش عارف هسألها ازاي بعد ما زعقتلها كدا؟..
+قولي عايزه تروحي فين بدل ما انا ماشي مش فاهم حاجه كدا..
_مردتش عليه ودورت وشي.
+زينب اخلصي هنروح فين ما تقولي حته تجيبي منها اللي عايزه تزفتيه عشان نخلص في الليله دي!..
_هو انت مبتعملش حاجه غير أنك تزعق تزعق هو في ايه بقي انا زهقت انت كل حاجه تحكمات وزعيق انا مش عارفه انا عملت ايه لكل دا ليه دايما بتتعامل معايا كدا والله زهقت ومبقتش مستحمله ليه كلكم بتعملوا كدا فيا انا بكرهكم كلكم وبكرهك انت اكتر واحد فيهم.
+وقفت على جمب وحاولت اهدي نفسي من العصبيه اللي انا فيها ومسكت ايديها، معلش انا اسف حقك عليا متعيطيش..
_......
+خلاص بقى يا زينب وبعدين ما انتي اللي بتعصبيني يعني انا مش طايق نفسي عشان مش لاقي شغل وعمال كل يوم انزل ادور عشان اعرف لما نتجوز اعيشك مرتاحه وبردوا مش لاقي ولما اجيلك اعملك اللي انتي عيزاه عشان مسبكيش مدايقه وتحسي ان انا بخطفك منهم ومش بحققلك اللي عيزاه فا تقوليلي لا مش عايزه وبردوا تتعاملي بنفس الطريقه اللي قولتلك مبحبهاش ومتتعامليش معايا بيها وبردوا مش بتسمعي الكلام وغير كدا بتقوليلي اكدب على اهلك عايزانى أكذب كمان واسيبك تمشي لوحدك في الشارع.
_كنت مكمله عياط جامد وانا مدايقه ومش برد انا بجد بكره ان حد يزعقلي..
+وبعد كل دا مش عايزانى اتعصب عليكي يعني مين فينا الغلطان بقى انا ولا انتي؟
_انت الغلطان عشان زعقتلي وانا مبحبش حد يزعقلي.
+تمام خلاص حقك عليا مش هزعق تاني بس بلاش تقلي أدبك وتسمعي الكلام وانا ساعتها مش هزعق ممكن تقوليلي بقى نروح فين عشان نجيب اللي هتجيبيه؟
_بس انا عايزه اروح.
+معلش خلينا نجيب اللي انتي عيزاه ونروح واهو بالمره تجيبي هديه صحبتك ممكن؟
_ماشي
[الكاتبه مني عبد الغني
_فعلا روحنا واشترينا لبس وكان بيختار معايا وفعلا كان زوقه حلو اوي واي حاجه كان بيختارها بتطلع حلوه ومظبوطه عليا. ،كفايه بقى اشترينا كتير.
+تمام خدي دا آخر حاجه قيسيها وبعدين نشوف هنعمل ايه تاني.
_خلاص يا خالد والله زهقت وتعبت من القياس..
'لو اخت حضرتك مش عيزاه انا ممكن اخدوا واقيسه اختيار حضرتك موفق جدا وانا بحب الاستايل دا.
+تمام مفيش مشكله اتفضلي.
_كنت واقفه مربعه ايدي وباصه على الحلوه اللي بتكلمه لا وبتقول عليا اخته كمان يا ما شاء الله دي جايه تشقط مش تشتري لبس.
' دخلت قاسته وطلعت، لا فعلا ذوقك حلو اوي هو اسم حضرتك ايه؟
+خالد
' مديت ايديها، تشرفنا.
_كان لسه هيمد ايده هو كمان روحت قربت منها ومسكت ايديها بكل غل، تشرفنا يا حبيبتي ولاء انا مش اخته انا مراته واقلعي الفستان اللي عليكي دا عشان ادخل اقيسه بقى.
+رفعت حاجبي وكنت واقف مستغرب اللي بتعمله ولقيت نفسي تلقائي ببتسم، مش لازم يا زينب مش قولتي مش عيزاه.
_خليك في حالك انت انا هقيسه يعني هقيسه.
`في نفس المقاس من الفستان بس واحد غيره يا فندم اجيبه لحضرتك؟
+تمام مفيش مشكله ياريت تج...
_لا انا مش هلبس غير اللي هي خدته منك وبعدين انتي مالك انتي كمان حاشره نفسك ليه؟!!
+زينب!!
_في ايه انا عملت ايه يعني؟
+يلا هنروح
_قولتلك مش هروح غير ما اشتري الفستان دا.
+مسحت بإيدي على وشي، معلش خلينا نروح ووقت تاني نجيبه ممكن.
_مشيت معاه وانا لسه باصه للوليه بنت الجزمه وانا متغاظه ونفسي اجيب الفستان اللي عليها اقطعه حتت
_لا فعلا ذوقك حلو اوي نينينيني وليه لازقه بصحيح ايه الأشكال دي..
+ضحكت، في ايه يا زينب ما تهدي البنت مقالتش حاجه لكل دا.
_مقالتش حاجه دي كانت ناقص تبوسك وبعدين بتديها الفستان اللي نقتهولي ليه هو اي حد وخلاص.
+إنني غيرانه؟
_ايه ايه؟ انا اغير من مين وعلى مين يا روحي دا انا مدايقتش غير على الفستان اللي هي خدته اغير عليك انت دا انا طول حياتي مغيرتش غير على ابراهي....
+بصتلها وهي بتقول اسمه كدا بكل طبيعه، معتقدش انه من الذوق انك تقولي اسم اللي كنت بتحبيه قدام جوزك يعني.
_اسفه يا خالد مكنتش اقصد والله.
+طيب
_يخربيت لساني اللي هيوديني في داهيه دا وليه اصلا اجيب سيره ابراهيم؟ بس هو وحشني اوي هو كده بجد خلاص هيتجوز غيري وانا هعيش مع حد غيره طب واحلامنا اللي حلمناها سوا وذكرياتنا اللي عملناها مع بعض خلاص كل دا راح؟!!...
+زينب؟
_....
+زيينب!
_ها ايوه نعم؟
+هتجيبي حاجه لصحبتك؟
_اه يا لهوي دا انا نسيت
+تمام، ركنت ونزلنا وفضلنا نلف على هديه.
*ايه دا زينب؟
_مين؟ عمرو!
*اه ازيك يا بنتي وحشتيني جدا والله.
_وانت جدا ايه يا بني فينك منعرفش عنك اي حاجه من ساعه التخرج!.
*والله جاتلي منحه بعد الجامعه وسافرت ولسه راجع من شهر والحمدلله اتنقلت في شغل هنا وهستقر يعني
_بجد دا كويس اوي هتشتغل فين بقى؟..
*هشتغل في....
+كنت راجع بعد ما كنت بشتري حاجه وقولتلها تستناني لقيتها واقفه مع واحد وضحكتها واصله للمول كله اتعصبت انه حتى مش عملالي احترام وقربت منهم......
يتبع الفصل الخامس اضغط هنا
الفهرس يحتوي على جميع فصول الرواية "رواية أحببتها مرة أخرى "اضغط على اسم الرواية