رواية لست ملكي الفصل التاسع 9 بقلم آيه عادل عبر دليل الروايات
رواية لست ملكي الفصل التاسع 9
قضيت احلي ايام مع حاتم وعدي شهر وسافرت معاه والاحداث اللي حصلت كانت كتير خديجه مرات رحيم حامل واختي رقيه كمان وكان لازم انزل مصر تاني عشان تجهيزات فرح رانيا اختي وحاتم نزل معانا وعدت الأيام علينا بضغوطاتها وبفرحها والفرحه الأكبر لما رانيا اختي اتجوزت وشوفتها بالفستان الابيض
رانيا : انا مش مصدقه يابنات اني بقيت عروسه وهتجوز ، انا حاسه اني بحلم والله
رقيه : يا حبيبه قلبي كل شئ وله ميعاده ، فاكره لما كنت بقولك كل ماضاقت بتفرج من وسع ، ربنا يسعدك ويهنيكي يا حبيبتي
رنا : يا بنتي هو اللي محظوظ ان انتي هتبقي مراته انتي اجمل واحده في الدنيا ورامي طيب ويستاهلك ربنا يسعدكم يا حبيبتي
خديجه : مبروك يا رانيا انا فرحانه عشانك اوووي ماشاء الله زي القمر
رانيا : انا محظوظه بوجودكم كلكم حواليا انا بحبكم اوي
دخل رامي وحاتم ورحيم عشان رحيم يسلم رانيا لجوزها رامي ساعتها حسينا بطيبه وحنيه رامي لما شاف رانيا عروسه قدامه وباس ايديها وراسها وقالها انتي ست البنات وست العرايس انا مش مصدق ان احنا اتجوزنا
سبحان الله كل شئ وليه ميعاده وكل شئ نصيب ونصيبك هيصيبك ربنا يسعدهم
خلص الفرح بس كنت حاسه ان رقيه عينها مش طبيعيه لما جينا نمشي قولت ل حاتم اني هبات مع رقيه وماما وهو وافق وقالي انا هبات في بيتنا وخليكم علي راحتكم
روحنا وقعدت مع رقيه وابتدينا نتكلم
رنا : مالك يا رقيه في ايه ، اوعي تكوني زعلانه عشان خاطر خالد
رقيه : انا زعلانه عشان نفسي مش علي خالد ، خالد مين اللي أزعل عليه ده مافكرش يسأل عليا فاكر انه بيربيني
رنا : اومال مالك طيب
رقيه : رنا انا عايزه اوصيكي علي بنتي اللي في بطني اوعي تسيبيها مع خالد اعتبريها بنتك دي حته من اختك يا رنا حافظي عليها
رنا : ايه اللي انتي بتقوليه ده يا بنتي بعد الشر عنك هتبقي كويسه وهتربي بنتك وتشوفي ولادها كمان
رقيه : حاسه اني مش هكمل يا رنا
رنا : بس بطلي هبل انتي فين وفين الولاده لسه فاضلك يجي 6شهور
رقيه : ربنا يعديهم علي خير ، صحيح هتسافري امتي
رنا : بعد بكره الصبح عشان حاتم عنده شغل كتير وكان مأجل كل شئ عشان فرح رانيا
رقيه : ربنا معاكي يا حبيبتي
خلص الكلام وكل واحده دخلت تنام ، كلام رقيه وجعني اوي علي قد ماكنت مبينه انه عادي وبطمنها علي قد ما خوفت عليها اوي
سافرت انا وحاتم وعمتي والامور كانت ماشيه تمام لحد ما في يوم كنت تعبانه وجالي نزيف وقعد معايا كام يوم وعملت تحاليل واشاعات واكتشفت ان عندي كانسر في الرحم ولازم اشيل الرحم ومش هخلف ، ماقولتش لحد وكنت بكلمهم كلهم عادي بس انا وحاتم كنا حرفيا بنموت احنا مش هنخلف ومش هيتقالي يا ماما ومش هيتقاله يا بابا كتمنا وجعنا جوانا وجه ميعاد العمليه فهمتهم في مصر كلهم أننا هنقضي كام يوم في فرنسا كنوع من التجديد وهنتفسح وهقفل تليفوني ماتقلقوش ، امي ورحيم حسو ان ده مش طبيعي بس سابوني علي حريتي
في المستشفي
حاتم : ماتخافيش يا حبيبتي هتبقي كويسه
رنا : مش خايفه كله بتاع ربنا ، انا بس مضايقه ان مش هيتقالي يا ماما
حاتم : عيب عليكي تقولي كده مانتي امي يا رنا ، من هنا ورايح هقولك يا ماما وانتي ياستي قوليلي يا بابا
رنا : ربنا يخليك ليه ، حاتم لو سمحت روح عمتي دي تعبانه وجودها بيحسسني بالذنب
العمه : بس يا بت انتي انا امك وبعدين مش عاجبك قعدتي
رنا : يا عمتو انا بس مش عايزه اتعبك ، ربنا يخليكي ليا حضرتك امي التانيه
دخلت غرفه العمليات نور الكشافات كان مخليني مرعوبه وكلام الدكاتره اللي انا مش فاهمه نصه كان محسسني بالغربه وفي ثواني روحت عالم تاني بعد ماخدت البينج وصحيت لقيت نفسي عامله العمليه
حاتم : حمدالله علي سلامتك يا حبيبتي
رنا : الله يسلمك ، خلاص
حاتم : خلاص
اتحجزت في المستشفي وحاتم ماكنش سايبني ولا هو ولا عمتي وكانت الامور ماشيه عادي وكنت بكلمهم كلهم في مصر وكان كل شئ تمام ، وخرجت من المستشفي وبقيت كويسه كنت لما بمشي واشوف اطفال كنت بحس باللهفه يارب انت العالم بحالي
عدي كام شهر وجالي أحلي خبر كنت مستنياه ولاده رقيه بس الغريب أن امي كانت بتبلغني وبتقولي
الام : اختك بتولد يا رنا بس لو سمحتي تعالي بسرعه اختك في حاله خطر ولازم تلحقي الولاده
رنا : ازاي يعني يا ماما هي مش بتولد علي طول
الام : لا يا حبيبتي الدكتور قال نستني 24 ساعه يلا يا رنا مافيش وقت
رنا : حاضر يا ماما ، سلام يتبع الفصل العاشر والأخير اضغط هنا