رواية الزوجة الثانية الفصل الثالث والفصل الرابع حصريا عبر دليل الروايات
رواية الزوجة الثانية الفصل الثالث 3
ازاي أنا اللي معاهم، يعني ايه؟؟
انا كنت متجوزة عمر؟ طب ازاي.. انا متاكدة اني اول مرة اشوفه كان من كام شهر، ازاي البيت اختفى وازاي.. وفين عمر؟.. عقلي كان هيشت ومكنتش عارفة افكر، كنت تعبانة جدا كمان، دخلت اوضتي ونمت، كانت الساعة تقريبا ٣ الفجر، نمت وعقلي كان لسه بيفكر، مش عارفة ممكن اكون نمت قد إيه، لكن صحيت تاني يوم وسمعت الاذان، توقعت انه الضهر لكن كان اذان العشا، انا نمت كتير جدا وصحيت تاني بالليل، الليل بقا شيء مرعب بالنسبالي، متحركتش من مكاني لسه مش مستوعبة، يمكن كل ده كان حلم! لكن لا. الصورة في أيدي، صورتي انا وعمر وولاده!،
فجأة الباب خبط، كنت مرعوبة وخايفة افتح، سكت وفضلت مكاني، لقيت صوت مفتاح في الباب والباب بيتفتح، كان عمر!!
اول ما شفته صرخت وكنت خايفة منه جدا، استغرب تصرفاتي وكان باين عليه الذهول
- منال.. مالك في إيه؟
- في ايه يا عمر.. انا قربت اتجنن.. انت كنت فين.. وايه الصورة دي.. وازاي مراتك ماتت وانت كمان و...
- اهدي اهدي بس.. في ايه حاصل
- انا هتجنن.. ايه الصورة دي، وازاي انا متصورة مع ولادك، فين مراتك وانا..
- صورة ايه يا منال.. انتي لسه هتعيدي تاني الكلام ده.. حرام عليكي بقا انا تعبت.. انتي مراتي واحنا متجوزين من ١٠ سنين ودول ولادنا!
- ١٠ سنين ايه.. ولادنا ازاي.. انت عايز تجنني!!.. انا نزلت وراك مصر وروحت بيتك وقابلت ولادك وجدتهم.. ولقيت صورتي معاها وقالتلي ان دي بنتها وانها ماتت!
- منال، متخلينيش اتعصب عليكي، انتي مستحيل تكوني نزلتي مصر.. مستحيل
- لا حصل والله العظيم، نزلت وروحت بيتك، وكل اللي قلته لك حصل، انت عايز تجنني صح، بتعمل كده ليه!
- نزلتي مصر ازاي يا منال!
- بعربيتي، روحت ورجعت لوحدي
- منال حبيبتي.. اهدي.. ارجوكي
- مش هاهدا.. لازم تفهمني ايه اللي بيحصل، يا اما والله هقتلك بجد وانتحر
- منال، بصي من البلكونه كده؟
- ايه.. بتقول ايه
- بصي بس..
- ايه ده؟
- بالظبط كده، عربيتك عطلانة من ٤ شهور ومتحركتش من مكانها ابداا!
الزوجة الثانية الفصل الرابع 4
- بالظبط كده، عربيتك عطلانة من ٤ شهور ومتحركتش من مكانها ابداا!!!
معرفتش أقول إيه.. انهارت في العياط، أنا مجنونة؟ لا مستحيل.. أنا أول مرة أشوف عمر كانت من شهور ومستحيل أكون عندي ولاد منه وأنا مش عارفة، بيعمل كده ليه؟، عايز يجنني ليه، والست اللي شفتها والعزا والولاد وكل ده إيه، مش ممكن كدبه يوصل بيه للدرجة دي، وليه كان بيظهر وبيختفي، بتعمل كده ليه يا عمر!
كان لازم أهدأ.. وأفكر.. كان لازم القى حد يساعدني، فكرت في ناس كتير لكن الموضوع كان أصعب من انه يتحكي لحد، محدش هيساعدني غير نفسي، أخدت إجازة من شغلي وفضلت في البيت، كان في منتهى الحذر معايا، عايز يحسسني اني مجنونة، لكن لا، أنا عايزة أعرف هو عمل كده ليه.. وهعرف.
بعد اسبوع بالظبط مكنش في جديد حصل، كل حاجة كانت زي ما هي، عمر قعد معايا وفهمني اللي عندي
- منال، انا عارف اني اللي هقولهولك ده صعب تستوعبيه، لكن لازم اقولهولك، منال انتي انتي عندك مرض عقلي، مش هقول فصام ولكن هو اعقد من الفصام، بتنسي حاجات كتيرة جدا، وبتعيشي في كذا شخصية وحياة، لما شفتك في مكتبك من شهور دي مكانتش اول مرة، احنا متجوزين من سنين، لكن الحالة دي بدأت تحصلك من ٣ سنين، وأنا معرفش سببها، وكل مرة بتجيلك فيها باضطر اني اتعرف عليكي من جديد، ولادنا انا خليتهم في القاهرة مع اختي، علشان احافظ عليهم وعليكي، صدقيني يا منال دي الحقيقة، وأنا بحبك. ومش هتخلى عنك ابدا!
- انا مش قادرة استوعب يا عمر، مش فاهمة ولا مصدقة. بيحصلي كده ليه.. واللي شفته في مصر كان ايه
- يا حبيبتي انتي منزلتيش مصر، صدقيني انتي هنا في البيت امبارح طول اليوم كنتي نايمة!!
- أنا تعباااااانة.. تعبانة جدا.. لازم اروح لدكتور
- لأ.. دكاترة لا مش هتروحي
- ليه.. مالك اتخضيت ليه
- يا حبيبتي احنا روحنا لدكاترة كتير جدااا.. انا مش عايزك تتعبي تاني، ارجوكي...أنا اخدت اجازة ومش هسيبك لوحدك تاني!
- حاضر يا عمر.. حاضر.. سيبني دلوقتي علشان انام!
مشي عمر وانا لسه بفكر في كلامه، أنا مش عارفة اصدق ايه.. احساسي بيقولي اني مش تعبانة.. هو بيكدب عليا، طب هيكدب ليييه، لازم يكون في حل، نمت وصحيت بالليل، سمعت صوت همس، مشيت بهدوء، لحد ما سمعته بيتكلم في الموبايل!
- أيوة، بكرة ان شاء الله هنفذ اتفاقنا.. مش عايزها تحس بأي حاجة وإلا كل تخطيطي هيبوظ!!
يا ترى بتخطط ل إيه يا عمر، هتعمل إيه بكرة، وحياتك يا عمر ما هتلحق تشوف بكرة!!