حكاية صبا الفصل الحادي عشر 11 - بقلم حنين عادل
Part 11
فتح مُسلم بوقه وهو بيشاور علي حاجة في ضهرهم وبيلطم مرة يشاور ومرة يلطم.
حط مراد ايده علي مسدسه ولف فجأة ورفع مسدسه ووقف صبا وراه
كانوا اتنين ملثمين واحد ماسك عصاية وواحد ماسك مسدس
صوب مراد بسرعة علي اللي ماسك مسدس وقعه في الأرض
حاول مُسلم يقوم بصعوبة وهو بيسند علي الكرسي قرب منهم بخوف وتوتر
اندفع الراجل التاني فجأة ورفع العصاية بكل قوته نزلت علي إيد مراد اتألم مراد وهو بيجز علي أسنانه ووقع المسدس منه
مسك دراعه بألم و بص بسرعة لـ صبا: اجري ادخلي جوه .
هزت صبا دماغها بخوف : لأ...
قرب مُسلم وشدها وراه : انت عاوزين منا ايه يا ولاد الكلب بقا قرفتونا انتم ما بتتهدوش .
رفع الراجل العصاية وجه يضرب مراد للمرة التانية تفاداه مراد بحركة سريعة وجت العصاية علي كتف مُسلم .
شهق من الوجع ...برق مُسلم بصدمة ومسك كتفه بايد والايد التانية العصاية والدموع اتجمعت عينيه وبيضحك بألم وهو بيبُص لـ مراد :
بتتفاداه ليه بتتفاداه ليه يا مفتري !
مش كفاية اللي انا فيه !
مسك مراد مسدسه بسرعة وضربه علي دماغه بسن المسدس
وبص لـ مُسلم نظرة طويلة : انت كويس ؟
مُسلم رمي العصاية علي الأرض وهز رأسه وهو ماسك كتفه : اه ....اه يا كتفي ...
صبا كانت واقفة تترعش بخوف قرب منها مراد وحضنها : ماتخافيش ماتخافيش أنا جمبك
بصت له وعيونها مليانة دموع : ايدك !
رفع ايده يطمنها بابتسامة : أنا كويس !
مُسلم بألم : اه يا نا ....يا بختي ويا حظي ! .
طلعت من حضن مراد بخجل راحت بسرعة علي مُسلم ...
صبا بدموع : انت بتعيط !
مُسلم بضحك ودموعه علي وشه : لا البصل دخل في عيني هههه
ضحكت صبا وهي بتمسح دموعها : أنا آسفة والله !
بص مُسلم عليها : ليه بتعتذري ليه ...انتي ذنبك ايه بس انا اللي عُرضه للكوارث !
صبا ضحكت : تعالي جمبي!
وقف مراد يبص عليهم بغضب وغيرة وقاطع كلامهم وهو بيضرب طلقة في السما
بصوا له الاتنين وهما مستغربين ....كسر اتجاه المسدس وصوبه ناحية مُسلم وهو مركز !
مُسلم بخوف : انت بتعمل ايه !
الطلقة عدت من جمب وش مُسلم وهو مبرق جت في واحد ملثم واقف وراهم ووقع علي الأرض ..
مسلم اتنفس بقوة وهو مبرق : اللي بيحصل ده كتير اي والله !
صبا اتوترت اكتر قعدت علي الأرض ومسكت دماغها وهي بتعيط : أنا مش مستحملة كل اللي بيحصل ده أنا لازم امشي من هنا ..
جرت الممر الطويل اللي في الجنينة ومراد وراها ومسلم ماشي ببطئ ..
مراد : استني يا صبا !
صبا وهي بتجري قالت من بين شهقاتها : كده كفاية أنا وجودي بيئذي كل اللي حواليا
مُسلم : يا صبا مش قادر اجري استني !
لف ليه مراد : ايه اللي جابك ادخل !
مُسلم بتحدي : وانت مالك ..
عربية جاية علي سرعة طلعت صبا وصوت الكلاكس عالي وقفت بخوف وماعدتش قادرة تتحرك شدها مراد بسرعة جت في حضنه ...
اتنهد براحة : انتي ليه عاوزة تحرميني من الحاجة الوحيدة اللي عايش عشانها !
رفعت عينيها ليه وهي حمرا وبصت له بمشاعر متلخبطة ..
ابتسم مراد : العيون دي ماتعيطش ...
مُسلم قاطعه : اومال تعمل ايه يا خويا ...
بعدت صبا عنه ...واتنهدت وهي بتبُص في الأرض
قرب مراد من مُسلم وهمس جمب ودنه:
أنا اتخنقت ولما بتخنق بعمل حاجات وحشة اوي
بعد عنه وهو موجه ليه نظرة حادة !
بلع مُسلم ريقه بتوتر ...
مسك مراد ايد صبا ودخل القصر ودخل وراه مُسلم وهو مش قادر يمشي...وبيتسند علي الحيط ...
دخلوا جوه فلف لـ مُسلم بابتسامة مرعبة :
استناني هنا هطلع صبا أوضتها وجايلك
صبا بصت له بابتسامة لتخفيف التوتر : أنا كويسة أنا هطلع أنا ووصل مُسلم أوضته ..
طلعت صبا ...فقرب مراد علي مُسلم بخطوات بطيئة طلع مسدسه وعمره وملامحه حاده
مُسلم اتوتر : ايه في حد ورايا؟
مراد ابتسم ببرود : لا ...
مُسلم بخوف : طب مطلع المسدس ليه !
مراد : عشانك يا غالي !.
مُسلم حاول يبتسم وهو بيبلع ريقه : شكرا يا كبير
لف مراد حواليه ومُسلم واقف مكانه بخوف وفجأة في حركة سريعة حط المسدس في رقبته ..
برق مُسلم بصدمة وقال وهو جسمه بيترعش :
ايه في ايه ؟
مراد ضغط علي سنانه وقال بغضب: انت طولت معايا هنا مش ناوي ترجع بيتك بدل ما ارتكب فيك جناية
هز مُسلم رأسه : هرجع هرجع حاضر بس مش النهاردة عشان اتطمن علي صبا و.......
بص له مراد بغضب فسكت وماكملش كلامه ...
مراد بعد عنه وقال ببرود : اطلع !
هز رأسه ومشي ببطئ
فقال مراد بصوت عالي : بسرعة
مُسلم بيبدأ يتحرك بسرعة وهو مش متوازن كأنه بيعرج : حاضر حاضر
طلع مراد بره لقي رجالته واقفين حوالين الراجل ومكتفينه ...
مراد بص لهم بغضب : انتم كنتم فين ...
بصوا للأرض بتوتر ..
ابتسم بشر: في حاجات كتير حواليا عاوزة تتغير لأن واضح ان ولائكم مش ليا !
طلع تليفونه ....وقف قدام القصر عربيات في رجالة كتير..
حاوطوهم ومسكوهم ..
مراد ببرود : خلصوا واخفوهم من علي وش الدنيا ...
بص للراجل الملثم علي الأرض بشر: انت بقا أنا اللي هعمل معاك الصح
شاور لراجلين من اللي واقفين شالوه ومشوا بيه ...
بص علي بوابة القصر اللي عليه رجالة كتير بيحرسوه وعلي باب القصر ...
بعدها شمر قميصه وملامحه باردة وهو بيطلع زفير بقوة ومشي راح ناحية المخزن.
ـــــــــــــــــــــــــــــــــــــــــــــــ
دخلت سماح بصينية الأكل وهي مبتسمة
سماح : الف هنا علي قلبك يا سيدي ..
وداد بصت له وقالت بحدة : سيبيها واطلعي
سماح : حاضر يا ستي ..
مشت سماح وهي بتسرق نظرات وتبُص علي نعمان .
وداد : استني !
وقفت سماح : ايوه يا ستي
وداد سكتت ثواني وهي بتبُص لها وبعدين قالت : هاتي لي المداس بتاعي !
هزت سماح راسها وراحت جابته من عند الباب وحطته علي الأرض وهي بتبُص علي نُعمان ..
وداد وهي شايفة نظراتها لـ نُعمان : لبسيهولي ...
سماح وطت علي الأرض والدموع مالية عينيها ومسكت رجليها بايد والشبشب بايد فزقتها وداد برجليها ووقعت ...
وداد بغضب: ضوافرك يا غبية عورتني
نُعمان بغضب : جري ايه يا وداد مالك من امتي وانتي بتتعاملي مع الناس اكده !
وداد : ايه ضهري واجعني حرام أما اقولها تلبسني!
نُعمان: قومي يا سماح اطلعي شوفي حالك
قامت سماح من علي الأرض وهي ماسكة ضهرها بألم ومشت ..
وداد بصت عليها نظرة طويلة والشك مالي قلبها اتنهدت ... وملامحها اتحولت للشر وبصت علي نُعمان اللي بص لـ بعيد وهو متوتر ..
وداد بشرود: أنا مش مطمنة من ناحية البت دي حاسة أن في حاجة مش طبيعية وهعرفها !
ولو طلع حاجة من اللي في بالي هتبقي سواد علي الكل
ـــــــــــــــــــــــــــــــــــــــــــــ
قعد مراد وهو بيشرب ميه ووشه عليه دم وقميصه الأبيض اللي بقي احمر من كتر الدم اللي عليه ...
مراد بيضحك : يعني صافي هي اللي بعتاكم.
حلو الكلام ده
وقف بغضب : هي اللي قضت علي نفسها بـ نفسها
قام يمشي فواحد من رجالته القدام مسك رجليه :
سامحني يا مراد باشا اديني الأمان
ضحك بنص وشه ببرود : اطلبه من شمس هانم اللي مشغلاك !
سابه ومشي والرجالة الجديدة بتخلص عليهم واحد واحد وصوت صراخهم وطلقات النار يرعب..
طلع بره المخزن الباب اتوارب واتقفل وراه واحد من رجالته واقف ليه بقميص وازازة ماية
غسل ايديه والماية بتنزل حمرا مختلطة بالدم وقلع قميصه فبان جسمه الرياضي اللي بيلمع في ضوء الشمس لبس قميصه ومشي.
دخل القصر طلع علي فوق سمع صوت ضحك صبا ..
خطواته بقت سريعة راح علي اوضة مُسلم وهو متعصب دخل لقي صبا قاعدة قصاده ..
صبا شافت مراد ابتسمت: مراد انت كنت فين !
مراد ابتسم : موجود !
صبا : تخيل مُسلم عاوز يمشي بس انا قولت له إنك مستحيل توافق الا أما نطمن عليه صح !
مراد بيضحك بنص وشه وهو حاسس انه هيتشل وقال بصوت متقطع : ص... صح!
صبا ضحكت وبصت لـ مُسلم: شوفت مش قولتلك!
رفع شعره لفوق ...وهرش في دقنه واتحرك خطوات لبره. ...
صبا : رايح فين !
مراد اتنهد : الجو حر ..مش طايق نفسي
مشي وسابها وهي مستغربة طريقته الجامدة معاها لأول مرة !
صبا بشرود وهي بتبُص علي الباب : هو انا ضايقته في حاجة ؟
مُسلم قاطع شرودها : تحبي أقولك اغرب مرة اتضربت من ابويا عشانها ايه؟
ضحكت صبا : قول يا مُسلم ده انت رهيب !
ــــــــــــــــــــــــــــــــــــــــــ
وفي الليل ..
كان مراد قاعد علي المرجيحة في الجنينة مشغل الكاسيت ..
طول عمرى بخاف
مـ الحب وسيرة الحب
وظلم الحب لكل أصحابه
وأعرف حكايات مليانة آهات .
ودموع وأنين..
اتنهد وهو بيكرر الكلام ما الأغنية :
والعاشقين دابوا . ما تابوا
دابوا . ما تابوا
طول عمري بقول
لا أنا قد الشوق وليالي الشوق .
ولا قلبي قد عذابه ... عذابه...
قعدت صبا جمبه فجأة فبص لها والأغنية شغاله :
وقابلتك انت لقيتك بتغير كل حياتي
ماعرفش ازاي أنا حبيتك ماعرفش ازاي يا حياتي
مراد كان ساكت وهو بيبُص لها ...قفل الكاسيت وبص قدامه .
صبا بابتسامة : الناس الرايقة اللي بتحب ام كلثوم ..
مراد وهو باصص قدامه : اه !
صبا بصت له باهتمام : هو انا ضايقتك في حاجة ؟
مراد بص لها نظرة طويلة : هو انا أمري يهمك ؟
صبا باستغراب : ايه السؤال الغريب ده ؟
مراد بص لها وكرر السؤال : هو انا أمري يهمك زي مُسلم !
بصت له باستغراب ثواني وضحكت وكأنها اخيرا استوعبت : اه عشان كده ..
انت غيران من مُسلم!
وقف : مُسلم مين ده اللي اغير منه .
ضحكت صبا وقامت شدته قعد جنبها :
اهدي بس كده استهدي بالله !
مراد بص لها واتنهد : أنا بمر بأيام صعبة علي قلبي ..
سكت ثواني وقال وهو بيبُص قدامه :
اول مرة في حياتي اكون متضايق كده ومش عارف أنفس عن غضبي .
رفع شعره لفوق وكمل :وده ضد طبيعتي
بص لها في عينيها :
لو مافيش امل عرفيني ..بلاش اتعلق في احبال هوي دايبة
صبا فركت أيدها بتوتر وبصت قدامها و......يتبع
ولسه اللي جاي تقيل مع كاتبة الجيل 😎
البارت أنا ذات نفسيتي حبيته 😂
•تابع الفصل التالي "حكاية صبا" اضغط على اسم الرواية