رواية على حافة الهاوية الفصل التاسع 9 - بقلم ولاء عمر
ــ من الاسبوع الجاي وأنتِ هتروحي كليتك يا بت ولدي.
بصيت ليه بإستفهام:
ــ وهو أنا لحقت يا جدو؟!
ــ مستقبلك أهم من أي حاجة، وحكاية النقل دي متشيليش همها.
ــ شكراً يا جدو، يارب ما أكون بتعب حضرتك معايا.
ابتسم ليا وهو بيشمر كُم الجلابية بتاعته وبيقعد علشان يأكل:
ــ مستقبلك وبعدها نبقى نفكر في أي حاجة تاني، وكمان متشليش هم مرواحك الجامعة، هنا بت عمتك هتبقى تروج وتيجي أنتِ وهي، يلا إطلعي ريحي وبكرا بقى يحلها ربنا.
طلعت وأنا بالرغم من إرهاقي إلا إن ابتسامتي كانت من الودن للودن، جدو، حمد و تيتا وأنا معاهم حاسة إني بني آدمة مهمة وسطهم.
دخلت الأوضة، اثاثها وفرشها مازال محتفظ ببساطته ورونقه، والدولاب اللي مازال محتفظ بلونه، وبساطة ورقة المفارش اللي فيه، كل حاجة في البيت عموماً كفيلة إنها تدخل الواحد في جو الراحة.
لبست بيجامتي ونمت، بالرغم من إنه مش زي السرير اللي في بيتنا وأبسط منه إلا إني حسيت إني مرتاحة نفسياً وأنا نايمة عليه.
صحيت كان نور الصبح لسة بسيط، اتوضيت وصليت وقرأت حبة من المصحف وبعدها وقفت أبص من الشباك على المنظر حبة وأشوف الشروق، أصلاً منظر فروع الشجرة اللي فوق الشباك والزرع اللي ظاهر من الشباك كفيل إنه يبقى free therapy .
سمعت صوت خبط على الباب فروحت وفتحته، لقيت تيتا جاية ومعاها صينية عليها شاي بلبن وفايش.
ــ صباح الخير، جيت قولت نفطر مع بعض لو صاحية،ولو نايمة كنت هسيبك براحتك.
ــ لاء أنا كنت صاحية من شوية صليت ووقفت أبص من الشباك حبة.
ــ طيب إقعدي نفطر مع بعض.
ــ من عيني.
قعدنا نفطر مع بعض والحقيقة إن دا أحلى شاي بلبن شربته في حياتي، تدرون ليش ؟! لأنه من إيدين تيتا، وكمان قعدت تتكلم معايا وتهزر وتحكي لي عن أيام زمان لما كنت قاعدة هنا.
قضيت معاها اليوم وكمان وقفت معاها في المطبخ حبة، شكلي كدا هتعلم الطبخ من إيدها..
ــ المهم تعالي نعمل العشا علشان يوسف جاي يتعشى مع جدك وحمد .
ــ مين يوسف؟
ــ دا يا ستي اللي بيساعد جدك في الأرض بتاعته، جدك بيقول إنه مهندس زراعي يعني وبما إن جدك تاجر وبيزرع كميات ماشاءالله فبيبقى محتاج اللي يأخد باله لو الزرع تعبان ولا محتاج كيماوي وكدا، يعني يوسف هو اللي بيشرف على اللي شغالين في الأرض وكمان بيأخد باله منها في غياب جدك وبيساعده فيها، غير كدا هو صاحب حمد أخوكي الروح بالروح.
ــ عرفت من حمد شوية يعني إن عنده هنا صاحب اسمه يوسف بس مكنتش أعرف إن هو اللي بيعمل كل دا.
ــ راجل جدع وشهم الصراحة، ويدخل القلب، يلا ربنا يرزقه هو وحمد ببنات الحلال.
ــ عندي سؤال يا تيتا، أصل أعرف إن هنا كله بيبقى قريب بعضه، يعني كدا يوسف دا يقرب لنا؟
ضحكت على سؤالي وهزت رأسها وقالت:
ــ أمه تبقى بنت عم أبوكي.
ياريتني ما سألت، أنا حاسة دماغي لفت، غمضت عيني لثواني أفهم وبعدها فتحتها وأنا بقول:
ــ الحمد لله، الحمد لله كمان مرة يعني مفهمتش حاجة.
ــ إعرفي إن في صلة قرابة وبس أحسن لك.
حطينا لهم العشا أنا وتيتا، أولك ليش جدي مُصر نقعد نأكل معاهم أنا وتيتا، أنا كنت راسمة في دماغي إننا هنقعد نأكل جوا مش كدا، بالفعل قعدنا بس بسم الله ارقيني مرفعتش عيني من طبقي، ولا عرفت ألمحه، لحدما خلصت وقومت دخلت المطبخ.
عملت لهم الشاي وطلعته خده حمد وأنا دخلت مع تيتا المطبخ وغسلت معاها المواعين .
ــ تعرفي يا جنات إنك واخدة بحسي.
ــ إزاي يا تيتا؟
ــ قولي ستي بس، بلا تيتا بلا بتاع.
ضحكتك على جملتها وبعدها هي كملت :
ــ يعني عمامك كل واحد ملهي في شغله، وعمتك ملهية مع بيتها وعيالها، وكل واحد فيهم بييجي كل فين وفين.
قضيت معاها السهرة وبعدها طلعت الأوضة، طفيت النور وفتحت الشباك، خدت كام يوم على نفس الروتين.
يوم الجمعة، قبل صلاة الظهر جات هنا بنت عمتي، طلعت الحقيقة حد مرح وحبوب وخدتني معاها طلعنا برا إتمشينا وسط الزرع والغيطان.
قعدت هنا تتكلم معايا وتعرفني على البلد وعن قصص غربية ومضحكة حصلت فيها، وكمان عرفت إنها في نفس كليتي يعني الحمد لله مش هروح وحدي.
شوفت يوسف كان قاعد هو وحمد على الدكة قدام الباب، ساعتها كملت مشي مع هنا وأنا بفكر، هو ممكن يوسف دا يطلع نفسه يوسف صاحب البودكاست؟! بس لاء، لاء ما أعتقدش، مش عارفه، يووه، ما لو صاحب البودكاست كان بينزل صورة واضحة كنت عرفت هو ولا مش هو، بس الصوت مشابه بس برضو مش قوي، بس برضوا مش عارفه أحدد.
ــ هو حمد عامل إيه يا جنات؟
إبتسمت إبتسامة جانبية وأنا بقولها:
ــ كويس، يعني بتسألي؟
ــ هاه، لاء أبداً، أصلي كنت عرفت من ستي من فترة إنه كان متعور.
ــ فعلاً، ألا قوليلي يا هنا، هو الجدع اللي اسمه يوسف دا،مشهور؟
ــ مشهور إزاي يعني؟
ــ يعني على السوشيال ميديا وكدا.
- لاء عادي ما أعتقدش.
سكتت بخيبة أمل، ساعتها هي قالت بحماس:
ــ أنا كنت بتابعك لما كنتي بلوجر.
ــ بتفكريني ليه بس، الحمد لله ياعم الواحد نضج ومبقاش حابب الموضوع.
ــ تعرفي لما جيت أحط في وشي زيك حمد زعق لي! أصلا أنا كنت بايتة مع ستي وروحت حطيت بقى راح بعد يزعق، روحت قولت له إيه هو أنت مخلفني وناسيني وقعدنا نتخانق.
ــ يا ستي الحمد لله إنك معملتيش زيّ علشان ما اشيلش ذنبك.
ــ لاء إحكي لي.
اتنهدت وأنا باصة قدامي وعيني على الطريق والزرع ودماغي مع اللي فات:
ــ من وأنا صغيرة، لما ماما وبابا مكانوش مهتمين بيا ولا بوجودي، وبينسوا وجودي معاهم بالأيام، أنا فاكرة إني بعد ما سافرت معاهم من هنا هما جابولي مربيين، بعدها بدأت أكبر وأنا لوحدي، مش متشافة ولا حد حاسس بوجودي، ولا حتى حد يعرفني، لحد ما دخلت الجامعة، بدأت السوشيال ميديا بقى تأخد وقتي كله، اتعرفت على نهلة، قررنا نعمل فيديوهات كدا بالحظ بعدها لقينا الموضوع عجبنا، كل فيديو مشاهداته بتزيد عن اللي قبله، اتعرفنا ساعتها على شيرين كانت بنت بسيطة بتعمل فيديوهات زيينا وبقينا شلة، اتعرفنا بعدها على أصحاب لينا شباب، بدأت بقى شهرتنا تزيد ونتعرف ونخروج ونروح ونيجي مع بعض، لحد ما في مرة سافرنا، و وإحنا راجعين العربية عملت حادثة مات فيها الشباب وأنا والبنات طلعنا بكسور بقى.
بصت ليا بصدمة:
ــ يلهوي، وبعدين.
ساعتها كملت وأنا قاصدة أتغاضى عن موضوع شهاب، محبتش أفضح نفسي.
ــ ولا قبلين، أنا ساعتها بعدما حصلت مشكلة معاهم نهلة وشيرين مشيليني الذنب مع إن دا كان قضاء وقدر، حتى أنا جات عليا فترة حاسة بالذنب، المهم بعدها هما عادوني وكرهوني، وأنا بعدت، وربنا وقع في طريقي سهيلة غيرت فيا شوية، بعدها بقى بعدنا وحبة انتكاسة بعدها سمعت بودكاست عرفته من صفحة حمد ودا اللي كان السبب في تغييري، وطبعاً حمد كان ليه دور كبير فى تغييري .
ــ حلو البودكاست دا على كدا؟
ــ آه جداً، حتى حمد قالي إن صاحب البودكاست دا صاحبه وقريب منه وكمان البودكاست دا معروف.
اسمه إيه ؟
ــ يوسف الضبيحاوي.
ــ ودا ملفتش انتباهك لحاجة؟!!
ــ إن يوسف صاحب حمد واللي شغال مع جدك اسمه يوسف الضبيحاوي؟
بصيت ليها وأنا مصدومة وبحاول أستوعب كلامها:
ــ بس لحظة، يوسف دا صوته يبان مألوف ليا، بس حساه مختلف ، بس هو مقارب ليه!
كانت هتصوت مني فقالت بنفاذ صبر:
ــ وضحي.
ــ يعني.. يعني يوسف صاحب البودكاست لهجته عادي زي أهل المدن، مش صعيدية.
ــ جنات، هاتي البودكاست دا.
فعلاً سمعت كلامها وجبته، سمعت منه دقيقة وبعدها بصت لي:
ــ صباح الفل بجد يا جنات، دا نفس الشخص، بس اللهجة مغيرة الصوت حاجة بسيطة، علشان اللهجة بتغير نبرة الصوت أصلاً.
ــ هنا، حاسة إن شكلي كلاون.
ــ قوي الصراحة .
ــ ليه، ليه بتصارحيني ليه؟!!
يا أني عليا، يعني أنا كنت معجبة بصاحب الصوت، وشخصيته، وفي الأسبوع دا أعجبت بيوسف وشكله ومن كلام تيتا عنه، يطلع نفس الشخص، كسفة والله.
ــ تعالي نروح، ستي بترن.
ــ ماشي .
مشينا على البيت، كان الليل بدأ يليل، والغروب بين الزرع والغيطان يخبل، روحنا وقعدنا مع ستي، والحقيقة إن القعدة معاهم ممتعة.
عدا أسبوعين هنا كانت بتروح وتيجي معايا فيهم، أول مرة يبقى معايا صاحبة بجد من بعد سهيلة وما احسش إني وحدي، أول مرة مأحدسش إني يتيمة بالرغم من وجود ماما وبابا بوجود تيتا وجدو.
جدو مطلعش قاسي وشديد زي ما كنت مفكرة، جدو طلع شايل جواه حنية الدنيا بس بيظهرها في وقتها المناسب، ويوسف، الحقيقة إن جمعني بيه مواقف وأنا بناوله الشاي.
ــ خدي طلعي الشاي لجدك ويوسف يا جنات.
ــ حاضر يا ستي.
خدت منها الصينية وطلعت بيها لحد عتبة باب البيت، ساعتها قام يوسف يأخدها مني، وقتها أنا قولت له وأنا متوترة:
ــ هو أنا حابة أشكرك.. الصراحة يعني على إنك سبب في كل اللي أنا فيه دا.
بص ليا باستفهام فكملت كلامي بتوتر:
ــ يعني على البودكاست اللي غيرني 180 درجة، وعلى أفكاره وأفكار الحلقات، و... وعلى طريقة كلامك الهادية اللي مخلتنيش أنفر وأخاف.. شكراً.
بص ليا وبعدها مسك مني الصينية وهو بيقول:
ــ الحقيقة إن مش أنا لوحدي صاحب البودكاست، حمد ليه مجهود كبير في الموضوع دا.
جدي ساعتها نادي عليه، فهو بص ليا وفي عينه لمعة وبعدها قالي بطريقة تحمل معاها كل معاني الذوق وهو خافض نظره:
ــ أستأذنك أنا علشان جدي بينادم عليا، ممكن تخلي حمد يبقى يوضحلك لما ييجي.
دخلت وأنا قلبي بيدق بسرعة، طريقة كلامه... هادية قوي، نبرة صوته باللهجة الصعيدي على عكس البودكاست وطريقته جذبتني، الحقيقة إنها في كلتا الحالتين جاذباني.
رجع حمد بالليل، ستي وجدي كانوا ناموا، عملت له يأكل وجبت الشاي وقعدت جنبه.
بص ليا وهو بيأكل:
ــ حاسس إنك عايزة تقولي حاجة..
فركت إيديا الاتنين في بعض وأنا بقوله:
ــ أنتو صحاب البودكاست ؟
خد حبة من كوباية الشاي وهو بيسأل بعدها:
ــ إحنا مين؟
بحلقت ليه وأنا بقوله:
ــ حمد بلاش إستعباط.
ــ حاضر يا ستي.
خد حبة من كوباية الشاي وانسجم، مش مستوعب باينه إنها كوباية شاي مش أكتر! ما علينا..
كمل كلامه:
ــ من سنتين ونص وفي سهرة كدا مع يوسف، قولته إننا ممكن نستفيد من معلوماته وطريقة كلامه الهادية ونعمل بودكاست زي الناس اللي هناك.
ــ هاه وبعدين؟
ــ ولا قبلين، أنا أحدد فكرة الحلقة، ونجمع معلومات إحنا الاتنين من الكتب عند جدك بما إن ما شاءالله عنده مكتبة جوة على شوية معلومات معانا وبحث، وبعدها البودكاست اتشهر بطريقة مكناش متوقعينها.
ــ طيب ولية باسم يوسف بس واسم مش مذكور؟
ــ عادي أنا كدا كدا مبحبش جو السوشيال ميديا.
ــ طيب ومعرفتنيش ليه من الأول!
ــ علشان محدش كان يعرف هنا أصلاً بموضوع البودكاست، وكنا بنسجله عند يوسف في أوضته.
ــ يلا تصبحي على خير.
ــ وأنت من أهل الهنا.
قولتها بإبتسامة لعوب الصراحة فبص ليا:
ــ إتملي هاه!
ــ تتهنوا ببعض يا عم، عقبالي أنا بس.
ــ نينيني، في حد يعرفك أصلا ؟
ــ أنا بشتغل بروجر، أنت إيش دراك أنت في شهرتي؟
ــ واضح إنك لقطتي اللهجة يا بت أبوي.
ــ أيوا يا واد أبوي.
ضحك بعدها على كلامي ودخل نام، وأنا طلعت أنا كمان أنام، لكن عقلي عمال يعيد ويزيد في شكل يوسف، ملامحه، طريقة كلامه، نبرة صوته، أحم طريقة لبسه، بيرفكت الصراحة، لايق له الجلاليب الصعيدي قوي.
بعد تلات أيام، كنا واقفين أنا وهنا في الموقف مستنين أي مواصلة، ولكن الحقيقة وكإن مواصلات البلد كلها خلصت في الوقت دا.
في عز ما إحنا واقفين في الحر سمعت صوت عربية بتزمر جنبنا، عدلت وشي لقيته يوسف.
-إركبوا
ــ ليه؟ بتاع إيه ؟
ــ جدك هو اللي قالي وأنا مالي بقى، كمان عرفت إن عندكم امتحان، جايين ولا أشوف مصالحي؟
ــ لاء، لاء بجد!! بقى هو دا اللي كنت منبهرة بهدوءه، بصي بيكلمني إزاي ؟!!
شدتني هنا وهي بتقرب من العربية وبتفتح الباب اللي ورا، وبتتكلم من تحت ضرسها:
ــ شكراً يا يوسف، معلش هي جنات مستغربة بس.
مالت عليا وإتكلمت بصوت واطي:- إتهدي، وراعي إننا ورانا امتحان، وبعدين جدك اللي باعته خلاص بقى .
سكتت علشان ما اتحطش في موقف محرج أكتر من كدا.
شغل العربية ومشي بينا.
ــ تحبوا تشربوا عصير إيه؟ علشان أنا نازل أجيب ليا، فهجيب لكم معايا.
ــ شكراً.
ــ العفو يا أستاذة جنات، هجيب تلاتة قصب.
ديموقراطية يوسف تحفه بجد، دا حتى مامشيش غير أما خد رأينا نشرب إيه.
جابه ووصلنا، نزلنا وساعتها أنا كنت معدية من جنب العربية، قال هو بصوت هادي:
ــ حلي على مهلك، دا امتحان مش نهاية العالم عرفت من حمد إنك وأنتِ صغيرة كنتي بتخافي من الإمتحانات.
•تابع الفصل التالي "رواية على حافة الهاوية " اضغط على اسم الرواية