رواية خاطف مجهول الفصل الرابع 4 - بقلم تقى مصطفى
_هو ممكن سؤال.
هزلي راسة بمعنى "ممكن" فكملت
_هو احنا بنعمل ايه في البيت المهجور دة؟
_ما هو ده الغريب ان جالنا اتصال دلوقتي ان في حالة خطف حصلت هنا لما كلمتك والساعة وقتها كانت١٢.
اتصدمت ورديت تحت تأثير الصدمه بصوت عالي
_نعممم!!
_ايه يا يمنى انتي كويسة؟
_وانا هبقى كويسة ازاي بأخبارك اللي هتجيب اجلي دي بس؟!
مسحت وشي بإيدي بضيق وانا بستغفر في سري و بعدين قولت فجأة
_يونس هي الساعه كام معلش؟
بص في ساعة موبايله ورد عليا باستغراب
_١٢ونص ليه؟
_طب اللواء مجاش ليه مش هو لازم يبقى عارف كل حاجه عن القضية برضو؟!
ضرب على راسه
_اه صح نسيت هكلمه.
راح يكلمه وانا روحت اشوف البيت دة ايه حكايته
في الأول طبعا رفضو بس بعدين سمحولي اعدي لما عرفو اني الظابط المسئول.
دخلت البيت كان فيه كهرباء غير الحلم بتاعي كان
ضلمة خالص لحد ما لقيت أوضة زي اللي انا كنت
نايمة فيها في الحلم و لسه هفتح الباب عشان
ادخل سمعت صوت يونس
_يمنى انتي بتعملي ايه يلا هنمشي طلع العنوان غلط.
لعنته في سري الصراحه وروحت له بعصبية
_ايه يا يونس حبك يعني تيجي دلوقتي؟!
_ليه انتي بتعملي ايه اصلا؟
_يلا يا يونس يلا عشان انا كدة هتشل وانا مش ناقصة.
وسيبته ومشيت طلعت لقيت اللواء فعلا واقف برة وشكله باين عليه العصبية الشديدة
بلعت ريقي بخوف من منظره و يونس طلع ورايا وروحنا للواء سوا
_خير يا حضرات،انتو مش عارفين العناوين اللي بتاخدوها ولا ايه؟
حاولت ادافع عن شكلنا قدام الظباط التانيين
_بس يا حضرت اللواء......
قاطعني وقال بعصبية
_بلا حضرت اللواء بلا حضرت الزفت بقى مش عارفين انتو بتعملو ايه؟كان فين عقلكم وانتو جايين لبيت مهجور في حالة خطف؟
نزلنا راسنا للأرض وانا ببص ل يونس بتوعد لإن هو اللي قالي نيجي وقبل ما افتح بوقي
_يلا يا حضرت اللواء عشان نتحرك للعنوان الصح.
دة كان صوت الظابط احمد زميلنا من بعيد
اتحركنا و يونس ركب معايا نظرا لإن هو مش معاه عربية و فضل الصمت هو المسيطر لحد ما قطعه هو
_يمنى؟
مردتش عليه و ركزت في الطريق وانا بضغط على الدريكسيون عشان اكتم غيظي
راح قال تاني
_يمنى خلاص، بس والله العظيم دة العنوان اللي اتقالي في الفون.
_مين اللي هيكلمك الساعة ١٢ بليل يا يونس عشان يقولك على عملية خطف في بيت مهجور فهمني؟!
_معرفش بس هو العنوان اتقالي كدة.
روحنا على العنوان التاني اللي المفروض انه صح و ياريتنا ما روحنا.
روحنا و خبطنا على الباب مرة، التانية،التالتة محدش بيفتح.
طب يا جماعة نستنى دقيقة،التانية،التالتة محدش بيرد فا كل واحد روح بيته وطبعا مسلمناش من تهزيق اللواء بسبب بوز الأخص"يونس" .
روحت نمت علطول وانا حاسة اني ضغطي على' من كم التهزيق اللي اخدته من اللواء
_____________________________
رجعت على السرير تاني وانا بردد الأرقام دي و بفكر في دماغي
_166 يا ترى ايه معناه وليه مكتوب بالد.م كدة بدل اي قلم عادي؟
سمعت صوت تكسير قوي جاي من برة فا قومت وقفت جنب السرير بسرعة
فجأة الباب اتفتح و دخلت منه البنت دي بس على
نسخة ارعب شوية و جت قعدت على السرير قدامي و اتكلمت من غير ما تبصلي
_ايه رأيك تقريلي حدوتة مرعبة ولا تطبخي لي اكله؟
اترددت ورديت بصوت مهزوز
_هقرألك حدوته مرعبة.
بصتلي في عيني
_بس لو معجبتنيش...
بلعت ريقي بخوف في انتظار انها تكمل
_هيبقى قدامك فرصة تانية كمان عشان تنقذي حياتك.
بعدين بصت على صينية الاكل الغريب اللي هي جايباه
_مأكلتيش ليه شكل الاكل مش عجبك؟
بلعت ريقي بخوف من منظرها ومردتش ف كملت
_طيب براحتك انتي اللي هتتعبي.
بصتلي تاني بعد ما كانت بصه على الحيطة الغريبة اللي في الوش
_جاهزة نبدأ دلوقتي ولا لأ؟
هزيت راسي بسرعة
_لا لا جاهزة.
قامت وقفت
_طيب يلا تعالي ورايا.
ومشت كام خطوة قدام لما لقتني مروحتش وراها رجعت شدتني من أيدي وطلعنا من الأوضة.
روحنا أوضة غريبة اكتر في الدور التالت لإن اللي اكتشفته ان الأوضة بتاعتي اللي كنت فيها كا نت في الدور الأول.
ولإن طبعا الدنيا ضلمة فا مشوفتش البيت الكبير دة
بالتفصيل بس لقيت تماثيل كتير للبنت دي و
تماثيل تانية لحد بنية جسمه ضخمة وليه قرون كبيرة.
روحنا أوضة كبيرة البوابة كانت ضخمة جدا و كان عليها شكل شيطان صغير.
دخلنا كانت الحيطان لونها اسود في رمادي غامق وفي في النص سرير كبير و عليه نايم هيكل عظمي لطفل صغير و على اليمين في مكتب خشبي باللون الاسود و عليه جثة لشخص كبير زينا مش جثة طفل.
قعدنا على السرير المرعب دة والبنت نامت واتغطت باللحاف كويس و طلعت كتاب من تحت اللحاف بتاعها الغلاف بتاعه كان عليه جثث كتير بس لفتني العنوان كان اسمه "الجثة الجميلة "
_يلا اقرأي سمعاكي.
فتحت الكتاب ولسة هقرأ اول سطر اتنفضت لما لقيت الجثة اللي على المكتب قامت قعدت على المكتب ودلدلت رجليها من عليه و مفتحة عينها باهتمام وحماس عشان تسمعني.
_يلا قولي عشان انام.
فوقت على صوت البنت من سرحاني حاولت اتجاهل الجثة اللي بتبصلي دي وركزت نظري على الكتاب
______________________________
ويليام أندرياس
16سبتمبر2009
الموضوع بدأ لما كنت بدور على شغل عشان اعمل العملية الجراحية لأخويا الوحيد و مكنتش لاقي خالص الدكتور قالي ان لو مجبتش الفلوس خلال الأسبوعين دول اخويا هيموت و للأسف مش هنلحقه
ساعتها كنت بدور على اي شغل زي المجنون و في يوم كنت قاعد مع اخويا كالعادة لقيته بيقولي
_ويلي انا عايز اشوف بنت جميلة زي خطيبتي اللي ماتت قبل ما اموت انا كمان.
_عايز واحدة تقعد معاك شوية يعني؟
_لا عايزها ميتة عشان اشوف هي احلى و لا خطيبتي لما ماتت.
استغربت من كلامه بس بما انه عايز كدة واحنا عايشين لوحدنا فا ممكن ليه لأ.
فتحت اكونت فيك و نزلت اعلان اني عايز بنت تهتم بأخويا العيان عشان انا مش فاضي اقعد معاه"كذب طبعا"
بعدها بيوم في بنت بعتت لي انها عايزة تيجي قولت لها انها هتدفع مبلغ في الأول عشان اضمنها انها متضرش اخويا بعت لها العنوان وجت بعدها بساعتين اخدت منها الفلوس و سبتها مع اخويا ودخلت جبت لها عصير.
وطلعت اديهولها شربته كله معداش خمس دقايق و كانت طلعت في الروح من مفعول السم.
و هكذا بقى جثة جرت وراها جثة جرت وراها جثة واخويا كانت صحته بتتحسن كل ما يشوف جثة جديدة قدامه.
_____________________________
قعدت اقرألها و انا أيدي بترتعش من الرعب لحد ما نامت لحد ما وصلت ل صفحة 166 حسيت البيت اتهز هزة قوية و كان في تكسير جامد برة وهي صحت على الهزة حركت عيني على الجثة اللي على المكتب كانت نامت تاني مكانها
و فجأة قامت بصتلي بصة مرعبة و عينها احمرت وحسيت بضربة قوية على راسي اخر حاجه حسيت بيها كان الدم اللي نازل على راسي و فقدت الوعي بس قبل ما افقد الوعي سمعت آخر جملة منها
_غبية ايه اللي خلاها تقرأ صفحة 166!!!
•تابع الفصل التالي "رواية خاطف مجهول" اضغط على اسم الرواية