رواية عقدة الانتقام الفصل الثالث 3 - بقلم مصطفى جابر

هبيع نور ل عصابة من بتوع الأعضاء وهاخد من وراها ملايين تخليني مش محتاج لحد طول عمري

شريف بذهول: تبيع نور إنت بتهزر يا عصام دي مراتك

عصام بضحكة شيطانية: مراتي في الورق بس يا شريف انا هاخدها ونسافرو اي محافظة وبعد ما العصابة تخلص عليها وياخدو اللي عايزينو منها وأخلص الصفقة هرجع لوحدي وأنا بعيط ومصدوم وأقول للناس إنها هربت مع ثري خليجي أو تاهت مني وأبوظ سمعتها في الأرض عشان محدش يدور ورايا والكل يصدق إنها خانتني وسابتني

شريف بخبث: دماغك سم يا عصام بس دي مخاطرة كبيرة لو حد كشفك هتروح ورا الشمس

عصام بجمود: محدش هيكشفني أنا هرتب كل حاجة نور طيبة وهتصدق أي كلمة هقولها 

_ هتبيعني يا عصام ؟ عايز تبيعني لتجار اعضاء عشان الفلوس إنت إيه يا أخي... إنت مش بني آدم إنت شيطان

عصام بغيظ: إنتي بتتصنتي عليا يا روح أمك أيوة هبيعك وهبيع اللي يتشددلك  

نور بغل وقهر: يا واطي يا ندل أنا اللي وقفت جنبك وصدقت كذبك والله لأفضحك والله لألم عليك أهلي وأبوك دلوقت يا تاجر النسوان

نور لسه بتجري ناحية الباب عصام هجم عليها مسكها من شعرها ورزعها في الحيطة بقوة

نور بصراخ ووجع: آآآه سيبني يا مجرم يا ناس الحقوني

عصام نزل فيها ضرب بالكفوف: اصرخي براحتك الحيطان دي عازلة للصوت وأنا منبه على الكل محدش يخبط علينا والشقة دي هتبقى سجنك لحد ما تعفني وتوافقي على كل كلمة أقولها

نور وهي منهارة في الأرض وبتحاول تحمي وشها: حرام عليك أنا عملتلك إيه أنا حبيتك وصنتك

عصام بغل: حبك ده حطيه في الزبالة أنا محبتش غير ريهام وإنتي كنتي مجرد مصلحة وكنتي هتيجي بفايدة بس دلوقت هربيكي عشان تعرفي إزاي تتصنتي عليا

نور زقته وهتقوم تجري مسك الفازة ضربها علي دماغها فقدت واعيها

عصام بقرف: إنتي اللي جبتيه لنفسك يا نور 

بليل نور فتحت عينيها بصعوبة لاقت نفسها مربوطه و عصام قدامها وجنبه بنت لابسه هدوم نور

نور بصدمة والم: إيه مين دي ومين سمح لها تلبس هدومي وتقعد في بيتي فكني يا عصام فكني بدل ما أقسم بالله هبحسك

عصام بخبث: اهدي بس يا عروسة أحب أقدم لك ريهام حبيبتي ومراتي وصاحبة العفش اللي إنتي كنتي قاعدة عليه ومفكرة إنه بتاعي

ريهام بخبث ودلع: أهلاً يا نونو نورتي بيتك يا حبيبتي معلش بقى الهدوم طلعت واسعة عليا شوية ذوقك بلدي قوي يا نور بس مش مشكلة عصومي هيعوضني بماركات من بره لما يقبض تمنك

نور بقهر ودموع: يا رخيصة يا خطافة الرجالة وإنت يا عصام إنت وصل بيك الرخص إنك تجيب عشيقتك في أوضة نومي وتوريني خيانتك وإنا متكتفة إنت إيه مفيش في قلبك ذرة رحمة

عصام بخبث: رحمة؟  الرحمة دي للضعفاء اللي زيك ريهام دي اللي كانت بتخطط معايا لكل خطوة إنتي كنتي مجرد بنك وبنسحب منه رصيد 

ريهام بخبث: بقولك إيه ما تخلصنا منها دلوقت وتشوف موضوع العصابة دول هياخدوها ازاي

عصام ببرود: لا لا مش دلوقتي بصي يا نور إنتي هنا هتفضلي زي الكلبة لا أكل ولا شرب لحد ما ارتب كل حاجه معا العصابة واخليكي توقعي على ورق تنازل عن كل حاجة . 

نور بانهيار: يا مجرمين يا كفرة سيبوني يا بابا الحقني يا بابا

ريهام قربت منها بخبث: باباكي دلوقت فاكر إنك في حضن جوزك وبتقضوا أحلى أيام حياتكم اصرخي براحتك بقي... يلا يا عصومي أنا جوعت خلينا نخرج نتغدا بره ونسيبها تستوي في نارها شوية

خدها وكان هيخرج ابتسم ورجع بخبث

نور بصوت مرعش: عاوز إيه تاني مش كفاية اللي عملته سيبني في حالي بقى

عصام ببرود: لا ده إحنا لسه بنبدأ دلوقت هننفذ الفصل الأول من الخطة هكلم حمايا العزيز وأبلغه إن بنته المصونة هربت بعد ما سمعتها بتكلم عشيقها في التليفون 

نور بصرخة: يا كداب يا واطي أبويا عمره ما هيصدقك أبويا عارف تربيتي

عصام وهو بيكتم بوقها: إخرسي خالص مش عاوز أسمع صوتك

طلع تليفونه واتصل علي حماه

عصام بصوت مخنوق وبيمثل العياط: ألو يا عمي سليم إلحقني يا عمي مصيبة حلت على راسي وراسك بسبب بنتك المصونه

سليم بفزع: عصام في إيه بنتي مالها جرى لها إيه أنطق

عصام بدموع : بنتك الخاينة انا سمعتها بتكلم راجل في التليفون ولما سألتها مين ده اتوترت وقالت حد قريبها وكان بيبارك ليها ولما عطتها ضهري ضربتني ومحستش بنفسي غير دلوقتي..صحيت ودخلت ادور عليها ملقتهاش وفتحت دولابي لقيتها فاتحة خزنتي وسرقت فلوسي والدهب اللي انا جايبهولها 

سليم بصدمة: إنت بتقول إيه يا ناقص نور تهرب نور تسرق إنت أكيد اتجننت بنتي أشرف منك ومن عيلتك كلها إنت عملت فيها إيه يا مجرم

عصام بتمثيل: أنا اللي مجرم أنا اللي كنت هفرش لها الأرض دهب أنا كنت في حلم جميل وصحيت على كابوس يا عمي وانا متأكد إن كان فيه حد مستنيها تحت ومرتبين كل حاجه معا بعض ولو انت مخلتهاش ترجعلي انا هتصل بالشرطة وهما يتصرفو معاها

سليم بزعيق: إقفل يا كلب أنا جاي لك حالاً ولو لمحت شعرة من بنتي ممسوسة بضرر والله لكون قتلك بدم بارد إقفل أنا ثواني وهكون عندك بالبوليس

عصام قفل السكة ببرود

عصام بضحكة: سمعتي أبوكي جاي بالبوليس وأنا محضر له مسرحية الهروب كاملة الشنط مفتوحة والهدوم مرمية والفلوس مختفية إنتي دلوقت حرامية وهربانة في نظر الكل وأنا الضحية الغلبان

نور بدأت تتحرك بعنف وهي متكتفة بتحاول تصرخ من ورا الطرحة كداب كداب بس صوتها كان طالع مكتوم ومخنوق انهارت في مكانها وهي بتشوف حياتها بتتدمر بدم بارد

ريهام بصدمه.: انت مجنون أبوها زمانه جاي والبوليس معاه هتخفي البت دي فين لو لقوها هنا هتروح في داهية وانا معاك

عصام بأبتسامة: متقلقيش هنسحبها من باب المطبخ اللي بيفتح على السلم الخلفي عربيتي مركونة هناك هتاخديها عندك شقتك يا ريهام وتترمي في المخزن اللي فوق السطوح مفيش مخلوق يعرف عنه حاجة

ريهام بخبث: عندي فكرة حلوه بردو أنا هتفق مع اتنين من الصيع اللي في منطقتي هياخدوا قرشين ويشهدوا قدام أبوها والبوليس إنهم شافوا بنت بملامحها نازلة من الشقه جري وراكبة عربية مع واحد وكده كده مفيش كاميرات مراقبة يراجعوها وبكدة يكون الموضوع بعيد عننا وابوها يبقي يدور عليها بقي

عصام بابتسامة: دماغك دي سم كدة سليم مش هيقدر يفتح بوقه والشرطة هتدور عليها في حتة تانية خالص ارفعيها معايا يا ريهام البت دي تقيلة 

نور كانت بتهز راسها بعنف وبتحاول تصرخ من ورا الطرحة بس ريهام قربت منها وضربتها بالقلم: اخرسي بقى ده إنتي هتشوفي أيام سودة يلا يا عصام بسرعة قبل ما حد منهم يوصل

جروها بعد ما اتأكدوا مفيش حد في الشارع وحطوها في شنطة العربية

ريهام بابتسامة: ولا يهمك يا حبيبي أنا هاخدها دلوقتي واوديها المخزن وهتصل بأخواتي يطلعوها   وأظبط الشهود وإنت خليك في شقتك ماسك دماغك من الوجع وعيش دور العريس المكسور قدام حماك 

عصام بمكر: أنا هوريهم تمثيل ولا اجدعها ممثل واخد أوسكار 

بعد شوية

 ريهام كانت سايقه بسرعة وفجأة طلعت عربية قدامها خبطت فيها الناس اتلمت الدخان طالع من العربية وريهام غرقانة في د،مها وبتحاول تخرج

واحد من الشباب سمعوا صوت من شنطة العربية

: يا ساتر يا رب الحقو في حد جوه العربية لسه عايش افتحوا شنطة العربية بسرعة

اتنين شباب فتحو شنطة العربية وأول ما اتفتحت الكل اتصدم ووقعت نور كانت مربوطة وشها أزرق من قلة النفس 

الشاب بذهول: يا نهار أسود دي شكلها  مخطوفة 

ريهام حاولت تسحب نفسها وتهرب وهي بتعرج بس تلات شباب مسكوها من دراعاتها وكتفوها

راجل كبير بغل بيضربها بالقلم : رايحة فين يا مجرمة بقى انتو العصابه اللي بتخطف البنات وبتبعوها صح دنتي يومك اسود بتخطفي بنات الناس وتتاجروا فيهم انطقي يا واطية مين اللي معاكي

ريهام بتصوت بانيهار : سيبوني والله ما أعرف حاجة دي عربية واحد صاحبي أنا ماليش دعوة

نور بتعب: أبوياااا إلحقوني عصام وريهام كانوا هيبيعوني لتجار أعضاء إلحقوني يا ناس

شاب وهو بيسحب ريهام من شعرها:  البوليس زمانه جاي دلوقت يا روح امك والله ما هتطلعي منها 

نور بتعب : بابا في الشقة عصام هناك بيضحك عليهم حد يلحق بابا

بعد شوية الشرطة بتوصل

الضابط بحدّة: خدوا الست دي على البوكس فوراً وإنتي يا آنسة اهدي خالص إنتي في أمان قوليلي عنوانكم فين 

نور بتعب شديد لسه هتتكلم اغمي عليها: 

اغمي عليها

بعد شوية في القسم فتحت بتعب لاقت شاب جمبها

: نور فوقي يا نور اي اللي عمل فيكي كده  إنتي مش فرحك كان أول امبارح

نور بهستيريا: عصام يا زين عصام طلع شيطان خطفني وكتفني وكان هيبيعني لتجار اعضاء ومعاه واحدة اسمها ريهام لولا الحادثة كنت زماني ضعت إلحقني يا زين إنت جارنا وعارفني أنا مليش غيركم

زين بغضب: اهدي يا نور والله اللي لمس شعرة منك ما هيطلع له نهار انا اتصلت بوالدك وزمانه علي وصول يا عسكري هات مية بسرعة

في اللحظة دي باب المكتب اتفتح ودخل سليم وهو منهار ووراه عصام

سليم بصدمة: نور بنتي إنتي هنا

عصام بتمثيل وجري عليها: نور حبيبتي اي اللي حصلك  خضيتينا عليكي بقى كده تهربي وتسيبي بيتك 

نور قامت وقفت وضربت عصام بالقلم : إخرس يا واطي أنا مهربتش إنت اللي خطفتني وكتفتني وجبت عشيقتك في أوضة نومي زين هو ده المجرم هو ده اللي كان هيبيعني

سليم بذهول: بتقولي إيه ؟؟