رواية عقدة الانتقام الفصل الاول 1 - بقلم مصطفى جابر

خلي بالك من بنتي يا عصام نور غالية عندنا قوي دي أمانة في رقبتك يا ابني

عصام بأبتسامة : يا عمي دي في قلبي قبل عيني دي ملكة وهتدخل مش الزوجية دلوقت.. يالله روحو انتو واطمنو دي امانه معايا

امها بأبتسامة:  ربنا يخليكو لبعض يبني... انا هوصلها لحد الشقه وهقولها كلمتين وبعدين امشي انا وحماك

عصام بخبث: لا لا مفيش حد هيطلع معانا أنا عاوز الليلة دي تكون لينا إحنا وبس بلاش دوشة المعازيم والطلوع والنزول أنا عاوزها ترتاح وتدخل بيتها بهدوء

حماته بإستغراب: بس يا ابني العرف إننا نطمن عليكم ونشوف الشقة

عصام بمقاطعة وهدؤء: يا عمي الشقة جاهزة وزي الفل وإنت شفتها لما اتفرشت من يومين سيبونا بقى نعيش فرحتنا والله أنا ما مصدق إن الباب هيتقفل علينا أخيراً اطمنوا خالص نور في أيد أمينة

نور بابتسامة: خلاص يا بابا عصام عنده حق إحنا تعبنا النهاردة اوي ومحتاجين نرتاحو روحو إنتوا ارتاحوا وبكرة الصبح كلمونا

عصام بمرح: يالا يا عروسة كفاية كلام لغاية كدة الناس بدأت تحسدنا على الوقفة دي

خدهو وطلع قدام الشقة

عصام بإبتسامة: جاهزة يا نور عيني جاهزة تشوفي حياتك الجديدة

نور بإبتسامة: جاهزة يا حبيبي افتح بقى أنا رجلي وجعتني من الوقفة

فتح الباب ودخلها وهو شايلها بصت للشقة بصدمه

نور بصدمه: عصام إيه ده فين عفشي فين حاجتي اللي أهلي جابوها إيه الكارثة اللي أنا شايفاها دي

عصام بإبتسامة خبث: اهدي يا نور مفيش كارثة ولا حاجة دي بس تعديلات بسيطة اضطررت أعملها عشان المركب تمشي

نور بغضب: تعديلات إنت بيعت جهازي يا عصام بعت عفش عروسة لسه مدخلتش بيتها إنت واعي للي بتقوله

عصام بتمثيل الحزن: والله غصب عني الديون حاصرتني من كل ناحية وصاحب القاعة والمطعم هددوني يفركشوا الفرح ويسجنوني لو مخدوش باقي فلوسهم كان يرضيكي الفرح يتلغي والناس تتفرج علينا كان يرضيكي يقولوا العريس اتسحب من وسط الزفة على القسم

نور بصدمة: تقوم تبيع حقي طب والقايمة يا عصام القايمة اللي إنت مضيت عليها بكل حاجة إنت كدة بتخون الأمانة

عصام بخبث: هعوضك يا حبيتي متزعليش نفسك عشان خاطري انتي عروسة

نور بدموع: إزاي جالك قلب تعمل كدة ده أنا كنت بختار كل حاجه في جهازي بحب وفرحه ازاي قدرت تعمل كده

عصام مسك إيدها بحنان مزيف: يا نور العفش بيروح وييجي لكن إحنا اللي باقيين أنا عملت كدة عشان نتجوز النهاردة ومحدش يكسر فرحتنا إنتي ست أصيلة والمفروض تقفي جنبي في المحنة دي مش أول ما تدخلي البيت تمسكي لي على عفش وخشب إنتي عندك عصام بالدنيا كلها ولا الخشب أغلى مني

نور بتنهيدة: كنت قولي يا عصام كنت عرفني وأنا كنت هبيع دهبي وأساعدك لكن مكنتش تكسر فرحتي كدة بس خلاص حصل خير أنا فعلاً شارياك إنت والشقة دي مهما كانت فاضية وجودك فيها هيملاها عليا

عصام باس راسها بحنان: كنت عارف إنك أصيلة ومعدنك دهب أنا هعوضك عن كل ده يا نور والله لأجيب لك أحسن منه بكتير بس الصبر إنتي مش متخيلة أنا شلت هم اللحظة دي إزاي بس حبك هو اللي قواني

نور بابتسامة: أنا جنبك يا حبيبي ومش هسيبك المهم نكون مع بعض وفي حضن بعض والرزق هييجي إن شاء الله

عصام بابتسامة: يا روحي إنتي أنا النهاردة أسعد راجل في الكون عشان معايا زوجة زيك بتفهم في الأصول خشي يالله خدي دوش وغيري هدومك وانا هشرب سيجارة في البلكونة وهجيلك

دخلت نور وعصام سحب نفسه بهدوء وخرج البلكونة وطلع تليفونه وكلم حد

عصام بهمس: ألو يا روحي أخيراً عرفت أكلمك وحشتيني أوي

ريهام بغل: وحشتك إيه بقى يا عصام إنت ناسي إنك لسه داخل مع الهانم وبعدين إيه العفش اللي إنت بعتهولي ده الذوق ده مش عاجبني خالص النجف موديله قديم والصالون لونه يغم النفس ده اللي قدرت تطلعه بيه منها

عصام بضحكة خبيثة: يا قلبي اهدي بس ده عفش نور اللي كانت دافعة فيه دم قلبها أنا قولت أديهولك إنتي عشان إنتي اللي تستاهلي الحاجة الغالية لو مش عاجبك نبيعه ونجيب غيره المهم إن فلوسها بقت في جيبنا

ريهام بغل: أنا مش طايقة فكرة إنك معاها في شقة واحدة دلوقتي ليه اتجوزتها يا عصام ليه حرقت دمي بالمنظر ده

عصام بغيظ: والله العظيم ما طايق أبص في وشها أنا عمري ما كرهت حد قدها إنتي عارفة إن الجوازة دي كانت مغصوب عليها من أبويا أصل أبوها وأبويا أصحاب وعشرة عمر وضغطوا عليا بكل الطرق أنا كنت بمثل الحب ده عشان أخلص وأخد اللي وراها واللي قدامها

ريهام بدلع: يعني مش بتحبها يا عصام

عصام بسخرية: أحب مين يا بنتي دي غلبانة وعلي نيتها لدرجة الهبل دنا اقنعتها بسهولة إني بعت العفش عشان أسدد ديون الفرح وصدقت وعيطت في حضني كمان أنا محبتبش ولا هحب غيرك يا ريهام إنتي اللي في القلب

ريهام بضحكة دلع: طيب يا سيدي وامتى بقى ناوي تخلص وتتجوزني أنا الشقة بتاعتي خلاص بقت جاهزة بعفش الهانم والفلوس اللي خدتها من وراها واللي معاك أظن تكفي نعيش ملوكي

عصام بابتسامة: قريب أوي يا روحي لسه بس فاضل اني اسحب منها فلوسها اللي شايلاها وأزهقها في عيشتها لحد ما هي اللي تطلب الطلاق وتتنازل عن كل حاجة وساعتها هنعلن جوازنا ونعيش حياتنا صح  فا معلش خليكي صبورة معايا شوية

ريهام بدلع: ماشي يا عصومي هستنى بس متتأخرش عليا أنا بغير عليك حتي من مراتك

عصام بخبث: محدش يملى عيني غيرك يا قمر يالا هقفل عشان متبدأش تشك فيا باي يا حبيبتي

تاني يوم نور بحنان: عصومي حبيبي صباحية مباركة عليك يلا قوم الشمس طلعت أنا جهزتلك أحلى فطار  يا عريس

عصام قام بزعيق: إيه ده إنتي إزاي تلمسيني كدة وأنا نايم إيه القرف ده إنتي مجنونة

نور بصدمة: عصام في إيه أنا بس بصحيك أنا أسفة والله مش قصدي

عصام بيقوم بعصبيه : أوف أنا أسف يا نور حقك عليا بس أنا مبحبش اي حد يصحيني أعصابي بتبوظ وببقى مش شايف قدامي تعالي هنا متزعليش أنا بس ببقي صاحي مخضوض

نور بذهول: خضتني أوي يا عصام عمري ما شفتك كدة

عصام بحنان مزيف: خلاص بقى قلبك أبيض قولتي لي بقى فطار إيه ده أنا واقع من الجوع بس قولي لي مالك شكلك مش مريحني لسه بتفكري في العفش

نور بقلق: اه يا عصام أهلي زمانهم على وصول هقولهم إيه بابا لو دخل وشاف الشقة فاضية كدة هيحصله حاجة إحنا لازم نلاقي حل قبل ما يوصلوا

عصام ببرود: بسيطة يا نور هتقولي لهم إن العفش اكتشفنا فيه سوس أول ما دخلنا ورجعناه المصنع عشان يترش ويتصلح وإننا فضلنا نفرش الحاجة القديمة دي مؤقتاً عشان نعرف ننام ليلتنا... حوري عليهم أي حوار إنتي ذكية وتعرفي تسكتيهم

نور بتوتر: أكدب على بابا يا عصام بابا بيعرف من عيني لو خبيت حاجة وبعدين هيصدقوا إزاي إن العفش كله فيه سوس في يوم وليلة

عصام ضغط على إيدها بقوة: يا حبيبتي إنتي عاوزة تخربي بيتنا من أول يوم عاوزة أبوكي يمسك فيا ويطلقنا ونبقى سيرة على كل لسان اقفي جنبي يا نور دي أول اختبار لأصلك وجدعنتك قولي كلمتين بس وهما هيصدقوكي  وأنا هأكد على كلامك وهما مش هيحبوا ينكدوا علينا في الصباحية

نور بهدؤء: ماشي يا عصام عشان خاطرك وعشان البيت ميتخربش هعمل كدة بس بالله عليك الموضوع ده يخلص بسرعة أنا مش متخيلة هبص في وش بابا إزاي وأنا بكذب

عصام باس إيدها: يا ست الستات والله هعوضك يلا بقى اضحكي مش عاوزهم يشوفوا وشك دبلان كدة

بعد شوية الباب خبط و ابوها وحماها دخلوا

سليم بصدمة: إيه ده يا عصام فين شقى عمري فين جِهاز بنتي الشقة قلبت خرابة ليه في ليلة

نور بهدؤء: اهدى يا بابا الموضوع مش كدة العفش طلع فيه سوس والشركة جت خدته عشان يلحقوا يعالجوه ويرجعوه

سليم بغضب: سوس إيه يا نور إنتي بتستغفلي أبوكي العفش ده أنا مستلمه بإيدي ومفحوص حتة حتة انطق يا عصام وديت العفش فين

عصام بغيظ مكتوم: يا عمي نور قالت لك الحقيقة مش معقول هنكدب عليك في يوم زي ده العفش فيه عيب ورجعناه  وكام يوم وهيرجع تاني

سليم قرب منه ومسكه من هدومه: يرجع اي دي قلة أدب وخيانة أمانة أنا هحبسك يا عصام القايمة اللي إنت ماضي عليها توديك ورا الشمس والله ما هسيبك تتهنى بمليم من اللي سرقته

عيسى أبو عصام دخل في النص وزق ابنه بعنف: إنت فاكرنا بريالة يلا أنا عارف حركاتك النص كم دي وبت سليم دي بنتي ولو إنت فاكر إنك هتاخد حقها تبقى بتحلم

عصام بتوتر: يا بابا أنا هجيب لها أحسن منه والله هعوضها بس اصبروا عليا شهرين

عيسى طلع دفتر شيكات من جيبه ورماه في وش عصام: مفيش شهرين إنت هتمضي دلوقت حالاً على شيك بمليون جنيه لسليم ضمان لحق بنته لحد ما العفش يرجع وإلا وربي لأتبرى منك وأرميك في السجن بإيدي 

عصام بصدمة: مليون جنيه ؟