رواية أهواك الفصل الحادي عشر 11 - بقلم رحاب القاضي
البارت الـ 11
ــــــــــــــــــــــــــــــــــــــــــــــــــــــــــــ
أصعب أنواع الخذلان.... أن تفتح بابك لمن قرر أخيراً إغلاق أبوابه في وجهك
ـ كانت جنه قااعده بتتعشي مع عايده وفؤاد وموبيلها رن برقم غريب، وقبل ما ترد فؤااد سألها بفضول وقال..
فؤاد
مين بيكلمك؟
جنه
رقم غريب ده بيرن عليا اليوم كله النهارده
فؤاد
ردي وافتحي المايك
سمعت جنه كلامه وردت وقالت
الو..
هاني
وحشتيني يا جنه هاني معاكي..
_اتنفضت جنه بخووف وعيونها اتملو دموع وبصت لفؤاد اللي اخد الفون من ايدها وقال بحده..
فؤاد
وحش اما يلهفك يا بعيد، انت ليه راجل انت مصمم تتهزأ.
هاني
انت فااكر اني هسيبهالك دي مراتي وليا انا لوحدي، حتي لو هقتلك يا فؤاد هعمل كده بس مش هخليك تاخدها مني.
_اتصدمت جنه من تهديد هاني لفؤاد وعايده قالت بحده وعصبيه..
عايده
ان شاءالله انت وناسك كلهم بعد الشر علي ابني..
قفل فؤاد الصوت وقال بنبره بارده
تمام يا هاني اللي عندك اعمله، بس بسرعه عشان ما بحبش استني كتير ومكالمتك دي لجنه وحيااة امك لاحاسبك عليها.
ـ قال فؤاد كلامه وقفل في وشه، وبص لجنه وقالها بجمود..
فؤاد.
هو جااب رقمك منين؟
جنه
ما هو ده رقمي القديم..
فؤاد.
اقفليه وهجيبلك رقم جديد النهارده قبل بكره.
اخدت الموبيل من ايده وقالت
حاضر..
عايده
انتي رايحه فين؟
جنه بدموع
شبعت يا خالتي رايحه انام
فؤاد
اقعدي يا جنه كملي اكلك
جنه
شبعت والله خلاص..
فؤاد
لو ما اكلتيش انا كمان مش هاكل ومش هخلي امي تاكل كمان
ابتسمت جنه وعايده قالتله بغيظ
بتراضيها علي حساابي انا، اقعدي ده هيجوع امه عشاانك اهو..
قعدت جنه وقالت
خلاص هكمل اكل اهو..
ابتسم فؤااد وبصلها بهدوء وقال
ما تخافيش يا جنه هو اخره يعمل الحركات دي وقريب اوووي مش هتسمعي عنه حاجه تاني..
ـ اتنهدت بضيق وما ردتش عليه وفضلت تاكل بهدوووء..
ـــــــــــــــــ #بقلم_الكاتبه_رحاب_القاضي ــــــــــــــــــ
_وفي الوقت ده في بيت جيدا كانت بتكلم باباها وقالتله بنبره غاضبه..
جيدا
بقولك يا بابي مش راضي يرجعلي ومصمم يتجوز قريبته دي
رشاد
وانا اعملك ايه خلاص سبيه براحته.
جيدا بدموع
انت ممكن تخليه يرجعلي لو بطلت تسااعده وهو دلوقتي محتاجلك
رشااد
انا اكيد مش هعمل كده يا جيدا، انا عمري ما هدخل شغلي في تفاصيل شخصيه تافهه زي بتاعتك دي.
جيدا بحده
انا اللي عرفته عليك انا اللي خليتك تسااعده من البدايه
رشاااد
بس انا ما شغلتهوش معايا عشان اتجوزك وبس الولد ده ساعدني اطور شغلي ومساعدتي ليه دي هتخليني انا كمان استفاد منه
جيدا بحزن
طيب عشاان خاطري كلمه قوله يديني فرصه ونرجع انا وهو لبعض، انا مش عارفه انسااه مش قادره ابعد عنه، انت فااهم يا بابي انا متحمله ايه هنا عشانه عشان بس اصعب عليه ويرجعلي.
رشااد
انا ماليش دعوه بالكلام ده، حلي مشاكلك بعيد عني يا جيدا وركزي في شغلنا وبس عايزك تبقي جنبه وعيني اللي براقب بيها فؤاد في مصر اتفقنا..
_ما ردتش عليه جيدا وقفلت الفون، وقاامت وقفت في البلكونه وفضلت تعيط بحزن وقلة حيله ورجعت مسكت موبيلها وكلمت جنه بس لقيت موبيلها مقفول، فأتنهدت بضيق وقالت..
جيدا
مااشي يا فؤااد اكيد خلاها تقفل موبيلها عشان ما تتكلمش معايا، بس والله لاخليها هي اللي تبعد عنك وتعرف وتتااكد ان مالكش غيري انا يا فؤاد..
ـــــــــــــــــ #بقلم_الكاتبه_رحاب_القاضي ــــــــــــــــــ
_وتاني يووم الصبح كانت عايده قااعده بتفطر، وقرب منها فؤاااد بااس راسها وقعد جنبيها وقال..
فؤاد
صبااح الفل يا ست الكل.
عايده
صبااح النور يا حبيبي
فؤاد
اومال البت جنه فين؟
عايده
من صباحية ربنا صاحيه وبتجهز عشان هتاخدها الكليه، فكرتني بيها وهي صغيره لما كنا هنقدملها علي المدرسه من فرحتها اليوم ده ما نامتش الليل ولا خلتني انام..
ابتسم فؤاد وقال
اكتر حد شوفته في حياتي بيحب التعليم.
_وفي الوقت ده نزلت جنه من فوووق وهي لابسه بنطلون جينز وشميز اوفر سايز وشكلهم حلو اووي وشعرها مفروود بشكل جذااب، واول ما شاافها فؤاد ابتسم بهدوء وقال..
فؤاد
ايه الشيااكه دي كلها..
ابتسمت جنه وعايده قالت
انا ما يعجبنيش اللبس ده البسي فستاان هيبقي احلي عليكي..
جنه قعدت معاهم وقالت
ما هو يا خالتي ده لبس الطلاب في الجامعه.
فؤاد
حصل وهتبقي احلي طالبه كمان..
جنه بهدوء
شكرا... هات رقم جيدا يا فؤاد عشان اكلمها من رقمي الجديد...
اتنهد. فؤاد. بضيق وقال
تكلميها ليه؟
جنه
عادي يعني عايزه اكلمها.
فؤاد بجمود
بعدين.. افطري عشان انا مش فاضي وعايز اشووف حوار الجامعه ده معاكي الاول..
جنه
حاضر..
_وبعد شويه كانت قاااعده جنبيه في العربيه وهي بتبص للطريق بابتساامه بسيطه علي وشها وقالها فؤاد بهدوء..
فؤاد
هنرووح الحاره الاول.
جنه بقلق
ليه.
فؤاد
في حاااجه كده عايزك تشوفيها
جنه
انا مش عايزه ارووح هناك واشوووف هاني لو سمحت
فؤاد.
معلش مش هنتأخر هناااااك، وبعدين انا معاكي يعني لا هاني ولا الجن الازرق هيقدر يعملك حاجه.
جنه
طيب ونرووح ليه انت خلاص غيرتلي الخط،بلاش تعمل مشااكل معاه..
مسك ايدها بهدوء وقال
قولتلك ما تخافيش يا جنه..
جنه بخوف حقيقي
قال انه ممكن يأذيك يا فؤاد؟
فؤاد
قال بس ما يقدرش يعمل كده، انتي عارفه كان يقدر يعمل كده لو كنت راجع ايد ورا وايد. قدااام وما كنتش هقدر احميكي منه وكنت هخسر نفسي كمان، فالحمد لله بقي اني رجعت حد. مهم وعرفت اخد حقنا منه.
سخبت ايدها من ايده وقالت
لو ما كنتش سافرت ما كانش كل ده حصل اصلا.
فؤاد
وكان زماني طلعان عيني عشان اقدر اعيش واعيشكم معايا، كنا هنتجوز ايوه بس ما كنتش هبقي مبسووط ولا هقدر اخليكي تبقي سعيده، كان زمان معانا عيلين تلاته شاليين هم اكلهم وشربهم ومش لاقيين صح، ولما كنتي هتنجحي ما كنتش عقدر اخاخليكي تدخلي الكليه اللي نفسك فيها عشان ظروفي
جنه بحده
تمام مش انت دلوقتي مبسووط وسعيد خلاص.
فؤاد
وانتي كمان بعيد عن اللي حصل. انا ومساافر، احنا ما كناااش نحلم بالعيشه دي، كان اقصي طموحي وانا وانتي نجيب شقه بعيد عن الحاره والاقيي وظيفه كويسه فاااكره.
جنه بسخريه
فعلا ده المعقول بالنسبالي واللي كنت بتمنااه، بس لما الحاجه بتزيد عن حدها بتبقي بايخه زيك كده دلوقتي.
فؤاد بغيظ
انا بايخ يا جنه
ما ردتش عليه وهو اتنهد بنفاذ صبر وقال
كتر خيرك.
جنه
انت مش قولت مش هتتكلم معايا في الموضوع ده تاني، ما تتقبل فكرة اننا اخوات وبس.
فؤاد بغضب
مش هقدر... واقسم بالله يا جنه هتقولي اخوات تاني ما تعرفي هعمل فيكي ايه.
بصت للناحيه التانيه وسكتت وهو قال
ده انتي بقيتي بوومه قنبلة نكد.
_ما ردتش عليه وبعد. شويه وصلو الحاره وفضلو قااعدين في العربيه وقالها هو بحده..
فؤاد
ما نطلع نقعد فووق
جنه
اقعد معاك ليه لوحدي انا..
فؤاد.
هاخد منك حته يعني ولا لو كنت عايز اعمل حاجه مثلا خالتك هتمنعني وهي قاااعده معانا
جنه
احترم نفسك، وبعدين احنا جايين هنا ليه؟
فؤاد
هتعرفي دلوقتي بس تعالي نقعد فوووق ونسيب باب الشقه مفتوح او ابعتي لـ لبني تيجي تقعد معانا مدام خايفه مني.
جنه
لبني راحت لبيت جدها ومش في بيتهم و احنا جايين هنا نعمل ايه برضو فهمني؟
فؤاد بص في موبيله وقال
دقيقتين بالظبط وهتعرفي.
_سكتت جنه وفضلت مستنيه وهي مش عارفه فؤاد بيخطط لايه وبعد شويه، لقيت عربيات الشرطه داخله الحاره ووقفو قدام المصنع بتاع هاني..
جنه بقلق
هو في ايه بيحصل؟
فؤاد بجمود
انزلي وانتي هتعرفي..
_سمعت كلامه ونزلت من العربيه وهو كمان، وشافو هاني وهي والشرطه واخدااه وبيقول بعصبيه..
هاني
يا باشا والله العظيم ما اعرف حاجه عن الحاجات دي.
الظابط
الكلام ده تقولو في النياابه طلعوه البوكس..
_وفعلا ركب هاني عربية الشرطه وشااف جنه وفؤاد وهما واقفين قداامه، واول ما جات عينه في عين جنه اتنفضت بخووف ومسكت بايديها الاتنين في درااااع فؤاااد واتخبت فيه وهو حاوطها بدرااعه وابتسم بخبث وقال بصوت عالي..
فؤاد.
يا جماعه ركزو معايا، كلكم ان شاء الله معزومين في اقرب وقت علي فرحي انا وبنت خالتي، ان شاء الله اول ما نحدد المعاد هنبلغكم..
_اتجاهلت الناااس هاني اللي بصلهم بحقد وعيونه اتملت دموع، وبدأت الناس تبارك لفؤاد وجنه اللي ساابته وركبت العربيه، وبعد شويه قعد جنبيها وقال للسواق يمشي..
جنه
هو ده اللي انت جايبني عشاانه.
فؤاد
ودي حاجه وحشه يعني.
جنه
هاني كان بيتكلم معايا عن كل حاجه في شغله، وعمره ما يعمل حاجه حرام
فؤاد بصلها بغيظ وغيره واضحه وقال
لا والله ومدام حبااه اووي كده اطلقتي منه ليه؟
جنه
انا ما بكرهش في حياتي قده يا فؤاد، بس ما بكرهش برضو قد الظلم وانت اكيد عملتله كده ولبسته المصيبه دي
فؤاد
ما كنتش هقدر ابعده عننا غير بالطريقه دي، صعبان عليكي يا جنه بعد. كل اللي عملو فيكي.
جنه
اطلقت منه وخلاص كنت خليني ابلغ عنه انه بيدايقني بس مش تلبسه مصيبه بسببي.
فؤاد
انتي مالكيش دعوه انا اللي عملت فيه كده، وانا اللي هشيل ذنبه انا افتكرتك هتفرحي لما تشوفيه في المنظر ده.
جنه
كرهي ليه مش هيخليني ابقي ظالمه زيه.
فؤاد
اهو اللي حصل افرحي انك خلصتي منه وبلاش تأنيب ضمير من غير سبب، انتي ارتاحي وبس ولو في ذنب قولتلك انا اللي هشيله..
ما ردتش عليه جنه وهو قال
هنروح الجامعه هنسأل بقي ونشووف الدنيا هنااك
ابتسمت بهدوء وقالت
تمام..
فؤاد
فرحتي دلوقتي.
جنه
علي رأي اللي قال مش مهم اللي فات المهم اللي جاي.
ضحك فؤاد بهدوء وقال
ياريت تنسي اللي فاات كله ونفكر بقي في مستقبلنا سوا، انا حتي لو غلطت زمان انا اهو بحاول اصلح كل حاجه واعوضك.
جنه بهروب من كلامه
هو انا هبدأ درااسه من اول السنه دي.
فؤاد بضيق
اكيد لا الترم الاول اهو بيخلص هتبدأي ازاي، بس دي جامعه خاصه هيكون ليها نظام واهتمام وتفاصيل مختلفه، احنا هنشووف بقي ايه المطلوب مننا عشان اول السنه الجديده تقدمي وانتي مرتاحه.
جنه
تمام بس اوعي تعشمني وترجع في كلامك.
فؤاد
لا ما تخافيش ده بالعكس هتلاقيني اكتر حد بيدعمك
جنه
طبعا مش احنا اخوات.
فؤاد بغيظ
اخوات تاني... ارجع يا ابني خلينا نوصلها البيت ونروح نشووف اللي ورانا.
جنه بخووف
لا لا خلاص والله بهزر معاك مش هقول كده تاني.
فؤاد قرب منها وقال
لاخر مره بحذرك يا جنه انك تنطقي الكلمه دي علي لساانك تاني، او توصفيني بأي وصف يعمل حدود بينا مفهوم.
جنه بضيق
مفهوم اوعي بقي.
بعد عنها وقال للسواق
كمل في طريق الجامعه
جنه
هي الجامعه هتبقي فين بالظبط؟
فؤاد
6 اكتوبر بعيد شويه عننا بس دي احسن جامعه خاصه في مصر.
جنه
تمام مش مشكله عادي.
_وبعد شويه وصلو الجامعه ودخل فؤااد عشان يتكلم مع العميد بتاع الجامعه، وساابها تكتشف الجامعه لوحدها زي ما طلبت منه، وكانت بتتفرج علي الجامعة بنظره كلها سعاده وهي متاابعه الطلاب وكل تفصيله في الجامعه بنظره كلها سعاده، وفجأه خبط فيها ولد كان مااشي بسرعه، فقالتله بسرعه واحرااج...
جنه
انا اسفه والله انا اسفه..
_ولا يهمك ما حصلش حاجه، انتي دفعة سنه اولي مش كده؟
جنه
لا اا انا لسه جايه اسأل عشان هقدم السنه الجايه..
_شال الولد النضاره الشمسيه من علي عينيه وقال وهو بيبصلها من فوق لتحت....
_مش خساره اعيد سنه كمان عشان اشووفك السنه الجايه يا.... انتي اسمك ايه؟
جنه بتوتر
اسمي جنه... بعد اذنك..
وقف الولد قدامها قبل ما تمشي وقال بهدوء
فارس.. اسمي فاارس مندور خليكي فااكره اسمي كويس هنتقابل كتير يا جنه لما تيجي هنا..
_بعدت عنه ومشيت بسرعه وراحت قعدت بره مكتب العميد اللي فيه فؤاااد، وفضلت مستنيااه لحد ما خرج وقالها..
فؤاد
مالك قاعده كده ليه هي الجامعه ما عجبتكيش؟
جنه وقفت وقالت
لا حلوه وكلية الصيدله حلوه اووي هنا، هو قالك ايه جوه؟
مسك فؤاد ايدها وقال وهما خارجين من الجامعه
قالي بسيطه اووي وسااهل انك تقدمي هنا، بس لازم تاخدي كام كورس زي ما قولتلك وهيكونو مهمين لدراستك في الكليه هنا، وكمان هتتعلمي لغه عشان تعرفي تتعاملي مع الدكاتره والطلاب هنا
جنه
فؤاد هتبقي مصاريف كتير عليك
فؤاد
لا ده مش مهم، هو المشكله ان هيبقي مجهود كبير عليكي
ابتسمت جنه وقالت
لا لا ما فيش مشكله انا بحب الدراااسه وانت عارف كده كويس.
فؤاد.
يا بختها الدراااسه
جنه
يا ظريف.. طيب هتروحني ولا اروح لوحدي
فؤاد
لا طبعا هوصلك وبعدين هرجع شغلي
جنه
ما تخليني ارجع لوحدي خلاص هاني ما بقاش موجود.
فؤاد.
بعدين يا جنه وابقي اخرجي لوحدك بس معاكي السواق لحد ما اعلمك السواقه
جنه
ليه؟
فؤاد
عشان اكيد هجيبلك عربيه واحلي عربيه واحدث عربيه نزلت مصر كمان.
جنه
انت بتتكلم بجد، انا هتبقي معايا عربيه.
فؤاد فتحلها باب العربية وقال
نفسي تقتنعي اني بقيت حد مهم ومليونير يا جنه، وخلاص حياتنا اتغيرت ولسه هتتغير هنعيش احلي عيشه، ولما يبقي عندنا عيال ان شاء الله هنخليهم مرتاحين وما حدش منهم هيتعب زي ما احنا تعبنا.
جنه قربت منه وقالت
نفسي انت اللي تفهم ان سبب تعبي هو غيابك وانك سيبتني مش الفلوس اللي بتتكلم عنها، وتفهم برضو ان انا وانت مش هتبقي عندنا عيال والكلام ده، جيدا ممكن تقوم معاك بالواجب ده وتملالك حياتك كلها عيال.
فؤاد بجديه
مش هيبقالي عيال غير منك وقريب اووي وخليكي فاكره كلامي ده كويس..
بصتله بغيظ وقبل ما ترد قالها بحدي
اركبي يلا خليني اوصلك عشان ورايا شغل ومش فاضيلك..
_سمعت كلامه وركبت العربيه وهو قعد جنبيها وبصلها بهدوء وقال..
فؤاد
بعد كده لو عايزه تخرجي براحتك مش هحبسك يعني، وكمان ابقي خدي امي معاكي واكتشفو المكان اللي احنا قاعدين فيه وانا هشتركلكم في نااادي حلو هتتبسطو فيه.
جنه
تمام..
فؤاد
وهشوف حوار الكورسات بتاعتك ده عشان تبدأي تهتمي بدراستك..
جنه
ما هو لسه بدري فاضل تمن شهور تقريبا واكتر مش كده؟
فؤاد
لازم اما تروحي تقدمي تبقي توب يا جنه، وعايزك تتعلمي تتكلمي انجليزي كويس في الفتره دي.
جنه
حاضر.
فؤاد
سجلتي رقمي عندك؟
جنه
لا لسه هسجله.
فؤاد
هاتي هسجله انا زي زمان.
بصتله بعدم فهم وهو قال
زمان اول ما جبتلك موبيل جديد كان اول موبيل تمسكيه وانتي داخله اولي ثانوي، سجلتي اسمي عندك "فؤادي"..
جنه بتوتر
زمان بقي...
فؤاد
اممم يعني مش هتسجليه نفس الاسم.
جنه
يااء الملكيه اللي كنت بضيفها لاسمك زمان ما بقتش من حقي.
فؤاد
مش اسمي بس اللي من حقك يا جنه، فؤاد كله ملكك وليكي لوحدك.
جنه اخدت منه الفون وقالت
فؤاد اسمك فؤاد وبس.
اتتهد فؤاد بضيق وقال
تعبتينيييي اوووي والله ولصبري حدود يا جنه
_ما. ردتش عليه وفضلو ساكتين وبعد شويه وصلها البيت واتفاجئو هما الاتنين بكريم مندور واقف قدام عربيته اللي لسه نازل منها..
جنه
هو الرااجل ده جااي عندنا ليه؟
فؤاد بقلق
بقولك ايه انزلي وادخلي جوه علي طول ما تسلميش حتي عليه مفهوم.
جنه
حاضر بس هو في حاجه؟
فؤاد.
هشووف اهو ايه اللي جايبه عندنا..
_نزلت جنه من العربيه ومعاها فؤاد وكانت داخله البيت علي طول بس وقفها كريم اللي قال..
كريم
مدام جنه استني لو سمحتي..
_وقفت حنه وبصت لفؤاد بقلق وفؤاد مسك ايدها بتملك وقال..
فؤاد
خير يا كريم بيه، غريبه يعني منورنا هنا في البيت؟
كريم
لا انا كنت هاخد منك معاد بس كلمتك وانت مش بترد.
فؤاد
معلش ما كنتش فااضي اتفضل نورتنا وشرفتنا
كريم
لا لا انا مش فاضي وكويس وشوفتك يا جنه.
جنه بهدوء
خير في اي؟
فؤاد
خير يا كريم بيه ان شاء الله؟
كريم.
انا جااي اعزمك انت وجنه علي عيد ميلاد بنتي بعد بكره ان شاء الله
ابتسمت جنه بهدوء وقالت
كل سنه وهي طيبه ربنا يخليها ليك
كريم
وانتي طيبه عقبال ما نفرح بيكم ان شاء الله
بصت جنه لفؤاد بعدم فهم وفؤاد قال
في حياتك ان شاء الله يا كريم بيه، واكيد هنيجي عيد الحفله وكل سنه وبنت حضرتك بخير
كريم
وانت طيب يا فؤاد، في انتظاركم وانا عزمت جيدا وهي كمان جاايه.
فؤاد
تمام يا كريم اتفضل بس معايا مش هينفع تيجي كده ونقف نتكلم من بره
كريم بص لجنه وقال
وقت تاني ان شاء الله، مبسووط اني شووفتك يا جنه اتمني تبقي ديما بخير.
جنه بتوتر من نظراته وكلامه
شكرا جدا لحضرتك.
_ابتسم كريم بهدوء ومشي وفؤاااد كان واقف متعصب بسبب كلامه مع جنه ونظراته ليها اللي كانت كلها اعجاااب، وقالتله جنه بألم اول ما كريم مشي من عندهم..
جنه
فؤاد ايدي وجعتني
بصلها فؤاد بضيق وقال
مش انا قولتلك ما تقفيش وتدخلي علي طول.
جنه
اعمل ايه يعني ما هو اللي نده عليا، هو عنده كام سنه؟
فؤاد بحده
وانتي مال اهلك؟
جنه
في ايه يا فؤاد بسأل عادي، وبعدين هتاخدني معاك عيد الميلاد مش كده؟
قالت كلامها بحماس لكن هو رد عليها بجمود وقال
لا هروووح انا وجيدا، انتي ما تعرفيش حد هناك ومش هتحضري اي حفله من الحفالات دي تاني، الحاجات دي مش شبهك اصلا..
جنه بضيق
امممم مش شبهي انا لكن شبه جيدا، معاك حق هي مناسبه ليك في الحفالات دي
فؤاد
هو اي نكد وخلاص يا جنه انا مش عايزك تروحي عند الرااجل ده
جنه
ليه يعني مش عايزني ارووح عنده، علي العموم اصلا عادي انا مش عايزه ارووح معاك اي مكان رووح شووف شغلك اللي عطلتك عنه..
_قالت كلامها وساابته ودخلت البيت وهو بصلها بضيق وراااح ركب عربيته ورجع شغله، واول ما وصل هنااك كان سعيد قااعد علي مكتبه ولما شافه قاام بسرعه وقاله..
سعيد
كريم مندور اتكلم وسأل عليك وانا قولتله انك في البيت؟
فؤاد وهو بيقعد علي مكتبه
ايوه ما هو جالي البيت.
سعيد
وكان عايز ايه؟
فؤاد
بيعزمني انا وجنه علي عيد ميلاد بنته.
سعيد
هو عنده اولاد؟
فؤاد
اللي اعرفه عنه ان مراته ماتت وعنده بنت واحده، جيدا قالتلي الحوار ده
سعيد.
ايوه صح جيدا ما جاتش النهارده
فؤاد.
يومين كده وهتلاقيها رجعت، هي زعلانه مني.
سعيد
طيب ما هي جنه رفضااك وشكلها كده مش هترضي بيك، فأرجع لجيدا انا ما شوفتش حد بيحب حد زي ما هي بتحبك كده
فؤاد
انا ما بحبهاش هي غاليه عليا مااااشي لكن مش لدرجة اني افضلها علي جنه
سعيد
ما هي جنه مش عايزااك
فؤاد
انا معاها للاخر يا سعيد وان ما جاتش برضاها تيجي غصب عنها انما اسيبها واقول مش نصيبي والكلام ده ما ينفعش يبقي بيني وبين جنه.
سعيد
وجيدا؟!
فؤاد
انا مش هخسرها برضو بس هتصرف، المهم عملت الشغل اللي قولتلك عليه..
سعيد.
واحده واحده عليا..
فؤاد
انا قولتلك ايه، بسألك خلصت الشغل اللي قولتلك عليه
سعيد
بخلص فيه.
فؤاد
بسرعه يا سعيد
سعيد
لا ما هو انا يا اتعلم يا اخلص بسرعه
فؤاد.
يا سعيد. مش عايزك تتلكع انا قولتلك قبل كده وهقولهالك تاني انا ما بثقش في حد قدك انت هنا..
سعيد
حاضر هحاول تاني بس واحده واحده عليا وحيااة امك، بالمنااسبه امك عزمااني عندكم النهارده ابقي خدني معاك وانت مرووح
فؤاد
انت مش كنت عندنا من يومين يااه..
سعيد
متخانق مع مرات ابويا ومش يتأكلني في البيت، وامك قايمه معايا بالواجب
فؤاد
اتجوز بسرعه بقي واخلص من مرات ابوك واهلك دول وهتبقالك حياتك ويبتك بعيد عنهم
سعيد
قريب ان شاء الله حددت مع الشيخ ابراهيم ان الفرح علي بعد عيد رمضان.
فؤاد
الف مبرووك مقدما شد. حيلك بقي في الشغل عشان تتجوز وانت مرتاح اكتر.
سعيد.
ان شاء الله يا فؤش هرووح انا اشووف شعلي وما اعطلكش.
_ومشي سعيد من عنده وفؤااد مسك موبيله وكلم جيدا بس ما ردتش عليه فأتنهد بضيق وقال لنفسه..
فؤاد
قال يعني كنت ناقص نكدك انتي كمان يا جيدا...
ـــــــــــــــــ #بقلم_الكاتبه_رحاب_القاضي ــــــــــــــــــ
_وعدي اكتر من شهر علي ابطالنا وكانت جنه بتتعامل مع فؤاد بحدود وهو كمان اتلهي في شغله عنها وسابلها مساحه انها تعتمد علي نفسها في دراستها وتخطط لمستقبلها لوحدها..
_وفي يووم رجع من شغله ودخل بيته وهو ماااسك شنطه كبيره في ايده وكانت عايده قااعده في الصاله قداام التلفزيون فقعد جنبيها وقال..
فؤاد
عامله ايه يا ست الكل؟
عايده
الحمد. لله يا حبيبي، ايه الشنطه اللي معاك دي؟
فؤاد
جايب فانوس رمضان لجنه وشوية حاجات كده هي فين؟
عايده
فوووق حضرت معايا الرؤيه وراااحت تكمل مذاااكره، نفسيتها بقيت حلوه اووي اليومين دول ربنا يخليك ليها ما حدش بيعرف يفرحها غيرك.
فؤاد
علي الله بس تقدر، المهم بكره صيااام ولا بعد بكره؟
عايده
لا بعد بكره اطلع وريها الحاجات اللي جايبها ليها واتكلم معاها تاني يمكن ترضي المره دي..
فؤاااد
طيب ما تكلميها انتي ما هو انا تعبت والله ومش هقبل الوضع ده كتير انتي اصلا شايفه هي بتعاملني ازاي.
عايده
انا ما اقدرش اكلمها ولا اقولها حاجه عشان هتفتكر اني بضغط عليها وانا مش عايزه اغصبها علي حاجه.
فؤاد اتنهد بضيق وقال
ماااشي يا امي انا هروووح اكلمها وربنا يستر.
_قال كلامه وساااابها ورااح لجنه فووق وكان لسه هيدخل عندها، بس وقف وخبط علي الباب وهي قالت من جوه..
جنه
ايوه.. مين؟
فؤاد
انا..
قامت وفتحت الباب وقالتله
نعمم يا فؤاد؟
فؤاد
دخليني عايز اتكلم معاكي
خرجت بره الاوضه وقالت
تعالي نقعد هنا واتكلم براحتك
بصلها بغيظ وقال
هو انتي بجد خايفه اننا نبقي في مكان واحد مع بعض؟
جنه
لا مش مسألة خووف، بس انت ليه تدخل اوضتي عيب وغلط.
فؤاد
مااشي يا جنه تعالي نقعد هنا..
وراحو قعدو في الصاله وقالتله
نعم..
حط فؤاد الشنطه قدامها وقال
كل سنه وانتي طيبه؟
جنه
ايه ده؟
فؤاد
شوفي بنفسك.
ـ فتحت جنه الشنطه وطلعت منها بوكس كبير وابتسمت تلقائياً اول ما فتحته ولقيت جواه فانوس كبير وشكله حلو جدا وعليه اسمها وصورتها وعروسه شكله كيوت اووي..
فؤاد ابتسم لابتسااامتها وقال
كل سنه وانتي طيبه بقالي 8 سنين ما جبتلكيش فانوس رمضان فقولت اعوضك بقي واجيبلك احلي واغلي حاجه.
جنه
وانت طيب عقبال ما تجيب لولادك ان شاء الله..
قااام وقعد جنبيها وقال
قصدك ولادنا انا قولتلك مش هيبقي عندي عيال غير منك انتي
بعدت عنه جنه وقالت
تاني يا فؤاد طيب خد هديتك مش عايزاها
فؤاد بضيق
واخرتها هنفضل كده علي طول.
ما ردتش عليه جنه وهو قال بجديه
انا بحبك يا جنه انسي كل اللي حصل وخلينا نبدأ سوا من الاول، ما ترديش عليا دلوقتي بس فكري بجد المااضي كان وحش وصعب عليكي عارف بس ما تخليهوش يدمر مستقبلنا كمان.
جنه بدموع
ما تسيبني براحتي وشووف حياتك بعيد عني وو..
قاطع فؤد كلامها وقال
ما اقدرش اعمل كده انتي عمري كله ومش عايز غيرك، فكري يا جنه.
جنه
طيب لو فكرت ولقيتني برضو مش قادره ابقي معاك هتسيبني في حالي
اتنهد فؤاد بضيق وقال
فكري كويس وانا متأكد انك مش هتقدري تبعدي عني، قلبك ما فيهوش غيري ومش هيطاوعك تختاري بعدي
جنه
طيب وجيدا؟
فؤاد
اللي بيني وبينها شغل وبس والله ما في حاجه جوايا من ناحيتها خالص.
جنه
حتي لما كنت مساافر؟
فؤاد
ما قولنا ننسي الماضي كله خلينا دلوقتي نبص لحياتنا الجايه.
جنه بهدوء
هفكر يا فؤااد بس سيبني براحتي ما تضغطنيش
ابتسم فؤاد وقال
براحتك خااص المهم في الاخر تعقلي وتختاريني يا جنه.
اخدت جنه البوكس اللي جابه ليها وقالت
هرووح اكمل مذااكره وشكرا علي الفانوس والعروسه عجبوني اووي.
فؤاد
طبعا مش انا اللي جايبهم.
جنه
ما تتغرش اووي كده، هاني كان كل رمضان بيجيبلي فانوس علي فكره كل سنه
فؤاد بغيظ
غوري يا جنه من وشي وسيرة الراااجل ده ما تجيش علي لساانك تاني انتي فااهمه ولا لا.
_ضحكت بهدوء علي غيرته عليها وراااحت قعدت في اوضتها، وهو كمان راح اوضته وهو مبسووط وحاسس انها خلاص بدأت تتقبل قربه منها وتوافق بيه...
ـــــــــــــــــ #بقلم_الكاتبه_رحاب_القاضي ــــــــــــــــــ
_وتاني يوم كان قااعد في فؤااد في مكتبه في الشركة بتاعته ومعاه سعيد وهبه السكرتيره اللي قالتله..
هبه
ما حدش كان بيخلص الشغل ده غير مدام جيدا..
سعيد
ما تكلمها يا فؤاد عشان نبدأ بقي المشروووع، هو كريم مندور ما حدش يعني هيعرف يتعامل معاه غير جيدا...
فؤاد بضيق
كريم مندور كان ليه شغل زمان مع رشااد العربي ابو جيدا، وعشان كده هيدعمنا بثقته في الناااس دي، وجيدا سابتنا هو بقي قلقان ومش عايز يدخل في حاجه مش مضمونه
هبه
معني كده ان المشرووع اللي كنا هنخلصه علي بداية السنه الجديده هياخد سنتين وتلاته واربعه احنا لسه مش عارفين نبدأ
فؤاد
مش عايز حد من الموظفين والعمال ياخدو بالهم من حاجه، كل حاجه تمشي بشكل طبيعي وانا هتصرف
سعيد
تمام بس قولنا هتعمل ايه؟
فؤاد
بعدين يا سعيد كل واحد فيكم يلا علي شغله.
_وسابوه فعلا وكل واحد فيهم راااح شغله، وهو مسك موبيله وكلم جيدا اللي كالعاده ما ردتش عليه، فبعتلها رساله علي الواتس وقالها فيها..
فؤاد
"جيدا.. لو سمحتي ردي عليا انا محتاجلك جدا ولازم ترجعي الشغل".
ـــــــــــــــــ #بقلم_الكاتبه_رحاب_القاضي ــــــــــــــــــ
ـ وفي الوقت ده في بيت فؤااد كانت قااعده جنه مع عايده اللي قالتلها بصدمه..
عايده
نعممم انتي بتقولي انه كان متجوزها يا جنه؟
جنه
ايوه يا خالتي جيدا قالتلي بنفسها، وكمان اتأكدت من سعيد عرفت اوقعه في الكلام وعرفت ان فؤاد كان متجوزها ، بس هو ضحك عليا وبيكدب علينا
عايده
بصي اانا مش قصدي ادافع عنه بس معني انه يخفي حاجه زي دي يبقي هو خاايف علي زعلك وانك ترفضيه اكتر ما انتي رفضااه
جنه بحزن
ما انا زعلت وموضوع زي ده مأثر فيا اووي، فؤااد انا عمري ما حبيت حد غيره وكنت فاكره اني الوحيده اللي في قلبه وعمره ما هيشووف ولا هيحب واحده غيري
عايده
سامحيه وهو اهو سايبها هي وبيجري ورااكي انتي، عشاان خاطري انا مش هعيشلكم العمر كله يا جنه وانتي وهو ما لكمش غير بعض، وانا عايزه افرح بيكم واشووف عيالكم قبل ما اموت.
جنه
بعد الشر عليكي يا خالتي ربن يديكي طولة العمر.
عايده
طيب ريحيني وقوليلي موافقه بيه؟
جنه بهدوء
موافقه يا خالتي.
عايده ابتسمت بسعاده وقالت
عين العقل يا قلب خالتك، هكلمه اقوله وافرحه انك اخيرا رضيتي بيه..
جنه
لا لا استني يا خالتي انا هكلمه الاول، لازم انا وهو نتفق علي حاجات كتير قبل ما نتجوز او تبقي بينا حاحه.
عايده
اللي انتي عايزاااه اتشرطي عليه براحتك يا عروسة ابني.
_ابتسمت جنه بهدووء علي كلام خالتها، وبرغم حبها لفؤااد وموافقتها بيه، الا انها مش مرتاحه وقلبها مقبوض من موافقتها بيه.
ـــــــــــــــــ #بقلم_الكاتبه_رحاب_القاضي ــــــــــــــــــ
_وفي الوقت ده في بيت جيدا، كانت قااعده في بيتها ومشغله التلفزيون علي اغاني رمضان وعيونها كلها دموع وحزن ووحدتها مأثره عليها جدا وعلي نفسيتها وشكلها وملامحها اللي بقيت باهته وكلها حزن، والباب خبط فمسحت دموعها وقااامت فتحت الباب وكان فؤااد واقف قدامها..
_قلبها بقي يدق بسرعه وعيونها اتملت دموع بسبب حزنها منه واشتياقها الكبير ليه في نفس الوقت بنبره حزينه وصوت مبحوح..
جيدا
جااي ليه؟
دخل فؤاد وقفل الباب وقال
شوفتي رسالتي وما ردتيش عليا، من امتي يا جيدا بقولك اني محتاجلك وتطنشيني.
جيدا بسخريه
اللي خلاك تفتكرني وتكلمني شغلك، فااكر يا فؤاد اول ما اتعرفنا علي بعض وبدأت احبك واتعلق بيك لما انت كنت بتعمل كل حاجه بحبها عشان تلفت نظري وتخليني احبك، وقتها انا قولتلك انا بدأت احبك عشان انت بتهتم بيا ومحسسني اني مهمه عشاني انا مش عشان حاجه تانيه، واني مش كويسه من جوايا لان بابي مش بيهتم بيا وما بيفكرش يكلمني غير لو عايز مني مصلحه تبع الشغل وكل كلامه معايا عن الشغل، فتلف السنين والراجل الوحيد اللي حبيته اللي كنت فاكراه هو السوبر هيرو بتاعي اللي هيعوضني عن كل حاجه وحشه وصعبه شوفتها في حياتي، يطلع كداب وطماع واناني ونسخه من بابي كمان، صح مش هو انت كده.
قرب فؤاد منها وقال بهدوء
انا ما كانش قصدي اذيكي، انا قربت منك عشان كنتي عجباني اتجوزتك عشان حبيتك يا جيدا بس ما اتفقناااش سوا
جيدا ببكاء
بس انا محتجالك زي ما انت محتاجلي دلوقتي واكتر، مستعده اعملك كل اللي انت عايزه وزيااده بس ترجع تحبني وتهتم بيا وتبقي معايا زي زمان
_واول ما خلصت كلامها رن موبيله برقم جنه اللي كانت بتكلمه عشان تبلغه بموافقتها بيه، بس جيدا قالتله بجديه وخبث..
جيدا
يا تبقي معايا دلوقتي وعلاقتنا ترجع زي الاول يا ترد عليها وتمشي وتنسااني خالص يا فؤااد انا وبابي وكل حاجه كانت بينا
_اتنهد فؤااد بضيق وقفل الفون بتاعه من غير ما يرد علي جنه وقرب من جيدا وقالها بهدوء..
فؤاد
عملتلك اللي انتي عايزاااه اهو ومستعد ابقي معاكي دلوقتي وعلي طول ومش عشاان الشغل وبس، عشان انا ما كنتش بستغلك يا جيدا
ابتسمت بسعاده ودموع وحضنته بكل قوتها وقالت
وانا مستعده دلوقتي اعملك كل اللي انت عايزه يا فؤاد.
_تفتكرو بقي ايه اللي هيحصل لما فؤاد يعرف ان جنه موافقه بيه ومستعده تتجوزه بعد ما اختيار انه يرحع لجيدا؟
•تابع الفصل التالي "رواية أهواك" اضغط على اسم الرواية