رواية قريب دون قصد الفصل السادس 6 - بقلم فونا
_ملكش قعاد في شقتي.
بصله بابا بصدمة،في حين ابتسم جدو بكل هدوء.
مسكني من ايدي وسحبني وراه وخرجنا برا القاعة.
مش عارفه المفروض افرح ولا ازعل بس على الأقل أنا مرتاحه أنها مش هتدخل شقتنا مكان ماما!
خرجنا والصراحة جدو كان جنبي مسابنيش،حاول يخرجني من حزني،خدني وروحنا على البحر قعدنا،فضلنا نهزر ونضحك كتير وحقيقي أنا محظوظة بجدو أوي.
بابا كان عمال يرن على جدو بس جدو كان بيكنسل.
_طب هيروحو فين يا جدو؟
ـ مطرح ما يروحو يا قلب جدو،مش أبوكي قسى وبعد؟!
يتصرف هو بقى.
فجأة لقينا چون قرب مننا.
_ممكن كلمة؟
هو بجد ليه؟!
عامل زي الأستاذ بيومي فؤاد بيظهر في كل حته.
بصله جدو وبدأ يتفحصه.
_ حاسس شوفت خلقتك دي.
فجأة جدو بصلي فبرقت وهزيت راسي بنفى.
ابتسم جدو بخبث،انا عارفه النظره دي!
كان لسه هيتكلم فقعدت اكح جامد.
چون اتخض بس جدو كان قاعد ثابت وعارف أني بمثل.
_ سلامتك يا حبيبة جدو.
ـ احم مش يلا نروح بقى الوقت اتأخر.
_يلا يا حبيبتي.
جدو عارف چون وعارف أني كنت معجبه بيه وعارف أنه ابن طنط سعاد.
روحنا البيت وجدو دخل ينام عشان كان مرهق، أنا دخلت عملت عشا خفيف.
مش قادرة احدد احساسي دلوقتي عامل ازاي ،بس أنا مرتاحه شوية.
خلصت عشا واتجهت لأوضتي،مسكت موبايلي وفتحت فيس،بقالي كتير أوي مفتحتش ولا قرأت روايات.
لقيت رواية في وشي شدتني وبدأت أقرأ فيها واندمجت أوي ، بعد وقت نزلت استوري فيس وكتبت:
"امتى الواحد هيلاقي الكتف اللي يتسند عليه؟"
بعدها بخمس دقايق جالي مسدج من رقم غريب على الواتس.
"حين يخذلُكِ العالم،
تذكّري
أنّ هناك قلبًا
اختاركِ وطنًا."
اتخضيت!
كنت حاسه أنه شخص معين كدا بس عملت بلوك بسرعة!
حاولت أنام بصعوبة لأن أحداث اليوم كانت صعبة.
تاني يوم صحيت بدري روحت الكلية وقولت لازم أبدأ اهتم بدراستي اللي اهملتها.
كان عندي محاضرة والدكتور كان مقسمنا مجموعات وكل مجموعة تعمل مشروع شكل،بدأ يقول اسامي المجموعات وكل مجموعة مكونة من ٦ أشخاص.
وقت مجموعتي وهو بيقول الاسماء ذكر اسمي واسماء باقي المجموعة وبعدها ذكر اسم چون!
اتقفلت من المشروع من قبل ما يبدأ حتى،أنا مكنتش عايزة اتعامل معاه خالص.
المحاضرة خلصت وبدأت أجمع حاجتي بضيق،معرفش أي حد فيهم ومعرفش غير واحد بس ومش طايقه ابص في وشه حتى!
خدت شنطتي وطلعت وكنت مقررة مش هكمل باقي اليوم.
طلعت برا وكنت ماشية بس وقفني چون فجأة.
_ يا مريم ممكن نتكلم بس خمس دقايق.
مبصتلوش واتحركت بس هو كان مصمم وعمال يقف قدامي.
اتكلمت بحدة_ لو سمحت اوعى من طريقي.
اتنهد وخد جنب وبالفعل سيبته ومشيت،يتكلم معايا في ايه وليه اصلا إحنا مفيش بينا أي مجال للكلام!!!
روحت عند جدو عملت الغداء واتغدينا،وبعد كدا قعدنا في البلكونة وقعدنا نحكي كل اللي حصل طول اليوم وحكيتله على چون.
كان باصصلي وساكت ف اتوترت.
_ هو أنا عملت حاجة غلط يا جدو.
ـ لأ يا حبيبة جدو بس..
_ بس ايه؟
ـ چون طلب ايدك.
•تابع الفصل التالي "رواية قريب دون قصد" اضغط على اسم الرواية