رواية فراشة المقبرة الفصل السادس 6 - بقلم اسماعيل موسى

كرمشت الورقه فى قبضتى، عصرتها من الغضب ،انا فعلآ شخص طيب ومسالم لكن لما ابداء فى مشوار هكمله للنهايه حتى لوكانت النتيجة موتى.

فتحت الملف كان فيه عقود لمحلات وشركه ومصنع بيع وشراء من كريمه متولى ليوسف عبد الحميد

رجعت بيا الذكريات التانى زياره قابلت فيها المرحومه لما سألتنى على أسمى ولما قلت طلبت البطاقه عشان تتأكد

معقول يا امى تكونى مخططه لكل حاجه من البدايه؟

ثم ايه إلى غير رأيك فى اخر لحظه ؟

انا قرأت جوابك إلى بتتهمينى فيه بالخيانه كان قبل ساعات من موتك

سبت الملف وغمضت عنيه، ايه إلى جرى فى الساعات القليله دى خلى ثقتك ترجع فيا تانى رغم انى مظهرتش ،لا كلمتك ولا قابلتك ؟

افتكرت كلام البنت إلى كان مطبوع فى ذهنى ،قبل وفاة الحجة كريمه بنتها وجوزها كانو عندها وحصلت بينهم مشاده كبيره ايه السبب؟ فكر يا يوسف فكر !!

اتعدلت وانا ببتسم السحر اتقلب على الساحر، اكيد هايدى النبروجى بنتها طالبتها ببقية الورث ،الوقت دا كانت الحجه كريمه متهمانى بالخيانه لكن مؤكد لسان الهانم فلت منها

وقالت انها حبستنى وانها مش هتشوفنى مره تانيه

الحجه كريمه مش غبيه عقلها بسرعه ربط الأحداث ببعضها وفهمت انى اختفيت لظروف خارجه عن ارادتى

انى مش لص ولا حرامى وبنتها كانت حبسانى ودا يفسر الجواب التانى القصير، لو وصلت هنا يوسف خد حقى

صرخت فى الاوضه صرخه كبيره ،الحجه كريمه قبل موتها عرفت انى بريء، مش حرامى، آمى قبل وفاتها كانت عارفه الحقيقه، ما متتش وهى زعلانة منى.

وحياة امى وابويا أغلى حاجه عندى فى الحياه لاخد حقك يا امى مهما جرى.

اتصلت بالبيت، قلتلهم محدش يدور عليه، انا كويس والمرتب هيوصل اول كل شهر لكن لحد ما انا اظهر إى شخص يسألهم يقولو ان علاقتهم بيا منقطعه من زمن طويل، مكنش فيه وقت اشرح، طلبت منهم يثقو بيا وقفلت الخط.

تخلصت من الشريحه كسرتها ورميتها فى الزباله تخلصت من كل حاجه ممكن تدل على مكانى او شخصى

من النهرده يوسف عبد الحميد مات خلاص انتهى واتولد مكانه شخص جديد، شخص غير الإنسان التافه إلى عاش كل حياته مغمور منسى مسالم ،شخص بيخربش ويضرب وممكن يقتل.

كنت محتاج سيوله، الفلوس بتفتح أبواب كتير متقفله

خدت وقت طويل لحد ما لقيت مشترى للمجوهرات والسبايك ،اخد عموله كبيره لكن المبلغ كان يستحق

غيرت جلدتى، طريقتى  لبسى وهدومى ،اتأجرت شقه كويسه

واشتريت عربيه واول حاجه عملتها شفت محامى عقر ينفذ اوامرى ويقدر يتصرف بعلاقاته واتعابه كانت كبيره مبلغ مغرى خلاه  تحت سيطرتى ،طلبت منه يشترى شقة الحجه كريمه لان فى العقود مكنش فيه عقد بيع الشقه، من حسن حظى ان هايدى هانم كانت عايزه تتخلص من الشقه بأى طريقه، وبالمبلغ إلى عرضه المحامى والى اكتر من تمنها مرتين مقدرتش ترفض او حتى تفكر وتسأل مين المشترى

وقعت على الأوراق من غير حتى متشوف اسم المشترى

والعقد كان بالتاريخ الى طلبته من المحامى بالضبط.

كنت قاعد فى القهوه لما المحامى فتحى النحاس كلمنى وقالى ان كل حاجه تمام والشقه بقت ملكك

استنيتة فى القهوه لحد ما وصل وقعد جنبى وطلب قهوه

ممكن اعرف احنا ليه دفعنا ضعف المبلغ فى شقه كان ممكن نشتريها بأقل من تمنها ؟

انت فلوسك رخيصه عليك للدرجه دى يا استاذ يوسف؟

قلتله يا فتحى لو هايدى النبروجى طلبت مليون زياده كنت هدفعه، متقلقش من الفلوس انا عامل حساب كل حاجه

من فضلك سجل الشقه بأسمى فى الشهر العقاري بنفس التاريخ وخد دول عشان الموظف هناك ميعقدش الموضوع ويقلك دا تاريخ قديم.

ملوش لازمه يا استاذ يوسف همس فتحى النحاس وهو بيحط الفلوس فى الشنطه انا كنت هخلص الموضوع من غير حاجه.

فتحى؟ قلت وانا بقف عشان امشى ،مش عايز اى تعطيل

النهرده الشقه تتسجل فى الشهر العقاري وبعدها تخلص اجرأت الشركه التى طلبتها منك.

طيب وبالنسبه للعقود التانيه ؟ اسجلها ولا ايه ؟

قلتله لا الموضوع ده لسه بدرى عليه ركز فى إلى قلتلك عليه

ياريت يوم ولا يومين تكون الشركه مشهره وقانونيه عشان نبداء الشغل.

كنت واقف وسط الأرض إلى اشتريتها لما المحامى فتحى النحاس كلمنى وقالى ابشر كل حاجه تمام

المقاول كان واقف على كلمه منى، اديته الأذن وخلال شهر الشركه اتبنت والعمال والصنايعيه شغالين فى المحاره والسراميك ،كل دور كان بيتبنى العمال كانو بيخلصوة على طول شغل ليل بنهار شهرين والشركه كانت خلصانه

شركة الحجه كريمه ،وتخصصها فى نفس خط الإنتاج إلى شغاله فيه مصانع بنتها، فى الوقت دا كنت قدرت اتعاقد مع الموردين ،نفس موردين شركة هايدى ومضيت عقود بأقل من تمن المنتج بتاعها ،العجله اشتغلت المعدات والعمال بس انا كنت بغامر اكتر عن طريق فتحى النحاس قدرت استقطب مجموعه من العمال من مصانع وشركة هايدى يشتغلو عندى

المخازن بدآت تتملى وكان فاضل حاجه واحده لازم اعملها

الضابط حازم ،ضابط المباحث إلى كان ملفقلى المحضر وبيدور ورايا فى كل مكان حتى المخبر بتاعه قابلته مره

وقفت العربيه قدام القسم فى منطقة الأنتظار ودخلت لابس بدلتى والنضاره السوده والساعه السواتش فى ايدى والتليفون على ودنى

خلصت يا فتحى ؟

لسه واخد اذن النيابه والمحضر فى ايدى بصوره ،ابعتلى نسخه على التليفون يا فتحى لما تخلص 

حاضر يا استاذ يوسف ،عايز اقابل الضابط حازم مدكور من فضلك رديت على امين الشرطه إلى سألنى عن سبب الزيارة 

نقله مين يا باشا؟

قلعت النضاره وابتسمت قله يوسف عبد الحميد هو هيكون مبسوط اوى لما يسمع أسمى.