رواية قريب دون قصد الفصل الخامس 5 - بقلم فونا
_ أبوكي هيتجوز انهاردة!
ولازم تبقي موجودة!
دموعي نزلت بقهر،برضو عمل اللي في دماغه وهيتجوز!
كنت خايفه أقول لجدو عشان ميتعبش أكتر بس هعمل ايه؟!
لازم أقوله.
طلعت من الأوضة بدور عليه لقيته في البلكونة،اول ما شافني ابتسم.
ـ تعالي يا حبيبة جدو.
قربت منه وبوست راسه.
_عامل ايه يا حبيبي.
ـ بخير طول ما أنتِ بخير.
ابتسمت بحزن وبعدين قعدت جنبه وأنا مش عارفه أبدأ كلامي ازاي ومنين.
خدت نفس عميق وكنت لسه هتكلم بس سبقني هو.
_خايفه تقوليلي الخبر؟
بصيتله بسرعة لقيته ضحك بحزن.
_ أبوكي كلمني وعزمني علي فرحه وعايزني اجيبك ونروحله.
بصيتله ومكنتش عارفه اقول ايه فكمل كلامه.
_ وهنروح نحضر الفرح.
بصيتله بسرعة.
_ لأ يا جدو مش هقدر.
ـ هتقدري، أنتِ قوية يا مريم وتقدري تواجهي.
دموعي نزلت.
_ بس دي ماما يا جدو،عارف يعني ايه.
بصلي بحزن فكملت بقهر.
_ ماما اللي كانت بتحب بابا وهو كان بيعشق التراب اللي بتمشي عليه،ماما اللي كان بابا ميستحملش لو جالها دور برد.
أنا مستغربة بجد هو ازاي أتغير كدا،ده مش بابا اللي اعرفه يا جدو ده حتى طردني من البيت عشان ناس منعرفهاش!
أنا قلبي موجوع أوي يا جدو.
حضني جامد وحسيت بدموعه على كتفي، الموقف صعب أوي أوي بجد.
_ سلامة قلبك يا عيون وروح جدو،أنا هجيبلك حقك وحق ماما يا عيون جدو.
مش عارفه مر الوقت ازاي وجدو اصر إننا نروح الفرح.
مقدرتش البس فستان ولا اتزوق وجدو مجبرنيش على حاجة زي دي خالص.
وصلنا القاعة وهنا قلبي بدأ يدق بسرعة.
دخلنا القاعة وأنا عيوني عليهم!
قاعدين في الكوشة سوا،مبسوطبن وبيضحكو وأنا قلبي مو*لع.
وأنا بقرب منهم أنا وجدو لمحت چون وكان باصصلي فبصيتله بكره،مبقتش قابلة ابص في وشه ولا المح طيفه حتى!
بصيت جنبه كان أخوه الصغير اللي لغاية دلوقتى معرفتش اسمه وبرضو بياكل!
ضحكت من جوايا الصراحة،حسيته دماغه مهوية.
جدو كان ماسك ايدي جامد وأنا كنت خايفه ابعد عنه.
وصلنا عند الكوشة،بابا بصلنا بهدوء وقام قرب مني وحضني،مبادلتوش الحضن وحتى مسلمتش علي العروسة!
قرب من جدو وحضنه.
_ شكرا يا أبويا أنك جيت.
بادله جدو الحضن وهمسله في ودنه.
_أنا مش جاي عشان سواد عيونك،أنا جاي افكرك أن الشقة اللي أنتَ كنت فيها دي بتاعتي ومازالت باسمي.
بعد بابا عند جدو بخضه.
_يعني ايه.
ـ يعني ملكش قعاد في شقتي.
•تابع الفصل التالي "رواية قريب دون قصد" اضغط على اسم الرواية