رواية حب الفصل الخامس 5 - بقلم ايمان تامر

~ هتقول ولا اقول انا يا عمار 

عمار بص عليا 

عينه في عيني لثواني 

ابتسم ابتسامه هاديه أوي 

ويمكن مكسوره شويه 

وبعدين لف وشه لباباه وقال 

= قول انت يا بابا 

عمو خالد بص لماما وقال 

~ عمار مسافر بكره 

ايه التلج ده يجدعان ! مين دلق عليا تلج كده ! ايه اللي بيحصل ده ? قلبي ده ماله ! هو لسه بينبض ولا وقف ? حد يقرصني طيب يمكن أفوق .

  

كنت باصه علي عمار بصدمه ، حاسه انه مقلب وهيقولولي دلوقتي أنها كاميرا خفيه وههه وكده .

فوقت من صدمتي واخدت بالي ان عمار كان عمال يبص عليا وعلي عمو خالد وماما ويرجع يبصلي تاني وسمعت سؤال بصوت ماما لفت انتباهي 

~ ميعاد الطياره امتي بقي 

~ الساعه ١١ الصبح 

~ يعني مش محتاج أي حاجه يا حبيبي اعملهالك متأكد ؟

= لأ يا طنط الله يكرمك ، دعواتكم بس 

مكنتش عارفه اقول ايه والله كلامي مش هيفيد بحاجه اصلا ، قومت بكل هدوء دخلت أوضتي مكنتش عايزه اعيط لأ عايزه انهار

عيطت بصوت واطي كتير وفضلت فتره كبيره في الأوضه  بصيت في الساعه لقيتها 8 إلا ربع بليل وهو لسه قاعد بره ، قررت اني مش هخرج بس لقيت الباب بيخبط ، مسحت وشي بسرعه ورديت 

_ مين 

= انا يا تيا 

سكت لحظه وبعدين قومت عدلت الخمار وفتحت 

= تعالي اقعدي معانا 

_ مش عايزه 

= شكلك مش كويسه ليه ؟

بصيت ورايا ورجعت بصيتله 

_ مفيش انا كنت بعمل شوية حاجات كده 

= طب تعالي اقعدي معانا 

دخلت الاوضه وانا بقول 

_ مش هخرج يا عمار مش فاضيه 

= انا ماشي الصبح ويا عالم هنتقابل تاني ولا لأ 

_ . . . 

اتنهد وكمل كلامه وهو ماشي 

= راجعي نفسك وتعالي اقعدي معانا يا تيا شويه

وقفت افكر شويه حسيت بنغزة في قلبي لما افتكرته وهو بيقول 

= انا ماشي الصبح ويا عالم هنتقابل تاني ولا لا 

خرجت بسرعه اقعد معاهم وهو شافني أبتسم ، قعدنا نتكلم ويهزروا شويه ل 12 وبعدين وقف عمو خالد وطبطب علي ضهر عمار وهو بيقول

~ قوم يلا اطلع عشان تقدر تصحي بدري 

قام عمار طلع وانا قلبي طلع معاه 

_ عمو خالد ممكن تصحيني اسلم عليه قبل ما يمشي 

~ حاضر يا توتو قومي يلا ادخلي 

دخلت نمت فعلا ، صحيت علي الشمس ماليه الأوضه 

مش شمس الصبح دي لأ 

بصيت حواليا أدور علي الفون لقيت الفون فاضل ، سمعت قرآن شغال بره عرفت ان كده محدش قاعد بره .

اتنفضت من علي السرير بسرعه وخرجت 

_ ماماااا . . يا عموووو 

لقيت ماما جايه من الاوضه 

~ ايه يا حبيبتي 

قولت بقلق

_ عمو خالد فين يا ماما ؟ و . . وعمار!

~ بيوصله للمطار 

_ ماما ! انا . . 

قاطعت كلامي وهي بتلف داخله الاوضه 

~ عمار قال مش هنصحيها نقلقها عالصبح كده

عمار سافر والبيت كان هادى وساكت بشكل بشع ، اليوم بقي مُمل أوي وكئيب في جزء من شعور الراحه والسلام الداخلي انسلب من جوايا مع سفر عمار ، يمكن رجعنا للوضع اللي كان موجود قبله بس انا كنت اعتادت وجوده خلاص وحبييت . . وحبيت وجوده حواليا . 

انتظرت انه يكلمني يوم واتنين 

اليوم بقي اسبوع 

الأسبوع بقي اسبوعين .

هو تقريبا مش معاه رقمي أصلا ولا يعرف أكونتاتي بس قولت يمكن سأل عمو خالد واخده منه .

_ عمو خالد هو . . 

كنت بفرك ايدي بإحراج 

_  اا عايزه يعني اسال حضرتك عن عمار 

~ كويس يا توتو 

رديت بلهفه 

_ هو انتو بتكلموه ؟

~ آه بكلمه علي طول 

_ امم 

اقوله ازاي انه واحشني دلوقتي او اني يعني عايزه اسمع صوته واكلمه بس ! فضلت السكوت أحسن .

بعدها باسبوع مقدرتش انساه لسه ، مش قادره ابطل تفكير فيه . . انتهزت فرصة ان عمو خالد اجازة وماما بتطبخ وقولت اسأله عن عمار تاني يمكن يرن عليه .

قعدت جنبه بهدوء وانا بقول 

_ ازيك يا عمو 

~ الحمد لله حبيبتي انتِ الدنيا معاكي ايه ! والشغل !

_ الحمد لله هو . . حضرتك كلمت اا . . . 

~ عمار ابني 

_ آه 

~ النهارده لأ بس كنت مكلمه من يومين 

_ اه هو بخير يعني 

~ اه يا توتو كويس 

طب إيه طيب مش كده يعني ، أوووف .

اتضطريت اسكت برضو وده كان الموقف اللي كل فتره بعمله .

كنت قاعده في المحل لقيت لؤي داخل اشتري اللي هو محتاجه وقبل ما يمشي ضحك وهو بيقول 

~ بطلتي تقراي ولا إيه 

بصيتله لحظه كده افتكرت انه بيكتب روايات وحلوه وبتاع رديت بابتسامه 

_ ليه يعني 

~ مشوفتكيش بتتفاعلي يعني علي الرواية الجديده ولا سألتي عليها 

_ هو في روايه جديده ؟ 

ضحك اكتر وهو بيقول

~ انتي قافله سوشيال ولا ايه ؟

_ لا بس مأخدتش بالي 

~ نزل 7 اجزاء من روايه جديده 

_ تمام هشوفهم 

بليل كالعاده سألت عمو خالد عن عمار وقالي

~ كويس يا توتو 

نفس الجمله بتاعت كل مره ، لكن المره دي ماما كانت قاعده جنبه ف قالت بسرعه 

~ بيسلم عليكي يا حبيبتي وبيسأل عليكي كل مره ابقي كلميه 

بصيت لعمو خالد اللي كان فيه صدمه خفيفه علي وشه ومسح علي دقنه بتوتر وبعدين بص للشاشه .

دخلت اخدت شاور عشان أهدي شويه بس افكاري مهديتش . .

_ هو ليه عمو خالد مش بيقولي انه بيسأل عليا ؟ 

_ ليه عمار مش بيطلب يكلمني ؟

_ عمو خالد يعرف اللي حصل بيني وبين عمار ؟

مية سؤال في دماغي مش لاقيه ليهم اجابات واضحه .

فتحت صفحة لؤي اقرا شويه عشان ابطل تفكير . . اتفاعلت علي السبع اجزاء وحطيت كومنت صغير علي السابع ك تشجيع يعني ، في نفس اللحظه جالي فريند ريكويست بصيت عليه لقيته من أكونت لؤي (نفس صفحة الروايات اللي انا متابعاها مش اكونت شخصي يعني) .

اترددت اني اقبل الريكوست بس حسيت ان راحتى في قبوله ف قبلته وقفلت ونمت ، صحيت ببص في الساعه لقيت جايلي مسدج من لؤي فتحتها بسرعه وانا بتعدل 

~ الروايه عجبتك ؟

_ جدًا 

~ مشوفتيهاش من بدري ليه ؟

_ منا قولتلك ماخدتش بالي ! 

~ قولتيلي ؟

_ لما سالتني في المحل 

عمل سين علي المسدج ومردش ، قومت فطرت وصليت وجهزت عشان الشغل ، فتحت الفون في المحل لقيت مسدج من لؤي

~ اه افتكرت 

عملت لاف وسكتت عشان حسيت بالذنب اني رديت اصلا .

الرواية نزل منها بارتين كمان وانا قررت اني مش هتفاعل عشان ميدخلش يكلمني تاني ، لكن منزلش منها تاني وبعد اسبوع لقيت مسدج منه دخلت اشوفها لقيته بيقول

~ عامله ايه يا تيا 

مردتش ومتفاعلتش وهو مبعتش حاجه تاني بعدها .

فات شهر ، فات اتنين تلاته

لؤي بطل ينزل روايات . . بيقابلني في الشارع يبصلي وبعدين يبص الناحيه التانيه علي طول ، ومعادش بيدخل المحل خالص 

وانا بطلت اسأل عن عمار من موقف لما ماما قالتلي انه بيسأل عليا وعمو خالد اتصدم انها قالت ، وبقيت أركز في حياتي واشغل نفسي طول اليوم وخلاص .

كنت راجعه من المحل بفتح باب الشقه سمعت صوت عمار ، قلبي اتقبض للحظه بس ركزت انه صوت فون . . دخلت لقيت عمو خالد وماما فاتحين فيد كول مع عمار وكان بيقفل معاهم وفعلًا قفل

_ سلام عليكم ورحمة الله وبركاته 

~ وعليكم السلام يا حبيبتي 

~ وعليكم السلام 

قعدت وحطيت شنطتي جنبي اترددت اني اسأل عليه بس قررت اني هسال 

_ هو . . كان عمار اللي علي الفون 

~ آه يا حبيبتي بيسلم عليكي 

_ هو بخير يعني 

~ اه الحمد لله 

_ تمام 

دخلت مع ماما المطبخ  بعد ما صليت وغيرت عشان نجهز الأكل

_ ماما هواا . . يعني . . 

بصيت ماما ليا 

~ ايه يا بت فيه ايه 

_ عمار يعني 

~ ماله 

_ مش هينزل تاني ولا ايه !

لفت ماما وشها وهي بترد عليا 

~ مش عارفه . . لما سالته هتنزل امتي قالي ادعيلي بس 

_ هو سافر ليه اصلا 

في اللحظه دي عمو خالد كان داخل يشرب ف قال

~ شغل يا توتو وقالي انه هيقعد كام سنه كده ويمكن ينزل لو معرفش يتجوز هناك 

ثواني كده . . يعني ايه هينزل لو معرفش يتجوز هناك ! يعني ايه بجد ! ايه يا عمو خالد انت بتهزر ولا ايه ، قول انك بتهزر والنبي . 

بعد كام شهر الأحداث فيهم زي ما هي لا بكلم عمار ولا اعرف عنه حاجه ولؤي بطل كتابه حتي مكملش اخر رواية ومش بشوفه كتير .

كنت قاعده في المحل سرحانه لقيت لؤي داخل يشتري حاجات ومعاه ولد صغنن سنتين تلاته مثلا ، كان معايا شيكولاته في شنطتي طلعتها للولد قبل ما يمشوا ونزلت لمستواه ابوسه وسألت لؤي وانا ببوس الولد 

_ يقربلك إيه 

~ دهه . .  ده اخويا 

_ ما شاء الله شبهك اوي ربنا يحفظه 

ابتسم وقالي 

~ الله يكرمك 

خلصت شغل ورجعت البيت كان عمو خالد في مشوار . . اخدت شاور ولبست بيجامه واسعه شويه وخرجت قعدت مع ماما لقينا عمو خالد داخل وبيكلم مع حد فون 

~ اه يا حبيبي وصلت اهو 

~ لا دخلت ليه 

~ ماشي حاضر بعد الغدا طيب 

 ~ سلام يا حبيبي

ألقي السلام ورديناه اتغدينا وعملت الشاي وبعدين عمو خالد مسك فونه وكان بيرن علي حد فيد كول ، فجاه طلع صوت عمار من الفون 

= ايه يا حج 

~ ام تيا معاك اهي يا حبيبي 

ماما اخدت الفون وقعدت تكلم عمار وانا رفعت الزعبوط احتياطي وفتحت الفون وقعدت اسكرول كاني مش مهتمه وكده يعني 

= ما تديني تيا يا طنط اسلم عليها كده 

يختاااااااي اهرب علي فيييين . . هو اه واحشني ونفسي اكلمه اوي بس التوتر يجدعان بقي هنعمل ايه وبعدين ثواني . . بقاله ٩ شهور مسافر ولسه فاكر يكلمني ! قطع افكاري لما لقيت الفون في ايدي وعمار بيقول 

= ازيك يا تيا 

ابتسمتله ورديت 

_ الله يسلمك عامل ايه 

= كويس الحمد لله ، بقي كده يا معفنه ده مكانش عيش وملح 

ضحكت وبعدين الضحكه اختفت لما اخدت بالي من دقنه . . اي ده هو عمار بيربي دقنه أصلا !  لقيته قال 

= وانا عمال اقول النهارده هتكلمك بكره هتكلمك وانتِ زي ما يكون ما صدقتي اني مشيت

ضحكت تاني وانا بقوله 

_ يعم ما انت مبتسألش انت كمان 

اتكلم بتريقه كالعاده 

= اه نسيت انك مسافره ومتغربه بقي وكده 

_ بس يا رخم ، خد عمو معاك اهو

المكالمه انتهت كنت مبسوطه اوي اني شوفته بس مستغربه طريقته . . هو تقريبا نسي انه كان بيحبني ولا ايه مش عارفه ايه الخنقه اللي جوايا دي مع اني مش بحبه خالص يعني .

بتمر الأيام وبرضو مش بنتكلم انا وعمار بس بسأل عمو خالد علي طول عنه وبقي يقولي انه سال عليا برضو ولؤي بدأ يعلن عن كتاب بيتكلم عن التوبه هينزل في المعرض السنه دي ، وحقيقي كان نفسي أجيبه ونفسي اكتر اروح المعرض ده  .

في يوم من الأيام ماما كانت بتسأل عمو خالد عن عمار وقالها 

~ لأ بقالي ٣ ايام مش بكلمه ان شاء الله يكون بخير 

~ طب ما ترن عليه يا خالد نطمن عليه كده 

~ مش بيفتح نت وقالي انه مش هيعرف يكلمنا حوالي اسبوع عشان مشغول . . 

سكت شويه وبعدين كمل 

~ بس قالي انه هيرن علينا يوم الاحد الساعه 10 بليل عامل مفاجاه 

ردت ماما 

~ مفاجأة ايه ؟

~ والله ما عارف هو قالي كده بس 

قعدت افكر وأعمل سيناريوهات للمفاجاه بتمر الأيام بين قلق وخوف وعدم راحه ومحاولة تخمين المفاجاه .

جه يوم الأحد كنت طالبه اجازه من صاحب الشغل لأني مش هقدر اخرج بالقلق ده . . صحيت من بدري وكانت الدقيقه بتعدّي فيه كأنها ساعات .

الساعه عشرهه 

بقت عشرهه وخمسه 

فون عمو خالد بيرن !

فتحت الأوضه بسرعه ووقفت علي الباب عمو خالد فتح المكالمه وماما كانت جنبه أول ما المكالمه بدات لقيت عمو خالد قام في لحظه 

~ ايييييه دههههه مشش مصددددق 

ماما ضحكت بفرحه وهي بتشد الفون عليها وبتقول

~  ايه المفاجاههههه الجميللله دي يا عماااار  

 سمعت صوت دوشه حوالين عمار ، اتحركت بهدوء ناحيتهم وببص في الفون لقيت . . .