رواية حب الفصل الرابع 4 - بقلم ايمان تامر

= تيا عايز اقولك حاجه مش قادر أخبي أكتر من كده الصراحه 

بصيتله شويه وهو كان باصص للبحر 

_ مم 

بصلّي وقال 

= هسألك سؤال الاول بس تجاوبي بصراحه 

_ مم 

بص للبحر 

لحظات صمت 

اتنهد ، وبعدين قال 

= انتِ بتحبي حد ؟ او معجبه يعن . . . 

رديت بسرعه وبدون تفكير وانا ببصله

_ لأ 

ابتسم بسمه خفيفه كده ولف وشه ليا ، حسيت وقتها عينه بتطلع قلوب 

= طب أنااا . . 

حسيت اني اتوترت متوقعتش هيقول ايه بس دخل قلبي توتر وبصيت حوالينا وهو مسح علي شعره وكان مثبت عينه عليا ، اول ما عيني جت في عينه تاني قال 

= بحبك يا تيا 

قلبي اتنفض من مكانه او انا كُلي اتنفضت أصلا ، مش ببادله الشعور او مش عارفه ، حسيت اني تايهه ، فضلت بصاله لدقايق وانا مصدومه شويه وبعدين لفيت وشي اتجاه العربيه وانا ببص في الفون وقولتله 

_ عمار انا اتأخرت لازم اكون في المحل دلوقتي 

ركبت العربيه وهو فضل واقف شويه وبعدين جه ركب ومشي بهدوء ، بدون ولا كلمه .

خلصت شغل ورجعت البيت ملقتش عمار معاهم قولت شوية وهينزل دخلت أوضتي أغير وهو منزلش باقي اليوم .

قعدت افكر فيه . . 

هل رد فعلي كان وحش !

 انا أحرجته طيب !

هو هيبعد عني كده !

طب انا عايزه ايه ? 

انا مش عايزه ادخل في علاقات دلوقتي اصلا ، بس انا ما صدقت ألاقي أخ وصاحب . . حد يبقي في ضهري وبيسمعني وبيهزر معايا . . مش هينفع أخسره ، لكن برضو شريك حياتي لازم يكون ملتزم أكتر مني ياخد بأيدي للجنه ويعيني علي العبادات ، عمار كسبان دنيا بس متجاهل الآخره شويه .

تاني يوم مشوفتش عمار ولما روحت الشغل ورجعت عرفت من ماما ان عمار نزل وانا بره قعد معاهم ، اليوم اللي بعده كذلك .

صحيت رنيت علي صاحب المحل بلغته اني تعبانه وهاخد يومين اجازة ، كنت عايزه أشوف عمار .

~ ايه يا توتو متأخره ليه 

_ مش هروح النهارده يا عمو 

~ في حاجه ولا إيه 

جت ماما بسرعه من المطبخ واتكلمت بقلق واضح 

~ مالك يا حبيبتي 

_ انا كويسه يا أمي ، بس قولت هقعد معاكم النهارده 

عمو خالد قام دخل اوضة عمار بصيت عليه لقيته في البلكونه بيعمل مكالمه .

في الوقت ده عمار نزل رن الجرس وبيفتح براحه ، جه عمو خالد  

~ ايه يا عمار اومال فونك فين  

= سلام عليكم ، فوق ، هواا . . مش الكوتشي ده بتاع تيا ؟

اتكلم عمو خالد بسرعه 

~ ما هي هنا اهي 

وقف مكانه مصدوم شويه ورفع وشه بصلّي وبعدين بص لعمو تاني 

~ كنت لسه برن عليك اقولك اا انزل عشان تيا هنا 

~ ما تدخل يبني هتفضل واقف علي الباب كده 

= اا احم لأ يا طنط ده انا نازل اقولكم اني خارج مع أحمد صاحبي شويه

عمار مشي حسيت انه خرج عشان لقاني موجوده ، بس ثواني هو قالي انه صاحبه هنا لؤي بس مين احمد بقي ! كنت متضايقه أوي طول اليوم .

_ انا داخله انام يا ماما تصبحي على خير 

~ بقولك يا توتو 

_ نعم 

~ هتمشي بكره الساعه كام عشان لو كده هاخدك معايا أوصلك 

_ مش هنزل يا عمو بكره 

~ هو في حد مزعلك هناك !

_ لأ والله انا اللي عايزه اقعد يومين بس ان شاء الله هنزل بعد بكره 

تاني يوم قررت ان لما عمار ينزل حتي لو هيخرج هوقفه اكلمه واشوف هو مش عايز يكلمني ولا يشوفني ليه هسأله علي كل حاجه ، بس عمار منزلش .

~ خالد هو عمار مش هينزل يتغدا ؟

~ لأ يا حبيبتي مش فاضي النهارده 

~ هو رافض ياكل معانا ليه انا حاسه انه فيه حاجه 

باس راسها وقال 

~ لا متقلقيش مفيش حاجه 

نفخت بضيق وقولت بدون تفكير 

_ عمو خالد انا عايزه اشوفه 

عمو خالد بصلي للحظه وبعدين قال 

~ هقوله وارد عليكي حاضر بس في حاجه يعني 

حسيت اني غرقت نفسي بالتسرع ده ، رديت 

_ ل لأ يا عمو 

بعدها بساعه لقيت عمار نازل ، قعدنا شويه وعمو خالد قام ياخد شاور وماما قامت تعمل كيكه ، ببص علي عمار لقيته باصص في الفون وساكت .

رفع وشه ليا وقال  

= بابا قال انك عايزاني

_ ل لأ اه . . هو انت زعلان مني 

بص في الفون وهو بيرد 

= لأ يا تيا 

نفخت بضيق وبصيت للناحيه التانيه 

= انا عرفت رأيك وخلاص ، انسي بقي اللي حصل وانا مش هفتحه تاني 

بصيتله بسرعه 

_ بس انت فاهم غلط 

رفع وشه ليا تاني 

= ازاي 

_ . . . 

مكنتش عارفه أقوله ايه بامانه ، بس عايزاه يفهمني ، فضلت ساكته ف اتكلم هو 

= ما تردي 

_ . . . عمار انت عارف اني بحاول أقرب من ربنا و . . 

رد بتريقه 

= وانا داقق الصليب يعني ولا إيه ؟

بصيتله وسكت ، عرفت انه مش هيفهمني كده ، قام وقف وقالي بضيق وتريقه

= عموما يا ست الشيخه انا موجود كأخ لو احتاجتي اي حاجه في اي وقت  

قومت وقفت بسرعه ، هو كده زعلان برضو مش هقدر اقول اني متعلقه بيه بس احساس انه هيبعد ده مزعلني 

_ عمااار 

= عرفي بابا اني طلعت بقي 

 

قعد حوالي أسبوع مش بشوفه غير ممكن وانا راجعه من الشغل يكون خارج من العماره مثلا ، كان يبصلي بطرف عينه كده ويقول

= ازيك يا تيا 

قبل ما ارد بيكون مشي أصلا .

وانا راجعه البيت بدخل العماره لقيت لؤي خارج منها ف ابتسلمي وقال

~ ازيك يا . . كان اسمك إيه !

ابتسمت وانا بقوله 

_ الله يسلمك اسمي تيا 

_ اا الكاتب بنفسه عندنا

ضحك وقال

~ اها كنت بسلّم علي . . عمار 

ابتسمت وانا بدخل من البوابه

  _ تمام عن اذنك

طلعت ولقيت ماما بتجهز الغدا بس تقريبًا في ضيوف جايين عندنا ، اخدت شاور ودخلتلها المطبخ 

_ ايه يا ست الكل 

~ تعالي يا تيا كملي حشو السمبوسه دي علي ما اولع علي المحشي 

_ هو مين جاي عندنا 

~ مفيش حد بس خالد قالي ان عمار هيتغدا معانا النهارده وقالي أعمل أكل حلو زي العزومات يعني

فرحت أول ما عرفت انه هينزل النهارده بس قلبي كان مقبوض شويه ، خايفه . . خايفه ميكلمنيش برضو ويتجنبني أو متوتره مش عارفه الحقيقه .

عمار نزل قعد مع عمو خالد في الصاله وانا مع ماما في المطبخ بس سمعته بيقوله 

~ كل حاجه جاهزه !

= ايوه يا بابا ادعيلي 

ماما قالت 

~ يلا اخرجي الأطباق دي 

خرجت وانا متوتره ، بصلي عمار وانا بحط الاطباق وقالي 

= ازيك يا تيا 

لفيت وشي للمطبخ وانا برد 

_ الله يسلمك 

خلصنا الأكل و عملت الشاي وشربناه ، عمار بيهزر هو وبابا وماما لكن مش بيكلمني او بيكلمني خفيف بس انا متضايقه ف مش برد عليه .

فجأه لقيت عمو خالد بيقول 

~ هتقول ولا اقول انا يا عمار !

لقيت عمار بص عليا 

عينه في عيني لثواني

 ابتسم ابتسامه هاديه أوي 

ويمكن مكسوره شويه 

وبعدين لف وشه لباباه وقال 

= قول انت يا بابا 

~ . . .