رواية حب الفصل الاول 1 - بقلم ايمان تامر

كنت بدور في الادراج كلها  علي ورقة اهداف السنه اللي بتنتهي عشان اشوف حققت إيه .

لقيت كتاب الغلاف بتاعه شدّني مسكته وقعدت ، قرأت الملخص وفهمت انها روايه ، حسيت اني عايزه أقرأها بس هستني لما عمو خالد ييجي استأذنه .

عمو خالد جه من الشغل واتغدينا ف اتكلمت وانا بلم الأطباق مع ماما 

_ عمو خالد فيه روايه في درج التسريحه كنت بدور علي حاجه ولقيتها 

~ اه يا توتو مالها 

_ ممكن اخدها اقرأها 

~ خديها يا حبيبتي

انا "تيا" عمو خالد ده جوز ماما تزوجته من 4 سنين بحُكم ان بابا متوفي ، عمو عايش لوحده وابنه مسافر بره مصر ف كان سهل اني اكون مع ماما عنده عادي بعد ما عرفت انه من المحارم .

اخدت الروايه فعلًا وبدات قراءه فيها طريقة السرد جميله أوي وأحداث الروايه تحفهه ، شدّتني لدرجة اني خلصتها في أسبوع . 

الكاتب كان اسمه لؤي ، في نهاية الكتاب فيه باركود فيسبوك وانستجرام ، دخلت  عملتله فولو ، كنت متابعه الروايات الجديده أول بأول وبتفاعل باستمرار لما بيوقف شويه بين الرواية والروايه بقرأ انا من القديم . 

~ توتي تعالي أقولك حاجه يا قلب ماما 

_ نعم حبيبتي 

~ عمار ابن خالد جاي كمان يومين ، مش عايزاكي تكوني خايفه من حاجه هيكون اخ ليكي ان شاء الله واتعاملي معاه بحدود وباحترام ، خالد بيشكر فيه متخافيش

~ هيقعد أسبوع معانا علي ما يشوف حد يظبطله شقته وهيبقي يقعد فيها بقي 

_ وهيسافر امتي يعني 

~ هيستقر هنا خلاص 

~ سلام عليكم ورحمة الله وبركاته 

_ عليكم السلام 

~ وعليكم السلام ورحمة الله، كنت لسه بقولها ان عمار جاي اهو وهي مرحبه بالفِكره ومبسوطه انه هيكون معاها أخ 

~ توتو مش عايزك تزعلي هو هيقعد أسبوع واحد وينقل في شقته

_ لا يا عمو خالد مش زعلانه ده انا مبسوطه فعلا كان نفسي في اخ من زمان

مكنتش فاهمه هما بيقولوا كده ليه ، لغاية ما بحثت وفهمت ان عمار مش من محارمي وقتها بس فهمت ليه هما فاكرين اني هتضايق منه .

 هلتزم بالبس الشرعي في البيت مش مشكله ده هو أسبوع يعني وانا في الأغلب هكون في المحل مش هتقابل معاه كتير .

انا كان نفسي في اخ وسند زي صحابي يا ربّ أقدر احس اني لقيت أخ يبقي في ضهري علي طول وسند ليا بجد .

بطلت اقرأ اليومين دول عشان بنجهز في أكل لليوم اللي هييجي فيه .

الاكل جهز وانا وماما لبسنا وعمو خالد اخد العربيه وراح يجيب عمار من المطار .

الجرس رن ماما فتحت وانا كنت واقفه بعيد شويه متوتره بس في شعور طمأنينه خفيفه كده ، دخل شويه نزلوا الشنط من ايديهم وبصلي ف اتكلم عمو خالد وهو بيشاور عليا 

~ دي بقي تيا يا ميرو 

ابتسمتله وهو كمان ، قرب يمدّلي ايده وهو بيقول 

= ازيك يا تيا 

اتكلمت وانا برفع ايدي علي صدري 

_ بعتذر مش بسلم 

بص في الأرض باحراج واعتقد وشه اصفر وقتها ف ابتسم وقال 

= لا ولا يهمك

اتغدينا ومشيت للمحل ولما رجعت كان في اوضته لغاية معاد النوم ، تاني يوم صحيت علي صوت الفون بيرن(صاحب المحل) رديت 

_ سلام عليكم ورحمة الله وبركاته 

~ وعليكم السلام ورحمة الله، معلش يا تيا معرفتش اكلمك امبارح بس المهم متجيش بقي المحل عشان الرجاله هتشتغل من النهارده في تقسيم المحل ولما يخلصوا هبلغك 

_ تمام يا عمو ماشي 

قفلت معاه وخرجت قولت لماما وعمو خالد اني هقعد كام يوم بقي ، فات يوم واتنين والأمور الي حدٍ ما مستقره بس عمار مبيخطلتش بيا انا خالص ، شاكه انه عشان احرجته وهو داخل .

صحيت النهارده ملقتش حد في البيت خالص 

_ طب عمو خالد في الشغل ، ماما وعمار فين ؟ 

غسلت وشي واتوضيت ودخلت اوضتي صليت وكنت بقرأ قرآن شويه بس سايبه باب الاوضه مفتوح ، الجرس رن وبعدها لقيت حد بيفتح براحه بصيت علي باب الشقه لقيته عمار 

~ أحم 

_ اتفضل

لقيته دخل علي المطبخ علي طول ، قومت روحتله 

_ ع . . عمار لو سمحت تعرف ماما فين 

~ نزلت تتسوق وانا جبت الفطار اهو بتقولك جهزيه علي ما تيجي 

جهزت الفطار وماما جت فطرنا وشربنا الشاي انا وماما وبعدها ماما قامت تنضف المطبخ وتعين الحاجه اللي جابتها وكان عمار قاعد يتفرج علي مسلسل .

بصيت عليه بطرف عيني وبعدين لفيت وشي له وقولتله

_ عمار هو انت زعلان مني ! 

اتكلم وهو باصص علي الشاشه 

= ليه يعني 

_ أأ  عشان مسلمتش عليك

= لا عادي 

_ طب مش عايز تتعرف عليا مش احنا اخوات 

بصلي وقال 

= قولت اسيبك براحتك يمكن مش عايزه تتعرفي عليا كمان 

بصيت للشاشه وفركت ايدي بتوتر 

_ ل لأ عادي 

وبعدين بصيتله وانا بكمل بسرعه 

_ هنكون اخوات بس بحدود عشان الدين بس 

= خلصانه 

_ امم 

كتم الشاشه وبصلّي وهو بيقول 

= انا عمار خريج هندسه وكنت شغال مهندس في الامارات بس خلاص بقي الغربه وحشه برضو 

_ مش بقالك كتير مسافر 

= 7 سنين بس لو قعدت العمر كله وعملت البلد بحالها صحاب ليا برضو غربه 

_ اها ، وانا تيا 

فضل باصصلي وساكت كام ثانيه كده وبعدين ضحك وقال 

= منا عارف انك تيا ، ها 

_ هه ههه في تالته تجارة انجلش ، اشتغلت في حضانه شويه بس مقدرتش وحاليا بشتغل في محل *** 

= وشغاله ليه أصلا ، سمعت ان بابا كان رافض بس انتِ اصريتي 

_ اها عمو خالد كان رافض بس انا بقيت أزهق من قعدة البيت ومليش صحاب ف قولت انزل شغل 

قعدنا نتكلم كتير ، اتصاحبنا بس اللي عرفته انه طايش شويه ، بيحب الاغاني بيقطع في الصلاه اوقات وكمان له علاقات مع بنات ك صحوبيه .

فات يومين وعلاقتنا بقت عباره عن اننا بنرخم وبنألش علي بعض بس طول اليوم .

كنت قاعده في جنب بالفون وبقرأ رواية ل لؤي لقيت عمار جه من برا وقعد جنبي ، كنت مندمجه اوي في الروايه لدرجة انه كلمني وانا مسمعتش ، ف بص فالفون معايا وقال 

= دي رواية ***** ؟ 

انتبهت وبصيتله 

_ انت بتقرأ روايات ؟

= ب ... لأ بس عارفها بتاعت لؤي دي صح ؟

_ ايوووووه عارفه ازاي وانت مش بتقرأ 

بصلي شويه وهو مبتسم وبعدين قال . . .