رواية ألفة ووصال (كاملة جميع الفصول) حصريا عبر دليل الروايات بقلم ايه شاكر
رواية ألفة ووصال الفصل الاول 1 - بقلم ايه شاكر
- سيبي بقا الموبايل اللي في إيدك ده! مش كفايه رافضه دكتور أد الدنيا أي واحده تتمناه...
- يعني ايه دكتور يعني! أنا أصلًا مش بحب الدكاتره أنا عايزه أتجوز مكانيكي أو نجار أو سباك أو حداد...
قمت وقفت وقلت بابتسامة:
- راجل يكون عنده عضلات كده عشان يـ...
- عشان يصبحك بعلقه ويمسيكِ بعلقه.
قالتها أمي بسخرية واتبدلت نظراتها للحدة وهي بتكرر كلمة حداد، فخوفت تجوزني لإبن عمي، قلت بتوتر:
- بصي أنا مش عايزه أتجوز خالص يا ماما!
اتأملت أوضتي الواسعه اللي فيها بلكونة بتجيب هوا لطيف يداعب أنفاسي ويلامس إحساسي، وقلت:
- حد يسيب الأوضه الفخمه دي عشان يتجوز حتة دكتور!
وقفت والدتي ورشقتني بنظرة اخترقتني وقالت:
- هتقعدي مع العريس يا ايمان رغم أنفك...
قالتها وهي تمسك بأنفي، فتحسسته مجرد ما تركته...
مش عارفه ليه مضايقاها مناخيري ! دايما تتريق عليا، وتفكرني بيها رغم اني بحاول أتناسيه، ممكن يكون عريض شويه لكنه مقبول، أضافت أمي:
- أنا معرفش العريس ده معجب بيكِ ازاي بالمناخير دي!
- ما هي دي غلطتك لو كنتِ نقيتِ مناخير جوزك اللي هو بابا مكنتش أنا هعاني دلوقتي...
تنهدت بعمق وقلت:
- أوووه كم أن روحي تُعاني!
ضـ ـربتني أمي بذراعي فتأوهت.
طلعت أمي من الأوضه وهي برده بتسخر مني ومن أنفي، بصيت في المراية وأنا أتحسس أنفي وقلت:
- ما به أنفي؟ والله إنه لجميل!
فتحت موبايلي أكتب خاطرة غزل بأنفي الأنيق، لكني فوجئت بإيد أمي بتسحب الموبايل من إيدي، وقالت:
- الموبايل دا لحس دماغك... مش هتاخديه إلا لما توافقي على حاتم... الدكتور حاتم...
قالت أخر جملة وهي بتضغط على حروفها، فقلت بتحدي، وبنبرة مرتفعة:
- مش هيحصل.
قعدت مكاني أبص للفراغ.
أمي ساقت تراب الأرض عشان يقنعني بحاتم! خالتي وعمتي وجدتي، وجيراني، وصديقتي، ووالدي وصديقه لحد ما بقيت أمشي في شارعنا فيوقفني صاحب البقالة ويقول:
- إيه يا إيمان لسه محيره أمك ومش موافقه على العريس! يا بنتي دا دكتور...
جذبني من أفكاري دخول أخويا صاحب ١١ عام وأصغر مني بتسعة أعوام، سحب الكرسي وقعد قصادي، بصيت لذراعه اليمين اللي امتد وطبطب على كتفي، وسمعت صوت تنهيدته العالية وقوله متظاهر بالرجوله:
- إيه يا قلب أخوكي! مش موافقه على الدكتور ليه! فضفضي... قوليلي مين الشاب اللي ضاحك عليكِ وأنا أروح أتكلم معاه... هااا... مين النجار السباك الحداد اللي بتحبيه؟!
خلعت شبشبي فوقف أخويا، وقال بنبرة مرتفعة:
- يا ماما! أكيد حد ضاحك على بنتك... تلاقيها بتحب حداد ولا نجار.
- اخــــــــــــــــرس.
قلتها بصوت عالي فاتنفض وجري لبرهة الأوضه وسمعت صوت قهقهته، فصفعت الباب وراه، وقعدت، مسكت بقلمي رفيقي وصديقي، لأكتب ما يعتل به صدري:
«مش مرتاحه! هو ده مش سبب مقنع عشان أرفض أي عريس؟!»
طُرق باب أوضتي فتجاهلته، واضطريت أفتح مع استمرار الطرق والإصرار، شوفت أخويا التاني واقف مبتسم ومادد ايده بموبايلي، قال باستفزاز:
- اتفضلي خالتك على التلفون يا أمو مناخير...
أخدت الموبايل من ايده ولم أُبالي باللي وصفني بيه، أنا خلاص اتعودت إني أسمع لقب «أم مناخير» منهم فتأقلمت عليه حتى نسيت اسمي!
قفلت الباب في وشه، فضحك.
رديت على خالتي، قلت بدون سلام:
- لو هتتكلمي على العريس فانسي.
- جرى ايه يا أمو مناخير مش عايزه تقعدي مع العريس ليه! إنت متخيله إن هيجيلك فرصه زي دي تاني!!
- أنا ليه محدش فاهمني... قولتلكم مش مرتاحاله.
- طيب خلاص بلاش العريس، أنا مكلماكِ عشان موضوع تاني، تعالي نقعد إسبوع في شقه بتطل على البحر نصيف ونقضي يومين تريحي أعصابك وأعضائك ونرجع ان شاء الله... إيه رأيك؟!
- موافقه طبعًا اعتبري الشنطه جاهزه.
تحمست، ومكنتش عارفه اللي منتظرني؟
" ليتني لم أذهب معهم إلي تلك الغردقه وهل قصرت معي غرفتي بشيء!! لا والله."
******
في اليوم الأول بالغردقة
شوفت حلم جميل أني بغوص في البحر بين الشعب المرجانية، وفجأة شوفت صنبور مياه فتحته فاندفعت مياهه في وشي، ففتحت جفوني فخسيت بميه تلامس بشرة وجهي بالفعل، كان ابن خالتي صاحب الثلاث أعوام اللي لا ينفك يروي الأرض وما فوقها من ماء نهره الجاري الذي لا ينقطع.
كان واقف فوق راسي وبيغسل وشي بماء بوله، فصرخت وقبل ما أخد حقي وأضـ.ـربه جرى على أمه وهو ييعيط ويصرخ، بيعيط! هل لأنني قطعت لحظاته السعيدة أثناء تبوله على وجهي؟
قمت من سريري ووقفت أصرخ باشمئزاز.
بصيت لنفسي بالمرآة شعري متبهدل من النوم وكمان مش هخرج من دون نقابي، أصابني الندم ووقفت أمسح وشي متقززة، وفي نفس اللحظة دخلت خالتي للأوضة، قالت:
- مزعله بودي ليه يا إيمان؟!
صرخت في وشها:
- أنا اللي مزعلاه!! الواد عمل بيبي على وشي يا خالتو...
ضحكت خالتي وقالت مازحه:
- أنا متعوده منه على كده... متقلقيش دي مايته طاهره ومفيده للبشره كمان.
مسحت وشي وأنا بقول بقرف:
- طاهره ازاي يا خالتو!! دي حاجه تقرف والله... شوفيلي الحمام يا خالتو خليني أستحمى.
- طيب يلا عشان نلحق نروح البحر.
قالتها وطلعت هي بتضحك، وكنتُ بدبدب في الأرض بتقزز من ملابسي المبلله...
استمتعت باقي اليوم على الشاطئ وشكرت الله أنني جئت معهم، حقًا! لحظات السعادة تمحو الحزن من القلب.
******
وفي المساء.
دخلنا مدينة الملاهي، اتشغلت خالتي بأولادها فسرحت شويه أتأمل الأطفال وأتخيل نفسي طفلة، فأنا لم أستمتع بطفولتي؛ كم أغبطهم!
وفجأة، لقيت نفسي لوحدي التفتت يمين وشمال فجميع أشيائي من موبايل وأموال مع خالتي...
بدأت جولة بالبحث في وجوه الناس يمكن ألاقي خالتي وملقتهاش، كنت هعيط ونظراتي بتدور في ملامح المارة من حولي حتى أنهم كانوا يلتفتون إليّ حين يلاحظون حيرتي.
وقفت مكاني، معرفش طريق للعودة إلى البيت وأدركت واعترفت لنفسي إني تائهة...
قلت بنبرة متحشرجة:
- أنا ممكن أبان كبيره لكني والله تايهه من عائلتي... إنتِ فين يا خالتو... يارتني ما جيت الرحله دي.
دموعي كانت هتنزل لولا صوته:
- إيمان!!
التفتت… قلت:
- دكتور حاتم!! بتعمل إيه هنا؟!
- جاي مع عيلتي فسحه... وإنت؟
- كنت جايه مع عيلتي بس...
شعرت بمؤامرة، فقلت بفراسة:
- إنتَ عرفتني ازاي بالنقاب؟! ولا متفق بقا مع خالتي؟! هي تتوهني وإنت تلاقيني وتقعد بقا تتكلم معايا وتقنعني أتجوزك لا انسى... فوق...
ضحك وقال:
- هو إنتِ تايهه؟! على العموم أنا أعرفك من وسط ألف منتقبه، عندي الحاسه السادسه بيكِ.
مقتنعتش ومتهزتش ومش هوافق عليه مهما حصل، دا أخو الحرباية «شروق» وأخوه متزوج من الحرباية الثانيه «أسماء».
طلع موبايله وكلم خالتي ووصلني ليها زي طفلة صغيرة تائهة، حضنت خالتي، وأعطتني موبايلي وقالت:
- عشان لو توهتِ تاني.
حاتم كان واقف جنبنا بيكلم جوز خالتي، وبعدين بصلي وفجائني:
- مين اللي فبرك صور نجمه يا إيمان؟ لو عايزاني أبعد عن طريقك جاوبي على السؤال ده.
ضحكت بسخرية من نفسي، يعني هو عايز يعرف الحقيقة عشان كده بيجري ورايا! عايزني أقوله سر احتفظت به سنتين وحلفت لنجمه إني مش هفشيه.
ولا أقول إن «أسماء» هي اللي عملت كده! ونشرت صور مزيـ.فة لنجمه وهي السبب في كل معـ.ـاناة «نجمه»، تنفست بعمق وقلت:
- قول بقا إنك مش عايز تتجوزني ولا حاجه وإن مطاردتك ليا طول الوقت ده عشان تعرف مين اللي نشر الصور!
- لأ أبدًا... أنا فعلًا معجب بيكِ وعايز أتجوزك، لكن لو إنتِ رافضه هتجوزك بالعافيه يعني؟!
- تصدق بالله... هتصدق إن شاء الله، إنت وأختك عينه واحده، فوله وانقسمت نصين، وأنا مش هريحك يا دكتور حاتم روح اسأل نجمه إنما أنا مش هقول حاجه.
- وأنا مش هسأل حد، وهتجوزك يا إيمان، وإنتِ اللي هتقوليلي وده وعد مني.
قالها ومشي، فقلت بنرفزة:
- دا في خيالك.
التفت وبصلي بنظرة تحدي مغلفة بالثقة وابتسم قبل أن يغادر، ويترك دقات قلبي بتدق في سرعه بقلق وحيرة.
قلت لنفسي:
- تتجوزني؟! ماشي وأنا قبلت التحدي يا… دكتور حاتم لنرى من الرابح.
•تابع الفصل التالي "رواية ألفة ووصال" اضغط على اسم الرواية