رواية نغم (كاملة جميع الفصول) حصريا عبر دليل الروايات بقلم لبنى دراز
رواية نغم الفصل الاول 1 - بقلم لبنى دراز
مؤلمة تلك الدمعة التي تسقط، و أنت صامت تسقط من شدة القهر، والألم، والاحتياج.
💔💕💔💕💔💕💔
نخفي حزناً و وجعاً و دموعاً أحياناً خلف عبارة (أنا بخير) تباً لعزة النفس و سحقاً لواقع لا يوجد به احتواء صادق.
💔😢💔😢💔😢💔
كنت مدللة والداى فأصبحت بين ليلة و ضحاها يتيمة الأبوين منذ الصغر و تركونى وحدى وسط مجتمع لا يعلم للرحمة عنوان فهذا قريب أمتلك أمرى فـ أكل مالى تحت مسمى الوصاية .
و عندما أراد الله إنصافى و رزقنى بصاحب القلب الرحيم وأصبحت زوجة و أم أتى من أستحل وحدتى و ضعفى و أخذ مني أبنائى بعد رحيل زوجى عن دنيا البشر و ها أنا أظل وحيدة بين وجعى و دموعى
نغم بقلمى✍️______________لبنى دراز
تعريف الأبطال
نغم الهلالى:: 45 سنة مهندسة أرملة و صاحبة شركة مقاولات صغيرة هادية جدا و دايما حزينة
إياد العامري:: 24 سنة مهندس مدنى شبه والده جدا جرئ و يقول الحق حتى لو ع رقبته
أسيل العامري:: 24 سنة توأم إياد خريجة هندسة ميكانيكا سيارات و ماسكة الشركة مع عمها
وليد العامري:: 55 سنة رجل أعمال صاحب شركات تجميع سيارات رغم اسمه و قوته إلا انه ما يقدرش ياخد أى قرار من غير رأى أمه
غالية السواح:: 75 سنة ست رغم كبر سنها إلا انها جبروت و كلمتها بتمشى ع الكل و هنشوف هتعمل ايه مع نغم ع مدار الاحداث
باقى الأبطال حسب الظهور
نغم بقلمى✍️____________لبنى دراز
فـ مكتب نغم
قاعدة فـ مكتبها غرقانة فـ شغلها و فجأة سمعت صوت دوشة و زعيق جامد و الباب اتفتح مرة واحدة و شافت
نهى:: السكرتيرة يا استاذ ما ينفعش كدا بقولك
وليد:: و انا قولت لازم اقابل نغم يعنى لازم أقابلها
نغم:: وقفت و بزعيق .. فى ايه يا نهى ؟؟
وليد:: ايه يا نغم مش فاكرانى و لا عاملة نفسك مش عارفانى يا بنت الهلالى
نغم:: بصدمة .. وليد !!!!
وليد:: ايوا وليد يا نغم هانم ايه افتكرتينى ؟؟
نغم:: قعدت مكانها و ساكتة مش بتنطق
وليد:: بعصبية .. ظهرتى تانى ليه يا نغم راااااجعة تانى لييييه بعد السنين دى كلها أحنا ماصدقنا العيال نسيوكى راااااجعة تفتحى الجراااااح من تانى لييييه
نغم:: بأنهيار .. هووو ميييين اللى رجع و جراااااح أييييه اللى اتفتحت .. الجراح ما اتقفلتش اصلا يا وليد ما اتقفلتش عشان تتفتح و اوعى تفتكر ان ولادى مهما قولتولهم عنى هينسونى انت فاااااااهم عمرهم ما هينسونى
وليد:: رجعتى تانى ليه بقولك ظهرتى فـ حياتنا تانى لييييه
نغم:: رجعت منين يا وليد انا ما بعدتش عشان ارجع انتوا اللى أخدتوا ولادى مني و هربتوا و انا ليا سنيييين طويلة بدور عليكم ماسبتش مكان ممكن تكونوا فيه الا و روحته مالاقيتش حد منكم
وليد:: أبعدى يا نغم أمشى سيبى البلد دى .. انا متابع أخبارك من زمان و عارف أنك مهندسة شاطرة تقدرى تنقلى مقر شركتك لـ أى بلد تانية
نغم:: بقوة و مين ادالك الحق أنك تأمرنى أسيب ولادى و بلدى و لا دى أوامر الست غالية يا وليد بيه
وليد:: أمى كبرت يا نغم و مش هتستحمل تسافر و تبعد تانى و مش هتقبل بوجودك و لا هتقبل انك تظهرى فـ حياة إياد و أسيل مرة تانية
نغم:: اسمع يا وليد نغم الضعيفة اللى استغليتوا وحدتها و ضعفها و أخدتوا منها ولادها دى انتهت من زمان مـ ـاتـ ـت مع طارق .. اللى قدامك نغم تانية و بُعد مش هبعد و ولادى مسيرهم يعرفوا ان عمهم و جدتهم كدبوا عليهم و ساعتها هيرجعوا لـ حضنى اللى سرقتوهم منه
وليد:: يبقى بتجنى ع نفسك يا نغم
نغم:: مابقيتش أخاف من تهـ ـد يد اتكم يا وليد و يلا من غير مطرود اطلع برا برااااااا
وليد:: انا مااااشى بس خليكى فاكرة لو إياد و أسيل عرفوا انك أمهم ما تلوميش غير نفسك يا نغم
و بالفعل مشى وليد و قعدت نغم بكل وجع السنين و دموعها اللى مش بتقف تفتكر حياتها و سنين عمرها اللى عدت من اول ما دخلت الجامعة و اتعرفت ع طارق العامري
"فلاش باك"
فـ الجامعة
اول يوم فـ الدراسة و داخلة نغم مع حياة صاحبتها الكلية و تايهين مش عارفين اى حاجة و شايفين الشباب و البنات كابلز و مجموعات و قالت
حياة:: ( استوووب .. حياة أبو ضيف عمرها 18 سنة صديقة نغم و عايشين مع بعض فـ أوضة فوق سطوح بعد ما اتخرجوا من المدرسة الداخلى) بأنبهار .. يالحووويي ايييه تاه دى دولة جوة دولة يا أما
نغم:: فعلا يا حياة طول عمري بسمع ان الجامعة دى عالم تانى خالص غير العالم اللى أحنا فيه
حياة:: اييييه يا بنتشى الله المستعان ع العالم ده .. تعالى تعالى نشوف المـ ـخر وب المدرج ده فين
نغم:: ايه يا بنتى اللى بتقوليه ده .. أبوس أيدك يا حياة بلاش طريقة كلامك دى هنا انتى شايفة الطلبة شكلهم حلو و محترمين مش عايزين حد يقول علينا بيئة
حياة:: حيلك حيلك يا حاجّة انتى .. اللى يدور عليهم الحلوين دول يلاقيهم من كاع المجتمع ايش فهمك انتى
نغم:: بتهز دماغها بنفاذ صبر .. هى اسمها كاع برضوا يا طالبة الهندسة يا متعلمة يا بتاعة المدارس
حياة:: يا ستى انتى هتقرفينى ليه بالكاف و لا بالقاف هتفرق يعنى .. فوتى ياختى قدامى نسأل حد عن مكان المدرج
وفعلا شافوا شاب داخل باين عليه من هيئته انه مش طالب مستجد زيهم
حياة:: شافته و تنحت .. بت يا نغم شايفة المز اللى داخل علينا ده تعالى نسأله شكله مخلل هنا مش نيلة جديد زينا كدا
نغم:: بزهق .. أمشى يا حياة نسأل اى بنت يلا
حياة:: لأ بقى كبرت فـ دماغى و هسأل المز القمر ده
طارق:: ( استووب طارق العامري دكتور جامعى و له حكاية مع نغم هنعرفها كمان شوية).. ماشى بثقة و سمعهم بس كمل طريقه لغاية ماسمع
حياة:: بس بس كابتشن ممكن سؤال لو سمحت
طارق:: بيشاور ع نفسه .. بتكلمينى انا
حياة:: أيوا يا قمر انت ممكن سؤال و النبي
طارق:: لـ حياة و عينيه راحت تلقائى ع نغم اللى واقفة و باصة فـ الارض .. أتفضلى عايزة تسألى عن ايه
حياة:: شكلك كدا خبرة هنا و مبلط فـ الخط مش جديد زينا
طارق:: بصدمة .. نعم !!
حياة:: قصدى يعنى شكلك قديم هنا .. يوووه بقى
طارق:: بزهق .. خير يا انسة عايزة ايه بالظبط
نغم:: بهدوء و رقة .. أسفة لـ حضرتك بس صاحبتى بتحب تهزر و معلش عايزين نعرف مدرج ( A) فين
حياة:: اه يا قمر و النبي أحيات أبوك اصلنا لسة اول سنة جامعة و كلية الهندسة كبيرة و تايهين فيها مش عارفين نوصل يعنى
طارق:: بهدوء لـ نغم المدرج قصادك ع طول أهو و لـ حياة و أنتى لو بطلتى معاكسة فـ خلق الله و ركزتى شوية كنتى شوفتى انك واقفة قصاده و سابهم و مشى
حياة:: بتريقة.. يـ ـخـ ـربيت تقلك يا جدع و بتقلده وبتخن صوتها لو بطلتى معاكسة فـ خلق الله .. ماهو انت اللى مز فـ نفسك كدا و عاملى فيها عبده المهم
نغم:: بكسوف .. عاجبك كدا يلا بينا بقى عشان نلحق اول محاضرة
و بالفعل دخلوا المدرج اللى انبهروا بيه جدا و بوسعه و قعدوا فـ أول صف
حياة:: بذهول.. شايفة يابت يا نغم المدرج واسع و كبير ازاى يالحححووى ده يشيل الحارة بتاعتنا و حارتين كمان ببيوتهم و عربياتهم و موتسيكلاتهم و فرن عم ابراهيم باللى فيها
نغم:: أهدى بقى و أركنى انبهارك ده دلوقتي ع جنب عشان سمعت ان الدكتور زمانه داخل و بيقولوا مابيتفاهمش فـ ياريت تسكتى شوية
حياة:: حاضر ياختى سكت اهو .. بس تعالى هنا سمعتى منين أبت الكلام ده
نغم:: يا بنتى ما الطلبة داخلين بيتكلموا اهو يعنى هكون سمعته فين بس
حياة:: لسة هترد شافت باب المدرج اتفتح و داخل منه الدكتور .. و برقت اوى و لـ نغم بهمس .. يا نهار فحلوقى ده المز اللى عاكسناه برة استر ياللى بتستر يا أرض انشقى و أبلعيييني
طارق:: عينيه ع نغم و حياة و هو بيعرف نفسه .. صباح الخير و كل سنة و انتم طيبين .. احب اعرفكم بنفسى انا دكتور طارق العامري هكون معاكم ان شاء الله طول السنة .. فيه شوية تعليمات صغيرة كدا عشان نبقى ع نور .. مبدئيا كدا وجودكم فـ كلية الهندسة ده معناه انكم متفوقين دراسيا و عينيه تانى ع حياة و أخلاقيا يعنى ملتزمين مش بتمشوا تعاكسوا فـ خلق الله
حياة:: بهمس لـ نغم أحيه يابو سوسو شكله بيلقح عليا ده و لا ايه
نغم:: بنفس الهمس عاجبك كدا يا بلوة انتى اهو طلع دكتور مش طالب
طارق:: بقوة .. اولا ماحدش يدخل بعد مني لـ أى سبب كان .. ثانيا و دى الأهم طول ما انا جوة المحاضرة و بتكلم احب اسمع صوتى بس بمعنى أن مافيش حد يهمس للى جنبه و لا حتى لنفسه بمعنى أدق أرمى الأبرة فـ الارض يسمع صوتها اللى قاعد أخر المدرج مفهوم .. ثالثا انا بحب أعمل اختبارات كتير ع مدار السنة عشان أعرف مستوى الطلبة بتوعى و أعرف أقيّمهم صح .. اللى مستواه هينزل فـ أى وقت ياريت من نفسه ما يكملش و ما يحضرليش بعد كدا لانى مابحبش اتعب نفسى مع حد فاشل .. أتمنى يكون كلامى مفهوم لأنى مش بحب أكرره مرتين و دلوقتي نبتدى المحاضرة
حياة:: بهمس لـ نغم يا نهار ألون منقرش بـ أسود و ده هنكمل معاه السنة ازاى بسحنة أمه الكئيبة دى
نغم:: بنفس الهمس أنكتمى و أتلمى بقى قبل ما ياخد باله و يطردنا
طارق:: أخد باله فعلا و وقف شرح المحاضرة و شاور لهم يقفوا .. أعتقد انا قولت ممنوع الكلام الجانبى اثناء الشرح و قولت مش بحب أكرر كلامى صح؟
نغم:: أسفين يا دكتور مش هتتكرر مرة تانية
طارق:: أسفكم غير مقبول و المرة دى هكتفى بطردكم من المحاضرة انما لو اتكررت المرة الجاية يبقى هتتمنعوا من حضور محاضرتى لأخر السنة مفهوم ؟ و دلوقتي اتفضلوا برة
و بالفعل خرجت هى و حياة من المحاضرة و هى محرجة بسبب طردها وقالت
نغم:: عاجبك كدا يا بلوة من اول يوم ننطرد من المحاضرة حرام عليكى يا حياة أكيد هيحطنا فـ دماغه بسببك و مش بعيد يشيلنا المادة
حياة:: ياستى فكك بقى انتى هتصدعينا ليه المرة الجاية نبقى ندخل و نغطس وسط الطلبة مانقعدش فـ اول صف و هو مش هياخد باله مننا أصلا
نغم:: أبوس أيدك يا حياة انتى عارفة أحنا تعبنا قد أيه عشان نوصل لغاية هنا بلاش تضيعى تعبنا ده بتهريجك و أستهتارك .. هنا غير المدرسة خالص ده عالم كبير علينا لو ضعنا فيه مش هنوصل للى أحنا عايزينه
حياة:: بت أنتى ما تاكليش دماغى و بلاش تبقى ضعيفة كدا و ايه يعنى الدكتور طردنا من المحاضرة يعنى كان طردنا من الجنة ياختى بقولك ايه انا جعانة هروح ادور ع حد بيعمل أكل فـ الملاهى اللى أحنا فيها دى هتيجى معايا و لا هتفضلى قاعدة زى خيبتها كدا
نغم:: لأ روحى أنتى انا قاعدة هنا مش رايحة فـ مكان
و بالفعل مشيت حياة و سابت نغم لوحدها .. فـ نفس الوقت كانت خلصت المحاضرة و خرج طارق من المدرج و شاف نغم و قرب منها
طارق:: بجدية .. شكلك هادية غير صاحبتك خالص ياريت تبعدى عنها لأنها هتاخدك فـ سكتها و يضيع مستقبلك بسببها
نغم:: بأعتذار .. و هى باصة فـ الارض .. أسفة يا دكتور اللى حصل جوة مش هيتكرر تانى
طارق:: أنا هقبل اعتذارك بس لو اتكررت تانى مش هقبله و ياريت تسمعى كلامى و بلاش البنت دى
نغم:: بحزن .. ما أعرفش غيرها من و أحنا صغيرين مع بعض فـ كل حاجة بس هى و الله طيبة و شاطرة جدا مشكلتها بس انها بتاخد كل حاجة بهزار
طارق:: أختك؟
نغم:: ببراءة .. لأ بس انا و هى مالناش غير بعض
طارق:: تمام المرة الجاية تحضروا المحاضرة و بلاش كلام اثناء الشرح عشان مش هسامحكم تانى
نغم:: حاضر يا دكتور بعد أذنك و قبل ما تتحرك شافت
حياة:: جاية بتهلل و مش واخدة بالها من طارق .. نغووومة بت انغم انتشى ابت خدنا افراج ياختى و فيش محاضرة تانية ابت افرحى يلا هنرجع الصومعة بتاعتنا
نغم:: بتشاور لـ حياة تسكت و هى مش فاهمة
حياة:: بغباء .. فى أيه يا بت مالك هى القطة كلت لسانك و لا يكونش المز ابو رجل مسلوخة طلع من المحاضرة و قالك حاجة ؟؟
طارق:: اممممم و لـ نغم وهو بيشاور ع حياة .. لأ فعلا شكلها شاطرة انا حذرتك و انتى حرة
حياة:: بصدمة .. أحييييه و بهمس سمعه طارق و نغم المز بنفسه يالحححويييي
طارق:: برفعة حاجب .. لـ حياة شكلك هتقعدى معانا كتير و تبلطى فيها
حياة:: هى مين دى لامؤاخذة يا دكتور اللى هتبلط فيها انا أه أبان كدا لكن انا لهلوبة و أعجبك و بعون الله شوف هفاجئك
طارق:: وهو بيلبس نضارته الشمسية .. هنشوف و سابهم و مشي
نغم:: بعتاب عاجبك كدا انتى مش ناوية تعقلى بقى و تبطلى طريقتك دى
حياة:: فكك مني و قوليلى المز ده كان واقف معاكى ليه ها .. هى الصنارة غمزت من اول نظرة و لا ايه
نغم:: صنارة ايه اللى غمزت يا حياة انا كنت بعتذرله عشان المحاضرة الجاية
حياة:: اممممم🤔 اومال كان بيحذرك من ايه قرى و أعترفى
نغم:: أقولك و ماتزعليش
حياة:: قولى ياختى
نغم:: منك
حياة:: نعععععم يا الدلعدى
نغم:: اه بيقولى أبعد عنك عشان مستقبلى ما يضيعش
حياة:: و انتى هتقدرى تعمليها يا نغم
نغم:: أكيد لأ طبعا يابلوة هو انا ليا غيرك بس ياريت تعقلى بقى و تخليه يغير الفكرة الهباب اللى خدها عنك دى
حياة:: بتعدل ياقة البلوزة .. دعونا نعمل في صمت .. يا ماما أنا مابحبش اتكلم عن نفسى أعمالى هى اللى بتتكلم عنى
نغم:: بهزار تباً لتواضعك يا شيخة أمشى ياختى قدامى خلينا نروح
و بالفعل خرجت نغم و حياة من الكلية و راجعين الحارة مبسوطين بـ أول يوم دراسة رغم كل اللى حصل معاهم ع مدار اليوم
________________________
فـ ڤيلا العامري
قاعدة بكل جبروت تؤمر و تتأمر ع الناس اللى شغالين عندها
غالية:: بزعيق .. انتى يا هنية يااااا هنيييية
هنية:: الشغالة أمرك يا ست غالية هانم
غالية:: اييييه نايمة ع ودانك ساعة عشان تردى
هنية:: أبدا يا ستى و الله اول ما ندهتى جيت ع طول أهو تحت أمرك
غالية:: خلصتى الغدا و لا لسة وليد و طارق زمانهم راجعين
هنية:: خلصت كل حاجة يا ستى حتى أكل البهوات الصغيرين اللى طلبته شيرين هانم كله خلص
غالية:: طيب غورى ع المطبخ اول ما يوصل وليد و طارق تجهزى السفرة
هنية:: حاضر ياستى .. و دخلت جرى و هى زهقانة من تصرفات غالية
بعد شوية وقت صغيرين وصل
طارق:: دخل بكل حب باس إيد غالية .. أزيك يا أمى عاملة ايه النهاردة
غالية:: بأبتسامة .. بخير يا حبيبى الحمدلله طمنى عملت ايه النهاردة فـ الجامعة
طارق:: هعمل ايه يعنى يا ست الكل .. كان عندى محاضرة واحدة بس خلصتها و قعدت شوية مع زمايلى و جيت
غالية:: برجاء .. طب مش ناوى بقى تفرح قلب أمك و تشوف بنت الحلال اللى تريح قلبك
طارق:: لسة ما آنش الآوان يا أم طارق
غالية:: ليه بس يا حبيبى انت ناقصك ايه بقى مال و جمال و مركز اجتماعى ماشاء الله ألف واحدة تتمنى نظرة منك
طارق:: باس إيدها .. و انا مش عايز من الألف دول غير واحدة بس قلبى يحس بيها و ساعتها هقولك تعالى اخطبيهالى
غالية:: يعنى يا طارق و لا واحدة من بنات العيلة و بنات شركائكم فـ الشغل قدرت تحبها
طارق:: و هو قايم طالع أوضته .. دول يا أمى عاملين زى العروسة المعروضة فـ المحلات ننبهر بيها بس مانشتريهاش .. أما اللى انا عايزها لازم تكون جميلة برة و جوة
غالية:: دايما كدا تاعب قلبى معاك مش زى أخوك أبدا
________________________
فـ الحارة نفس الوقت
داخلين حارتهم بعد ما رجعوا من الكلية و سمعوا هيصة و زيطة و دوشة و هى داخلة
حياة:: أصحوووووا يا حارة الباشمهندسة اللى هتظبطكم و تعملكم إعادة بناء لـ جماجمكم وصلت
نغم:: بنفاذ صبر من حياة .. أيه اللى بتقوليه ده أهدي بقى و وطى صوتك ده
حياة:: أستنى انتشى بس لما نشوف أم فاروق بتزغرط ليه .. أقطـ ـع دراعى ان ما كانت بتزغرط لـ جوزها تلاقيييه أخيرا عرف ههههههههههه
نغم:: بصدمة .. ايييه
حياة:: ماذا بكى يا أختاه اتصدمتى ليه ياختى
نغم:: بنرفزة .. انتى مالك انتى بالكلام ده
حياة:: بأندهاش .. كلام ايه يابنتى هو انا قولت حاجة غلط انا اقصد عرف يشتري لها التلاجة اللى نفسها فيها .. ضميرك ده نوتى خالص دايما بتفهمينى صح ههههههههههههه
نغم:: طيب يلا قدامى ع البيت عشان جعانة و تعبانة جدا
حياة:: يلا ياختى .. و بالفعل و هما داخلين البيت سامعين صريخ جارتهم أم أبراهيم و الحارة اتلمت
نغم:: بخضة .. خير يا خالتى ام ابراهيم فى ايه
أم أبراهيم:: بصريخ .. الواد أبراهيم يا نغم يابنتى
حياة:: بخضة .. ماله اتـ ـخـ ـطف
أم أبراهيم:: بصريخ أعلى .. لأ يا حياة يا بنتى
حياة:: اومال ماله اتقبض عليه
أم أبراهيم:: ياااااااررررريييييت
حياة:: بخضة أكبر يالههههوى مااااات البقاء لله ربنا يصبر قلبك
أم أبراهيم:: يااااااريته مااااات غار فـ داهية و لا كان عمل عملته السوووودة يا ميلة بختى يااااختاااااااى
واحدة من الجيران:: عمل أيه ياختى ابراهيم
أم أبراهيم:: سرررررقنى ياااختاااااااى فتح كيسى و سرق منه 20 جنيه و هرب الحراااامى
حياة:: بغيظ .. يـ ـخر بيييتك بقى يا ولية يا معـ ـفنة قالبة الحارة و بتكاكى عشان 20 جنيه .. ماهو انتى اللى بخيلة و تلاقيه يا كبد أمه طلبهم منك و انتى اللى استندلتى معاه عشان كدا خدهم من وراكى يا بخيلة
نغم:: لـ حياة بس بقى عيب اللى بتقوليه ده الست قد مامتك اطلعى قدامى يلا و بلاش فـ ـضـ ـايح
حياة:: و هى طالعة .. بقول ايه يعنى الولية المعـ ـفنة نازلة ويك ويك ويك قولت ابنها جراله حاجة و فـ الاخر طلعت بتصوت عشان 20 جنيه و بصت وراها ع تحت يااااامعـ ـفنة يا جلدة بتصوتى عشان 20جنيه مش جايبين كيسين إندومى وكيس شيبسى
نغم:: بنفاذ صبر .. يا بنتى انتى مالك أطلعى ساكتة بقى
حياة:: طلعت ياختى أهو توب علينا يارب من البيت ده و بلاويه و اللى بيجرا فيه
و فعلا طلعوا و دخلوا اوضتهم اللى فوق السطح و هى عبارة عن اوضة بـ حمام و فيها سرير واحد و دولاب صغير و ترابيزة عليها بوتاجاز مسطح و مطبقية
نغم:: دخلت و حدفت نفسها ع السرير بتعب أخيرا هناااام
حياة:: انتى يا بنتى مش قولتى جعانة
نغم:: لأ هنام الاول شوية و بعدين لما أقوم أبقى أكل
حياة:: طب خدينى جنبك ياختى
و بالفعل ناموا الاتنين من كتر التعب بسبب السهر من فرحتهم بأول يوم جامعة و تحقيق اول خطوة فـ مستقبلهم
______________________
فـ الجامعة
تانى يوم نغم و حياة داخلين م البوابة الرئيسية للكلية و هما داخلين شافوا طارق نازل من عربيته و شافوا معاه صاحب عمره دكتور أحمد الاسيوطى مطرقع و غاوى معاكسة فـ الطالبات و شاف حياة و نغم داخلين و عينيهم ع طارق و بيتهامسوا
حياة:: بهمس بت انغم الحقى المز ابو رجل مسلوخة اهو
نغم:: رفعت عينيها فـ ثوانى و نزلتها بسرعة .. ياريت تمشى و انتى ساكتة و إلا فعلا هسمع كلامه و أبعد عنك
حياة:: من غير وعى زعقت لدرجة ان طارق و أحمد سمعوها .. تعمليها يا نغم ؟ تقدرى تعمليها و تبعدى عنى؟
نغم:: أرجوكى يا حياة وطى صوتك انا نصحتك كتير و قولتلك بلاش طريقتك دى
حياة:: بمقاطعة .. طب أسمعى بقى يا نغم يا بنت عم مصطفى الله يرحمه طريقتى مش هغيرها و صوتى مش هوطيه و عايزة تبعدى ابعدى و يلا بقى هااا
أحمد:: قرب من حياة .. مالك يا عسل متعصبة ليه
حياة:: بنرفزة و انت مالك انت يا بارد ده ايه ياختى تلاقيح الجتت دى ع الصبح
أحمد:: بمعاكسة .. انا بس حابب أخدم يا قمر
حياة:: أخدمك يوم خرجتك يا بعيد قول انشالله و لـ نغم يلا انتى كمان ع الزفت المدرج لما نشوف سى الدكتور اللى ما جاش امبارح ده شكل سحنة أمه ايه هو كمان و مشيوا فعلا دخلوا المدرج
طارق:: بنفاذ صبر من أحمد صاحبه و حياة .. لله الأمر من قبل و من بعد و لـ أحمد بهمس قابل كان الله فـ عونك
أحمد:: بنفس الهمس اوعى تقول ان الكلام ده عليا أزعل
طارق:: هو برضوا مش انت اللى اعتذرت أمبارح و لا انا بيتهيألى
أحمد:: لأ أوعى تقولها
طارق:: مش فاهم يا أخرة صبرى اقول ايه بالظبط
أحمد:: أن المجنونة اللى كانت بتزعق دى من الطلبة الجداد اللى عندنا السنة دى
طارق:: بيهز دماغه بمعنى أيوا .. و من حسن حظك هتدخل تلاقيها فـ وشك ع طول
أحمد:: بتهريج .. ده أحنا ليلتنا فل بالصلاة ع النبي .. وسع يا أبنى لما ندخل نعاين قصدى ندخل المحاضرة ههههههههههههه
طارق:: ربنا يهديك يا أحمد مش هترجع أنت الا لما تتعلق و تتدبس فـ واحدة من اللى بتعاكسهم دول
أحمد:: حط أيده ع كتف طارق شوف يا طاروقة البنات دول عاملين زى طبق الحلويات المشكلة ايش فهمك انت بس
طارق:: بذهول .. طبق حلويات !! يـ ـخـ ـر بيت تشبيهك
أحمد:: ده أحلى تشبيه يابنى و الله .. أسمع بس دلوقتي انت لو قدامك طبق حلويات و هتاخد منه حتة كنافة هتكتفى و لا هتدوق حتة جلاش كمان طب دوقت الجلاش معقول هتسيب الطبق من غير ما تدوق الزلابية و لا تدوق البسبوسة و يا روحى ع البسبوسة طرية كدا و دايبة فـ العسل دوووب و لا صوابع زينبو يا لهوييييى عليها ههههههههههههه
طارق:: بضحك .. خليك عايم كدا فـ الحلويات لغاية ما تجيلك كومة سكر تجيب أجلك .. أدخل أدخل ألحق المحاضرة
فـ المدرج
نغم و حياة دخلوا المدرج و قعدوا برضوا فـ اول بنش مستنيين الدكتور لما يدخل و قالت
حياة:: لما نشوف سى المعتذر ده شكله ايه
نغم:: يا بنتى انتى انا عايزة افهم بس شكل الدكتور هيفرق معاكى فـ ايه يعنى
حياة:: أكيد طبعا يفرق يا فالحة لو كان فرفوش كدا و بيحب يهزر هناخد منه المعلومة كدا و تلزق فـ النافوخ ع طول اما لو كان زى المز ابو رجل مسلوخة ده هستخبى منه و الله المستعان عليه بقى
و شوية و هى لسة بتتكلم شافت باب المدرج اتفتح و دخل منه أحمد و اول ما شافها غمزلها من غير ما حد ياخد باله
حياة:: اول ما شافته .. بهمس لـ نغم يا ليلة طشييين روحت فـ داهية رسمى
نغم:: بنفس الهمس .. ياريت تتلمى بقى ده تانى دكتور تقفشى معاه أبوس أيدك عايزين نخلص تعليمنا بسلام و ناخد البكالوريوس من غير ما نشيل سنين الله يخليكى
حياة:: الله بقى وانا مالى مش هما اللى واحد فيهم عامل فيها عبده المهم و التانى زى الفرقع لوز بيتنطط ع أجله و أخره شكله كدا هياخد بالشبشب
نغم:: و عينيها ع أحمد .. طيب اسكتى بقى عشان الدكتور ما ياخدش باله زى دكتور طارق و يطردنا هو كمان
أحمد:: و عينيه ع حياة ابتدا يخبط بالقلم ع الترابيزة اللى قدامه .. انتباه من فضلكم صباح الخير فـ الاول كل سنة و انتوا طيبين عام دراسى سعيد عليكم ان شاء الله انا طبعا قبل ما أعرفكم بنفسى و أتعرف عليكم عايز اعتذرلكم انى ما قدرتش أكون موجود معاكم أمبارح بس ان شاء الله هكون معاكم ع مدار السنة و هنتقابل يومين فـ الأسبوع بـ مادتين و طبعا المادتين مكملين لـ بعض و دلوقتي أعرفكم بنفسى و طبعى قبل ما نبتدى المحاضرة
حياة:: بزهق لـ نغم يـ ـخـ ـر بيت كدا كل واحد يدخل يقول أعرفكم بنفسى و بطبعى يكونش داخلين يخطبوا
أحمد:: خد باله من حياة و قبل ما نغم ترد قالها بجدية .. ممكن تقفى لو سمحتى
حياة:: بتسأل و هى بتشاور ع نفسها .. أنا ؟
أحمد:: بجدية .. أيوا أنتى ممكن تقفى
حياة:: وقفت بزهق أفندم يا دكتور
أحمد:: ممكن أتعرف عليكى
حياة:: نعععم !!!
أحمد:: أتخضيتى ليه ؟ عايز أعرف اسمك ايه ؟
حياة:: أسمى حياة محمد أبوضيف
أحمد:: طيب يا حياة شايفك من وقت ما دخلت و انتى بتتكلمى كتير و ملامحك بتقول انك معترضة ع كلامى
حياة:: أبدا يا دكتور مش معترضة و لا حاجة ثم حضرتك لسة ما قولتش حاجة يعنى عشان اعترض عليها
أحمد:: بالظبط كدا انا لسة ما قولتش حاجة اتفضلى أقعدى و ياريت ماتتكررش تانى لو عايزة تفضلى مستمرة معايا
حياة:: أسفة يا دكتور مش هتتكرر و هى بتقعد .. جواها كل واحد راسم نفسه عشان دكتور طب و دينى لا ابقى دكتورة أنا كمان و أرسم نفسى زيكم بس ها
أحمد:: ابتدا يعرف نفسه .. أنا أحمد الاسيوطى بيقولولى صديق الطلبة لانى بحب اقعد معاهم كتير بس مش معنى كدا اننا ناخد ع بعض و الهزار يعدى حدود التعامل .. انا بسامح و التمس العذر اول مرة بس يعنى حضرتك دخلت متأخر بعدى هسمحلك تدخل المحاضرة اول مرة و مش هسألك أتأخرت ليه أنما المرة التانية مش مسموحلك تدخل وتعرف من نفسك كدا و ماتعرضش نفسك للأحراج و الطرد و نفس الشيء للكلام الجانبى برضوا بسامح أول مرة بس و التانية لو بصتلك تفهم من نفسك و تستأذن بأدب و تخرج من المحاضرة و ده برضوا منعا للأحراج قصاد باقى الدفعة تمام كدا و دلوقتي نبتدى المحاضرة
و أبتدا بالفعل أحمد فـ شرح المحاضرة ساعتين كاملين و حياة و نغم مركزين جدا طول الوقت و أخيرا خلصت المحاضرة بـ جملة أحمد ان شاء الله المرة الجاية هسأل فـ الكلام ده و أشوف مستواكم من خلال تركيزكم معايا النهاردة و خرج من المدرج
نغم:: اوووف ايه ده المادة دى شكلها صعب اوى
حياة:: و هى بترقص حواجبها بس دكتورها شكله لذيذ و مطرقع أوى ههههههههههههه
نغم:: يا بنتى انتى جاية تتعلمى و لا تعاكسى الدكاترة
حياة:: يا حبيبتى اسكتى انتى بقالنا سنين فـ المدرسة الداخلى وشنا فـ وش شوية بنات الدكاترة اللى هنا مزز عنهم ده غير وش ميس انشراح اللى يقـ ـطع الخميرة م البيض مستكترة يعنى عليا اعاكسهم شوية
نغم:: طيب يلا قدامى الـ break تقريبا نص ساعة تعالى ناكل حاجة انا جعانة
حياة:: يلا ياختى و هما ماشيين ناحية كافيه الكلية شافت
أحمد:: لـ حياة .. بخ
حياة:: بصت له من فوق لـ تحت و كملت طريقها هى و نغم
أحمد:: بس بس بس يا عسل انت ياللى ماشى طب عبرنا عشان منظرنا
حياة:: وقفت بنرفزة .. تصدق هتصدق ان شاء الله انا هخلى منظرك مسخرة لو ما بعدتش عن طريقى دلوقتي
أحمد:: ليه بس يا دميل ده انا غرضى شيريف
حياة:: ده عندها يا حيلتها
طارق:: من وراهم لـ أحمد انت مش ناوى تعقل شوية بقى
حياة:: بصتلهم بأحتقار و مشيت .. أه هى باينلها سنة سودة من اولها واحد يطردنا و التاني يعاكسنا
نغم:: أمشى بقى خلينا نفطر و نلحق المحاضرة التانية
عند أحمد و طارق
أحمد:: عينيفة أوى البت دى
طارق:: يا أبنى اتلم شوية بدل ما تلاقى نفسك تريند ع السوشيال ميديا بسبب عمايلك دى
أحمد:: و ماله أنا راضى .. أبقى تريند ع أيد مزة أحسن ما أبقى قاعد مبطوط زى الوزة ههههههههههههه
طارق:: يـ ـخـ ـر بيت أمثالك مش عارف انا .. أنت دكتور فـ كلية هندسة و لا فـ شارع الهرم .. أمشى قدامى يلا خلينا نحضر مع دكتورة هدى المحاضرة بتاعتها
أحمد:: لأ دمها تقيل ع قلبى و بعدين انت بتحضر عشان رسالتك هى اللى بتشرف عليها أحضر انا لييييه ؟ ثم انا عندى محاضرة تانية يلا اشوفك بعدين سلام
و بالفعل مشى أحمد و طارق دخل يحضر المحاضرة وسط الطلبة عادى جدا
نرجع لـ نغم و حياة
بعد ما فطروا مشيوا دخلوا المدرج و قعدوا مكانهم من غير ما ياخدوا بالهم من طارق اللى قاعد وراهم ع طول و بيرغوا بصوت عادى بس هو كان سامع
نغم:: بحزن .. مش عارفة يا حياة عايزة أشوف شغل تانى جنب المكتبة استاذ سعيد مش راضى يزود المرتب و انتى عارفة مصاريف الكلية عاملة ازاى
حياة:: و مين سمعك يابت يا نغم ده راجل جلدة شكله يقرب لـ أم أبراهيم ههههههههههههه
نغم:: طيب و بعدين هنعمل ايه معاش بابا مع مرتب المكتبة مش هيكفى
حياة:: طيب ما تبعتى لـ عمك مش انتى برضوا مسؤولة منه
نغم:: اه مسؤولة منه اوى ياختى .. أسكتى بالله عليكى ده واحد ما صدق بعد موت بابا و ماما رمانى فـ مدرسة داخلى عشان ما يتحملش مسؤوليتى و كان أخرى اشوفه مرة فـ السنة و هو بيدفع المصاريف .. إلا ما سأل عنى و شافنى عملت أيه فـ المدرسة و لا يعرف بعد ما اتخرجت منها روحت فين تفتكرى هيساعدنى دلوقتي اسكتى أسكتى فكرى معايا بس خلينا نشوف مكان تانى نشتغل فيه مع المكتبة
حياة:: بتنهيدة وجع .. أحنا اللى عملنا فـ نفسنا كدا كان لازم يعنى نتنيل و نحقق طموحنا و ندخل كلية الهندسة كان ماله معهد الخدمة الاجتماعية سنتين زى الفل و أقلب
نغم:: بدموع .. كان حلم بابا و ماما يا حياة و انا نفسى أحققلهم حلمهم
حياة:: طاااايب يا فالحة تقدرى تقوليلى فـ الكلية الزفت العملية دى هتشتغلى ازاى شغلانتين مع المذاكرة و المحاضرات
نغم:: بحزن .. الله المستعان بقى و اسكتى عشان الدكتورة دخلت
طارق:: وراهم و سامع كل كلامهم و جواه مش عارف ليه قلبه وجعه من كلامهم و تقريبا طول وقت المحاضرة وهو مش سامع و لا كلمة و كل تركيزه مع نغم و اللى أتفاجئ بمستواها هى و حياة و تركيزهم العالى جوة المحاضرة و قرر يساعد الاتنين بشكل غير مباشر
نغم بقلمى✍️______________لبنى دراز
:: ده أخر كلام عندك يا نغم ؟؟
نغم:: أيوا ده أخر كلام عندى
•تابع الفصل التالي "رواية نغم" اضغط على اسم الرواية