رواية صالحة أخت منصور الفصل السابع 7 - بقلم حياة محمد الجدوى
الجزء ٧
اهدى البارت ده Dalia Ammar
واتمنى اكون عند حسن ظنك
&&&&&&&&&&&ـــ&&&&&
بصت له صالحه بصدمه وقالت: أنا ضيعته أنا ....فين منصور يا عمى
رد متولى وقال: ضيعتى اخوكى الغلبان وهو إللى شال بلوتك
فتحت صالحه عيونها بصدمه وهى بتسمع عمها بيقول؛: منصور محبوس بتهمة الشروع في قتل ياسر ابن العمده
صرخت صالحه: : منصور اخويا إزاى منصور مالوش دعوه
رد الحاج سعيد: إزاى يابنى مش الموضوع مع البت
حسانين: ماهو بعد ما اتقطع المحضر القديم
عشان نخلص البت بس فيه جنايه وواحد مضروب بالسكينه فهيتهموا مين يعنى غير اللى الموجود
صرخت صالحه: لا إلا اخويا ده أنا اطربق الدنيا عليهم هما يشيلوها للغلبان ده عشان يخلصوا ابنهم ده انا هفضحهم في البلد كلها وقامت بسرعه تخرج من البيت فشدها متولى من شعرها وقال: على فين راحه تفضحينا تانى وتفرجى علينا الناس تانى
صرخت صالحه: سيبنى يا عمى اروح القسم واقول لوكيل النيابه
رماها عمها على الأرض وصرخ فيها والشر يتطاير من عنيه : تروحى فين يا كلبه مش كفايه فضحتينا وفرجتى علينا الناس انتى شايفه الشارع ده رجلك مش هتلمسه تانى حسانين:شارع إيه ده حتى مش هتعتبى عتبة الباب ده وأنا بقى إللى هربيكى من أول وجديد.
وارتفعت صرخات صالحه وهى بتنادى على منصور وعمها بيقول لها وهو بيضربها: صوتك ده ما اسمعوش تانى سامعه يابت
ردت صالحه وهى منهاره مابين دموعها: حاضر حاضر صوتى أهو ( وحطت إيدها على فمها )مش هتكلم ومش هطلع صوتى بس هاتولي منصور هاتولي منصور انا ماعرفش اعيش من غيره
متولى وهو يضربها: ضيعتى اخوكى وبتقولى ماقدرش اعيش من غيره كنتى اتربى بدل الوسا،خه وقلت الأدب دى كنتى اتلمى بدل سيرتك اللى على كل لسان
صالحه بوجع: حاضر حاضر بس ارحمنى ابوس ايدك ارحمنى
متولى: كنتى رحمتينا انتى بدل مانتذلل للعمده عشان مايفضحناش بسببك
جريت صالحه على جدها تتحامى فيه وهى بتقول بوجع: الحقنى يا سيدي خليهم يرحمونى ياسيدى
حاول جدها يحميها منهم لكن صوته الضعيف مش ظاهر من اصواتهم العاليه حاوطتها بذراعه الضعيف الهش لكن قوته راحت ففشل انه يحميها من بطشهم فبدأ يقول بصوته اللى أهلكه المرض وكبر السن: سيب البت يا حسانين ارحمها يا متولى هتموت في إيدكم
رد متولى بعصبيه: يارتها تموت وتخلصنا من عارها الكلبه دى فضحتنا وخلت الناس تشمت فينا
ردت صالحه وهى تأن من شدت الوجع: يارتنى أموت وارتاح منكم يارب خدنى منهم يارب
رد حسانين: يارب اجعلها ساعة اجابه وخلصنا منها
الحاج سعيد بوهن: يابنى حرام عليكوا اعملوا اعتبار لشببتى
حسانين: ماانت لو كت ربتها عدل ما كانتش عملت فينا ده كله بس انت إللى دلعتها وركبتها علينا وكل ما نقول لها غلط تدافع عنها كان لازم اقطع إيدها من أول ما مدتها تسرق مننا لكنك كنت بتشجعها وأدى النتيجه بت فا....ره. ملهاش كبير بس أنا هاربيها من اول وجديد وهاكسر دماغها سمعانى يابت إياك اشوفك بره البيت ولو فيه شحات اهبل اتقدم لك هجوزك له غصب عنك وابقى عيشى معاه مانتى بتحبنى الهبل . وسابها وخرج فزحف جدها على إيديه ورجليه لحد ما وصل لها وهى متكومه على الارض وجسمها كله جروح وعلامات زرقاء من كثرة الضرب شد راسها ووضعها على رجله وقال بصوت مخنوق بالدموع : صالحه يابنتى ردى عليا صالحه
فتحت صالحه عيونها وقالت بوجع: فين منصور يا سيدي
الحاج سعيد وعيونه بتزرف بالدموع: حاسه بإيه يابنتى
صالحه وهى بتهذى من شدن الوجع: يارب أموت ...يارب خلصنى من الدنيا دى فين منصور يا سيدي عايزه اشوفه قبل ما أموت
رفع الحاج سعيد شاله على وجهه وقعد يبكى جنبها من الضعف وقلة الحيله.
وبعدها خرج تليفونه من جيبه وضغط على رقم فرد عليه بيومى: أزيك يا أبه
الحاج سعيد وهو بيبكى وبيشهق من البكاء: برضايا عليك يا بنى تعال خلص البت دى
بيومى بقلق: فيه إيه يا ابه حصل حاجه مال صوتك
الحاج سعيد: برضايا عليك تعالى دلوقتي خد البت هيموتوها ويبقى ذنبها في رقبتنا كلنا ألحقنى يا إبنى
بيومى: حاضر يا أبه بس انت اهدى وأنا هتصرف وقولى حصل إيه
الحاج سعيد: تعال دلوقتى ماتستناش لبكره البت هتروح منى ابوس ايدك
بيومى: ماشى انا هتصرف وقفل السكه
منى: عمو الحاج ده يا بيومى
بيومى وهو بيتصل برقم اخوه: أيوه
منى: طب عايز ايه
بيومى: مش عارف انا بتصل بمتولى افهم منه
وبعد شويه قام بيومى بسرعه وقال: أنا رايح البلد دلوقتي حالا
منى: خير فيه حاجه
بيومى: مش عارف اخواتى بيقولوا كلام كتير مش فاهمه بس
منى: يمكن الموضوع مش مستواها
متولى: ابويا بيتصل عليا وهو بيعيط وتقولى مش مستاهل ابويا ماعيطش لما مات عبد الحى اخويا الله يرحمه كان واقف زى الجبل فلما يكلمنى دلوقتي وهو بيعيط يبقى فيه مصيبه كبيرة انا رايح حالا
أما عن حال منصور فماختلفش عن حال صالحه كان في حالة هيجان شديدة.فقد اصدرت النيابه ارساله لمستشفى الأمراض العقليه للتأكد من حالته العقليه والنفسيه ومعرفة مدى إدراكه ووعيه قبل تحويل القضيه للمحكمه . وبسبب حالة الهيجان والاضطراب اللى فيها اضطروا لإعطائه حقنه مخدره عشان يقدروا يسيطروا عليه.
&&&&&&&&&&&&&&&&&&&
كان قاعد على الأرض وراس صالحه على رجله وفجأه شافه قدامه بيبص له بحزن وبعدها قال: كده ياأبه تعمل كده في اولادي ياأبه هى دى الأمانه إللى أمنتك عليها وبعدها سابه ومشى
الحاج سعيد: ليه يا بنى بتدينى ضهرك بص لى يا عبد الحى
- ضيعت ولادى الاتنين يا أبه ضيعت الاتنين ياأبه وبدأ يبعد
الحاج سعيد: استنى يابنى ماتمشيش استنى ياعبد الحى
فتح عينه الحاج سعيد فجأة وهو بيتشاهد ويستغفر ربنا ورفع شاله يمسح عرقه بعدها قال بضعف: ليه يا عبد الحى ليه تسيبنى وتمشى يا غالى .بص لقى نفسه على سريره فهب بفزع وقال: صالحه وقام بسرعه يتسند على الحيطه لحد ماوصل لصالحه اللى نايمه على الأرض فقعد جنبها وناداها صالحه ردى عليا يا بنتى .
رفعت صالحه رأسها بتعب وقالت: فين منصور يا جدى
سحبها راسها من على الأرض فقامت معاه بتعب فضمها لصدره وهو بيطبطب على ظهرها وبيمسح على رأسها.فبكت صالحه على صدر جدها وقالت: انا والله ماعملت حاجه غلط انا تربية إيدك يا سيدى
الحاج سعيد: بطلى عياط يابنتى
صالحه: أنا ضربته لما حاول يعتدى عليا والله العظيم يا سيدى ضربته بالسكينه وربط التانى زى الكلب انا مش فا...ره انا بخاف ربنا
الحاج سعيد: أنا عارفك كويس يابنتى بطلى عياط
صالحه بضعف: أنا عايزة منصور يا سيدي انا عايزه منصور.
في الخارج كان بيومى مع اخواته بيفهم منهم الحكايه بالظبط
بيومى: هو ابوك لحق يكلمك عشان كده جاى حامى علينا
بيومى: أنا مش حامى على حد انا عايز بس افهم
حسانين: تفهم إيه فضحتنا الكلبه وسيرتنا بقت على كل لسان
بيومى: يعنى البت كانت بترقص في الافراح وماشيه مع الشباب وسيرتها على كل لسان طب وانتوا فين
متولى : يعنى إيه احنا فين هنسيب مصالحنا ونمشى وراها.
بيومى: لأ اقعد اتفرج عليها لحد الفاس ما وقعت في الراس وبعدها بنتكلم.
متولى: بقولك ايه انت مش هتيجي من مصر تحاسبنا عشان البت دى لا يا حبيبي البت دى كانت في رقبتنا من ساعة مااتولدت واحنا شايلين همها هى وأبوك واخوها الأهبل كمان فإوعى تيجى تحاسبنا
بيومى: انا لا هاحاسبك ولا هاحاسبه انا هاخد البت دى معايا
حسانين: في ستين داهيه
بيومى: خلى حد يلم هدومها وانا هاخدها معايا هى فين
متولى: هتلاقيها جوه مع ابوك
بيومى: بجد الواد منصور ابن اخوكوا فين
متولى: في الحبس
بيومى: إيه في الحبس ليه
حسانين: معرفش كنا متفقين مع العمده يخلص الموضوع على الساكت بس الموضوع كبر بسبب ابن العمده اللى فى المستشفى فالمحامى قال هيشيلها الواد والموضوع مش هيزيد على تلات شهور في مستشفى المجانين وبعدها يخرج وتتقفل القضية.
بيومى: ياسلام تلات شهور في مستشفى المجانين وانتوا صدقتوه
حسانين: وهو هيكدب ليه وبعدين احنا عايزين نقفل السيره دى
بيومى: أنا هاخد البت دى معايا
متولى: خدها بس ماتجيش تشتكى منها
بيومى: أنا هاخدها ولو عملت حاجه أنا هبقى اتصرف معاها. يكون أبوكوا صحي دلوقتي
حسانين: تعال نخش ونشوفوا
دخل بيومى البيت واتصدم بأبوه على الأرض وفي حضنه البنت
قرب من ابوه وباس إيده وقاله: أنا جيت يا أبه.
انفجر سعيد بالبكا وهو بيقول: مش راضي ببص لى بيقولى دى الامانه إللى أمنتهالك
بص له بيومى بدهشه وقال: مين ده يا أبه
الحاج سعيد: أخوك عبد الحى يابنى اخوك
بيومى: الله يرحمه .هى دى البت.بت يا صالحه بت يا صالحه وبدأ يسحبها من حضن جدها فصرخت صالحه من الوجع بص بيومى في وشها وقال: إيه إللى عملتوه في البت دى
حسانين: تستاهل قليلة التربيه دى
بيومى: مش بالطريقه دي خلى حد يلم هدوم البت دى انا هاخدها وأمشى دلوقتي
بيومى' : هدومها في البيت القديم هبعت أى حد يلمهم بس ياريت ماترجعهاش عشان ده شرط العمده انه مايشوفش وشها في البلد مره تانيه
&&&&&&&&&&&&&&&&&٢
في طريق الرجوع كانت صالحه نايمه في حين وقف بيومى عند صيدليه واشترى لها مراهم وعلاج وبعض المحاليل عشان يعوض جسمها عن الغذاء وحاله الضعف إللى عندها وبعدها رن التليفون رد بيومى: أيوه يا منى انا في الطريق.....يعنى كمان ساعتين وأوصل .بصى خلى الخدامه تنضف أوضة الضيوف....هاحكى لكى كل حاجه بس لما اوصل ماشى.وبعدها قفل السكه
بعد حوالى ساعتين ونصف دخلت السياره فيلة بيومى إللى بعد مانزل منها شال صالحه ودخل البيت الكل كان بيبص له بصدمه لكنها دخل البنت الأوضه وخرج وقال لهم: دى بنت عمكم وهى عملت حادثه وهى تعبانه بس ان شاءالله لما تخف هتعيش معانا. وياريت محدش يسألنى عن حاجه عشان انا تعبان اوى ومش قادر أرد على حد
وطلع أوضته وطلعت وراه منى مراته وقالت: انا بقى عايزه اعرف الحقيقة لأن كلامك مش مصدقاه .
اتنهد بيومى وقال: وأنا هاحكى لك عشان اخد رايك لأن الموضوع ده تاعبنى وتاعب نفسيتى
في اليوم التالي وبعد ماكل الأولاد راحوا مدارسهم وجامعاتهم دخل بيومى على صالحه إللى كانت نايمه شاف وشها المليان بالجروح فاستغفر ربنا وبعدها اخد مرهم الجروح وبدأ يعالج جروحها وهو بيسمع أنينها وبعدها قال: معلش يا بنتى استحملى شويه وبعد فتره اتأكد من المحلول في ذراعها قال لها: أنا رايح الشغل دلوقتي انا وصيت الخدامه تجيب لك الفطار كلى وارتاحى وبالليل لينا كلام هنقوله سوا ماشى
هزت صالحه راسها بأه
سابها وخرج وبعد شويه دخلت منى وهى شايله صنية الأكل فقربت منها وقالت: صباح الخير عامله ايه دلوقت
همست صالحه: الحمدلله
منى: طب يالا عشان تفطرى
صالحه: ماليش نفس
منى: مين قالك ده انتى لازم تفطرى كويس عشان تاخدى علاجك وبعدين انا ماصدقت البيت فضى من أولادى عشان نفطر سوا ولا انتى مش عايزانى أفطر معاكى.
صالحه: .......
قربت منها منى وشالت المغذى من إيدها وقالت: مش محتاجينه انا هاغذيكى كويس وقدمت لها كوبايه حليب دافئ وقالت: يالا اشربى ده قبل الفطار.
صالحه بتعب: لا يا مرات عمى مش عايزه
منى: مش عايزه ٱيه ده انتى هنشربيه غصب عنك ....وقربته منها وشربتها اللبن وهى بتضحك عليها وبعدها قالت: شاطره أنا احب إللى بيسمع الكلام.يالا تفطرى بقى
وقدمت لها الأكل
بعد شويه قالت: تصدقى يا صالحه انا ماكنتش فكراكى خالص اصلى يعنى مش بنزل البلد كتير وإنتى كمان مش كنتى بتيجى هنا خالص صح
هزت صالحه راسها بأه
منى: بس عرفتك من عنيكى أصلى أول واحده تاخد بالها من لون عنيكى أصلها زى لون عنين الحاج عبد الحى الله يرحمه
اتنهدت صالحه وقالت: الله يرحمه
منى وقالت: كان اخوكى حاطك تحت المعزه عشان ترضعى يومها كنتى بتصرخى أوى و...............
صالحه بإهتمام: وبعدين
فكرت منى شويه وقالت: تصدقى إنى رضعتك انا إزاى راحت عن بالى دى انتى كده بنتى بالرضاعة
صالحه بعدم اهتمام: جدى بيقول إن فيه ستات كتيره رضعتنى.
منى: بس بصراحه مش فاكره رضعتك كام مره ثلاثة ولا اربعه مش فاكره أنا خفت عليكى من لبنى ليتعبك اصل يوسف كان عمره يجي سنه بس كده معناه انك بنتى بالرضاعة
بصت لها صالحه من غير ماترد فكملت منى بدهشه: انتى كده تبقى أخت يوسف ابنى وتبقى بنتى تصدقى دى .يعنى المفروض إنتى تقولى لى يا ماما
صالحه بدهشة: ماما..أنا عمرى ماقلت لحد يا ماما حتى مرات عمى متولى عمرها ما خلتنى قلت لها ماما
ابتسمت منى وقال: عشان ابقى انا اول واحده تسمعها منك وأول واحده تقولى لها تصدقى إنى فرحانه أوى حتى لو عدد الرضعات مش كفايه انى اكون امك هتقولى لى برضوا سبحان الله ربنا دخل محبتك في قلبي من أول مادخل عمك بك امبارح.وحسيت إن فيه حاجه ربطتتنى بك من أول نظره.
في المساء دخل عليها بيومى وقال: ياصالحه أنا جيت لك وفضيت نفسى مخصوص عشان اسمعك فإحكى لى
صالحه بضعف: وهتصدقتى يا عمى
بيومى هاصدقك بس احكى كل حاجه من أول ما عرفتى ابن العمده لحد دلوقتي وماتخبيش حاجه عليا عشان لو عرفت انك خبيتى مش هيحصل طيب
صالحه: حاضر يا عمى هاحكى لك.
&&&&&&&&&&&&&&&&&&
بعد كام يوم كان الجميع على السفره وهما بيضحكوا
يوسف: اكتر حاجه مفرحانى انك اصغر منى اصل بصراحه كلهم اكبر منى وبيزلونى أنى الصغير
يمنى: سيبك من الأخ ده خليه مع الميتين أصحابه انا بعد الغدا هاخدك معايا المكتب الهندسي بتاعى
صالحه: الميتين أصحابه يعني ايه
ضحكت منى وقالت: سببك منهم هما كده طول الوقت مابيبطلوش نقار مع بعض
يوسف: هى غيرانه منى عشان انا دحلت كليه الطب وهى لأ بكره تقعى تحت ٱيدى
منى: بعد الشر عن بنتى
وفجأة دخلت عليهم ( سميحه) بنتهم الكبيره
وقالت: اوعوا تكونوا اتغديتوا من غيرى
ضحك بيومى وقال: تعالى ياحبيبتي
دخلت وقالت: لاسلام على طعام بس إزيكوا كلكوا إزيك يا صالحه عامله ايه دلوقتى
صالحه: احسن الحمدلله
بعد الأكل سحبتها سميحه ودخلت الأوضه وقالت: بصى يا صالحه انا عينى بتلقط الكذب من أول كلمه وموضوع الحادثه دى مش مصدقاها فأحسن حاجه تقولى لى الحقيقة من غير لف ولا دوران أنا يا صالحه بنت عمك وزى اختك الكبيره ومحدش هيشيل همك قدى .
قعدت صالحه وقالت لها وانا بحبك والله يا ابله سميحه وارتحت لك
سميحه: خلاص يبقى احكى
صالحه: حاضر هاحكى
بعد فتره خرجت سميحه وهى غاضبانه جدا أول ما شافها بيومى عرف إنها عرفت فقال: من غير ماتقولى انا عارف كل حاجه وذنب البنت دى فى رقبته اعمامك
قالت سميحه: لا يا بابا زنبها مش في رقبتها
ذنبها في رقبتكم إنت قبلهم
بيومى: أنا وأنا مالى انا عملت إيه
سميحه:ماهو كلامك ده هو الذنب انت عملت ايه للغلبانه دى إيه دورك في حياتها طبعا ولا حاجه سايبها لأخواتك يدمروها ويدمروا مستقبلها وقاعد ساكت .ليه مش دى تبقى بنت اخوك زيك زيهم انت فين من حياتها
متولى: يعنى إيه انا فين هاسيب مصالحى وأمشى وراها ... وبعدها سكت بخجل من نفسه
سميحه: سكت ليه يا بابا
بيومى: حتى دى هى نفس الحجه إللى قالها اعمامك
سميحه: عشان تعرف ان زيك زيهم
منى: ياسميحه عيب تكلمى بابا كده
سميحه: أنا اسفه يا بابا بس ربنا قال(( فأما اليتيم فلا تقهر)) بص كده يا بابا بص وشوف إللى جوه هتلاقى كل صور القهر بنت لسه ورده بس للأسف ورده زبلانه مكسوره شايله الهم على قلبها
بيومى: كفايه يا سميحه كلامك بيوجع
سميحه: حاسب نفسك قبل أن تحاسب يا بابا تصدق انا شفت فيديو فرحى لقيتها فيه طول الفيديو بتضحك وبترقص مع اخوها ولما ببص في وشها دلوقتي مش لاقيه أى حاجة من الطفله المرحه الجميله انا شايفه واحده اتفنن الكل في تحطيمها والغريبه زعلانين انها لسه عايشه
بيومى: يابنتى خلاص انا مش هاسبها انا هاحاول اعوضها عن السنين إللى فاتت
سميحه: ياريت يا بابا ياريت
بعد شهر
دخل عليها بيومى وقال: بصى يا صالحه بالنسبة لموضوع منصور انا حاولت والله إنى اجيب لك تصريح زياره بس منصور تحت الملاحظه وعرفت ان الموضوع صعب بس بعد ماتخلص المحاكمه هاخد اذن بالزياره له في المستشفى
صالحه: حبيبى يا اخويا طب ماتعرفش يا عمى ان كان بخير ولا لأ
بيومى : ماتخافيش هو كويس وتحت إيدين دكاترة كويسين اوى بيراعوا ربنا فيه
المهم اناجيبت اوراقك من البلد وقدمت لك في كليه التجاره
صالحه بيأس: مالوش لزوم يا عمى
بيومى: مين قال له لزوم طبعا أنا مستغرب إزاى واحده زيك متفوقه كده وماتخشش الجامعه ربنا يسامحهم اعمامك المهم انتى هتنتظمى في الدراسه من أول الاسبوع عشان كده خدى ( وخرج من جيبه مبلغ كبير من الفلوس) وقال روحى مع يمنى واشترى لك لبس حلو كده للجامعه
صالحه: انا مش عايزه حاجه انا عايزه اخويا
بيومى: ان شاءالله هيخرج ويعيش معانا هنا بس انا عايزك تذاكرى وتتفوقى وانا مش هاكتفى بالجامعه بس لا ده انا هقدم لك تاخدى دورة كمبيوتر وكمان انجليزي عشان يبقى معاكى لغه
صالحه: بس يا عمى
بيومى: مافيش بس يالا روحى البسى عشان تروحى مع يمنى
حضته صالحه وقالت: ربنا يخليك ليا يا عمى
حضنها بيومى وباس راسها وقال: يالا يا بت بلاش عواطف لمرات عمك تغير
ابتسمت صالحه وخرجت في حين قعد بيومى وهو مهدود جنب منى
منى' مالك زعلان ليه
بيومى: اخواتى اتصلوا بيا
منى: عمى فيه حاجه
بيومى: ابويا تعبان من ساعة ما اخدت صالحه وكل شويه ينادى عليها وعلى اخوها بس مش هى دى المشكلة
منى: طب فيه إيه
بيومى: اخواتى متصلين بيا عشان احضر كتب كتاب ملك بنت متولى على ياسر ابن العمده
منى: إيه البجاحه دى إزاى جلهم قلب يحطوا إيدهم في إيد العمده بعد إللى عمله في صالحه
بيومى: وانتى تفتكرى تهمهم صالحه في حاجه دول اهم حاجه مصلحتهم وبس
منى: طيب وانت هتعمل ايه هاتروح
بيومى: انا ماكنتش عايز اروح بس ابويا كل مابيكلمنى بيعيط ويتعب لحد ما اخواتى اخدوا منه الموبايل عشان مايتعبش وانا دلوقتي عايز اكلمه وأطمن عليه ومش عارف فهاروح عشان اشوفه
منى: وتحضر كتب الكتاب
بيومى بحيره: مش عارف والله بس انا بجد محتار منهم ومن قسوة قلوبهم دى.
-&&&&&&&&&&&&&&&&&
بعد أربع شهور دخلت يمنى على صالحه وقالت: زهقانه
قفلت صالحه الكتاب وقالت::طيب
يمنى: يابرودك ياشيخه بقولك زهقانه تقولى طيب
صالحه: ماشى طب انا هاعمل لك إيه
يمنى: تقومى كده زى الشاطره تغيرى هدومك وتيجى نخرج نتفسح شويه
صالحه: طب انا عندى حل حلو ماتروحى تكلمى خطيبك احسن
يمنى: لسه قافله معاه وزهقت قومى بقى
دخل يوسف وقال: على فين
يمنى: يوسف يا حبيبي تعال خرجنى انا متضايقه
يوسف بنداله: لأ
يمنى: عشان خاطرى
يوسف: برضوا لأ إلا إذا صالحه هتيجى معانا
يمنى: ياسلام يا اخويا اشمعنى
يوسف: اختى الصغيره ولازم أدلعها
يمنى: سمعتى يالا بقى عشان ده هيذلنا على الخروجه دى.
&&&&---&&&&&&&&&&&&٥
دخلت سميحه البيت وهى ونادت: صالحه يا صالحه
جت لها صالحه وقالت: ايوه يا أبله
سميحه: بقول لك أنا جوزى سافر في مهمة شغل اسبوع لماليزيا إيه رايك لما تيجى تقعدى عندى الاسبوع ده
صالحه: معلش يا ابله خلينى قاعده هنا عشان اعرف أذاكر ومااضايقش حد
سميحه انتى حره بس انتى الخسرانه
صالحه: مش مهم بجملة الخسائر
سميحه: طب مش تعرفى خسرتى إيه
صالحه: خسرت إيه
سميحه: ولا حاجه بس يادوب كنت هاخليكى تشوفى اخوكى
صالحه:!!!!!!!
&&&&&&&&&&&&
•تابع الفصل التالي "رواية صالحة أخت منصور " اضغط على اسم الرواية