رواية عشق بلا اسم الفصل السادس 6 - بقلم مريم اسماعيل

كان قاسم في طريق العودة إلي منزله ، فكان طوال اليوم يفكر كيف له أن يكون بجانب سجدة ، ويعاملها بقسوة ، يوم واحد ولم تتحمل أعصابها ، نعم يعترف أنها اساءت لنفسها ، قبل أن تسئ إليه ، ليتخذ قراره أن يعفو عنها من غضبه ، لكن لن يقترب منها ، ليري ساجد أمامه بغضب جامح ، واعينه تلمع بالشر .

" ساچد واچف إكده ليه ، كيف الحراميه إكده ، يا ولد هندواى ."

ليغتاظ ساجد من بروده اكثر واكثر ، ليمد يده داخل جلبابه ويخرج مسدسه الاسود ، ووجه امامه مباشرة ، ليبتسم قاسم ببرود

" ناوى علي چتلى ولا إيه ، الفرصة چت ليك علي الطبطاب ، كان نفسك من زمان تعملها ، اضرب مستنى إيه ."

ليصمم ساجد علي فعلته وبالفعل يدوس علي زنات مسدسه لتنطلق الطلقة النارية ، ليسقط قاسم علي اثر الطلقة ، ويبتعد ساجد عن المكان بسرعة كبيرة .

في المستشفي

كان قاسم في غرفة العمليات ، وكان الجميع بإنتظاره بالخارج ، لترى والدتها من بعيد تهرول ، لتقف لا تعلم ماذا تفعل ، لتنظر لوالده قاسم كانت تقرأ القرآن الكريم وتناجى ربها ، ام كنز كانت نائمه علي كتفيها وهامده ، لتتحرك نحو والدتها بهدوء ، لتراها أمام غرفة العناية المركزة .

" أما في إيه ، بتعملى إيه إهنا ."

لترتمى والدتها بإحضان ابنتها

" الحچينى يا بتى ، بوكى ، بوكى هيروح منينا ، ."

ليخرج ساجد عليهم ،لتنظر له والدته بغضب ،

" ارتاحت يا واد بطنى ، خربت علي خيتك ، وضيعت ابوك ."

لا تفهم سجدة ما يدور حولها ، لتركز في حديث والدتها

" أنت اللي طخيت چاسم ."

لتهتف والدتها وهى تلطم خديها

" أيوة يا بتى ، وابوكى مستحملش وچع من طوله ."

ساجد ينظر لها بعناد

" ايوة عملتها ، ولو چام منيها ابچى چابلينى ، إيه هخاف إياك منيه ."

لتقف سجدة أمامه

" لاه تخاف علي ابوك ، اللي علم وكبر وبچيت دكتور ، تداوى الناس مش تچتلهم ، ورايد تسمع الحچيجة ، هچولك يا اخوى ، أنى كدبت عليكم ، عشان أنت رفضت تچوزنى ليه ، كنت رايد اعمل ايه ، اسلم واتچوز راچل تانى ، چاسم يعلم ربنا ، ما لمس منى شعره يا ابن امى وابوى ، ولو چرا لچوزى حاچة ، الله في سماه مهسامحك واصل ."

لتحاول الدخول لوالدها لتبلغها الممرضه أنه نائم الآن ، لتعود لتطمئن علي قاسم لترى الطبيب يخرج من العمليات .

" الحمد لله خرچنى الرصاصة ، وكلها شوية ويفوچ ، إن شاء الله ."

لتزفر بإرتياح ، وتدعو أن تطمئن علي والدها هو الآخر ، كان ساجد واقفا مذهولا يعقل أن تكون كذبت بالفعل عليهم ، يعقل هذا ، لتصارحه ، والدته بالحكاية ، ليندم علي إذهاق روحه .

...... ........ ........؟.......

بعد ساعات

كان يقف الظابط ليستمع لأقوال قاسم

" إنى موعتش اللي طخنى ، الدنيا كانت عتمه ، وملحچتش المحه ."

لترتاح سجدة قليلا هى تعلم أن ساجد ليس بخائن ،هو من المؤكد وقف امامه وتباهى بقتله ، ليخرج الظابط ، وتجلس والدته تقبل يده

" حمد لله على السلامه يا ولدى ، ربنا ما يحرمنا منيك واصل ، وتفضل في حياتنا إكده ، أنى چلبي انخلع من مطرحه ."

ليقبل يدها

" سلامه چلبك يا اما ، إن شاء الله اللي يكرهك ."

كنز بدلع

" أيوة أنت وأمك هتفضلوا تحبوا في بعضيكم ، وأنى واچفه إكده ."

لتهتف والدتها بهدوء

" الغيرة دى همليها لمرته يا بتى ، إنما أنت تنكتمى خالص ، البت ملخت يدى فضلت نايمه كأن اخوها بيلعب ."

ليبتسم قاسم وهو يلاحظ شرود سجدة

" طبعها يا اما ، فاكرة زمان لم كانت تچول لرحيم الله يرحمه ، چاسم ضربنى ، واطلع في الاخر كت بهزر وياها ."

" الله يرحمه ، عنديك حچ من يومها وهى إكده اللي يفكر يمد يده يبچى ضربها طوالى"

لتلاحظ كنز هدوء سجدة

" أما تعالى رايداكى في كلمتين ."

" ما تچولى يا بت هو في حد غريب ."

" يا إما ، ابوس يدك ركزى هبابه ."

لتغمز لها تجاه سجدة لتفهم ماذا تريد كنز

" طيب چومى يا بت رايداكى ."

لتفعل كنز مثلما فعلت من قليل

" ما تچولى هو في حد غريب ."

ليضحكوا جميعا عليها

" چومى يا مغلبانى ، چومى ."

لتقف كنز وتخرج هى ووالدتها

ليهتف قاسم بشك من هدوء سجدة

" سچدة ، زعلانه إياك أنى چمت منيها .،"

لتنفي له

" يا مرى ، لاه وربنا يعلم ، بس اصل ابوى إهنا ."

قبل أن تكمل حديثها يهتف هو

" بوكى بره ومهملاه .،"

لتدمع اعينها

" لاه بوى في العناية ، وچع من طوله لم درى باللي ساچد عاملة .،"

ليبعد انظاره عنها

" هو ساچد عمل إيه ."

لتتعصب من طريقته

" أنى خابرة زين أن ساچد اللي عمل فيك إكده ."

لينظر لها بهدوء

" ولو چولت لاه ، محصلش ."

" بتچول إكده عشان ميحصولش مشاكل ."

لينفي حديثها ويمسك يدها ويضعها علي جرحه

" واعيه الرصاصه فين ."

لتؤمى له

" ايوة في كتفك من ورا ."

" أيوة ساچد صوح وچف وطلع سلاحه وضرب ، بس الرصاصه مچتش فيا ، حسيت بالوچع في ظهرى ، خابرة دا معناه إيه ."

هى تفهم ما يقوله لكن تريد تأكيد لبرائه اخيها

" لاه مفهماش ."

ليبتسم عليها

" معناه أن اللي ضربنى حد تانى ، ضربنى من ضهرى ، عشان إكده چولت موعتش ليه من الأساس ."

لتفرح لنجاته ، ولبرائه اخيها من دمه

" الحمد لله ، ابوى لم يعرف هيفرح چوى ، ويچوم منيها ."

" إن شاء الله ، يلا مشي طمنى أمك ، وابوكى ، وأن أشد حيلى واچف علي رچلى واچاى اطل عليه ."

لتخرج مسرعة لتبلغ والدتها لتحمد ربها ، لينظر ساجد لهم ماذا يحدث اليوم كل شئ ينهار ، اخته وكذبتها ، قاسم ولم يمثه بسوء ، ليعلم أن والده افاق ويطلب سجدة .

" بوى حمد لله على السلامه يا نور عينى ."

ليهتف بإعياء شديد

" يسلم عمرك من كل شر ."

لتقبل يده وراسه

" بوى ، ساچد برئ ، چاسم اللي طخه ، طخه في ضهره ."

وتقص عليه ، ليزفر بإرتياح اخيرا والده برئ من دم انسان آخر .

" الحمد لله يا بتى ، نادمة عليه هو وامك ."

لتخرج وترى عائلة قاسم تقف مع والدتها

" إكده يا سچدة ، متچوليش أن أبوكى بعافيه ."

" حچك عليا يا اما ، بس اللي حوصل مخلى راسي مش فيا ."

لتحتضنها كنز

" ولا يهمك المهم بوكى عامل إيه دلوچ .،"

" اتحدت ويايا ، الحمد لله ."

ليهتفوا جميعا

" الحمد لله "

لتقترب كنز من والده سجدة

" واه أنت كيه امى تفرح تبكى ، تزعل تبكى ، وهو إيه ده ، متعرفوش تفرحوا من غير بكى "

" هما الستات إكده دمعتهم چريبه ."

هتف ساجد بتلقائيه لينظروا جميعا تجاه ، بما فيهم كنز ، لتؤمى له بالموافقه علي حديثه .

" طيب بالاذن احنا ، نطمنوا علي چاسم ونعاود تانى نطل عليه ."

تتحرك كنز ووالدتها ، وكانت كنز هائمه ، فساجد بالزى الطبي ، مثل ابطال الروايات التى تقرأ عنهم .

" مالك يا ولدى بتبحلچ في الطريچ إكده ليه ."

" ولا حاچة ، سچدة رايد اتحددت ويا چاسم ."

" ماشي ، بس ابونا رايدنا ، ندخلوا ليه وبعدها نروح لچاسم ."

ليدخلوا الثلاثه

ليشير لهم بالاقتراب

يقترب ساجد ويقبل يده ويطلب العفو والسماح

" هسامحك بس بشرط ، وعد يا ولدى ، لا تأذي چاسم ولا اهله ، دول خلاص بچوا منينا ، خيتك غلطت لم كدبت ، بس ربنا رضاها براچل صوح ، راچل حماها وخاف عليها من الهوا ."

" موافچ يا ابوى بس ترضي عنى ."

" أنى راضي عنيك لم تبطل تسرعك ده عاد ، وتچرب من چوز خيتك ، وتبچى ضهر لخيتك ، فاهم يا ساچد يا ولدى ، الانتچام ، بيولد حچد وكره ، ودول آذي يا ولدى ، بعد عنيهم ."

" حاضر يا ابوى ."

" ربنا يبارك فيك ليهم يا حچ ، وتفرح بعيال عيالهم ."

ليؤم لها بدون حديث فهو استهلك طاقته الكاملة في وصيه ساجد ، لينام والده ويذهب ساجد لمقابلة قاسم .

عند غرفة قاسم ، طلب أن يدخل له بمفرده ، ليوافق الجميع ، لتهتف كنز بهمس لسجدة

" هو دا اخوكى اللي كان بيوصلك الچامعه ."

" أيوة هو ، ليه ."

" متوكده التانى كان طويل إكده ويرعب ."

لتضحك عليها

" عشان كان بيلبس الجلبيه ، لكن إهنا بلبس الشغل فهمتى ."

لتؤما لها

" فهمت ، فهمت چوى ، چوى ، وبينا داخلين علي أيام زينه چوى ."

في غرفه قاسم كان نائم بهدوء ، ليقف أمامه ساجد بنظرات غير مفهومه ، ليقترب منه ويقترب منه بشده ويهتف

" خابر أنى بكرهك چوى ليه ، من الچامعه ، من يوم ما خدت البت الوحيده اللي عشچتها ، وچيت دلوچ خدت چلب خيتى ، بس وماله خده ليرفع يده و ........

...... ..........

عشق بلا اسم