رواية كذبه واحده بس الفصل الخامس والاخير 5 - بقلم حياة محمد جدوى

الجزء الأخير

في شقه على قالت ضحى بفرحه

أما يابت يا سلمى شقتك بعد ما خلصنا فرشاه بقت حلوه حلاوه تهوس ربنا يهنيك بها

سلمى: ميرسي يا ماما

على: مالك يا بومه يا كشريه ضاربه بوز كده ليه

سلمى: يرضيك يا بابا يقولى مش هينفع نروح شهر العسل بره مصر وعايزنى نقضى اسبوع في اسكندريه يرضيك

على: ومالها اسكندريه دى عروسه البحر المتوسط يعنى اجمل محافظات مصر

سلمى: ماقلتش حاجه بس كان نفسي نروح فرنسا ماليزيا ولا تركيا زى ما الكل بيقضى شهر العسل

ضحى: معلش يا سلمى مانتى عارفه ظروفه ووضع أبوه وأمه

سلمى: طب وأنا مالى هو أبوه وأمه متخانقين أنا ذنبى إيه

بص لها على وقال: بتقولى ذنبك إيه ده إنتى ولعتى ما بينهم

قامت سلمى وهى بتبرطم ,: كل حاجه أنا أنا وأنا مالى دى حتة كدبه صغيره ما الناس كلها بتكدب إشمعنى كدبتى أنا إللى الكل بيحاسبنى عليها

ضحى بفرحه' : مش مصدقه إن اخيرا بنتنا هاتتجوز

على' : بس ربنا يستر من كدبها ده

ضحى: تنكر إن كدبها ده هو اللي خلاها تتجوز

على: طبعا أنكر عمر الغلط مايبنى بيوت الغلط بيدها وانا كان عاجبني حال بنتى وهى صادقه أكتر بكتير من دلوقتي وخايف عليها لأن آخرة الكدب وحشه

ضحى: يعنى هيحصل لها إيه ماهى كل مره يتعدى على خير

على: بس مش كل مره بتسلم الحره لازم في مره

&&--&&&---&&&&&&&&&&

فى يوم الفرح كانت سلمى فى البيوتى سنتر

وحولها زمايلها وهى مكشره

دخلت أمها عليها وقالت': ياكئيبه مكشره ليه

سلمى: تصدقى المعفن ده نسى يحجز سيشن

ضحى: مفيش مشكله يعنى مش هنبوظ الجوازه على سيشن

سلمى: يا ماما ده فرحى إللى هاعمله مره واحده في حياتى فيبقى زى ما يتمنى

ضحى: إفرحى يا سلمى وبلاش كأبه ده إنتى هاتعملى فرحك في قاعة فخمة غيرك بيعمله في الشارع والعروسه والعريس مش بيبطلوا رقص من أول الفرح لأخره إفرحى

سلمى: حاضر يا ماما هافرح

ضحى: وياريت تعدى الفرح على خير عشان بصراحه أنا مش مرتاحه لك

سلمى: دايما فهمانى غلط

ضحى: أنا هسبقك على القاعه عشان أستقبل المعازيم ماشى

سلمى: وتسيبنى لوحدى

ضحى: معاكى صحباتك وقريباتك بس ماينفعش اسيب أم العريس تستقبل المعازيم لوحدها ماشى

سلمى: ماشى

&&&&&&&&&&&&&&&&

ارتفعت موسيقى الزفه ودخلت سلمى وهى ماسكه في إيد زوجها مصطفى والكل فرحان وبيصقف أما ضحى فإستمرت تزغرد وهى فرحانه

قعد مصطفى و سلمى في الكوشه والكل بيتصور مع العروسه الجميله والعريس الكل بيرقص ويغنى فرحان

كانت سلمى بترقص مع مصطفى وفجأه اتوقفت الموسيقى والكل اتثبت في مكانه لأن اقتحم المكان إثنين من القوات الخاصة وراهم ظابط ومعه مجموعة من العساكر فرفع الكل .إيديه لفوق

مصطفى: إي ده يا محمود إيه مفاجأتك البايخه دى .

بص له محمود بدهشة وقال: مصطفى هو ده فرحك

مصطفى: ياسلام أمال انت هنا ليه

محمود: أنا هنا في شغل

مصطفى: شغل

محمود: أيوه من حوالى حالنا بلاغ إن فيه قاصر وأجباروها أهلها على الزواج بدون رضاها .وإنها وتحت السن القانوني

مصطفى بذهول: قاصر (( وبص لسلمى إللى إبتسمت بإحراج

فقال لها مصطفى: قاصر يا سلمى ده كله وقاصر وبعدها بص لمحمود وقال: هى دى مراتى القاصر

بص لها محمود بدهشة وقال: إنتى عندك كام سنه

على بذهول: أنا والدها ( بص لها وقال)هو إنت بتسألها إنت مش شايف إنها كبيرة

محمود: استنى بس ياعمى خلينى أفهم ردى لو سمحتى

سلمى: عندى ٢٦ سنه

مصطفى: يعنى مش قاصر كبيرة اوى اهى

محمود: ثانيه واحده يا مصطفى . طيب إنتى حد أجبرك على الجواز

بصت سلمى لمصطفى وماردتش

مصطفى: ماتنطقى حد اجبرك

سلمى: لأ بس يرضيك ينسى يحجز لى سيشن

مصطفى بذهول: نعاااام

سلمى: اه كل البنات عامله سيشن وفيديوهات حلوه مع اجوازها ةأنا لأ عشان إيه عشان الأستاذ ده نسى .

على: تقومى تبلغى على جوزك يابنت الهبله

سلمى: إيه بتبصوا عليا كده ليه!!! زعلانين منى ليه!!! هو أنا عملت ايه أنا يادوب كدبت

فرفع كل المعازيم أصبعهم وقالوا في صوت واحد ( كدبه واحده بس)

مصطفى: أديك شفت يا محمود الموضوع كله مجرد هزار في هزار وكدبه من المدام

محمود: بس للأسف القانون مش بيعترف بالهزار

مصطفى: تقصد ايه

محمود: انا أقصد إن فيه بلاغ إتقدم وفيه واحده اعترفت إنها قدمته فأنا مضطر اقبض على العروسه بتهمة البلاغ الكاذب وإزعاج السلطات

سلمى بخضه: إنت بتهزر صح

محمود: للأسف مش صح يا عسكرى حط الكلبشات في ايديها

مصطفى: ماتخافيش أنا وعمى هانيجى معاكى

على: يالا يا تاعبه قلبى

وفعلا قيد العسكرى إيدين سلمى بالكلبشات عشان تروح القسم فقامت منال واطلقت الزغاريد احتفال بالقبض على سلمى

منال: لولولولولولو لولولى

سلمى: كده يا حماتى فرحانه فيا

محمود: ماتتكلميش مع حد وامشي مع العسكرى

أول ما خرجت من القاعه ظن العاملين إن دى فقره جديده فبدات تزف سلمى وهى بالكلبشات في حين مصطفى وعلى وضحى وبعض المعازيم ماشيين وراها لحد ماخرجوا من القاعه

ركبت سلمى عربيه البوكس وقالت: مصطفى مش هاتركب معايا

مصطفى: اركب مين هو أنا ناقص شبهه إركبى وأنا وراكى بالعربيه

وانطلق الموكب العروسه في البوكس والعريس وراها بالعربيه المتزينه وراها كام عربيه من الأهل والأصدقاء لحد ماوصلت القسم فبدأ المساجين و المشبوهين يزفوها بالتصقيف والغناء لحد ما دخلت مكتب محمود

مصطفى: عشان خاطري يا محمود

محمود: إنت عارف القانون هاتتدخل الحجز لحد ما تتعرض على النيابه

سلمى وهى بتعيط: والهوى يعنى هبات في الحجز لا ابوس ايدك دول هايعملوا عليا حفله

على: أدى اخرت الكدب يا سلمى

ضحى: هى فيه إيه ولا فى إيه خروجها من القسم وبعدها إلقوا لوموها

على بغضب: نلومك إنتى مش كنتى عايزاها تكدب عشان تدخل دنيا اهدى دخلت القسم وانتى يا سلمى كان نفسك تروحى فرنسا ولا ماليزيا إبقى روحى طره ولا ابو زعبل

سلمى: عشان خاطري يا مصطفى اوعى تسيبنى هنا

مصطفى: يا محمود عشان خاطري أنا خرجها يعنى يرضيك ليله دخلتى اقضيها كده أنا في حته وعروستى في الحجز

محمود: بصراحه لأ على العموم أنا هافرج عنها وهاسوى القضيه ودى جدعنه منى لكم بس تضمنها

مصطفى: اضمنها ما أنا لبستها خلاص

محمود: يالا يا بنى حد يفك الكلبشات

مصطفى::لا أنا عايزها كده بالكلبشات

محمود: ليه بقى

مصطفى: عشان افكهم في البيت وغمز بعينه

خرجت سلمى بالكلبشات والكل بيقول لها (( ألف مبروك)) (( كفارة))

ركبت العربية مع مصطفى لحد ما وصلو لشقتهم فشالها مصطفى ودخل بها وقفل الباب

مصطفى: أخيرا بقينا في بيتنا الف مبروك يا حبيبتي يا رد السجون

سلمى: إخص عليك يا مصطفى مش كنا رجعنا القاعه كملنا الفرح

مصطفى: فرح إيه ده لو قعدنا كمان شويه هاتتحفينا بكدبه ندخل بسببها الانعاش

سلمى: بعد الشر عليك وبعدين خلاص حرمت حرام وتوبه اكدب تانى

مصطفى: بجد ولا بكره الاقيكى بتقولى انا يادوب كدبت

سلمى: لا والله دى توبه نصوحه صدق من قال الصدق منجه وأنا بموت في المانجا

ضحك مصطفى وقال: غلبتينى معاكى يا سلمى

( رفعت إيديها ودخلت مصطفى من الكلبشات فأصبحت متعلقه في رقبته وقالت: خلاص مفيش غلبه تانى بحبك أوى يا مصطفى

مصطفى: وأنا بموت فيكي يا سلمى

سلمى: طب إيه

مصطفى: إيه

سلمى: بلاش بواخه

مصطفى: لا بجد مش فاهم

سلمى: فك الكلبشات

هرش مصطفى في شعره وقال بإحراج

هو لازم

سلمى: يا مصطفى ماتبوخش الفستان تقيل ومهبطنى غير ان إيديا وجعتنى

مصطفى بإحراج: اصل بصراحه..

سلمى: إيه!!!؟

مصطفى: بصراحه نسيت أجيب مفتاح الكلبشات من محمود!!¡!!!!!!!!!!

النهايه