رواية نبضات قاتلة الفصل العاشر 10 - بقلم زينب محروس

الفصل العاشر

استقرت راحت يدها على صدره، لتدفعه بعيدًا بضعف، لكنها كانت إشارة كافية لينتبه إلى قسمات وجهها النافرة من قربه، فأصبح ينقل حدقتيه بين وجهها و يدها بنظرات قاتمة، و قد احتدت ملامحه، فتعجلت «غرام» قائلة بخوف:

_ بلاش تفهمني غلط.

ابتعد عنها قائلًا بغيظ:

_ خلاص فهميني الصح؟

منحتها ابتسامة متكلفة، و تحاملت على نفسها عندما لامست خده بأناملها، و أوضحت الأمر قائلة:

_ أنت عارف إني بحبك يا «مالك» ، بس الحقيقة إن أنا حاليًا مش مستعدة لخطوة زي دي، نفسيتي مش أحسن حاجة، فخلينا نأجل الموضوع دا شوية، لأن أنا بجد مش كويسة خالص بسبب فراق بابا و ماما.

أشاح بوجهه بعيدًا عنها، و أغمض عينيه في حركة سريعة، ساعيًا لكبح غضبه عنها، ثم التفت ناظرًا إليها و قد ارتخت ملامحه العابسة، و قال:

_ مفيش مشكلة يا حبيبتي، ارتاحي إنت دلوقت و أنا شوية و راجع.

★★★★★★★

قامت «غرام» باستدعاء «عبير» إلى غرفتها بعدما تأكدت من ذهاب «مالك» إلى عمله، فكانت تحرك قدميها بترددٍ لشعورها بملل الانتظار، و أخيرًا جاءت إليها الخادمة، فطلبت منها التأكد أن الباب محكم الإغلاق.

و أشارت إليها لتجاورها على الأريكة، و بادرت قائلة بترقب:

_ أقدر أثق فيكي و يفضل الكلام اللي هقوله ده سر بينا ميعرفش بيه مخلوق؟

ردت عليها «عبير» بنبرة صادقة:

_ طبعًا يا دكتورة، أخدمك بروحي و الله، دا أنتي جميلك اللي عملتيه مع رجاء أختي في ولادتها، يخلي أوامرك كلها مطاعة.

_ الأمر لله يا حبيبتي، بصي أنا عايزة منك خدمة صغيرة بس بالنسبة لي اكنك بتنقذي حياتي.

ضيقت «عبير» حاجبيها باستغراب، و سألتها بفضول:

_ تحبي أعمل ايه عشانك؟

تحدثت «غرام» بصوت هامس وقالت:

_ الوقت اللي تلاقي فيه «سميرة» طالعة فوق تتصلي عليّ فورًا، و لما أكون مش موجودة تحت و «مالك» يرجع من الشغل بردو تتصلي عليّ......بس لازم محدش منهم ياخد باله بكدا..........تمام؟؟

_ بس كدا!!

_ أيوه، بس لازم تعرفي إن لو حد عرف بالكلام ده أنا هروح فيها، أنا اخترتك عشان بأثق فيكي، بلاش تكسري الثقة دي أرجوكي.

ضربت «عبير» على عنقها و أقسمت بصدق:

_ و الله العظيم يا دكتورة، أنا افديكي برقبتي، متقلقيش.

_ طيب اسمعي ساعديني دلوقت ناخد أكل من المطبخ من غير ما «سميرة» تاخد بالها.

_ «سميرة» بتخرج كتير من البيت، تقدري تقولي كل يوم ممكن تخرج بتاع ساعتين كدا تروح تشوف اولادها و مامتها فلو ينفع تستني عشر دقايق كدا هي كانت بتغير و أنا طالعة.

★★★★★★★

عندما تقدمت خطوتها الأولى داخل غرفته، تسلل عطرها إلى أنفه فأغمض عينيه مستمتعًا بشعور الأمان الذي يجتاحه بتواجدها معه، وضعت أمامه الطعام و ابتسمت قائلة:

_ عامل إيه يا «أحمد» ؟ وحشتني؟

لم تكن تعني كلمتها الأخيرة بالمعنى الحرفي، و لكنها رغبت في منحه شعور الاهتمام، ليعلم أن هناك من يحبه و يريده بخير.

فتح عينيه ناظرًا إليها، فلمعت عينيه بوميضٍ من اللهفة و العتاب، فاستدنت بظهرها على الحائط و قالت:

_ انا آسفة عشان مجتش الأيام اللي فاتت، بس كان عندي مشكلة.

نظر إليها باهتمام؛ ينتظر تفسيرًا لكلماتها، فأكملت بصوت مختنق:

_ فاكر بابا «أحمد» اللي قولتلك عليه المرة اللي فاتت؟ لما خرجت من عندك يومها عرفت إنه مات هو و ماما.

خانتها عيناها عندما فرت الدموع هاربةً على وجنتيها، فتفاجأت به يُزيل دموعها بأنامله النحيفة المرتجفة، و ينطق بخفوت:

_ البقاء لله.

لقد سمعت تلك الجملة من الجميع، لكنه جعلها مميزة، و كأنه طبطب على قلبها، فابتسمت بودٍ و قالت:

_ و نعم بالله.

بدأت تطعمه كما فعلت في المرة السابقة، و قالت بحنان صادق:

_ كدا مبقاش عندي غير «أحمد» واحد، و مش هسمح لحد يؤذيه.

★★★★★★

ظلت على هذا المنوال لمدة أسبوع كامل، اقتصرت في يومها على زيارتها لأحمد و إمداده بالغذاء نهارًا، و في المساء تخلد مبكرًا إلى نومها كي تتحاشى زوجها، و تحافظ على المسافة و الفتور بينهما.

جاءت إليها «منى» لزيارتها في بداية الأسبوع الجديد، ففضلت «غرام» أن تأخذها إلى غرفتها بعيدًا عن «مالك» الذي يشاهد المباراة في حجرة الجلوس.

بادرت «منى» بنبرة جادة:

_ مستعدة تسمعي الكلام اللي هقوله؟

هزت «غرام» رأسها وقالت باستعجال:

_ قولي قولي، جاهزة اسمع أسوأ السيناريوهات، مفيش حاجة هتبقى أشد عليّ من موت أهلي.

_ أنا شوفت تسجيل الكاميرات اللي في محل عم «عبد المجيد» ، أمك رجعت البيت قبل ما المأذون يكتب الكتاب و كانت بعربية «مالك» و الشاب اللي نزل معاها ده شغال في الحراسة اللي عندكم هنا.

_ و بعدين؟

_ الغريب بقى إن والدك ظاهر في الكاميرا و هو بيعيط و بيجري داخل العمارة، و بعد والدك ما طلع بحاولي تلت ساعة الشاب اللي كان مع والدتك ده نزل......يعني اعتقادي إن الشاب دا هو السبب في موتهم.

أيدت «غرام» اعتقاد صديقتها و قالت:

_ و عمل كدا بطلب من «مالك».

_ خلينا نقدم شكوى، و سيبي البيت ده و تعالى معايا.

اعترضت «غرام» قائلة:

_ مينفعش، لسه قاعدة هنا شوية، و موضوع الشكوى ده لا هيقدم و لا هيأخر، لأن «مالك» هيخرج منها زي الشعرة في العجينة.

قالت «منى» باستنكار:

_ ازاي يا بنتي دي جريمة قتل!

تلوى ثغرها ببسمة ساخرة و قالت:

_ ببساطة جدًا الفيديو اللي بتقولي عليه ده مش دليل على إدانة «مالك» ، و كمان مش دليل قوى ضد الشاب اللي ظاهر، ف خلينا نأجل الموضوع دا شوية، كدا كدا هجيب حق أهلي.

حذرتها «منى» قائلة بقلق:

_ بلاش اللي في دماغك دا يا غرام، واضح إن «مالك» صعب و شخص وحشي مش هنعرف نلعب عليه.

قالت «غرام» بغموض:

_ سبيها لله، عملتي الطلب التاني؟

تزامن رد«منى» ، مع إخراجها مفتاحًا من حقيبتها فقالت:

_ اهوه، طلعت نسخة زي اللي كانت مطبوعة على العجينة، أتمنى يكون الصنايعي عرف يعملها مظبوط.

★★★★★★

في تلك الأثناء، قاطعت «سميرة» متابعته للمباراة، عندما جاءت قائلة:

_ مستر «مالك» عايزة أقولك حاجة.

رد عليها و نظره مثبت على شاشة العرض:

_ في ايه؟

أجابته قائلة بحيرة:

_ في حاجة غريبة بتحصل بخصوص «أحمد».

ضيق ما بين حاجبيه سائلًا بترقب:

_ حاجة غريبة ازاي؟

أوضحت «سميرة» قائلة:

_ دلوقت أنا كنت بطلع كل يوم ساعة الصبح و ساعة وش المغرب كدا افكه عشان لو هيستخدم الحمام، و كنت بطلع عيش وحلاوة كل ٣ أيام زي ما أنت قولت لي.

_ فين الغريب في كدا؟

_ الغريب إنه الأول كان بيخلص الأكل اللي بطلعه دلوقت مبقاش يقرب منه أصلا.

قال «مالك» بحقدٍ دون اكتراث:

_ عنه ما أكل يا «سميرة»، خليه يموت و نخلص.

_ ما هو في حاجة كمان.

_ حاجة ايه؟

_ الأسبوع الأخير ده بقيت أسيب الأكل بكميات معينة في التلاجة، و اجي تاني يوم الاقيه ناقص.

هتف «مالك» بحدة خفيفة:

_ هو احنا هنراقب الأكل؟ ما يمكن تكون «عبير» بتاكل أو «غرام» او ممكن «غرام» بتأكل حد من الحرس....فمش هقعد ادور مين أكل و مين لاء!

_ طب حاجة كمان.

تنهد «مالك» بصبر أوشك على النفاذ وقال:

_ انجزي، لسه ايه؟

_ طلعت امبارح لاقيت «أحمد» مفكوك مع اني متأكدة اني كنت قافلة السلاسل الحديد على إيده، و كمان قابلت الدكتورة نازلة من على السطح.

قطب حاحبيه مفكرًا، ثم هب واقفًا بوجه مكفهر، فقد استطاع ربط الخيوط ببعضها، فهدر بغضب مكتوم:

_ «غرام» فين؟؟

_ مع دكتورة «منى» في الأوضة فوق.

تخطاها «مالك» ، صاعدًا إلى غرفته ناويًا الفتك بها، فقد نفذ صبره و لن يغفر لها بعد الآن.

يتبع ......... عرض أقل