رواية الفتاه المنحوسه الفصل التاسع 9 - بقلم سحر حسين
بقلم سحر حسين عزت
البارت التاسعه :
المصيبه التاسعه
ماشيه لقيت راجل كبير قالي ............
كان في راجل كبير في السن قاعد علي كرسي قدام ورش خشب وكان باين من لبسه أنه علي قد حاله هو كان لبس قميص مألم و بنطلون جينز و في رجله شبشب جلد بس قديم شويه المهم لما شافني ماشيه و مهمه نده عليا و قالي
خدي يا بنتي تعالي
بصيت عليه و قولتله
انا .... حضرتك بتنده عليا انا
ابتسم و قالي
اه انتي امال مين هو في بنت غيرك في الشارع
بصيت حواليا و قولت
لا مفيش بنت غيري
و بعدين قربت منه و قولت
نعم عايز حاجه يا عمو
قام من مكانه و دخل الورشه جاب كرسي تاني و قالي
اتفضلي اقعدي هنا
استغربت جدا و بعدين قولتله
ايوه ليه
ضحك و قالي
متخافيش عايز اتكلم معاكي شويه اقعدي
روحت عند الكرسي و قعدت و بصيتله و قولت
خير يا عمو اتفضل اتكلم
قالي
مالك
استغربت من سؤاله و قولت
انا .... مفيش حاجه
ضحك و قالي
يعني انتي كويسه
ابتسمت و قولت
اه الحمدلله كويسه المهم حضرتك كويس
قالي
انا هكدب زيك و هقولك انا كويس
ضحكت و قولت
ايوه بس انا مش بكدب انا كويسه
قالي
يا بنتي انا بعرف اقرأ العيون و الوشوش
ضحكت و قولت
وانا بقي مكتوب علي وشي ايه
قالي
انت فكراني بهزر طيب اسمعي انتي وحيده و عيونك في حزن و وحده كبيره اووي
استغربت و قولتله
كل ده عرفته من عيوني
قالي
لا و لسه اكتر من كده تحبي تسمعي
قولت
لا كفايه اللي انا فيه يا عمو و نبي المهم اقولي وانت بتكدب ليه
ضحك و قالي
مش مهم انا .... انا خلاص في اخر عمري المهم انتي اوعي تستسلمي للدنيا يا بنتي
ضحكت و قولت
الكلام سهل يا عمو بس انا خلاص تعبت من الدنيا دي
قالي
معقوله تعبتي بسرعه كده
قولتله باستغراب
بسرعه..... بعد كل ده و تقولي بسرعه عندك حق ما حضرتك متعرفش حاجه انا اتبهدلت اووي انت مش عارف حاجه
وانا بتكلم دموعي نزلت من غير ما احس بنفسي المهم كملت كلام زي ما اكون ما صدقت اتكلم
انا عشت اسود ايام في حياتي انت متعرفش انا شوفت اي انا بجد تعبت
هو فضل بصص عليا و ساكت لحد ما خلصت كلامي و بعدين قالي
انتي عندك كام سنه يا بنتي
قولت
15 سنه
قالي و هو بيضحك
بس يعني انتي عندك 15 سنه و ضعفتي كده امال هتعملي ايه لما توصلي 65 سنه وتبقي زي كده
ضحكت و قولت
والله ما ظنش اني هعيش لسن ده
ضحك و قالي
لا هتعيشي و بكره هتعيشي اجمل ايام حياتك يمكن تعبتي دلوقتي بس بكره ربنا هيفرحك و هيعوضك خير ان شاء الله يا بنتي
قولت
يارب يا عمو المهم بقي اقولي حضرتك بتعمل ايه هنا
قالي
دي ورشتي انا نجار شاطر اووي بس كبرت و معنديش صحه عشان اعرف اشتغل دلوقتي
قولت و بحسن نيه والله
طيب مدام مش بتشتغل دلوقتي خلاص بيع الورشه بدل ما هي مفتوحه علي الفاضي كده
لقيته اضايق اووي وقالي
لا مستحيل أبيعها أو حتي اقفلها حتي انتي بتقولي كده والله لو هموت عندي استعداد اموت فيها
قولت
طيب صلي على النبي كده واهدي وربنا مكنش قصدي ازعلك انا اسفه
قالي و هو مضايق
عادي يعني هي جت عليكي
قولت له
طيب هو مين تاني طلب منك تبعها
ابتسم و بص في الارض و قالي
عيالي ... ربنا يصلح حالهم
قولت له
امال هما فين
رد و هو برضو بصص في الأرض وقالي
سابوني و مشيوا وانا فضلت لوحدي
قولت
ومرات حضرتك فين
قالي و هو بيبتسم
حبيبتي ربنا يرحمها
قولت
انا اسفه
فجأة لقيته بيبص وره في الورشه و لما بصيت لقته معلق صوره ليها في الورشه هي جميله اوي ماشاء الله لما شوفت الصوره قولت
ماشاء الله هي دي
قالي
حبيبت قلبي و صاحبت عمري
قولت
يا سلام علي الحب
قالي
انا محبتش غيرها هي الوحيده اللي وقفت جامبي و صبرت معايا كتير و ستحملتني بجد
قولت
ربنا يرحمها هي اتوفت من زمان
قالي
اتوفت من خمس سنين
قولت
و بعدها عيالك مشيوا
قالي
عيالي بعد ما ربتهم و علمتهم من الورشه دي و بقوا حاجه كبيره وكل واحد معاه شهاده كبيره بقوا بستعروا مني و من الورشه دي و هما عارفين أن امهم باعت دهبها كله عشان افتح الورشه دي انا مستحيل افرت فيها فهمتي
قولت
فهمتك وانت معاك حق اوعي تبعها اهم حاجه الذكريات احنا عايشين عليها لما الناس اللي بنحبها بتروح بنفضل عايشين علي الذكريات
قالي
وانتي خسرتي مين من حبايبك
قولت
لا انا الحمدلله خسرت كل اهلي
بصلي باستغراب و قالي
اهلك كلهم
قولت
اه وربنا كلهم
ضحك و قالي
ربنا يبارك في عمرك يا بنتي
ضحكت و قولت
علي الله يا حج .... اه صح حضرتك اسمك ايه
قالي
انا عمك صالح يا بنتي وانتي
قولت
و انا هدي يا عمو
قالي
اسمك جميل اووي يا هدي و انتي بقي بتحبي الهدوء ولا لا
ضحكت و قولت
الهدوء مفروض عليا في حياتي اصل مين هيعمل دوشه ما انا لوحدي
و بعدين قولت في بالي
اه لو تعرف اللي حصلي هتعرف اني معشتش يوم واحد في الهدوء ده بس مستحيل اقولك عشان كل اللي بيعرف يا اما بيبعد أو بيموت
المهم ضحكت و هو قالي
خير يا بنتي بتضحكي علي ايه
قولت
لا مفيش حاجه يا عمو صالح ... المهم قولي مش عايز حد يشتغل معاك
قالي
ياريت ايدي علي كتفك عندك حد عايز يشتغل
قولت
اه و حد محتاج للشغل اووي
قالي
هاتيه وانا هعلمه كل حاجه و هخليه احسن نجار في الدنيا
قولت
الحد ده قدامك اهو
بصلي باستغراب و قالي
قدامي
قولت
اه وربنا انا اكتر حد محتاجه للشغل
قالي
اه بس الشغله دي صعبه اووي
قولت
و ماله كل الشغل صعب مفيش حاجه سهله
قالي
ايوه بس
قولت
بس ايه هو لزم يكون راجل يعني عشان توافق تشغله عندك
قالي
لا مش قصدي بس الفكره ان انتي مش هتستحملي
قولت
لا متخافش هستحمل انت لسه متعرفنيش
قالي و هو بيضحك
ماشي يا عم الجامد
فرحت اووي و قولت
يعني بجد حضرتك موافق
قالي
اه وانا هعلمك كل حاجه
قولت
وانا جاهزه بس معلش لزم تعمل حساب اني في المدرسه و لزم اذاكر كويس عشان ادخل كليه هندسه
ضحك و قالي
اشمعنا هندسه
قولت
وصيه اهلي
قالي
ماشي وانا هسعدك كمان
قولت
ماشي متفقين هنبداء من امته
قالي
من بكره أن شاءالله و هتقبضي باليوم
قولت
يعني ايه
قالي يعني كل يوم هديكي القبض بتاعك يعني زي مصروفك كده فهمتي
قالت
ماشي و انا موافقه
قالي
تمام يلا روحي دلوقتي و هستناكي بكره أن شاءالله
قولت
ماشي أن شاءالله بكره هكون عند حضرتك بس يارب تكون كويس
قالي و هو بيضحك
إن شاء الله هكون كويس
و طبعا هو مفهمش انا كنت اقصد ايه بس طبعا انتو فاهمين المهم روحت وانا فرحانه جدا و حسيت أن ربنا بيبعتلي ناس كويسه تقف جامبي زي مثلا طارق اه وحشني اووي و عايزه اسمع صوته علي الاقل اللهم قومت اغير هدومي و لبست بيجامه النوم و مسكت التلفون وانا قاعده علي السرير و جبت نمرت طارق و كنت هموت و ارن عليه و بعدين جه في بالي عمو صالح روحت قومت اتوضي و اصلي ركعتين عشان ربنا يسترها معايا بكره والراجل يفضل عايش و فعلا عملت كده و بعدين روحت عشان انام و ظبط المنبه و نمت و تاني يوم صحيت في معاد المدرسه وروحت واليوم كان ماشي كويس لحد الاخر و مصدقت جه وقت المروح عشان اروح الشغل و مش هضحك عليكوا كنت ماشيه وانا خايفه بقدم خطوه و برجع خطوتين المهم روحت عند الورشه وكانت المفاجأة لما شوفت ..................
تابع
•تابع الفصل التالي "رواية الفتاه المنحوسه دليل الروايات " لكي تظهر لك كاملة