رواية الفتاه المنحوسه الفصل الخامس والعشرون 25 - بقلم سحر حسين
المصيبه 25
طيب بصي يا ستي
........................................
انا اسمي محمد سليم والدي متوفي من صغير كان عندي 7 سنين و عندي 3 بنات اخواتي و امي عايشه من يوم ما ابويا مات وانا اللي كنت بشتغل و بصرف علي اخواتي والحمدلله الله جوزتهم و طمنت عليهم وانا فضلت قاعد مع امي و هي ست كبيره بس كده عايزه تعرفي ايه تاني
ردت هاله و قالت
عندك كام سنه
قال
32 سنه اعقبال ما خلصت جوازات اخواتي كان العمر جري
قالت
العمر كله أن شاءالله طيب كنت مرتبط قبل كده
ضحك محمد وقال
كان في حد في حياتي و خطبتها بس كانت عايزانا نقعد بعيد عن امي و قريب من أهلها هيا و طبعا ده صعب عليا دلوقتي وللاسف معملتها كانت وحشه مع امي
قالت هاله
طيب وانت قولت لمامتك عني
قال
اه طبعا
قالت بكسوف
طيب قولتلها ايه
قال
قولتلها اني بحب واحده و عايز اتجوزها
قالت
طيب و هي قالت ايه
قال
فرحت جدا و قالتلي هاتها عشان اشوفها قولتلها لا اصبري بس شويه وانا هخدك و هخليكي تشوفيها
قالت
أن شاءالله هشوفها قريب و متخافش والله هشالها علي دماغي من فوق و مش هخليها تشتكي مني خالص
قال
عارف
ضحكت و قالت
و عرفت منين بقي
قال
عشان عارف انك جدعه و متاكد انك مش تزعليها وانا هكون مطمن علي امي و هي معاكي
قالت
يا سلام و عرفت ازاي بقي اني جدعه
ضحك و قال
لما واحده تخدم راجل كبير و متعرفهوش و كل القرابا اللي بنهم أنها كانت جارته و كمان خالي بالها من واحده غريبه و تعاملها زي اختها يبقي مش هتخلي بالها من حامتها ازاي
قالت
اه يعني انت حبتني عشان كده بس
قال
لا والله انا في استجدعتك جدا وده زود حبي ليكي بس والله العظيم انا حبيتك من اول نظره
اتكسفت و بصت في الارض و معرفتش تتكلم راح هو اتكلم و قال
هااا في حاجه تانيه عايزه تعرفيها ولا خلاص كده
ردت و قالت
لا انا خلصت انت عايز تسالني علي حاجه
قال
حابه تتكلمي ولا اسال انا
قالت
لا انا هتكلم و هقولك على كل حاجه
انا اسمي هاله عزمي بنت راجل فلاح و انا كنت الكبيره و كان عندي 18 سنه و كده بقيت كبيره و عندنا لازم البنت تتجوز وهي صغيره المهم كان في واحد فلاح برضوا جارنا و ابويا كان عايز ياخد يشتري الأرض بتاعته المهم الراجل رفض و قال لبويا أن مش هيبيع أرضه بس عايز يكون في نسب بنا عشان يعني يزرعوا و يشتغلوا مع البعض والمحصول اللي يطلع يبقي ليهم هما الاتنين ابويا وافق ساعاتها خصوصا أن الراجل ده كان عنده اراضي كتيره بس فقير
و ابوايا العكس غني بس مش عنده اراضي كتيره المهم ابويا جوزني لابن الراجل ده حتي من غير معرف
كانت هاله بتتكلم و هي مكسوفه و في نفس الوقت حزينه و كان شكل محمد بدأ يتغير كان في الاول مبتسم بس دلوقتي لا المهم هاله كملت و قالت
فجأة دخل عليا ابويا و قالي تعالي يا هاله عشان تروحي مع جوزك كنت مستغربه جوزي ازاي و هو مين اصلا كان اول مره اشوف فيها جوزي كان يوم فرحي و بعد جوزنا بأربع أيام جوزي طلب من ابوه أنه يسافر القاهره عشان شغل هنا احسن و هو مش عايز يشتغل في الأرض بتاعت أبوه و ساعتها انا مكنتش عايزه اجي هنا بس ابوه و ابويا غصبوني اني اسافر معاه وجينا هنا و ساعاتها هو شتغل مع عم صالح و انا كنت قاعده مع مراته لحد ما جوزي مات و لما فكرت ارجع البلد تاني اهلي رفضوا و قالوا مينفعش ارجع هنا بعد موت جوزي عشان البلد كلها بتتكلم عني و بتقولي اني كان شكله وحش علي جوزي عشان مات بعد ما اتجوزت بفتره قصيره وانا من ساعتها وانا عايشه هنا و مرجعتش ولا مره البلد تاني و هما هناك اعتبروني ميته
بدأت هاله تعيط و هي بتتكلم و بعدين قالت
انا اسفه لو زعلتك بس كان لازم تعرف كل حاجه عني انا حبيتك بجد يا محمد و يمكن اول مره احب فيها و عشان كده قولتلك كل حاجه و هستني ردك فكر كويس و حتي لو رفض انا هفهمك و هقدر موقفك والله و مش هزعل منك اه و انا دلوقتي عني 27 سنه
محمد كان باين عليه الصدمه بس في نفس الوقت متكلمش ولا كلمه كان باصص عليها وساكت بس بعد ما هاله خلصت كلامها قام وقف و قال
طيب انا لازم امشي عشان اتاخرت و أن شاءالله هبقي اتصل بيكي بعد ازنك
و فعلا قام و سابها و مشي و اول ما قفل الباب وراه هاله اتفتحت في العياط و هنا اتاكدت أنه خلاص مشي و مش هيرجع تاني خرجت هدي من المطبخ علي صوت هاله جريت عليها وقالت
في ايه اللي حصل يا هاله فين محمد
رفعت هاله عنيها و بصت لهدي و قالت
محمد مشي مشي و مش راجع تاني
و قامت حضنت هدي جامد و فضلت تعيط و مكنتش قادره تتكلم خادتها هدي للاوضه عشان ترتاح علي السرير و اول ما قعدت على السرير اتكلمت بهستريه و قالت
سابني يا هدي سابني لما عرف اني كنت متجوزه بس والله كان غصب عني
ردت هدي و قالت
اهدي بس يا حبيبتي هو هيفكر شويه مع نفسه و هيرجع تاني متخافيش محمد بيحبك والله وانا شوفت ده في عيونه بس طبيعي هيزعل لما يعرف أن كان في حد تاني في حياتك اهدي بس
قالت هاله و هي بتعيط
انتي مشوفتش شكله كان عامل ازاي يا هدي
قالت هدي
طيب انتي لو كنتي مكانه كنتي هتعملي ايه مش كنتي هتتصدمي و هتحتاجي تفكري كويس يا حبيبتي
قالت بهدوء
يعني هيرجع تاني
قالت
هيرجع و الله هيرجع بس اديلوا فرصه يا هاله ماشي
قالت هاله بعد ما مسحت دموعها
ماشي انا هستناه انا حبيته يا هدي دي اول مره احب فيها حد و عمري ما هحب غيره هستناه
قالت هدي
و هو بيحبك يا هاله و هيرجع امسحي دموعك و خليكي قويه يا قلبي ماشي
قالت
ماشي يا هدي ربنا يخليكي ليا يارب
بدأت هاله تهدي شويه و كان عندها ثقه في حبها و أن محمد هيرجع و مش هيسبها ........ بس محمد كان تفكيره مشتت الموضوع كان صعب عليه و لما رجع بيته كان قاعد بيفكر طول الوقت في كلام هاله و مكنش عارف يعمل ايه هو بيحبها بس في نفس الوقت كان خايف من رد فعل مامته لما تعرف أن البنت اللي حبها كانت متجوزه قبل كده راح عند مامته الاوضه بتاعتها و لما دخل لقاها قاعده علي السرير و كانت بتقرا قرآن و قف قدامها و قال
ماما بعد ازنك كنت عايز اقولك على حاجه
مامته صدقت و قالت
خير يا حبيبي اقعد مالك
قعد محمد علي السرير و قال
فكره هاله اللي قولتلك عليها
ابتسمت و قالت
اه طبعا ست هاله اللي كلت عقلك من قبل ما تيجي حتي
ابتسم و قال
انا كنت قاعد معاها دلوقتي عشان اعرفها و هي تعرفني
ابتسمت و قالت
طيب كويس علي خير يا ابني ربنا يتمملك على خير يا حبيبي بس مالك مش مبسوط ليه
قال
اصل بصراحه عرفت حاجه كده و مش عارف اعمل ايه ولا عارف افكر بسببها
قالت
خير يا ابني في ايه
قال
هاله كانت متجوزه قبل كده
قالت امه
مطلقه يعني
قال
لا ارمله يا ماما
قالت
عندها اولاد
قال
لا علي كلامها جوزها اتوفي بعد جوزهم بفتره قصيره
قالت
طيب و فين المشكله
استغرب محمد من رد فعل أمه و قال
يعني انتي معندكيش مشكله يا ماما
قالت
يا ابني انا قدامك اهو ارمله معني كده اني وحشه
قال
لا يا ماما انا مقولتش أنها وحشه بس ....
قالت
طيب لو لقدر الله ده حصل مع حد من اخواتك البنات هتقول نفس كلامك ده لو واحده فيهم اتجوزت تاني
محمد فكر في كلام امه و سكت و هي كملت كلامها
طيب هل هتقبل أن جوز اختك التاني ده فكر حتي بنفس طريقتك بس يا ابني لو البنت دي طيبه وانت بتحبها يبقي اتكل علي الله و متفكرش في الماضي فكر في مستقبلكوا مع بعض انت بتحبها ولا لا
قال
بحبها يا ماما والله بحبها بجد
ضحكت و قالت
يبقي اتكل على الله يا ابني ربنا يسعدك و تكون هي العوض ليك و تكون انت العوض ليها
قال
يعني انتي معندكيش مشكله
قالت
مدام انت هتكون سعيد معاها يبقي معنديش مشكلة معاها
وطي محمد علي ايد امه و باسها و قالها
ابنك هتجوز يا ست الكل
حطت اديها علي وشه و قالت
و اخيرا هفرح بيك
قال
هروح اكلمها لحسن انا سايبها بتعيط
قالت
حرام عليك روح طمنها و ابقي قولها اني عايزه اكلمها
قال
بجد هتكلميها
قالت
اه طبعا مش هتبقي مرات ابني
قال
طيب ثواني
طلع تلفونه و تصل بيها و اول ما تلفون هاله رن و شافت أن هو اللي علي تلفون مسكت التلفون و كانت خايفه ترد كانت خايفه ليكون رده عليها أن كل شيء نصيب و اول ما فتحت فتحت قال
الو
هاله كانت حاطه التلفون علي ودنها و كانت خايفه ترد قام هو اتكلم و قال
هاله
قالت بخوف
نعم
قال
مش عايزه تكلميني ولا ايه
قالت
لا عادي خير
قال لها ماما عايزه تكلمك
هاله خافت اكتر و قالت
ايه مامتك
قال
ايوه خدي هي معاكي اهي
خدت امه التلفون و قالت
الو ايوه يا بنتي
ردت هاله و قالت
ايوه
قالت
عامله ايه يا بنتي
ردت هاله
الحمدلله بخير
قالت
معلش لو كنا بنتصل في وقت متأخر
رد محمد و قال
مش متأخر اوي يعني دي الساعه 10 لسه
ضحكت امه و قالت لهاله
بصي يا بنتي انا عايزاكي تعتبريني امك و لو محمد عملك اي حاجه عرفيني بس وانا هنفخهولك
ضحكت هاله و اخيرا و لما سمعت كلام امه ارتاحت و فرحت جدا المهم ردت و قالت
ربنا يخليكي لينا يا حبيبتي وان شاء الله هشوف حضرتك علي خير
ردت و قالت
أن شاء الله يومين و نجي نقرا الفاتحه وان شاء الله تتم الخطوبه علي خير يا حبيبتي
اتكسفت هاله و قالت
أن شاء الله
قالت امه
طيب يا قلبي خدي محمد معاكي اهو
محمد خد التلفون و خرج من الاوضه بتاعت امه و دخل الاوضه بتاعته هو و فرد جسمه علي السرير و اتكلم في التلفون و قال
الو
قالت
الو
قال
مال صوتك انتي لسه بتعيطي
اول ما قال كده فعلا هاله عيطت تاني و قالت
انا مش فاهمه حاجه يعني ايه
ضحك و قال
هو ايه اللي يعني ايه
قالت
يعني انت وفقت عليا
قال
يا هاله انا بحبك و اللي انتي قولتيه ده مقللش حبي ليكي ولا حتي احترامي ليكي بس الفكره كلها كان لازم اعرف رد ماما قبل ما اقولك ايه حاجه انا عمري ما كنت هسيبك يا هاله
قالت
طيب لو ماما مكنتش وافقت عليا كنت هتعمل ايه
قال
كنت هقنعها بيكي كنت هعمل اي حاجه وكل حاجه عشان تكوني معايا بس الحمدلله ماما اهتمت اني بحبك و بس و هي وافقت عليكي
قالت
حرام عليك انا كنت بموت طيب ليه مقولتليش الكلام ده
ضحك و قال
انا اسف و اوعدك أن مش هخليكي تعيطي تاني ابدا
قالت
وانا بوعدك اني مش هعمل اي حاجه تزعلك ولا حتي تزعل ماما مني والله
قال
انا عارف يا حبيبتي والله عارف ان شاء الله يومين و هنجيب الشبكه
قالت
أن شاء الله يا حبيبي
فرح محمد و قال
ايه قولتي ايه
اتكسفت هاله و قالت
حبيبي انت حبيبي الاول والاخير والله
فرح جدا من كلامها و هما الاتنين فرحوا و انبسطوا مع بعض جدا المهم قفلوا مع بعض و بعد كام يوم كانوا بيحضروا للخطوبه وفعلا جه محمد و معه امه و الشبكه و جه يوم الخطوبه محمد كان لبس بدله سوده و هاله كانت لبسه فستان احمر و شكلها كان جميل جدا المهم اجتمعوا كلهم في الصاله و محمد لبسها الشبكه و كان الكل مبسوط و عم صالح كان قاعد علي الكرسي مبسوط راحت هدي شغلت اغاني و بدأت ترقص هي و هاله و محمد مع بعض وأمه كانت قاعده تسقف و كانت فرحانه لكن صالح كان
................................................
•تابع الفصل التالي "رواية الفتاه المنحوسه دليل الروايات " لكي تظهر لك كاملة