رواية الفتاه المنحوسه الفصل السادس عشر 16 - بقلم سحر حسين
بقلم سحر حسين عزت
البارت 16
المصيبه 16
محدش قدر يتوقع مين اللي كان بيتصل بيا اكيد ما علينا انا هقولكم اللي كان بيتصل بيا عمتي صفاء فاكرنها انا نفسي مكنتش اتوقع انها هي المهم اول ما عرفت انها هي قولت
عمتي يااا يا عمتي انتي بقالك فتره طويله ما كلمتنيش
ردت و قالت
انا عارفه يا حبيبتي بس والله انا مشغوله اووي المهم قوليلي انتي عامله ايه
رديت وانا مبسوطه انها بتسأل عليا
انا الحمدلله بخير يا عمتي انتي عامله ايه
ردت و قالت
انا كويسه انا سمعت انك مجبسه رجليكي خير
رديت وانا مستغربه بالاهتمام ده
اه دي حادثه بسيطة بس الحمدلله بخير
ردت و قالت
طيب يا حبيبتي الحمدلله اني اطمنت عليكي المهم انتي عايشه فين دلوقتي عايزه اجي اطمن عليكي بنفسي
رديت باستغراب شديد
انتي هتجيلي
قالت
اه طبعا هو انا عندي اغلي منك يا بنت اخويا
قولت
ماشي يا عمتي تشرفي في ايه وقت علي العموم انا قاعده في شقه بابا
قالتلي
الله يرحمه ده الغالي ماشي يا حبيبتي على العموم أن شاءالله بعد العصر كده هبقي اجي اقعد معاكي شويه
قولتلها
ماشي يا عمتي
المهم قفلت معايا وانا مكنتش مرتاحه للمكالمه ده ابدا ولا حتي مرتاحه أنها تيجي هنا بس مقدرش اقولها متجيش ما علينا و ربنا يسترها بقي بعد كده صحيت هاله و قولتلها
هاله .... يا هاله اصحي بقي كل ده نوم
قامت و قالتلي
صباح الخير و بعدين كل ده نوم ايه هو انا عرفت انام بسببك ده انتي طول اليوم كنتي بتعيطي وانتي نايمه و مسكتيش غير لما مسكت ايدك و نمت جامبك
استغربت من كلامها و قولت
انا .... انا كنت بعيط وانا نايمه
قالت
اه والله انا عايزه اعرف لما بتكوني لوحدك بتعملي ايه
قالت
مش بعمل حاجه بس انا محلمتش بحاجه عشان اعيط
قالت
عياطك امبارح مكنش بسبب الحلم ده بسبب اللي جواكي
قولت
ايوه اعملي فيها دكتور نفسي بقي اقومي ساعدوني عشان ادخل اخد دوش
قالت
اتريقي .... اتريقي انا صح بس مش هتناقش معاكي مش مشكله بكره لو عيطي وانتي نايمه هبقي اسجلك عشان تصدقي
قولت
ماشي يلا قومي بقي و بطلي رغي
قالت
ماشي يلا تعالي يا ستي
و فعلا قامت و دخلتني علي الحمام و بعد شويه جبتلي هدومي و علقتها في الحمام و سابتني و طلعت و انا فضلت قاعده افكر في كلامها انا كنت بعيط فعلا و هل ده فعلا من اللي جوايا ولا كنت بحلم و مش فاكره الحلم المهم خلصت و لبست و خرجت لقتها مجهزه الفطار و مش هكدب عليكوا فرحت جدا اول مره احس بالإحساس ده و كنت فرحانه جدا أن في حد معايا و في حياتي اصلا بس فكرت أنها كام يوم و هتمشي و هرجع لوحدي تاني بخاف و بزعل علي نفسي فعلا المهم قعدنا نفطر مع بعض واحنا بناكل قولتلها
انا عندي فضول اعرف انتي اتعرفتي علي بابا صالح ازاي
قالت
يااااا دي حكايه طويله اووي
قولت
قولي يعني احنا ورانا حاجه
قالت
ماشي اسمعي يا ستي انا كنت لسه عروسه جديده و جوزي كان شغال مع عم صالح في الورشه بس ساعاتها الورشه دي مكنتش بتاعت عم صالح بس كان شغال فيها و كان بيقسم القمه مع جوزي و كان بيعتبره ابنه بعد ما عياله طلعوا وطين و سابه و مشيوا
قولت
انا سألت بابا عليهم قبل كده بس هو مقالش حاجه عنهم
قالت
ربنا يصبره هو بتصعب عليه نفسه لما نتكلم عنهم عشان كده محدش بيسأل عنهم
قولت
طيب احكيلي انتي بقي
قالت
اه انتي عايزه توقعيني في الكلام
قولت
لا بجد عايزه اعرف كل حاجه عنه بس في نفس الوقت مش عايزه ازعله فاهمه
قالت
ماشي بس اوعي تقولي اني قولتلك حاجه ماشي
قولت
قولي و متخافيش والله مش هقوله حاجه
قالت
طيب بصي يا ستي عم صالح مخلف والدين و بنت و كان بيحبهم جدا و كان بيحب مراته الست كريمه و عايزه اقولك على حاجه هي فعلا كريمه كانت ست زي السكر ربنا يرحمها ويغفر لها المهم لما اتجوزت انا سكنا تحتهم يعني كنا جيران و كان عياله في جامعه و ماشاء الله كان مربيهم احسن تربيه بس لما وصلوا و بقي حاجه كبيره استعروا بالفقر ده و كانوا عايزين يطلعوا منه باي شكل بس طبعا عم صالح قالهم
لا ده حالي و حالي ده اللي خلاكم تبقوا حاجه و دلوقتي بقيت وحش
بس بصراحه محدش اهتم و الكل سابهم و مشيوا حتي بنتهم اول ما جالها عريس متريش اتجوزت و سافرت معاه المشكله مش هنا المشكله ان من ساعات ما مشيوا محدش فيهم سال عنهم ولا حتي برساله لحد ما الست كريمه تعبت اووي و جالها بعيد عنك كده المرض الوحش و كانت عايزه اي حد يخدمها المهم طلعت انا و فضلت اخدمها و هي كانت بتتعامل معايا زي بنتها و اكتر كمان طيب اقولك علي حاجه
قولت
قولي
قالت
دي كانت علي طول بتجيبلي هدوم جديده المهم فضلت وقفه جانب عم صالح لحد ما قدر يشتري الورشه و بقت بتاعته راسمي و للاسف بعد ما ده حصل بسنه اتوفت الست كريمه الله يرحمها و ساعتها عم صالح كره حياته و فضل فتره طويله ميخرجش من بيته من كتر حزنه عليها أصلها كانت حب حياته انا عمري ما شوفت حد بيحب حد كده و ساعتها كان جوزي هو اللي بيشتغل و كان بيطلع يحاسب عم صالح و هو كان بيديله مرتبه و خلاص و هو يعني فضل حزين عليها لحد صحته تعبت طيب اقولك على حاجه ده لحد دلوقتي لسه محتفظ بالحاجات بتاعتها زي ما هي انا يدوب بطلع اروق الشقه بس المهم بعد وفاتها بسنه جوزي هو كمان مات و بقيت عايشه لوحدي و انا ساعتها قولتله انا هطلع اشتغل يا عم صالح هعيش ازاي و هو ربنا يكرمه قالي لا خليكي انا اللي هشتغل و كل اللي انتي عايزاه هجبهولك انتي بنتي وانا عمري ما هخليكي تتبهدلي طول ما انا عايش و فعلا من ساعتها هو يشتغل وانا اطلع اروق الشقه و نزل اطبخ عندي و طلعله اكله و فضلنا علي كده لحد دلوقتي
قولت
طيب وانتي معندكش اولاد
قالت
لا
قولت
انا اسفه
قالت
لا يا حبيبتي متتاسفيش انا راضيه الحمدلله و بعدين بيني و بينك خوفت اخلف و يعملوا معايا زي عم صالح بعد ما اربيهم و اتعب عليهم يستعروا مني لا علي ايه كده احسن
قولت
طيب و هما محدش فيهم جه لما امهم ماتت
قالت
ابدا و يمكن كمان محدش يعرف أن امهم ماتت بقولك من ساعت ما مشيوا محدش بعت حد رساله يطمن عليهم
قولت باستغراب
معقوله في حد يعمل كده في أهله
قالت و هي بتضحك
اه يا اختي الفلوس بتعمل ايه حاجه و في ناس بتتغير علي أهلها اول ما يبقي معاهم فلوس اسكتي انتي متعرفيش حاجه
ضحكت و قولت
لا بالعكس أنا عارفه كويس اووي ما علينا طيب انا شبعت
قالت
و انا كمان الحمدلله انا هقوم اشيل السفره و انتي هتعملي ايه و اوعي تقوليلي انك هتنامي
قولت
انا مش عايزه انام بس مش عارفه اعمل ايه
قالت
يا بت هو انتي مش بتذاكري ليه
قولت
تصدقي انا فعلا بقالي فتره مفتحتش كتاب
قالت
طيب يا فالحه ادخلي ذكري شويه يمكن تفلحي بس يا بت اوعي لما تفلحي تبعينا انتي كمان خليكي فكرانا هااا
قولت
لا متخافيش انا مستحيل انساكوا و بعدين معنديش امل اووي اني هوصل و هبقي حاجه كبيره
قالت
يا ساتر علي التفاؤل اللي انتي فيه اساعدك تدخلي جوه
قولت
لا روحي انتي انا هعتمد علي نفسي
قالت
ماشي
المهم دخلت فعلا الاوضه و بدأت اطلع الكتب عشان اذاكر بس طبعا مفهمتش اي حاجه خالص والله فضلت اقلب في الكتاب ده شويه و ده شويه و هي بعد عشر دقائق جبتلي الشاي قال يعني مركزه اووي كان كل تفكيري في اللي حصل مع عم صالح هو ازاي استحمل كل ده من عياله المهم و انا قاعده سمعت صوت حرز الباب بيرن و شويه و هاله فتحت الباب و بعدها جت هاله و قالتلي
يا هدي في واحده بره عايزاكي بس بصراحه انا مش مرتاحه للوليه دي خالص
قولت
هي جت
قالت
هي مين دي
قولت
دي عمتي
قالت باستغراب
عمتك
المهم طلعنا من الاوضه و اول ما شافتني علي الكرسي جت و خدتني في حضنها و قالت
حبيبتي الف سلامه عليكي يا بنتي
قولت
الله يسلمك يا عمتي اتفضلي اقعدي
المهم قعدت و هاله قالتلي
انا جوه يا هدي لو احتاجتي حاجه ابقي اندهي عليا
و كانت هاله هتمشي راحت عمتي قالت ليها
انتي يا بت اعمليلي حاجه ساقعه كده اشربها ريقي ناشف
هاله بصت ليها بصه كانت هتاكلها روحت انا رديت علي عمتي و قولت
اسمها هاله يا عمتي
و روحت بصه لهاله و قولتلها معلش يا هاله امسحيها فيا انا و بعد اذنك اعملي عصير لعمتي
ردت هاله و قالت
حاضر عشان خاطرك بس يا هدي
و مشيت هاله وانا قولت لعمتي
خير يا عمتي
قالتلي خير يا بنت اخويا ده انا بطمن عليكي مش اكتر
قولت
غريبه يا عمتي ده انتي بقالك كام شهر مش معبر اني اشمعنا افتكرتيني دلوقتي
قالت
بقي كده يا هدي يعني انا اجيلك وانتي تقولي كده
قولت
معلش يا عمتي انا بس بطمن
قالت
لا يا حبيبتي اطمني انا بس كنت عايزاكي في موضوع كده
ضحكت ما انا عارفه طبعا أن مجيها ده هنا مش لله ابدا ولا حتي عشان تطمن عليا المهم قولتلها
خير يا عمتي موضوع ايه
قالت
هو خالك ايمن بخير
اول ما قالت كده استغربت جدا انها بتسأل عليه المهم قولت
معرفش انتي عايزه حاجه منه
قالت
لا بس بصراحه يا هدي ربنا يباركله
بصتلها باستغراب شديد معقوله هي بتشكر فيه دي مكنتش بتحب حتي سيرته ايه اللي حصل فجأة كده و هي لما شافتني بصيت كده قالت
مالك بصه ليه كده
قولت
اول مره اعرف انك بتحبي خالي لا و كمان بتدعيله غريبه دي
قالت
لا يا هدي ده انا طول عمري بعزه و بعمله زي اخويا بالظبط
قولت
المهم بتسالي عليه ليه
قالت
اصله بصراحه جالي و اشتكالي منك مش معقوله يا هدي الطريقه اللي اتكلمتي بيها دي ده مهما كان خالك
ضحك و قولت
اه طيب عشان اوفر عليكي الكلام يا عمتي انا مش هبيع الشقه والله لو دفع فيها مليون جنيه
ردت و قالت
لا ده قال إنه مستعد يدفع 2 مليون جنيه ايه رايك
قولت
وانتي نصيبك قد ايه يا عمتي
ردت و قالت
قصدك ايه انا مش هاخد حاجه انا بعمل خير مش اكتر
قولت
خير انتي مستحيل تيجي لحد هنا و تتكلمي عن خالي كده لو مش هتطلعي باي مصلحه من الموضوع ده
اول ما قولت كده قامت و فضلت تزعق و طلعت هاله و كانت لسه هتتخانق معاها راح الباب خبط و راحت هاله عشان تفتح و كانت المفاجأة لما الباب فتح ....
لا متستغربوش مهي المفاجأت كلها بتيجي لما افتح الباب
تابع
بقلم سحر حسين عزت
•تابع الفصل التالي "رواية الفتاه المنحوسه دليل الروايات " لكي تظهر لك كاملة