رواية صراع العقل والقلب الفصل السادس والعشرون 26 - بقلم كنزي علي

اللهم صل وسلم وزد وبارك على سيدنا محمد وعلى آله وصحبه وسلم أجمعين 😍❤❤

لا إله إلا أنت سبحانك أنى كنت من الظالمين 💕

ياارب يا كريم يا عظيم أرفع البلاء والوباء اللهم أمين ربنا يحفظنا جميعا اللهم أمين ❤

عند أميره بتعمل التظبيطات الاخيره ومعاها ميكيب ارتست تعتبر خلصت لبس فستان لونه كشمير بتظريز خفيف سمبل وشيك بتلت تربع كم ضيق من الصدر ونازل بطبقه شيفون واسعه شعرها متوسط الطول معمول تسريحه رقيقه ونازل بالجمب مع ميكب رقيق كانت ملاك بملامحها البرئيه

والدتها دخلت عليها

سها ابتسمتلها :حبيبتى ايه الحلاوه دى كلها تسلم ايدك يامدام ندى

ندى الميكب ارتست :أنا معملتش حاجه انسه أميره زى القمر وألف مبروك عن اذنكوا

سها : اتفضلى وميرسى مره تانيه

أميره :مامى بجد حلوه

سها :حبيبتى ماشاء الله عليكى زى القمر وطلعت كوليه الماظ ولبستهولها

أميره :الله يامامى حلو اوى ميرسى مامى انا متوتره وملتغبطه اوى ودقات قلبى مش عارفه اسيطر عليها شوفى أيدى سقعانه اوى

سها :هههههه حبيبتى كل ده طبيعى بس لازم تكونى واثقه فى نفسك أكتر من كده انتى مش أى حد فاهمه

اوكى يلا الناس على وصول ولازم أشيك على كل حاجه

هنزل أنا وانتى متتأخريش وبستها ونزلت

أميره بتبص لنفسها فى المرايا

أهدى ياأميره دا مجرد تعارف وو وبس

ومش هتكونى لوحدك ياربى اعمل ايه آه المعالج قالى لما تكونى متوتره ظبطى نفسك وفكرى فى حاجه تانيه وووايه

هههههه نسيت دا انا نسيت اصلا كل الجلسات الاخدتها

خدت كذا نفس وخرجتهم بطريقه منتظمه ونزلت ...

شهاب كان محتار يلبس ايه آه بيهتم بلبسه جدا بس النهارده محتار فى الآخر قرر يلبس بنطلون اسود وسويتيشرت اسود مفتوح من عند الرقبه شويه وهاف كول ابيض وظبط شعره الكثيف بتسريحه شبابيه مناسبه ليه وخاتم فضه بفص كبير وساعه براند وبرفيم

بص لنفسه برضا

وتلقائياً فتح دولابه الخاص ...

وطلع منه عينه برفيوم روز واخد منه نفس عميق ملى بيه رئته

وأبتسم واتنهد .. وحشتيني غمض عينيه واتخيل شكلها النهارده وهمس متأكد أنك هتكونى احلا وأجمل مما أتخيل وحط البرفيوم مكانه ونزل

مهاب لسها :مش عاوز غلطه واحده

سها:متقلقش كل حاجه مظبوطه وجاهزه

مهاب : اوكى

الكل وصل عربيه فؤاد وجاسر

وعمرو واتقابلوا ودخلوا

شهاب كان فى استقبالهم حياة وفؤاد مع بعض وعمرو ونسرين وأسر وأخيرا روز وجاسر

روز كانت من ناحيه شهاب الأول ماشفها انبهر بجمالها

شهاب سلم على جاسر وبهمس لروز : لبيت دعوتك وجيت فى الميعاد

روز بصتله ودارت ابتسمتها ودخلت

طبعا شهاب شاف ابتسمتها الفرحته

مهاب وسها رحبوا بيهم وقعدوا

فؤاد بيتكلم وبيفتحوا مواضيع عامه

شهاب بيسرق نظرات من عينين روز الحست أنها محاصره وبتهرب بعينيها

بس تلقائياً عينيهم بتتقابل

شهاب بيحاول يركز مع كلامهم بأكبر قدر

روز عجبها جدا شياكته وانقته وأسلوبه فى الكلام واد ايه كلامه قليل آه بس ليه وزنه

الداده من بعيد شاورت لسها استأذنت وراحتلها وبلغتها أن أميره عوزاها

سها راحت لاميره : حبيبتى مالك

أميره :مامى لو سمحتى ممكن تندهي لفيروز

سها ابتسمتلها : اوكى بس بطلى توتر وراحت لفيروز وبهمس ابتسمت

..أميره عوزاكى

فيروز راحت لها

روز :ماشاء الله ايه الجمال ده كله

أميره :روز متوتره اوى مش عارفه مالى

روز :ههههههه متعمليش حاجه ده طبيعى بصى رددى بسم الله الذى لا يضر مع اسمه شئ فى الأرض ولا فى السماء وهو السميع العليم وفعلا أميره عملت كده

روز كملت... حبيبتى بجد زى القمر ربنا يحميكى وغمزتلها

كل ده علشان أسر ههههه يابختك يااسر

أميره : روز اسكتى متوترنيش

وبعد شويه

سها إجت تاخد أميره وروز وراها ودخلت وبتعرفها على الموجودين

وسلمت وقعدت جمب حياة

الأعجبت بيها جدا وببرائتها وكسوفها الواضحين ومن الناحيه التانيه جمب روز البتغمز لأسر على جمال أميره

شهاب شفها وابتسم على حركتها

فؤاد طلبها وقرؤا الفاتحه

وحياة قامت أدت الهديه لأسر ولبسهلها

شهاب عينيه على روز بقاله فتره عاوزها تشوفه وعينيه اتقابلت معاها وبتحريك شفايفه ليها : عقبالك

روز فهمت حركه شفايفه وابتسمت وزاغت بعينيها بعيد

فؤاد :تمام ايه رأيكوا الخطوبه بعد أسبوعين والفرح على الصيف إن شاء الله

سها بأعتراض : بس كده طارق مش هيكون موجود أنا بقول ننتظر لما يجى

شهاب :ماما بعد إذنك طارق على القليله لساله شهرين يعنى احنا نعمل خطوبه هنا فى القصر كمان أسبوعين والفرح فى الصيف يكون طارق معانا وأنا متأكد أن طارق كمان هيوافق على الرأى ده

وابتسم لوالدته يحسها على الموافقه

مهاب لسها : أنا شايف أن ده حل مناسب

سها بتسليم ليهم : اوكى

واتفقوا على التفاصيل

سها لحياة ونسرين بأبتسامه : اتفضلوا معايا هوريكوا حاجه وقاموا

سها بهمس لشهاب :خد أسر وأختك الجنينه عارفها بتتكسف خليك جنبها آه ومتنساش روز وجاسر

شهاب :تمام

وراح ناحيه أسر ... سياده الرائد اتفضل وراح ناحيه أخته وروز وجاسر ايه رايكوا نقعد فى الجنينه شويه

جاسر بهمس لروز : هو احنا هناكل امتى

روز برقتله

سكت وفعلا راحوا

همس جاسر سمعوا شهاب وأبتسم

شهاب ما بين اخته واسر وماسك ايديها وقعدوا على كرسى طويل وعريض :طيب هشوف حاجه وراجع

وسابهم ومشى

فى نفسه ...موقف زباله بسلم أختى لواحد يحب فيها أوف

وبص نحيه روز المع جاسر طب وده اعمل فيه ايه

ما انا كمان عاوز احب فيها

وجتله فكره وراح ناحيه الشيف اتكلم معاه هما عاملين بوفيه صغير ومن بعيد نده لجاسر

شهاب : سياده النقيب الحقيقه الشيف

وبيشاور عليه

طلب منى ادوق الأكل يعنى أشوفه مظبوط أو فى حاجه فقولت جاسر باشا الهيقوم بالمهمه دى

جاسر :بس اصل يا باشا

شهاب :ايه ياجاسر احنا خلاص بقينا أهل وأنا يهمنى جدا رأيك

وطبطب على ضهره وشاور للشيف الجاله : باشا اتفضل معايا ... وراح معاه

شهاب راح لروز

وبيهمس لنفسه ... بقى على آخر الزمن شهاب الحديدى يتفق مع شيف اه يابت البحيرى

وراح لعندها كانت مدياله ضهرها وبتبص على حوض ورد

شهاب بص عليها شويه واتخيل نفسه شايلها وبيلف بيها المكان كله وبيقولها اد ايه انتى جميله أد ايه بحبك اخد نفس : رووز

روز بصتله وابتسمت وبصت وراه بأستغراب :فين جاسر

شهاب :بس بيشوف حاجه وجاى على طول

شهاب بيبص لعينيها مش قادر ميقولهاش أنها حلوه اوى بهرته بجمالها : حلوه اوى

بلع ريقه ... زى القمر

روز اتكسفت من نظراته قبل كلامه رطبت شفايفها وضغطت عليها ووشها أحمر

وزاغت بعنيها بعيد

شهاب عاجبه اوى خجلها ووشها البيحلو أكتر وهيا مكسوفه : ايه رأيك فى الجنينه

روز بصت لقدام : حلوه

شهاب استشف حاجه من كلمه حلوه : حلوه بس وأبتسم ... بس ايه

روز : حلوه بس كل حاجه فى مكانها اوى الورد الأخضر فى مكانه بعيد ليه عن باقى الألوان يعنى الحوض ده ليه كله أخضر وده كله ألوان يعنى مثلا تخيل لو فى الحوض ده على الجوانب ورد أخضر وفى النص ألوان مختلفه

وبتبرر كلامها ... هواا كده حلو اوى ومعمول بطريقه مدروسه وكمان شكل مش بس جناينى هو المشرف على الجنينه لاء الموضوع فيه متخصص وده واضح بس مش عارفه اقولهالك ازاى هو محتاج

وسكتت

شاورلها بعينه تكمل

فقالت محتاج روح فاهمني

شهاب بصلها بأستغراب ديما كان بيبص على الجنينه حاسس أنه ناقصها حاجه لما كان بيشوف الجنينه عندهم كان بيحس أن الورد فرحان بيحس بأنتعاش دلوقتي عرف أن لمستهم فيها هيا السبب فى الروح دى هو عارف والده واد ايه بيحب كل حاجه ليها متخصص ومحدش ليه يدخل فيها فدى النتيجه

سكوت شهاب وتأمله فى الجنينه عرفت أنه اضايق

روز : على فكره أنا مقصدش أقول حاجه تضايقك أنا بس

شهاب قاطعها وابتسم : نفسى تبطلى تسيئ الظن فيها

بص قدام ورجع بصلها ... ياروز أنا مش وحش ووضحتلك سوء التفاهم الخلاكى تقعدى أكتر من سنه تتهربى من مقابلتى وانك تشوفينى وبتهيألى أنك سامحتينى

روز بأحراج : ابدا والله مقصدش أنا بس حسيتك أضايقت من كلامى

شهاب :لاء ياروز مضايقتش بالعكس كنت بفكر فى كلامك واد ايه مظبوط ديما كنت ببص للجنينه كنت بحس أن ناقصها حاجه وانتى لفتى نظرى ليها

اسألينى الأول أنا يهمنى جدا أن ميحصلش سوء تفاهم ما بنا

وشاورلها يقعدوا على أطراف حوض الورد وقعدوا

روز عجبها أنه مهتم ميحصلش سوء تفاهم ما بنهم ... وتكلموا شويه

أسر وأميره مش لاقين كلام يقولوه ساكتين قالها ازيك وعامله ايه عشرين مره

أميره مكسوفه وبتلعب فى أيديها وجت على الانسيال

أسر : عجبك الانسيال

أميره :حلو اوى ميرسى زوقك حلو

أسر بصلها وسكت

أميره : هو مش زوقك

أسر :بصراحه لاء زوق ماما وروز أميره أنا مبحبش الكدب أكتر حاجه بضايقنى

اضايقتى من صراحتى

أميره :بالعكس دى حاجه كويسه جدا احم بمناسبه الصراحه كنت عاوزه أسألك سؤال محيرنى

أسر: طبعا اتفضلى

أميره :يعنى والدتك وروز

وحطت أيديها على شعرها ففهم

أسر :قصدك موضوع الحجاب

هزت راسها بأيوه ...

شوفى يااميره فعلا أنا كنت أتمنى ارتبط بحد زى أمى بس مش عارف اوصلهالك ازاى يعنى قولتلك أتمنى بس مش أكيد أنا من أول ماشوفتك حركتى حاجات كتير فيا مش عارف ده حب او إعجاب بس الحسيته بجد أنك مهمه جدا بالنسبالى واتمنى تكونى شريكه حياتى انتى بقى إحساسك ايه نحيتى

اميره اتكسفت ومردتش

اسر أبتسم ... لا مافيناش من كده زى ماجوبتك تجوبينى

أميره بكسوف وإرتباك ووش احمر : حسيت فيك كتير من أبيه شهاب وشوفت أد ايه خوفت عليا يوم موضوع صاله البولينج أنت شخصيه مريحه جدا بالنسبالى وده الحسيت بيه

أسر اتبسط جدا من ردها العفوي فيه معانى كتير حلوه وصلتله ... واتكلموا شويه

سها بتفرج حياة ونسرين على القصر واخدوا تليفونات بعض

واتبدلوا الأحاديث والأفكار وكونوا علاقات حلوه مع بعض

شهاب :تعرفى لو كنا متفقين أننا نلبس زى بعض مكنش هيبقى بالشكل ده

روز ابتسمت هيا فعلا أخدت بلها من أول ما شفته : اممم فعلا

شهاب :قولتلك عقبالك جوه انتى بقى مش المفروض تردى عليا

روز :هههههه عقبالك انت كمان

بس هو انت ليه مرتبطش لحايد دلوقتي

شهاب :لحايد دلوقتي كبير أنا كده

روز :لاء والله مقصدش أقصد

شهاب :مش هسيئ الظن فيكى وعارف قصدك بس ببساطه قررت ماارتبطش غير لما أحب أو اقتنع بالانسانه الهرتبط بيها

روز :على فكره أنا مش بسيئ الظن فيك هيا بتيجى معاك كده ههههه حظك معايا كده

شهاب أبتسم وبص للأرض وبصلها : مرتبطه

روز :اممم دا سؤال خاص ياسياده المقدم سورى مش هرد عليه

شهاب :بقى كده ما انتى سألتيني وانا جوبتك

روز ابتسمت : سؤالى مختلف قولتلك انتى ليه مرطبتش مش مرتبط تفرق وبعدين ليه جاوبت كان ممكن تقول مش هجاوب وانا هحترم جدا قرارك

شهاب عارف أنها بتهزر وعجبه ملوعتها ليه بس فضوله أكبر من أى حاجه عاوز يعرف إجابتها عاوز يطمن قلبه قالها بأصرار واضح : انتى مرتبطة

روز مكنتش هتجاوب بس حست فى عينيه فضول للإجابه : لاء مش مرتبطه

وفى نفسها .. ايه ده مش قولتى مش هجاوب

شهاب فرح بس داره فرحته : ايه موصفاتك فى فارس الأحلام

روز أخدت نفس وطلعته بهدوء : أنا مش صعبه وانى هقولك الفارس العلى حصان ابيض والأحلام دى

لاء أنا واقعيه شويه هقولك يكون راجل بمعنى الكلمه فى كل حاجه وأكتر حاجه تفرق معايا أنه عاوز يرتبط بيا أنا لشخصى لفيروز بس فاهمني

هز رأسه بأيوه

وكملت ... واكيد يهمنى جدا أنه ميكنش ارتبط قبل كده ودى حاجه مهمه

شهاب هنا اضايق وافتكر ارتباطه من شرين وكان حاسس أن ارتباطه منها مش هيعدى على خير فحاول يبدوا طبيعى : ليه يعنى ممكن حد يكون ارتبط وحصل ظروف وانفصل وبعدين حبيتوا بعض وارتبطوا فين المشكله

روز :اممم لاء مش معاك زى ما أنا يوم ما هرتبط بشخص هيكون هو أول واحد فى حياتى لازم أكون أنا أول واحده فى حياته

شهاب بيحاول يقنعها : طيب ما يمكن اختياره الاولانى كان غلط ومجرد ارتباط صالونات اقصد مفيهوش مشاعر

ووبعدين ارتبط بيكى وحبك وده كان الاختيار الصح

روز : اممم اكيد وجهه نظرك تحترم ووجهة نظرى معتقدش هغيرها

شهاب فى نفسه أكيد لما تحبينى كل ده هيتغير ده مجرد تفكير على اد سنها

ياترى دى الحقيقه ولا بغالط نفسى

روز كملت .. روحت فين شكلك مش مقتنع بكلامى ههههه دا مش سوء ظن دى حقيقه والدليل أنك بتقنعنى بوجهه نظرك

شهاب حاول يبتسم ويكون طبيعى : فعلا المره دى عندك حق

وسكتوا شويه

شهاب : ايه رأيك فى الحب

روز :الحب عمتا ولا

شهاب :ولا

روز :معرفوش مجربتوش بس حاسه لما هحب هحب اوى لأنى الحمد لله مش محرومه منه كل الحوليا بيدونى حب كبير فا أن حد يخترق كل دول ويدخل قلبى متأكده أنه عمل المستحيل عشان احبه

شهاب فى نفسه من ساعه ما شفتك وانا بعمل مستحيلات مش ممكن كنت اعملها او افكر انى اعملها بس علشان اخترقك لسه هتودينى لفين علشان اخترق ده

وبص على قلبها فاق على صوتها

روز : انت بقى ايه رأيك فيه

شهاب بصلها وابتسم بصراحه :انااا

بصوت عالى: مفاجأه ههههه

شهاب بيبص قدامه بذهول

أميره جرت عليها بفرحة : شررررين حبيبتى وحشتيني وحضنتها بفرحه

فعلا احلى مفاجأه

حمدله على السلامه ليه مقولتيش انك جايه

شرين عينيها على شهاب : حبيت اعملهالكوا مفاجأه

أميره :احلا مفاجأه ياحبيبتى حمدله على السلامه

شهاب من بعيد أول ما شفها كان مذهول حاول يستوعب الموقف بس حس بخوف : مش وقتك خالص

فاق على صوت شرين من بعيد

شرين بأبتسامه : شهاب حبيبى

قام وقف وراح لعندها

وهيا كمان كانت بتجرى عليه

وسريعا حضنته

... وحشتني اوى اوى اخبارك ايه

شهاب اتفاجأ لما حضنته بعد الحصل بنهم بقوا متحفظين مع بعض فى كل حاجه بس والده كلمه كتير أنها مهما كان بنت عمك واعتبرها أختك

فأبتدى يتعامل معاها إلى حد ما كويس بس مش للدرجه دى

روز شيفه المنظر واضايقت جدا

وفى نفسها ... آه بنت عمه بس مش لدرجه دى ازاى يحضنها كده

شهاب اصلا مابدلهاش حضنها وايديه متحركتش بس غضب روز وضيقتها مخلتهاش تشوف غير ان شهاب بادلها حضنها

شرين بأبتسامه : أنت متعرفش كنت وحشني اد ايه

شهاب بأقتضاب : حمدله على السلامه

شرين :الله يسلمك

أميره لما شافت شرين سابت

أسر من غير حتى ما تستأذن وده ضايقه جدا وراح لعندها يشوف فى ايه

استنتج من كلامها انها بنت عمها بس منظر شرين استفزه جدا لبسه فستان ضيق جدا قط وواصل طوله لحايد فوق الركبه ولبسه جاكت قصير جدا مغطى نص دراعها وبوت دا غير الميكب الأوفر وشعرها معمول كيرلى بس بطريقه مستفزه وعامله وشم على صدرها بالجمب بالانجلش قلب وفى حرفها sh

أميره بصت وراها تنده على أسر اتلقته وراها : أسر أعرفك بشرين بنت عمى اقدملك ياشرين أسر خطيبى

شرين بصتله من فوق لتحت وفى نفسها بقى الهبله دى ترتبط بحد زى ده اوكى اوكى وسريعا مدت أيديها : هاى أسر مبروك

أسر : الله يبارك فيكى

وبدون تردد آسف مابسلمش

شرين بسخريه بصت لأديها وبصتله ليه : أنا ايديا نضيفه على فكره

ومنتظرتهوش يرد

وبصت لروز بنظرات تفحص لكل حته فيها

روز من أول ماشفتها وقلبها انقبض منها وكمان حاسه انها مضايقه جدا من شهاب

شرين لروز :وانتى كمان مابتسلميش ولا ايه النظام

روز بأبتسامة مصتنعه مدت أيديها : حمدله على السلامه يا شرين

شرين بصت لأيديها وبصتلها بأستهزاء وغيظ

شهاب بنبرة تحذير : شرررين

شرين بصتله وابتسمت ومدت أيديها : أهلا الموقف حصل سريعا بس متلاحظ

جاسر إجه

روز بهمس : كنت فين

جاسر :كنت ايييه سيبك مين دول

شرين : هاى أنت كمان مابتسلمش

جاسر بأستغراب وبيبص لروز : مين دى

شرين سبقت ووقفت جنب شهاب وشبكت فى دراعه وبأبتسامه : أنا شرين بنت عم شهاب وأميره

جاسر :أهلا وسهلا

أميره بتبص على حد ورا :مين دى ياشرين

شرين :آه سورى جيرمين تعالى ههههه نسيتك دى بقى صاحبتى الانتيم جيرمين

أعرفك ياجيرمين دى بقى ياستى أميره ههههه مش بنت عمى بس لا دى أختى وحبيبه قلبى

جيرمين :اه طبعا هاى

شرين كملت : وده شهاب ابن عمى

جيرمين :هاى شهاب

وكانت راحه عليه تحضنه بس

شهاب رجع خطوه لورا ومد ايديه : اهلا

روز اشمأزت جدا من شكلها

جيرمين لبسه جاكت قصير جدا وبطنها باينه وجيبه قصيره جدا ولبسه شراب طويل اسود وبوت دا غير الحلق الفى حواجبها ووشم فى رقبتها ومكياج صارخ وغامق وتسريحه شعرها غريبه زيها

ولما جت تحضن شهاب

روز فى نفسها ... بعد ايه ماانت لسه حاضن وبايس دلوقتي ولا مش على هوراك

أميره :شرين مامى وبابى عرفوا أنك جيتى

شرين :لسه تعالى معايا وانا بسلم عليهم اه عوزاكى فى حاجه مهمه

شرين مش عوزاها فى حاجه بس حبت تضايق أسر ومسكت أيديها وجت تمشى

أميره :استنى ثوانى

وراحت لأسر بأبتسامه : معلش شويه وجايه مش هتاخر

ومشت معاها

شرين فى نفسها أستغربت اميره يعنى ديماً بتنفذ اوامرها من غير نقاش كأنها مغيبه لاء دى بقت بتفهم وده غلط شكلى اتأخرت كتير

شهاب تلقائياً بص لروز البدلته نظره ضيق نظره غريبه هو فهمها كان عاوز يفهمها ان شرين سكت وبسخريه ان شرين ايه وسريعا بص لأسر : معلش يااسر شرين بقالها فتره مسافره ولسه جايه واميره مرتبطه بيها جدا استأذن ثوانى وراجع

جاسر :ايه المليطه دى دا المقدم شهاب هيهيص هههههه

روز بصتله بتحذير وبصت نحيه أسر الشفته من البدايه وملامحه كلها ضيق :أسر ايييه أميره وشرين يعتبروا اخوات وبقالهم فتره مشفوش بعض وو

أسر بيبص لروز عارف أنها بتبرر موقفها بسخريه بص لجاسر وبصلها : أهو قالك مليطه

روز :طيب مش هينفع وقفتنا تعالوا ندخل

أسر : ندخل فين بمنظرنا الزباله ده

روز :أسر ميصحش موقف وحصل فجأه لا هما يقصدوا واحنا المفروض نقدر ده يلا

جوه القصر شرين وأميره دخلوا ووراهم جيرمين

أميره :مامى شوفتى المفاجأة

سها :شرين حبيبتى حمدله على السلامه

نسرين لحياة بأستغراب : مين دى

حياة بنظره مش موريحه ناحيه شرين وجيرمين بصت لنسرين : معرفش

شرين :وحشتينى ياخالتو مامى بتسلم عليكى اوى آه جيرمين صاحبتى تعالى اقدملك خالتو سها

سها :أهلا وسهلا ياحبيبتى تشرفنا

جيرمين :هاى ياطنط

شرين :خالتو جيرمين جايه مصر زياره وهتقعد معايا

سها :أكيد ياحبيبتى تنورنا وبصت لحياة ونسرين

... حياة هانم نسرين هانم اقدملكوا شرين بنت أختى وبنت عم أميره كانت فى أمريكا عند أختى ولسه جايه

حياة بصتلها بعدم رضا : حمدله على السلامه

نسرين :أهلا حمدله على السلامه

شرين بصتلهم بضحكة استفزار : هاااى

شهاب نده لاميره : ميصحش تسيبى خطيبك وتمشى كده

أميره :ثوانى بس ياابيه أصل شرين

شهاب :ملها مش هطير

وبهدوء عكس الغيظ الجواه أبتسم ...

أميره الناس ضيوف عندنا عيب روحى لخطيبك واعتزريله على الحصل يلا

أميره جت تخرج قابلت أسر فى وشها

جت تتكلم سبها ودخل قعد جنب باباه

روز وجاسر ... راحوا وراه وقعدوا

شرين دخلت سلمت على عمها مهاب

ومهاب عرفها عليهم إلى حد ما فؤاد وعمرو مضايقوش من شكلها أن كل واحد حر فى نفسه حياة ونسرين جم وقعدوا

نظرات حياة لأسر

وأسر لوالدته باين فيهم الضيق وبيحاولوا يعدوا الموقف

سها :اتفضلوا العشا جاهز

ايه رايكو نخلينا هنا ... والشباب فى الجنينه

وفعلا ده الحصل فى الجنينه كان فى تربيزه لأسر واميره لوحدهم

وتربيزه لجاسر وروز وشهاب وشرين وجيرمين

أسر باين عليه الضيق واميره لحظت

أميره : أسر سورى على الحصل ياريت متضايقش

أسر مابصلهاش ومتكلمش

أميره : والله أنا لماشفت شرين من فرحتى رحتلها من غير مااخد بالى

أسر بصلها بتعجب : من غير ماتخدى بالك ازاى مش فاهم

أميره اتوترت وده بان عليها : إحم مقصدش المعنى أقصد يعنى انت عارف أنا مليش أخوات بنات وهيا الوحيده القريبه منى وبقالها كتير مسافره وكانت وحشانى اوى ولما شفتها المفاجأه خلتنى اعمل كده لكن والله مقصدش اضايقك أنا اسفه

أسر عفويه أميره فى الكلام خلاه يهدى من نحيتها ويصدقها

حاول فى نفسه يعدى الموقف يعنى هما لسه بيتعرفوا على بعض

وطالما شايف فى عينيها الاعتزار قبل ما تتكلم فدى حاجه كويسه :تمام ياأميره حصل خير

أميره :يعنى مش زعلان

أسر أبتسم : كنت زعلان وحاليا لاء

سكتوا شويه وابتدوا يكلوا

اسر : هو انتى تعرفى صديقه شرين دى

أميره :لاء خالص أول مره اشوفها بس شكلها طيوبه اوى

أسر فى نفسه طيوبه شكلك هتتعبينى ياأميره بطيبتك دى

أميره : هو انت ليه مسلمتش على شرين وقولتلها أنك مش بتسلم

أسر :أنا فعلا مش بسلم على سيدات

بصتله بأستغراب

اسر : اه فاكر أول مره شوفتك وسلمت عليكى ساعتها محبتش اكسفك مع أن ده غلط لأن السلام بالايد حرام

أميره بأستغراب اكتر : حرام

أسر :أيوه فى حديث شريف للرسول الله صلى الله عليه وسلم بيقول (لأن يطعن فى رأس رجل بخيط من حديد خير له من ان يمس امرأه لا تحل له) أظن الحديث مش محتاج شرح وواضح وده حديث اتفقوا عليه جميع الفقهاء

أميره : عليه افضل الصلاة والسلام

بصراحه أول مره اعرف بس ميصحش برضه انى اكسف حد ومسلمش عليه

أسر بعقلانيه : مش هقولك انى لما عرفت الحديث وأن حرام السلام بالايد نفذت على طول

لاء الموضوع إجه معايا تدريجيا يعنى فى البدايه مبقتش ابدا أنا بالسلام وبعدين ابتديت مثلا احط ايدى فى جيبى لو حسيت أن القصادى هيبدا بالسلام ومره فى مره اتعودت مهو فى الآخر لازم التزم بدينى على اد مااقدر ومتكسفش من العبد

أميره اتبسطت من أسلوبه وطريقته فى الرد :فعلا عندك حق

وفتحوا مواضيع بسيطه يتعرفوا بيها على بعض أكتر

عند تربيزه شهاب وجاسر قاعدين جنب بعض وروز قعده جنب جاسر وشرين قعده جنب شهاب وجنبها جيرمين

شهاب بيحاول يسرق نظرات من روز اليعتبر مبصتلوش خالص

شرين متابعه ومتغاظه هيا لما شافت روز فى الفيديو والصور مكنوش موضحين أنها حلوه كده وشيك بالشكل ده وده جننها

شرين لشهاب :مامى بتسلم عليك كتير اوى بس زعلانه منك علشان مش بتتصل عليها ههههه بس متقلقش أنا قولتلها أنك بتكلمنى ديما وبتسال عليها

شهاب مضايق منها هو ولا مره اتصل عليها وبالنسبه لخاتو بيبعت السلام مع والدته من غير مايبصلها : الله يسلمها

جيرمين :شوفت ياشهاب الوشم الشرين عملاه هههه أول حرف من اسمها

وطبعا دى كانت تلميحات متفقين عليها يقولوها جنب روز لأن أول حرف من شرين وشهاب زى بعض

شهاب بصلها ومتكلمش ولا حتى بص على الوشم

شرين بضحك لجرمين : مفهوش حاجه الوشم على فكره دا مجرد أول حرف من أسمى انتى عارفه أنا بحب اسمى اوى

شرين بتبين أنها بدارى تلميحات جيرمين

روز فضولها خلاها تبص على الوشم واتخنقت شهاب شفها وهيا بتبص عليه وشاف تعبير وشها واضايق لأن تلميحات جيرمين وصلتله

شرين لروز : متعرفتش عليكى انتى مين بقى

روز أسلوب شرين معجبهاش بس بكل ثقه : أنا فيروز عبد القادر البحيرى

وبأبتسامه بسيطه .. أكيد عرفتى دلوقتي أنا مين

شرين اتغاظت من ثقتها فى نفسها طبعا هيا عارفه هيا مين دا غير عيله البحيرى مسمعه جدا فى كل مكان فى مصر وخارجها : آه أعتقد سمعت عن عيله البحيرى قبل كده

روز بأبتسامه وثقه : أكيد تعرفى عيله البحيرى كويس اوى الاسم ماركه فى مصر والخارج خصوصا فى إيطاليا ألمانيا كندا ولااا مسفرتيش الأماكن دى

شرين بغيظ وتسرع : طبعا سافرت كل الدول دى واعرف عيله البحيرى كويس جدا

روز بصتلها بأبتسامه انتصار وبتاكل

شهاب متابع كل ما يجى يرد على شرين روز تسبقه ويعجب جدا بردها وقد ايه عندها ثبات انفعالى وسرعه بديهه رهيب

وفى نفسه ديما بتفوقى توقعاتي يااحلا ما توقعت

حلقتنا خلصت😍

والسلام عليكم ورحمه الله وبركاته 😍❤❤ عرض أقل