رواية الجلاد لقلبي رغم حبي الفصل الخامس 5 - بقلم دينا النجاشي

كان يتابع ردود أفعالها وكلامها بعناية، ليقاطعه صوت والدها.... ها ياولاد اتفقتوا علي اي

ادم بحترام... هستأذنك يا عمي بكره هاخد سماء مشوار 

سماء بصدمه.... نعم!!!؟ 

غمز لها آدم دون أن يلاحظ والدها، وأكمل حديثه بجدية... اي رايك يا عمي. 

والدها بابتسامه... اتفقوا مع بعض وشوفو هتعملوا اي. انا من نحيتي موافق

نظرت سماء إلى والدها بصدمة وكانت على وشك التحدث، لكن حديثها قطعه وقوف آدم وباحترام... هستأذن انا يا عم محمد وان شاء الله هيكون في زياره تانيه

والد سماء بتفهم.. ان شاء الله يا حبيبي

غادر آدم وذهب محمد معه للخارج ، اما حسناء وقفت مع سماء لتودعها لتنظر لها سماء بغيظ... هو دا اللي مش بعبع 

حسناء بضحكه... ماله بس دا هادي وزي القمر

سماء بسخريه.. القرد في عين امه بقا. 

حسناء بزهق قرصت أذنها...بت انتي لسانك ده مش هيتلم ابدا

سماء بوجع.. اه ياماما خلاص هو قمر وعسل دا حتي هيبه كدا اللهم بارك

حسناء بغمزه.. و قعه. وقعه مفيش كلام

سماء بضحكه.. حبيبي اللي بيفهمها من وهي طايره

ضحكت حسناء بخفة وودعتها  ثم اتجهت إلى السيارة حيث كان آدم ينتظرها.

صعدت إلى جواره، وما إن تحرّكت السيارة حتى نظرت إليه بلهفة اي رايك:

ادم بهدوء.. حلوه

 رامقته حسناء بغيظ...

_ ما انا عارفه انها حلوه وهتعجبك انا اقصد اتفقتوا علي اي 

ردّ ببرود، دون أن يلتفت: والله انتي اللي سألتي عن رأي

زفرت بغيظ وهي ترد ساخره .. معلش انا غلطانه اتفقتوا

علي اي يا ادم بيه

ادم بابتسامه... طلبت من عمي اخدها بكره مشوار وهو وافق

اتسعت عيناها بفرح .. بجد لا مش مصدقه 

ادم بابتسامه... كله يهون لأجلك يا قمر

غمزت بخفه واردفت بمكر: لأجلي انا بردو. بس علي العموم كويس طلعت بتفهم . 

رفع آدم حاجبه واردف باستغراب...انتي واخده عني فكرة اي بظبط. 

ضحكت والدته بمحبة وهي تحتضن ذراعه، فابتسم آدم على فرحتها، ثم أعاد تركيزه على الطريق أمامه.

ــــــــــــــــــــــــــــــــــــــــــــــــــــــــــ♡♡♡♡

وفي اليوم التالي، وتحديداً في سرايا عائلة الشيمي، كان عمران جالساً في الحديقة وامامه الابتوب، يعمل عليه، لكن صوت سمر قاطعه.... اذيك يا ابيه

رفع عمران عينيه إليها بهدوء..كويس يا سمر 

سمر بتوتر.. احم ابيه انا مش عوزاك تزعل من الكلام اللي ماما قالته وانا اسفه بالنيابة عنها

عمران بتنهيده...سمر انتي اختي زيك زي عائشه و لما تعتذري تعتذري عن غلطك انتي. مش عن غلط غيرك حتي لو والدتك لاني مش هتقبل ان اختي تشيل خطأ مش بتاعها وتعتذر عنه. 

سمر بدموع حاولت اخفائها... ابيه انا بتمني ان كل اللي بيحصل ده ميأثرش في علاقتنا 

عمران بحزن سحبها لتجلس امامه وبحنيه... اتكلمي يا سمر قولي في اي وليه بتقولي كده. 

أنزلت سمر رأسها إلى الأرض، والحزن يعتصر قلبها، قبل أن يتبعها البكاء:

– "أبيه... إحنا مبقاش لينا حد."

تلعثمت كلماتها وسط دموعها، ثم تابعت بصوت مكسور:

– "اللي بابا عمله كسرنا... أنا وسارة."

– "وتفكير ماما، وإصرارها إنك إنت السبب، خلاني خايفة طول الوقت... خايفة نخسركم كمان."

امتلأت عيناها بالدموع، ورفعت رأسها أخيرًا لتلتقي بنظرات عمران، الذي كان الحزن واضحًا في عينيه، وكأن كل حرف خرج منها كان سكيـ*نًا في قلبه.

همست بوجع، وصوتها يرتجف:

– "أبيه... إحنا مش وحشين، وعمرنا ما اتمنينا نبعد عنكم... بعدنا كان غصب، رغم إننا عايشين في بيت واحد."

– "واللي ماما بتعمله... بيوجعنا أكتر."

عمران بجديّة وحنان:

اسمعيني يا سمر… اللي بينا وبين عمّي ومراته مالوش دعوة بيكي إنتي وسارة، لأنكم أخواتي، ومتنسيش إني أنا اللي مربّيك، ودايمًا كنت المسؤول عنك.

ومش هاجي في الآخر وأبعد علشان كلام مالوش لازمة، اتقال في وقت كانت فيه والدتك زعلانة من اللي حصل.

صدقيني يا حبيبتي… اللي بينا أكبر بكتير من المشاكل والكلام الفارغ ده.

ولو فعلًا مش عايزاني أزعل منك، يبقى تطلّعي كل الأفكار دي من دماغك، وركّزي في دراستك.

ودايمًا افتكري إني في ضهرك وسندك في أي وقت تحتاجيني فيه.

وحكاية إن "مبقاش ليكم حد" دي، تشيليها من دماغك خالص…

لأني موجود، وعمّك موجود، وأهلك زي ما هما، محدش اختفى ولا بعد.

ابتسمت سمر بارتياح، وقد لامست كلمات عمران قلبها الموجوع، فهزّت رأسها بمحبة، ثم استأذنت في المغادرة.

أومأ لها بلطف، فتوجهت إلى الخارج، وتركته يغوص في صمته.

وبعد رحيلها، تنهد بحزن،

وقد أثقل صدره ألم تلك الصغيرة التي تحمل همًا أكبر من عمرها.

كان يعرف أن ما بداخلها لم يُقل كله بعد، وأن الخوف لا يزال يسكن نظراتها...

لكنه قرر هذه المرة ألا يكتفي بالكلام.

بل أن يحتويها أكثر، ويكسر كل حواجز الخوف من رأسها، واحدة تلو الأخرى.

ـــــــــــــــــــــــــــــــــــــــــــــــــــــــــــ

عند سمر...

دخلت جناحهم بخطوات هادئة، والابتسامة ما زالت معلّقة على شفتيها، تأثّراً بكلمات عمران التي لامست قلبها.

لكن فجأة، شهقت بفزع عندما سحبها أحدهم بعنف من ذراعها!

التفتت بصدمة لترى من الفاعل...

كانت والدتها.

تنفّست سمر بارتباك، محاولة التماسك، لكن قلبها كان يطرق بقوة بين أضلاعها.

وقبل أن تنطق بأي كلمة، دفعتها والدتها بقسوة، لتسقط على الأريكة.

صرخت بغضب، وعيناها تشتعلان:

– "انتي إيه اللي وداكي عند الناس دول؟!"

– "مش أنا قلت رجلك ما تعتبش هناك؟!"

ارتجف جسد سمر من هول انفعال والدتها، وعيناها راحتا تتلفتان في كل اتجاه، وكأنها تبحث عن مأوى من ذلك الغضب.

كانت الكلمات تختنق في حلقها، تحاول أن تختار ما تقول، أن تبرر جلستها مع عمران، فهي  خرجت فقط حين تأكدت أن والدتها لم تكن في المنزل...

لكن الصمت خانها.

صرخت والدتها، أكثر غضبًا من صمتها:

– "ردّي عليا يا سمر!!"

– "إنتي بتتجاهليني؟!"

وفي تلك اللحظة... دخلت سارة.

تقدّمت بخطى هادئة، ووقفت أمام والدتها ببرود غريب، تنظر إليها بثبات.

واردفت بحدة خافتة:

– "خير يا ماما؟ صوتك مسمع في كل البيت ليه؟!"

نظرت إليها والدتها بعينين تشتعلان غضبًا، وردّت بسخرية لاذعة:

– "أُختك الشملولة… داخلة من برّه لقيتها قاعدة بكل برود مع ابن عادل، وكأنّه مش السبب في مصيبة أبوك!"

سارة، بجمود حاد ونبرة تهديد خفي:

– "السبب في إيه بالضبط؟ مش فاهمة؟"

– "يعني هو عمران اللي ضرب عيسى على إيده وقالّه يبيع القرف ده؟ هو اللي خلاه يتاجر في سُـ*مّ يدمر بيه شباب الناس… ويدمّرنا معاه بجشعه؟"

صمت مفاجئ...

ثم صدمة واضحة ارتسمت على وجه الأم، وعيناها تلمعان بالذهول:

– "إنتي بتقولي إيه يا مخبولة؟!"

– "يعني صدّقتي إن أبوكي كان كده؟! صدّقتي إن أبوكي...!"

تراجعت خطوة للوراء، تلهث من وقع كلمات سارة، ثم صرخت وكأنها تطرد شيئًا داخلها:

– "خليتوا ابن هانم يلعب في دماغكم؟!"

سارة بغضب متفجّر، وعيونها تلمع من القهر:

– "أنا مش صغيرة عشان حد يلعب بعقلي!"

– "أنا كبيرة كفاية عشان أفهم كل اللي بيحصل حواليّا."

– "وبلاش شغل الصعبنيات ده، فوقي من دور الضحية اللي عايشاه، لأن محدش هيخسر في الآخر غيرك إنتي!"

تملّك الغضب من والدتها، واشتعلت عيناها بالنـا*ر...

فهي تعلم تمامًا أنها لا تستطيع مجاراة سارة في الحُجّة، ولا كبح اندفاعها، لكنها تعرف كيف تُهاجم، وكيف تُوجّه ضربة لا تُنسى.

ورغم كل إصرارها على اتهام عادل وابنه، كانت الحقيقة أشد قسوة من أن تُقال.

هي لا تكرههم فقط لما فعلوه، بل لما يُمثّلونه… ماضٍ موجع، وندبة لم تندمل، وخذلان لا يغيب عن ذهنها.

نظرت لسارة بغضب فهي تعلم ان ابنتها لا تُجيد الهزيمة، لأنها الوحيدة التي كانت تقف في وجه طغيان عيسى حين صمت الجميع، الوحيدة التي لم تخشَ غضبه ولا سلطته.

لكنها أيضًا لم تنسَ...

ولم تسامح.

فتقدّمت بخطوة، ونطقت بكراهيّة مدفونة منذ سنين، نبرتها كأنها تصفع بها سارة بقوة:

– "خليكي كده دايمًا... دافعي عنهم، عن عيلة الكدب والنفاق!"

– "دافعي عشان حبيب القلب… اللي عمره ما عبّرك، ولا حتى بصّلك بصة!"

ضحكت سارة بسخرية باهتة، تحمل وجعًا مكتومًا… كانت والدتها تضغط على جُرحها القديم بلا رحمة، لكنها لم تُظهر ضعفها.

نظرت إليها ببرود يغلفه الحزن، وبقلب يفيض قهرًا:

– "عارفة يا ماما إيه الفرق بيني وبينك؟"

– "أنا بدافع عن الحق… عن اللي بشوفه بعيني وبقناعتي الكاملة."

– "لكن إنتي… إنتي مستعدة تخسري كل حاجة، حتى إحنا، عشان توصلي لحاجة جواكي، للانتقام اللي سيطر عليكي سنين."

سكتت لحظة، وكأنها تبتلع مرارة الكلمات، ثم تابعت بنبرة أهدأ لكنها أكثر وجعًا:

– "وجواكي… جواكي عارفة كويس إن عمران وعمي مالهمش ذنب في اللي كان بيعمله عيسى."

– "عارفة... لكن رافضة تعترفي."

نظرت إليها بنظرة مباشرة، تحمل نضجًا لا يُشترى:

– "نصيحة مني، صغيرة وبسيطة..."

– "لما توصلي لانتقامك اللي أنا لحد دلوقتي مش فاهمة سببه الحقيقي… ابقي بصّي وراكي."

– "وشوفي خسرِتي إيه."

– "لأن اللي هتخسريه... عمرك ما هتعوّضيه، ولا هيرجع زي الأول أبداً."

لم تفهم والدتها تمامًا ما الذي قصدته سارة بـ "الخسارة التي لا يمكن تعويضها"... لكنها كانت واثقة من شيء واحد: سارة لا تنطق بكلمة إلا وهي تعنيها تمامًا.

وقبل أن تتمكن من طرح سؤال واحد، استدارت سارة وغادرت الغرفة.

لكنها توقفت عند الباب، ثم التفتت ببطء، ونظرت إلى والدتها بنظرة حاسمة، خالية من التردد:

– "أنا هتكلم مع عمي وعمران، وهرجع الشركة من بكرة."

– "وموضوع إنك تبعدينا عنهم... تنسيه تمامًا."

– "كفاية العيشة المقرفة، وكفاية الحقد اللي بتغرسوه في قلوبنا من صغرنا... إنتي وجوزك."

انصدمت والدتها، اتسعت عيناها بدهشة لم تعهدها في نفسها، وكأن الكلمات ضربت شيئًا عميقًا داخلها... لكنها لم تستطع الرد.

وسارة؟ لم تنتظر.

استدارت بهدوء، وتركتها واقفة في صمت، وتوجهت مباشرة نحو مكتب عمها... لتبدأ فصلًا جديدًا، مواجهة جديدة، وربما... بداية الحقيقة.

ـــــــــــــــــــــــــــــــــــــــــــــــــــــــــــــــ♡♡

في مقر شركة آدم كان يعمل على بعض الملفات أمامه عندما تلقى اتصالا من رقم مجهول، فأجاب عليه وهو منهمك في قراءة الملف، فـ جاء الصوت من الجانب الآخر..اهلا يا ادم بيه

ادم بجمود... مين

الشخص... مش مهم انا مين بس حبيت اباركلك علي الخطوبة. 

ادم بتوجس ضغط علي زر أحمر امامه.... اممم الظاهر ان الأخبار بتوصلك بسرعة 

الشخص بضحكة.. اسرع مما تتخيل بس احييك علي اختيارك الصراحه مهره عربيه اصيله

لمعت عينا آدم ببريق شرس، وابتسامة باهتة شقّت شفتيه حين سمع كلمات المتصل.

لكن صوته حين رد... كان كالصقيع، بارداً حدّ الرعب:

– "من الغباء إن الواحد يلعب في عدّاد عمره بإيده، ويفتكر إن الكورة دايمًا في ملعبه."

صمت لحظة، ثم انحنى قليلًا للأمام، وكأن المتصل أمامه فعلاً، وقال بنبرة أشد قسوة، مملوءة بالاشمئزاز:

– "بس عارف إيه أكتر حاجة خلتني أشمئز منك؟"

– "إنك ما بتحترمش ذكاء الشخص اللي قدّامك."

– "ودي غلطة هتندم عليها كتير..."

ثم همس بثبات شيطا*ني، كأن كلماته قَسَم لا رجعة فيه:

– "أنا بوعدك...

هجيبك راكع.

وهقطع لسانك ده... بإيدي."

المجهول، وقد فقد هدوءه، صرخ بنبرة حادة، مملوءة بالغضب:

– "اللي لعب في عدّاد عمره هو إنت يا ابن شعيب... بس ملحوقة!"

– "ونصيحة مني… اكسب ودّي، لأن اللي جاي مش خير لا عليك، ولا على أهلك!"

ضحك آدم بسخرية، ضحكة هادئة لكنها قا*تلة، زادت من استفزاز الطرف الآخر، حتى بدأ يتمتم بكلمات غاضبة غير مفهومة.

لكن آدم... فجأة غيّر نبرته.

تحوّلت ضحكته إلى جمود مرعب، ونبرة صوته أصبحت أكثر برودة من الجليد.

أمسك بسلا*حه الموضوع على المكتب، وراح يحركه بين سبّابته وإبهامه ببطء... بعينين لا ترمش.

ثم همس بصوت منخفض، إجرا*مي، كأنه يلفظ حُكمًا لا مهرب منه:

– "الظاهر... إنّي هتمتّع جدًا الأيام الجاية."

– "فاسمعني كويس…"

– "عاوزك تعدّ على إيدك… لعشرين."

– "لأني عامل لك مفاجأة... وهتعجبك."

اردف الآخر بتوتر واضح في نبرته، وكأن الكلمات تخونه:

– "تقصد إيه؟"

أسند آدم ظهره إلى الكرسي، وابتسامة ساخرة تتسلل إلى وجهه:

– "أنا ما بحبّش خصمي يبقى جبان، يا عاصم."

– "عيب أهددك... وتنخ من أول كلمة."

ارتبك المتصل، وتجمّدت أنفاسه، وقد صُدم تمامًا بمعرفة آدم لهويته…

لكن قبل أن ينبس ببنت شفة، أنهى آدم المكالمة في وجهه، بضغطة واحدة، قاطعة كحد السـ/يف.

اشتعَل الغضب في عينيه، وقذف الهاتف فوق المكتب بعنف، ثم صرخ غاضبًا بصوتٍ أرعب من يسمعه:

– "ورحمة أبويا... لو ما كان قدّامي كمان ساعة، لأكون مخلّص عليكم كلكم!"

جاء صوت صهيب الذي كان يسمع كل شئ، وبنبرة حاول فيها أن يكون هادئًا رغم التوتر:

– "اهدى يا آدم... إحنا بالفعل في الطريق للمكان اللي تحدّد."

لكن آدم لم يرد.

أنهى المكالمة بصمت، وعيناه تلمعان بشرر الغضب.

وفجأة، توقف في مكانه، كأن فكرة خاطفة عبرت ذهنه... ثم اندفع خارج المكتب بخطوات سريعة، وفي طريقه أجرى عدة مكالمات متتالية، صوته حاد، قصير، لا يقبل النقاش.

ــــــــــــــــــــــــــــــــــــــــــــــــــــ

وفي منزل سماء أنهت مكالمتها مع مودة بعد أن أبلغتها بكل ما حدث بالأمس. فذهبت لتتوضأ وتصلي، ثم بدأت صلاتها. رن هاتفها وتكرر الرنين مرة أخرى ثم للمرة الثالثة. وبعد أن انتهت أمسكت بهاتفها وجاء البرنامج باسم صاحب الرقم. لتقم بالرد على الرنة الرابعة  وهي خائفه من تكرار اتصاله وعقلها يرسم احداث مخيفه، فأجابت بصوت متوتر. .... الو

صرخ آدم بغضب عليها لعدم الرد على الهاتف، مما جعل قلبها يرتجف من صوته العالي. 

_انتي مش بتردي ليه من الرنه الأوله

سماء بهدوء... خير في اي وليه كل الاتصالات دي

ادم بغضب... انتي فين دلوقتي. 

سماء باستغراب... هكون فين يعني موجوده في البيت

ادم بجمود... تمام انا في طريقي ليكي اجهزي عشان هخدك معايا

سماء بصدمه.. جاي فين ياحج انت. مفيش حد في البيت 

ادم بلامبالاه... اخلصي انا خلاص وصلت عند بيتك. 

كادت سماء ان ترفض بنفعال لكنه اغلق في وجهها. 

فاتصلت بوالدها ليأتيها أن الهاتف خارج التغطية، فزفرت بغضب، فاتخذت قرارها واتصلت بحسناء ليصل صوتها... حبيبت قلبي عامله اي. 

سماء بنفعال.. ماما ابنك المجنون بيكلمني ومتعصب وبيقولي اجهز لانه جاي البيت يخدني ولما قلتله محدش هنا مهتمش وقالي انه قريب. 

حسناء بتوتر فهي تعلم أن هذه الأشياء ليست من طبيعة آدم وتدرك أن هناك خطأ ما...سماء اسمعي كلام ادم وقومي اجهزي يلاه

سماء باستغراب.. انتي بتقولي اي ياماما

حسناء بجديه.. اسمعي اللي بقولك عليه وقومي يلاه اجهزي ومتخرجيش من البيت غير لما يقولك اخرجي يلاه. 

سماء بتوتر.. ماما هو في اي هو بابا حصله حاجه. 

حسناء بهدوء.... لا يا حببتي بابا كويس وادم هيجيبك تقعدي معايا هنا قومي بقا وبلاش عند. 

سماء باستغراب... حاضر هقوم اجهز. 

حسناء بحب.. ماشي يا حببتي انا هقفل عشان لو ادم اتصل متبقيش مشغوله وشويه وهتصل عليكي. 

أغلقت حسناء، وتركت سماء، متفاجئة من الوضع، لتذهب بعدها وتستعد.... 

عند ادم امر بعض رجاله بتباعه لمنزل سماء وبعدها جاءه اتصال من والدته فقام برد عليها وهو يعلم ان سماء قامت بالاتصال بها.... السلام عليكم 

حسناء بتوتر.. وعليكم السلام خير يا آدم في اي؟ 

ادم بجديه.. مفيش يا حببتي لما اجيلك هفهمك هقفل معاكي دلوقتي وهكلمك بعدين. 

والدته بتفهم... ماشي يا حبيبي خد بالك من نفسك. 

أغلق ادم وبعد دقائق وصل امام منزل سماء واعطي بعض التعليمات لرجاله بحراسة المنزل بعنايه... ثم اتصل ليخبرها أنه بالخارج......... فخرجت إليه وهي تفكر في سبب قدومه، إلا أنها فوجئت بوجود الحراس في كل مكان. نظرت إليه بتساؤل لكنه لم يستجب لنظراتها.

فغضبت من الأمر ووقفت مكانها بعند. لينظر لها بغضب وهو يحثها على الاقتراب. زفرت بغضب واقتربت من مكانه، فأمرها بالصعود إلى سيارته لتردف بغيظ... اظن مطلوب من حضرتك تفهمني في اي. 

لم يهتم لسؤالها وسحبها إلى سيارته وأغلق الباب بغضب لعدم تلبية كلامه. لترتعد خوفا مما فعله ، فصعد هو أيضًا سيارته وغادر دون أن ينبس ببنت شفة.

سماء بجديه... ممكن افهم في اي؟ ولا هتفضل ساكت كتير. 

ادم بجمود.. مش عاوز اسمع صوتك لغايت ما نوصل للڤلا. 

انصدمت سماء من نبرته الجافة، وابتلعت ألمها للحظة، ثم ردّت بجديّة، بصوت ثابت رغم ارتعاش قلبها:

– "إنت ما لكش الحق تكلّمني بالأسلوب ده...

وياريت توقف، لأني مش ناوية أروح معاك لأي مكان."

لكن صوته انفجر كالرعد، مقاطعًا كلماتها:

– "قلتلك… اخرصي!"

شهقت سماء، وقد ارتجفت من شدّة غضبه، وارتفع صدرها من الخوف والذهول.

صوته اخترق جدار الأمان الذي كانت تحاول أن تبنيه داخليًا.

لكنه لم يُبْدِ أيّ اهتمام…

تابع طريقه ببرود، واتصل بصهيب، يسأله عمّا وصل إليه، وكأن شيئًا لم يكن.

بينما كانت سماء تنظر عبر نافذة السيارة إلى الطريق…

وعيناها لا تتوقفان عن الانهمار.

دموعها كانت حارقة… ليست فقط من الخوف، بل من الخيبة.

خيبة في آدم.

فهي لم تتخيله يومًا بهذه الغطرسة…

بهذا السلوك القاسي.

كأن شيئًا ما تحطّم داخلها… بصمت.

يتبع

– لما اللي بتحبه يكون أكتر شخص بيخوفك…

تفتكروا ده اسمه حب؟ ولا بداية لنهاية موجعة؟

– مستنية آراءكم في الكومنتات–