رواية يأس القلوب الفصل الثالث 3 - بقلم رودة
part 3
اليندك ببناتي ويطيح دمعة منهن اخلي يندم علئ اللحظة الفكر بيهة ياذيهن وباعي اسمعيني زين باجر انتِ والبنات تعتذرن بالعمادة وكدام كل الطلاب لا ومحمد اخذج سحل تعتذرين سامعة لو لا كالت وهية تبجي اي خالو والله اعتذر هاي اخر مرة نترتهة وكلت يلا
وخري من يمي طلعت وسليمة مشت وراي كالت امسحهة بوجهي خوية هاي الادبسز شهرتني لبست الحذاء اكرمكم الله وكلت واني اباوعلهة بتك عين كثرت دكاتج سليمة وترا كل شي واله حد ورصيدج بدة يخلص ترا وداعتج كل شي اعرف ماينضم علية شي طلعت
وسديت الباب وراي وتمشيت للبيت لكيت الاسواق مفتح دخلت اخذت حلويات للبنات واخذتلي باكيت جكاير ورجعت للبيت دخلت وسديت باب الكراج وراي دخلت للبيت صحت مريم وكتلهة هاي الحلويات انتِ واخواتج وهاي السمسمية لمحمد والفستق لحسين
وتعرفين بعد ضحكت وكالت تاج راسي والله بوكتهن اجني الحلويات ضحكت وشبكتهة واباوع ريحانة وسارة يباوعن علينة بغيرة ضحكت وفتحت ايدي واجني ركض وشبكتهن كلهن وكلت واني اشبكهن حيل يايابة شكد غاليات البنات وابوس بيهن وهنة يضحكن
اباوع علئ ريحانتي شون تعدلت نفسيتهة شوية وتضحك ومتونسة مجرد ماشفتهة فرحانة وطلعت من جو الحزن فرحت وكلت الحمدالله وباجر تفرح اكثر من ينكشف كلشي كعدنا نباوع علئ الطوبة اني والولد والبنات يسولفن واباوع شلون متجمعين كلنة ناقصنة
بس هية خلصت اللعبة كمت للغرفة جاي انام تمددت علئ الجرباية وفتحت المبايل شغلت اغنية جذاب دولبني الوكت بمحبتك ... جذاب روحي تمرمرت من عشرتك ..ز جذاب وتريد ارد انوب الك لا ماارد وانسئ المضئ وتريد ارد انوب الك لا ماارد كلشي انكضة ولو صرت بس انت الدوة لا ماارد وانسة المضة ....جذاب ..
باسل
كاعد اكلب بالفيس وادخن عفت المبايل وتذكرت ريحانة موجني طوخت وياهة وجريتهة سحبت نفس من النركيلة وكلت لا لا تستاهل ومنو هية علمود ترفع صوتهة علي تالي وكت القزمة تصيح علي هسة يامحمد اني شكو افكر ؟! وشاغل نفسي والله يالله طبها مرض
سحبت نفس من النركيلة وكلت صحيح قزمة بس بالله موبنية ضيم استغفرت الله وكلت كافي باسل عيب تفكر هيج بتالي الليل تمددت واجتني رسالة سحبت المبايل اباوع اسراء اللزكة دازتلي شلونك حبيبي شمرت المبايل وكلت اهو هاي والله بطرانة الله ياخذج وياخذ
حبيبج استغفرالله شني ياخذني كمت اعلس من ورة هالنركيلة حسيت واحد واكف فوك راسي كعدت اباوع ابوي وجهة احمر وعصبي بحركة وحدة شال النركيلة وركعهة بالكاع وكال بعصبية اني شكم مرة كايل الك لا تشرب هالسم ؟! كتلة شنو بوية تتحكم بية مثلا ؟!
ترة اني مو باسل الصغير اني كبرت كال بعصبية حتئ لو كبرت اكسر راسك شكم مرة كايل الك بطل تشرب هالسوالف موزين ابني موزين ماتفهم انتَ كتلة بعصبية لا افهم والليعجبني اسويه محد يدخل بية كال بعصبية وهوة يهدد اكسر راسك اذا رفعت صوتك مرة
ثانية علية سكتت اخذت المحفظة والمبايل وباكيت الجكاير وطلعت وهوة يصيح علية وكال باسل اذا تطلع هسة بعد لاترجع للبيت كتلة هوة طالع وبعد ماارجع اسمع امي تهدا بي طلعت شغلت السيارة وطلعت وكفت بالسيارة بالاعظمية ونزلت سحبت
جكارةوضليت ادخن واسحب جكارة ورة جكارة هدات شوي تنهدت وكلت ابوك هذا ابوك شلون ترفع صوتك عليه ضربت السيارة وكلت ابوك موصاحبك استغفرالله ياربي ركبت بالسيارة وطفيتهة وتمددت وغمضت عيوني .
ريحانة
كاعدين نتريك علمود بابا يوصلني للدوام كملت اخذت الجنطة وطلعت ركبت وبابا بدا يسوق وكال توكلنا علئ الله وسارة كاعدة ورة وصلنة للجامعة نزلت اول مدخلت للمحاظرة الاولئ اجة الاستاذ وكال بابا ريحانة تفضلي لغرفة العميد يردونج استغربت شنو يردون
كمت ورحت لغرفة العمادة دكيت الباب ودخلت انصدمت واني اشوف البنات كدامي واكفات ووياهن سحر بت عمتي درت وجهي وكلت نعم استاذ وسولف الي الموقف وانو البنات متفقات وية سحر وهالسوالف وقدم الي اعتذار ابتسمت بقهر وكتلة استاذ موكتلك اني
ممسوية شي هسة اتاكدت ؟! هز راسة باسف وفتح ملف تحقيق وية البنات وفصل لمدة 10 ايام كتلة استاذ تسمحلي اطلع كال تفضلي طلعت ودمعتي طاحت مسحتهة شوف اقرب الناس الك من لحمك ودمك همة الياذونك ومنو سحر سمعت سحر تصيح وراي تريدني
اوكف ماوكفت اجة عالبالي بابا ابتسمت اكيد هوة خلاها تعترف وتعتذر اخ يابابا كل مرة هوة البطل مالتي غوركت عيوني وكلت الله يفتحها بوجهك ويحفظك الي كعدت بنهاية الحديقة وطلعت دفتري من الجنطة وكتبت البارحة جنت اكتب وابجي واشكي لدفتري من
الناس الياذوني اليوم اني اكتب وبين الفرح والحزن ممكن يجي يوم واوكف بوجه الي ياذوني وماابقئ انسانة خجولة ؟! يجي يوم وكل هذا التعب يروح ؟! زين يجي يوم ودموعي تبطل تنزل علئ اتفه الشغلات ؟!يجي يوم وبابا وماما يرجعون وترجع حياتنا طبيعية ؟ّ!
كل شي يجي بس ماما متجي ...فزيت علئ وحدة وراي تكول شتسوي الحلوة درت وجهي وابتسمت شفتها وردة ضميت الدفتر وكمت سلمت عليهة كعدت يمي وكالت خاف قاطعتج اكوم ؟! كتلهة بسرعة لا لا كلشي معندي شسالفة ابتسمت وكالت شلونج ؟! كتلهة تمام
انتِ شلونج كالت تمام ضلينة نسولف وشوي شوي تعرفنا اكثر وتبادلنا الارقام جانت هاي اول مرة اصادق بنية دومي كنت انسانة وحيدة ارتاحيت لوردة كلش وهية يعني تنحب بسرعة كمنا تمشينا شوي وكالت تعالي عازمتج علئ قهوة حلوة مثلج ابتسمت وكتلهة
قهوة ومنج لا لا متتفوت ضحكت وضحكت رحنا للكافتريا وطلبنا قهوة وكيك وكعدنا ناكل ونسولف طلعتني من الجو الي اني بيه هية مو ملاك لا لا هية انسانة علئ هيئة نسمة باردة بخمس دقائق تغير المزاج صحيح هذا ثاني لقاء بس وردة احسها تحس بية وماتجرئت
وسألت شنو بية اكتفت بالسكوت وتكفلت بالموضوع وطلعتني من المود الحزين ومن هذا اليوم وردة صارت من اقرب الاشخاص الي .
باسل
الصبح رجعت للبيت دخلت للبيت اريد ابدل علمود اروح للدوام فتحت باب المطبخ شفت ابوي كاعد يتريك وامي تصب جاي كلت صباح الخير امي ردت بابتسامة هلا يمة صباح النور وابوي ماحجة شرب جاي صعدت ابدل دخلت للغرفة سبحت بساع وطلعت
لبست البدل العسكرية والساعة والاسلاح ورشيت عطر ومشطت شعري وطلعت الجنطة مال دوام خليت بيهة كم تراكسود واخذتها ونزلت شافتني امي كالت اكعد اتريك يمة كتلهة الف عافية طالع تاخرت طلعت ودرت وجهي وكلت يمة لايضل بالج عشر ايام وانزل
شغلت السيارة وصلت للمركز ومن المركز طلعنا للموصل التحاق .
طالب
ادري انتَ شلون تكلة بعد لا تجي للبيت جاوبني عزيز يدري بية مااقبل يشرب هالسم شكو يعاند سحبت نفس من الجكارة وكتلة وهسة شلونذ خزرني وكال عوف هالسم لا تموتني ضحكت وكتلة عمي هاي طفينة الجكارة كتلة هوة وين كال التحق للموصل وها
لااخابرهة ولا اسئل عليه يعلي علية صوتة بسيطة باسل طبطت علئ ضهرة وكلت خوية حقك بهاي بس يبقة هوة وحيدك وعزيز كلبك هز راسة وكال هوة شنو االمصبرني غير هذني الكلمات كمت صبيت كوبين جاي الي واله وخليتهن عالمكتب وشرب جاي وكال
اي شلونك انتَ شربت جاي وكتلة عايش الحمدالله باوعلي بتك عين وكال وهوة يهز بايدة اشو جنك راجع شباب يولي تشرب جكاير وتصفن والاغاني بس لا حنيت وغمزلي باوعتلة بتك عين وكلت غلطان ويني وين الشباب كلاني الشيب طك اصبع وكال بين علينة
الكبر طكيت ضحكت وكتلة اشرب جايك برد شرب وكال اي تشرد تشرد غير الموضوع بساع بس وين تروح مني ابتسمت اله ااخ يا عزيز شكد عزيز علية .
مريم
نضفت البيت وكملت كلهة طلعت ومحمد كالي اجيب صمون واجي راح محمد واندك الباب استغربت معقولة اجة بهل سرعة ركضت اباوع من الكامرة وانصدمت وضربت علئ خدي عزا العزا هذا شجابة مصطفئ ابن عمة ناهدة دك مبايلي اباوع هوة يدك راسلني كم
مرة ويهدد ويكلي احبج وهالسوالف دك الباب كمزت بساع جاوبت علي وكلت بخوف وصوتي يرجف ها شرايد ؟! اجتني صوت ضحكته وهوة يكول فتحي الباب يحلوة كتلة تحلم امشي ولي منا لا اخابر بابا والله واكلة علئ كل سوالف وحتئ المحادثات عندي اخلي
يموتك وداعة امي ضحك وكال عادي ميهمني افتحي الباب مااسوي شي بس اشوفج كتلة مصطفئ روح منا كال اويلي يابة شكد حلو اسمي بصوتج دفتحي الباب خلي اكحل عيوني بشوفتج كتلة ولي منا احسن الك ترا اني موحدة من صاحباتك كال ايي انتِ مرتي كتلة
حلم ابليس بالجنة ضل احلم بكيفك وخطط بكيفك هسة محمد جاي بالطريق سد الخط واباوع كمز فوك الباب شمر ضرف وراح ركض طلعت ركض من الغرفة ونزلت فتحت الباب مال الاستقبال وركضت اخذت الضرف ودخلت بساع وسديت الباب كعدت علئ
القنفة وايدي ترجف افتح الضرف لو لا اخر شي فتحته مجموعة صور شفت اول صورة وضليت ارجف واكلب بالصور شمرت الصور وضليت اضرب علئ خدي واكول عزا العزاني عزا العزاني هاي مو اني والقران مو اني مجموعة صور مفبركة الية
ومحادثات وهمية سمعت الباب اندك عرفته محمد بساع اخذت الصور وضميتهن وركضت غسلت وجهي ورحت فتحتله الباب دخل وكال شني نمتي صار ساعة ادك بالباب كتلة هامادري ماسمعت دخل وسد الباب خلة العلاليك علئ الميز وكال شبيج مريم ليش باجية
؟! كتلة ههه لا وين باجية بس داكنس ودخل بعيني مدري شنو تقرب مسح علئ خدي وكال مريم متاكدة عينج بيهة شي بلعت ريكي وكتلة ها اي اي متاكدة هز راسة وكعد وعرفته مصدكني كالساعة الكاه صافن علي ورافع حاجبة ضليت اشتغل والهي بروحي وهم
سويت ريوك وتريكنا واني بالي مو وياه بالي بالمصيبة الي اني بيهة فتحت مبايلي لكيت رسالة من عنده جايتني كاتب بيهة شلونها الصور بربج هههه يخبلن مو بس شني انتِ محليتهن وها اذا متسوين الي اكلج عليه بش يرحن لابوج واخوانج وتدرين بية اسويها يلا
باي يحلوة بليل احاجيج طاحن دموعي مسحتهن لا يجي محمد عفت المبايل وضليت افتر بالغرفة واكول ياربي ساعدني شسوي هسة شسوي واكلت اضافري اكل من الخوف .
ريحانة
رجعت من الدوام اني وسارة محمد جابنة دخلت البيت هدوء استغربت مريم وين عفت دنطتي وصعدت رحت لغرفتهة شعجب كل مرة هية تتلكاني بالباب وتشبكني اليوم ماكو دكيت باب الغرفة ودخلت الضوة طافي تقربت عليهة نايمة تلمست وجهة حار واني امشي
ايدي علئ خدهة طاحت دمعتهة بساع شغلت الضوة وكتلهة مريم شبيج ليش تبجين منو وياج ماتحجي مغمضة وعيونهة يطيحن كعدت يمهة بستهة براسهة وكلت وصوتي بي رجفة منو منو وية امي الثانية منو مزعلهة فتحت عيونهة حمر كلبي وجعني كتلهة
احجي موكلبي راح فدوة لكلبج مسحت دموعهة وكالت مابية شي حبيبتي هيج صداع خفيف كتلهة بقلق شبيج مريضة شنو ياذيج ناخذج للمستشفئ هزت راسهة وكالت وهية تكوم هياتني شوفيني حبيبتي مابية شي لا تخافين سارة وين كتلهة هذيج جاي تصبلنا اكل
كالت امشي خلي اني احضر انتن تعبانات كتلهة واني ارجعهة للجرباية نامي معليج بينة ارتاحي اليوم احنا نتغدة وننام كالت بس كتلهة لا بس ولا هاي نامي نومتهة وبست راسهة وطلعت من الغرفة تلتكتني سارة سولفت الهة كالت خليهة ترتاح ونشوف شبيهة
مومال صداع هزيت راسي ورحت ابدل وبالي يمهة غسلت وبدلت ونزلت وكاعدين نتغدة اني وسارة وساكتين دك مبايلي جدو فتحت خط سلمت عليه وعتب علي لين صار هواي مجاينهم كال خلي محمد يجيبج انتِ واخواتج هسة اليوم متجمعين ماكدرت اكلة مانكدر
نجي كتلة صار جدو هسة جاينكم سديت الخط وكلت لسارة كالت والله موكت التجمعات تعبانة من الدوام كتلهة اني نفس الحالة هم تعبانة بس عيب من جدو كومي كولي لمحمد وتعالي بدلي حخابر بابا اكله واشوف سارة كامت واني خابرت علئ بابا جاوبني سلمت
عليه وكتلة حنروح لبيت جدو كال الله وياكم بابا روحوا ديربالكم علئ حالكم وانزل من الدوام كتلة ان شاء الله كال اي اليوم شصار ماصار بالجامعة سولف الة وكتلة بابا انتَ تدري بيهة هية مو كال بابا ختولي معليج بيهة واعرف سوالفهة وهاي اخر مرة تندك
بريحانتي وماعليج بيهة من ترحون كتلة ان شاء الله بابا وسديت الخط اجت سارة كالت ححسين راح ياخذنة محمد نايم كتلهة اوك وبابا كال روحوا صعدنة رححنة لمريم كالت مالي خلك اروح روحن انتن وموتتاخرن ترا اضوج بدونجن شبكناهة وكلنة اكيد يعمري
مانتاخر كم ساعة ونرجع رحنة نبدل لبسنا صايات ومكياج كلش خفيف بس مرة ومسكارة ونزلنة واخذنا اخوي ححسين بيت جدي بعد عن بيتنة فرعين وصلنة لكينة الكل موجود سلمنا وكلهة تسال علئ مريم وليش مااجت كلنة الهم مالهة خلك وهالسوالف بعدين
كعدنا نسولف وعمتي سليمة تباوع النا بتك عين وبس تتهامس عبالك مدري ششايفة وسارة بالكوة متحملة بعدين دخلوا ولد عمي وسلموا وضلوا يسولفون ويانة وكال مصطفئ شعجب مريم مااجت همست الي سارة هوة شعلي اللوكي الحقنة تجي متجي شدخله
كرصتهة وكتلة واني اتصنع الابتسامة مريضة مالهة خلك كال ها سلامتهة متشوف شر فجاة كالت عمتي سليمة لعمتي افراح شلون لكيت مرة لطالب تخبل كالت هيج وكلهة باوعت عليهة وكلهة كالت اي وشنو خلي يزوج والمن باقي وهذا الكلام وبيهم الي يبتسم النا
بشماتة يحجون وسارة عيونهة صارت حمر همست الهة خلي يولون معليج بيهم لا تبجين صيري قوية وتدرين ببابا ميزوج عليمن بعد كالت بصوت مكسور يرحن فدوة للتراب التمشي عليه امي عيوني غوركت وكتلهة طركاعة اسكتي راح ابجي وياج ضحكت
وكالت عابت ضحكتيني من كلتي طركاعة ضحكت وكتلهة ديلا اضحكي وحركي كلبهم وغمزت الهة وضحكت بعدين اذن المغرب كلهة كامت تتوضة وتصلي توضيت ورحت للغرفة الاخيرة جان الباب شوي مفتوح جاي ادخل علمود اخذ مصلاية وكفت واني
اسمعهن يكولن عمتي سليمة تكول لافرا وبناتهم يمهم تكلهة اصبريلي وشوفي شراح اسوي بيهة خاف خليتهم يطلكون هالمرة اقوة اذا مااسوي بيهة مرض خبيث مااطلع سليمة نغزني كلبي هاي عليمن جاي تحجي جاوبتهة عمتي افراح لج سليمة استري علينة اذا درة
طالب احنة سبب طلاقهم هوة وجوري ينهينا ومحمد كالت هيج واني مصدومة ودموعي تنزل جاوبتهة افراح ميدري يمعودة خليهة علي وماتدرين بمصطفئ من ضمن االاتفاق هوة حصتة مريم واذا انسحبنة وعفنة كلشي يفضحنا استري علينة والسحر لسويته لطلاق
طالب وجوري شكد قوي هالمرة ابليهم بسحر يروح الرزق والصحة وضحكت اجت للباب جاي تطلع تحركت بساع مشيت دخلت للحمام وسديت الباب كعدت بالكاع اريد استوعب الي سمعته دموعي تنزل مستحيل مستحيل ضليت اضرب علئ خدي واكول هنة
سبب فراق امي وابوي ضربت علئ خدي وكلت 6 سنين امي بعيدة بسببهن ربي اخذني تعبت ضليت اشهك وابجي واكتم بصوتي هسة شلون شاسوي ويعني مريم مسويلهة شي مصطفئ مومريضة اي مومريضة شوف شمسوي لاختي كمت بساع واني اسمع سارة
تدور علي غسلت وجهي اريد دموعي توكف مااكدر اريد امي شهكت وخليت ايدي علئ حلكي 6 سنين يالضالمات 6 سنين بس كل مرة اسكت بس هالمرة اذا ماالعب بيجن طوبة واخذ ححق امي وحق ابوي وحقنا كلنا وتعب هال6 سنين والبجي البجينا والعذاب الي
عشنا بيه مااطلع ريحانة غسلت وجهي وخمس دقايق انتضرت وجهي يصير لونه طبيعي طلعت ورحت اصلي بالغرفة كملت صلاة وكعدت علئ المصلاية ادعي وعيوني تنزل بحرارة علئ خدي مسحتهن وفزيت علئ صوت سارة وهية تكول وين ادور عليج يلة
راح نرجع للبيت محمد منتضرنة بالحديقة بساع كمت ودعناهم وطلعنة بسرعة مشة محمد واحنة وياه واني ساكتة واحس روحي راح انفجر وصلنة للبيت صعدت ركض لغرفة سارة دخلت وسديت الباب شغلت الضوة كمزت كتلهة وعيوني حمر مصطفئ شنو مسوي
الج ؟! كالت شنو يامصطفئ ؟! كتلهة مريم مصطفئ ابن عمو شنو مسوي الج ؟! ضلت ساكتة طاحت دموعي وكلت احجي بداعة بابا ترا راح اموت وداعة ماما اشرت الي علئ الجرارة استغربت فتحته ولكيت مجموعة صور اكلب ومصدومة اباوع مريم ايدهة علئ
وجهة وتبجي شمرت الصور وكعدت بالكاع صافنة علئ المصيبة الي احنة بيها والكلام الي سمعته يحرك بية حرك بس خلص سكتت هواي هالمرة راح تبدي العواقب احنا مولعبة بيد احد مسحت دموعي وكلت مريم خابري مصطفئ كالت شنو كتلهة خابري واسمعيني شنو اكلج كليلة ....
- يتبع الفصل التالي اضغط على (يأس القلوب) اسم الرواية