رواية يأس القلوب الفصل السابع و الثلاثون 37 - بقلم رودة
part 37
من وجهة وكتلة يموييي تعبان سودة علية وبسته بخده وكلت اللهم اني صائمة ابتسم بهدوء وهمس
تخبلتي بوية اكلها تعبان تكعد تبوس بية انعم الله عليج خوش تعرفين تداويني وتوخرين التعب واني
احيج علئ هاي الطريقة لين صراحة بوية كلبي يحبها واني احب هيج سوالف كثريلنا بوية كثريلنا ضحكت
بخجل وكتلة عابت ارجع انام ارجع ضحك وسحبني نومني علئ ايدة وكال بنعاس اي شبيج ضايجة كتلة
مادري بس احس روحي مختنكة كلت هيج وهوة عدل كعدته وكال وهوة يتلمس وجهي شبيها حبيبة روحي؟
ليش مختنكة؟ كتلة واني العب بشعره شمدريني بس ماكو شي اسويه وعمة نامت وعمو اجة تعبان وهم نام
وانتَ نايم واني عبالك جني بس اني افتر بالبيت ابتسم وكال فراشة بوية ياجني ؟ابتسمت كال وين
تردين اخـذج ؟كتلة لا وين هستوك جاي وتعبان وتريد تطلعني ؟ اصلا ارجع نام باع شصاير بيك واني راح
اكعد اباوع علئ المسلسل كال وهوة يكوم ويطك اصابعة دكومي بنيتي كومي كتلة واني اسحب الغطة
وارجع اتغطئ اما ارجع نام يلا مااكوم كال بهدوء دكومي يابوية اني اريد اطلع واتونس وياج صار هواي
ماطالعين سوية واليوم اريد تفطر برة بالمطعم مدري شجاني وكتلة واني مغمضة عيوني الله وتوكلني ذرة
حارة ومكثرين ملح ضحك وكال ايي مويدلل حبيبي ابتسمت الله فد اشتهيتها كمت وكتلة زين يعني هسة
نروح ؟الساعة بالاربعة هسة ،بعد ساعتين للفطور كال اي اريد اخذج لمكان حلو راح يعجبج كمت وكتلة واني
اتقرب باع هوة اني اريد اطلع واغير جو بس شسمة خاف اتعبك ومنا انتَ جاي تعبان خليها غير مرة عادي
وهسة ارتاح لزمني من خدودي وكال وهوة يعت بيه راحتيي وياج بويـة ياتعب يا هاي ديلا امشي حضري
نفسج لو تردي ارديج بطريقتي الخاصة؟ بكيفج بالخدمة اني ضحكت وكتلة لا شكرا عيني رايحة
رايحة فتحت الكنتور امم هسة شنو البس سحبت بنطرون اسود وطلعت وياه قميص زيتـوني فوك الركبة
بشوية بس يعني حلو ومستور وطلعت شيلة لون
بيجي وكعب هم لون بيجي وجنطة وهوة بالحمام واكف كدام المراية ويحلق بلحيته ويحد بيها لبست
البنطرون ولبست كيمونة جوة القميص وبعدين وكفت كدام المراية مكيجت وعجبني اجر ايلاينر هم جريت
بس يعني مكياج حلو سويت مو طوخ لين اساسا اني مااحب الطوخ وحتئ الايلاينر خفيف بعدين لفيت
الشيلة ورشيت عطر وهوة طلع والخاولي علئ كتافه ومحلق ابتسمت يمة شكد طالع حلو شافني عقج
حواجبة كال موجنة القميص قصير؟ كتلة لا والله طوله كلش زين كال وهوة يفتح الكنتور دكومي بدلي
ماتطلعين بيه كومي كتلة شنو؟ غير بدلت ومكيجت اما والله ولا ابدل مسح وجهة وكال جاي اكلج كومي
بدلي القميص ماتطلعين بيييه تسمعيني لو لااا بلعت ريكي وكتلة بضوجة واني اكعد علئ الجرباية مااريد
اطلع انتَ عود اطلع وجاي انزع الشيلة لزم ايدي وكال بهدوء بوية ليش تعاندين؟ جاي اكلج القميص
ماعاجبني كومي بـدلي وبطلي عناد كتلة واني ادك رجلي بالكاع ماابدلة يعني ماابدلة مسح وجهة وكال
دكومي يلا روحي بيه بس خلي اشوف بعد يا سر"""" يطـلعج ابتسمت وكتلة يعني اروح بيه خزرني وسكتني
راح للكنتور سحب بنطرون اسود من الـ526292 البنطرونات الي لونهم اسود يعني عندة كومة بناطير
لون اسود واحد احلئ من الثاني وسحب قميص اسود كبل عقجت حواجبي شنو رايح يلبس اسود والاسود
حلو عليه بدل ودكم القميص وكف كدام المراية مشط وخلة عطر وفتح الجرارة اخذ الساعة لبسها والمناضر
واني صافنة عليه يعني عباله اقبل يطلع هيج كتلة بضوجة هاي شنو هيج راح تطلع كال وهوة يلبس
الحذاء اي لـيش؟ كتلة عفية باسل بدلهم كال شبيج بوية تخبـلتي؟ كتلة بدلهم يلة بدلهم ماتطلع هيج كال
تذكرين هستوج من اكلج بدلي وتعانديني ؟باوعت عليه بضوجة كال يلا امشي كدامي برطمت ومشيت
من كدامه وهوة يكول الصبر ياللهي الصبر اخذ محفضته والسويج والمبايل واجة وراي نزلنا واثنينا
واحد يدردم علئ الثاني بعدين راح كال لعمتي لاتنتضرونا علئ الفطور برة راح نفطر واني منتظرته
بالكراج طلع شغل السيارة وصعدت وسديت الباب وهوة بدأ يسوق ولابس المناضر سحبت ايدة بضوجة
وكتلة لاتتحرك خلي اصور ابتسم بطرف شفته وكال عنيد شبيك ضايج كتلة واني اصور مضايجة المكبسل
كال مبين كرفس ورفع ايدة كرص خدي وباسه كتلة واني مبتسمة عابت لاتقشمرني وخر ضحك بصوت
عالي وكال وهوة يحك لحيتة احبـك ولك ابتسمت وكتلة اموت عليك سحب ايدي باسها واني ضليت
اصور يمة صورت شكد صور حلوة وايدي وايدة حليب وككو ،وعروق ايده الباردة يموي تموت والحلقة
والساعة كيك بوية كيك لحد ماوصلنا اباوع جابنـي لمكان يصير يم نهر دجلة بيه حدائق ومطاعم مكان
كلش حلو ومرتب ابتسمت نزلنا الله الهوئ يموت تتقرب لزمي ايدي ونمشي وصلنا للحديقة اكو
مصبطات كبل النهر كعدنا علئ وحدة ولزم ايدي واني مبتسمة غمضت عيوني اشم بالهوئ يمويي شكد نقي
فتحت عيوني وكتل حرفييا احلئ مكان ابتسم وكال نصعد بالعبارة؟ كتلة بخوف بس اني اخـاف منها كال
اني وياج وتخافين؟كتل واني اضغط علئ ايدة كل الامان وياك ابتسم وكمنا تقرب دفع الحساب وصعدنا
وجانت هم اكو عوائل صاعدين كعدنا ثنينا وهوة لازم ايدي واني راسي علئ كتفه بدت تمشي العبارة ضغطت
علئ ايدة وهوة مسد علئ ايدي بحنية رفعت راسي اباوع بنية كاعدة كبالنا كالساع تباوع عليه وتهمس
للبنية الي يمها يمة شصار بية كبل باوعت لباسل وكتلة بضوجة وين عيونك باسل كال وهوة مستغرب وياج ب
وياج بوية وياج كتلة واني اضغط علئ سنوني اي خليك وياي احسن هز راسة بضحك واني اخزر بالبنات
ولايستحن عابت اكو شي اسمه مستحة شوية وخلصت الجولة بالعبارة نزلنا وكلت لباسل عطشت
شوكت ياذن باوع لساعته وكال اصبري مابقئ شي هزيت راسي ضلينا نتمشئ بالحديقة ونسولف ونضحك
لحد ما صار وقت الفطور جان حاجز بالمطعم دخلنا وشوية وجـابوا الفطور حاجز منـدي لحم، وبيتـزا
ومقبلات وببسي وهالسوالف بدينا ناكل عزا فد جوعانة يمكن لين حامل واتعب اكلت وكملت وهوة هم
غسلنا وشربنا جاي ودفعنا الحساب وطلعنا كال ها
حبيبي شبعتي؟ كتلة اي عمري والاكل كلش طيب كال الف عافية تمشينا واشترئ الي ذرة وهوة هم اشترئ
وكعد ياكل وياية وهم نسولف ونضحك فد غيرت جو وتغير مزاجي ،بعدين كال ها هسة نرجع لو تردين بعد
نفتر؟ كتلة خلي نرجع لين رجلية ضلت تاذيني من الكعب هز راسة وكال تمام دنتمشئ للسيارة علمود
نصعد وفاتوا اثنين ولد بالدراجة وواحد صاح شـدعوة هلكدد حلوة عميي والثاني كال الزيتوني ياكل ويشرب
عليج اويلي يابة يمة عز العزاني غير بادت روحي واباوع باسل فتح عيونة وطاح السويج من ايدة وصاح
عليهم بعصبية حسيته راح يركض وراهم كتلة بخوف واني ارجف عفية باسل عوفهم خلي نرجع راح اوكع
من الخوف مسح وجها بعصبية وكال امشييي كدامييي امشيي يمة مشيت عزا العزاني فتح السيارة
وصعد وركع الباب حيل صعدت وهوة شغل السيارة وكالساع ماسح وجهة بعصبية ويدك علئ الاستيرن
ويكول كتللهااا لاتلبسيينة لاتلبسيينة بسسس شلووون تسسسمع الكلمة هييية اذا ماتعصبنيييي وتشعل
كلبيييي من الغييييرة ماتررتاح ماترتاح اريييد اشووف بعددد منو يخليييج تطلعين هييج الة اشعلج
شعلل ليييش تعانديين لييشش اخ كون الزمهممممم الة اخليهم يبجووون دم لج اني يتغزلون بيج كدامي؟
وضرب علئ الاستيرن واني يمة بس ارجف ودموعي تنزل كتلة هدوء باسل شبيك اهدأ صاح اسكتييي
مااسمع صوتج درت وجهي علئ الجامة وبس ابجي وهوة يسوق وصلنا للبيت كبل نزلت حتئ الجنطة
عفتها وسديت الباب وراية حيل دخلت ابجي وهوة اجة وراي لزمني من ايدي ومشاني او بالاحرئ سحلني
دخلنا كبل صعدنا فوك دخل للغرفة وشمر الجنطة مالتي علئ الجرباية وكال باعي عناد بعد ماتعانديني
هيج طول قميص بعد ماتلبسين واذا عاندتي ياريحانة العب بيج طـوبة سمعتيي كتلة واني امسح بدموعي
الي ينزلن عشرة عشرة اي مااعاند بعد مااعاند فتحت الكنتور سحبت دشداشة بدون مااباوع ودخلت للحمام
غسلت وجهي وبس ابجي هسة اني شعلية والله يالله وبس اسكت بروحي هسة لو نازعة القميص مو اشرفلي
نزعت ملابسي وسبحت وبدلت ولبست الدشداشة وبعدين توضيت وطلعت واني انشف بشعري وعيوني
حمر من ورة البجي لكيته مبدل وكاعد يصلي وكفت مشطت ورشيت عطر وفرشت مصلايتي ولبست الحرام
وصليت وكملت وهوة متمدد علئ الجرباية نزعت الحرام شو هذا صفن علية ورفع حاجبة باوعتله بتك
عين ودرت اباوع للمراية عزا العزاج ريحانة شلابسة الدشداشة الحمرة الي اشترتها الي امي غصب غمضت
عيوني بفشلة ابد مووكتها البسها كعدت علئ القنفة وسحبت مبايلي خابرت سارة احجي وياهة وكالساع
اباوع عليه بزعـل وهوة كالساع يباوعلي ويخزر ويدور وجهة كملت اتصال وية سارة وتمددت علئ القنفة لو
يطك مااروح يمة علئ الجرباية سحبت مخدة ولحاف وتمددت وغطيت روحي مااحسيت الة لعبت نفسيي
ماتحملت كبل شمرت اللحاف وكمت ركض للحمام وتقيأت يمة انسحنت روحي شصار بية وهوة اول
ماكمت كام وياي تفاجئ واني اتقيأ وهوة يمسد علئ ضهري ويكول بقلق الله بوية الله شبيج؟ لحد ماحسيت
معدتي فرغت يالة ارتاحيت غسلت وهوة دارني عليه وغسلي وجهي وبلل الي ركبتي وسد البوري يريد
ينشف وجهي بالخاولي كتلة بقهر وخر من يمي لاتلزمني مااهتم الي سحبني ونشف وجهي طلعت من
الحمام صاح تعالي تمددي هنا علئ الجرباية كتلة واني احجي وعيوني مدمعة معليك بية يلا عوفني
موهستوك تصيح علية وتبجي بية يلة معليك بية استغفرالله ومسح وجهة واني عفتخ وتمددت علئ
القنفة وتغطيت وضليت ابجي والغرفة صارت هدوء سمعت خطواته تقرب رفع اللحاف وحصر روحة يمي
علئ القنفة كتلة باسل وخر من يمي مااريدك شبكني وكال اش اسكتي وباسني بخدي دفعته شبكني حيل
وكال لاتحاولين مااوخر درت عليه وخصل من شعري نازلات علئ وجهي كتلة شتريد موهستوك تصيح علية
وتبجيني وتقهر بية وتضوجني وتطلع روحي وتعصبني وتغورني كال وهوة يبوس بخدي اي بعد كملي كتلة
وخر مااكمل كال وهوة يسحبني لحضنة ويمسد علئ شعري يابوية بعد من احاجيج علئ لبسج واكلج بدلي
معاجبني لا تعاندين لين اني اعرف بنضرات الناس عليج شلون ترديني اقبلها؟ ولاتذكريني بهذولي السز
بوية كلبي محترك لحد هسة اخ لو بس الزمهم الة اجة يحجي وكتلة خيولون لاتهتم هز راسة لا اراديا خليت
راسي علئ صدرة وكتلة بهدوء واني العب بكيمونته بعد مااعاندك هاهية والبس الي يعجبك ويرضيك
والشي الي ماتقبل بيه مااوصل يمة واسمع كلمتك اهم شي ماتضوج مني وتعصبني ورفعت راسي وكتلة
وعيوني مدمعة بس ها لاتصيح علية وتعصب ترا والله اني اخاف مادري بس هيج مدري شيصير بية اني كلت
هيج وهوة كبل كعد وشالني من القنفة ووكف كال بوية شكد حلوة من تصيرين بنية تسمع الكلمة ابوسج
اني ابوسج باسني بخدودي وكال اشعله شعل بعد الي يصيح عليج ابتسمت ورجع باسني بخدودي وكال كافي
زعل يلة مااحب تضوجين مني لو تزعلين كتلة واني احاوط ركبته واحجي وكصتي علئ كصته وانتَ هم
تسمع كلمتيي وبعد ماتلبس بس اسود لين تطلع كلش حلو واني اغار عليك وشفت هذني اليوم شلون
يباوعلك؟ هيج بعد عيونها افكسهن الي تباوعلك انتَ مالتي بس مالتي وبس اني اباوعلك محد يباوعلك
ضحك بهدوء وكال بعد امر خدمة كتلة بضوجة واليوم شو كلة تصيحلي ريحانة وين ريحانتي؟ همس يم اذني
وهوة يبوسها ريحانتي بوية ريحانتي ابتسمت بخجل وشبكته حيل وشبكني تمشئ خلاني علئ الجرباية
وفتح الجرارة طلع الدوة مالتي اوو ناسيتة وجاب كلاص مي شربني الدوة وشربني مي واني مبتسمة وساكتة
عبالك بنتة الصغيرة وطبعا اشك هرمونات الحمل الهن تاثير علية شوصايرة رومانسية ومادري شنو ،تمدد يمي وضلينا نسولف ونتناكر .
سارة
نجبي لاتبجيني مريم كافي كالت مريم وهية تدك علئ الكاع من الضحك لج شلون عايفة نعالج ولابسة نعال
الولد وطالعة غطيت وجهي من الفشلة عزا العزاني عفت النعال ابو كركوشة ببيت امير وطالعة بنعاله من
الفشلة واليوم امه اجتي سلمت علئ امي وجايبة نعالي بجيت من الفشلة كال مريم وهية تضحك حب
من اول نعال دفرتها وكلت نجبيي مريم لاتقهريني نوب اني الثولة شلون ماحسيت كالت انتِ كلتيها ثولة
وين اكو اثول يحس صحت بصوت عالي بابا صييح علئ مريييم راح اكتلهها والله كومي طلعي كومي
كامت وهية تضحك واني ابجي من الفشلة يعني اني والله طايحة حظ شلون عفت نعالي ابو كركوشة الاحمر ولبست نعاله يعني ماحسيت .
طالب
نايم وفزيت علئ صوت هلهولة مسحت وجهي واستغفرت الله بوية راح يجلطوني غمضت عيوني
ورجعت هلهولة ثانية صحت بعصبية شنييي جلبتوا خوما جلبتوا، دخلت جوري للغرفة وكالت ها عيني
شبيك كتلها منو جاي يهلهل كالت اني اي عيني صاير متعرف صوتي استغفرت الله وكتلها بوية مونايم
شعندج تهلهلين؟ كالت غير اهل فدك ردوا الموافقة وهلهلت كتلها هاا هنا الحجي بيها الخير ان شاء الله يلا
طفي الضوة وبعد مااريد اسمع صوت طفته وتقربت كالت حترجع تنام عمري؟ كتلها واني اخلي ايدي علئ
عيوني لا بوية راح اروح اتونس يعني شتشوفيني؟ كالت بضوجة شبيك صاير متتحمل هسة اني شكتلك
فوك مجايين اني وبنتك يمك ابتسمت لا اراديا من كالت هيج سحبتها من ايدها نومتها علئ ايدي وبستها
بخدها وكلت هاهسة رضيتي رفعت حاجبها وكالت اي رضيت ضحكت وبستها مرة ثانية وكلت بوية اموت
علئ هاي حركتج اكلج بوية اكلج ضحكت شبكتها حيل وكلت هوة منو يدلع هيج حلو ويسحن الروح لو
بس انتِ؟ ضمت راسها بصدري بخجل ضليت امسد علئ شعرها حتئ النومة طارت من عيوني كمت
طكطت اصابعي وهية متمددة وتباوع علية كتلها ها ارتاحيتي من كعدتيني؟ يلا كومي موخذاج الواهس
وتمددتي ضحكت وكامت كمت غسلت وطلعت كعدت بالاستقبال وهية شوية واجت وراية جايبة ماعون
فواكه وعصير برتقال طبيعي اخذت العصير وكتلها عاشت ايدج جوريتي ابتسمت وكالت الف عافية كعدت
يمي كتلها حسين وينة واجاني صوتة وهوة يدخل للاستقبال ها طالب اشتاقيتلي ضحكت اخذ تفاحة من
الماعون وكال هانت هانت بعد كم يوم فدك تسويلي هيج ماعون كعد يمي وكال اي بوية شوكت نروح
وناخذ مشية ونتفق وياهم كتلة ان شاء الله هلايام وورة العيد الخطبة انتَ ومحمد سوية مااكدر اسوي
بالعيد الخطبة لين اول يوم العيد حنة اختك مريم وثاني يوم العرس كال تخيل طالب مريم بنتك راح
تروح وريحانة راحت وسارة اخ هم يجي يوم وتزوج اخ كلبي وابقة اني علئ كلبك بالبيت بس لا تضوج
اجيبلك خوش بنوتة واسويك احلئ جدو ضحكت وكتلة دكوم منا كوم ماعندك سالفة بيها خير .
مريم
بديت احضر وصار 3 ايام اني وماما وسارة نروح للسوك علمود اكمل جهازي واجي تعبانة كلش لين نروح
من 3 لحد 6 يالة نرجع وكلشي نشتريه نرتبه اني وسارة بالجنط ولحد الان صارن 7 جنط مرتبات مكياج
وملابس واحتياجات وجنط واحذية وووو وكملت كل جهازي حرفيا شلون الهم وانشال وهم احمد انطاني
فلوس لجهز لبيتنا لين اني وياه ببيت طالعين مو وية اهله بس يعني الاغراض مال بيت كلهم كملتهم واجة
احمد اخذهم وهم يدزلي صور نختار الديكورات سوية ويشتري وكلي اني مااراح اخلي بي شي ناقص وانما
اجيب كل الاحتياجات وبعد من نتزوج انتِ ترتبيه علئ ذوقج، علاقتنا اني وياه الحمدالله كلش زينة
ومرتاحين وماعدنا مشاكل وصحته صارت كلش زينة ومايمر يوم اذا مانحجي يهتم لكلشي بية ويحب كلشي
بية ومتقبلني بكل حالاتي اكثر من مرة طلعنا وهماتين اشتريت وحضرت وحرفياً تعبنا هواية لين الاستقرار
يرادله هواي جهد وتحضيرات وتعب مصاير بس الحمدالله علئ كل حال اهم شي ننجمع سوية لين تعبنا
هواية، وحرفيا من اكثر الامور الي شايلة همها شلون راح اعوف اهلي مثل كل يوم ابجي بليل لين راح
افارقهم لين طول كل هل سنين اني جنت الام والاخت والصديقة باعتباري الكبيرة وبوكت انتهاء علاقة امي
وابوية صرت اني الهم كلشي اطبخ وانضف واركض منا ومنا واخوية علاوي جان صغير ربيتة علئ ايدي،
ريحانة جنت شاهدة وياهة بكل المواقف ومداريتها لين حالاتهة جانت صعبة وسارة الي جانت تضحك بيهم
بس جان من يجي الليل جانت تجي تبجي بحضني وهواية امور مااكدر انساها معلقة ببالي بس من اكثر
الاشياء الي تسعدني هوة علاقتي باحمد ماجنت متوقعة يجي يوم ونرجع سوية بعد ماانتهئ كلشي
ماجنت متوقعة يجي يوم واني اصير مرته ومسجلة باسمه بس الحمدالله اجة هذا اليوم ومن عدها صرت اصدك واؤمن بـمقولة :
كل متوقع آت
واجة اليوم المنتظر .....
يتبع ...
- يتبع الفصل التالي اضغط على (يأس القلوب) اسم الرواية