رواية يأس القلوب الفصل السادس و الثلاثون 36 - بقلم رودة
part 36
وأسولفلك ع الرآدوني والحبوني
وأنت تگلي شو مغرور ؟
مو مغرور بس ودآعتك مليت
حبوني شكثر هالناس
بس غيرك ولآ حبيت .
في اليوم التالي
سارة
الدنيا عصر متمددة علئ جربايتي وسمعت ماما تصيحني عفت المبايل وكمت وكتلها جاية ماما نزلت
دخلت للمطبخ كتلها ها يوم؟ كالت تعالي هذا ماعون الفواكه واللبن والتمر وراشي وديهم لبيت جيرانة ابو
امير لين شو علاوي ماهوة صار ساعة ادور عليه فتعالي وديهم بساع لين اللبن راح يبرد بلعت ريكي
وكتلها موتدللين يمة؟ صعدت ركض غسلت وجهـي لبست عبايتي وطلعت شيلة لـون بيجي لبستها
ونزلت شافتني ماما كالت وهية تعدلي الشيلة ماما موتتاخرين بساع تعالي دنيا عصر اخاف
عليج كتلها بابتسامة ياماما هوة اني وين رايحة هوة بيتهم كدامنة ومريم ملتهية تحضر اخذت الصينية
وطلعت وسديت الباب وراية ومشيت بلعت ريكي وكلت اللهم اني صائمة دكيت الباب ودادك دكة ثانية
وانفتح الباب وطلعت المرة ابتسمت وكتلها السلام عليكم خالة كالت هلا بعد خالتج مديت الصينية وكتلها
بخجل هذا ماما دزته ابتسمت وكالت ياحبيبتي ليش تكلفون نفسكم كتلها لا خالة الف عافية اخذت الصينية
وكالت تعالي ادخلي عفتج واكفة كتلها بسرعة لا والله ماما منتظرتني كالت ادخلي ياامي خلي نشوفج شوية
بلعت ريكي ودخلت وهية سدت الباب دخلت وراهة وصاحت تعالن ماما غصون ورنا اجني البنات شافني
استغربن سلمن علية وهية المرة كالت الهم هاية بنت جيرانة ابو محمد الامر مال امير ابتسمن وكالن اهلاً
وسهلاً حبيبتي يمة واني ميتة من الخجل اني شجابني ام طفكة ضلينا نسولف وتعرفت عليهن شوية شوية
وحدة تدرس هندسة ميكانيك مرحلة ثالثة ووح
دة تمريض مرحلة اولئ يعني بكدي كلش تونست
بالسوالف وياهم وبساع تفاعلنا ونسيت امي منتظرتني ونسيت كلشي كمزت علئ صوت واحد وهوة يكول
السلام عليكم اباوع امير وواكف بالبدلة العسكرية يمويي انسحنت روحي بلعت ريكي وكلت بكلبي اللهم
اني صائمة ورديت عليه وعليكم السلام وهوة كبل رجع جاي يطلع لين الضاهر انصدم بوجودي
ورجع كال وهوة يحك راسة بس العفوا ابوج سالني عليج لين امج موديتج ومتاخرة وخايفة عليج بس
هسة اكلهم هاية لاتخافون لااردياً كمزت وكلت عزا شلون نسيت يمة الفشلة والخجل الي اني بيه
حسسوني اني صف اول ابتدائي وتيهت بالطريق كمت بساع والبنات كالن ابقي بعد تونسنا كتلهم ان
شاء الله غير مرة لين هسة امي راح تموتني ضحكن وام امير تضحك وتكول خذاج الواهس وية البنات عود
عيديها علينا حبيبتي تونسنا كالها واني البس بالنعال ومامنتبهة ارتبكت ان شاء الله عمة طلعت لكيت بابا
هوة وهذا امير واكفين بباب بيتنا ويسولفون تقدمت امشي بخجل ومدنكة بساع فتحت باب الكراج ودخلت
مشيت بساع للمطبخ وامي شافتني وكامت صاحت بية ولج سويرة تردين تموتيني اني موكتلج لاتتاخرين
علية شكو رحتي تدكين سوالف وخذاج الواهس وابوج اجة وكتلة كتلها واني انزع العباية صدك جذب يمة فد
خجلت وارتبكت شكد عيب حسستيني اني وحدة صغيرة وتيهت يعني هية خمس دقايق تاخرت كالت
وهية تاشر علئ الساعة فلك ياخمس دقايق دزيتج بالاربعة ضبط وهسة بالخمسة ونص شهكت وكلت عزا
اخذني الواهس بس تدرين يمة فد محبوبات البنات حتئ انطيتهم رقمي وحسابي علئ الانستا دنتواصل
وكذا ضحكت وكالت شبساع يايمة تكونين علاقات كتلهة واني ارفع شعري موتدرين يعني اني محبوبة
وياهو يشوفني يحبني وسمعت كحة بابا دخل للمطبخ كبل كالت اقصد يحب اخلاقي وامي ضحكت ومريم
وياهة شافني بابا وكال بعد من تدزج امج لاتتاخرين هلكد وتهبطيها يابابا مرة ثانية كوليلها وروحي يم
البنات كتلة ان شاء الله بس شسوي لمرتك كلبها رهيف مدري عليمن طالعة وغمزلته ضحك وكال ماتصيرلج
جارة امشي روحي سوي العصاير لا تبقين واكفة وتخلين بس مريم تشتغل وتفتر كتلة هية متقبل تكلي
اخاف عليج لاتتعبين كالت مريم وهية تهد علية بالجمجة الجذابة اصيحج تكليلي تعبانة مدري شبية
كتلها واني احضن بابا اي شسوي تعبانة غير حب بابا تعبني ضحكوا كلهم وكال وخري مكارة روحي كملي
شغلج يلا وخرت منة ورحت اسوي الخفايف .
مريم
كملت الفطور وكعدت علمود ارتاح تمددت بالقنفة علئ الاستقبال وبابا كاعد هم هوة وماما يسولفون واني
اكلب بالمبايل وكال بابا مريومة احمد فاتحج بموضوع الزواج مو بالعيد حددوا؟ طفيت المبايل وكتلة بخجل
اي بابا فاتحني كال تردين تاجليه اذا تشوفين ماتلحكين او هاي؟ كتلة بخجل مادري بابا الي يعجبك
بس اني ماعندي شي يعني هز راسة بأبتسامة وماما باوعتلي وكالت بس خلي اصير زينة علمود اخذج
للسوك واكمل جهاز الج لين هالعملية تعبتني كتلها لا ماما عادي علئ راحتج اهم شي صحت ابتسمت
وصاحتني يمها بوستني ودخلت سارة وهية تهفي لروحها اي عيني البوس كلة لمريم وسارة محد يبوسها
ضحك بابا وكلها تعالي ملعونة تقربت شبكها وباسها وهية تكلي علئ عنادج شوفي بابا يحبني وانتِ ست
جوري خلي مريم تفيدج ضلينا نضحك علئ سوالفها عبالك وحدة طفلة ولو هية صدك طفلة يمة خلي
اسكت لاتسمعني وتكوم تكتلني فجاة دك مبايل ماما فتحت خط كالت هلا ماما ريحانة شلونج حبيبتي
ومدري شنو حجن وامي ابتسمت وشو كبل هلهلت واحنا نباوع مستغربين كالت الها بفرح هاج ابوج بشري
حبيبتي انطته المبايل وكلنا الهة اني وسارة بفضول شكو ماما ليش هلهلتي كالت ريحانة حامل ومسحت
عيونها الدمعت اني وسارة كمنة نكمز منا ومنا وسارة كالت وهية تهز ركبة احلئ خالة اني والحسيين وبابا
يحجي وية ريحانة بفرح ويكلها الف مبروك حبيبتي ديربالج علئ روحج باباتي اني اجيج بعدين مااتاخر اي
سلميلي عليهم وانطة المبايل لامي وكعدت تنصح بيها وتحجي وبعدين حجينا وياهة اني وسارة وفرحانين
وباركنة الها وبابا الفرحة ماسايعتة كام يفتر بالبيت ومبتسم وكالساع يكول اي من اروح الهة اخذ الشغلات
الي تحبهم خاف باقيات بنفسهة ولو بيت عزيز مايقصرون بس لازم اخذ الها يمة فديت ابوية الحنين
واليوم البيت كلة فرحان واجوي الولد وبشرناهم وهماتين فرحوا وباركوا لريحانة وحسين يطك اصبع
ويكول لاتحاجوني بوية صرت خال منا وهيج او بوية شبساع كبرنا وصرنا خوال اخ بين علينا الكبر وبابا
متمدد ويباوعلة بتك عين حسين غمزلة وكلة ها حجي بيمن تفكر بابا كلة وهوة يعدل كعدته افكر
اكول اني شمسوي بحياتي بيمن عاصي الله سبحانه وتعالئ وبلاني بيك سارة صحت ببممم في منتصف
الجبهة ضحكنا وحسين يكلة ادري بيك تحبني بس تكابر عاذرك عاذرك وبابا يضحك علئ سوالفة وحسين
صاح بوية انسحنت روحي شوكت ياذن صدك جذب الناس كلها اذنت بس هذا اليمنة يجرها جر استغفرالله
كمت فرشت السفرة وبدينا نحضر وحسين فاتح باب الاستقبال ولازم صلاحية مي وتمرة ومنتظرة يكول الله
واكبر علمود كبل يفطر باوع للساعة وكال سارة بعد شكد وياذن بلا شوفي قناة العراقية سارة صاحت عليه
من المطبخ مادري انتَ شوف اني جاي اكسر بالثلج كال مريم بلا انتِ شوفي درت علئ قناة العراقية كتلة
بعد خمس دقايق صاح لا يامحمد اي الصدمة دي ضحكت ورحت جبت العصاير والفواكه والزلاطة وسارة
جابت الكلاسات والخواشيك وبعدين جبت الجدورة وسارة وهية كاعدة تصب بالاكل جنا مسوين مركة
تبسي وتمن بالشعرية وشوربة ودجاجة مشوية كملت صب واذن وماما وبابا يصلون بابا كمل واجة كعد واحنا
نريد ناكل وماما بعدها كال حسين وهوة ياكل خيارة جاي تصلي صلاة ام الخمستلاف ركعة وصاح ييمة
الاكللل بردد متنة من الجوع عود بعدين صلي وهية تصيح الله واكبر كال حسين تكول اكلوا معليكم بية
يمة خربنا ضحك شوية واجت امي وكالت يا شبيكم هية بس صلاة المغرب خبصوتني ماخليتوني اكمل
صلاة العشاء وحسين كلها لعد الحمدالله ماكملتي جان اليوم للعشرة يالة نفطر كعدت وبدينا ناكل كملنا وبابا
وماما كاموا يغسلون واحنا سوينا انبطاح يم السفرة سارة دكت علئ بطنها وكالت يمة بطني شوتوجعني
واني كلشي مااكلت كلها حسين وهوة يسوي تمارين عود يريد يهضم الاكل ولج ياكلشي مااكلتي غير
ماعونين تمن وكرصتين خبز كالت سارة شنو عيني تحسب بلكمي انتَ ويبو ضلوا يتعاركون وهمة
متمددين دخل بابا وصاح هاي بعدكم ماكايمين وكمنا كلنا صرنا طشار وصاح اي بوية السفرة تشيل نفسها
ببحدها وتمشي للمطبخ تغسل روحها يمة غير متت من الضحك ركضت غسلت ونوب جبت صينية ننكل بيها الماعين اني وسارة .
ريحانة
ورة الفطور بساعة هوة كاعد بالاستقبال يشتغل بالحاسبة بين الاستخبارات اكثر شغلهم بالحاسبة وعمو
متمدد بالغرفة ويمه عمة اخذت عصير داليا من الثلاجة فتحته اشرب بالمصاصة وامشي بالبيت دخلت
للاستقبال شفته مندمج تقربت شافني ابتسم فتحلي ايده وكعدني بحضنة باسني بخدي وكال وهوة يحك
لحيتة بخدي شيسوي حبيبي قربت العصير من عنده وكتلة اشرب شرب ورجعت اشرب وهوة يمسد علئ
شعري خليت العصير علئ الطبلة وشبكته وادية تعلكت بركبته باسني وكال شلون صرتي كتلة واني اسند
راسي علئ صدرة مادام انتَ يمي اكيد احسن ابتسمت وشبكني وكال اويلي يابة باوعت للحاسبة وكتلة
بضوجة عوف الشغل شوية وخلي اسويلنا كعدة حلوة ونكعد نسولف ونغير جو ابتسم وسد الحاسبة وكال
مويدلل حبيبي؟ اساساً اني كملت وخلة ايدة علئ بطني وكال اكلج شو تحمست شوكت تجيبين؟
ضحكت وكتلة او بعد هواية صفن بوجهي ورجع كال شو وجهج اصفر؟ خاف تعبانة وماتكليلي ورجع كال
باعي اذا تردين بعد مانصعد نبقئ كاعدين هنا لاتتعبين روحج زين كليلي مشتهية شي تردين اجيبلج شي
ابتسمت واني امسد علئ خده سلامتك يروحي كلشي مااريد والله وكلشي مابية اهدأ ابتسم وجر ايدي باسها
وهمس فرحان حيل فرحان يمة اني بس اشوف الفرحة بعيونة افرح لا ارادياً حضنته وكتلة يمة فديت
الفرحان اني ضحك وشبكني كتلة يلا خلي اكوم احضر النا كعدة حلوة علمود نباوع فلم كال وهوة ملتهي
يبوس بوجهي اي ليش لا نباوع فلم كتلة واني اعدل بفالينتة وحبيبي يروح للمحل يجيب النا حبشكلات مو
ضحك وكال ديلا كليلي شنو تردين كتلة هوة انتَ جيب النا حلويات والله عليك لاتنسئ الكيكة الي احبها
وها جيبلي عصير داليا بنكهة الفواكه وجبس ليز بالبن والاعشاب كال هاهية؟ كتلة اي عمري اخذ المحفظة
وكام كال مااتاخر ابتسمت الة ودزيتلة بوسة بالهوة وهوة غمزلي ضحكت وصعدت فوك شغلت ضوة الغرفة
سحبت اللحاف فرشت بالكاع يم الجرباية وكبال التلفزيون وجبت مخدتين خليتهم ونزلت جوة حضرت
ماعون فواكه ورتبته واكو جيس حب فرغت بمـاعون وصعدتهم رتبتهم علئ الطاولة الخشبية الصغيرة
وخليت هماتين شموع يعني سويت جو كلش حلو داشغل بالشموع وانفتح باب الغرفة ودخل هوة
ابتسمت شايل العلاليك والجكارة بشفايفة باوع وكال وتالي وية ترتيبج الحلو ابتسمت عفت الجداحة
وتقربت يمة خلة العلاليك علئ الجرباية وفتح اول علاكة طلع كارتونة مربعة حجمها وسط استغربت شنو
هاي من انتبهت نفس غلاف الكيكة كمزت وكتلة جبتلي كارتونة من هاية الكيكة الي احبها ضحك وكال
اي جبتلج كارتونة من هاي الكيكة الي تحبيها وطلع العصاير والحلويات الي جايبها طبعا هوة علاقته
موقوية وية الحلويات بس من وراي كام ياكل تمدد علئ الجرباية واني اباوع بالعلاليك اخذتهم رتبتهم
بالثلاجة وعزلت علئ صفحة انزلهم لعمة وعمة رتبت الحلويات وخليتهم وباسل رابط الحاسبة علئ
التلفزيون وديشغل فلم وطبعا اني كتلة طلع رعب لين عاجبني اشوف فلم رعب فتحت الكتتور طلعتلي
كيمونة وياها الشورت مالتها دخلت للحمام بدلت وطلعت رفعت شعري كباية ورشيت عطر وخليت حمرة
وتنت لخدودي ورفع راسه ديصيحني شافني ضل صافن ابتسمت بخجل وسديت الجرارة ورحت طفيت
الضوة وبس الشموع مشتغلة والفلم مشتغل كعدت يمه سحبني لحضنه ومنتجي علئ الجرباية سحبت الغطة
وبدينا نباوع ونكرس حب واني لابدة بحضنة وتندمت لين كتلة نشوف فلم رعب لين ادري بنفسي خوافة
مديت ايدي اخذت كيكة واكل واباوع وهوة هم مندمج ويكرس حب وفجاة طلعت لقطة تخوف الكيكة
نشمرت واني انكلبت عليه وصرخت بخوف وهوة كمز والحب طاح من ايده وكف الفلم وضحك وكال شبيج
بوية واني مجلبة بكيمونته وحاضنته عدل كعدته ورفع راسي وخر الخصل الي نزلن وكال شبيج بوية
هاهية لقطة تخوف وراحت كومي عوفي الفلم بعد ماانباوع لايصير بيج شي نوب كتلة بخوف اي منباوع
ضحك علئ شكل شعري نازل والحب طايح علية وكاعدة بحضنة طفة الفلم وكام شغل الضوة واني
امشي وياه ومجلبة بكيمونته تقدم صار يساعدني نرتب بالغرفة وخليت الحلويات بالثلاجة وهوة يرتب
وياية كملنا تمدد علئ الجرباية واني حضنته وهوة منتجي علئ الجرباية ويكلب بالمبايل وحاضني بايده
وراسي علئ صدره واباوع وياه بالمبايل شوية وطفاه كتلة واني العب برموشه باجر تروح للمركز حبيبي كال
وهوة يبوس ايدي اي يروحي كتلة وشوكت تجي يعني بنفس اليوم كال لا هالمرة 3 ايام باوعت عليه
بضوجة وكتلة شنية 3 ايام هواية ابتسم وكال شسوي غير هوة هذا الشغل وبعدين غمضي فتحي
تلكيهم مخلصات هزيت راسي وهوة كال وهوة يسحبني اله ويغطيني نامي وارتاحي علمود بعد
ساعتين نكعد للسحور كتلة تمام وخليت راسي علئ صدرة وهوة حضني وغفينا .
طالب
نتمشئ اني واخوي ابو وداد علئ الشارع العام ونسولف وكتلة ايي يالغالي هلايام احنا يمكم كال هلا بيكم
خوية تنورونا كتلة بابتسامة البيت منور باهلة، بس موجية عادي هاي كال بأستغراب شلون يعني؟ كتلة
اريد اخطب وداد لمحمد ابتسم وكال هلا بيكم، وين الكة مثل محمد اني ؟ وتدري ياخوي ابو مصطفئ قبل
شهر طلبها مني لمصطفئ بس رفضت، لين ماامن عليها واعرف سوالف مصطفئ ،كتلة خيولي شنو هوة هذا
السز تنطي وداد؟ وبعدين وداد بنتي يولي بعيوني اخليها وكلها تعرف معزتها عندي هز راسة وابتسم
وكتلة امشي وياي بعد للحديقة العامة هناك عزيز والولد تونس شوية ويانا كال امشينا ورحنا منا لحد
الوحدة بليل رجعنا وصلته وياي بطريقي بالسيارة ورجعت للبيت دخلت السيارة وسديت باب الكراج
ودخلت للبيت لكيت البنات يحضرن بالسحور شافني كالن الله يساعدك بابا كتلهم هلا بابا وين الولد كالن
بالاستقبال دخلت شافوني سلموا وعلاوي اجاني ركض شبكني وباسني بسته براسه وكلت هلا بحبيب ابوه
ضليت اسولف وياه واضحك علئ سوالفه وكال بابا اسولفلك نكتة كتلة اي بابا احجي .
مريم
دخلت للاستقبال جبت القوري مال جاي وبابا يدغدغ بعلاوي وعلاوي كله بضحك نعلعلا ابو اخوتك بابا،
عزا العزا بابا كبل سحب علاوي من ياخته وكلة ولك هاي منين متعلمها؟ كله حسين علمني ياهة شبيها بابا متضحك ؟
عزا العزاك حسين، بابا دار صفن علئ حسين وحسين كام ركض وبابا وراه خليت قوري الجاي وركضت وراهم طلع حسين
يركض من الاستقبال وطلع بابا وراه طاير وبابا يكلة ها تريد تطلع عين الولد من هسة تريدة يستهتر تعال
ولك تعال بوية راح يجلطني اي من طركاعة طاحت عليك حسسييين جر علاوي وكلة شوف بابا عيب تكول هيج هاي باعتبار جاي تسب جدك
اذا بعد حجيتها اعاقبك لاتكولها علاوي هز راسة وكال صار بابا ركضت للمطبخ وسولفت لسارة كبل
كالت نعلعلا خوتج مريمة يمة غير متت من الضحك وبابا بعده يصيح علئ حسين دخل للاستقبال
وصاح بوية راح يجلطني طركاعة طاحت عليك حسييييين .
بعد مرور ايام
حسين
مسحت وجهي مرتبك انفتح الباب ودخلت هية تقدم عصير مسحت كصتي ووهية تقدمت تقدم العصير
وصلت يمي انطتني همست الها واني اخذه ها دكتورتـي ،هية ايدها اهتزت ابتسمت بهدوء الها وهية
راحت ،اليوم بعد انتظار دام لايام واخيرا ابوي اخذ اجازة واليوة راح يطلب الي ايد فدك، فرحان واخيراً
بعد عناء طويل، اني وياهة علئ علاقة لمدة 3 سنوات من جنت مرحلة ثانية محاماة ولحد هسة تعرفت عليها
صدفة اجت وية صديقة النا بالشلة الي بالجامعة وانعجبت بيها ،وهيج استمرت العلاقة هية نفس
سوالفي هههههههه واني وياهة متفاهمين والحمدالله فتح بابا الموضوع وطلب ايدها علئ سنة الله ورسولة،
ومن بعد حوار طال لمدة نص ساعة، ابوها كال ان شاء الله باقرب وقت نردلكم خبر ونتشرف بيكم ابتسمت
وشوية وطلعنا ركبنا بالسيارة واجني امي وسارة ومريم صعدن وسارة كالت بسرعة حسين عاشت ايدك
علئ الاختيار يعني عفية عبالي مغرورة وهاي طلعت فد حبابة وفطيرة كتلها بابتسامة فدك بعد ابوي ضحك
علئ شكلي شلون سرحان وامي كالت بالمبارك يمة يوم يردون خبر الموافقة ان شاء الله ونفرح بيك كتلها
الله يبارك بيج يوم ان شاء الله يمة، ويحجن بيها واني بالكوة متحمل ،شوكت تجي يمي علمود اكعدها ببوسة
استغفرالله اكعدها بصباح الخير وانومها بتصبحين علئ خير فزيت علئ صوت ابوي وهوة يكول لوف بهذا
السايد وبطريقك علئ بيت عمك ابو وداد وخابر محمد خلي يجي كتلة باستغراب ليش كال اطلب اله وداد
غير؟ لين احتمال بعد منا للعيد مااحصل اي اجازة واني ناوي بعد العيد خطبتكم اثنينكم فيعني اريد
اخلص كلشي هزيت راسي وخابرت محمد كتلة وتوجهت لبيت عمي .
مريم
وصلنا لبيت عمي نزلنا وسارة تكول حسوي صفحة علئ الفيس اصير خطابة منو يريد يخطب اروح اخطب الة
ضحكت وكالت هلا هلا كالساع نخطب لواحد اخخ بس اني بقيت وين تعيس الحظ العفوا سعيد الحظ
كتلها جايج بالطريق مايتاخر ضحكت ودخلنا استقبلونا بيت عمو وكعدنا نسولف ونضحك منا لحد
مااجة محمد وبابا فاتحهم بالموضوع وطلبها وعمي كال اني لو علية اكلك كبع واخذ خوية بس رأي وداد
اهم شي عندي ابتسم بابا وكال اله اكيد خوية رأيها مهم وهية خجلت وكامت طلعت من الاستقبال ولحكناها اني وسارة .
محمد
اباوع عليها كامت طلعت من الاستقبال ابتسمت علئ شكلها شلون خجلت بوية شكد احبها واعزها،مبايلي دك
كمت استاذنت وطلعت بالحديقة اخابر، سديت الاتصال وفزيت علئ صوتها وراي وهية تكول ليش
مكتلي، درت وابتسمت تقربت وكتلها صارن بسرعة حتئ اني تفاجئت ماعبالي اليوم هزت راسها، كتلها
واني اعدل شالها مابقة شي وتصيرين يمي ابتسمت بخجل وكالت وشمدريك راح اوافق كتلها واني اسحب
ايدها ابوسها شحدج بوية بكيفج انتِ ماتوافقين مثلاً، سحبت ايدها بخجل وتمشت جاي تروح دارت علي
وكالت احبك هواي وراحت تركض ابتسمت علئ منضرها وتنهدت وكلت هانت هانت .
سارة
رجعنا للبيت واني كل خمس دقايق اهلهل من الفرحة، عبالك مامصدكة بس ها حقي ترا اخواني واخيرا
انفكت عقدتهم هلا هلا يعني حتصير مناسبة والعب اركص والعب جولة وهزيت ركبة وضربتني مريم
وكالت امشي بدلي والله موتيني كالساعة الكاج تهزين لو مدري شتسوين تخبلتي كتلها واني اركصها وياي اي
تخبلت واركص بيها ضحكت ودفعتني وراحت تبدل تقدمت وكفت يم الشباك اواكف ورجف كلبي شفته يم
باب بيتهم يتمشئ ويخابر، تنهدت وكلت ياريتني وماكملت سكتت اكتفيت بالابتسامة .
ريحانة
كاعدة بالمطبخ ومكابلة الشباك منتظرة باسل يجي اليوم صار اليوم الرابع يالة كدر يجي وكلبي طاك عليه
اريده بس يجي متعودة علية وصحيح اخابره بس مااكدر كالساع لين مشغول شوية ودخلت السيارة
للكراج يمة رجف كلبي وكفها ونزل فتحت الباب ابتسمت شافني ضحك وفتح اديه واني لا اردياً ركضت وشمرت روحي بحضنه .
يتبع ....
- يتبع الفصل التالي اضغط على (يأس القلوب) اسم الرواية