رواية يأس القلوب الفصل الثاني و الثلاثون 32 - بقلم رودة
part 32
فديت الي ميعوفنيي بحدي هوة يضحك علية فتح
باب السيارة صعد واني صعدت بالصدر انفتح باب
الكراج وشغل السيارة وبدا يسوق واني لازمة ايدي الثانية واسولف واضحك كتلة ولاعبالك رايحين نجيب
صمون عبالك رايحين للندن ضحك وصل يم الفرن نزل اباوع عليه شلون يمشي يمة فدوة لطولة شوية واخذ
الصمون ودخل للمحل الي يم الفرن خمس دقايق وطلع عبر الشارع وتقدم فتح الباب وصعد خلة الصمون ورة
والعلاكة بحضني فتحتها وشفت جايبلي كيكة من هاية الي احبها هواي ومشكل الي حلويات واندومي
مديت ايدي كرصته وكتلة فديت حبيبي المكبسل شكد احبك اني ضحك وكال كرفس صايرة هواي
تكرصين ليش تخليني ابجيج مد ايدة يريد يكرصني وانحصرت يم الباب وكتلة لا بداعتي والله كرصتك
توجع ضحك ورجع يسوق شوية وصلنا نزل فتح الباب الكراج ورجع دخل السيارة وانسد باب الكراج اخذت
الصمون والعلاكة ونزلت فتحت باب المطبخ ودخلت خليتهم علئ الميز وبساع نزعت العباية والشال وحميت
الجاي والبيض وخليتهم بالصينية واخذتها للاستقبال وهوة دخل كعد كعدت يمه وكال عاشت ايدج بوية
بسته بخده وكتلة الف عافية مسح كصته وكال شني اليوم ناكل لو لا ضحكت وكتلة اكل اكل بدينا ناكل
ونسولف كملنا اخذت الصينية غسلتها وتوضيت ورحت اصلي لكيته مصلي قبلي صليت وبعدين كبل
كمت علئ البيت نضفته كله وهوة كاعد بالاستقبال يشتغل بالحاسبة ومركز رتبت ماعون حلويات وفاكهة
واخذت مبايلي ورحت كعدت يمه خليتهم علئ الطبلة كدامنا ودحست روحي بحضنة سد الحاسبة وشبكني
ومد ايدة اخذت شيف تفاح اكله ورجع كال شهل دلال اليوم كتلة ها عيني شتقصد اشو مدللتك كاليومية
وبعدين اذا ماادللك ادلل منو تقرب باسني بخدي ونزل باسني بطرف شفتي وكال احبج بوية همست بخجل
اموت عليك شاف مبايلي بيدي همس البارحة زعلتي لين سحبته منج؟ هزيت راسي بمعنئ اي شبكني اقوة
وكال لاتتوقعين بيوم اشك بيج ابداً ثقتي بيج عمياء والله شاهد امنت الج البرامج لاربطت مبايلي بمبايلج
ولا هاي قابل ماعندي ثقة بيج؟ وادري شوية متسرع وموحلو تصرفي سحبته كبل منج السماح بوية
ابتسمت وكتلة فدوة الك حبيبي وكتلة واني العب
بكيمونته بس شلون تكلي شوفي واحد خلي يفهمج ها
كال لعد بس انتِ تنرفزيني بوية ؟ اني هم نرفزتج وشحدج تشوفين واحد ومحد يفهمج بكدي محد
وباسني بخدي حيل وعضني كمزت ضحك كتلة واني لازمة خدي متوب يعني متوب ضحك وشالني خلاني
علئ القنفة وكال هسة اكعدي هنا وصيري عاقلة وخليني اكمل شغلي برطمت وكتلة ليش كومتني
متريدني مو ها كايمة كايمة وكمت امشي وضامة ضحكتي كال وين؟ كتلة رايحة بغرفتي عيني الله
لايعوزني عليك مخلي الابتوب علئ رجله اشرلي علئ رجله الثانية بمعنئ اكعدي هنا كتلة اما مااجي خلة
الابتوب علئ الطبلة وكام وكال شو تعالي ضحكت وركضت وهوة ركض وراية طلعت اركض واضحك
وصلت يم الدرج لزمني وشالني وكال لكفتج شالني واني اضحك وادفع بي وهوة عضني من زندي وخربت
من الضحك وفزينا ثنينا علئ صوت عمو عزيز يافشلتي من الصدمة ضلينا ثنينا صافنين بوجهة
وباسل شايلني واني محاوطته من ركبته بساع نزلني واني من الفشلة صعدت فوك للغرفة ركض دخلت
وضليت اكمز عزا العزاني هسة بعد شلون اباوع بوجهة يمة شهل فشلة حسيت وجهي راح يطك من الحرارة
يمة راح ابجي شوية ودخل باسل للغرفة يضحك كتلة عزا باسل عمو شنو كال ضل يحجي مو ضحك وكال
شيـحجي يمعودة؟ هم لو حاجي احسن يكلي ها صالحتها ؟اموتك بعد اذا زعلتها؟ تحمست رحت جاي
اطلع من الغرفة لزمني كال اوكفي اوكفي وين رايحة كتلة رايحة ابوسة وخر مني ضحك وكال اوكفي اوكفي
كتلة بحماس صحيح تفشلنا وبعد حتئ استحي اباوع بوجهة بس فدوة ميقبل تزعلني اوي فديتني شكد
محـبوبة عكس هذوليج الناس تقرب وحاوطني من خصري وكال شتقصدين شو طولان لسانج مد ايدة
جاي يكرصني كتلة بساع اقصد انتَ شكد محبوب ومحد يحب يزعلك ضحك وباسني بخدي وبعدين
مبايله دك راح يخابر واني اخذت الملابس خليتهم بالغسالة ونزلت جوة لكيت عمة جاية بوستها وكالت
هلا يبعد عمتج شلونج شلونه باسل وغمزتلي ضحكت بخجل كتلها الحمدالله زينين رفعت ايدها تدعي وتكول
اللهم امين ان شاء الله دومكم زينين ويديمكم سوية ويبعد عنكم كل المشاكل ويوم اشوف بحضنكم طفل
يمه هية كالت هيج ومادري شصار بية مادري مجاي اكدر اتخيل اني وباسل وعدنا طفل؟ ويشبه باسل عزااا
كزكزن ابتسمت وكتلها ويحفظج النا وبعدين كعدنا نسولف ونضحك وعمو يباوع بالتلفزيون وكالساع
يباوع علينا ويبتسم لحد ما دك مبايله من خلال كلامه عرفته يحجي وية بابا يمة كلبي طاك علية وسمعته
يكلة بالباب جاي جاي كام واني كمت وراه سويت روحي رايحة للمطبخ اباوع فتح باب الكراج ودخل بابا
سلم عليه اني ماتحملت وصلوا لنص الكراج وطلعت اركض وصحت بفرح بابا عمو عزيز ضحك وبابا ضحك
وتقدم شبكني شمرت روحي بحضنة وشبكته حيل باس راسي وكال هلا بروح ابوها هلا بالعزيزة الغالية
بسته بخده وهوة باسني وكال شلونج بوية شني كلبي طاك عليج كلت ماتجينا خلي اني اروحلها ابتسمت
وعيوني مدمعة وبس شابكته دخلنا وهوة شابكني ونمشي دخلنا للأستقبال ودخل باسل سلم علئ بابا
وباوعلي بتك عين شلون شابكته ضحكت وبابا باسني براسي وكال لباسل ليش ماتجيبها يول كلبي طاك عليها
ابتسم باسل وبابا كال اخذها وياي اليوم وباجر عود جيبها عزا هوة كال هيج اني كبل باوعت لباسل انحرج
مسح كصته وكلة الي يعجبك عمي ولو عود اني هلايام جاي اجيبها واجي بس بعد انتَ اجيت ابتسمت
منو قبل كم يوم يكلي مااوديج شعندج رايحة ؟ابقي بحضني كال بابا دكومي حضري روحج علمود ترحين
وياي كمت وطبعا عمة قدمت مي وبعدين اني قدمت العصير وصعدت لبست عبايتي فوك الدشداشة مااخذ
ملابس عود البس من سارة ومريم هههههه انفتح باب الغرفة واني الف بالشال باسل مجتف اديه ومنتجي
علئ الباب ويباوعلي بتك عين كال تعوفيني وترحين يعني كتلة واني اخلي حمرة باجر اجي يعني مااتاخر
وتقربت بسته بخده شبكني وباسني شوية ووخر وكال وهوة يمسد علئ خدي تونسي بوية وغيري جو وية
البنات لاتضوجين ولاتزعلين بس اهم شي موتنسيني ضحكت وكتلة واني الزم وجهي بثنين ادية شلون
انساك ها كلي بعدين تعال هوة يوم واحد شبكني وكال ميخالف تعودت عليج شبكته وسمعت عمو يصيحني
بسته بخده وجرني باسني وكال وهوة يطلع محفظته هاج هذا مصرف خاف تحتاجين شي كتلة عندي والله
ماكو طلع خمسة وعشرين وكال تحتاجين بعد؟ كتلة لا لا اصلا زايدة كال ميخالف خليت الفلوس بالجزلان
واخذت مبايلي والشاحنة ونزلت وباسل نزل قبلي لكيت بابا واكف بالكراج سلمت علئ عمو وعمة
وصعدت وية بابا وشغل السيارة ومشة ودرت وجهي ابتسمت لباسل رفع حاجبة وابتسم الي يمة تعودت
عليه ولاعبالك هوة يوم واحد درت وجهي علئ بابا وكتلة واني الزم ايدة وابوسها يمة شكد مشتاقتلك اني
شكد ضحك وجر ايدي باسها وكال ياحيل ابوج انتِ حليانة بابا مرتاحة مو هزيت راسي وكتلة الحمدالله
وتدري عمو وعمة شكد لطيفين ويحبوني ومدلليني دلال والله وهذاك اليوم عمة عزيز اجة من الدوام
جايبلي جرك بالحلقوم سمعني الصيح اكول لعمة صارلي هواية مماكلته ابتسم بابا وكال عزيز بعد وين
اكو منه اي وباسل؟ ابتسمت بخجل كتلة هم نفسهم هز راسة وكال الحمدالله اهم شي راحتج بابا بالطريق
نزل للمحل وكال تنزلين وياية تشترين لأخواتج والج تحمست كتلة اي انزل نزلت لزم ايدي ويمشي دخلنا
للمحل اخذنا حلويات واخذت للبنات الاشياء الي يحبنهم ولو هوة بابا حتئ يعرف اكثر مني كالساع
جايب حاجة وكايل هاية مريم تحبها هاي سارة اخر شي جاب ككو بعلبة يصير دوائر كال هذا امج تحبه
ابتسمت وكملنا دفع الحساب وطلعنا وبعدين هم بالطريث نزل جاب معجنات ويمهم اكو واحد يبيع
عصائر طبيبعة هم جاب برتقال وبطيخ صعد وبدا يسوق ونسولف ونضحك يمة شكد مشتاقة اكعد
اسولف وياه هيج وصلنا للبيت وكال ترا مايدرون بية رحت اجيبج سويتها مفاجاة ابتسمت وكتلة تمام شلت
الغراض وهوة شال المعجنات ودخلنا ونسمع صوتهم بالاستقبال سارة تصيح السبع يطلع دم السبع يطلع دم
دخلنا ومحمد كاعد فوك حسين ويخنك بيه وامي تصيح عليهم ومريم وعلاوي يكرسون حب ويباوعون
عليهم دخل بابا وكال عفية بوية عفية ودخلت وراه وصاحت سارة ريحااانةواجتي تركض شبكتني واني
شبكتها وتبوس بية ونوب سلمت عليهم واحد واحد وماما شبكتها حيل يمة شكد مشتاقة الها نوب حليانة
بعد روحي وبطنها كبرانة مبينة يعني ماما صاحت لسارة جيبلها مي سارة كالت ختولي شنو هية خطار
مثلا ضحك بابا وكلها ماتصيرلج جارة بعدين كالوا لبابا شلون جبتها ومدري شنو سولفنا الهم وهاي وبعدين
نزعت العباية وكمت افتر بالبيت وبعدين صعدنا فوك اني والبنات دخلت لغرفتي نفس ماعفتها شمرت روحي
علئ الجرباية الله شكد اشتاقيت الها كمت طلعت من الغرفة صادفتني سارة تشرب عصير برتقال شربتني
وكالت صايرة حلوة ولج هيج فراكنا محليج ابتسمت ولزمتني من ايدي ونزلنا جوة تجمعنا كلنا بالاستقبال
وكعدنا ناكل حلويات ونسولف وبعدين طلعنا فلم وكالساع اذكر باسل اشتاقيتله طلعت مبايلي اخذت
صورة واني مخلية ايدي علئ خدي واباوع للفلم ودزيتها وكتبت اشتاقيتلك وغلقت المبايل ورجعنا
نباوع وحتئ بابا ويانة وماانحس الة البطل شبك البطلة وصارت بيناتهم نضرات محمد كح ومريم كالت
تردون مي كايمة اجيب وسارة كلتلها كايمة وياج اساعدج متتتت واني ضليت خانسة بمكاني ماما مدري
شهمست لبابا وهوة ضحك وهز راسة حسين طفة الفلم وكال خلصت كروتكم يلا كل واحد لفراشة
ادبسزية ماعدا ابوي وامي ضحكنا وكمنا صعدنا فوك اني والبنات ونمنا تلاثتنا علئ جرباية مريم وتغطينا
سوية وضلينا نسولف ونضحك واني اسولف الهم مواقفي وية باسل وهاي وهنة متونسات .
جوري
واكفة انزع بالتراجي اذن اذاني وحضني طالب من ورة وكال شتسوي جوريتي ابتسمت وكتلة دانزع بالتراجي
دارني عليه وكال شو بوية وخري ايدج خلي اني انزعهم مد ايدة دينزعني وكال شني هاي بوية شلون
تلبسنهم ادري متوازيات خوما متوازيات ضحكت وبعد عناء نزعني الترجية والثانية اني نازعتها قبل لايجي
حاوطني من خصري وكال حليانة بوية حليانة واني كلبي رهيف مايتحمل ضحكت شبكني وكال احبج بوية
كتلة بهدوء اموت عليك، باسني بخدي وهمس واني اموت علئ اليموتون علية ابتسمت بخجل كعد علئ
القنفة وسحبني لحضنة وهيج عنده استعداد يصفن بوجهي ساعات ومايمل متمددة بحضنة ويمسد علئ
شعري وصافن بوجهي باسني وكال الله لايحرمني منج بوية، شبكته وكلت ولامنك يروحي كال جبتلج ككو من
هذا الي تحبينة مد ايدة للطبلة سحب علاكة طلع منها علبة ككو ابتسمت من زمان يدري بية احبها فتح العلبة
وطلع ككو وكلني وكال بوية انة اول مرة اشوف حلو ياكل حلو ضحكت وكتلة ها ترا جاي تكبر براسي من
تكول هيج ضحك وكال كلام حق بوية وضلينا نسولف وكعدتنا متخلة من غزله وحبه يمة شكد احـبه لحد ما غفيت بحضنة .
سارة
الدنيا ليل واني واكفة يم الشباك اباوع للبيت الي كبالنا ومبتسمة سمعت بابا اليوم يكول لمحمد البيت الي
كبالنا لكيته لامير لين صار فترة موصيني علئ بيت استغفرالله من الصبح اني لازمة الشباك شديصير يالله
واذا اجو اهنا عاشوا عادي وشنو يعني اصلا اني تحمست لين بابا كال عنده اثنين اخوات كلت اصير
صديقتهم وكذا لايروح بالكم بعيد باوعت ريحانة منتجية علئ تاج الجرباية وتحجي وية باسل ومريم
تحجي وية احمد واني بنية مسلمة سنكل محترمة معرفش غير حب ماما وحب بابا .
يتبع ...
- يتبع الفصل التالي اضغط على (يأس القلوب) اسم الرواية