رواية يأس القلوب الفصل الحادي و الثلاثون 31 - بقلم رودة
part 31
تعاندني
عليمن .. هوّ وكت عناد ؟
مو گلنه گضت
كلمن أخذ حِله
العندك إخذه إلك
وأتباهه بي عالناس
والعندي جرح
بحرورته أتسله.
ريحـانة
تقربت بسته بخده وطاحت دمعتي بساع مسحتها ووخرت رحت للحمام غسلت وطلعت فتحت الكنتور
وطلعت بنطرون جينـز وقمـيص مشجر وشيلة سادة بدلت وكفت كدام المراية اخلي مكـياج لين وجهي
مبين كـلش تعـبان فخفيت الأثر كملت لفيت الشيلة ورشيـت عطر اخذت الابكوت مالتي من التعلاكة
واخذت الجنطـة وفـزيت علئ صـوته وهوة يكـول وين؟ بدون مااباوعله واني كاعدة البس الكعب كتلة
بهدوء للجـامعة عمو يوصـلني شمـر اللحـاف وكال بعـصبية انـتظري اني اوصلج تنهدت باوعتله كام فتح
الكنتور طلع تراك رياضي واخذه ودخل للحمام واني اخذت الجنطة ونزلت شفت عمو وعمة يتريكون
صبحت عليهم وكعدت علئ صفحة كالت عمتي ماما تعالي اكلي وية عمج؟ كتلها لاعمة مااشتهي الف عافية
عمو كال تعالي بابا ماكو ماتشتهين وراج دوام شوتعالي اكعدي يمي باوعتلة وعيوني مدمعة هز راسة
وكال اكسر راسة اليزعلج شوتعالي ابتسمت كعدت يمة باسني من راسي وكال اكلي بوية اكلي اخذت صمونة
وبديت اكل وياهم شوية ونزل باسل والله يالله شدعوة هلكد طالع حلو لابس تراكسود نيلي وعطره
يمشي قبله صبح علئ عمو وعمة وكعد داكل بس رفعت راسي خزرني اللكمة وكفت ببلعومي غصيت
شربت مي ورجعت اكل هذا شماله خرب حظي كملت يساع كمت غسلت اباوع الساعة بـ7 ونص كتلة بهدوء
شوكت توصلني عندي محاظرة عملي اول محاظرة ومايصير اتاخر ماجاوبني يشرب جاي ويكلب بالمبايل
كلش ضجت من ماجاوبني كتلة بضوجة توصلني لو لا اذا ماتوصلني كول علمود اروح وية عمو ماباقية عليك
كال صوتج لاتعلينة لا اكوملج ترا بالكوة متحملج هوة كال هيـج واني دموعي نزلت عشرة عشرة باوعلي
استغفر الله واخذ السويج وطلع واني انهضمت كلش من كال بالكوة متحملج اغسل بوجهي واشهك بالكوة
هدأت روحي شربت مي اباوع وجهي صار احمر من البجي استغفرالله يالله اخذت الجنطة وطلعت لكيته
مشغل السيارة فتحت الباب الورة وصعدت ماصعدت بالصدر هوة هم ماحجة الظاهر الاستاذ مرتاح طول
الطريق مبايله كالساع داك وشغل ومادري شنو شوية ووصلنا للجامعة بدون تفاهم اخذت الجنطة ونزلت
وسديت الباب كل قوتي داحرك بدمه مثل محرك دمي دخلت للجامعة لبست الابكوت بساع وتوجهت للقاعة
لكيت الباب مسدود دكيته وكلت ادخل استاذ كال ليش متاخرة ؟ ماحجيت صاح بابا موداحجيي وياج
ليش متاخرة موكلت الي يتاخر مايدخل يعني شكلة هسة مثلا اكلة باسل طنكر علية وماكام بساع كتلة
ازدحامات استاذ نتر وكال ادخلي وهاي اخر مرة اسمح الج تتأخرين دخلت وعيوني مغوركة بالدموع شلون
صيح علية كدام الطلاب كعدت وبدأ يشرح لحذ ماخلصت المحاظرة طلعت امشي وروحي طالعة
تذكرت البارحة شنو صار وتنهدت نمت البارحة والخوف مزروع بداخلي صحيح اني غلطانة لين
ماحجيت بس ماتوقعت هيج تكون ردة فعله وهوة زعل وضاج مني واني ضجت منة وشلون راح تصفئ
ماادري ودخلت بعدين للمحاظرات الباقية لحد ماخلص الدوام ودائما افتر بحدي وامشي بحدي ماعندي
صديقات هية وردة وسوت بية خـوفة ....طلعت بالكراج لكيته واكف منتجي علئ السيارة ومجتف اديه
شافني صعد بالسيارة واني تقدمت صعدت ورة وسديت الباب وبدا يسوق وماحجة ولا كلمة خليت
الجنطة علئ الكشن وبدا يسوق واني صافنة علئ الجامة وميتة تعب وجهي صار اصفر ومنا الدنيا حارة
وصلنا للبيت اخذت الجنطة ونزلت امشي اول مادخلت خليت الجنطة علئ الميز نزعت الشيلة وفتحت المي
البارد وضليت اغسل بوجهي بمي بارد الله لحد ماتنكعت تنكع وهوة دخل شافني صفن وراح للأستقبال
دخلت عمتي للمطبخ شافتني ضحكت كالت ها يمة انطبختي من الحر كتلهة واني انشف بوجهي كلش عمة
كلش تقدمت بوستها واخذت الجنطة والشيلة وصعدت فوك دخلت سحبت دشداشة تصير جوة الركبة اخذتها
ودخلت للحمام سبحت ولبستها طلعت انشف بشعري شفت البنطرون مالتي صاير نصين ومشمور بالكاع
شهكت وركضت علية عزا كلشي ولا بنطروني اجيت ابجيي نوب اكثر بنطرون احبه اخذت البنطرون ونزلت
جوة وشعري نازل منكع مي بعده ونزلت هدادة ولازمة البنطرون بيدي دخلت للأستقبال وكتلة وعيوني مدمعة
ليش هيج مسوي بالبنطرون مالتي؟ ماجاوبني ملتهي يتشغل بالحاسبة كتلة احجي وياك ليش هيج مسوي
بالبنطرون مالتي رفع راسة وكال وهوة يدخن ماعجبني ومرة ثانية ماتلبسين هيج كتلة بعصبية
ودكيت رجلي بالكاع موبكيفك وطلعت من الاستقبال صعدت للغرفة وبس ادردم حركك كلبييي نوب ثاني
مرة البسه مااحس الة دخل وراي للغرفة وكال موبكيف منو؟ بلعت ريكي وكتلة موبكيفك تقرب ولزمني من
وجهي وكال لسانج طولان لاتخليني اكصه الج احترمي احسن الج نترت ايده بضوجة لزمني من
ركبتيي وكال بعصبية راسج اكسره اذا عدتيهااا بجيت وكتلة وخررر منييي خنكتني شبيك وياي شبيك كال
وهوة يحذرني باصبعه واصلة ترا لحد هنا وبالكوة ساكت وحق محمد لا تخليني الزمج والعب بيج طوبة
سالفة البارحة ماناسيها الج يعني مثلا تردين اكعد اصفك الج لو شنو؟ وخرت منه وكتلة بهدوء كلشي
مااريد منك بس وخر من يمي ولاتتقرب يمي كال بعصبية اساسا بعد مااجي يمج لين تصرفاتج صايرة
متناقضة لابعد حدود ومادري شلونها من توعين وتحسين علئ نفـسج بهذاك الوكت عود اتحاسب وياج
غوركت عيوني وكتلة شنو تقصد توعين علئ نفسج دتحسسني اني مخبلة؟ لو شنو كال بهدوء شلون
ماتفهميها افهميها وعافني وطلع شمرت الخاولي وكلت بعصبية انيي صوجي احجي وياك ،وفوكاها هوة
الزعلان والضايج ويصيح علية نوب وكالعادة ابجي واعزل بالغرفة وادردم ابو راس العصبي المكبسل كملت
الغرفة ونزلت جوة دخلت للمطبخ عمة مسوية دولمة اليوم فتحت الثلاجة طلعت طماطة وفلفل اخضر
وخيار وخس سويت زلاطة ورشيت عليها ملح وليمون وطلعت لبن ورتبت السفرة بالاستقبال وعمتي كلبت
الدولمة بالصينية واخذتها خليتها بنص السفرة وهوة بعدة كاعد يشتغل بالحاسبة ولااهتميت اله ولاعبرته
كعدنا وبدينا ناكل وجوعانة كلش التهيت اكل رفعت راسي لمحته يباوعلي شافني انتبهت دار وجهة باوعت
علية بتك عين همزين ماشافني جان سحلني بنص السفرة كملنا شلت السفرة ودخلت للمطبخ نضفته
وسويت الجاي حضرت الصينية وصبيت الجاي واخذته للأستقبال قدمته وكعدت اشرب وياهم وكالت
عمتي باجر الخطبة مال ايمن ابن اخوية ترحين وياية يمة؟ داحجي وكال باسل متروح باوعت عليه وكتلها لا
عمة مالي خلك وعندي امتحانات وباوعت عليه وكلت ان شاء الله علئ الحنة اروح خزرني درت وجهي شوية
وكمت صعدت فوك بالغرفة تمددت علئ الجرباية وكبل غفيت من التعب ورة كم ساعة فزيت الدنيا مغرب
كمت من الفراش رحت غسلت وتوضيت وصليت البيت هدوء اخذت مبايلي ونزلت شفت باسل بعدة
كاعد يشتغل علئ الحاسبة استغربت لاعمة ولاعمو بلعت ريكي وكتلة وينهم شو محد موجود؟ كال ابوي رجع للمركز عنده خفر وامي عند بيت جدي تبات
هزيت راسي وطلعت من الاستقبال البيت موحلو بدونها جنت اخلص وقتي وياهة وهسة ويامن اذا اكعد
يم باسل اخلصها عرك رجعت للأستقبال كتلة تريد عشة؟ هز راسة بمعنئ لا عصبت موصوجك صوجي
اني اسئلك رحت للمطبخ فتحت الثلاجة طلعت تفاحة ورحت كعدت بالاستقبال يمه مجبورة لين البيت فارغ
واخاف كعدت علئ القنفة اكل واكلب بالمبايل فززني صوته وهوة يكول جيبي المبايل بلا استغربت كتلة
شتسوي بيه ؟كال جيبي ضجت شنو يقصد كمت وانطيته المبايل وكتلة يعني متثق بية مو جيد ! عبالك
احجي وية حيدر مو هوة موصوجك صوجي اني باقية يمك ومتحملتك مااحس الة كام ولزمني من
فكي وكال بعصبية وعيونة حمر اسمه ماتكولينة بالسانج بلعت ريكي بخوف نترني وكال جيبي اخذه
مدري شسوة خمس دقايق وانطاني ياه كال موكلشي ودخلتي الثقة بالموضوع مجرد امنت الج المبايل علمود
محد يكدر من خلال رقمج يوصل للبرامج ،وجيد بوية لهل درجة اني ثكيل عليج وموكادرة تتحمليني
اخذيييي المبايل وروحي من يمي مااريد اشوف وجهج اخذت المبايل وطلعت من الاستقبال وكلت بقهر
وتالي وية جفصاتي اجيت اكحلها عميتها باوعت عليه يمسح بكصته ضوجته سودة بس هوة شلون يكلي
مااريد اشوف وجهج وانقهرت بالزايد خليت ورجعت وكتلة يلا موماتريد تشوف وجهي كوم وديني لبيت
اهلي دابقئ يمهم همة يتحملوني وانتَ شوف منو يتحملك ويتحمل هاي سوالفك رفع راسة خلة الابتوب
بعصبية علئ التخم وكاملي واني طكيتها بركضة صعدت علئ الدرج وهوة يكول بعصبية اوكفيي يمة
حسيت كلبي راح يوكف دخلت للغرفة وسديت الباب دكه بعصبية وكال افتحي الباب خلي اعلمج شلون
تتحمليني افتحييي يمة منتجية علئ الباب وكتلة بخوف روح ماافتح الباب عوفني دك الباب وكال
افتحي راح اكسره شفته دكه حيل كلت حيكسره فتحته علئ كيفي ورجعت ليورة وهوة دخل شافني
ضل ساكت خصل من شعري نازلة علئ وجهي واجر نفس بساع مسح كصته وكال انتِ وين تردين
توصلين؟ ليش تخبليني وتخليني اصير عصبي؟ بلعت ريكي وكتلة اني ممسويتلك شي انتَ مدري شبيك
عصبي وبس تصيح ومن البارحة لعبت بية طوبة وحسرة علية اسوي اي شغلة كبل تصيح علية وسكتت
وكتلة بقهر وهاي صار تقريبا 14 يوم مدري شكد من احنا متزوجيين وهية دتسوي بية بعد كم يوة شتسوي؟
واعترف اني غلطانة من ضميت عليك وكلت لعمو بس جنت خايفة كلش وهاية ردة فعلك هية الي ماتخليني
اكلك لين ماخليتني احس بالامان واني الجنت دائما احس بالامان وياك ليش هيج اخذت الموضوع بصعوبة
كليي تقرب بعصبية وكال تعرفين شنو يعنيي اغاررر تعرفيين شنو يعنييي دمي محترك مجرد مااذكر
هيييج يكلج ويلحكج اريد الزمههه واطلع روحة انتِ مالتي وهمس ريحانة باسل انتِ محد يتقرب الج هوة
يحجي واني يمة كلبي حسيته راح يطلع من مكانه عزا يغار علية ورجع كال بس عادي اذا تحسيني ثكيل
عليج ومتكدرين تتحمليني وعصبي ومتناقض ابتعد عنج لين كلشي ولا اذيج كتلة اني موقصدي كال لا
قصدج لاتكعدين تبررين كتلة مااحب ابرر اني اريدك تفهمني بدون تبرير رفع حاجبه وكال لعد شوفي منو
يفهمج ويتحملج وطلع من الغرفة ضربت الباب بعصبية موصوجك صوجيي انيي نووب يكليي يفهمج
ويتحملج شيقصد انييي محد يتحملني وماانطاق سمعت باب البيت انسد نزلت وكض عزا عافني وطلع
اخاف بحدي بالبيت يمة ركضت سديت باب المطبخ ودخلت للأستقبال هدوء والبيت بس اني بي فد خفت
شلون عافني عفية خلي يرجع والله اعتذر منه واعترف بغلطي بس لا يعوفني بحدي اموت من الخوف
عندي فوبيا كلش قوية من انو ابقى لوحدي صعدت لغرفتي سديت الباب وكمزت من
صوته خليت ايدي علئ كلبي بخوف يمة اخذت مبايلي ودكيت عليه ميرد يطلعلي يجري مكالمة الان
دكيت هواية ومايرد طاحت دمعتي مسحتها بساع لا ماابجي ماابجي لين اذا بجيت اخاف بالزايد بس وين
بس سمعت صوت طب ضليت ابجي وارجف رجعت دكيت علي وشهكت وكلتتت هسة غير يرددد ملتهييي
يخابر بصاحباته هاية مكالماته الما تخلص ابو البنات وشهكت ابو الجكاير هسة غير يرد ماكو سديت باب
غرفتي واباوع الساعة بـ10 جريت اللحاف وتمددت علئ الجرباية ومتلفلفة وبس ارجف ودموعي ينزلن
وختمت القرآن من كد ماخايفة سحبت مبايلي وضليت اكلب بيه التهيت شوية راسلت سارة ومريم سولفت
وياهم شوية بس بنيت الهم انو اني بخير وكلشي ماكو لحد ماخلص المبايل شحن خليته علئ الشحن ورجعت
اصفن ببحدي وكالساع اسكت وارجع ابجي ماضلت سالفة تقهر ماتذكرتها وبجيت عليها باوعت الساعة
صارت بـ1 وشوية وتصير ونص ضليت الوب بمكانيي وين راح وين وخرت اللحاف فتحت باب الغرفة ونزلت
جوة كعدت بالمطبخ منتظرته وجهيي احمر دم وعصبية وارجف نص ساعة وانفتح الباب رفعت راسي
وعيوني حمر اباوع عليه شايل علاكة مال ادوية بيده نغزني كلبي بلعت ريكي مادرت ابين كتلة بعد وكت
ليش هسة جاي؟ ماخليتها علئ باجر؟ كال بعصبية اسكتيي لا تخليني اجرم بيج واصلة لهنا ترا كتلة واني
ارجف من العصبية منين مااجيت ارجع وعفته وصعدت للغرفة دخلت للغرفة كبل للحمام دخلت
وسديت الباب واغسل بوجهي اريد اسكت بس ابجي واشهك ماكو لحد ماهدات طلعت من الحمام شفته
متمدد علئ الجرباية وايده علئ عيونة باوعت للقنفة شامر علاكة الادوية كلبي نغزني طلعت من الغرفة افتر
بس اريد اهدأ وتروح الرجفة مني شوية وهدأت دخلت للغرفة فتحت الكنتور داخذ الغطة فززني صوته وهوة
يكول وين رايحة؟ كتلة واني اسد بباب الكنتور رايحة انام بالاستقبال كال عوفي البيدج وتعالي نامي هنا
كتلة واني اخزر بي مااجي شمر المخدة علية وكال بعصبية تعالي لا اكوم اكسر راسج ومحمد بلعت ريكي
ورجعت الغطة لمكانه ورحت يمة علئ الجرباية وحصرت روحي بالطرف وبس ادردم شوية وسكتت
حسيته كام يدنة سويت روحي نايمة تقرب وشبكني مد راسه باسني بخدي بوية انسحنت روحي صحيت
علئ روحي وكلت بكلبي اخ والله وعرفتك ليش ترديني احي يمك علمود يحلالك الجو كمت بعصبية
وكتلة شكو تشبكني اني موكتلك لا تتقرب الي عرفتك ليش تريدني يمك هوة كح وسوة روحة نايم وكال نايم
ومادري بروحي كتلة اي خطية قهرتني نايم ومتدري كال ترا ماميت عليج يلا ارجعي نامي لاتخبصيني
جريت اللحاف وغطيت راسي وضليت بس ادردم لحد ماصاح علية وسكتت ابتسمت جوة اللحاف باع باع
يريدني يمه علمود يشبكني ورجعت انقهرت من تذكرت عركاتنا وشلون عافني وطلع غوركت عيوني
وكلت لا هوة ميحبني صار 3 ايام لعب بية طوبة هوة لويحبني ميصيح علية ويبجيني تقريبا نص ساعة
حسيته كام باوعت عليه من جوة الغطة شفته شرب دوم ورجع تمدد ويمسد علئ راسه ويمسد عليه
واعصابه بارزة عرفت الضغط هابط عنده ومتأذي وخرت اللحاف وباوعت عليه رجع كام وطلع من الغرفة
وخرت اللحاف وكمت وراه امشي علئ كيفي نزل ونزلت وصلت للمطبخ شفاه طلع ليمون من الثلاجة
وطلع الملح من الكاونتر كلت بهدوء واني اتقدم واخذهن من ايدة واحجي وبالكوة لازمة روحي ماابجي
اكعد اني راح اسويلك العصير الضغط هابط عندك مو نتر وكال ارجعي نامي ميحتتج اني اسوي كتلة
مومعناها احنة متزاعلين يعني اعوفك بحدك وانتَ مريض فيعني انطيني خلي اسويلك رجاءاً لو متريد
اسويلك شي من ايدي كال وهوة رافع حاجية اي مااريد شي من ايدج هوة كال هيج واني كبل برطمت
وكتلة يعني يعني متريد مني شي كال بهدوء وهوة يدير وجهة نفس ماسمعتي ويلا ارجعي نامي نزلن
ذموعي وعفته ومشيت صعدت ودخلت للغرفة واني اشهك موصوجك صوجي انيرنمت علئ الجرباية
وتغكيت وراسي طالع من البطانية وابجي واكول صوجي اني العوبة اركض وراك ضل انتَ سوي لنفسك
شعلية بيك واحجي وابجي خمس دقايق ودخل للغرفة سكتت وغمضت عيوني فجاة حسيته همس يم اذني
فتحت عيوني باوعتله شفته متكرفس كدامي وماد كلاص العصير وكال بهدوء نكدر نعتبر هذا العصير
عربون صلح بيناتنا وننسئ الزعل وكلشي لو مانكدر؟ بجيت بالزايد وباوعت عليه بزعل وهزيت راسي بمعنئ
لا وغطيت وجهي مااحس الة اللحاف انجر وتمدد يمي وكال وهوة يبوس بخدي عادي ننسئ الزعل هسة
وباجر الصبح نرجع متزاعلين؟ هزيت راسي بمعنئ لا كبل كال هوة بكيفج ؟ شو تعالي وسحبني لحضنة
وشبكني حيل حسيته كسر ضلوتي واني ادفع بيه واكلة عوفني مااريدك وبعد مااحبك لاتتقرب يمي ورفع
راسة وكال متحبيني؟ كتلة اي مااحس الة ضل يدغدني بلحيتة يدري بية اموت من الضحك حاولت
اكتم ضحمتي ماكدرت ضحكت ودموعي تنزل بنفس الوقت شلون رهمتها مادري كتلة الله عليك عوفني رفع
راسة وكال تحبيني لو لا كتلة واني اضحك اي والله هواية بس عوفني باوعلي وابتسم كال شوفي اني
شكد احبج وماتكدر علئ زعلج وصار 3 ايام ماتحاجيني بلا اني موخطية زين كليلي منو الغلطان
كتلة وعيوني مدمعة اني كال زين منو المضلوم كتلة انت كال زين منو لازم يصالح الثاني كتلة انتَ ضحك
وكال غير انتِ الغلطانة ولازم تصالحيني هزيت راسي وكتلة حتئ لو اني الغلطانة غير لازم انتَ صالحني
موتكول اني بنيتك؟ خربط شعري وباسني بخدي وهمس بنيتي وروحي كتلة لعد ليش تزعليني وتبجيني
كال بوية غير انتِ تدوسين ببطني كرصتة وكتلة منو تدوس بالبطن ضحك وكال اخ الله موانتِ موانتِ
كرصته مرة ثانية وكتلة متريد شي من ايدي مو جر ادية وباسهن وكال العافية تجي منهم يبعد بيتي
ابتسمت وهوة صاح صبرني عليها يخو زينب صبرني ضحكت وكتلة ليش؟ كال تبتسمين واني ابتلي شبكني
حيل وكال كون هيج اضمج ومحد يشوفج بس اني شنو رايج تكعدين وبعد ماتداومين واني اكابلج واكعد 24 ساعة
وبعد لا اغار ولا اعارك كتلة لاعيني متمشيهن علية هذني سوالفك وبعدين تعالي كلي اليوم وين تاخرت
وعفتني بحدي متت من الخوف باسني وكال رحت للمستشفئ وهوسة وازدحام منا للوحدة يالة خلص
المغذي واجيت كتلة واني احضنة يمة سودة علية كال وهوة يبوس راسي اسم الله عليج كتلة من وراي صعد
الضغط وتمرضت مو باسني وكال يولي لاتكولين هيج هوة اني من اشوفج اصير زين وتردلي عافيتي مونوب
اتمرض من وراج لابوية وين ابتسمت بخجل وبادلته الحضن وكتلة عبالي رحت يم البنات كلبني وصار
فوكاي وكال وبعدين تعالي هاي سوالف البنات منين تجيبينها واني فقير وماعندي هيج سوالف وبهاية
سوالفج راح تخليني اروح اصاحب وبكيفج بعد لزمته من حنجة وكلت انتً بس فكر وشوف شسوي بيك
خزرني وكال شسوين بلعت ريكي وكتلة ابوسك من راسك ضحك بصوت عالي وباسني بخدي كتلة هسة
احنا تصالحنا باجر نرجع متزاعلين كال وهوة يمسد علئ شعري شحدج بوية هوة انتِ بس فكري تكعدين
مطنكرة وشوفي شسوي بيج ابتسمت وكتلة شتسوي كال ابوسج من راسج ضحكت وهوة ضحك والعصير
ماشربته حتئ نسيته ونسيت الزعل كله وضلينا نشاقة ونضحك يابة زعل حبايب باسني بخدي وهمس يم
اذني نشكر جهود امي المبذولة بتفريغ البيت ....
يتبع..
- يتبع الفصل التالي اضغط على (يأس القلوب) اسم الرواية