رواية يأس القلوب الفصل السابع و العشرون 27 - بقلم رودة
part 27
صدري وسكتيهم من ماي عيوني صعبة جنت اتمنئ مايكبرن ويبقن صغار بس علمود لايجي هذا اليوم بس
ماكو اعتراض هاية هية سنة الحياة بوية لو بيدي ماانطي اي وحدة من بناتي هيج بس اسطرهم واكعد
اكابلهم دخلت للغرفة وكفت كدام المراية انزع بالارباط خليته علئ الميز ونزعت السترة دخلت جوري للغرفة اباوع عليها من
المراية تفتر بدشداشته القصيرة بالبيت والبطن بارزة ابتسمت علئ شكلها انطتني البجامة والكيمونة من
الكنتور وهية مشغولة ترتب هاك حبيبي هذني انطتي ياهم سحبتها من ايدها صارت مقابيلي حضنتها من
خصرها وقربتها الي بستها بخدها وكلت يابة شني مشتاقين اليوم ماشفتج اباوع عليها ملامحها شوية
تعبانة حسيتها دايخة بس ابتسمت وفجاة اجت تطيح وضميتها لحضني بوية كلبي رجف عليها سندتها وكتلها
بخوف جوري وياي؟ تسمعيني وهية ماكو خليتها علئ الجرباية وصحت سارة كلاصص ميي اجت تركض
كالت ها بابا شافت امها صرخت كالت شبيها كتلها بعصبيةة كلاص ميي راحت وكلها تجمعت بالغرفة
جبت عطر من الميز شممته الها وفزت جبت المي بساع شربتها وكلت بقلق شبيج يابة؟ تسمعيني كالت بتعب
مابية شي بس يمكن لين مماكلة شي من الصبح كتلها بعصبيية شلون متاكليين والطفلل اي بطنج مافكرتي
بيه ماجاوبتني تعبانة استغفرت الله ومسحت كصتي بوية انهبطت عبالي بيها شي كلهة مجمعة يمها
وخايفين صحت كومييي ريحانة انتِ وسارة سون الها عشة كال حسين لا يابة اني رايح اجيب الها مشويات
محمد كلة انتظرني جاي وياك وراحوا اباوع لمريم خايفة وترجف اشرت لسارة وريحانة اخذنها وطلعن
يهدأن بيها تنهدت واباوع لجوري لازمة ايدي ومغمضة عيونها بتعب تقربت بهدوء نمت يمها وسحبتها لحضني
وكلت بتعب بوية شلون تبقين بدون اكل من الصبح صدك تحجين يعني اليوم لادوة ولا اكل موزين عليج
بوية موزين كالت بتعب مادري مااشتهي كتلها ماكو ماتشتهين بداخلج طفل حرام بوية حرام لازم تاكلي
يحتاج الج تغذية هزت راسها وخلته علئ صدري بستها وضليت امسد علئ شعرها شوية وجابت ريحانة
صينية العشة اشرت الها خلتها وباست امها وطلعت وسدت الباب كومتها علئ كيفي وهية مستندة علية
كعدت بالكاع وكعدتها يمي وصرت اني اوكلها وهية تمد ايدها تاكل واني اكلها بقلق يابة خاف متكدرين؟
خلي اني اوكلج وهية تكول شنو صغيرة وتوكلني هياتني داكل كتلها بحب اي صغيرة لون شكد مايصير
عمرج تبقين بنيتي اذا عندج مانع كليلي علمود اصرف ابتسمت بتعب وكالت ماعندي ماعندي ضحكت وكتلها
حرامات وضليت كاعد يمها لحد ماكملت وجبت الها الدوة شربته والحمدالله صحصحت اجت سارة اخذت
الصينية وكالساع جاي واحد مطمن عليها لحد ما صارت الساعة بـ12 طفـيت بعد ماكدرت من التعب
تمددت واجت شبكتني ونامت يمي وغفيت واني شابكها .
ريحـانة
بعد ما تطمنت علئ ماما والحمدالله صارت احسن تنهدت بتعب وشمرت روحي علئ الفراش فتحت
مبايلي ولكيت باسل دازلي رسالة يابة شنـي حتئ اليوم ماشفنـاج ابتسمت بتعب دك مبايلي جاوبتـه
حجينا وكتلة اليوم انتَ وينك موكتلي علئ اساس تريد تشوفني كال وين اكدر؟ كلها جاية وهوسة وزحمة
ادخل جوة وكلها نسوان كتلة ايي صحيح همزين مادخلت جاوبني يكلك لاعبة جولة بالركص كولي اي
صدك علمود اكسر راسج بلعت ريكي وكتلة لا وين شمدريك كال امي تكول هنيالك عليها واليوم خفت
تنحسد لين ركصت غمضت عيوني بفشلة وخجل كال ها شوسكتي وين لسانج الطويل ؟وشوفيني شنو
لبستي بلا اني نبهتج وكلت مااريد لا ضيك ولا قصير كتلة ها ماطكيت صور كال انتِ ماتطكين صورة؟ حرام
مااصدك 24 ساعة طك ما طك ضحكت وكتلة بخجل تمام هسة حدزلك سديت الخط وحددت 3 صور
ودزيتهم الة وارتبكت اريد اشوف ردة فعلة خمس دقايق ودك مبايلي جاوبته كبل كال بعصبية ليش هيج
مفتوح من الضهر والصدر بعد لو مخليتة كله مفتح وشدعوة هلكد قصير لو مقصرته بعد كتلة غير هوة
فستان وهيج موديله شسوي يعني كال وانتِ لكيتي بس هذا الفستان ماكو غيره كتلة افتريت كومة بالسوك
وبس هذا عجبني كال تعالي يمي وخلي اشوف منو يخليج هيج تلبسين بالمناسبات جفصت وكتلة لعد لو
تشوف فستان الحنة شتكول كال شنو حسيت علئ روحي شحجيت عزا العزاني كال تدرين بية مااحب
تلبسين كدام العالم هيج ليش تعصبيني؟ كتلة بسرعة لا والله اصلاً باع طويل ومستور وحتئ ردانات كال
بارتياح ها زين كلت بكلبي مايدري بيه مخصر وفتحة من الضهر وفتحة من الصدر وضيك كلش ابتسمت بمكر
من غير الباقيات كتلة باع ترة متطلع بساع فدوة لين اني بدلة وفستان واريد اطك صور وياك بالبدلة
وبالفستان كال بس خرب يومج شطالعة حلقومة بوية حلقومة ابتسمت وكتلة بخجل اني وين احجي باسل
وانتَ وين كال ها شنو تردين ماسمعت كلت بكلبي داخ الولد من وراي كتلة هيج هيج وضلينا نسولف وكالساع
جافصة وساحلني بالمكالمة لحد ما بدا يغفي واني مستمرة البك وهوة يكلي اي واي نوب كتلة ها عمري
نعست حتروح تنام كال بنعاس اي حروح انام ليش عندج مانع لو تردين تجين بحضني ؟يمة كال هيج واني سحت من الخجل شكول عليك ياباسل كتلة تصبح علئ
خير ضحك وكال احبج بوية همست بخجل اموت عليك وسدينا الخط ونمت والابتسامة مرسومة علئ وجهي .
في اليوم التالي
ريحانة
كعدت الصبح علئ صوت المنبه بس اليوم اداوم لين اخذت اجازة 7 ايام علمود العرس وهالسوالف كعدت
غسلت وبدلت لبست بنطرون اسود وقميص ابيض وشيلة لون بصلي وكعب نفس لون الشيلة وخليت
مكياج خفيف رشيت عطر وسمعته دك هورن اخذت الجنطة ونزلت لكيت سارة تحضر بالريوك وماما كاعدة
علئ الميز انعكست الادوار اليوم بوست ماما واطمنت عليها ولكيتها مخلية سارة تسويلي لفة جبن مثلثات
اخذتها وبوستها وطلعت فتحت باب الصدر وصعدت وكتلة صباح الخير دار علية وانصدمت عزا العزاك باسل
كال صباح الخير حبيبي وتقرب باسني بخدي ولا اراديا بسته بخدة ابتسم واني مصدومة بشكله شكد
طالع حلو لابس تراكسود رياضي اسود ومحدد لحيته والمناضر والشعر مرفوع والجكارة بشفته يمة كلبي
مايتحمل هيج حلاة قبل لا يسوق صفن بوجهي وكال شهل جمال بوية شمسوية بوجهج ماتكليلي تنهد وكال
بوية تفاصيل وجهج تعبتني يمة غير انتهيت ابتسمت بخجل وهوة مسح كصته ورجع يسوث يسوق اباوع و
مادري شلون تجرئت مديت ايدي بغيرة وكرصته من زند ايده وكتلة شدعوة هلكد طالع حلو ها ويامن جاي
تطلع ضحك ومسح مكان الكرصة وكال وين رايح جاي اوصلج للدوام فوك ماكاعد من الصبح كتلة بضوجة
شنو يعني مان علية لو متريد توصلني مد ايدة كرصني وكال ها من الصبح تردين تتعاركين كرفس
كتلة واني مبرطمة وامسح بمكان الكرصة موكتلك لاتكرصني كرصتك توجع المكبسل ضحك وهوة يسوق
مد راسة باسني بخدي وكال يلا راضيناك يحلو ابتسمت سحبت ايده لزمته جر ايدي باسها وشبكها يمة
هالحركة تسحن الروح تنهد وكال حلقومة شطالعة اليوم ابتسمت بخجل يمة شكد احبة ،كالساع اخطف
علية نضرات يمة انسحنت روحي شطالع غرت عليي شنو هيج شدعوة طالع حلو دك مبايلة جاوب يحجي
وية ولد صديقة واني انتبهت بعدني مماكلة اللفة فتحتها داكل قسمت منها وهوة كمل اتصاله مديت
ايدي داوكله كال متريك يروحي اكلي انتِ كتلة بزعل اما اكل ابتسم واكل واني رجعت اكل وصلني للجامعة
دانزل جرني من ايدي وباسني بخدودي وكال احـبج بنيتي ديـربالج علئ روحج دنكت بخجل وكتلة صـار
اخذت الجنطة ونزلت وهوة انتظرني دخلت يالة راح دخلت للجامعة واني مبتسمة يالله حتئ بشرتي صايرة
تخبل هاية كلنا ترتاح نفسيتي تصير حلوة بشرتي وكلنا تتعب تصير مدري شلونها رحت كبل للقاعة
وشوية ودخل الدكتور وبدأ يشرح المحاظرة .
سـارة
مسوين حملة علئ البيت ونمسـح ونرجع ليورا شلنا فراش الارضيات وغسلنا من غير الاثاث الي تغيـر
وبعديـن ماما جاي تصعد علئ الكرسي تنضف المروحة دخل بابا وهية جاي تصعد علئ الكرسي كلها بأستغراب
شنو جـاي تسـوين؟ كـال وهية تصعد دانضف المروحة خزرها وكال انزلي بسـاع، يعني انتِ ماتخافين علئ
روحـج البارحة مريضة وواكعة وهسة تردين تنضفين ونوب الكرسي خاف مايتحمل ويطيح بيـج انزلي كالت
مابية شي خلي اكمل الزمي الكرسي سارة واني واكفة بنصهم بابا يكلها نزلي وهية تكول لزمي الكرسي تقرب
بابا ونزلها من الكرسي يمة غير هيج من يمي الابتسامة شكت حلكي اني دومي مفضوحة بابا يحجي
وياي واني حلكي فاتحته واضحك خزرني وكال سارة شو وخري بابا مو احجي وياج كمزت كتلة ها بابا كال
يابابا وين راح بالج جيبي الدرج خلي اصعد اني اسويهم لاتنتلون كتلة صار بابا وطلعت للحديقة جبت
الدرج من المخزن ودخلت خليت الدرج وصعد بابا كال الزمي وانطيته الاسفنجة وهوة الجكارة بحلكة وينضف
بيها وماما كاعدة علئ الكرسي وتكلة ديربالك لاتنتل لا توكع من يمي قلقت ردت اشاقة وياه وهزيت الدرج
ثبته بايده ضحكت كال وهوة يشمر الاسنفجة علية الزمي عدل لا اطيح حظج كتلة ها تطيح حظي والله
بعد ماالزمه مسح وجه وكال بوية شلون راح تخليني اكتلها شو وخري من تعالي جوري انتِ الزمي وانتِ
روحي ابتسمت وكتلة بتك عين اي كول من البداية تريد ماما توكف عيني عيني كال وهوة ينزل من الدرج
شوتعاي طالعة عينج عفت الوصلة وطلعت اركض واضحك يمة واسمعه يصيح وراي ها الخوافة وين
رحتي ضحكت وصعدت فوك شفت مريم رافعة شعرها ذيل حصان ولابسة برمودة والفانيلة وكاعدة ترتب
بملابس ريحانة بالجنط لا ارادياً غوركت عيوني ماجاي اصدك بعد يوم تروح بعد منو ابجي منو يتحملني
بكدها ومنو ومنو كعدت يم مريم كالت ها كملتي كتلها واني ارتب وياهة اي كملت والمروحات بابا راح
ينضفهم اباوع عليها عيونها حمر دم عرفتها هم باجية لا ارادياً بجيت وهية من شافتني بجيت برطمت
وبجت كتلها واني اشهك هية شني شيصير لو محد تزوج وتروح ونبقئ كلنا هنا هسة ريحانة حتروح وانتِ
وراهة وشهكت وخليت ايدي علئ عيوني وكلت وابقئ بس اني محد منكم تبقئ يمي شبكتني وكالت وهية
تمسح بدموعي ياسارة حبيبتي صدك تحجين وبعدين اني بعد موهسة وحتئ لوتزوجت غير كالساع اجيج لو
اجيبج يمي ماتخلصين مني غير اختنا الصغيرة انتِ ياعيني شلون نعوفج يلا امسحي دموعج لاتجي
ريحانة وتشوفج وتنقهر مسحتهم وكتلها هاهية سكتت ضلت تضحك بية بس اني هيج غصة بداخلي الي
اختهم متزوجة حتعرف شعوري بهذي اللحظة شنو ضلينا نرتب وطبعاً ماما اجرت الها هذي الجنط الي
تصير مال مهر كامل وحدة كبيرة كلش والثانية هم كبيرة والثالثة حجمها متوسط والرابعة هم متوسط و
الخامسة اصغر والسادسة هم شوية اصغر والسابعة كلش صغيرة كملنا ترتيب المكياج وسوالف العناية
بالبشرة والجسم وكذا ورجعنا رتبنا الملابس وقسمناهم يعني مال بيت بجنطة مال طلعة جنطة وهكذا وطبعا
ريحانة مرتبة قسم منهم بس متلحك تكملهم لين عدها دوام كملنا الجنط وعلئ اساس اليوم بابا ياخذنا علمود
نرتب الاغراض فكمنا بدلنا وهاي خليت محمر خدود وتنت ولبست بنطرون وتيشيرت وحذاء رياضي ونزلت
اسحل بالجنط وصعد حسين نزل الجنط الباقية ونزلت مريم شايلة جنطة وريحانة قبل ساعة اجت من الدوام
وكاعدة تتغدة وضلت توصي بينا شلون نرتب وهاي حسين خلة الجنط بالسيارة وصعدنا وبابا صعد بدأ
يسوق ومريم كاعدة بالصدر واني ورة شوية ووصلنا استقبلونا دخلنا قدمولنا مي وعصير وبعدين صار لازم
نصعد علمود نرتب الجنط ساعدنا باسل بيهم وبابا طلع وية عمو عزيز دخلنا للغرفة صليت علئ محمد وال
محمد الغرفة تركية فخمة ولونها اسود ومرتبة كـلش ماشاءالله كلش عجبتني فتحنا الجنط وباسل طلع عمة
كالت اخذوا راحتكم حبايب انزعوا الشالات نزعنا الشالات وبدينا نرتب علكت ملابس الطـلعة الي صارن
بكنتور واحد لين ست ريحانة اهم شي عدها ملابس الدوام وبعدين رتبنا ملابس البيت عبارة عن تراكسواد
ودشداشات قصيرة وهالسوالف ومريم ترتب بباقي الاشياء ونرتب ونسولف ونضحك وية عمة فدوة لكلبها
شكد محبوبة الله يحفظها ،بعد 3 ساعات كملنا كلـشي واجة باسل جايب عشة وكعدنا وية عمة تعشينا
وبعدين باسل كعد ويانة وضـلينا نسـولف ونضحك عيني عيني وية نسيبنا هسة اول ماانرجع اكل لريحانة
واكعد اتغزل بيه واضوجها واخليها تغار موبيدي اتونس من احرك دمها وورة ساعة رجعنا باسل للبيت
ولكينا ست ريحانة تنتضرنا بالحديقة .
ريحانة
دخلوا البنات وبداو يسولفولي علئ الترتيبات وكذا واني مبتسمة ودلوني علئ مكان الاشياء وبعدين سارة
حضنتني وسكتت ومريم اشرتلي بمعنئ جانت تبجي ودخلت بقت المرجوحة تفتر بينا وهية شابكتني
وساكتة كتلها ها يحلوة شوسكتي شنو ضايجة كالت ها لا مابية شي كتلها لا متمشي علية كولي شبيـج
رفعت راسها اباوع عيونها حمر وكالت هيج بس ضايجة لين راح ترحين متعودة عليج شبكتها وكلت
وشنو وذا راح اروح قابل انساج مثلا غير كالساعة اجيكم لو تجوني والله اني شكد مقهورة وساكتة بس
شسوي سارة هاية هية سنة الحياة ابتسمت وكالت شسمة تذكرت شي كتلها باستغراب شنو كالت اليوم
سولفنا وية باسل وضحكنا خرب يومه شكد حلو ضربتهة بخفة علئ ضهرها وكلت بغيرة نجبي سارة
ضحكت وكالت نوب من يضحك هيج فد حلو كتلها سارة والله راح ابجي لاتحجين هيج ضحكت وكال بس
شنو لايكين تخبلون ماشاء الله يمة متحمسة اشوف شكلكم شنو تطلعون عكب باجر ابتسمت بخجـل
وضلينا نسولف وبعدي دخلنا جوة واجتمعت العائلة وبابا شابكني وماما من الجهة الثانية يمي ولازمة ايدي
ونسولف ونضحك وبـابـا سودة علية كلش ملتهي
بالشغل هلايام اخذ اجازة علمود يرتاح وماما مداريته وكالساع مسويتلة شي مدللته دلال يمة فديتهم
يخبـلون وهيج كضـيت اخر يومين يم اهلي عبارة عن ضحك وسوالف بس ماما متخليني اسهر لوقت متاخر
تكول بشرتج تتعب وكالساع مسويتلي شي لو دازة الي شي واني فرحانة بدلال ماما مع العلم كلنا هيج مدللتنا
وتدارينا وماخلينها تشتغل وتتعب ابد بس هية تقبل فسوت شغلات خفيفة لحـد مااجـة يوم الحنـة ...
يتـبع ...
- يتبع الفصل التالي اضغط على (يأس القلوب) اسم الرواية