رواية يأس القلوب الفصل الرابع و العشرون 24 - بقلم رودة
part 24
من گتلي تبعِد قررت
شكيت بية ، شقصرت ؟
وكون الله ليشوفك وجع
واحد يشُك بنفسة ،
ريحانة
كلت بفرحة يحبني والله يحبني وهنة مصدومات ويباوعن بوجهي عبالهن تخبلت والحقيقة اي صدك
تخبلت كلبي يدك علئ السريع راح يوكف الخفقان شكل عندي تقربت سارة شافت مبايلي سحبته شافت
المحادثة هزت ركبة وصاحت يحبها والحسين شبكتني وثنينا نضحك ومريم هزت ايدها وكالت مخبلات والله
مخبلات اثكلن عيني الثكل حلو سارة كالت عبالك اني المعترف الي عزا فد فرحت جيبولي واحد ضحكنا
لزمت المبايل وجهي احسه راح يطك من الخجل هسة شجاوب عليه شنو اكلة مريم سحبت سارة من الغرفة
وطلعن وكالت يولي اخذتي راحتج بالحجي وياه عود بعدين نحجي لاتفوتين هيج لحظات حلوة وسحبت
سارة الي بالكوة قبلت تطلع بدلت بساع ولزمت مبايلي وتمددت علئ الجرباية ويمكن الشعر حفظته من كد
مقريته كتبت كلام ردت ادزه ومسحته بساع اريد احجيه بوجهة موهسة موهسة غفيت والابتسامة
مرسومة علئ وجهي فزيت مدري ورة شكد علئ صوت مبايلي يدك مديت ايدي جريته بنعاس فتحت
خط بدون مااباوع للأسم خليته علئ اذاني واجاني صوته وهوة يكول صباح الخير يحـلو ابتسمت واني
مغمضة كتلة صبـاح النور وكمت اباوع للساعة بعدهي بـ6 ونص كال بـدلي هسـة راح تجيج بـ7 وربع اريد
نتريك اليوم سوية وبعدين اوصلج للدوام ؟ ابتسمت وكتلة تمام كايمة وسدينا الخط رحت بساع غسلت
وفتحت الكنتور طلعت بنطرون اسود بوي فريند وياه قميص اصفر وبيه كتابة انكليزية والحذاء الرياضي
اكرمكم الله والشيلة والمكياج كملت وكلش حبيت شكـلي رشيت عطر باوعت الساعة بـ7 و10 دقايق دك
مبايلي جـاوبته كال قبل موعدنا بـخمس دقايق انتـظرج لو كملتي كتلة بخجـل لا هـياتني نازلة كملت
كال تمام انتظرج اخذت الجنطة ونزلت بسـاع محد كاعد كلها اليوم اجازتهم فتحت باب المطبخ وطلعت
سديته وراي وصلت لباب الكراج فتحته وطلعت شفت السيارة واكفة تقدمت فتحت باب الصدر وصعدت كتلة
بابتسامة صباح الخير نزع المناضر وكال وهوة يسوق صباح النور دار علية وابتسم وكال شطـالعة ؟ ابتسمت
بخجـل ودرت علئ الجامة وهوة ضحـك يسوق واذكر البارحة ويرجع وجهي يصير احمر دم من الخجل وصلنا
لمطعم بـشارع فلسطـين، دنتريك نزل ونزلت وياه دخلنا للمطعم وطلب الريوك واني كاعدة كبالها خلة
المبايل علئ الميز وكال نحجـي؟ بلعـت ريكي وهزيت راسي مد ايدة لزم ايدي ابتسمت بخجـل وكال وهوة
يحجـي بجدية، ممكن اكون اذيـتج وجـرحتج وبجـيتي هـواي بسببي وتـجاهلتج وقسـيت وياج،وكرهتـج
بكلشي بس مسح كصته وكال بس احـبج وضغط علئ ايدي باوعتلة وعيوني مغوركة رجع كال اني مااجبرج
علية والله واذا جنتي ماتبادليني الشعور عادي الج كل الوقت واذا جنتي مقررة تنهين كلشي واني صدمتج
بكـلامي فأعتبري روحي كلشي ماكلت ونطلع منا وناسين كلشي لين اساساً مااكدر اجبرج علئ شي انتِ
ماتردينة وانتِ حرة بقراراتج وتصرفاتج وكلشي لين هاية حـياتج ! ماكدرت اكتم كل هذا الحب بداخلي
تجاهج فأعترفت الج لين يوم عن يوم جاي يزيد ماينقص، اني اشـرب جكـاير وعصـبي واشـلع الكلب
واستفزازي ومن اعصب مااشوف شي كدامي وكل الصفـات القـاسية بـية تتقـبليني وتحبـيني بكل حالاتي؟
ترضين بيـة؟ يحجي واني مركزة وياه بكل حرف يكولـه سكت ورجع كال سكـوتج يهـد حيلي بـوية،
ابتسمت وعيوني مدمعة وكتلة بجيتني هواية وقهرتني وزعلتني بـس بتصرف واحد حلو منك جنت
انسئ كـلشي عصرت عيوني ماردت الدمعة تنزل وكتـلة اني عانـيت هوايـة ومن دخلت انتَ لحياتي
بالبداية حسيت انو راح اتاذة اكثر بس طلع العكس رغم كلشي رغم عصبيتك الزايدة بش اني جنت
اشوفك احن عصبي بالدنيا كلها،الاهتمام الي جنت احس بنقص بيه انتَ حسستني بيه مجرد مااعصب
منك واضوج اذكر اللحظات الحلوة الي تصير صدف بيناتنا لا ارادياً ابتسم اني تقبـلتك وسكت وبلعت ريكي
وكلت وحبيـتك بكل حالاتك وضغطت علئ ايدة ودموعي نزلت وكلت تتقـبل وحدة جانت تتـعالج عند
دكتور نفـسي بسبب حالتها النفسية؟ تتقبل وحدة تبجي وتنهار من ادنئ شغلة؟ تتقبل وحدة مريـضة
مهوسة تعاني من فرط الانتباه بس تحـبك ! انمدت ايدة مسحت دموعي ورفع ايدي باسها وكال موبـس
اتقبـلها اخـليها هـيج بكـلبي واقفـل عليـها ضحكت ومسحت دموعي وهوة مبتسم وكال احـبج بويـة حيـل
احبج كتلة بخجل اني هم كال دكوليها لاتشلعين كلبي انتِ شنـو كتلـة احـبك كلت
هيج وهوة مسح كصتـه وتنهد وهمس هديتي حيلي وسحب نفس وكال واني احبـج حييـل ابتسمت بخجـل وكالساعة ادنك لو ادور بوجهـي
استحيت اباوع بوجهة كلش استحيت يالله تريكنا وجانت كعدتنا عبارة عن هدوء وابتسامات طلعنا ركبنا
بالسيارة انتجيت علئ الكشن واباوع عليها وهوة يسوق وشلون الابتسامة مرسومة علئ وجها ووجهي
وهوة كالساعة يخطف يباوع علية ويبتسم الي لو يجر ايدي يبوسها اخر شي كال احس الفرحة
ماسايعتني شني هية كل احبك هيج حلوة لو بس منج هيج تهد الحـيل درت وجهي علئ الجامة وحسيت
روحي راح اطك من الخـجل معقولة هذا نفسة باسل العصبي الي كل يومية نتعارك اني وياه؟ ضحك علئ
شكلي وكال يايابة يطگ بستان جوري بـ خدها من تخجل يمة سحت بمكاني كتلة بترجي باسل فدوة
اسكت والله استحي ضحك وبكل ثول كتلة شوف يعني هسة اني كتلك احبك كال باستماع اي؟ كتلة يعني
هسة عود اني صرت حبيبتك؟ ضحك وكال لعد انتِ من زمان حبيبتي كتلة بخجل باسل ضحك وكال اي
كملي كتلة واني اطكطك بأصابعي يعني بعـد كلة تكلي حبيبتي وروحي وعمري وهالسوالف؟ ضحك بصوت
عالي وكال ماعندي مانع تردين اصيحلج كرفس؟ لو ام الاغرائات لو حبيبتي عضيت شفتي بخجل وكتلة لا
الله عليك جاوبني وكف السيارة ودار علية قرب وجهي يم وجهة وكال بس كليلي شنو هاي الفـطارة
الشـايلتها نوب بوية اني كلبي رهيف مايتحمل هـيج اي حبيبي كملي؟ يمة حسيت روحي صخنت وبكل ثول
كتلة شبيك باسل مواكلك لا تحجي هيج والله اسيح مدري اذوب كدام هيج حجي كلت هيج وانتبهت
شحجيت ياكاع انشكي وبلعيني علئ هاي الجفصة ضحك وقرب وجهة .
باسل
ضحكـت علئ كلامها بوية هيـج راح تسودني بحركاتها كلبي وية كل ضحكة من عدها يريد يطلع بس القفص
الصدري لازمة وساتر علينا قربت وجهي سم وجها متقصد وكتلها بمكـر كـلب باسل انتِ اباوع عليها
صفنت ومارمشت بستها بخدها وهمست يم اذنها شوفي فائدة السيارة المضللة تخليني ابوسج براحتي
وبعدهي ساكتة ضحكت وكتلها حبيبتي صار خمس دقايق واكفين كدام باب الجامعة راحت عليج
المحاظرة وهية فزت ابتسمت واني اشوفها صارت حمرة دم من الخجل بدون كلام اخذت الجنطة ونزلت
شفتها دخلت حركت السيارة والمزاج اليوم ماكو منه اذكر شلون تكول ااحبك وهيج كلبي يضل يرجف عليها
شنيي بوية هية كل احبك هيج حلوة وبعد كل هذا الكتمان اعترفت الها مااكدرت اكتم اكثر حبها كاليوم
جاي يزيد وماينقص !حبيتها وتقبلتها بكل حالاتها مثل ماهية حبتني وتقبلتني كلامها زادني فرح تحجي وي
كل حرف كلبي يريد يطلع من مكانه باسل الي وياهة موباسل الي اعرفه ينكلب غير واحد يخاف يحجي
كلمة ويأذيها يخاف عليها من كلشي بدي هيج بس اخليها واكعد اباوع عليها مااريد شي ثانـي شوفتها
تكفي وتوفي من اليوم راح تبدي وياي بداية جديدة راح يكون اكثر شي اطمح انو احققه هوة اسعادها
والباقي كلة عادي هية الاهم اريد اعوضها عن كلشي خسرته ومااخلي دمعة تنزل من عيونها الاحبهم سعادتها
حاليا اكثر شي يهمني وصلت للمركز واشتغل وبالي يمها اجة ابـوي للمركز وكعدت يمه حجينا شوي وكتلة
اريد نحاجي عمي عزيز بخصوص موعد العرس اريده قبل رمضان ابتسم ابوي وكال تدلل بـوية نحاجي ليش
لا ؟ ان شاء الله اليوم نمر عليهم بليل ونكلهم يبدأون يحضرون والي تريده يجرالك بست ابوي من راسه وكتله ماتقصر يالغالي .
طـالب
فزيـت الصبح اليوم ماعندي دوام بالمركز ابتسمت علئ منضر جوري نايـمة عـلئ ايدي بـستها بخدها وضليت
امسد علئ شعـرها باوعت لبـطنها بدت تكـبر ومنضرها هية وبطنها يرد الروح ، كمت وغطيتها دخلت سبحت
ولبست البجامة والكـيمونة مشطت شعري رشيت عطر طلعت من الغرفة شميت ريحة الجاي المهيل ابتسمت
شفت مريومة جاي تحظر ابتسمت علئ منضرها تحسنت نفسيتها تقربت بستها بخدها وكلت صباح
العافية بوية شافتني شبكتني وكالت صباح النور يعمري شبكتها حيل وكلت شني هالوردة المفتحة من
الصباحيات ابتسمت وكالت اي غير اريد اتريك وياكم صار هواية ممتريكين واستغليتها انتَ موجود ابتسمت
وكتلها يلا منتظرج علمود نتريك بدت تحضر كعدت علئ الميز واباوع للحديقة فزيت علئ صوت جوري
وهية تكول صباح الخير ابتسمت وكتلها صباح النور ومريم ردت عليها باوعت علئ الريوك وكال ماما ليش
تعبتي نفسج اذا جوعانة مكعدتيني اسويلج ريوك اني ماصدكت صرتي زينة وضـلن يتناكرن واني اباوع علئ
جوري جنها بطة وتفتر بالمطبخ وكفت يمي ومريم ملتهية تحضر ابتسمتلي وكالت ها عيني اليوم
ممكعدني وياك شنو مليت من عدنا ضحكت وجريت ايدها بستها وكلت بهمس انتِ الاصل بوية بس كلبي مانطاني اكعدج من النوم ابتسمت وتحضر وية مريم
كملن وبدينا نتريك مريم كملت وكامت بدت تنضف بالبيت الفوك واني جوري بعدنا كاعدين بالاستقبال
نتريك واباوع عليه خلت قشطة بالصمونة وخلت مربئ وخلت فوكاهم عسل ورشة شكر بلعت ريكي
وكتلها صدك جذب بوية لايصير عندج تسمم شلون
تخبطيهم كلهم سوة كالت وهية تاكل شسوي
داشتهيهم اتنسئ عليهم ورجعت سوت لكمة ثانية ابتسمت علئ شكلها شلون مبسطة وتاكل كتلها واني
اشرب جاي الدوة خـلصتي؟كالت ايي وهوة داكلك جيبلي بعد لين الدكتورة كالت جددي كتلها صار بوية
العصر اروح اجيبلج ياه كالت وهية تاكل الله شكد حلو لو كاليومية هيج مكابلني وكاعد حتئ يصير الي واهز بالاكل تقربت بستها بخدها وكلت اي غير لوبيدي
اعوف كلشي واكابلج وتدرين بية الصفنة بوجهج لعبتي ابتسمت بخجل ضحكت وكتلها كملي اكل كملي .
مريم
دانضف وبالي يم احمد اليوم تطلع التحاليل وبالي يمه وكلش قلقانة بس املي بالله كبير سمعت مبايلي يدك
بغرفتي رحت ركض شفته يتصل اكيد ديبشرني بالنتيجة بس خفت افتح خط خاف تطلع النتيجة
عكس مامتوقعتها بلعت ريكي وفتحت خط كتلة بقلق ها حبيبي؟ كال مريـم معجزة مابـية شي مابـية بجيت
وهوة يكلي مابية شي ضليت اصلي علئ محمد واحمد الله واشكره وكالساعة اغص بالبجي وهوة يكلي بوية
كافي بجي بوية راح اجي باجر الطـيارة كلبي طاك علئ شوفتج مااريد شي من هاي الدنيا بس انتِ وهسة
من طلع مابية شي كملت الفرحة يبعد حيلي زين كبل اجيج لو انتظر شعري يطلع؟ كال هيج بجيت وكتلة
لاتحجي هييج دير بالك تعيدها والله ازعل وبعد مااحاجيك تجيني هيج ويحجي وياي ومتلهف عاف
موضوع مرضه وشفائه وركض علئ موضوع الخطبة لهفتة وفرحته خلني هيج اموت من الفرح بحيث من
سدينا الخط شغلت السماعات وخليتهم بأذني واعلئ
صوت وردح ساجدة ونضفت البيت تنضيفة ماصايرة حتئ تنضيف سارة سويته بدالها الفرحة ماسايعتني .
ريحـانة
خلص الدوام طلعت وزميل يمشي وياي ويسألني بخصوص المحاظرات واني اجاوبه ومندمجة بعدني
ماواصلة للكراج رفعت راسي ولمحت باسل كدامي عزا العزاني ابتسمت وبلعت ريكي الولد تشكرني وراح
تقدمت مشيت لباسل وكفت كدامة وكتلة هاا الله يساعدك كال بـضوجة ويساعدج يلا امشي مشة
وعافني عرفته ضاج مشيت بسرعة صرت يمه ولزمت ايدة وكتلة والله مجرد زميل وسألني علئ المحاظرات
كال اي واني شعلية كتلة اهو باسل يعني يومنا حلو الله عليك لا تضوج ويخرب علينا كال ها يعني اني
اخرب يومج جيد جيد كتلة واني اضغط علئ ايدة ونمشي باع تبطل زعل وتجر عدل وياي لا
مااتعرف شأسوي بيك نزع المناضر وكال وهوة يمشي اي بوية شتسوين كولي خوفتيني كتلة بثقة لا ابقئ
خايف مااريد اكلك كال لا الله عليج احجي ضليت ارجف خاب دروحي تخوفني هية ام الاغرائات يمة
متت بمكاني كتلة الا تجفص ماترتاح امشي لا احاسبك ولا هاي ضحك وكال لا تخليني اتغزل بيج هسة
واخليج تفهين وتشهرينا وعلئ كولتج تذوبين يمة متتتت من الخجل متتت مادري شلون سيطرت علئ
روحي وصلنا للكراج صعدنا بالسيارة شغل السيارة وبدأ يسوق يمة مجاي اصدك عود احنا هيج وعلاقتنا
تصلحت وهاي الفرحة ماسايعتني كلساع اصفن بوجهة لو هاي مااريد اضيع اي لحظة واتندم عليها بعدين
وهوة مامقصر كالساع شامر كلمة اطول مني لو متغزل بية لو ساحب ايدي ويبوسها ومع الاسف عرف نقطة
ضعفي هالسوالف ولزمني من ايدي التوجعني وخلصتها اصفن واخجل اصلاً اسمي الحقيقي خجولة
ومرات يصيحولي صفونة وصلني للبيت وقبل لاانزل باسني بخدي نزلت سديت الباب دخلت للبيت
والأبتسامة مرسومة علئ وجهي لكيت العائلة مجتمعة بوستهم واحد واحد وابتسامتي فاضحتني اريد اخفيها مااكدر سارة غمزتلي همست الها بعدين سحبتني مريم
للمطبخ وشاورتني وكالت طلعت تحاليل احمد مبي شي شبكتها وبوستها وتحمدت اله بالسلامة كلش
فرحت الهم واخيراً نوب صعدت بدلت وغسلت وصليت ونزلت تغدينا وكملنا وسارة مسترخية
ومتمددة علئ القنفة كتلها متكومين تنضفين طكت اصبع وكالت لكيت مريم حبيبة كلبي وتاج راسي منضفة بدالي الله وين اكو احلئ من هيج ضحكت
وكتلها عابت شكد عجوزية كالت اي عيني اليوم شسويتوا ماسويتوا ابتسمت وكتلها طلعنا تريكنا سوة
وضليت اسولف الها وهية الابتسامة شاكة حلكها كامت طلعت تركض من باب الاستقبال كتلها بضحك وين
رايحة كالت رايحة ارتبط وطب دخل محمد للاستقبال وانطكت بيه وكلها وين رايحة وين؟ بلعت ريكها وكلتلة
فاتتني صلاة العصر وخر يمعود ضحكت عليها ومحمد خزرها وهية ضلت توزع ابتسامات راحت ودخل محمد
وفتحلي ايدة وركضت حضنته وكال مشتاقلج يروح اخوج ملتهي بالشغل هلايام بسته وكتلة معذور يعمري
كعدت يمه وهوة شابكني ونسولف ونضحك وحسين متمدد علئ القنفة يلعب بالمبايل وكالساع كايل جذاب
ماملتهي بالشغل ملتهي بصاحباته جاوبه محمد اي مو اني حسين بممم قصفه كاله حسين بعد كلبي استاذ
محمد شوكت ناوي تزوج وتفرحنا اشو عروستك وموجودة دزوج علمود ازوج وراك كبل ضحك محمد وكلـة الله كريم رجع كله حـسين موتزوج وتصير نفس
ابوي وعلة صوتة يجي من الدوام مانشوفه يخلصها نايم لو كاعد بالمطبخ ومكابل امي وهية تطبخ مايكول
عندي ولد اشوفهم اجة علاوي يركض كلة يكول ابوي ليش تخليني اكوم اسحلك مبين جلدك يحكك ضحكنا
وحسين صاح تاج راسي بوية محمد كلة واني هم تاج راسك حسين كله خاب دكوم لوتصير شامبو مااخليك
علئ راسي وبدوا يتناكرون واني شبعانة ضحك لحد مااجة بابا لزم حسين بالشقة ولوة ايدة وضلوا
يتشاقون وبعدين انجمعنا كلنا نسولف ونضحك لحد ماصارت الدنيا مغرب صلينا وبدينا نحظر بالعشاء اندك
الباب وطلع بابا واخواني وشفت من الشباك باسل وعمي عزيز دخلوا للأستقبال استغربت شعجب جايين
ودينا مي وعصير وهالسوالف ونسمع اصوات ضحكهم وسوالفهم واني وسارة لازكين بالباب اخر شي امي
سحلتنا كالت لايفتحون الباب وتنشرهن ادبسزيات سحلتنا يمها بالمطبخ وشويـة وراحوا واني الفضول
كاتلني شكو وشنو رادوا شوية وانفتح باب الاستقبال وطلع بابا مبين علي ضايج وكالساعة يباوعلي يمة
خفت شكو شصار لحد ماراحت ماما تشوفه شبيه واجت صدمتني من كالت .....
- يتبع الفصل التالي اضغط على (يأس القلوب) اسم الرواية