رواية يأس القلوب (2) الفصل العشرون 20 - بقلم رودي

part60

          

                

حضتني وكالت يموييي هلا بام الحلوين ضحكت وكتلها هلا بيج باعي هسة همة نايمين من يكعدون ميبجون ترا هادئين بكيفج لاتصدكين كالت اي خطية

 كلش هادئين سودة علية ضحكت وكتلها ديلا شبيج مااتاخر كالت روحي اني اريد ابقة يمهم اليوم اشبعهم عضاتت هذولي المدنفشين كل واحد خدوده 

كيلوين كتلها لا سار الله عليج لاتعضيهم شبيج يعني ابطل مااروح ضحكت وكالت نجبي اشاقة بوستها وكلت يلا بيبايي ,طلعت ماما من الغرفة مبدلة هم 

لابسة عبايتها الخليجية والشيلة لمحها بابا جان يشرب مي رفع حاجبه وهية ابتسمت وكالت امشينا ماما امشي طلعنا وبابا طلع ويانة كال اوصلكم شغل 

السيارة وصعدنا اني  ورة وماما بالصدر بدا يسوق ومشغل اغنية  ورد وشايل وردة خوفي الناس تحسده ويدندن وياهة بهدوء وماما صافنة عليه 

ومبتسمة ابتسمت على شكلهم شكد حلوين وحبهم مبين بعيونهم همست بحب الله يديمكم ويحفظكم ومايحرمنا منكم يارب ،وصلنا للسوك وماما كالت لبابا 

انزل ويانا وهوة ماكال لا نزل ويانة ودخلنا للسوك بابا يمشي واحنا بصفه شفت محل مال اطفال ابتسمت وهمست لماما خلي ندخل اشتري لياسر 

وملوكة ابتسمت وكالت بهدوء طالب راح ندخل لهذا المحل ،دخلنا وهوة دخل ويانا ،اخذت الهم كل واحد تراكسودين شتائيات ،واخذت الهم كل واحد

 اوفر البسه الهم باجر يصير على شكل دبدوب ومدنفش يموييي ومال ملوكة وردي وياسر سمائي ،وماما وبابا يختارون لغلا ،ووبابا اخذهم جاي 

يتحاسب واني طلعت فلوس من الجنطة وهوة جان ديطلع من محفظته شافني طلعت خزرني خزرة يمة خلاني كبل اضمهم واسد الجنطة انطه للولد 

الفلوس وشال العلاكة وطلعنا وكلي اني وياكم وتردين تدفعين ؟موعيب بابا ؟كتلة بخجل موهواي محتاجة اشياء شنو اخليك انتَ تدفع والله عندي هواي 

باسل مخلي عندي ،استغفرالله وهز راسة وكال ضميهم خليهم الج اني ادفع لاتشيلين هم ومشينا ودخلنا اني وماما لمحل الفساتين ،وهوة وكف برة 

ينتظرنا وياعيني اجيت عيني على فستان طويل قماشه حرير مخصر عالجسم ومفتوح من فوك ولونه ماروني لزمته وكلت لماما شوفي يموتت

 خلي اخذه باوعت للسعر ٨٠ الف يمة استحي اشتري وبابا يدفع ماما كالت ها تاخذينه بلعت ريكي وكتلها لا مااريده باوعتلي بتك عين وكالت شو اوكفي

 وطلعت وشوية ودخلت هية وبابا ،كبل حاجة الولد واجة اخذه من ايدي وكال بالعافية ،واخذه يخليه بالعلاكة تقربت وكلت لبابا مااريده بابا ماعجبني 

يولي رجعه ابتسم وكال من شوكت تستحين اصرف عليج بابا ؟اني ابوج موغريب بنيتي باوعت لماما وكتلها ايي ركضتي كتيلة ركضتي ضحكت 

        

          

                

وكالت تستاهلين متمشين الة بالعين الحمرة ضحكت واخذت الفستان وفرحانة بييه بعدين اشتريت كعب ولبسة للعرس كيلوت ووياه قميص ،يعني 

جهزت كلشي ،رجعنا للبيت تقريبا وقت غروب وكلبي طك علية ياسر وملاك يمة عبالك سنة موكم ساعة ،دخلنا للبيت وكبل عفت العلاليك ودخلت لركض للغرفة شفت سارة تلعب بيهم وتضحك كبل دنكت عليهم ابوس بيهم 

واضحك واكول يمة يمة اشتاقيتلكم اني وابوس بيهم وهمة يكمزون بست اديناتهم وكلت لسارة ها بس لاتعبوج ياروحي كالت بالعكس يمعودة فد 

تونست بست غلا وكتلها وهاي الحلوة هم تعبتج ابتسمت وكالت عيني تريد ماما وين امها دخلت ماما بوست الجهال وشالت غلا تلاعب بيه وغلا سنحت 

بحضنها وبابا يباوع علينا ومبتسم ،شوية وكمت بدلت وكمت كدرت الفستان شني يموتتت عليي اخذت صورة واني مبتسمة ودزيتها لباسل ،وغلقت

 المبايل ورحت صليت وتعشينا والتمينا نسولف ونضحك وفرحانين بمحمد ,فتحت مبايلي لكيت باسل مراسلني راد على صورتي وكاتب 

وشدعوة هلكد حليانة ؟ماخفتي على كلبي من دزيتي هاي الصورة ضحكت وكتبت اله حلوة مو مباشرتا شاف الرسالة ورد حلوة ؟كولي اموت بيها مجال 

بوية ابتسمت بخجل وكتبت اله احبك باسل رد ميت بيج ياروحه لباسل وضلينا نسولف .

طالب 

واكف احدد بلحيتي وحضنتني جوري من ورة وكالت شيسوي حبيبي ابتسمت وكتلها احدد بلحيتي وجهة صار بوجهي وهمست شنو ناوي تصير

 حلو بالزايد ضحكت وكتلها مال حلو اي حلو قبس مااوصل يمج ابتسمت وكالت لاعيني اني وين وانت وين اكيد انتَ احلى ضحكت وضميتها 

لحضني وكلت فرحانة مو باجر حنة محمد الي صار سنين منتظريها همست بهدوء الحمدالله الله طول بعمرنا وخلانا ننجمع من جديد ونشوف هيج يوم

 همست الحمدالله وكلت بمكر هسة بس ازوجه ارجع اطلقج اني علمود محمد رجعتج وخرت مني مشت استغربت وصلت يم باب الحمام وكالت اذا 

ماازوج واعوفك اصبرلي هية كالت هيج يابوية تبهذلت احوالي من العصبية مشيت الها بساع دخلت لباب الحمام جاي تسده ودفعته وكالت بعصبية واني 

انصي صوتي شو فتحي الباب فتحي وهي تدفع بيه وتضحك عرفت شلون تعصبني شلون عصبتها دفعته حيل وهية كمزت يم المغسلة وكالت وهي 

تضم ضحكتها هاي شبيك هسة اني شكلت موكلت تعوفني كتلك ازوج نوب ترجع تكولها يامحمد تقربت وكتلها جارة ماتصيرلج موكايلج حتى بالشقة 

متكولين هيج كالت منو كلك داشاقة وطكتها بضحكة صفنت عليها وكلت بضوجة هوة موصوجج والله صوجي اني عفتها وطلعت من الحمام وهية

        

          

                

 لحكتني تضحك شبكتني من ورة وكالت صاير متتحمل شقة والله يالله هسة شكلت اني تدري بية اشاقة وكرصتني وكالت لعد بس انتَ تضوجني استاذ

 طالب ووجها صار مقابيل وجهي ورمشت وكالت وينطيك كلبك ضوج مني لا اراديا بستها بخدها وكلت ملعون كلبي مايكدر ضحكت وشبكتني عضيتها

 بكتفها وهمست دعيديها بعد وشوفي شسوي بيج كالت وهية تباوع بعيوني شتسوي عيني ؟همست واني سرحان بلامحها شسوي ابوسج مابيدي غير 

شي ضحكت بصوت عالي خليت ايدي على حلكها وكلت بضحك اش صوتج شهرتينا ابتسمت وسحنت روحي بوية سحنتها بستها بخدها بقوة وكلت 

شدعوة هلكد تسحنين الروح ماتكليلي شدعوة وخلصتها ضامها لحضني واتمعن بملامحها وماامل لو ابقة لاخر يوم بعمري .

في اليوم التالي 

ريحانة 

كعدت على صوت ملاك تبجي ضليت ابجي وارضعها وادردم شلون يعنيي مانام البارحة مسهرينيي للخمسة حفلة عدنا حفلة كللوش ارتاحيتي من 

كعدتيني وهي ترضع وصافنة بوجهي باوعت بعيونها الخضر ضحكت وكالت يالله ضعيفة كدام هاي النضرات اني ضعيفة بستها وكلت شنو هايي

 امي شنوهايي تبجيني منا تضحكيني منا وهي ابتسمت واني اسنحنت روحي وضليت ابوسها بيها واضحك وانفتح باب الغرفة ودخلت ماما باوعتلنا 

وابتسمت كالت صباح الخير حبيبتي كتلها بابتسامة واني اخلي ملاك عالجرباية واكوم احضنها وابوسها صباح الخير يالخير كله بوستني وكالت

 ياروح امج شلونهم الحلوين وتقربت تبوس بيهم وملاك تكمز الها وهي تضحك وملاك ماخذة ملامحها عبالك امها مبينة ,كالت ماما بابتسامة يلا 

جيبي ياسر وتعالي تريكي راح انزلها وياي ملوكة كتلها تمام راحت ماما واني رحت غسلت واخذت ياسر ونزلت لكيت ملاك بحضن بابا يلاعب بيها 

ويبوسها وغلا مخليها بايده الثانية ومسنحة بحضنه كلت بابتسامة صباح الخير بابا كال بابتسامة صباح النور حبيبتي تعاي تريكي كعدت باوعت 

للساعة ب8 يبويي كلة من وراج مليكة كعدتينا هسة وكعدنا نتريك وكلها اجتمعت عالصينية محمد وحسين واني وبابا وماما وعلاوي ,كال حسين 

واللكمة بحلكه ام ملوجة صبيلي جاي كلت بضوجة لبابا بابا صيح علييه بنتي اسمها ملوكة مو ملوجة كلة يكلها ملوجة ضحك بابا وكله حسييين عوف 

البنية ,كال حسين وهوة يباوع لملوكة حبيبتي ملوجة ملوجات تروحلج فدوة امج كتله بضوجة واني اصبله جاي تروحلي فدوة الاملح وهوة مستمر 

يلاعب بيها ويكلها ملوجة واني بالكوة ضامة ضحكتيي لحد ماانفجرت ضحك وياه ورجعنا نسولف وفرحانين بمحمد وحسين طك اصبع وكال حي 

        

          

                

الله راح يتزوج مجمد ضربه محمد على ركبته وكال محمد يالمصخم محمد مو مجمد ضحك حسين وكله بكيفي شنو اصيح الكم اصيح ,وكال 

لبابا ,طلوبي اليوم اريدك خوش تهوس ارفع راسنا باوعله بابا وهوة يشرب جاي وكله اكسر راسك احسن اثكل شوي اثكل ,حسين هز ركبة وكله وليش 

اثكل شبية شواخبل وضحكنا ومناكر هوة وبابا وكالساع يكلة امي كاعدة مااريد احجي وافضحك يمها  ويبو تكب الصيحة لحد ما كمنا نرتب البيت 

ونمسحه وهمة كل واحد اتفرغ يسوي شغلة واجتي مريم وسارة وضلينا نركض منا ومنا ,لحد ورة الاذان بدوا يجون الخطار وناس تقدم مي ناس 

عصير واني تبهذلت وية الجهال حسرة ما اتحرك يبجون عصبت كلش دك علية باسل واني انفجرت بالبجي من كال شلونج وهوة تخبل يكلي شبيج 

تبجين شصاير ؟كتلة ببجي هاي ملوكة تبجي وماتقبل تسكت قهرتني شلون تبجي ضحك بهدوء وكال وهسة انتِ تبجين لين ملوكة تبجي كتلة ببجي اي 

ضحك وكال اروحلج فدوة اني شو مسحي دموعج وسكتيها على كيفج شوفيها شنو تريد ولاتعصبين على كيفج وضل يهدا بية ويكلي هانت مابقى 

شي وانزل ونعتني بيهم سوية لحد ماهدات واني ابجي على ملوجة على كولة حسين وعلة اشتياقي لباسل ,لحد ماسدينا الخط واني مبتسمة وملوكة سكتت 

وياسر اخذه حسين بالحديقة يمه طلعت وراه اريد ادخله لين باردة لايتمرض علية نوب ,لكيته داخل كاعد بيه ماما صايحته همزين ,رجعت بدلت لملوكة 

لبستها اوفر وهمزين عدها شعر خليت الها قراصات هههه طلعت تخبل بنتي وخليتها يم سارة جوة وصعدت مريم تشسور الي بشعري كملت شعري 

بالفترة الاخيرة طول حيل وباسل يموت عليه ابتسمت وكتلها باسل شكد يحبه هالاكول يكلي ديربالج تكصيه ضحكت وكالت حقة عمي اني احمد كل يوم 

يرزلني لين كصيت شعري  وضلينا نسولف ونضحك , بعدين كمت لبست بنطرون ثلجي ضيق ووياه قميص اصفر ابو الشدة وبيه فتحات من الزنود

 وشعري نازل على طوله ومكياج يمة  طلعت شكد حلوة مريم اخذت الي صور ودزيتهم لباسل وبعدين بدلت لياسر وملاك ولبستهم نفس الشي وغلا 

نفس ملابسهم طلعوا درزن هههههه شلت ملوكة ونزلت وياسر حسين كبل اخذه مني يكلي عوفي يمي يونسني ضحكت ونزلت وملوكة بيدي دخلت 

للاستقبال النسوان باوعلي وامي باوعتلي وصلت على محمد وكالت المرة ماشاء الله هاي ريحانة هيج كبرانة وصارت ام ولامبين عليها كالت امي

 وهي تخزرني هههه اي ماشاء الله ,وبجت ملوكة كالت ماما اخذيها هنا هوسة صعديها فوك واني ركضت بيها يمة راح تكتلني تخاف عليها رحت

 للمطبخ ودخل بابا شافني ضحك وكال شطالعة يابة ماعرفتج رمشت وكتله اخبل مو ضحك وكال هوة انتِ حلوة بكل وقت ياعيني ضحكت وبسته بخده

        

          

                

 وهوة باسني ودنك باس ملوكة وكال فدوة للبنات يابة فدوة وكال بس لا تردين تاخذينهم وياج ؟كتلة ماما كال موزين عليهم واختلاط بس وين 

اوديهم ؟!صفن وكال والله مادري يايابة شوفي وين تبقيهم لين مستحيل تاخذينهم كتلة تماما وعافني وراح يبدل واني حرت يامحمد وين ابقيهم 

ولااكدر اعوفهم يم احد مااكدر شلون هسة ابقة مااروح  رحت شربت مي وصعدت يم البنات هوسة ويشسورن ومكياج وبابا صاح  استعجلوا صارت 

الدنيا مغرب السيارات راح يوصلن حتى نوصلكم لبيت العروسة ومناك نروح احنا للقاعة حنة الولد ،بساع كلها كامت تتراكض وانخبصن اخذت

 غراضي وجهالي ورحت لغرفة حسين سديت الباب خليتهم على الجرباية ودكيت على عمتي جاوبت سلمت عليها وهاي وبعدين كتلها شنو عمة 

ماتجين ؟مومعزومة شو تاخرتي كالت حبيبتي فقراتي يأذني مااكدر اجي والله وخابرت امج تعذرت منها كتلها بخوف لاعمة معذورة سلامتج خوفتيني

 عليج بيج شي كالت حبيبتي لايضل بالج مابية شي،شنو بعدكم مارايحين لبيت العروسة ؟كتلها بضوجة. مراح اروح عمة لين ملاك وياسر مااكدر 

اخذهم كالت يا شلون ماترحين ؟روحي تونسي وغيري جو وخلي واحد من الولد يجيبهم يمي ،كتلها لاعمة شلون انتِ منا فقراتج ومتاذية ازيد الاذية 

عليج كالت شلون راح تخليني اكتلها هالابنية وفجاة صاحت يمة هلا نور البيت وانسد الخط ،استغربت خاف اجة عمو عزيز وماتدري وسدت 

الخط ،خليت وكعدت عالجرباية والدموع بعيني عادي مااروح بحنة محمد اروح بحنة حسين بس محمد صار هواي منتظرينة يعرس شلون مااروح 

وضليت ابجي وملاك وياسر صافنين علية  ،بحدود النص ساعة واندك باب الغرفة صحت واني اسكت بملاك خبصتني بس تبجي منوو صاحت سارة 

دفتحي الباب بساع كمت فتحته وكتلها ها سارة كالت هاي ليش مامبدلة ولج راح نطلع بعد نص ساعة وشبيج باجية ام دميعة  كتلها مااروح سارة الجهال

 وين اوديهم ترديني احير بيهم  ابتسمت وكالت ترا باسل اجة جوة وصعدت اصيحج  كتلها باستغراب شبيج سارة ؟ترا باسل بالدوام والصبح جنت احجي 

وياه مكالي راح انزل ضحكت وكالت بالقران جوة بالحديقة ابتسمت يعني عمة هستوها يمكن اجة باسل وسدت الخط ،كلت لسارة دقيقة واجي ابقي يم 

الجهال نزلت ركض ومااهتميت للنسوان الكاعدات طلعت من المطبخ همزين محد بالحديقة ادور عليه ماكو انقهرت كل ضني طلع رحت ورة 

البيت جاي اشوفه وانسحب وشهكت همس هاي اني باسل ابتسمت وشبكته حيل وكانو اريد اعوض هالايام الي جنت بعيدة عنه بيها يبوس براسي 

وبخدودي ويهمس يايابة  كلبي طاك عليج بنيتي باسني بقوة بخدي وهمس شطالعة كيكة بسته بخده وكتلة اشتاقيتلك هواي باسل كلش هواي همس 

        

          

                

وكصتي على كصته افدي اليشتاقلي اني باسني وهمس احبج شبكته حيل وكتلة اموت عليك باسل كرصته وكتلة موعلى اساس بعد 3 ايام وتنزل 

شنزلك ؟ضحك وكال جابني الشوك ضحكت وكال وهوة يمسد على صارت ونزلت رهمتها منا منا وصارت ها لو ترديني ارجع بسته بكتفه وكتلة شحدك

 رجع شبكني وهمس باذني امشي جيبيلي الجهال كلبي طاك عليهم كتلة تمام ابقة هنا موتروح كال منتظرج دامشي سحبني من ايدي باسني وهمس احبج 

ابتسمت وكتلة اموت عليك دخلت بساع للبيت وماما شافتني ابتسمت واني ضحكت صعدت اخذت ملوكة وياسر من سارة ونزلت بيهم على كيفي 

طلعت للحديقة همزين الضوة مشتغل رحت  يم باسل شافنا ابتسم وصاح يابة هلاا صار مقابيلي وضل يبوس بيهم ويشمهم وهمة بس يباوعون بوجهة 

شالهم ثنينهم ويحاجي بيهم واني غرت شابكته من ورة وهوة يضحك تقدمنا كعدنا بالمرجوحة اني بصفه وبايدي ملوكة وياسر بايده ,وهوة اندمج وياهم 

يموت على الجهال يموت , ويبوسهم بعدين يرجع يبوسني واني خربانة ضحك بعدين كتلة بعد ربع ساعة يرحون لبيت العروسة بس اني مااروح

 كال ليش ؟كتلة غير ابقة يم ياسر وملوكة كال يابة ترا اني اجيتج مباشرتا علمود يبقون يمي وانتِ ترحين كتلة يا يا وانتَ وين تكدر الهم   باس ملوكة 

وكال معليج اكدر يلا كومي تحضري وية البنات كتلة لاباسل مااكدر اروح والله عادي اعوضها غير مرة كال كومي روحي تونسي وغيري جو ادري 

بيج تنقهرين لين ماراح ترحين فهسة صيري حبابة وكومي لا هذا البنطرون اشكه ضحكت وكتلة كايمة كايمة مد خده بمعنى بوسيني بسته وضحك كال 

جيبيلي اغراضهم امي منتظرتهم كتلة بفرح حتاخذهم يم عمة كال اي كتلة 

لعد خوش خلي اجيب الغراض مشيت ووكفت كتلة بس باسل تجيبلي ياهم 

غير كال وداعتج  اجيبهم ابتسمت وكتلة تمام دخلت   ودخلت جوة يدري بية جنت كلش متحمسة لحنة محمد ولهذا السبب قافل يريدني اروح صعدت 

بساع  حضرت جنطتهم وطلعت وياي ماما سلمت عليه وبوست الجهال ودخلت وهوة انطاني ياهم وخلة الجنطة بالسيارة وعدل كراسيهم مال اطفال

 الي يثبتهم بيها ,وخلاهم  وقبل لا يصعد باسني بخدي وكال ديربالج على روحج بسته وكتلة تروح للقاعة وية الولد ؟كال اي عيب محمد عازمني واكد 

علية اجي هسة بس اودي الجهال ابدل واطلع كتلة تمام وقبل لايصعد بوست الجهال وكتلة بقلق باسل خليها مااروح اريد ابقة يمهم فدوة مااكدر اعوفهم 

ابتسمم ومسد على خدي بهدوء وكال ياحبيبتي غير علمودج اني اريدج تغيرين جو ؟وتتونسين يم البنات ولاتخافين عليهم يم امي هزيت راسي وكتلة 

        

          

                

تمام ورجعت بستهم وهوة حرك السيارة وطلع واني دموعي ضلت بعيني دخلت شفتهم ديتحضرون راح يطلعون صعدت بساع  لبست الفستان مريم 

تبرم بشعري  عالسريع وسارة تمكيج الي كملن ولبست الكعب اباوع لنفسي طلعت اخبل وسارة ومريم نفس الحالة بساع لبست العباية ولفيت الشال على

 كيفي حتى لايخرب شعري طلعنا وكبل ركبنا بسيارة حسين اني وماما ومريم وخالتي وتحرك الكوستر والسيارات والحسين عالك الاغاني 

والهوسات وماما يمه بالصدر والهلاهل يمة فد تونسنا والضحك وصلنا لبيت عمو غالب ونزلنا ودخلت ماما والنسوان يهوسن ويهلهلن والجكليت واني 

والبنات وياهم سلمنا على وداد الي طالعة امير لابسة بدلة لون احمر ذكرتني بالحنة مالتي ابتسمت وشعرها اسود طويل ومبروم ومرفوع شوية والمكياج

 بارز ملامحها ماشاء الله طالعة تخبل اشتغل الديجي وبدا الدك والركص وكومنها تركص ويانا وهي هم حييل فرحانة ومتونسة منا لحد مادخل محمد 

وارتفعت الهوسات والهلاهل وماما تهوسلة وهوة باس ماما من راسها ومن اديها وهي سودة علية بجت وشبكها سكتها واني دموعي تنزل الموقف الي 

الله لايحرمنا منه امين يارب.

محمد 

اباوع عليها ونضراتي كلها حب همست سبحان من سواج ,شنوهذا الجمال عروستي ؟ابتسمت بخجل حضنت ايدها بستها وهية همست صار حلم 

الطفولة صدك محمد راح نزوج ضحكت وكتلها اييي الاحلام اذا اصرينا عليها وحاربنا علمودها تتحقق بستها بخدها وكلت احبج ابتسمت وكالت اني 

هم احبك والهلاهل والهوسات بوية طرشتني تقربت سارة تركص كدامي وتهلهل ضحكت وهية كالت اخونا خوش اخو يستاهل الهوسة وسحبتني 

اركص وياها واني مومال هاي السوالف جيبوا حسين يتمركص كوموا وداد وياي وسحبتها لصدري وضليت اتحرك وياها بهدوء وهية راسها على

 صدري وتحجي كلمات الاغنية واني سرحان بتفاصيلها ,لحد ماكعدنا وحنيتها واكلنا كيك وحسين خبص المبايل عليه حركه حرك بسيطة اردلك

 ياها , طكينا صور واللقطات جنا احنا مختارينها وصارت نفس ماردنا ,تونسنا حيل وكلشي جان بخاطرها تسوي بالحنة من مراسيم 

وصورو وكلشي سويته الها ماردت اخلي شي بنفسها ورة ساعة تقريبا بستها براسها وودعتها وطلعت وتسجل هذا اليوم من احلى الايام بحياتي ,حسين

 جان منتظرني برة بالسيارة اول ماصعدت كال صدك جذب يمعود ابوي خبص المبايل علي لزكت يم وداد موباجر تشوفها كتلة انجب لك تريدني ابقة

 خمس دقايق لاتخليني امدك هنا ضحك وكال لين عريس وفرحان راح اعبرلك ياها كتلة دسوق سوق ,شغل المعزوف ويسوق ويركص واندمجت 

        

          

                

وياها واندمج يطك اصبع ويصيح الليلة حنته وباجر يزفونه والليلة حنته وباجر يزفونه صحت بضحك يمعود راح نندعم هز ركبة وكال زوجنا 

وخلصنا منا بقة حسين والاصغر منة طكيتها بضحكة بصوت عالي وهوة منمدمج ومستمر يهز لحد ماوصلنا للقاعة نزلنا ودخلنا والجماعة كلها 

جاية ,سلم علي باسل وباركلي ووكفنا نسولف ونضحك لحد ما اشتغلت الاغاني واشوفلك ياها كلها بالنص وبابا يهز راسه ويباوع لحسين محتل 

الساحة وكانوا يكول راحت تربيتي عالفاضي وحسين حتى السترة نازعها بوية فحطني جرني يمه وارتفعت الهوسات وعمي عزيز يهوسلي وابوي وياه والجو اشتعل .

ريحانة 

خلصت الحنة ورجعنا للبيت  والخطار كلها راحت وباجر يرحون ويمة مكسرين تكسر وباجر ورانا عرس شمرت روحي عالقنفة وصحت يمة 

تعبانة يمة رجلي تكسرن وماما واكفة تزرل بمريم لين ركصت ولابسة كعب وهية منا حامل وكالت الها اكول لاحمد عليج ومريم ضلت تتوسل بيها 

وسارة تاكل خيارة وتأشرلي عليهن وتضحك سمة خربتني ضحك دزيت رسالة لباسل من تكمل الحفلة يجيب الي ملوكة وياسر لين يمة كلبي طك 

عليهم اباوع الساعة ب12 تاخر الوقت وبعدها حنتهم مامخلصة شوي انفتح باب الاستقبال ودخل حسين لازم سترته بيده ويهوس يوم الالي واذبح طلي 

وبابا دخل وراه يسولف هوة ومحمد ويضضحكون وعلاوي يهوس وية حسين يمة خربنا ضحك حسين هز ركبة وكال لامي حضري روحج نزف 

محمد منا تزوجيني منا ضحكت وكالت اله من هالعين قبل هالعين ونوب ضل يتناكر هوة وبابا ومحمد كعد يم ماما وحاضنها ويبوس براسها كتلة 

محمد باسل رجع للبيت كال ها صحيح كلي كللها بس اسبح واتعشئ اجيبلها الجهال كتلة تمام صعدت فوك اني والبنات نبدل وسارة تمسح بالمكياج وتهز

 جتف ومريم تهز ركبة واني بشعري الحمدالله تخبلنا رسمي دخل حسين للغرفة هز جتف وكال اثكلن شوية اثكلن يمة غير فحطنة من الضحك ,بدلنا

 وكعدنا نسولف ونضحك وشنو سوينا اليوم وهالسوالف لحد ما سمعت بابا يصيح يابة اجة باسل تعالي نزلت ركض دخلت للاستقبال شافني باسل ابتسم 

مخلي ملوكة بحضنه ومسحنة عيني وياسر مجلب بايده اخذتهم منة وبوستهم وبابا يباوع النا ومبتسم كعدت يمه والاعب بيهم وهوة مندمج  يحجي وية بابا 

عن الالتحاق ويسولف اله وسودة علية مبين عليه التعب وعيونه محورة واول مانازل كبل دخل سابح وماكل شوية وجايني بسرعة ياعيني ، وطول مايحجي حاضن ايدي وحاضنة ايده ناموا الجهال وهوة استاذن 

ديروح وديت الجهال بفراشهم ورجعت لكيته ديطلع طلعت وياه هوة وبابا باسني براسي ووصاني على نفسي وعالى الجهال وكال باجر اجيج كتلة تمام

        

          

                

 وراح واني دخلت وكبل صعدت نمت باجر ورانا يوم طويل ومتعب .

طالب

دخلت للغرفة علكت السترة بالزاوية وانفتح باب الحمام وطلعت ست جوري تنشف بشعرها باوعتلي ابتسمت وكالت ها طلوبي ضحكت وكتلها روحه 

لطالب ،علكت الخاولي واجتي حضنتني وكالت اشتاقيتلك ترة بستها بخدها وهمست اني هم اشتاقيتلج تونستي اليوم ؟كالت بفرح ايي كلشش ومحمد 

كلش فرحانة لوشايفه ابتسمت وكتلها اي شفته وفرحان بيه هزت ركبة وكالت دشوفني شون اهز ركبة شوف الجمال شوف ضحكت وعضيت 

شفتي وكتلها استاذة منو يلحكج ؟ضحكت هزت كتفها وطكتني بيه وكالت محد بستها وهمست اكيدد ،خلي ادخل اسبح وخرت راحت تمشط واني 

دخلت سبحت وطلع لكيتها تغطي بغلا وتهز بيها الكاركوك ابتسمت على منضرهم شكد احبهم يايابة،مشطت شعري ورشيت عطر وتقربت تمددت 

على الجرباية وهية اجت تمددت يمي وحضنتني وهلهلت باذني على كيف وفززتني ضحكت وكتلها انتِ هم صايرة مخبلة بعد روحي ،سوت روحها

 زعلانة وهية بالكوة ضامة ضحكتها وكالت ااا مخبلة مو عود يعني دادلع عليك وهاي ضحكت وكتلها هاي يسموها تخرعيني بنص الليل موتدلعين 

ضحكت ودارت وجها حضنتها وهمست يابة هوة منو يدلع هيج حلو وينوكل فهميني ضحكت وكالت لا بس اني بستها بخدها وهمست تنسحن روحي 

على هاي حركاتج ارحمي بحالي ابتسمت وكالت ترة احبك ؟همست بحب اموت عليج جوريتي وكلت شنو مناوية اليوم تنامين باجر العرس كالت من 

الفرحة طار النوم هسة خلي انام باجر وراي كعدة من الصبح بستها بخدها وهمست اييي وهية ضلت تحجي وياي بهدوء وكلما تضحك اكلها اشش غلا

 راح تكعد علينا وتسهرج للصبح وتسكت لحد مانامت وهية مجلبة بركبتي وحاضنتني وغفينا والابتسامة مرسومة على وجوهنا .

سارة 

رجعت بليل لبيتنا وكلت الصبح عود ارجع لاهلي دخلت ،والبنات جانن وياي بالحنة تونسنا حيل ،صعدت لغرفتي الضوة طافي امير نايم دخلت على 

كيفي اخذت ملابس من الكنتور ودخلت سبحت وطلعت مشطت شعري همزين اكو ضوة جاي من الحمام ،وخليت مرطب لوجهي وادية، ورحت 

للجرباية تمددت ومااحس الة امير حضني ابتسمت وكتلة كاعد همس اممم هستوني باسني بخدي شبكته وكتلة اوي اشتاقيتلي مو حقك حقك ضحك 

وكال اي كلش فوك ماتتوقعين بسته بخده وهمست غصبا ماعليك خوش ضحك بهدوء وكرصني كمزت كتلة امييير لاتكرص ترا  اعوفك والبس 

عبايتي واروح لاهلي كال شحدج تطلعين وشبكني حيل وضل يشاقة وياي واني اكمز وخربانة ضحك،كالت بضحك صوتج شهرتينا دنيا ليل كتلة واني

        

          

                

 اضم راسي بركبته شعلية غير انتَ تضحكني وضلينا نسولف ونضحك لحد ماغفيت واني حاضنته .

في اليوم التالي 

ريحانة 

فزيت الصبح على صوت الهوسة بالبيت  باوعت للساعة ٩ الصبح ،كمت بساع غسلت ورتبت شعري ومالكيت ياسر وملوكة يمي اكيد ماما منزلتهم 

طلعت من الغرفة نزلت ،شفتهم كاعدين يتريكون بالاستقبال وغلا وياسر وملوكة على صفحة ومغطيتهم ويناغون ببحدهم ابتسمت وكتلهم صباح 

الخير ردوا كلهم صباح النور بست ماما وبابا من راسهم ودنكت على الجهال بستهم وكلت ماما شوكت نزلتيهم كالت يبجون وانتِ نايمة صعدت 

ردت انومهم مناموا خليت ونزلتهم بست ملوكة وكتلها ملعونة اكيد انتِ بجيتي وكعدتي ياسر وهية تكمز ضحكت وبابا سوالي مكان يمه وكعدت 

اتريك وسارة هم جاية من الصبح ومريم كاعدة يم محمد ويسولفون ويضحكون كتلة بفرح مبارك مبارك عريسنا مبارك وحسين طك اصبع 

وسارة هزت ركبة وبابا اللكمة ضلت بحلكه وصافن علينا وطكيناها بضحكة وهوة ضحك وكال متصيرلكم جارة موكدامكم نعمة الله احترموها 

شوية ،حسين كال رجاءاً طلوبي فرحانين لاتحجي ويانا باوعله بتك عين وكله ها يعني اعوفك تهز وتتمركص على راحتك البارحة شسويت بالقاعة 

الحمدالله ضاعت تربيتي بيك،ضحك وكله يابة غير حنة محمد هاي مو اي احد ان شاء الله بحنتي اخليك تتبرة مني ضحك بابا وكله متصيرلك جارة 

متصير ،ضحك حسين باوعلي وكال وين مفلوكة كتلة شنو كال ملوجة كلت لبابا شوفههه يكوللل على بنتييي مفلوكة ميكول ملوكة بابا ضحك وكله 

حسين عوف البنية لا تضوجهاا كاليومية احنا نحجي يعني ،كال حسين خاب دروحي منو مدلع بنتج اشو بس اني المفروض تفتخرين كتلة دروح افتخر 

بيك وتكلها مفلوكة وهمة يضحكون وهوة يهمس الي مفلوكة ويعيب عليها ،واشيل روحي وادكها بالكاع لحد ماتعايشت وية الوضع وضليت 

اضحك ،كملنا ريوك وبساع كمنا ننضف بالبيت وصعدت لغرفة محمد هية نضيفة والنزلة مفروشة وكلشي تمام بس رجعت مسحت وعطرتها وشغلت 

قران بيها ،ورتبت الغرفة ومريم تكنس وسارة تمسح وماما ترتب ويانا ،والطباخ اجة بالحديقة لين غدة اليوم ،ورة الاذان بدو يجون الخطار 

اني صعدت الجهال بغرفة حسين نامو ،والتهيت اروح منا واجي منا ،وماما تبخر بالبيت ،لحد ماصاحتني سارة شسورت شعرها وكملت شسورتلي 

شعري ومريم مشسورة من زمان والبيت انكلب بالخطار والهلاهل والهوسات ومنا اغاني ،همزين غرفة حسين صايرة بنهاية الطابق الثاني 

جان الجهال كعدوت من ورة الهوسة وتبهذلت ،شوية وصعد محمد وحسين وارتفعت الهلاهل وماما تهوس اله وحسين وياها واحنا ،صعد بالغرفة يبدل 

        

          

                

لبس القاط ورتب شعره والعطر وحسين يعدله بالياخة ويهوسله واخر شي تحاضنوا وباسه من راسه وباركله ،نزل محمد واني رحت وية حسين 

قميصه شوي تعقج اكويه اله دخل للغرفة واني اكوي كتله بهدوء اشش لا يكعدون الجهال واموتكك ضحك وكال سكتت سكتت ،راح بدل وطلع عدلت

 اله السترة وبسته بخده وهمست يوم الالك يابعد روحي ونفرح بيك ابتسم وباسني براسي وكال ام ملوجة الغالية ضحكت وضربته على كيف وكف 

يمشط ويرتب شعره رش عطر ولبسته الساعة ،ولبس محبسه وووكفت اخذت اله كم صورة ونزل ،القاط الاسود طالع بيه ياخذ العقل يمة فدوة 

لاخوي خليت ودزيت الصورة لنازك ودزيت لباسل كم رسالة وسديت المبايل ،وكفت ابدل لبست الكيلوت والقميص ،رتبت شعري نازل على طوله 

وخليت مكياج وطوخت الحمرة ودخلت سارة ومريم تقريبا نفس لبسي بس اختلاف بالالوان طالعين نخبل يمة فديتنا ههههه ،وكفنا ناخذ صورة 

وفيديوهات ونركض على صوت الاغاني ،ودزيناهم لنازك لين مااجت للحفلة ماكدرت يلا ان شاء الله بعد ايام تصير منا وبينا ونشبع من 

عدها ،كعدوا الجهال وبدلت الهم وشلت ملوكة ومريم شالت ياسر ونزلنا والمعازيم كومة سلمنا وكعدنا وملوكة تستغرب منو يتقرب الها تبجي وتضم 

راسها بصدري واني اسكت بيها وياسر يبجي علية اخر شي خليتهم ثنينهم بحضني وسارة تاخذ النا صور وتضحك واخذنا صور وية ماما الي طالعة 

تاخذ العقل ام العريس بعد ،لابسة قفطان يصير طويل ولونه اسود وبيه فضي ومرتبة كصة شعرها ،ومشسورته وباقي مفتوح ،والمكياج سموكي 

ومن جابت جسمها ترتب وصار يموتت يمة اذا يشوفها بابا يتخربط متتتتت ،وهية فرحانة بينة وتصلي على محمد وكالساع تجي تاخذ ملوكة لو 

ياسر وشوية وترجعهم وغلا مامفارقتها بحضنها ،والنسوان يباوعن الها ويتهامسن خوب نسوان عمامي خلوها سكتة احسن ،يمة فديتها لامي شوية 

ودخل بابا مستعجل لين يركض منا ومنا دخل علمود يبدل راح للغرفة وكال صيحيلي امج بساع وين الملابس وبابا حبيبتي جيبيلي كلاص مي عطشان 

كتلة تمام بابا صحت ماما وراحتله بساع وخليت الجهال يم البنات واخذت اله مي دخلت للغرفة شفته يحجي وية ماما ،يكلها من تدخلين

 للمطبخ خلي اشوف شعراية طالعة من الشال العب بيج جولة جوري ،من شافني سكت واني بالكوة ضميت ضحكتي وماما مبتسمة وتباوعلي ومبين 

ضامة ضحكتها لبس دشداشته البيضة ودكمها وواكف يلبس بالساعة ،شرب المي وكال فدوة لايدج ابتسمت وكتلة الف عافية ،كمل ورش عطر كتلة 

اوكف خلي اخذ صورالك ولماما بابا كال مستعجل بابا غير وقت كتلة بساع مااتاخر بساع رحت جبت المبايل وماما وكفت يمها وهوة حاوطها بايده 

        

          

                

ومبتسم واخذت الهم كومة صوت حلوات وهوة كالساع يصفن بوجها ويبتسم عمي حقه ،اخر شي طلعت من الغرفة سمعت صوت ياسر يبجي بساع 

رحت ومريم كالت وين تاخرتي الولد بس يبجي عليج اخذته بسته وكتلة هياتني اجيت ياروحي انتَ سكت وبسته بخده ومبرطم وعيونه يمة 

متروسات دموع يموييي سودة علية بسته من عيوني وكلت هياني ماماتي على شنو البجي بعد وملوكة العيارة ماتبجي متونسة من شافتني شلت ياسر

 بجت تريدني وضليت شايلتهم وحايرة بيهم،لحد ماكالوا راح يرحون لبيت العروسة وتصير الزفة كلها كامت تطلع تركب بالسيارات ،دك مبايلي باسل

 جاوبته بساع وسلمت عليه وكتلة ها حبيبي انتَ وين ،كال ويمه صوت هوسة ،ها عمري لاتركبين وياهم منتظرج بسيارتي برة جيبي الجهال 

وشوفي منو وياج يجي وتعالي ،كتلة بفرح يمة فديتك نقذتني عود كلت 

مااكدر اروح علمود الجهال كال بضحك ديلا تعالي ،كتلة جاي جاية ،سديت 

الخط وركضت صحت مريم وسارة يجن وياية لين امير واحمد ملتهين وبسياراتهم الولد وماما تركب بسيارة بابا ،لميت شعري ولفيت الشيلة 

ماالبس عباية لين القميص طوله زين ومستور ورتبت مكياجي ولبست الجنطة ،وشلت ياسر وسارة شالت ملوكة ومريم ويانا وطلعنا البيت فارغ 

يمة عافونا وراحوا طلعنا بساع طلعت ماما واكفة بالكراج هيةً وحسين منتظرينا نجي وكال بعصبية وين تاخرتن امشن بساع طلعنا سيارة باسل 

واكفة بالباب ،بساع صعدت بالسطر وهنة صعدن ورة سلمنا عليه وهاي وهوة باوعلي وابتسم واخذ ياسر باسه ورجعه الي ومريم عبرت اله ملوكة 

باسها ورجعها ،بدا يسوق واني اشغل بالاغاني واندمجنا وحاضن ايدي واندمج وباسها والبنات ضحكن شهرني وخزني متتتتت ضحك 

ويانا ،والسيارات كالساع واكفة ونازلين دك وركص ،لحد ماوصلنا لبيت عمو غالب ،نزلت واخذت ملوكة وياسر بقة باسل دخلنا وارتفعت الهلاهل 

والهوسات ويهوسن بالنص ويكولون فصوص روبة ويا كفاها وين دورها ولكاها وكللوشش واني اررص وفرحانة وملوكة بايدي ،وسارة ومريم 

وياي ،وماشاء الله وداد طالعة تموتتت بالبدلة البيضة ومن شافتنا ابتسم وبسناها وباركنا الها ورجعنا نركص ،والفرحة ماليتنا والابتسامة مرسومة 

على وجوهنا ،لحد مادخل محمد وارتفعت الهلاهل والجكليت وماما تهوسلة وتكول ياهل القوط ذبوا القوط حمودي لبس قاطه وهوة يضحك وحضنها 

وهم باسها براسها واديها بعدين تقدم باس ودادا من راسها وكعد يمها .

وداد 

حضن ايدي وباسها حيل وهمس مبروك علينا حبيبتي ابتسمت بخجل وهمست الله يبارك بيك حبيبي ،وضلوا ياخذون النا صور ،وعلامات 

الاربتاك والخجل واضحة على وجوهنا ،وكالساع يهمس الي بكلامته الحلوة ويخيلني اسيح من الخجل لو يضحكني ويهدا بية لين الرجفة مامفارقتني ،من 

كالوا راح يطلعون وهوة كام ومد الي ايده مدري شصار بية خليت ايدي بيه وكومني وصرت بصفه وارتفعت الهلاهل و دخل بابا وسلمني بايده ووصاه

 علية واني اختنكت والدموع ملت عيوني ،باسني براسي واني شبكته ونزلت دموعي ومسحتهم ويهدأون بية ،لزمني محمد من ايدي وباسها وكال اجيبج 

بأي وقت تردين عليمن البجي بعد،كتلة وعيوني مدمعة والله؟ضحك وكال وداعتج ابتسمت وطلعنا والهلاهل طرشتنا وهوة لازم ايدي والبرنص ضعت 

بيه ،صعدنا بالسيارة وحسين يسوق وعالك الاغاني وعمو بالصدر، رفعت راسي  باوعت  لمحمد حاضن ايدي وساند راسه على كتفي ابتسمت وهوة

 شافني وهمس بهداي ،نضراتج راح تموتني ،هدت حيلي ابتسمت بخجل وهوة ضحك بهدوء وافتروا هواي وكالساع موكفين السيارات ونازلين ،لحد

 ماوصلنا لبيت عمو ونزلنا وقبل لا ندخل ذبحوا خروف يم رجلينا واني مجلبة بمحمد دخلنا وهوسات وهلاهل حسيت راح افقد الوعي من كد 

ماارتبكت وتعبت دخلنا كعدت بالاستقبال وهوة طلع واجتي عمتي يمي شربتني مي وماما تهدا بية والبنات واكفات ،وتقريباً ساعة وصعدوني 

للغرفة وسمعت هوسات ويكولون زفيناه بوصاية حيدر زفيناه وهوسات هزت البيت هز واني ارجف وماما لازم ايدي وتمسد على راسي دخل محمد 

وهمة نزلوا وعمة بوستنا وباركت النا وماما نفس الحالة وطلعن من الغرفة وهوة تقدم نزع السترة وعلكها واجة يمي مباشرتا حضني وضل واكف 

لاارادياً حضنته وانزاح كل خوف مني حتى الرجفة راحت ،رفع راسه ابتسم الي وباسني من راسي وهمس يايابة شكد صار منتظر هاي اللحظة ؟

الحمدالله والله يكتب النا السعادة ولايحرمني منج ابتسمت وهمست ولامنك امين وسندت راسي على صدره وهوة يمسد بهدوء على راسي وباسني 

براسي وهمس يلا روحي بدلي البدلة تعبتج هزيت راسي وشلت البدلة دخلت للحمام نزعتها وسبحت ولبست السيت الابيض  وطلعت واني انشف بشعري 

وهوة دخل يسبح واني رتبت شعري وخليت حمرة خفيفة ورشيت عطر وهوة طلع باوعلي ابتسم وابتسمت اله وكف مشط ورش عطر بعدين ،جابوا 

العشة تعشينا ونزلوه ،وتمدد على الجرباية وفتحلي ايده شمرت روحي بحضنه ضحك وباسني بخدي وهمس احبج ووووووو.

ريحانة 

صعدوع العرسان وخفوت الخطار وبدينا ننضف بالبيت الي انكلب كلاب والاماعين تكومت قسمنا الشغل واني وكفت اغسل بالاماعين وياسر يم باسل

 برة وملوكة نايمة لو يمي وكاعدين جان تبهذلت  جان تبهذلتت ،هلكت واني اغسل بيهم وسارة كملت المطبخ مبقت بيه شي بس الاماعين اغسلهم 

وانضفهم ،كملتهم وجاي اعزل ولمحت باسل دخل يتمشى ولابس دشداشة بيضة والساعة محلية ايده وشعره مرفوع وشواربه محددة،وياسر بايده 

ويخابر ،ابتسمت على منضرهم وشكلهم الي يسحن الروح وهوة سد الخط وانتبه الي بدون اي مقدمات ومبررات ركض وطلعت من المطبخ وحضنته حيييل ....

يتبع ...