رواية رواسي الدهر الفصل التاسع 9 - بقلم روح الدليمي

 

➰➰➰➰➰➰➰➰➰➰➰

طلعت اتسحب من الغرفه بدون صوت، رحت يم غرفه هيا 

شفت الباب مسدود و الضو مفتوح 

قربت راسي على الباب سمعت صوته جوه 

يعني راح يمها!!! انفتح الباب و عثرت لزمني من خصري حتى ما اوكع و گال 

رسيم:الله الله، تأذيتي ؟ 

رواسي:اي 

رسيم:شوو اشوف وين انضربتي 

اشرتله على گلبي و همست بصوت بس هوَ يسمعه.. 

رواسي:گلبي الي تأذه و اذيه الگلب تذبح 

 بعدت روحي عنه و طلعت بدون ما اباوع بوجههم 

دخلت للغرفه و عفت الباب مفتوح، شوي و اجه 

شاف ملابسه بعدهن بمكانهن فتح الكنتور و رجع يرتب بيهن بدون ميحجي شي 

كمت من مكاني طلعتلي ملابس للنوم و هالمره 

بدلت بالغرفه و تحت انظاره... لبست نفس ما متعوده بنومي البس، شورت و بدي حفر.. مشيت من يمه دخلت للحمام فرشت اسناني و غسلت وجهي و رجعت تمددت بفراشي.. هوَ اخذ بس بجامه بدون تيشيرت و دخل للحمام شوي و طلع بارز عضلاته و صدره عاري 

اجه تمدد بالفراش بدون ميحجي شي 

فتحت تلفوني و صرت اگلب بي مو نعسانه ابد 

فريت روحي و تمددت على ظهري و كعدت اگلب 

اجتني رساله من رقم غريب رأساً دار روحه عليه 

يباوعلي يريد يعرف منو الي دز رساله 

فتحتها طلع زميلي بالجامعه عبد العزيز يسئلني اذا اداوم بالمستشفى باجر او لا، كتبتله "اي" و سديت التلفون حطيته على الشحن.. سحبني من خصري و لزگني لزك بي و گال 

رسيم:نامي بحضني 

رواسي:اريد احس بالامان وياك رسيم 

طبع بوسه على كتفي و جاوبني 

رسيم:كل الامان الج روسيه

رواسي:خايفه منك 

فرني عليه صرنه وجه بوجه و انفاسنه اختلطت ببعضها.. 

رسيم:خافي من الدنيا كلها بس لتخافين مني 

رواسي:بس أنتَ تأذيني و تجرحني و لا كأنو اني بشر و عندي احساس 

رسيم:شنو تريدين اسويلج و اخليج تحسين بالامان ويايه 

نزلت عيوني عنه و حجيت

رواسي:اختار أنتَ منو تريد يبقى وياك طول العمر اني لو هيا؟ 

                

رسيم:بدون اي تفكير أنتِ، هايم بيج اني روسيه مستحيل ابدلج ببنات العالم كله 

رواسي:ليش تهددني بيها و رحت يمها قبل شوي؟ 

رسيم:رحت يمها حتى تفتحيلي الباب و حجيت وياها علمود باجر اخذها لاهلها طلبت منها تحظر اغراضها 

رواسي:احسني وحده حقيره لان اريدك تطلكها، بس رسيم أنتَ مالتي اني ما اقبل وحده ثانيه تشاركني بيك! 

رسيم:شكد تحبيني روسيه؟ 

ركزت عيوني بعيونه و حجيت بهدوء..

رواسي:بكد تعذيبك الي 

بعدت روحي عنه كعدت و سندت ظهري 

على ظهر الجربايه و اردفت.. 

رواسي:تعرف احسني وحده مريضه 

رسيم:لا ليش؟

رواسي:لان حبيتك و أنتَ خطفتني و عذبتني و تزوجتني غصب عني... بس برغم كل هذا حبيتك، وين اكو وحده عاقله و عقلها براسها تحب شخص عذبها؟ 

رسيم:مثل ما اني بقيت احبج حتى لما عرفت ابوج السبب بموتت امي، الحب مو بيدنه گلوبنا هيَ الي تحب 

رواسي:بس أنتَ عاقبتني على غلطه مو غلطتي 

كعد نفس كعدتي و گال بنبره حزينه.. 

رسيم:متندم روسيه والله متندم مستعد اسوي كلشي في سبيل تسامحيني 

رواسي:تريدني اسامحك؟ 

رسيم:اي والله وداعتج ندمان على الساعه الفكرت بيها اخطفج و اعذبج 

ميلت راسي حطيته على كتفه، مشيت اصبعي 

بكل خفه على صدره مكان الطلقه و گلت بهدوء و حب.. 

رواسي:خلي روحك بروحي و لتجرحني ابد 

فر نفسه و نام صفح فتحلي حضنه و گال 

رسيم:تعالي يا بعد الروح أنتِ 

تمددت بحضنه و صرنه وجه بوجه، طبع بوسه

على كصتي و گال 

رسيم:حضني امان الج من كلشي بالدنيا 

قربت وجهي عليه اكثر تجرأت و طبعت

بوسه على شفايفه و همست.. 

رواسي:لتأذيني بعد فدوه 

بلحظه وحده صار فوكي و گال 

رسيم:أاذي روحي قبل ما اذيج.. 

طبع بوسته على شفتي و گضينه ليله حلوه 

نسيت كلشي بهاي اللحظه، تذكرته هوَ و بس 

چانت ليله ممتعه.. مليانه مشاعر 

نمت بليلتها نومه مريحه بعد عذاب اشهر.. 

و لاول مره احس بالامان ويه رسيم.. 

        

          

                

كعدت الصبح على صوت المنبه، طفيته و كمت من 

مكاني طلعت ملابس و فتت لحمام حتى اسبح

بدلت هدومي و طلعت لكيته گاعد بس شافني 

كام من مكانه اجه ب اتجاهي حضن خصري بيده 

و طبع بوسه على شفتي گال.. 

رسيم:صباح الحب 

مديت ايدي حاوطت رگبته و رديت

رواسي:صباحي أنتَ 

رسيم:احبج باباتي 

رواسي:روسيه احلى تخصني بس اني متكدر تكولها لغيري 

رسيم:متنكال لغيرج بعد ابد 

رواسي:عفيه، يلا فوت اسبح حتى توصلني راح اتأخر

رسيم:ما اتأخر بس طلعيلي ملابس حَبيبي 

بسته من خده و رحت فتحت الكنتور 

طلعتله ملابس حطيتهم على الجربايه و اخذت اغراضي 

و نزلت جوه، لكيت الكل كاعدين صبحت عليهم 

البنات كامن للمطبخ يحظرون ريوك دخلت وياهم اساعدهم بلكي اتعلم منهم، رشا گالت 

رشا:روسيه عيوني كعدي أنتِ بعدج عروس 

ضحكت و گلت.. 

رواسي:شلوون عروس دخيلج، اريد اساعدكم بلكي اتعلم منكم شوي 

عذراء:شعجب متعرفين تسوين شي؟ 

هيا:حايره بخطف الرياجيل منين يصير عدها وقت تتعلم 

غمضت عيوني بقوه و زفرت نفسي متعصبه.. 

رواسي:اني من البدايه گلت معاملتج الحلوه و كلامج العسل هذا كمين بعدين تطلعين على وجهج الحقيقي 

توقعت بعد كم شهر يلا يطلع بس زين طلع من اول يوم و خليتي الكل يعرف أنتِ شنو!

عذراء:رواسي غلسي و معليج 

رواسي:و بالنسبه ليش ما اعرف كلشي، لان امي جانت مدللتني متخليني اسوي اي شي بالبيت حتى اركز بدراستي 

رشا:احنه نعلمج بس مو هسه تخرجي و نكربج كرب 

تدللين 

ضحكت وياهم و كملنا تجهيز الريوك، الي حضرت

الاجبان و اللبن و الي خدرت جاي و الي سوت بيض 

صرنه ننقل كلشي للصاله.. اروح و ارجع و رسيم على نفس نظراته و ابتسامته لما يشوفني 

خلصنا كلشي و كعدنا نتريك، باوعت للساعه و 

حجيت ب استعجال 

رواسي:حَبيبي يلا راح اتأخر 

رسيم:يلا كومي 

ترخصنا منهم و كمنا غسلنا و طلعنا وصلني 

للمستشفى الي راح اطبق بيها و گال 

رسيم:رواسي 

رواسي:عيونها 

رسيم:لتختلطين بالشباب 

        

          

                

رفعت حاجبي معاجبني كلامه و حجيت

رواسي:يعني شلون بله؟؟ 

رسيم:على كد الشغل و بس و رقمج ممنوع تنطينه لاحد 

رواسي:اومر ثانيه استاذ رسيم؟

رسيم:كل شوي خابريني سمعيني صوتج 

رواسي:حَبيبي ليش متجي ويايه مو احسن؟ 

رسيم:خوش فكره 

رواسي:باي رسيممم

سحبني من ايدي قربني عليه وطبع بوسه على خدي

بعدته عني و حجيت منفعله.. 

رواسي:مووو هناااا مووو هناااا 

رسيم:مرتي أنتِ روسيه

رواسي:حتى لو عيب حَبيبي 

اخذت اغراضي و نزلت من السياره دخلت 

للمستشفى و هوَ راح... اجتمعنا اني و زملائي الي ديطبقون مثلي و صارو يشرحولنه على كلشي 

توزعنا كل مجموعه على قسم معين و اني جنت بالطوارئ.. اليوم كله كضيتها ركض بركض 

هلكت كلش و رجعتلي التقلصات بسبب التعب، طلعت تلفوني من جيبي و اتصلت على رسيم ما جاوبني 

ماعندي رقم واحد من اخوانه حتى اخابره يجي ياخذني 

دزيت رساله لرسيم كتبتله 

رواسي:حَبيبي خلي احد يجي ياخذني خلصت اني 

ما شافها و لا جاوبني.. بقيت ساعه كامله انتظر 

كل الي ويايه خلصوا و راحو بقيت بس اني 

رجعت دكيت عليه مجاوبني انجبرت اخابر ادم 

لان بعدني ما اندل البيت ماكدرت اروح بتكسي 

رواسي:هلا ادم شلونك؟ 

ادم:بخير و نعمه الحمدلله و أنتِ 

رواسي:بخير، ادم اذا ماعندك شي تكدر تجي ترجعني للبيت؟ 

ادم:ليش وين أنتِ؟ 

رواسي:بالمستشفى و صار ساعه انتظر رسيم ماكو و ميرد عليه 

ادم:يلا هسه اجيج 

سديته من عنده بعد ما انطيته اسم المستشفى الي اطبق بيها، و دزيت رساله لرسيم 

رواسي:خابرت ادم راح يرجعني هوَ لان أنتَ ماكو 

هم ما شافها، طلعت بَره انتظر ادم 

عشر دقايق و سيارته صارت كدامي، صعدت وياه 

و اخذني للبيت تشكرته گال 

ادم:بالخدمه روسيه شوكت متحتاجيني تلكيني يمج 

رواسي:متقصر عيوني، سلم على اهلك 

        

          

                

ادم:يوصل ديري بالج على نفسج 

نزلت من السياره و دخلت البيت غسان و محمد 

كاعدين بالصاله و صوت البنات جاي من المطبخ 

رواسي:سلام 

محمد:الله يساعدج عيني 

گعدت و جاوبته

رواسي:ويساعدك يارب 

غسان:وينه رسيم لعد؟ 

رواسي:ما اعرف دكيت عليه ما جاوبني و دزيتله هم ما رد عليه

غسان:لعد منو جابج؟ 

رواسي:ابن عمي ادم خابرته و رجعني 

محمد:ليش ما دكيتي على واحد من عدنه؟ رسيم مخبل اذا يعرف يسوي مشكله 

عدلت شعري و حجيت..

رواسي:ماعندي ارقامكم و اني دزيتله بلغته انو ادم راح يرجعني ما اتوقع يسوي شي 

كمت من مكاني و گلت 

رواسي:من رخصتكم اروح ابدل و ارجع 

غسان:اخذي راحتج عيوني 

صعدت فوك فتت سبحت و طلعت بدلت 

ملابسي و نزلت جوه، بوجهي للمطبخ سلمت على البنات 

و كعدت يمهن جانن يلفن دولمه 

رواسي:شنو غدانه دولمه اليوم؟ 

رشا:لا هاي للعشه 

رواسي:اكو احد يتعشى دولمه!! 

عذراء:منين جايه حَبيبي من يا كوكب 

ضحكت رشا و گالت 

رشا:من المريخ 

رواسي:اني اهلي يتعشون خفايف و اصلاً منسوي عشى 

كل واحد يسويله شي سريع و ياكله او فواكه لذلك استغربت 

عذراء:الي بهذا البيت اذا عشاهم مو ثكيل يبقون جوعانين 

رفعت ايدي الم شعري و بين اثر الحرق بزندي 

باوعولي مستغربين و عذراء گالت.. 

عذراء:روسيه هاي شبيها ايدج؟ 

نزلت عيوني على زندي ضحكت و گلت.. 

رواسي:قديم احتركت بالفحم 

رشا:اووف سوده عليه اكيد تأذيتي 

رواسي:اسم الله عليج، موتني و طول هوايه لحتى طاب 

بس احبه 

رشا:تحبي؟

رواسي:لان سبب هذا الحرق شخص عزيز عليه و كل ما اشوفه يذكرني بي 

باوعت حواليه و اردفت.. 

رواسي:هيا وينها مالها صوت؟ 

عذراء:اخذها رسيم لبيت اهلها من الصبح 

        

          

                

رواسي:اهاا 

دك تلفوني شفت المتصل "رسيم" اخذته و كمت 

من مكاني جاوبت اجاني صوته يصيح 

رسيم:وينججج أنتِ؟؟؟ 

رواسي:بالبيت اني ليش تصيح! 

رسيم:اني شحجيييت رواسييي؟؟ 

رواسي:من تجي نحجي راح اسده 

سديته بوجهه و رجعت يم البنات وكفت يم الطباخ 

فتحت الجدوره اباوع شمسوين اكل، درت روحي عليهم و گلت 

رواسي:شنو الاكل؟ 

رشا:طرشانه و تمن 

رواسي:ماكو خيار ثاني؟ 

رادت تجاوبني بس قاطعها صوت رسيم 

يصيح ب اسمي.. طلعت من المطبخ و رحتله 

بس شافني عاط.. 

رسيم:و تاالييي ويه عنادج رواسي؟ 

رواسي:شسويت حَبيبي 

استغليت الفرصه محد موجود بالصاله.. 

قربت روحي عليه اكثر بسته من خده و حجيت بهدوء

رواسي:سويت شي غلط عُمري ؟ 

رسيم:لتتدلعييين 

حطيت ايدي على كتفه و حجيت بدلع..

رواسي:اني اتدلع على حبيب روحي، منو مضوج حَبيبي الحلو 

طبعت بوسه ثانيه صارت قريبه من شفته 

و اردفت.. 

رواسي:احجيلي گلبي اسمعك بكل حب 

بعدني عنه لما نزل غسان من فوك 

و گال.. 

رسيم:خو ما تعبتي اليوم؟ 

حجيت بهمس 

رواسي:بس شفتك نسيت كل تعبي روحي 

تحمحم و واضح عليه التوتر و گال 

رسيم:غسان تعال رايدك بشغله 

غسان:ترا ميتين جوع اجل موضوعك لبعد الغده 

رواسي:الاكل جاهز هسه اصب 

رفع حاجبه مستغرب و گال 

رسيم:أنتِ تصبين الاكل؟ 

رواسي:اي شنو ماعندي ايد

رسيم:تطورات حلوه يلا بسرعه 

رحت للمطبخ البنات واكفات وحده تغسل مواعين و الثانيه تحمي بالاكل.. وكفت اساعدهم و صبينه 

الاكل و كعدنا كلنا ناكل.. اني طلعتلي لبن روبه و اكلته ويه التمن ما احب الطرشانه ابد 

رسيم:جيبي ماعونج احطلج 

رواسي:لا دااكل ما اريد 

        

          

                

رسيم:و الطرشانه؟

رواسي:اكو احد ياكل مربى و تمن؟ 

كلهم ضحكوا ضحكت وياهم و اردفت.. 

رواسي:والله شلون تاكلوها 

محمد:والله طيبه 

رواسي:بالعافيه عليكم عيوني 

قرب روحه و همس بعصبيه 

رسيم:تردين عيونج تنعمي بعد روحي ؟ 

رواسي:ميجي من گلبك 

باوعت على البنات و حجيت بصوت مسموع

رواسي:عاشت ايدكم بنات 

عذراء:بالعافيه حبي بس ما اكلتي شي 

رواسي:الحمدلله شبعت، من رخصتكم اروح انام شوي تعبت اليوم

كمت من مكاني و صعدت فوك غسلت و تمددت 

بالفراش الوجع ذبحني ذبح، من اجيب شيصير بيه؟ 

غمضت عيوني و من التعب رأساً غفيت..

حسيت على صوت رسيم يكعد بيه، فتحت عيوني باوعتله 

گال..

رسيم:هااي شنوو رواسيي؟؟ 

عقجت عيوني اريد اصحصح و گلت 

رواسي:شنو حَبيبي ؟ 

مدلي صوره اخذتها من عنده، صورتي اني 

و ادم حاضني و لازك خدي بخده و ثنينه نضحك.. 

رواسي:صوره شبيها؟ 

جاوبني بعصبيه.. 

رسيم:تحبيي؟؟؟ 

عدلت روحي كعدت و حجيت..

رواسي:اذا متبطل عصبيتك هاي متحصل مني اجابه 

كعد يمي يباوعلي بغضب و حجه بهدوء 

رسيم:شنو هاي الصوره حَبيبتي؟ 

رجعتها اله و حجيت بنفس نبره الهدوء

رواسي:صوره قديمه قبل كم سنه شجابها يمك؟ 

رسيم:أنتِ تحبي رواسي؟ 

رواسي:و برأيك اذا احبه ارجعلك؟

رسيم:لا 

كمت من مكاني و حجيت 

رواسي:بعد شكو تسأل لو ماعندك ثقه بيه؟ 

رسيم:و شعنده هيج لازك روحه بيج!! 

رواسي:ابن عمي ترا و رابين سوه احنه و هاي الصوره بعيدميلادي اخذناها، و بعدين مالك حق تحاسبني على اي صوره الي ويه اي شخص من عائلتي! 

سحبني من ايدي كعدني بحضنه، دفن راسه 

بركبتي و گال بخدر.. 

رسيم:اغار عليج من الطير الطاير شتحجين أنتِ 

رواسي:تجي و تسألني بهدوء اذا ترفع صوتك عليه بعد، اعوفك والله و ارجع لاهلي 

ابتعدت عن حضنه و اردفت.. 

رواسي:بعدين وينك أنتَ اليوم؟ عفتني انتظرك و لما رجعني ادم عصبت عليه! 

رسيم:جنت بالمحكمه، تطلكنا اني و هيا 

رفعت حاجبي معاجبني كلامه و گلت

رواسي:متأكد رسيم! 

رسيم:اي ليش اكذب عليج؟ 

رواسي:تمام 

عفته و دخلت للحمام غسلت و نزلت جوه 

بدون ما احجي وياه بعد.. گلبي ما مرتاح و حاسه اكو شي ديصير من ورايه.. رحت كعدت بالصاله بدون ما احجي شي و بقيت افكر.. احس روحي استعجلت برجعتي اله

بس ردت احرك گلب ابويه بزواجي من رسيم 

و فوكاها رأساً سامحته والله يا رواسي مال قندره و دككك على راسج حتى تصحين على روحج و تفكرين عدل.. 

قاطع تفكيري صوت رشا.. 

رشا:شبيها القندره 

رديت بفهاوه.. 

رواسي:هاا، ياقندره؟ 

رشا:أنتِ كلتي قندره و سكتي 

رواسي:هيج و لا شي داافكر، وين الولد لعد؟ 

عذراء:مو كدامج كامو ويه رسيم وين بالج صاير شي وياج؟ 

رواسي:رسيم صدك طلك هيا؟ 

عذراء:اي 

هزيتلها راسي و بقيت ساكته.. ما اعرف شنو يدور بعقلي 

رجعوا الولد كعدوا و بقوا يسولفون بيناتهم 

حسيت اصواتهم صارت بعيده عليه وشوي شوي 

صارت تختفي، و بعدها ما حسيت على اي شي...