رواية ذنوب على قيد الغفران الفصل الثامن 8 - بقلم براء
البارت التامن
البـــــــــارت الثامـــــــــن
مرحبا حبايبي العسل شلونكم ❤❤
طبعا اليوم مزاجي كولش محلو وضايجه الى درجه فأريد تعليقات هيج حلوه وعسل مثلكم بحيث تغيرلي مودي 🙂❤
#ذنوب على قيد الغفران
#للكاتبه براء
فهد : اليوم عندي استراحه وكالعاده امي متخلي واحد يطلع تريدنه كلنه متجمعين وشلون جمعه هي .... كاعد بالمطبخ اشرب جاي واروى ماسكتت من الصبح مستلمه امي تنطيهه تقرير عن جوارينه الجدد والي تفاجئنه من كعدو لان هالبيت من قبل لا نجي احنه للدنيا هو متروك
ايمان : يمه خو كتيلهم اذا يحتاجون شي لايترددون يجونه
اروى : لايمه كتلهم بس مبين كلش حبابين خو بنتهم تخبل جميله بشكل
منذر : وحده وتعجب اروى اغسل ايدي منها
آلاء : هي اروى ماعدها ذوق باللبس تردوهه يصير عدها ذوق بالبنات
ورده : حجت سندريلا
فيصل : خزرتهه لسانج
ورده : باوعتله صفح فيصل الخيخه
فهد : اندك الجرس كمت طلعت بره فتحت الباب شفت وحده ... ركزت بوجها هاي نفسها الي شفتها بالمستشفى
غنى : هم انت ؟
فهد : عفوا
غنى : بكلبها شكله ماعرفني .... احم السلام عليكم
فهد : وعليكم السلام تفضلي
غنى : احنه جوارينكم الي انتقلنه من فتره
فهد : بهدوء اهلا وسهلا بيكم
غنى : تسلم ... تفضل انطيته الصينيه واجيت اروح
فهد : لحظه
غنى : نعم
فهد : شلون صار اخوج
غنى : دمعت عيوني ... توفه
فهد : تندمت لان سألتها ... الله يرحمه
غنى : ويرحم امواتكم ... يله مع السلامه
فهد : هله ... دخلت وسديت الباب
سعاد : منو اجه
فهد : خليت الصينيه على الميز ... الجوارين الجدد
علي : اي شفتهم جاي ينزلون غراضهم قبل جم يوم بس شعجب كعدو هنا مو صارله فتره طويله البيت متروك
ايمان : والله ماادري يايمه احنه شعلينه
اروى : فهد منو جاب الاكل بنيه لو مره جبيره
فهد : لا بنيه
اروى : شفتها شلون حلوه
فهد : وين الحلا بالموضوع شكلها مستفز
علي : اخذت دولمايه ... الله هي هاي دولمه ودولمه آلاء دولمه وبعدين تعال فهد شلون يعني شكل البنيه مستفز
فهد : كعدت كل معاني ماكو بوجها بياضها زايد عن اللزم بحيث من تشوفها تلقائياً تنزعج
اروى : لا والله معليك بي علي شوف البنيه تخبل بييييييييضه كطن كطن وعيونها سود وكبار وشعرها اسود كلش البارحه من رحت اوديلهم النزله ضليت صافنه عليها شكلها فد شي
ايمان : قصدج البنيه بلكه ( ناصعه البياض )
اروى : اي
فهد : بهدوء بنظركم البياض حلو بالعكس اني بالنسبه الي اشوف صاحبه السمار الخفيف تسوه هاي قماشة الحج الي تحجون عليها وللمعلومه تره اكو قرده وبيض البياض مو مقياس للجمال اهم شي الملامح
بتول : اي والله صحيح كلامك هسه مو اني سمره بس حلوه وشكلي جدا مقبول
فهد : بس اني ماجنت اقصدج انتي اني احجي عن فئه معينه انتي مالج علاقه بيها
منذر : هههه ماهذا ياهذا
فيصل : انت تنطبق عليك قاعده خالف تعرف ... عود مخلي مواصفات خاصه ... والله تاليتك توكع بوحده تشبه القرد نفسه
فهد : طلعت موبايلي يعني تشبه مرتك
علي : هههه ولا تكعد راحه انت
فهد : ابتسمت
ايمان : كافي حجي زايد ميجوز تحجون بالبنيه وانت فهد عيب تتنمر ماكو واحد خالق نفسه وانتي ام فيصل باجر نروح اني وياج نسير عليهم باعتبارهم جيرانه صارو
سعاد : وشعدنه يمه رايحين عرفه ولفه
ايمان : هاي اصول و واجب والجار على الجار وبعدين احنه حايط على حايط عيب نغلس عليهم
سعاد : هاي السوالف عدكم بالريف عدنه ماكو هالسوالف تردين روحي انتي وبناتج
ايمان : مصيرلج جاره والله يمه اروى باجر نروح اني وياج بس دزي خبر الصبح الهم حتى نروح العصر
اروى : ان شاءالله
________________
سحر : هاا يمه وديتي الاكل
غنى : فتحت حجابي اي وديته تدرين مبينين صدوك حبابين هالناس
سحر : امي الله يرحمها جانت دائما تمدح بيهم تكول فد ناس متواضعين وحبابين بشكل رغم حالتهم الماديه جدا ممتازه بس عمرهم ماتعالو على احد
غنى : الله يحفظهم ... تغدينه راحت خاله لغرفتها واني صعدت لغرفتي جانت غرفه بسيطه جدا صحيح مو بكبر غرفتي القديمه بس الحمدلله اكو ناس ملاكيه حتى سكف تحتمي بي اخذت موبايلي لكيت نرجس مخابرتني ... رجعت خابرتها
نرجس : الوو هاا ولج شلونج
غنى : شتاقيتلج
نرجس : افف حتى اني والله سكتي راح ابجي والله جنت ساعه الساعه من اضوج اجي يمج هسه وين اروح
غنى : حتى اني ضايجه
نرجس : صدك ولج وين جنتي
غنى : رحت اودي غده لجوارينه
نرجس : هله هله شبسرعه صار عندج علاقه بالجوارين وكمتي تروحيلهم
غنى : شبيج انتي دزولنه نزله ورحت ارجع المواعين الهم وفشله ارجعهن فارغات
نرجس : هاا زين عدهم ولد
غنى : كلبت عيوني طبعا عرفتج حتسألين هالسؤال وجوابي ماادري
نرجس : افف لج غنى حموت تدرين بيتنه كله متكأب على مودج جعفر ضايج على فراكج واني ضايجه هم
غنى : اوو نرجس عفيه لتضلين تكولين هيج والله اموت من القهر وبعدين تعالي احنه اكيد حنتشاوف كل يوم
نرجس : صدك باجر منو يجيبج للجامعه
غنى : ماادري ومااندل وين الشارع العام وحايره وين الاكي سيارات يجوز اخذ تكسي وهم كون اطلع من وكت لان المنطقه بعيده عن الجامعه مو مثل قبل تدرين لحد الان ممتقبله المكان
نرجس : ليش
غنى : ماادري ممرتاحه صحيح المنطقه حلوه ونظيفه وناسها هادئين بس اني مااعرف شبيه
نرجس : ان شاء الله تتعودين لتخافين اني وياج مااعوفج
غنى : ابتسمت حبيبتي نرجس اني كلش احبج
نرجس : ماكو حاجه اكلج انتي شنو بالنسبه الي صحيح اني الله منطاني خوات بس عوضني بيج نونايتي الحلوه
غنى : ابتسمت
__________________
مرتضى : دخلت لبيت جدي لكيت الحجيه كاعده هي وامي واختي ... هاا شو متجمعات
ياسمين : وعليكم السلام والرحمه
مرتضى : العفو حجيه بست راسها السلام عليكم
ياسمين : هله بيك وليدي شلونك
مرتضى : والله موزين
ياسمين : ليش يمه شبيك
عبير : شبي يعني اكيد الحب متعبه
مرتضى : خزرتها
ياسمين : لتخزرها لك احجي ولج شبي اخوج
عبير : بييي هذا مرتضى يحب وحده وياه بالكليه بس هي مامنطيته وجهه وهو ساحل روحه عليها
مرتضى : شنو ساحل روحي عليها احترمي نفسج ... البنيه ادري بيها تحبني بس تستحي تكلي واني وره التخرج اروح اتقدملها رسمي
ياسمين : ليش مو هسه تتقدملها وخلي الزواج وره التخرج
نسرين : اني هم اكله هيج بس ميقبل
مرتضى : لا وره التخرج احسن
ياسمين : لتضل تأجل يابيبي تالي يمشي بيك العمر مثل ابن خالك وتدخل بالثلاثين وانت اعزب الحياة لازم نستغل كل لحظه بيها ونعيشها لتضل تاجل تتندم بعدين
مرتضى : اذا قصدج على فهد فمن سابع المستحيلات اصير مثل هذا ابو خشم المرفوع
نسرين : ولك
ياسمين : لحظه نسرين ... موعيب تحجي على ابن خالك هيج شمسويلك هو اشو كافي خيره شره وبعيد عن العالم
مرتضى : شايف روحه ومامصدك مسوي نفسه احسن من العالم ميسلم وميحجي وكالب خلقته اربعه وعشرين ساعه شترديني احبه وهو هيج مزعج
ياسمين : تنهدت انت ماعشت الي عاشه فهد فلتكعد تحجي عن شي انت متعرف سببه
مرتضى : حجيه كل احنه عدنه ظروف ومشاكل بس ما تشيخنه على العالم هذا محسن وحارث وباقي الشباب مو حالهم من حال فهد اشو حبابين وينحبون حتى علي اخو دكتور وعليه العين بس مع هذا كلها تحبه وهو هم متواضع ويه الكل اله فهد حضرته يستنكف من الناس حتى كعده ميكعد ويانه مسوي روحه شيخ لو يكعد ويه خوالي لو ويه حارث ومحسن واحنه لابسنه
ياسمين : شبيك انهديت ولك اسمع فهد هذا خط احمر ديربالك تحجي عليه اولا اكبر منك وعيب وثانيا روحو صيرو مثله لو شوفو الي عاشه وعود تعالو احجو عليه
مرتضى : يوو يحجيه انتي لو نسب الكائنات متحجين بس خلي واحد يمس فهد تنكلبين لبوه عليه عفتها وكمت
ياسمين : هذا شبي ابنج خبل
عبير : يغار بيبي
نسرين : صحت بيها عبيير
عبير : سكتنه سكتنه
_______________________
آلاء : واكفه اسوي ريوك لفيصل لان عنده دوام هو والولد وطبعا ايمان تكعد من الصبح وياهم بس حماتي الغبره مسويه روحها عروس تكعدلي الظهر ... طلعت الطاوه للصاله اباوع نزل فهد لابس ملابس عكسريه وهو طويل وخشن مو ناعم مثل اخوته ماشاءالله يخبل
فهد : صباح الخير
الكل : صباح النور
فهد : يمه وين اروى خلي تستعجل اريد اوديها واروح لدوامي
ايمان : هسه تجي راحت تلبس شالها ... اكعد تريك
فهد : هزيت راسي ... لا مااشتهي
اروى : نزلت صباح الخير ... هاا فهد نروح
فهد : اي يله
اروى : بست ايد امي قبل لا اطلع هاي عاده عندي ... طبعا صارلي فتره من قدمت اوراقي والحمدلله رجعت ادرس مره ثانيه واكيد فهد التزم بيه هو ياخذني ويجيبني ... طلعنه من البيت وفهد ساكت كالعاده اباوع اكو بنيه واكفه على الشارع العام ومبينه حايره هاي بت جوارينه ... لحظه فهد اوكف
فهد : ليش
اروى : هاي بنت جوارينه يجوز مضيعه خلي اشوف وين تريد
فهد : اوكفي خلي اصف على جهه وروحي حاجيها ... يله نزلي
اروى : نزلت ... صباح الخير
غنى : درت وجهي صباح النور انتي اروى مو
اروى : اي صحيح ... انتي شموكفج هنا
غنى : منتظره عبريه او تكسي اريد اروح للكليه
اروى :انتي بأي جامعه
غنى : جامعه بغداد
اروى : حتى اني يله تعالي ويانه احنه نوصلج
غنى : لا شكراً اني منتظره التكسي اخذي راحتج
اروى : ماكو عبريه وتكاسي تمر منا ... يله تعالي احنه نوصلج جريت ايديها يله امشي احنه طريقنه واحد
غنى : لا عفيه اني انتظر ماكو مشكله
اروى : شبيج حبيبتي تعاي وصلت يم السياره فتحت الباب ... فهد حنوصل البنيه ويانه صارلها ساعه منتظره تكسي وماكو
فهد : باوعتلها صعدي
غنى : احم لا ماكو داعي
فهد : صعدي بابا تأخر الوقت بعد وين تلكين تكسي صعدي مناكل بشر احنه
غنى : انجبرت اصعد اليوم عندي امتحان واذا تأخرت يروح عليه
اروى : يله امشي فهد
غنى : اسمه فهد عبالي فيصل
اروى : ما كتيلي شنو اسمج
غنى : غنى
فهد : باستنكار شسمها
اروى : ههه شبيك فهد اسمها غنى شنو ماسامع بهالاسم
فهد : بهدوء لا شهالاسم الغريب هذا
غنى : اسمه اسم حيوان ويصنف على اسمي ... تنهدت استغفر الله
فهد :وصلت للجامعه ... يله نزلن
غنى : بهدوء شكرا زحمتك
فهد : لا ماكو زحمه .... انتظرت يدخلن للجامعه وطلعت لدوامي
اروى : اكلج بصراحه وبدون مقدمات اني هالسنه مقدمه على الماجستير ودفعتي كلهم تخرجو وصارلي فتره موقصيره مداومه وماعندي احد وهسه اريد امشي وياج لان اضوج وحدي
غنى : ابتسمت تعالي اعرفج على صديقتي
اروى : يله امشينه
غنى : وصلت للحديقه شفت نرجس كاعده صباح الخير
نرجس : وينج صار ساعه منتظرت... باوعت جايه هي و وحده منو هاي
غنى : اعرفج هاي اروى جوارينه اروى اعرفج على صديقتي نرجس
نرجس : خزرت غنى وسلمت على البنيه شلونج حبيبتي
اروى : هلو بيج نرجس ... بنات اني اروح اجيب جاي واجي هسه ثواني مااتاخر
غنى : براحتج
نرجس : انتي شلون تصادقين وحده غيري شهالصلافه
غنى : صدوك تحجين نرجس بعدج تدورين هالسوالف
نرجس : اي صدك احجي اني مو كايلتلج احنه ثنين ممنوع تخلين شخص ثالث ويانه
غنى : عيب نرجس البنيه وحدها وحبت تتعرف علينه اكلها لا وبعدين تتوقعين اني افضل احد عليج ماعيب انتي صديقتي وحبيبتي واختي هم
نرجس : انتي خوش ضلي ضحكي عليه بهالكم حجايه ... اباوع اجتي البنيه كعدت يمنه وبدت تسولف استلطفتها نوعا ما ... اي عرفينه عليج بما انو دخلتي بشلتنه
اروى : اسمي اروى عمري 23 قسم هندسه كيميائيه تخرج العام وهالسنه قدمت على الماجستير عندي اربع اخوان فيصل وفهد وعلي ومنذر واختين ليلى وورده وبرجي الحوت وبس
نرجس : اخوتج حلوين
غنى : كرصتها
نرجس : ااخ ليش تكرصين هسه شسويت اني
اروى : ابتسمت عادي غنى خلي تسأل اني اريد اتعرف عليكم لتتقيدون بوجودي ... اي شنو جنتي تسألين على اخواني شوفي فيصل الجبير مو حلو فهد يخبل وعلي هم حلو بس احلى واحد بيهم منذر
نرجس : ومنذر هذا مزوج لو لا
اروى : اي مزوج
نرجس : حرامات
اروى : هههه يله تعالن حتبدي المحاضرات
فهد : كملت التقرير وكمت لمكتب المسؤول دكيت الباب ودخلت ... سلام
غانم : وعليكم السلام تفضل
فهد : كعدت تفضل هذا التقرير تكدر تتناقش بي انت والمسؤولين تقريباً كمل كلشي والادله واضحه وموجوده هم مابقه غير التنفيذ
غانم : ابتسمت سبع والله سبع ماتندمت من سميتك الذيب
فهد : هسه شراح تسوي
غانم : هسه اخابر المسؤولين وبعدها نبدي نباشر بالعمليه بس انت شلون بيك اني خايف لا يكدرون يوصلون الك لو درو
فهد : همه والي لابسه برجلي ماخفت من الاكبر منهم اخاف منهم
غانم : الحجي بيناتنه انت ماخايف
فهد : من شنو اخاف انت صدك تحجي اني لو اخاف ماجان دخلت بهالمجال اصلا وبعدين اذا انت ناسي اذكرك بالاستخبارات محد يعرف الثاني وخاصه الضباط دائما يكونون شخصيلات مجهوله فلتشيل هم اني متبع مبدئ مادام مشيت بشي مستحيل اتركه لحد ما احقق غايتي بي واني من اكول شي اسوي اسوي وانت تعرفني
غانم : اني لوما اعرفك مااسلمك هيج قضايا صعبه بس بنفس الوقت اخاف عليك لان اعتبرك مثل ابني والله .... تدري دائما احمد الله انو محد يعرف انت ذيب الاستخبارات والا جان انت هسه بيباي
فهد : ابتسمت محد يكدر يسويلي بيباي اني ماتعبت على نفسي حتى بعدين اموت على ايد وصخه مثل ادين هذوله السفله
غانم : صدك ذكرتني على طاري التعب .... على كيفك ويه المساجين جاي يشتكون منك الشرطه يكولون جاي تأذي المساجين وتعذبهم هواي
فهد : هذا يا حنين كلك
غانم : ضحكت ماعليك بي ... المهم فهد ابني على كيفك وياهم لتقسي هواي ذاك اليوم كاسر خشم واحد يصير مو تجيك عقوبه
فهد : بهدوء يطبه طوب محد كله يرتكب غلط واحنه هنا منلعب اليغلط يتحاسب وكل ضابط عنده طريقه خاصه بالتحقيق وهاي طريقتي وبالنسبه للعقوبه فلتخاف ميكدرون يسوون شي اني ورقه رابحه الهم يخافون يدنولي ...... كمت يله اني اروح وانت شوف التقرير ودرسه عدل
غانم : براحتك يالسبع
آلاء : كاعده وحدي وملانه وين اروح ماادري كمت طلعت من غرفتي نزلت جوه لكيت خاله ايمان وخاله سعاد كاعدات سوه كالعاده ... دخلت للمطبخ هاا انغام شجاي تسوين
انغام : اطبخ الغده غير ... درت وجهي عليها اكلج تره ميصير عايفه كل الشغل عليه وكاعده بغرفتج تره انتي الجنه الجبيره مو اني
آلاء : هي تحجي واني عيني على ايدها ... اكلج منيلج هالاسوار حلو
انغام : ابتسمت هاي منذر جابه الي بعيد ميلادي
آلاء : هاا وشدعوه جايبلج اسوار ذهب خو هديه بسيطه على كده
انغام : الهديه مو بسعرها ... قيمتها بالنسبه الي اكبر من سعرها وبعدين ليش تكولين على كده الحمدلله احنه وضعنه تمام منذر معلم وراتبه كافي علينه واحنه شعدنه طفل واني حامل هسه
آلاء : بس احنه بكدكم شو فيصل ميجيبلي شي لو انتي وحد
انغام : لا اله الا الله اني اكمل شغل احسلي
______________________
اروى : طلعنه من الجامعه بعد ماخلص دوامنه اباوع غنى اجت تروح لزمت ايدها اوكفي وين
غنى : الحك على العبريه
اروى : ماكو عبريه يله تعالي فهد هسه يجي علينه احنه طريقنه واحد عوفي هالتكلفه
غنى : لا حبيبتي ماكو داعي
اروى : دتعاي اوكفي يمي وعلى فكره فهد ميقبل هسه يرزلني اذا رحتي وحدج
نرجس : هاا نونه شو مارحتي
اروى : راح تروح ويانه هسه يجي اخويه علينه
نرجس : خزرت غنى لعد شو من جنت اتوسل بيج حتى ترجعين ويانه اني وجعفر مجنتي تقبلين
غنى : همستلها فشله البنيه اصرت وحرجتني واني ماعندي ميانه وياها حتى افشلها وارفض
نرجس : حسابج بعدين
اروى : اجه فهد يله غنى
نرجس : اباوع وكفت سياره كبالنه نزل منها واحد لابس عكسري فتحت عيوني هذا مو ابو الزيتوني صاك الزياره ... رسن باوعت لغنى الي تتهرب بسيطه ياغنى دكاتج صارن هواي اني اعلمج
فهد : يله فضنها
غنى : بارتباك يله باي نرجس
نرجس : باي
غنى : صعدنه بالسياره بعد ماسلمنه .... هذا الي اسمه فهد شكله يخوف مااعرف ليش هيج حسيته
فهد : اروى محتاجين شي لو نروح كبل للبيت
اروى : لحظه خلي اخابر امي ... الوو هاا يمه ... الحمدلله ... اي راح نجي للبيت فهد يكول تردون نجيب شي ويانه ... هاا خوش يله باي .. فهد امي تكول جيبو لبن
فهد : خوش .... وكفت يم اسواق واجيت انزل باوعت للبنيه اصلا نسيت هي ويانه لاحس ولانفس ... محتاجين شي
غنى : بهدوء لا شكراً
فهد : اكيد لتخجلين تره انتي الي راح تدفعين فاذا محتاجه شي نزلي جيبي
غنى : بكلبي هذا شبي ... لا شكراً كلشي مااريد اباوعله راح
اروى : صدك غنى اليوم العصر نجي اني وامي نسير عليكم
غنى : ابتسمت كل الهلا بيكم
اروى : بيج اكثر حبيبتي
غنى : اجه هذا الي اسمه فهد ... فتح الباب وخله الغراض يمي ورجع صعدوانوب رحنه للبيت نزلت ... شكراً زحمتكم
فهد : ماكو زحمه
اروى : اكلج غنى باجر الساعه بالسبعه وثلث كون انتي جاهزه حتى متأخرينه
غنى : ليش ؟
اروى : غير حتى نروح للجامعه من وكت
غنى : لا عفيه ... انتو وصلتوني اليوم شكرا بس من باجر اني اروح بتكسي او ااجر خط
فهد : سديت باب السياره اولا صعب تلكين تكسي هنا اله تطلعين على الشارع العام وشفتي شكد بعيد عن المنطقه وثانيا تره انتي بطريقنه ماراح تكلفين علينه اذا وصلناج لتخافين واذا على الاحراج فاعتبري خط ودفعي كروه
اروى : ياا فهد
غنى : لا لا كلامه صحيح اذا رحت انوب ادفع فلوس ... شكراً الكم يله مع السلامه فتحت الباب ودخلت
اروى : دخلت فهد صدك تحجي مو حرجت البنيه وهي مبينه حالتها جداً ضعيفه
فهد : دطبي وبلا حجي زايد مالي خلكج انتي وهاي المستحيه
______________________
فرح : شبيج ريم اني مااكدر اسوي هيج
ريم : يحظي كتلج فهد فرصه وتكونين غبيه اذا ضيعتيها نسيتي هو شكلج كال اذا حملتي راح يخلي زواجكم دائمي
فرح : انتي كلتيها اذا حملت
ريم : اي هو اني شداكول غافلي وحملي عندج اكثر من طريقه اولها تركي حبوب منع الحمل ولتاخذين ومن يجيج فهد غافلي وتتمي ذيج الشغله وشوفي اذا صار حمل وحجيه كليله قدر وصار وخلصت السالفه
فرح : هاي السالفه تمشي على واحد غشيم ومدمغ مو على فهد الي يركز ويدقق على كلشي لج الخاشوكه هاي الخاشوكه مياكل بيها اذا ميتأكد من نظافتها تردي ميتأكد من كلشي قبل لا يتقربلي فهد فطن ويدقق بشكل مو طبيعي فهالسالفه من المستحيل تمشي عليه
ريم : وتالي تبقين هيج زين حاولي تخلي يحبج انتي ماناقصج شي وحتى زواجج الاولي جان لفتره قصيره وانفصلتي
فرح : ااااه ولج سكتي هو بقه شي ما سويته حتى ارضي اكشخ وابدل واركص وابدع ماانكر انو يعجبه هالشي بس مايحبني ولج هو حتى مكان شغله مااعرفه
ريم : لعد شتعرفين ولج
فرح : احنه صارلنه اربع اشهر من تزوجنه زواج مؤقت ... اول ما التقينه فهد صارحني بالموضوع واني وافقت وطبعا الزواج اتمم لعد ماتنفذت شروط فهد الي هي اهلي ممنوع تسألين عنهم ... حياتي الخاصه ممنوع تدخلين بيها ... اذا لعبتي بذيلج اطلكج ... تقصير من ناحيتج ممنوع .... بكل وكت اجي لازم الكاج جاهزه .... اهم شي تعتنين بنظافتج ريحه اكل وخبصه وهوسه مااريد ... تعتنين بلبسج ... صوت عالي مااريد ... وهاا اهم نقطه موضوع الزواج الدائمي مينفتح كدامي ... تخيلي انو اذا خالفت واحد من الشروط راح انهان وماكو حاجه اكلج شهد اذا عصب شيسوي
ريم : يعني شيسوي يضربج
فرح : لا لا فهد اصلا ضد موضوع الضرب عمره مارفع ايده على مره ابد ولا رفع ايده عليه بس هو شنو عنده حجايات يسمني سم بيهن كلامه مؤذي بشكل ... يكدر بدون مايرفع ايده عليج بس يحاجيج بطريقه يبجيج والله سامعه الاذى النفسي فهد يأذيج نفسياً مو جسدياً بس طبعا هاي اذا دستيله على طرف يسوي هيج اذا متدخلين بي ماكو اهدئ منه
ريم : الله يساعد كلبج بس يمعوده حجي جارح ولا ضرب
فرح : الحجي بيناتنه غير اذا ضربني يكسرلي عضم انتي شايفته شضخمه كل ايد من اديه هاكبرها ماشاءالله
ريم : شجابرج تبقين وياا بس كليلي
فرح : تنهدت احبه
ريم : حبتج كراده (جراده) على هالحب هذا
_____________________
غنى : واكفه اخبز طبعا الانسه نرجس اخابرها مترد مااعرف شبيها ... اندكت الباب طلعت فتحتها شفت اروى وياها ثنين نسوان
اروى : سلام
غنى : ابتسمت وعليكم السلام تفضلو ... سلمت عليهم
ايمان : اباوعلها اللهم صل على محمد شهالجمال ... هله حبيبتي شلونج
غنى : الحمدلله اباوع طلعت خاله
سحر :اهلا وسهلا عيوني تفضلو تفضلو
ايمان : دخلنه خليت هديه بسيطه مال واجب بباب الاستقبال ودخلنه بيتهم بسيط بس حلو
سحر : شلونكم
ايمان : حبيبتي ام شنو
سحر : ام حوراء
ايمان : يعني هاي الحلوه حوراء
سحر : لا هاي بنتي الصغيره غنى
ايمان : هاا الله يحفظها اعرفج على نفسي اني ام فهد جوارينكم الي بصفكم هاي بنتي اروى وهاي جنتنه آلاء
آلاء : شلونج خاله اني آلاء مرت فيصل ابن ضرت ام اروى الجبير
سحر : احم اهلا وسهلا بيج حبيبتي والله زحمناكم اليوم ويه بنتي ماقصرتو
ايمان : لا عليمن هالزحمه الناس لبعضها واحنه جيران واهل ان شاءالله
سحر : ان شاء الله
غنى : جبت مي ودخلت انطيتهن اباوع على ام اروى صافنه عليه
ايمان : شلونج حبيبتي
غنى : الحمدلله خاله .... كعدن يسولفن ويه خاله وخالتي اندمجت وياهن بسرعه لان حبابات وام اروى ماشاءالله شخصيتها كلش قويه وحتى طريقتها بالكلام لبقه مبين اخو اروى طالع عليها انتبهت على هاي الي اسمها آلاء كل ساعه تذب بسمار على ام اروى طبعا اني ادري ابو اروى متزوج ثنين اليوم سولفت النه
ايمان : اباوع لهالبنيه الله يحفظها يمكن راح اضربها عين فصختها تفصخ .... بيضه بلكه وعيونها سود وكل عين هالكبرها رغم لابسه نظارات بس من نزعتهن انتبهت عليها معانيها حييل حلوه خشمها صغير وحلكها صغير وجها مدور وجسمها مرتب لا ضعيفه عصه ولا سمينه يعني صدك حلوه ... هادئه وساكته صوتها ماسمعته احاجيها على كد السؤال تجاوب مبينه خوش بنيه لان عجبت اروى بعد ... الله يخليها لأهلها
______________________
فهد : نايم بغرفتي واجتني مكالمه ... ادري هالموبايل ميسكت يعني كل ساعه داك ... جاوبت الوو
فرح : الوو حبيبي شلونك
فهد : بهدوء بخير
فرح : راح تجي اليوم
فهد : اي بس مو هسه
فرح : ماشي منتظرتك
فهد : قفلت الجهاز ورجعت افكر بأشياء مجهوله دائمي ينسلب من عيني النوم بسبب التفكير ... التفكير بالشغل وبالاهل وبالحياة وبهواي اشياء التفكير دمرني نفسياً احاول اِني ابطل اركز على كلشي بس مااكدر هالحاله ملازمتني من جنت مراهق ولليوم كد ماشفت ضيم كمت اشوف كلشي اله سبب محد يسويلك شي اذا بالمقابل ميريد شي ... هذا اخوك ميسلم عليك اذا ماورى شي .... مرات احس دماغي راح ينفجر من التفكير والتحليل ... ممكن البعض يشوفوني شخص معقد او مكروهه او شايف نفسي بالمختصر الاغلبيه يشوفوني شخص سيئ وللاسف الناس تعتمد على موقف واحد وتفسره من بالها محد يفكر انو الكدامه ليش صار شي او ليس يتصرف بهالطريقه ممكن يكون متعرض لموقف خلا هيج او ممكن مالكه الي ينصحه فصار هيج ... لو بأيدي اسوي غسيل دماغ لمجتمعنه كله
محسن : هاا سلام
فهد : باوعتله انتو وتالي وياكم جم مره كلت دكو الباب قبل لا تدخلون افرض جنت جاي ابطل وانت سويت مداهمه عليه شسوي اني
محسن : هسه ديله الي يسمعك يكول عندك شي خارق للطبيعه اشو العندك عدنه لتكعد تدور ادب براسنه واذا شفناك جاي تبدل شنو الي عندك ماموجود بالبشريه يعني
فهد : كمت تره انعل والديك احترم نفسك حيوان
محسن : هاي على ابويه
فهد : تنهدت انت شعندك جاي لهنا مو عندك مره متولي يمها
محسن : تعاركنه وعفتلها البيت واجيت يمك ابن عمي العزيز
فهد : واني شنو مخلفك وناسيك
محسن : اكلك اكعد اني ضايج وطالعه روحي خلي نكعد نسولف اوكف خلي اخابر حارث حتى تكمل الكعده
فهد : خليت ايدي على راسي طارت النومه من عيني احتركت ابهاتكم
__________________
ايمان : كمت يله عيوني من رخصتج
سحر : بعد وكت
ايمان : لا هم ياله ... امانه ام حوراء اي شي تحتاجي ليردج غير لسانج اعتبرينه اهلج اي شي تردي احنه موجودين والولد بخدمتج
سحر : حبيبتي تسلمين ربي يحفظكم ويخليج الولد
ايمان : حبيبتي يله يمه تعالن ... مع السلامه غنى
غنى : ابتسمت الله وياج خاله ...اباوعلهم طلعو
سحر : شفتي نونه شلون ربج ميكطع بعباده شفتي شلون طلعو جيران ورده ذوله خو ام فهد دره مال الله
غنى : اي كلش حبابه .... دخلنه خالتي راحت كعدت على التلفزيون واني صعدت لغرفتي توضيت وكعدت اقره قران والي صار ملجئي واماني هالفتره
_____________________
فرح : افف وين صار فهد كال راح اجي بالليل صارت بالتسعه وهو لسه مااجه ... سمعت صوت الجرس عدلت شعري ونزلت ركض فتحت الباب شفته كالعاده بطلته التاخذ عقلي حضنته حبيبي شلونك
فهد : اباوعلها كاشخه ومحضره نفسها الحمدلله انتي شلونج
فرح : تمام لزمت ايده ودخلت
فهد : كعدت هاا شو مجهزه نفسج شنو مستعجله
فرح : حضنت ركبته ... ليش اني يايوم ماجنت جاهزه الك
فهد : همست الي يعجبني بيج انج دائما جاهزه
فرح : تقربت منه وانت تحب هالشي يعني
فهد : شتكولين انتي
فرح : فتحت قميصه ماعندي شك انو اني اسحرك نزعته القميص بست صدره ... شلونه مزاجك اليوم
فهد : خربان
فرح : دفعته بخفه على الجربايه لعد خلي احسنه الك
فهد : ابتسمت نشوف
بعد مرور ساعتين
فرح : نايمه بحضنه اباوعله مغمض عيونه ويدخن هالفتره متحسنه علاقتي بفهد لاحظت نفسي من سديت موضوع الزواج الدائمي وكمت مااعكر مزاجه رجع مثل الاول ويايه ... جريت الجكاره منه اخذت نفس منها
فهد : خزرتها شهالتصرفات السخيفه هاي
فرح : قربتها منه تفضل ردت اخذ نفس صار فتره مامدخنه
فهد : خليها الج طلعت غيرها
فرح : شنو تقرف مني
فهد : مو قصه اقرف مااحب ادخن ويه احد من نفس الجكاره وحتى النركيله ما اشاركها ويه احد لاهي ولا الخاشوكه ... شنو ستوج تعرفيني
فرح : كل مابيك جاي تفاجئني بتصرفاتك
فهد : انتظري الاقوى راح افاجئج.اكثر .... رجعت اكمل الجكاره بهدوء
_____________________
صباحاً
غنى : كاعده اتريك اني وخاله
سحر : هاج حبيبتي
غنى : شنو هذا
سحر : مصرف غير
غنى : بست ايدها عندي خاله ممحاتجه وبعدين اني ما احب اكل بالنادي فاذا عندي فلوس ام معندي محتفرق
سحر : ليش يمه خلي الفلوس عندج يجوز تشتهيلج حاجه تحبين تعزمين زميلاتج
غنى : لتخافين كتلج عندي وبالنسبه للفلوس فعفيه سويلي بيهن كنافه واريد حلاتها خفيفه
سحر : بس من عيوني الثنين جم غنى عندي اني
غنى : سمعت الباب يندك كمت بستها يله اني اروح ادعيلي
سحر : الله وياج ربي يوفقج ويحفظج
غنى : طلعت شفت اروى صباح الخير
اروى : صباح الورد يله تعالي
غنى : صعدنه بالسياره شفت هذا الاسمه فهد وجهه ميكصه الطبر ولو اني شعليه خطيه يجوز شغله صعب وهو مبين عليه عكسري ... صباح الخير
فهد : بهدوء صباح النور
اروى : عفيه فهد وكفني يم المكتبه اريد جم شغله
فهد : وين جنتي البارحه ستوج تذكرتي
اروى : نسيت والله
فهد : طلعت للمكتبه ... شتردين اني اجيبلج
اروى : لا عفيه اني اريد انزل انت متخليني اشتري براحتي
فهد : شلون تنزلين وحدج وكلها زلم كليلي واني اجيبلج كلنه
اروى : لا هاي المكتبه تشتغل بيها بنيه دائما اجي اشتري منها
فهد : يله نزلي عندج عشر دقايق مو تتاخرين
اروى : لا مااتاخر
فهد : لحظه ... هاج فلوس
اروى : عندي
فهد : ميخالف
غنى : شكد حلو شلون يخاف على اخته ... ااه ياحبيبي يامروان شيصير لو انت عايش هسه وتداريني من تكبر هيج .... اباوع لفهد طلع جكاره وكعد يدخن .... اختنكت خاصه الجام مسدود واني كاعده وره فالدخان يرجع عليه كمت اكح
فهد : اطفيها ؟
غنى : احم احم لا براحتك بس عادي افتح الجامه
فهد : اكو احد لازمج فتحيها
غنى : شهالفضاضه يا إلهي ... فتحت الجامه واخذت هوه
فهد : شيصير منج الحجي ابو كامل
غنى : جدي ابو امي
فهد : هاا
غنى : ضل ساكت اسئلته غريبه واجوبته اغرب كلامه مختصر جدا ... مدري ليش اخاف منه شكد ماهو هادئ بس اني احسه عصبي شويه واجت اروى ... وطلعنه وصلنه للكليه نزلنه ويه نزلت نرجس
جعفر : خزرتها ... تقربت منها منو هذا
غنى : احم شلونك استاذ
جعفر : زين
نرجس : عيني على فهد هلو اروى حبيبتي شلونج
اروى : تمام
جعفر : ماكتيلي غنى منو هذا واشرت عليه
فهد : باوعت ورايه ... وياي
جعفر : اي منو انت
فهد : بهدوء مامجبور اجاوبك وبعدين اعرف شلون تنتقي الفاظك انت بحرم جامعي يله اروى اني رايح مع السلامه حركت سيارتي ومشيت
جعفر : عندج خمس دقايق وتلحكيني فوراً
غنى : ليش
جعفر : غنى رجاءاً عناد مااريد لحكيني بسرعه
غنى : باوعت لنرجس شكو
نرجس : روحي شوفي شيريد
غنى : لحكته للمكتب اول مادخت ماحسيت روحي غير نجريت .... هااايييييي شبيييك
**************************
- يتبع الفصل التالي اضغط على (ذنوب على قيد الغفران) اسم الرواية