رواية رواسي الدهر الفصل السادس 6 - بقلم روح الدليمي

 

➰➰➰➰➰➰➰➰➰➰➰

 رجعت لدكتورتي 

اول ما طلعت المريضه الي يمها دخلتني اني 

بقت تقره بالتقرير و تشوف بالسونار 

باوعتلي و گالت ...

_ماكو شي يستدعي للخوف مثل ما گتلج وضعه ممتاز، بس احتياط لكل شي ممكن يصير راح انطيج ابر تثبيت 

رواسي:تمام شكراً دكتوره 

كتبتلي على وصفه علاج اخذتها منها و طلعت 

من الغرفه اقره بيها.. كاتبتلي حبوب فيتامينات و فولك اسد و ابر تثبيت.. 

حجيت لادم حجي الدكتوره، اخذ الوصفه مني و راح للصيدليه جابلي العلاج و رجعنا للبيت.. 

روتينا ملل بملل ماكو شي نسوي ابد، اتجنب ابقى

گاعده ويه ادم هوايه خاف يسوي اي شي بيه.. 

اكثر وقتي بالغرفه.. 

مر شهر على زواجنه اني و ادم 

و قرر ارجع لدوامي و جامعتي، طلعنا اني وياه من الصبح و رحت حجيت ويه الاداره و بالگوه لحتى اقتنعوا ارجع اداوم.. اشترالي تلفون و رجع رقمي القديم من الشركه

بلشت اداوم و ادم يوديني الصبح و يرجعني 

اهلي ابد ما حجيت وياهم و لا همَّ حاولوا يحجون وياي 

بعد شهر من الدوام طلعت بَره انتظر ادم مثل كل مره 

صرت ادور بعيوني على سيارته و شفت رسيم 

واكف و منتجي على السياره 

اول ما شافني اجه ب اتجاهي تراجعت و ردت ادخل 

للجامعه مره ثانيه، بس انعتيت من ايدي و انضربت بصدره... بقه يباوع بعيوني و عاط بيه بصوت عالي 

رسيم:شلوووون تزوجتييييي و أنتِ على ذمتييي ما طلگتجججج!!! 

حاولت اخلص روحي من عنده بس بكل مره احاول 

افلت ايدي منه يشد بقبضته عليها، اردف بنفس النبره.. 

رسيم:جاوبييينييي روااااسيييي 

رواسي:عوفني رسيم دتأذيني 

رسيم:عبالج اعوفج بهاي السهوله؟؟ امشي كدامميييي يلااا 

دفعني كدامه ردت اوكع اله شوي، التفت عليه و عطت بي 

رواسي:شجاااابككك شرجعكككك مو انسجنت أنتَ؟؟؟ 

رسيم:عبالج اذا انسجن تكدرين تاخذين راحتج من ورايه؟؟ 

                                      

 

                

رواسي:ارجع منين ما اجيت ما اريد اشوف وجهك روووح، هسه يجي ادم و تصير مصيبه 

فتح باب السياره و راد يصعدني بيها كوه 

بس انسحبت من ايدي رفعت راسي على صوته 

عاط ب رسيم.. 

ادم:شتسووويي هناااا؟؟  

رسيم:مو شغلك، صعدي رواسي 

سحبني ادم خلاني وره ظهره و گال بجديه.. 

ادم:رواسي متجي وياك لاي مكان روح احسن ما ادفنك بمكانك 

هجم رسيم عليه وضربه و ادم رجعله الضربه

التمو العالم علينه و كل مجموعه لزمت واحد بيهم 

بطني مغصتني من الخوف، باوعت لادم و گلت 

رواسي:ادم امشي خلي نروح حباب لتسوي مشكله 

اخذ ايدي بيده و مشينه للسياره 

صعدت اني و هوَ اندار لجهته و صعد حرك السياره 

بسرعه و عاط بيه 

ادم:شيسووييي هذااا يم جامعتج؟؟؟ 

رواسي:والله مااعرف انصدمت لما شفته 

ادم:سهله 

شال تلفونه و اتصل على احد من خلال حجيه

عرفته ديحجي ويه ابويه گال 

ادم:ادري شلون يطلع؟؟ شلون ما لكو عليه شي، أنتَ مو گلت مجرم و متورط.. استغفر الله العظيم عمي هذا مينكدرله يسحبها من بيناتنه و يرجع ياخذها، متتذكر اول مره خطبها و رفضته شسوه؟؟؟ 

فرك وجهه بيده الثانيه و رجع يسوق و اردف.. 

ادم:مو حجي هذااا مو حجي! احبسهااا خوماا احبسهااا 

اني احلها خلص، معليك اني احل كلشي من جذوره 

يلا سلام 

سده من عنده باوعت لادم و حجيت متسائله 

رواسي:رسيم خاطبني قبل؟؟ 

ادم:ع اساس متعرفين يعني مو حجيتي كلشي للشرطه أنتِ؟ 

رواسي:كلشي ما اعرف فهمني! 

ادم:خطبج اكثر من مره ابوج چان بكل مره يرفضه اخر مره بيوم الي خطفج بي من نهيت عليج اني 

رواسي:يعني رسيم چان يحبني؟؟

ضحك مستهزء و گال 

ادم:لا بس يريد ينتقم من ابوج عن طريقج

رواسي:شمسوي ابويه ليش؟ 

ضرب على الستيرن بقوه و كال.. 

ادم:هوَ هذا الي راح يخبلني ابوج شنو مسوي حتى مخلي رسيم حتى بالاحلام يجينه 

درت وجهي على الجامه و انشغلت بتفكيري 

ليش رسيم خاطبني من ابويه و مموافق؟؟! 

و شنو الشي الي مسوي ابويه لدرجه رسيم يريد بس ينتقم منه ب اي طريقه! 

        

          

                

ما اعرف شلون وصلنه للبيت، نزلت من السياره 

و اخذت اغراضي و رأساً دخلت 

بوجهي فتت للغرفه طلعت ملابس الي بدلت و تمددت بفراشي، التفكير سيطر عليه 

خايفه من الجاي ما اعرف شنو حيصير بعد! 

بنفس الوقت الفرحه احتلتني من شفته واكف كدام عيوني 

و ما بي شي.. 

اندكت باب الغرفه سمحتله يدخل و سحبت 

الغطه على روحي غطيت جسمي.. اجه كعد يمي على 

طرف الجربايه و گال 

ادم:اهلي و اهلج جايين يمنه

رواسي:هلا بيهم، بس شعجب؟ من تزوجنا لحد هسه محد بيهم اجه علينه؟

ادم:نكعد نحجي و نضع النقاط على الحروف 

عدلت كعدتي و رفعت شعري عن وجهي و حجيت... 

رواسي:لتكوللهم اني حامل من رسيم الله يخليك والله ينزلوا ب اي طريقه 

ادم:ما اجيب طاري هذا الموضوع سرج يمي ميطلع ابد كومي مطمئنه 

رواسي:شكراً ادم

ادم:تعرفين جنت اتمنى نعيش حياتنه بحب و فرح 

بس أنتِ من يومج متريديني 

رواسي:صدكني ادم اني اشوفك اخويه، صعبه عليه اعيش وياك كزوجه و أنتَ بنظري اخويه 

ادم:حتى لو رسيم مجان داخل حياتج؟ 

رواسي:لا رسيم و لا غيره السبب، من احنه صغار رابين سوه و ببيت واحد لحد ما كبرنا يلا كل واحد راح ببيته الجديد ويه اهله لذلك ما اكدر اشوفك غير اخ الي 

ادم:هاهيه رواسي كومي بدلي و تعالي يلا لتطلعين كدامهم هيج 

رواسي:ليش بي شي لبسي؟ 

ادم:شوفي روحج بالمرايه و تعرفين اذا بي او لا، اني انتظرج بالصاله 

طلع من الغرفه و طبك الباب وراه

كمزت من مكاني و رحت على المرايه باوعت على روحي و گلت 

رواسي:والله مابي شي يعني شكو يريدني ابدل 

ركزت على روحي اكثر البدي محصور على جسمي 

و مخايل على ملابسي الداخليه مبينه 

ضربت كصتي و حجيت معصبه على روحي 

رواسي:طاح حظج رواسي، مو ببيت اهلج أنتِ شنو هذا اللبس متستحين على نفسج... عابت اي والله 

 

فتحت الكنتور و طلعتلي دشداشه لبستها و طلعت 

من الغرفه وكفت بمكاني لما اندك الباب.. راح ادم فتحه 

و دخلوا امي و ابويه و وراهم عمي و زوجته

سلمت عليهم و كعدوا همَّ اني دخلت للمطبخ 

خدرت جاي الشغله الوحيده الي اعرف اسويها.. 

صبيت الجاي بالاستكانات و اخذته الهم 

كعدت على الكرسي و حطيت الصينيه بحضني 

        

          

                

ابويه باوعلي و گال... 

راشد:روسيتي شلونج بابا؟؟ 

نزلت راسي ابعد نظراته عني و حجيت.. 

رواسي:ميهم شلوني 

عمي سالم گال.. 

سالم:ليش بابا ادم مضوجج بشي؟ 

رواسي:لا عمو، بس الي سويتوا بيه برأيكم اكدر اكون بخير من بعده؟؟

راشد:شسوينالج، فهميني رواسي شنو الي سويناه غير انو 

حافظنه عليج من شخص مجرم؟؟ 

حطيت الصينيه على الطبله الصغيره بصفي 

و حجيت.. 

رواسي:مجرم، متأكد أنتَ؟ اذا مجرم شلون طلع من السجن خلال كم شهر بس!! 

راشد:بس سوايته وياج تثبت انو هوَ شخص مجرم ولجج بنتي افهمي هذا يشتغل ويه عصابه!! 

سالم:احجيلنه الحقيقه بنتي و خلينه نفتهم! 

رواسي:انتو الي لازم تحجون مو اني؟؟ 

رفعت عيوني باوعت لابويه و عطت بصوت عالي.. 

رواسي:فهمنييي بابا أنتَ فهمني، شنو الي مسوي لرسيم أنتَ؟؟؟ 

راشد:سالفه قديمه 

باوع عمي لابويه و گال.. 

سالم:شمصخم أنتَ الثاني؟؟؟ 

راشد:ما اكدر احجي اي شي، بس بنتي التهي ببيتج و زوجج و عوفي رسيم ميفيدج 

كمت من مكاني و حجيت بعصبيه.. 

رواسي:تحجي كلشي هسه لا وحق الله اسوي شي ميعجبكم 

نتر بيه بنفس النبره.. 

راشد:شووو تهدديين ولججج! 

رواسي:احجي كلشي و هسه 

دار وجهه على امي و بقه ساكت، كام عمي من مكانه 

جره من ياخته و عاط بي 

سالم:ولككك احجي فضنيييي شنو مسوي؟؟؟ 

ادم:يابه مو هيج عوفه 

سالم:خلييي يحجي لا اطيح حظه هسه 

تنهد ابويه نزل راسه و گال... 

راشد:راح احجي بس تنطوني وعد اي حرف ميطلع، لان اتدمر اني و انسجن! 

سالم:شمسوي مصيبه احجي!!! 

راشد:رسيم شاف رواسي صدفه و حبها، اجه خطبها مني و لما عرفته منو يكون رفضته.. چان بكل مره يخطبها ارفض لحد ما اجاني بيوم و گال "شنو سبب رفضك الي" 

نزلت دموعه مسحهن و اردف.. 

راشد:بوكتها كتله اذا تعرف سبب رفضي أنتَ بنفسك راح تتركها، بقه فتره كلش طويله ما سمعت عنه خبر و لا شفته.. لحد ما اجاني بيوم و گال "رواسي راح تصير الي و احرمك منها مثل ما حرمتني من امي" 

        

          

                

عاط بي عمي بصوت عالي.. 

سالم:شنووو يعنييي، شمسويي لامه أنتَ؟؟؟ 

صار يبجي و گال بنبره حزينه.. 

راشد:موتتها 

كلنا شهكنا مصدومين من كلامه، بقيت فاتحه 

عيوني على وسعها من هول الصدمه.. نزلت دموعي 

و حجيت.. 

رواسي:شلون موتتهاااا؟؟؟ بابا شدتحجي أنتَ!!!

باوعتلي مرت عمي و گالت.. 

امنه:رواسي بنتي شبيج اهدي هسه نفهم كلشي 

كام عليه ادم حضني يهدي بيه، كل جسمي 

صار يرجف من العصبيه و عملت ابويه.. 

همس بصوت ناصي 

ادم:كافي رواسي مو زين عليج حامل

رواسي:متسمع شنو گال؟؟ 

ادم:بس اهدي حتى نفهم

اندار على ابويه و اردف.. 

ادم:عمي خلصناا و احجي ليش موتتها و شلون؟؟

راشد:من بعد ما مات ابو رسيم تعرفت عليها و حبيتها ردت اتزوجها على سنه الله و رسوله، بس هيَ رفضتني لان متزوج.. رحت عليها و تعاركنه و بلحظه صار كلشي 

رفعت عيوني على امي دموعها تنزل على الصامت

تعرف كلشي و بقت ساكته!!  

رواسي:منو المجرم بيكم أنتَ لو رسيمممم!  

راشد:مو قصدي والله دفعتها وكعت و انضرب راسها

بالحايط و بلحظتها ماتت 

سالم:و رسيم شلون عرف؟؟ 

راشد:من خاله هوَ حجاله 

رواسي:طلعوو بَررره 

ادم:سكتي عيب 

عطت بصوت عالي حسيت احبالي الصوتيه تگطعت

رواسي:كلتتتتت طلعووو بَررره، اذا متطلعون اني اطلع 

كام عمي گال 

سالم:نشكرج بنتي، يلا امنه 

رواسي:مو أنتَ عمو، ابويه و امي يطلعون ما اريد اشوفهم بعد 

راشد:رواسي بنتي والله كلشي صار بالغلط 

رواسي:مو بنتككك اني، تنسوني خلاااص 

عفتهم و دخلت للغرفه قفلت الباب عليه اعاصبي براس خشمي، باوعت على تلفوني تجيني رسائل رحت شلته من الشحن 

انصدمت بكميه الرسائل و المكالمات من رقم غريب 

فتحت الواتس و رديت كتبت 

رواسي:منو؟؟ 

رأساً اتصل عليه، جاوبته اجاني صوته يصيح 

رسيم:رواااسييي طلعي بَررره 

        

          

                

رواسي:شتريد مني رسيم؟ عوفني بحالي خلال كم شهر ما بقى شي مصار بيه 

رسيم:طلعي روسيه متبقين يمهم بعد 

رواسي:اني متزوجه رسيم لو نسيت؟؟ 

رسيم:خلال خمس دقايق اذا متجيني اني اهجم عليكم و بكيفج بعد 

سد التلفون بوجهي، بقيت حايره ما اعرف شسوي 

شوكت ارتااح اني شوكتتت... 

طلعت من الغرفه رحت للصاله چان بس ادم

موجود، باوعلي و گال متسائل 

ادم:شبيج لونج مخطوف؟

رواسي:رسيم بَره 

ادم:فوتي جوه أنتِ و قفلي الباب عليج 

رواسي:لتأذي حباب 

ادم:فوتي گلت! 

عفته و رجعت دخلت لغرفتي و قفلت الباب 

عليه مثل ما طلب مني.. شوي و صار صوتهم ثنينهم واضح بالبيت.. واحد يصيح على الثاني 

فتحت باب الغرفه و طلعت وكفت يم باب الصاله 

اسمع كلامهم.. 

رسيم:لتخليني اموتككك هسه، گتلك تطلكها و غصب عنك 

ادم:أنتَ تفهم لو لا؟ ادري شنو براسكك دماغ لو قندره؟؟ 

رسيم:وين ما اروح قندره رواسي ورايه، عائله متوارثه قنادر 

ادم صار يضحك بصوت عالي و صاح 

ادم:روااااسييي تعالي هناا حَبيبتي 

مديت راسي من الباب اشوفهم، رسيم نايم 

فوك ادم و يضرب بي و ادم خربان من الضحك 

دخلت للصاله تحمحت و گلت 

رواسي:جهااال انتو والله العظيم 

ابتعد رسيم عن ادم لما شافني اجه ب اتجاهي 

جرني من ايدي يريد ياخذني و گال 

رسيم:يلا امشي كدامي 

نترت ايدي منه و حجيت بعصبيه

رواسي:نعااال على راسك مو بس قندره، شبيييك بابا شتحس أنتَ؟؟ 

رسيم:متبقييين هنااا ما اقبل 

رواسي:و اني انتظرك تقبل يعني؟ منو أنتَ حتى تدخل بيه! 

ادم:رواسي كافي عيب عليج 

رواسي:اني عيب عليه لو هوَ؟؟؟ 

رسيم:اول مره يحجي حجايه بيها حظ اسمعي كلامه و سكتي احسن من ما تنركعين بالقندره على حلگج 

كعدت على القنفه و گلت 

رواسي:ترا عيب عليك تهجم علينه متستحي على نفسك أنتَ؟ ولو منين تجيب المستحه و أنتَ من المافيا 

        

          

                

رسيم:لججج والله مو مثل ما أنتِ مفكره شبيج! 

رواسي:اذا خلصت تكدر تروح يلا 

كعد ادم بمكانه و گال 

ادم:كافي ترا مصختوها ثنينكم، أنتَ الثاني اكعد خلي نحجي 

كعد رسيم وجه نظراته على ادم منتظره يحجي 

گال.. 

ادم:اسمعك رسيم شنو تريد أنتَ؟ 

رسيم:تطلكها و ارجعها على ذمتي 

ضحك ادم و گال 

ادم:ما اكدر تعذرني 

رسيم:غصب عنك تطلكها 

ادم:والله و غلاتها عندي ما اكدر اطلكها 

سكت شوي و بقه يباوع عليه نظرتله بمعنى لتحجي 

گال.. 

ادم:لانها بعدها مرتك مو مرتي 

صار يباوعلي مستغرب كمت من مكاني 

و حجيت بعصبيه.. 

رواسي:ليش هيج ادممم؟؟ 

ادم:حقه يعرف رواسي 

رسيم:شلون يعني فهموني انسطرت 

ادم:لانها حامل منك ف طلاقكم و زواجنه باطل 

صار يباوعلي بنظرات حيره، بادلته بنظرات غضب 

عفتهم كاعدين و طلعت من الصاله 

فرحت لان عرفني بعدني مرته و بنفس الوقت كارهته بسبب سوايته الي، و خايفه اذا ارجع يمه صدك يأذيني و ينتقم من ابويه بيه اني.. 

دخلت للحمام غسلت وجهي، طلعت من الحمام لكيته 

واكف ينتظرني يم الباب.. سحبني لحضنه و حضني 

بكل قوته و گال.. 

رسيم:مشتاقلج روسيه 

رواسي:وخر عني ادبسز 

دفعته عني بالكوه و تعديته مشيت صار بوجهي 

ادم گال.. 

ادم:روحي ويه رجلج رواسي ماكو داعي تبقين هنا بعد 

رواسي:مستثقل كعدتي يمك ؟؟ 

ادم:لا والله ابد بعيوني اخليج 

رسيم:حتى افگسهن الك و اخليك اعمى 

رواسي:شعندكك هنا بعدكك امشي روح ما اريدك اني 

رسيم:الكذاب الله يحطه بالنار روسيه 

رواسي:كون تنحرك بنار جهنم و تتشعوط تشعوط 

ادم:كافي رواسي، يبقى زوجج و لازم تروحين وياه و اذا متريدي ترجعين لبيت اهلج لحد ما تولدين بالسلامه و بعدها تطلكين من عنده 

رواسي:احس اكو شي غلط 

ادم:مثل شنو؟ 

رواسي:اني اتذكر مره قريت انو يقع الطلاق على المرأه الحامل 

رسيم:ميجوز يتزوجج و أنتِ حامل اصلاً حتى لو طلاقنا صح بس زواجكم باطل 

رواسي:اي خلص مدام متطلكين احنه ف عوفني بحالي 

ادم:هسه شنسوي يعني؟ 

رواسي:ادم اذا متريدني يمك ارجع يم اهلي عادي، بس رسيم مستحيل ارجعله 

عفتهم و دخلت لغرفتي بقيت حايره، شسوي و شنو الصح 

و شنو الغلط.. كعدت اقره على النت اريد اعرف طلاقنه باطل لو زواجي من ادم 

قريت ب اكثر من موقع انو طلاقنه صحيح حتى لو جنت حامل، بس زواجي من ادم باطل و اذا يريدني لازم ينتظرني اولد يلا يعقد عليه مره ثانيه 

شلون بلوه هاي، يارب ساعدني و لتخليني بهيج موقف 

اندكت باب الغرفه كمت فتحتها چان ادم گال 

ادم:ميقبل يروح منا الا ياخذج وياه، لحد هسه مطول بالي و ما سويت شي لخاطرج بس ما اريد اقهرج 

رواسي:احبه والله بس بعد كلام ابويه و المصيبه الي عرفناها اخاف اروح يمه 

ادم:خلي يعقد عليج من جديد و روحي وياه، تحبون بعضكم و اني شاهد على حبه الج

رواسي:يااا حب هذا ادم يا حب فهمني، عذبني و اذاني 

صح حبيته و ما اعرف شلون حبيته بعد كل شي سواه بيه 

بس اخاف ارجع يمه ليسوي بيه اكثر من هيج 

لككك كل جسمي اثار حروق و جروح لحد هسه ما راحن 

ادم:لعددد شكوو تزوجتي و فوكاها حامل من عنده؟؟ 

رواسي:كلشي غصب عني صار 

ادم:يعني متريدي ؟ 

رواسي:اوووف ادم اوووف لو اعرف اريده او لا ابقى ساكته برأيك؟؟؟ 

ادم:خير ان شاء الله 

دار وجهه عني و راح سديت باب الغرفه، نزعت الدشداشه اريد اغير ملابسي كدام المرايه

بقيت واكفه كدام المرايه و عيني على جسمي 

كله اثار ضرب و حرق، اخذت نفس و زفرته بقوه 

شلت ملابسي لبستهن بسرعه قبل لا يدخل عليه و يشوفني بهل منظر هذا!.. 

مشيت بكسل و گعدت بزاويه الغرفه و لميت رجلي على صدري و استرجعت ذكرياتي ليومي الاسود..  لليوم الي غير حياتي كلها...