رواية ذنوب على قيد الغفران الفصل الثامن و الستون 68 - بقلم براء

 ذنوب على قيد الغفران

                                        

 

منذر : فهد الله يخليك ساعدنيي اميي ضربتها جلطه وانشلتت 

الكل : شنووو 

منذر : اي ... فهد الله يخليك مو وكت الحجي اريد تساعدني 

فهد : اوكف اوكف بشنو تريدني اساعدك 

منذر : امي محتاجه عمليه وفورا وضعها كلش موزين واني ماعندي والله تعرف احنه بنهايه الشهر وما جوه ايدي فلس احمر اعرف بعد الي سوته متستاهل تساعدها بس هاي تبقه امي وما اكدر ما اساعدها 

فهد : شكد  محتاج 

علي : صدك تحجي بعد كل الي سوته راح تساعدها 

منذر : لخاطري مو لخاطرها والله ارجعهم بس خلي استلم راتبي فهد ماعندي غيرك والله 

فهد : بنفاذ صبر مو جاي اكلك شكد تريد 

منذر : مليون 

فهد : هسه ثواني باوعت لغنى مفتاح الخزنه بمكانه خو ما شايلته 

غنى : لا نفس مكانه 

فهد : خوش ... صعدت فوك جبتله المليون ونزلت تفضل 

منذر : والله ما اعرف بشنو اجازيك بعد كل الي سوته امي ومن طاحت بشده ساعدتها 

فهد : مو بحالها اني كل الي جاي اسوي لخاطرك انت بس ماكتلي شنو سبب الجلطه 

منذر : تنهد انت تعرف من بعد سالفه الفصل امي باعت الكاع مالتها انطتكم المبلغ الي طلبتو والي زاد من فلوس الكاع ضمتهن وقبل جم يوم اقترحت عليه تبيع كل ذهبها وتضيفه على هاي الفلوس حتى نبيع بيوتنه ونشتري بيت جبير نكعد بي اني وياها وبيت فيصل وفعلا اتفقت ويه فيصل وعرضت بيتي للبيع واخذت ذهب امي بعته ولكيت بيت جبير ومناسب قريب على بيت جدي ورحت البارحه اريد اخذ الفلوس من امي حتى اجملها فوك الذهب ونشتري البيت حاجيتها كالت خليت الفلوس عد فيصل يخليهن بالبنك لان اخاف ينباكن يضيعن رحت خابرت فيصل حتى يسحب الفلوس ويجيبهن جان السافل يكلي الفلوس اني اخذتهن هذا حقي من الكاع الي باعتها والفلوس هسه وديتهن لسوريا اسوي بيهن مشروع ويه جماعتي وهي بس سمعته من كد الصدمه وكعت بسرعه 

علي : لا يانذل يا خسيس 

فهد : وشصار بعدين .

منذر : بدموع ماشفتو منظرها شلون انعوج حلكها واديها وتختض نريد نسيطر عليها منكدر حتى الجهال اخترعو من شافوها من حلاه روحي شلتها بسرعه وخذتها للمستشفى اول مادخلوها كالو انشلت ولازمها عمليه فورا حاولت ردت احصل المبلغ ماكدرت وماصار كدامي غيرك لان السافل فيصل من كتله يكلي اني شكو تلكي هذا فلم من افلامها 

علي : صحيح امك اذت حتى ابليس بشرها بس فيصل بسوايته هاي بين هو حتى انكس من الخنزير هالكلب هذا 

            

فهد : بهدوء كافي حجي روح منذر لتتأخر 

علي : امشي منذر اني جاي وياك امشي يله 

غنى : طلعو الولد وخطيه منذر دموعه عشره عشره باوعت لخاله الي بانت على ملامحها التعجب 

ايمان : دخيلك ربي هاي شجاي يصير بالدنيا شلون واحد يبوك اهله بدم بارد شلوووون لو مهما كانو الاهل متتسوه وياهم هاي السوايه دخيلك وسترك ربي دخيلك شجاي يصير بالدنيا 

فهد : اللهم لا شماته بس كل الي صار من ايدها هاي نتيجه الحلفان بكلام الله جذب 

غنى : اباوع لمروان بجه شلته ... شنو قصدك فهد 

فهد : من شكيت بيها هي الي مبدله الحبوب مالت امي حلفتها على كلام الله وحلفت بكل عين خلت ايدها على القران وقسمت ما مسويه اي شي ولا مأذيه اي واحد منه  

غنى : استغفر الله الف استغفر الله كزبر جلدي شلون تكدر تحلف بالقران جذب 

فهد : تكدر ليش متكدر الي متخاف تخلي ادويه تموت الواحد وتسلب روحه ترديها تخاف تحلف بكلام الله 

نرجس : شنو من مله هاي وجماله نريد الله يرضه على هالبلد والله ما استبعد من بعد هالسوايات والاذيه الجاي تصير بهالوكت يكلبها بينه 

ايمان : سبحانك ربي شكد ما انت رحيم بينه بس لو تريد تعاقبنه تنتقم منه شر انتقام فعلا غفور رحيم شديد العقاب 

فهد : دك عليه منذر فتحت الخط وطلعت  

غنى : اهز بمروان وايدي على جوان ... يارب لتراويني هيج يوم بجهالي لتخليهم يأذوني ويأذون ابوهم لو كبرو ... اباوع لمروان يباوعلي بس شافني ضايجه برطم بعد كلبي لتبجي يكلبي انت هاا ضجت على ماما متريد تشوفها ضايجه اروح فدوه للحنين .... نرجس فدوه شيلي جوان كعدت افتري بيها بالغرفه بلكي تنام خلي انيم مروان 

نرجس : جيبيها ام الوكاحه ام الصلافه تريد واحد يشيلها ويديح بيها 

ايمان : مو خوش طبع هذا انوب تتعلم على الشيل ومتقبل تنذب بالكاع 

غنى : غير فهد يا خاله اذا كعد واحد منهم ياخذه ويطلع يفتر بي بالبيت لحد ما ينام ياله يجيبه 

نرجس : خليهم خطيه مادام يرتاحون بالفره يله اعوفكم اطلع افرفر جوانه حتى تنام 

غنى : فدوه لفيها زين لتاخذ برد 

نرجس : صار 

غنى : طلعت نرجس باوعت لمروان رجع نام حبيبي شليته بصفي وغطيته ... خاله لعد وين ورده 

ايمان : عدها امتحان وجاي تقره 

غنى : هزيت راسي اباوع دخل فهد ... هاا شكلك منذر 

فهد : كعدت يكول وضعها مو تمام والدكتور كايله تأخرت 

ايمان : يعني شنو راح تموت 

        

          

                

فهد : لا بس نسبه شفائها جدا ضئيله لان ما سوولها عمليه اول مادخلت وبنفس الوقت هي مضروبه جلطه كلش قويه بحيث ماردتها مرد 

ايمان : لا اله الا الله ... الله يبعدنا ويجفينه شر الامراض

 

فهد : امين 

ايمان : يله يمه اني اعوفكم واكوم ارتاح ... تصبحون على خير   

: اجمعين 

فهد : باوعتلها لعد وين جوان 

غنى : كعدت فاخذتها نرجس تفرها حتى تنام 

فهد : كمت صدك تحجين لتروح تاخذ برد مو جانت بالدفو اذا لاحها برد تستبرد متفكرون انتو يعني اضل اعلم بيكم 

غنى : اباوعله عافني وراح شويه واجه شايلها وهي كاعده ما نايمه 

فهد : خليتها على الجربايه هاا حبيبي كاعده حبيبت ابوها متكدر تنام هاا كلب ابوها تريد تلعب ... شنو شنو شتريد الحلوه 

غنى : كامت تبتسم يعمري شلون تضحك من واحد يناغيها ... اباوع اجه فهد يبوس بمروان ويجر بخشمه حتى يكعده ... لا فهد خطيه هستوه نام عوفه ما اكدرلهم ثنينهم 

فهد : الكوا..... ميقبل يكعد 

غنى : عليمن طالع ابد ميحب النوم 

فهد : عليه بس اني احب النوم بس وياج 

غنى : عيب عليك اني مو هذا قصدي 

فهد : ولا اني قصدي الي ابالج ... اباوعلها دنكت ابتسمت رغم جابت وصارت ام وصارلها سنتين وياي بس هي هي نفسها ابد ما تغيرت دنكت بست خدها ... يله حبيبتي نامي واني راح اضل العب جوان شويه لبين متنعس وتنام  

غنى : لا اخاف جوعانه خلي ارضعها بلكي تنام 

فهد : لو جوعانه تبجي بس لا شبعانه وتريد تلعب شلتها خليتها بحضني نامي انتي حبيبي اني بعدني كاعد منتظر علي يرجع 

غنى : ليش شتريد منه 

فهد : هو خابرني كلي لتنام اريدك بموضوع كتله ميخالف منتظرك 

غنى : ماشي ذبيت حجابي وتمددت مبعده مروان شويه عني لان اخاف واني اتكلب ااذي طبعا من يوم الي جبت وفهد ميقبل ينيمهم غير بنصنه غطيته وغطيت روحي وضليت اباوع لفهد الي كاعد ويسولف ويه جوان وهي بعد كلبي مركزه وياا عبالك تريده يحجيلها بعد ضليت اباوعلهم لحد ما نمت 

__________________________ 

علي : هاا شكلك الدكتور 

منذر : شكلي يعني للاسف ماكدرو يسيطرون على الوضع لان عمليتها تأخرت وهالتشوف ضربتها جلطه وانصابت بشلل 

علي : مو مشكله بلكي تتعالج وتصير زينه كافي منذر لتبجي ازمه وتعدي 

منذر : شلون متريدني ابجي لك هاي امي لو مهما تسوي وتفعل تبقى هي الجابتني وتعبت عليه قابل تريدني اصير مثل هذاك السافل باك فلوسها وبكل حقاره صدرهن لخارج العراق وما اهتم لا للحرام ولا للعيب 

        

          

                

علي : لو ما متأكد هو اخونه جان كلت نغ.... والله 

منذر : والله سوايته حتى النغو.... ميسووها لابد النغ... من تجيبه وتصرفلك جم فلس عليه مينساها الك بس هذا كلب .. كلب وسافل ومنحط لوما منحط ميرفع ايده ويضرب امه 

علي : الدنيا دواره واذكرك شتسوي يرجع عليك 

منذر : هزيت راسي 

علي : بقينه لل1 هو بقه وياها واني رجعت للبيت دخلت لكيت فهد منتظرني 

فهد : هاا شو تأخرت 

علي : ماكدرت اعوف منذر منهار على امه خطيه خابر خواله ولا واحد منهم قبل يجي صدمني موقفهم بصراحه يعني لو مهما كانت المشاكل بين الاخوه من يوكع واحد بشده بدال ما يوكفوله اول الناس يتبرون منه ويكولون مالنه علاقه 

فهد : جلاب شتتوقع من جلاب ولو الجلاب وفيه تنطيها عضمه تضل تعبدك بس ذوله منبع مال حقاره شتتوقع منهم ... المهم ما كتلي ليش ردتني انتظرك 

علي : هيج جانت ابالي حسبه وكلت لو صارت انت موجود واحاجيك بس الحمدلله ماصارت 

فهد : وشنو هالحسبه 

علي : عبالي راح تموت وتعرف وضع منذر انت ماعنده كلت اني وياك موجودين ونساعده لان جنت شبه متأكد راح تموت ترس اذاني سمعت الدكتور كال ضربتها جلطتين وحده وره الثانيه وانشل كل جسمها تعجبت من كال عايشه بالعاده الي عمره جبير وتضربه اكثر من جلطه وينشل ميطول بس هي عاشت شلون ماادري بقدره الله 

فهد : هذا عقاب من الله لو يريد يرحمها يموتها بس ربك يريد يعاقبها بالدنيا والاخره 

علي : اللهم لا شماته 

فهد : حشا لله اني ما اتشمت بس جاي اوضحك وجهه نظري يله من رخصتك اني تعبان اريد انام ورايه دوام وانت عود باجر لتروح للدوام ابقه ويه منذر خطيه 

علي : اي هو جنت مقرر هيج اسوي 

فهد : دخلت لغرفه امي شيطلع هالشهر ونصعد لغرفتنه جزعت روحي ما ارتاح اذا مو بغرفتي .. تدنيت وخرت الغطه ونمت بصف جوان اباوعلها هي ومروان نايمين بنصنه ابتسمت على منظرنه احس بشعور حلو من ننجمع كلنه سوه وخاصه بالنومه غمضت عيوني حتى انام باجر ورايه دوام 

_______________________ 

صباحا 

غنى : كعدت الصبح على صوت بجي جوان ومروان فتحت عيوني لكيتهم يبجون باوعت للساعه هستوها بالتسعه الصبح تنهدت ياربي والله بعدني نعسانه البارحه اربع مرات كعدت ينام واحد يكعد الثاني وهكذا رفعت جسمي على كيفي ... هاا يماما هاا هياتني يمكم لتبجون يعمري فتحت دشداشتي حتى ارضعهم شلتهم ثنينهم خليتهم على صدري اباوعلهم سكتو ... طبعا سالفه الرضاعه كولش متعبتني ماشاءالله عليهم حبايبي يجوعون بسرعه وهواي يردون صدري وهالشي من صدوك يتعب خاصه همه ثنين مو احد .... اباوع لمروان يطبطب على صدري ويرضع ابتسمت بعد كلبي شلون سوالف باوعت لجوان هاا ولج دبسزز شو خانسه

كامت تضحك هههه بعد عمري هالضحكه بوستهم يمه افيييش شكد احبكم 

        

          

                

رضعتهم لمن شبعتو وخرتهم عن صدري اخذت  كلينس مسحت حلوكهم وصدري نيمت جوان واخذت مروان ادك على ظهره حتى ميتقيئ تريعته وسويت نفس الشي لجوان 

نرجس : صباح الخير 

غنى : ابتسمت صباح الورد  

نرجس : هاا شو الحلوين كاعدين 

غنى : اي كعدو جوعانين قبل ربع ساعه رضعتهم وهاي كدامج كعدو 

نرجس : سوو اسوف يمه سنووو انتو سنوو الوح فدوه لهالعيون الحلوه ... ولج غنى جهالج رجعوني طفله بكد سالم 

غنى : شبيج شو احسج هادئه اليوم على غير العاده 

نرجس : خابرتني اروى تبجي 

غنى : خير شبيها 

نرجس : كالعاده نسرين وحجيها المثل السم 

غنى : شنو جديده عليها 

نرجس : تعرفيها بعد شكد تتحسس من موضوع الحمل ونسرين مكابلتها صبح وليل انتي جبيره وميصير عندج خلفه واستلاحكي روحج لتطلعين عاكر ... اكلها ولج غبره لتهتمين احنه راجعنه يم الدكتوره الي افهم من نسرين وعشره بكدها وكلتلنه ما بيجن شي وهذا رزق وانطتنه مقويات حتى يصير حمل بس هاي ثوله ناصبه مناحه وكاعده كل يوم 

غنى : انتي تدرين بيها شكد حساسه مع انو سامر واكف وياها ولا حجه ولا فتح حلكه بالعكس هو يكللها اكو ناس تبقى سنين بدون اطفال وما حجو شي ترديني اني الماصارلي سنه احجي واتمنن 

نرجس : صحيح حجيه بس تردين الصراحه غنى هالايام جاي اشوف علي كلما يشوفله طفل يذبله حسره شكبرها حاجيته اكثر من مره يكلي كالت روحي على الطفل بس صابر 

غنى : كولشي بأيد الله ولتتوقعين اكو واحد يريد مصلحتنه بكد ربنه ولتنسين كل تأخيره وبيها خيره اكيد اكو صالح من تأخر حملجن ... وهسه يله سويلنه ريوك وكعدي خاله دنتريك لان اني مااكدر اكوم يله يله 

نرجس : تره تعبت شوكت تصيرين زينه ماطلعت هاي 

غنى : برطمت تتعاجزين مني 

نرجس : اتعاجز من روحي ومنج ما اتعاجز هسه ثواني والريوك يمج 

غنى : ابتسمت حبيبتي ... طلعت واني كعدت العب جهالي شويه اريدهم يتعلمون على اللعب والضحك ما اريدهم يتنحسون 

_________________________

فهد : كاعد بمكتبي وخابرني عمي جاوبته ... الووو 

عباس : الوو هاا بويه الله يساعدك 

فهد : هله بيك عمي ويساعدك خير 

عباس : ماكو شي بس تعال للمعمل شوف العمال شتريد يسوون 

فهد : اني متفق وياهم على الي اريده نفس بناء المعمل القديم كلشي ليخربطون وانتو موجودين كل لمحسن شنو الي يخطر على بالك سوي بالشكل المعقول وانتو هم لان اني ما اكدر اطلع عندي شغل كلش هواي 

        

          

                

عباس : خلص براحتك راح اعوف محسن يتصرف 

فهد : ماشي ... سديته منه اباوع دخل عمر هاا 

عمر : هذا الاسمه اسعد اجو اخوان مرته لمكتبي يردون يحاجوك شكللهم 

فهد : خلي الشرطي يدخلون اشوف تاليتها وياهم شنو ... طلع عمر وهمه دخلو 

كامل وخالد : السلام عليكم 

فهد : هله ... خير 

كامل : انت رجل غنى مو 

فهد : قصدك غنى الي اخذتو ورثها وطردتوها بالشارع وشوهتو سمعتها بكل مكان مو 

خالد : الفات مات وكلشي انتهى واحنه ولد اليوم وهي تبقه بت اختنه واحنه خوالها 

فهد : رفعت حاجبي لا بله شلك بيها هاي ولد اليوم ابو ولد ... سمعوني زين خلي نختصر النقاش الماله داعي دخلو بصلب الموضوع بعد ساعه عندي اجتماع اريد اكمله وارجع لبيتي مرتي وجهالي منتظريني فاختصرو 

كامل : شوف ابني احنه...

فهد : قاطعته سياده الضابط فهد او ابو مروان اني مو ابنك 

كامل : ابو مروان اسمعني احنه داخلين على الله وعليك نريدك تساعده بشغله ابو امير الي راح بالرجلين بسبب حادث غير مقصود وتدمر ودمر مرته وابنه وبناته وياا 

فهد : هذي مو مشكلتي اني شعليه ماسامع القانون لا يحمل مغفلين محد كله روح اشرب سم وسوق واكتل بالعالم وبعدين اني اخر واحد المفروض تلجئون اله لان تدرون بيه شكد حاقد واكرهكم على الي سويتو بمرتي واسعد لو تطلع روحه كدامي وباستطاعتي اساعده هم ما اساعده على سوايته النكسه ويه غنى 

خالد : بس الانسان خطاء اذا الله يغفر منو احنه ومنغفر 

فهد : هذا الله مالك هالدنيا وصاحبها منبع الرحمه والمغفره تجيبه علينه لا وتقارن هم لك بابا هذا الله انت مستوعب المقارنه الي جاي تسويها منو اني زبالتيش وتقارني برحمه الله 

كامل : حشاك ابو مروان مو هذا القصد بس احنه طمعانين باخلاقك وكلامك كلها هنا تشهدلك من شرطه لضباط شكد خوش ادمي وكلبك طيب فأجينه نحاجيك باعتبارك نسيبنه وماعدنه غيرك وهم تعشمنه باخلاقك  

فهد : بهدوء اولا انتو جذابين بهالمركز كل الشرطه تكرهني لان شاوي البصل على اذانهم هاي نقطه نقطه ثانيه ستوكم عرفتو عدكم بت اخت ومزوجه وجايين تدورولي هالكلاوات نسيب ونعيل ونن هالسوالف سمعوني زين حتى لو جان بامكاني اساعد رجل اختكم النذل هم ما راح اساعده وبالنسبه لقضيته فتحولت للمحكمه وانحكم بعد لو تنكلب الدنيا محد يكدر يساعده القضيه طلعت من ادينه فلتحاولون لان رجل اختكم لابسته القضيه لابسته

خالد : يعني ماكو امل ابد 

فهد : اي ماكو امل وهسه اذا ممكن تفاركوني لان عندي اجتماع 

        

          

                

كامل : احنه جدا نتشكرك لان انطيتنه من وقتك 

فهد : هله ... اباوعلهم طلعو شلون اشكال بسم الله متنكال بوجهم بس اريد اعرف هالبت المشعول العندي عليمن طالعه تبرك ... اخذت سلاحي وطلعت رايح لمكتب الاجتماعات حتى استلم القضيه الجديده 

_________________________ 

غنى : كاعدين اني ونرجس وخاله ايمان ودخلت علينه انغام بايدها جهالها 

ايمان : شبيج يمه 

انغام : هسه خاله ... ولج نرجس لحكيني بماي بسرعه 

نرجس : هله هله الواضح اكو اخبار دسمه اوكفي خلي اجيبلج الماي مو تحجين 

غنى : طلعت نرجس تركض جابت ماي لانغام الي وجها صاير احمر وتهفي بعز البرد 

نرجس : احجي يله 

انغام : شربت ماي واخذت نفس كاعده .... ولجن بتول 

الكل : خير شبيها 

انغام : تزوجت 

الكل : يااا 

انغام : اي والله 

غنى : شلون يعني تزوجت وانتي شمدريج 

انغام : مو تدرن بيها قبل فتره طويله تطلكت وتكربست براسي وكعدت عدي وره ما عافتكم يربجن كمت اشوفها تتقرب لمنذر لو تلبسلي دشداشه جنها اتك لو تلبس تراك يحدد ملابسها الداخليه خبلتني وهذا منذر الفاهي يدنك راسه ويغلس تالي جزعت روحي من كمت اشوفها تخابر بنصاص الليالي خفت لا تطلع جاي تحجي ويه منذر فكمت اراقبها وعينجن متشوف الشفته ولجن مسويتلها علاقه ويه واحد متزوج عن طريق الفيس ومدري شلون ضاحكه عليه ومخليته يتزوجها بسر ومحد يدري 

نرجس : عزه العزاها كون ... واكول ليش كلتيلي بأخر فتره متكعد بالبيت طلعت تروح لهذا 

ايمان : الله يطيح حظها ما صارلها حتى سنه من تطلكت راحت عرست 

انغام : ليش انتن متدرن المثل هاي يفلفلن على الرجل يكدرن يبقن بدون زواج لا وجماله احاجيها قبل شويه تكلي اني ما مسويه شي حرام عاقد عليه سيد وما علنت زواجي منه سابقاً لان ما جنه جاهزين 

غنى : والله عدها قابليه شلون تتقبل نفسها اكثر من رجال يدخل حياتها ماشي انتي تطلكتي حقج تشوفين حياتج بس مو هيج ...اباوع لخاله ايمان لزمت زلوفها 

ايمان : وحق ذني وكولن كالت ايمان اذا ما طلكها الرجال يستقتل على المره بس مو الرخيصه وهاي من شافها باعتله روحها هسه يشبع روحه بيها ويذبها مثل كريم وهسه تشوفن 

نرجس : لا والله خاله تسمحيلي اغلطج تره بوكتنه هنه الساقطات الي يحيرن شيسون حظهن كاعد الشريفه بهالوكت ماكله تبن بثنين اديها 

غنى : الحمدلله ليش ماكلين تبن بالعكس الله منعم علينه من خلانه راضين مرضيين بحياته عبالج المثل ذني يرتاحن لا قابل حلوه يعني كل يوم ويه رجال شكل وين الحظ بالموضوع بالعكس ذني يقهرن لان صارن سلع يطيحن بأيد اي واحد يلعب بيهن وينذبن 

        

          

                

انغام : اي والله لا عاب حلكج ... بس الكاتلني اني ذوله الزلم المطايه من الله انطاك بيت ومره وعائله تروخ تخووون ليش وياريت لو يتزوجولهم وحده عليها الاعتبار على الاقل اسمها شريفه لا همه وين ماكو كح.... يركضون 

ايمان : لا مو الكل

غنى : ضلن يتناقشن بالسالفه واني صفنت عجيب شلون النسوان يتقلبن ينامن بحضن اكثر من رجال يمه اني غير فهد ما اقبل ولا اريد تلعب روحي من كل رجال غيره وما اتقبل اتخيل نفسي ويه اي رجال غيره بس ما اعرف هالنسوان شبيهم ... تنهدت الله يبعدنه .... مر الوقت راحت انغام لان طلعو سعاد  واجه فهد هاا حبيبي الله يساعدك 

فهد : دنكت اخذت شفايفها هله يروحي هاا شو كاعده 

غنى : نومت الجهال وانتظرت شو تأخرت حبيبي حتى دكيت عليك مجاوبت 

فهد : نزعت قميصي اي جان عندي اجتماع ماكدرت اجاوبج 

غنى : جوعان اكوم اصبلك غده 

فهد : لا حبيبي لتتحركين موزين عليج اني تغديت بالمطعم ويه جماعتي واجيت 

غنى : شعجب 

فهد : نمت على رجلها تردين الصراحه كمت استحي من مرت علي خطيه صارلها فتره شايله البيت على راسها وكل يوم اجي بي من الدوام هي تصبلي غده وتسويلي جاي وتسألني شمحتاج وشتريد فشله ابتلت خوما ابتلت 

غنى : مسحت على شعره ان شاءالله بس خلي يتحسن وضعي واني ارجع اكوم خطيه نرجس انشلع كلبها وياي 

فهد : دخيلج كعدي وسكتي اني مستعد اضل اكل من المطعم واغسل هدومي بأيدي بس لتتحركين انتي وترحين تتاذين 

غنى : دنكت عليه بست خده بقوه احبك 

فهد : اوف شكد مشتاقلج بس ميصير اتقربلج اله وره الاربعين يله نصبر ونكضيها مقبلات وابو قاسم نرجع نصومه قابل شعدنه اكلج 

غنى : هاا 

فهد : متنطيني بوسه من الحلك 

غنى : ابتسمت مخليه شفايفي على شفايفه هستوني دابوسه وصرخو الجهال 

فهد : لا ياا ولد الكلب يا ولد النعال كمت شلووون يعني منبوووس اليوم 

غنى : اباوعلهم من صاح بيهم خنسو 

فهد : شو سكتو خاف زعلو 

غنى : رفعت كتافي ما اعرف يمكن ... اباوعله كل عقله دنك يبوس ويشبك بيهم ويتعذر 

فهد : اسف باباتي اشاقه وياكم ميخالف بخاطركم منبوس قابل شنو البوس رب الصومت ابو قاسم ما اصوم حلكي 

غنى : كاعد يتناقش ويسولف وياهم وهمه وياا ضحكت هههه 

فهد : عليمن تضحكين

غنى : منظركم تحفه بصراحه عود صدوك تحجي كاعد تبرر لاطفال عمرهم ماصاير حتى شهر شيفتهمون همه 

        

          

                

فهد : لو عمرهم يوم هم ما اخليهم يضوجون مني غنى ما اريدهم يذكرون عليه ولو موقف واحد مو حلو اريدهم كلما يصفنون يكولون الله انطانه ابو والنعم منه 

غنى : ابتسمت تحبهم 

فهد : شميتهم اموت عليهم ذوله كلبي 

غنى : لعد واني 

فهد : انتي روحي نفسي عمري حياتي كياني كلشي بيه شتردين بعد 

غنى : ابتسمت انت الي روحي وعمري وحياتي بست ايده اروحلك فدوه 

فهد : شفتو بابا خو امكم التتحارش ومن اكوم اكسرها تكول اوي فهد اكعد راحه 

غنى : هههه دكوم دكوم اسبح وارتاح 

فهد : اي كايم 

غنى : اباوعله اخذ ملابسه ودخل للحمام سبح وطلع فرش السجاده ووكف يصلي ... كمل وكعد يسبح 

فهد : صدك ما كتلج رجل خالتج انحكم خمس سنين

غنى : باوعتله عود صدوك.

فهد : لعد اجذب عليج 

غنى : ليش 

فهد : غير لان كتل طفل انحكم عليه خمس سنين بتهمه القتل الغير متعمد تحت اثر كحول 

غنى : صفنت دمرني وخلاني داخله انذار لسنه والله دمره لخمس سنين 

فهد : كمت كعدت يمها شبيج حبيبي 

غنى : حضنته دافنه راسي بركبته تدري لو ممساعدني بذاك اليوم جان تدمرت 

فهد : غمضت عيوني بروح ابوج لتجيبين طاري ذاك اليوم لان حيل اتنرفز من اتذكره واعصابي تنتلف من يجي على بالي ابتعدت مباوعلها شبيج 

غنى : اموت عليك ياروحي وسندي 

فهد : بست ركبتها وعضيتها الهيييي اختباااارك صعببببب صعببببب

غنى : عززه فهد صوتك فضحتنه 

فهد : شيخلص هالشهر والله متت ابو قاسم يبجي يريد مريته 

غنى : بخجل هو شدمرنه غيره 

فهد : بشرفج تحبي 

غنى : منو هو 

فهد : ابو قاسم ابو العيشه 

غنى : يااا فهد احبه شنو كوم كوم 

فهد : ليش شبي يخبل ... تذكرين من...

غنى : قاطعته عززه فهد لتروح زايد كوم مني كوم 

فهد : ضحكت ام وجه الفاهي عود تستحي وهي مخلفه 

غنى : للمره الالف اكلك انت مزنجر فلتعيب عليه 

فهد : تعاي بس شو جهالنه لا فاهين ولا مزنجرين 

غنى : اي الحمدلله ما طلعو عليك جنك بيذنجانه 

فهد : عود صدك 

غنى : جريته من تشيرته بخفه و بست شفايفه ليش يصحلي يطلعون جهالي بهالجمال واكول لا كتلك حتى لو مزنجر اموووووت عليك وبعيني احلى رجال خلقه الله انت 

        

          

                

فهد : اويلي الله اووف من اشلع هالشفه هم واحد يكلي ليش حضنتها بقوه لان ما اكدر اتقربلها ميجوز 

غنى : حضنته واني مبتسمه 

____________________________

علي : كاعد وطلعو منذر وليلى يبجون ... شكو شبيكم 

منذر : لك علي امي حتى حلكها متكدر تحركه معووج ليم اذنها وحجيها كله مكسر اديها معوجات حتى الاطباء صفنو ماكو تفسير لحالتها غير الجلطه معقوله الجلطه هيج تسوي 

ليلى : بدموع روح شوف يا مله سافله وحقيره سحرولهاااا و وصلوهااا لهالمرحله الجلطه متسوي هيج شوووف امك لو مرت اخوك ام الزلم شمسويات لامي 

علي : احترمي نفسج لا امسح بيج المستشفى خاف عبالج اذا دكتور ما اسويها تره مسقط وبايعهن كلهن فلزمي حدج وديربالج تجيبين طاري امي على لسانج ومرت فهد هم ترحين فدوه لاخلاقها ولو هو مو صوجج صوج امي الي ماوكفت بوجهنه وكالت لترحون وصوج مرت اخويه من ما تفلت بوجهج وطردتج من بيتها بس هنه ميفتهم 

ليلى : هذا حجي مرتتتك مووو 

منذر : كافيييي انتي شنووو متملييين من المشاكل امسحها بوجهي عليه 

علي : انت شعليك وامسحها بوجهك يله حبيبي اني اروح لان من دوامي كبل اجيتك والله هاي وكفتي لاجل عينك وفهد هم لو عنده مجال يجيك بس عنده دوام 

منذر : معذورين والله ما اعرف شحجي الي من امي وابويه ذل امي ووصلها لهالمرحله وولد ابويه الي هي مرت ابوهم واذتهم وبالاخص فهد حركتله معمله كله وهم من احتاجيته وكفلي ما اعرف افرح لو ازعل على الجاي يصير 

علي : حضنته احنه اخوه يامنذر لتنسى هالشي ولو تثالث الدنيا محد يكدر يفركنه طبطبت على ظهره وابتعدت طالع .... الله لايوفقج ياسعاد حرام ادعي عليج وانتي بهالشده بس تستاهلين واحد يدعي عليج دمرتينه وفركتي شملنه شكول عليج ...رجعت للبيت طبيت البيت هدوء جهال فهد نايمين ماكو صوت اباوع طلعت نرجس تلكتني 

نرجس : هاا لولي شلونك 

علي : هلوو حبيبتي 

نرجس : تتغده 

علي : اي والله جوعان بس وين فهد 

نرجس : رجع ونام اعتقد لان غرفه امك هدوء

علي : هاا خوش 

____________________________

غنى : كعدنه العصر من النوم كعدت فهد وكام يتحارش بالجهال يكعدهم جزعهم لمن كعدو وهو كالعاده طاحلهم تعضعض لحد ما بجاهم ورجع بوسهم وهمه الدبسززيه شيسويلهم ويرجع يبوسهم يسكتون شويه واجه الكل كعد بالغرفه وراحت نرجس جابت جاي وكعك وكعدو علي وفهد يسولفون على وضع سعاد 

ايمان : زين همه ليش ميحولوها على اخصائي 

علي : اجه اخصائي شافها وهو اصلا الدكتور السوه الها العمليه اختصاص بس ماكو فائده صارت خرده 

        

          

                

نرجس : شنو يعني 

علي : بعد متكدر تتحرك ممكن حلكها يرجع بالعلاج بس تكدر تمشي مستحيل اله معجزه من الله ياله 

فهد : صدك شو بتول ما اجت لهنا تتبكبك وتريد واحد يساعدها كالعاده 

ايمان : غير تزوجت 

فهد : بهالسرعه 

ايمان : اي حتى اني تفاجئت 

فهد : يطبها هرش شسويلها همزين عرست وفكت ياخه عنه 

غنى : ضلينه كاعدين للمغرب وكلمن كام لمكان مر اليوم .... وصارعلى ولادتي تلث اشهر واليوم حنروح اني وفهد وهمه للحله نبقى كم يوم طبعا جهالي بهل الكم شهر نشنشو وصارو يخبلون الدنيا مكلوبه عليهم لان مدبدبين وبيض حمر وسوالفهم تخبل هادئين الى درجه ..... واكفه اباوعلهم جنت ملبستهم تراكات سوده وبيها خط ابيض طالعين يخبلون .... فزيت على صوت فهد درت وجهي عليه 

فهد : يله وين صرتي 

غنى : كملت بس خلي اكمطهم حتى اسيطر عليهم جبت الكماطاطات كمطتهم انطيت مروان لفهد وشلت جوان نزلنه لكينه خاله كاعده 

فهد : ما نويتي تجين تعاي ويانه غيري جو شعدج بالبيت 

غنى : اي والله خاله تعاي ويانه 

ايمان : مابيه حيل والله روحو انتو تونسو شعليكم بيه 

فهد : شنو شعلينه غير اني كلت نروح سوه تالي انتي بطلتي 

ايمان : ولك يمه والله مو حمل طريق اني اتعب واختك عدها دوام خوما اغيبها على حساب الطلعه روحو انتو وتونسو عبالك اني وياكم 

فهد : خلص براحتج 

غنى : تقدمت بوستها يله مع السلامه خاله 

ايمان : الله وياكم بعد كلبي شو ابوس الحلوين يمه يمه شلون راح افاركهم تلث ايام شلون انام وحسهم ما سامعته 

غنى : ابتسمت اخذناهم وطلعنه صعدتهم وره وثبتتهم بمثل الكاروك المتحرك شد عليهم فهد الحزام وصعدنه لان ما اكدر الزمهم ثنينهم وره اامنلهم 

فهد : هاا هسه تمام نطلع 

غنى : اي ... طلع فهد وكل عقله شغل المسجل على ماما جابت بيبي على حساب الجهال ... عفيه فهد مخلصانه منها بالبيت تطلعها الي هنا 

فهد : غير جهالي يحبوها انتي شكو سمعو باباتي ماعليكم بهاي 

غنى : هزيت راسي والله سوالفك كضينه الطريق كله ماما جابت بيبي وفهد كل شويه يدور وجهه عليه يصيح بصوت هاااااا وهمه يسنكرون من الضحك بعد كلبي ... وصلنه وره ساعتين لان فهد يسوق بهدوء على حسابهم اباوع وكف يم فندق ... مو عدكم بستان شعجب جبتنه للفندق 

فهد : دخلت للكراج ... حبيبي بيت البستان كاعد بي الفلاح الجديد وعائلته واذا رحنه لا احنه ناخذ راحتنه ولا همه خطيه فكلت نبقى بفندق وكل يوم اطلع افركم بالحله واخذكم للبستان هم 

        

          

                

غنى : خوش عاشت ايدك 

فهد : صفيت السياره ونزلت فتحت بيبان الوره نزلت الجنط والعربانات خليتها بيها الجهال وانطيتها لغنى قفلت السياره واخذت الجنط ودخلنه

غنى : اخذ فهد هوياتنه و وكف يحجز السويت ويدفع باوعت على بنات كاعدات ويباوعن للجهال حجت وحده 

: ذوله توم 

غنى : هزيت راسي 

: بنات مو 

غنى : ابتسمت لا ولد وبنيه 

: فدوه يتشابهون مامبين ولد وبنيه 

غنى : اباوعلهن اجن يكرصن بخدودهم ويلزمن اديهم وهو صافنين عليهن مستغربين 

: هاي ليش هيج يباوعون 

غنى : ابتسمت مستغربين لان مشايفيجن سابقا هاي طبيعتهم 

: يا فدوووه الله يخليهم 

غنى : تسلمن حبيباتي ويخليجن 

فهد : يله غني 

غنى : اي يله من رخصتكم دفعت عربانتهم ومشيت صعدنه بالمصعد صاعدين للطابق الي حنكعد بي ... حبيبي بأي طابق حجزت 

فهد : بالطابق الثاني هسه نوصل

غنى : وصلنه للطابق الثاني فتح فهد الغرفه المكتوب عليه نفس رقم المفتاح دخلنه اباوع تشبه الشقه الصغيره حلوه تخبل تشبه مال العرسان بيها مطبخ وصاله وغرفتين 

فهد : عجبتج 

غنى : فتحت حجابي كولش حلوه

فهد : شفته بالانترنت وعجبني اخذت الموقع وجبتكم همزين عجبكم .... باوعت للجهال شبيهم شو خانسين 

غتى : اكيد تعبانين من الطريق هسه ارضعهم وانيمهم بس خلي ابدل واجي دخلت للحمام ذبيت مي على روحي ولبست تراك برموده وطلعت انشف بشعري لكيت فهد مطلعهم ومحللهم ... هاا حبيبي تسبح 

فهد :  اي هسه بس طلعيلي ملابس 

غنى : صار رحت طلعتله تراك عزلته على جهه واجيت يم الجهال ... باوعت لروحي زين اني شلون حرضعهم واني لابسه تشيرت نزعته واخذتهم كعدت وخليتهم بحضني اللهم صلِ على النبي من كد ما مدبدبين من اشيلهم ايدي تضل توجعني وكمت اخاف عليهم .... رضعتهم وامسح على ظهرهم بلكي ينامون اباوع طلع فهد لاف منشفه على خصره وينشف شعره 

فهد : اباوعلها .... اكلج 

غنى : هاا حبيبي 

فهد : اني جوعان 

غنى : اي مو جبنه غده ويانه هسه بس خلي اشبع الجهال واكوم احضرلك الغده 

فهد : بهدوء بس اني اريد اكل مثل جهالي ... غنى 

غنى : هاا 

فهد : اني جوعان واريد مثل اليسوو جهالي حالي من حالهم 

        

          

                

غنى : احم حبيبي بس...

فهد : تقربت وكفت كبالها دنكت بايس شفايفها يله كمليهم حتى يجي دوري ماعندج حجه بعد طابت عمليتج وطلع اربعينج وطلع ... بست بصف شفتها هاا شكلتي 

غنى : بخجل ماشي بس اكملهم .... رضعتهم ونيمتهم واجه هو بدون مقدمات وطبعا ما عافني لحد ما اخذ الي يريده .... حبيبي حيكعدون كافي 

فهد : مصيت ركبتها خلي يكعدون طزز هي هاي العايزه بعدهم بطول ..... واحسبلهم حساب 

غنى : حضنت متونه انت متشبع 

فهد : اخذت شفايفها بايسهن ابتعدت ساند راسي على راسها لا ما اشبع ولتسألين هالسؤال بعد بهالسالفه اني نفسي دنيه خوش 

غنى : آاااه موو هيج ضربت صدره زين تعرف روحك 

فهد : ابتعدت عنها نايم بصفها خليتها بحضني اووف هسه ارتاحيت 

غنى : كلبت جسمي نايمه على ايده بهدوء عفيه طاقه متخلص 

فهد : ضحكت مو بصالحج اذا خلصت طاقي وتعرفين ليش ماكو حاجه ندخل بالقلم العريض 

غنى : ابتسمت نايمه بحضنه .... للعصر ياله كعدنه صلينه وبدلنه وطلعنه نفتر بالحله كولش حلوه تشبه بغداد ثاني يوم رحنه زرنه الحمزه عليه السلام و زيد ابن علي عليه السلام تغدينه هناك وزرنه وافترينه بالسواك مالتهم وراها افترينه بمناطق الحله مولاتها شوارعها سوكها كولش تونسنه بهالتلث ايام رجعنه لبغداد والضحكه على وجوهنه حتى الجهال غيرو جو هناك رجعنه لبغداد ورجعت حياتنه لطبيعتها 

________________________ 

بعد مرور اسبوع  

  

نرجس : كاعده بغرفتي ودخلت عليه اروى .. لاهله ولا مرحبا شعدج 

اروى : اكلي تبن ولج وعوفي العرك 

نرجس : كعدت شبيج ولج

اروى : ولج شاكه بروحي حامل 

نرجس : حلفي 

اروى : والله العظيم ... الشهريه صارلها اسبوعين غايبه عني وماردت اكل لسامر واامله حجيت لملك وخليتها تجيبلي اختبارات حمل 

نرجس : اي وسويتي الاختبار 

اروى : لا 

نرجس : ضربت كصتي لج ليييش ياثوله 

اروى : اخاف 

نرجس : من شنو يحظي 

اروى : اخاف يطلع سلبي 

نرجس : دتعالي خلي نروح يم غنى لان اخاف علي يدخل علينه فجأءه وفهد ماهو هسه يله تعاي بسرعه 

____________________ 

غنى : كاعده العب مروان وجوان واندكت الباب كمت فتحتها لكيت نرجس واروى بوجهي ... ابتسمت يا اهلا تفضلن ... شبيجن 

        

          

                

نرجس : حجيتلها كلشي

غنى : اييي بلكي الله تطلعين صدوك حامل 

نرجس : يله دخلي سوي التحليل 

اروى : اخاف والله 

غنى : سمي بسم الله وروحي دفعتها يله لتخافين حتى لو طلع سلبي 

نرجس : ذني اربعه ياهو اول واحد تجربي 

اروى : ملك كالت ذني مضبوطات وابد ميخطأن راح اخذ واحد منهن 

غنى : اي يله ... اباوعلها اخذت واحد ودخلت للحمام .... لزمت كلبي يارب بجاه زكريا عليه السلام مثل مارزقته الذريه ترزق كل محروم .... ضلت اروى جوه ربع ساعه وسمعنه صوتها تصرخ ركضنه للحمام لكيناها تبجي ... شبيج 

اروى : خطين خطين التحليل ايجابييييي انيييي حامل حااااامل 

غنى : حضناها وكمنه نكمز وياها كد مفرحانين يمكن بحملي مافرحت هيج ابتعدنه بوسناها وباركنالها 

نرجس : مبروك الوصخه تكومين بالسلامه ان شاءالله 

اروى : حقيره يبارك بيج يوم الالج ان شاءاللهة

نرجس : باوعت للاختبارات بنات شنو رأيجن اني هم اجرب 

غنى : شتجربين 

نرجس : احلل شو عجبني الوضع والدراما الصارت اخذت الثاني راح اجرب ما اخليها بنفسي 

اروى : تخبلتي 

غنى : اي صدوك شلون تسوين الاختبار وانتي ماعندح اعراض حمل 

نرجس : والله اجرب ما ابقيها بنفسي اخذته ودخلت للحمام 

غنى : هههه خبله مو صاحيه والله .... كل عقلها دخلت سوته وطلعت 

نرجس : ولجن شو طلع خطين 

اروى : شنو شنو 

نرجس : اي والله هاجن شوفن 

غنى : اخذت الاختبار منهن اي والله ولج 

نرجس : عود يعني اني حامل هسه 

غنى : مااعرف هاج الثاني روحي جربي خلي نتأكد اباوعلها اخذته ودخلت مره ثانيه سوته وطلعت هاا 

نرجس : هم خطين ... باوعتلهم عود صدك يعني 

غنى : ضحكت سبحانك الهي سبحانك حضنتها ونزلت دموعي شكد سمعن حجي تالي حبلن سوه 

نرجس : اني حامل حامل ههههه يعني مو عاكر مثل متكول نسرين الغبره 

اروى : اي ولج اي بس لحضه انتي حتى بهاي لاحكتني 

غنى : هههه لا احلى شي تزوجتجن سوه وحبلتن سوه .... اباوعلهن يضحكن من كل كلبهن بيومها كلنه للكل وبدون مبالغه البيت كله فرح لان ثنينهن سوه حبلن علي الدنيا ملامته وسامر خطيه من الفرحه حضن اروى كدام الكل ويضحك صدوك بيومها الابتسامه مافاركت وجوهنه 

        

          

                

ثاني يوم اجه منذر وفاجئنه من كال سعاد تريد فهد حتى هو تفاجئ راح فهد ويه منذر 

__________________________

فهد : دخلت لبيت منذر وينها 

منذر : بهاي الغرفه تعال 

فهد : دخلت جوه لكيتها متمدده منظرها صدمني لا ايد ولا رجل ايدها معووجه وحلكها هم تقربت كعدت كدامها ... ردتيني 

سعاد : بصعوبه من منذر اط اطلع بره 

منذر : ماشي 

فهد : طلع منذر وبقينه اني وياها ... خير 

سعاد : لل ليش مم ما اجيت زر زرتني 

فهد : كلامها بصعوبه ينفهم ركزت وياها ياله فهمتها .... وليش ترديني ازورج شنو تغشمين روحج لو شنو 

سعاد : فه فهد اا اني اخخ اخاف اامم اموت اريد تبريلي الذمه وتس وتسامحني

فهد : ابتسمت والله جريئه انتي بعد كل الي سويتي تردين ابريلج الذمه واسامحج ... كليلي بله على شنو ترديني اسامحج ؟ على حركه المعمل لو على اذيتج لامي لو ... كمت تقربت منها دنكت عليها همست لو ترديني اسامحج على التعذيب الي جنت اتعذبه بسببج لو اسامحج على الليالي الي نمتها بالبرد واني جوعان لو اسامحج على الاثار الي انطبعت بجسمي بسببج لو اسامحج على تفرقتج الي زرعاتيها بيني وبين اخوان لو ولو لو ولو على شنو ترديني اسامحج ويا موقف ترديني ابريلج الذمه بي .... تذكرين من شفتيني مره كاعد اسوي دفتر جنت ناوي انطي للمدرس مالتي واجيتي انتي اخذتي وحركتي وحركتي كلبي وياا بعد ما جنت اشتغل لاسبوع لالا خلي اذكرج بموقف ثاني تذكرين من شفتيني اكل ورحتي كلتي لابويه وبيومها ابويه عاقبني وحرمني من الاكل يوم كامل بعد شنو ذكريني مواقفج هواي 

سعاد : بدموع سس سامحني فهد ا اني ظلمتك و وا واذيتك هواي ب بس والله متندمه اتمنى منك تسامحني 

فهد : اذا كدرتي ترجعيلي طفولتي واذا شافيتي الجروح الي بجسمي اسامحج يله تكدرين صحت احجييييييي 

سعاد : لارد تبجي 

فهد : متكدرين لان هذا شي مو بأرادتج واني هم ما اكدر اسامحج لان روحي رافضه هالشي كلما اشوفج واتذكر حياتي قبل اكرهج بالزايد وروحييي يا سعاد ما مبريه الذمه وعسى الله لا يرحمج وما مسامحج اني ابتعدت وطلعت تحت صياحها وصياح منذر اليوم اكدر اكول خذت حق 31 سنه من عمري من شفتها ذليله كدامي ابتسمت صدك الدنيا دواره 

________________________ 

بعد مرور سنه ونصف  

غنى : كاعده بالامام الكاظم (عليه السلام)وجوان ومروان يلعبون كدامي ... حاجيتهم على كيفكم ماما فدوه اروحلكم لتوكعون .. اباوعلهم اجوني ثنينهم هاا 

جوان ومروان : باابي بابي 

غنى : ابتسمت ديزور ماما اشرت شوفو هناك راح يزور ويجينه ... جوان حبيبتي ليش هيج ملابسج جنت ملبستهم ثنينهم اوفرات كابوي وياا تيشرت احمر وهمه ثنينهم شعرهم طويل واسود نازل على عيونهم منظهرهم يخبل جد وبدون مبالغه جهالي آيه من الجمال بس الي حيموتني خديداتهم ذني جريتهم ادغدع بيهم وابوس اوف اوف عسل عسل دبسززيه يضحكون اباوع اجه فهد من بعيد يمشي حبيبي فدوه اروح لطوله رغم مرت سنين على زواجنه بس ابد محسيت بيها عبالك البارحه تزوجنه ... كامو جوان ومروان يركضوله اباوعله شالهم واجه كعد ...تقبل الله حبيبي  

        

          

                

فهد : منا ومنج يروحي هاا صليتي 

غنى : اي صليت وزورت الجهال وطلعت كعدت هنا 

مروان : بابي عم 

جوان : بابي فدفد عم عم 

فهد : هههه صار انعللكم ابو العم عم هسه نروح نتعشه بس خلي نكعد شويه خوش 

مروان وجوان : خوس 

فهد : يله بوسه بوسه 

غنى : اباوعلهم شلون يبوسون بفهد يموتون عليه وهو مخبل بيهم بحياتي ما شايفه ابو يحب جهاله لهالدرجه والله مداريهم حتى اكثر مني اباوع عليهم  والابتسامه ماليه وجهي اروحلهم فدوه شكد احبهم اباوع عافو فهد واجو باسوني حضنتهم بعد كلبي ابتعدت ابوس بخدودهم الجنهن طماطات من الحمار صدقه ماماتي شنووو انتو

فهد : بابتسامه عوفيهم خلي يلعبون 

غنى : عفتهم راحو يلعبون باوعت لفهد شبيك 

فهد : انتي ليش هالكد حلوه 

غنى : بخجل عيونك الحلوه 

فهد : مو احلى من عيونج 

غنى : احم صليت 

فهد : اي صليت وقريت قران اليوم جنت ناوي اصوم بس عندي دوام والدنيا حاره ماكدرت 

غنى : اباوعله سبحان الله قبل كم سنه جنت اتوسل بي يصوم وهسه التزم بشكل مو طبيعي صلاته بوكتها ويصوم رجب وشعبان وياي والقران ختمه فوك العشرين مره كل هذا كام يسوي من ذات نفسه بس مع هذا بقه على طبيعته هم لسانه باذر بس احبه 

فهد : شبيج تباوعيلي شتردين 

غنى : تذكر قبل سنين شلون جنت تشلع كلبي على الصلاه والصوم 

فهد : الحمدلله تغيرت وبفضلج باوعتلها ... تدرين اني اشكر المستشفى لان خلتني التقي بيج لاول مره 

غنى : الكاظم  

فهد : شنو 

غنى : اول مره التقينه بيها هي هنا بالكاظم 

فهد : هاي شوكت 

غنى : ابتسمت تذكر من مره جنت جاي لهنا واجيت تنطي فلوس لفقيره و وكعن منك واجت بنيه انطتهن الك بالعلامه جنت لابس زيتوني 

فهد : صفنت مسترجع ذاكرتي 

: عفواااا اخويه .... هاي الفلوس وكعن منك 

غنى : هاا تذكرت 

فهد : ابتسمت اي تدرين ولا ابالي كل عبالي اول مره شفتج بيها بالمستشفى تالي طلعت صدفتنه هنا ... ويا محلاها من صدفه تدرين اعشق هاي الصدفه وكل صدفه جمعتني بيج 

غنى : واني اعشق النفس لو طلع منك ... اني مهووسه بتفاصيلك 

فهد : لزمت ايدها احبج لان غيرتيني تدرين من يوم الشفتج واني ذنوبي على قيد الغفران واكبر دليل انو ما جاي اشوف غير الراحه وهاي علامه على انو الله سامحني   

غنى : ابتسمنا وعيونه على جهالنه ايده بايده وكلبي حاضن كلبه جهالنه كدامنه اجمل حياة ممكن اعيشها هي بحضن فهد وجهالي الله يحفظهم الي وميحرمني منهم .... فهد احبك 

فهد : اعشقك 

نترك فهد وغنى ونسد الباب طالعين من حياتهم لهنا واكون ختمت وياكم روايه ذنوب على قيد الغفران فهد طفل عانى من التعذيب والتعنيف المستمر والمكثف بطفولته وهالشي ولد منه انسان عنيف صعب خارج عن السيطره انسان خطاء هرب من واقعه المرير لاجئ لكل انواع المعاصي والمحرمات ليرضي نفسه عانه هواي بحياته بمرحله الطفوله تبعتها مرحله الشباب والمسوؤليه ولكن! شاء الله ان يظهر في حياته انسانه صافيه ونقيه حتى تغيره تكونله صدر احتواء ويكونلها سند يعوضها عن كل الي شافته ومن يوم الي دخلت هي لحياته صارت ذنوبه على قيد الغفران سبحان الي يهدي من يشاء بغير حساب 

اختم وياكم هالروايه بالعديد من القبل تسبقها ذرات من الحزن لغيابي عنكم اتمنى اكون بهالروايه خليت بصمه حلوه بكلبكم وياريت لو كنت خفيفه الضلعليكم اتمنالكم الفرح والسعاده والحب ورضاء الله واعتذر على كولشي بدر مني بقصد او بغير قصد والي مزعتله منكم خلي يسامحني لو ضاج مني بتصرف خارج عن ادراكي والي يحبني خلي يندعيلي  

احبكم ..... اختكم براء ❤