رواية ذنوب على قيد الغفران الفصل السابع و الستون 67 - بقلم براء
السابع والستون
فهد : كاعد على اعصابي صار نص ساعه من دخلو ولحد الان ماطلعو .... ياربي دخيلك كون ماكو شي حسيت بأيد تطبطب على ايدي عرفتها امي
ايمان : شبيك يمه ليش وجهك اصفر وحلك ابيض
فهد : خايف
ايمان : لتخاف يمه تفائل شجاك راح توكع
فهد : شلون اتفائل وهي بنص الموت هسه كلبها تعبان وراح تجيب ثنين وضربوها بنج وممكن البنجر يأثر عليها كل هالاحتمالات تخليني دربي ما اشوفه باوعتلها يمه اني اخاف اخسرها
ايمان : اسم الله يمه ليش هيج تحجي كول يا الله شبيك ترجف هاي عود انت السبع الميخاف من شي والي محد يكدر يكله على عينك حاجب يرجف على عمليه بسيطه
فهد : بهدوء حتى لو كانت بسيطه تره الجوه مرتي وجاي تصارع حتى تجيب قطعتين من روحي اني عائلتي كلها جوه مرتي وجهالي معرضين للخطر بسبب وضع غنى الصحي
ايمان : ان شاءالله ماكو شي صلِ على محمد
فهد : اللهم صلِ على محمد وال محمد ....ضليت كاعد ولازم كلبي احس روحي تريد تطلع خايف وهاي اول مره اخاف لدرجه بودي ابجي من الخوف يا رب العرش العظيم دخيلك مرتي وجهالي بأمانتك
اروى : شو طولو شوكت يطلعون
ايمان : شبيكم يايمه قابل جاي تلعب هي عمليه هاي
نرجس : بنات خلي نقره فاتحه لقضاء حاجه وتسهيل ولاده غنى
غسق : اي والله
ام صالح : يادافع البلاء ادفع البلاء عن حفيدتي وجهالها دخيلك ربي طمعانين بكرمك وقدرتك الهي
فهد : كمت افتر بالممر وعيني على الساعه مر وقت طويل وماطلعو تنهدت اباوع لغرفه العمليات تنفتح ويطلعن الممرضات يركضن ... شكو احاجيهن ميردن مووووو احجييييي وياااااجن
: المريضه جاي تنزفر بشكل رهيب لازم نجيبلها دم الوضع خرج عن السيطره
فهد : لا الهي لا اني طلبتها منك هي وجهالي لتفجعني بيهم
نرجس : بدموع سوده عليه ربي دخيلك كومها بالسلامه
ايمان : اباوعله الدموع ترست عيونه يمه سوده عليه شحاله على مرته وجهاله
فهد : شويه واجن الممرضات يركضن وجايبات الدم وياهن دخلن لغرفه العمليات وهم بعد ماطلعن كعدت وحيلي مهدود .... ميهمني شي اهم شي مرتي ربي انقذلي غنى ماعندي غيرها هاي تؤم روحي وحبيبتي لو صار عليها شي اني انتهي الهي ... اباوع صارلهن ساعات وماطلعن غير يفضنها بنات الكلب احتركت ابهاتجن يا كح...... ضليت كاعد على اعصابي لحد ما طلعت الدكتوره ركضنالها كلنه هاا دكتوره بشري
الدكتوره : الف مبروك شرفو التوأم الحلو على الدنيا وامهم وضعها استقر الحمدلله الي صار اليوم معجزه جنه على وشك انو نخسر المريضه بسبب كثرت النزف الي تعرضتله بس الحمدلله كدرنه نسيطر على الوضع
فهد : زين شوكت اكدر اشوفهم
الدكتوره : حاليا راح ننقل المريضه لغرفه خاصه والجهال هسه يجيبوهم بس وين ملابسهم
اروى : ذني عندي تعاي نرجس نروح وياهم
فهد : دكتوره غنى وضعها زين
الدكتوره : والله زينه والحمدلله والشكر استقر وضعها بقه بس تكعد من البنج
فهد : تنهدت براحه احس ماي بارد ونزل على كلبي من حجت سمعت صوت امي وبيبيه غنى يهلهلن
ايمان : كللللوووش الحمدلله على سلامه مريتك يمه
اروى : الحمدلله على سلامتهم حبيبي
فهد : الله يسلمجن
غسق : يتربون بعزك خويه والحمدلله على سلامه نونه
ام صالح : كرت عينك
فهد : رحم الله والديجن
بلسم : يايييي متشوقه اشوفهم
شهد : حتى اني متشوقه اشوفهم يله هسه يجيبوهم
فهد : واكف بباب غرفه العمليات اباوع طلعوها نايمه حبيبتي الحمدلله ربي طلبتك للمره الثانيه ومارديتني خجلان من كرمك وعطائك ربي دخلوها للغرفه ودخلن الدكتوره والممرضات وياها شويه ودخلنه وراهن اجيت وكفت يم راسها ياروحي نايمه ومتدرين الدنيا طشت لو رشت عايفتني من ساعات ابو ابويه استلك دنكت بست راسها بعمق ولاول مره ما اهتم اذا احد موجود ابتعدت وكعدت
ايمان : هاا يمه ارتاحيت و ورد وجهك
فهد : تنهدت الحمدلله ... باوعتلها وين جهالي
ايمان : هسه يجيبوهم راحت نرجس واروى وياهم لتخاف ثواني وهمه هنا
فهد : اباوع الكل ملتم على غنى من بنات عمامي لخواتي لاهلها لعد شكد هي انسانه زينه بحيث الاغلبيه يحبوها ويعزوها .... خلصت من سالفه ولاده غنى ودخلت بالسالفه الثانيه جهالي اريد اوشوفهم احس روحي مفرفحه تريدهم ... ضليت كاعد وصافن على لاشيئ سمعت صوت البنات
شهد : اجو اجو جابوهمممم
فهد : اباوع دخلو مثل العربانات الصغار ما مبين منهن شي كمنه كلنه التمينه عليه اباوع ثنين جهال صغار وناعمين الى درجه واحد مكمطي وملبسي وردي و والثاني نيلي عرفت ام الوردي بتي وابو النيلي ابني ابتسمت بفرح واحس الدنيا ما لامتني
غسق : اوي يمه بعد كلبي كزكزت عليهم شهالجمال هذا
ام صالح : اللهم صلِ على محمد ... الله يحفظهم ويبعد عنهم كل شر بعد كلبي جنهم امهم النعومه والهدوء
ايمان : يتربون بعزك بعد كلبي وينطيك طول العمر وتكبرهم وتزوجهم بأيدك
فهد : بهدوء ما ازوجهم ذوله حتى طلعه ما اخليهم يطلعون دنكت بستهم على كيفي من كد ما جلدهم ناعم خفت لا ينجرحون ابتعدت اباوعلهم واحس عيني متشبع ... بس اريد اعرف اني شمسوي حتى الله ينطيني مره زينه شريفه وحبابه وجميله وتعبدني عبادع ويرزقني منها توم ولد وبنيه معقوله اني مسوي شي زين لهالدرجه حتى الله يرزقني كل هالرزق لو هاي لان غنى زينه الله جاي يكافئها
ورده : كعدوهم حبابين
نرجس : ولج شنكعدهم عوفيهم همه يكعدون وحدهم
ورده : ياجماعه يصير اعضهم
اروى : شتعضين ولج
ورده : انتحبت ولج متشوفيهم شلووون ناعمين تحسيهم كيكه لزمي لزمي وجهم يييييبووو والعباس ما اتحمل بعد
ملك : هههه حقج والله شكلهم كلش لطيف خاصه همه ثنين مو واحد ويتشابهون
فهد : همه يحجون ومخبوصين واني عيني عليهم عيوني ماجاي تشبع اباوعلهم وكأن كدامي كنز شعور بداخلي صحى ما اكدر اوصفه خوف على فرح على مسوؤليه ما اعرف شنو هو بس الي اعرفه انو من طاحت عيني عليهم وهمه اخذو قطعه من كلبي وختمو عليه ورغم اول مره اشوفهم بس حسيت روحي حبيتهم لدرجه انو ردت اخفيهم ولا اخلي واحد يشوفهم
غنى : بخفوت اه
فهد : كمت بسرعه رايح يمها هاا حبيبي
غنى : فهد
فهد : يمج حبيبي تسمعيني
غنى : لتكعد يم بتول هاي متستحي
فهد : ابتسمت
ايمان : شجاي تكول يمه
فهد : هيج يمه ... رجعت باوعتلها خرب يومجن النسوان حتى وانتن مبنجات توصن رجولتجن يبتعدون عن النسوان
غنى : لتحاجيها فهد خلي تولي
فهد : هههه صار .... ضلت تهذي وتحجي شاطي باطي وذني يضحكن عليها
شهد : وخرو وخرو خلي اصورها
فهد : لا لتصوريها كعدي
شهد : خلينه نوثق هالشي ما اراوي لاحد والله
فهد : بهدوء كلت لا لحد تصور اي شي
ايمان : خلص بكيفك يمه
فهد : ضلينه كاعدين يمها لحد ما انتهى مفعول البنج منها وكعدت اول ماصحت نزلت دموعها
غنى : بألم ااخ يمه بطني
ام صالح : الحمدلله على سلامتج حبيبه كومن يمه صيحن للدكتوره خلي تنطيها مسكن
اروى : هسه اصيحلها
فهد : اجت الممرضه انطتها مسكن وكالت هسه يهدئ جسمها .... وفعلا ماطولت حوالي دقايق وبدت تصحصح وتستوعب كلشي حواليها
غنى : فتحت عيوني اباوع الدنيا غواش فتحتهن وسديتهن اكثر من مره ياله وضحتلي الصوره احس اكو فراغ بداخلي والثكل الي على بطني ماهو يمه وين جهالي باوعت لفهد ... بدموع وين جهالي فهد
فهد : هذوله وياهم حبيبتي نايمين لتخافين عليهم ... لزمت ايدها الحمدلله على سلامتج ياروحي
غنى : بهدوء الله يسلمك حبيبي اباوع لخاله ايمان اجت بوستني هي والبنات
ايمان : الحمدلله على سلامتج يمه
غنى : الله يسلمج خاله الكل تحمدلي بالسلامه وكعدو ...فهد اريد اكعد
فهد : اي هسه رفعت جربايتها وخليت مخده وره ظهرها مرتاحه
غنى : اي ... جيبو الجهال خلي اشوفهم ... راح جاب واحد منهم فهد اباوع هاي البنوته لان ملبسيها وردي شلتها بأديه بس باوعتلها نزلت دموعي نورتيني يماما نورتي حياتي يروحي رفعتها بايستها ياعمري ريحتها تخبل حضنتها ومابودي اعوفها اباوعلها فتحت عيونها وتباوعلي يا روحي تعرفين امج انتي هاا يكلبي حسيتي على ماما تريد تشوفج مو
فهد : وكفت يمها اباوع لبتي سبحان الخلقها ايه من الجمال
غسق : شراح تسموها
فهد : البنيه امها تسميها واني اسمي الولد احنه هيج متفقين
ايمان : شراح تسميها يمه
غنى : باوعتلها حسميها جوان
ام صالح : شهالاسم المرعبل هذا هاي الاسماء كلها فاطمه نور حليمه سليمه ما لكيتي غير هالاسم
فهد : حليمه ؟ سليمه ؟ طفله مواليد سنه حديثه تردينه نسميها سليمه او حليمه صدك تحجين حجيه
ام صالح : اي واذا شكو بيها
غسق : والله سوالفج يحجيه
شهد : الاسم يخبل عود اذا جبت اني هم اسمي جوان
ايمان : الله يكومج بالسلامه حبيبتي
ملك : صدك غنى شنو معنى اسم جوان
غنى : ابتسمت اله معناوين الاول ورده الربيع والثاني نهر من انهار الجنه
ايمان : يخبل جوان بيبي يمه اروح سبع فدوات لهالعيون
غنى : ههه شوفي شلون تباوع عبالك تفتهم
ايمان : هههه بعد كلبي هالعيون تفهم
فهد : ابتسمت حبيبه ابوها ذكيه من هسه
غنى : فهد جيب الولد اشوفه
فهد : شلت البنيه كبرت بأذنها اليمنه واليسره و انطيتها لامي رحت اخذت ابني من سريره شلته
غنى : اخذته منه ... يشبه جوان بس هذا ولد يروحي حبيب ماما نورت ياسندي وسند اختك بسته وشميته مثل اخته نزلت دموعي غصب عني احس روحي الحاضنتهم مو اديه وخفت بهاللحظه لا اموت مثل امي واعوفهم طلبت واني بهالشده الله يكول بعمري ويخليني لاجلهم
ايمان : ليش تبجين حبيبتي
غنى : فرحانه كولش فرحانه
زمرد : ربي يجعل ايامج كلها فرح
الكل : آمين
غنى : شلت راسي منه مباوعه لفهد فهد حتسمي الطفل
فهد : ابتسمت مروان
غنى : فتحت عيوني صدوك
فهد : اي عجبني اسم خاله واريده على اسمه
ام صالح : نزلت دموعها مروان حبيبي سوده عليه حرموني من شوفتك الميخافون الله
زمرد : يمه لتكدرين البنيه الله يخليج ... عاشت ايدك خاله الاسم يخبل يتربى بعزك ان شاءالله ابو مروان الورده
غنى : باوعت للطفل مبتسمه مروان حبيبي ياترى من تكبر حتصير بلسم لجروحي وتعوضني عن فقدان خالك يروحي بوسته وحضنته
ورده : يمه جوان ليش تسوي هيج بحلكها
ايمان : هههه هاي جوعانه بعد كلبي تريد ترضع غنى يمه راح اشربهم مميات ومن تحسين نفسج كادره ترضعيهم رضعيهم تره حليبج افيدلهم من التعليب
غنى : جيبيهم خاله مبيه شي اكدر ارضعهم والبنج انتهى مفعوله ماكو مشكله ... طلعت صدري ونزلت الشال عليه خاف يجي واحد خليته للاحتياط رضعت مروان لان بحضني اباوعله سوده عليه شلون جوعان
غسق : تقربت بوستها حبيبتي الحمدلله على سلامتج ربي يحفظج ويحفظ هالكمرات العندج تعذرينه صار لازم نروح وبس تطلعين من المستشفى احنه اول الوادم نجي
غنى : براحتكم حبيبتي تنورون بأي وقت ... طلعو اهلي وبيت عم فهد اجه حارث خذاهم وخاله ايمان خابرت علي يجي على البنات وفعلا اجه علي هو ومنذر طايرين
علي : ما شاءالله ماشاءالله ولكم شلون متحملين متاكلوهم
منذر : الف مبروك يتربون بعزك حبيبي فهد الله يخليهم الك
فهد : الله يخليك ابو سالم الورده
علي : شسميتوهم
فهد : جوان ومروان
علي : تخبل اسمائهم وحيل موالمه عليهم ... شوكت الله يرزقني مثلهم
فهد : ان شاءالله يرزقك بالاحسن منهم
علي : ان شاءالله
غنى : انقهرت على اروى ونرجس وحده كامت تباوع للثانيه خطيه شهد تزوجت وحملت وهنه لسه محملن ناس تكول عدهن تابعه مدري شنو وناس تكول صابتهن خرعه من موتت اخو الحجيه وبعد ميحبلن اشكال الحجي طلعو عليهم وهنه ساكتات خطيه راحن للدكتوره طلع كولشي مابيهم بس لسه الله مرزقهن والله قبل لا ادخل للعمليات سمعت بوكت الطلوكه اذا تطلب الولاده طلب يتحقق واني دعيت الله يرزقهن الذريه ويرزق كلمن محروم منها
طلعو الولد همه والبنات وبقت بس خاله ايمان وانغام مرت منذر هالبنيه لو شما اسوي ما اكدر اجازيها دارتني من سويت حادث ومن حبلت جانت تجي تساعدني بالبيت ومرات خطيه تطبخ وتجيني تكلي اكلي تغذي لتكومين لتتحركين وهسه من جبت هم ماعافتني الله ينطيها العافيه
فهد : يمه رجعي انتي وانغام اني موجود
ايمان : لا يمه مرتك متكدر وحدها والدكتوره كالت كون تبقه يومين لان بعده جرحها ما التئم ويرادلها راحه وكون يومين متتحرك لمن وضعها بستقر خوما نعوفك انت وياها يومين
فهد : اني لراحتكم تردن تبقن بكيفجن ... كمت يله اني اروح اسجل الجهال واجيبلكم عشه واجي عفتهم وطلعت
انغام : شلون تحسين نفسج هسه
غنى : انطيت مروان لخاله واخذت جوان ارضعها لا الحمدلله الالم خف احسن نفسي احسن شويه
انغام : الله يساعدج اني وحده وشلت حالتي انتي ثنين تلكيج متي
غنى : على التعب الي شفته بيهم اجيت اموت بس والله يا انغام من شافتهم عيني حسيتهم يستاهلون اتعب على حسابهم هالتعب ...بست جوان يمه اريد اكلهم كد ما حابتهم
ايمان : ابتسمت كلنه مثلج ندك ونلطم بالحباله ومن نشوفهم ننسى كل الم وتعب شفنا بيهم فطره الامومه الله زرعها بينه بعد
غنى : هزيت راسي حاضنه جوان يمه فدوه اروح لليوم الخلاني امكم خليتها ترضع لحد ما نامت هي ومروان شالتها خاله خلتها بسريرها ... رجعت راسي على المخده رغم جنت تعبانه بس عندي واهس اشيلهم واخليهم بحضني اصلا نسيت نفسي مسويه عمليه غمضت عيوني واخذتني النومه وين ياله كعدت نص الليل شفت انغام وخاله نايمات وفهد كاعد يم راسي .... فهد
فهد : بهدوء هاا حبيبي كعدتي
غنى : اي
فهد : تقربت بست اديها شلون صرتي هسه
غنى : الحمدلله زينه باوعت لسراير جهالي مكعدو بعد
فهد : لا من رضعتيهم لسه همه جروها نومه وياج مبين عليهم هادئين
غنى : طالعين على ابوهم
فهد : يعني ابوهم هادئ
غنى : شتكول انت
فهد : بست شفايفها اني اكول طالعين على امهم هادئين وينحبون
غنى : ابتسمت اوف فهد جنت شايله هم لا اموت واعوفهم
فهد : كون افرك حلكج لمن اخلي يخر دم حجايتج قبل لتدخلين للعمليات ضلت ترن بأذني دربي ماكمت اشوفه كل ساعه اكول ليش كالت هيج وخاف راح يصيرلها شي والله هذا كلبي راد يطلع من حلكي
غنى : لزمت ايده حبيبي اني داخله عمليات ومااعرف اذا راح انجو لو الله كاتبلي اموت بهاليوم فكلت اوصيك على جهالي قبل لا ادخل لان اني مااعرف مصيري والحمدلله الله كتبلي عمر
فهد : الحمدلله والشكر
غنى : اكول حبيبي
فهد : كولي
غنى : حباب اني جوعانه
فهد : ابتسمت يخسه الجوع هسه اجيبلج العشه
غنى : اباوعله راح فتح علاكه وطلع منها طاسه سفري وفتحت علبه جابها خلاها بمثل الصينيه
فهد : هاج جبتلج شوربه ومشاوي ومعلاك حتى تعوضين الدم الخسرتي ومن تكملين اكلي تمر على حساب الرضاعه ما اريد جهالي يجوعون
غنى : وانت شمعرفك بكل هذا
فهد : ليش غير هو من وراج اني صرت خبره بالحوامل اعرف شنو الصحي الهم وشنو الموصحي النومه المناسبه والملابس المريحه للطفل حتى اوضاع ال..... المناسبه الج حفظتهن
غنى : باوعت عززه فهد صوتك
فهد : نايمات ميسمعن يله اكلي خلي اروح اكعد يم جهالي ولد الكلب يخبلون
غنى : ضحكت والله تحير انت هذا مدح لو ذم
فهد : مادام سمعتيني كتلهم ولد الكلب يعني مدح دنكت بوستهم وهمه نايمين اروح فدوه لهالنومه
غنى : ابتسمت ماخذه الخاشوكه اكلت لمن شبعت واجه هو شالهن خطيه انشلع كلبه 9 اشهر هو الراحه مشايفها من ورايه
بقيت يومين بالمستشفى وطلعت بيومها فهد سوه غده وذبح ذبيحتين على سلامتي وسلامه الجهال ما خله واحد معزمه اهل ابويه اجو هم وخوال وخالات فهد هم اجو من البصره ... اني ضليت بغرفه خاله لان ما اكدر اصعد فوك كل ساعه جاي احد وخوما الناس تصعدلي فوك هم زحمه وخطيه خاله كعدت بغرفه ورده .... مر اسبوع على ولادتي مثل الورد البيت مخبوص بجوان ومروان وفهد خو هذا عالم ثاني يضوج من واحد يلزمهم لو يشيلهم ميكدر يحجي بس يبقه على اعصابه .... اباوعله محللهم ثنينهم وكاعد كدامهم يسولف وياهم
فهد : باباتي حبايبي هاا ولد الكلب تعرفوني اباوعلهم يباوعولي عبالك جاي يفتهمون شكول ولكم والحسن راح اكلكم لتباوعولي هيج
غنى : ههه خبلتهم حبيبي شجاك
فهد : مالج علاقه حبيبي اني وجهالي .... بوستهم وشميتهم خرب يومهم ماخذين ريحه امهم ... باوعتلهم يحركون بأديهم ورجليهم ضحكت تدرين اني ما مصدك صار عندي جهال ومو واحد ثنين لا ويخبلون
غنى : ابتسمت تحبهم
فهد : روحي صارت بيهم اريد اضمهم عن الدنيا كلها من شفتهم واني قسمت بالله ما اخليهم يشوفون يوم واحد موزين بحياتهم واحاول قدر الامكان ابعد عنهم كلشي يأذيهم
غنى : اباوعله شلون يحجي وعيونه عليهم .... من شفته هيج حسيت الله انطه جهالي هديه اول ما اجو والي ابو حنون يحبهم لهالدرجه ... ضلينه اليوم كله بالغرفه فهد مكابلهم وكاعد وهمه فد لوتيه من يشوفو يسوون حركات بوجهم اله وهو يتخبل عليهم ويصيح ولد الكلب لتسوون هيج تردون تموتوني
ثاني يوم الكل متجمع بغرفتي وسمعنه باب البيت يتكسر طلع علي يركض فتح الباب اباوع دخل منذر يركض ويلهث ويبجي كامله الكل
فهد : شبيك شبيك
منذر : لارد
فهد : هسسسه غير يبطل ينوح ويحجييي
منذر : فهد الله يخليك ساعدنيي اميي ضربتها جلطه وانشلتت
الكل : شنووو
************
يتبع
- يتبع الفصل التالي اضغط على (ذنوب على قيد الغفران) اسم الرواية